៥. បញ្ចមបណ្ណាសកំ

(២១) ១. កិមិលវគ្គោ

១. កិមិលសុត្តវណ្ណនា

២០១. បញ្ចមស្ស បឋមេ កិមិលាយន្តិ ឯវំនាមកេ នគរេ. និចុលវនេតិ មុចលិន្ទវនេ. ឯតទវោចាតិ អយំ កិរ ថេរោ តស្មិំយេវ នគរេ សេដ្ឋិបុត្តោ សត្ថុ សន្តិកេ បព្ពជិត្វា បុព្ពេនិវាសញាណំ បដិលភិ. សោ អត្តនា និវុត្ថំ ខន្ធសន្តានំ អនុស្សរន្តោ កស្សបទសពលស្ស សាសនោសក្កនកាលេ បព្ពជិត្វា ចតូសុ បរិសាសុ សាសនេ អគារវំ ករោន្តីសុ និស្សេណិំ ពន្ធិត្វា បព្ពតំ អារុយ្ហ តត្ថ សមណធម្មំ កត្វា អត្តនោ និវុត្ថភាវំ អទ្ទស. សោ ‘‘សត្ថារំ ឧបសង្កមិត្វា តំ ការណំ បុច្ឆិស្សាមី’’តិ ឯតំ ‘‘កោ នុ ខោ, ភន្តេ’’តិអាទិវចនំ អវោច.

សត្ថរិ អគារវា វិហរន្តិ អប្បតិស្សាតិ សត្ថរិ គារវញ្ចេវ ជេដ្ឋកភាវញ្ច អនុបដ្ឋបេត្វា វិហរន្តិ. សេសេសុបិ ឯសេវ នយោ. តត្ថ ចេតិយង្គណាទីសុ ឆត្តំ ធារេត្វា ឧបាហនា អារុយ្ហ វិចរន្តោ នានប្បការញ្ច និរត្ថកកថំ កថេន្តោ សត្ថរិ អគារវោ វិហរតិ នាម. ធម្មស្សវនគ្គេ បន និសីទិត្វា និទ្ទាយន្តោ ចេវ នានប្បការញ្ច និរត្ថកកថំ កថេន្តោ ធម្មេ អគារវោ វិហរតិ នាម. សង្ឃមជ្ឈេ ពាហាវិក្ខេបកំ នានត្តកថំ កថេន្តោ ថេរនវមជ្ឈិមេសុ ច ចិត្តីការំ អករោន្តោ សង្ឃេ អគារវោ វិហរតិ នាម. សិក្ខំ អបរិបូរេន្តោ សិក្ខាយ អគារវោ វិហរតិ នាម. អញ្ញមញ្ញំ កលហភណ្ឌនាទីនិ ករោន្តោ អញ្ញមញ្ញំ អគារវោ វិហរតិ នាម. ទុតិយំ ឧត្តានត្ថមេវ.

៣. អស្សាជានីយសុត្តវណ្ណនា

២០៣-២០៤. តតិយេ អជ្ជវេនាតិ ឧជុភាវេន អវង្កគមនេន. ជវេនាតិ បទជវេន. មទ្ទវេនាតិ សរីរមុទុតាយ. ខន្តិយាតិ អធិវាសនក្ខន្តិយា. សោរច្ចេនាតិ សុចិសីលតាយ. ភិក្ខុវារេ អជ្ជវន្តិ ញាណស្ស ឧជុកគមនំ. ជវោតិ សូរំ ហុត្វា ញាណស្ស គមនភាវោ. មទ្ទវន្តិ សីលមទ្ទវំ. ខន្តីតិ អធិវាសនក្ខន្តិយេវ. សោរច្ចំ សុចិសីលតាយេវ. ចតុត្ថេ បញ្ច ពលានិ មិស្សកានិ កថិតានិ.

៥. ចេតោខិលសុត្តវណ្ណនា

២០៥. បញ្ចមេ ចេតោខិលាតិ ចិត្តស្ស ថទ្ធភាវា, កចវរភាវា, ខាណុកភាវា. សត្ថរិ កង្ខតីតិ សត្ថុ សរីរេ វា គុណេ វា កង្ខតិ. សរីរេ កង្ខមានោ ‘‘ទ្វត្តិំសវរបុរិសលក្ខណបដិមណ្ឌិតំ នាម សរីរំ អត្ថិ នុ ខោ នត្ថី’’តិ កង្ខតិ, គុណេ កង្ខមានោ ‘‘អតីតានាគតបច្ចុប្បន្នជាននសមត្ថំ សព្ពញ្ញុតញ្ញាណំ អត្ថិ នុ ខោ នត្ថី’’តិ កង្ខតិ. វិចិកិច្ឆតីតិ វិចិនន្តោ កិច្ឆតិ, ទុក្ខំ អាបជ្ជតិ, វិនិច្ឆេតុំ ន សក្កោតិ. នាធិមុច្ចតីតិ ឯវមេតន្តិ អធិមោក្ខំ ន បដិលភតិ. ន សម្បសីទតីតិ គុណេសុ ឱតរិត្វា និព្ពិចិកិច្ឆភាវេន បសីទិតុំ អនាវិលោ ភវិតុំ ន សក្កោតិ. អាតប្បាយាតិ កិលេសសន្តាបកវីរិយករណត្ថាយ. អនុយោគាយាតិ បុនប្បុនំ យោគាយ. សាតច្ចាយាតិ សតតកិរិយាយ. បធានាយាតិ បទហនត្ថាយ. អយំ បឋមោ ចេតោខិលោតិ អយំ សត្ថរិ វិចិកិច្ឆាសង្ខាតោ បឋមោ ចិត្តស្ស ថទ្ធភាវោ ឯវមេតស្ស ភិក្ខុនោ អប្បហីនោ ហោតិ.

ធម្មេតិ បរិយត្តិធម្មេ ច បដិវេធធម្មេ ច. បរិយត្តិធម្មេ កង្ខមានោ ‘‘តេបិដកំ ពុទ្ធវចនំ ចតុរាសីតិធម្មក្ខន្ធសហស្សានីតិ វទន្តិ, អត្ថិ នុ ខោ ឯតំ នត្ថី’’តិ កង្ខតិ. បដិវេធធម្មេ កង្ខមានោ ‘‘វិបស្សនានិស្សន្ទោ មគ្គោ នាម, មគ្គនិស្សន្ទំ ផលំ នាម, សព្ពសង្ខារបដិនិស្សគ្គោ និព្ពានំ នាមាតិ វទន្តិ, តំ អត្ថិ នុ ខោ នត្ថី’’តិ កង្ខតិ. សង្ឃេ កង្ខតីតិ ‘‘ឧជុប្បដិបន្នោ’’តិអាទីនំ បទានំ វសេន ‘‘ឯវរូបំ បដិបទំ បដិបន្នោ ចត្តារោ មគ្គដ្ឋា ចត្តារោ ផលដ្ឋាតិ អដ្ឋន្នំ បុគ្គលានំ សមូហភូតោ សង្ឃោ នាម អត្ថិ នុ ខោ នត្ថី’’តិ កង្ខតិ. សិក្ខាយ កង្ខមានោ ‘‘អធិសីលសិក្ខា នាម អធិចិត្តអធិបញ្ញាសិក្ខា នាមាតិ វទន្តិ, សា អត្ថិ នុ ខោ នត្ថី’’តិ កង្ខតិ. អយំ បញ្ចមោតិ អយំ សព្រហ្មចារីសុ កោបសង្ខាតោ បញ្ចមោ ចិត្តស្ស ថទ្ធភាវោ កចវរភាវោ ខាណុកភាវោ.

៦. វិនិពន្ធសុត្តវណ្ណនា

២០៦. ឆដ្ឋេ ចេតសោវិនិពន្ធាតិ ចិត្តំ វិនិពន្ធិត្វា មុដ្ឋិយំ កត្វា វិយ គណ្ហន្តីតិ ចេតសោវិនិពន្ធា. កាមេតិ វត្ថុកាមេបិ កិលេសកាមេបិ. កាយេតិ អត្តនោ កាយេ. រូបេតិ ពហិទ្ធារូបេ. យាវទត្ថន្តិ យត្តកំ ឥច្ឆតិ, តត្តកំ. ឧទរាវទេហកន្តិ ឧទរបូរំ. តញ្ហិ ឧទរំ អវទេហនតោ ឧទរាវទេហកន្តិ វុច្ចតិ. សេយ្យសុខន្តិ មញ្ចបីឋសុខំ, ឧតុសុខំ វា. បស្សសុខន្តិ យថា សម្បរិវត្តកំ សយន្តស្ស ទក្ខិណបស្ស វាមបស្សានំ សុខំ ហោតិ, ឯវំ ឧប្បន្នសុខំ. មិទ្ធសុខន្តិ និទ្ទាសុខំ. អនុយុត្តោតិ យុត្តប្បយុត្តោ វិហរតិ. បណិធាយាតិ បត្ថយិត្វា. សីលេនាតិអាទីសុ សីលន្តិ ចតុបារិសុទ្ធិសីលំ. វតន្តិ វតសមាទានំ. តបោតិ តបចរណំ. ព្រហ្មចរិយន្តិ មេថុនវិរតិ. ទេវោ វា ភវិស្សាមីតិ មហេសក្ខទេវោ វា ភវិស្សាមិ. ទេវញ្ញតរោ វាតិ អប្បេសក្ខទេវេសុ វា អញ្ញតរោតិ.

៧-៨. យាគុសុត្តាទិវណ្ណនា

២០៧-២០៨. សត្តមេ វាតំ អនុលោមេតីតិ វាតំ អនុលោមេត្វា ហរតិ. វត្ថិំ សោធេតីតិ ធមនិយោ សុទ្ធា ករោតិ. អាមាវសេសំ បាចេតីតិ សចេ អាមាវសេសកំ ហោតិ, តំ បាចេតិ. អដ្ឋមេ អចក្ខុស្សន្តិ ន ចក្ខូនំ ហិតំ, ចក្ខុំ វិសុទ្ធំ ន ករោតិ.

៩. គីតស្សរសុត្តវណ្ណនា

២០៩. នវមេ អាយតកេនាតិ ទីឃេន, បរិបុណ្ណបទព្យញ្ជនកំ គាថាវត្តញ្ច វិនាសេត្វា បវត្តេន. សរកុត្តិម្បិ និកាមយមានស្សាតិ ឯវំ គីតស្សរោ កាតព្ពោតិ សរកិរិយំ បត្ថយមានស្ស. សមាធិស្ស ភង្គោ ហោតីតិ សមថវិបស្សនាចិត្តស្ស វិនាសោ ហោតិ.

១០. មុដ្ឋស្សតិសុត្តវណ្ណនា

២១០. ទសមេ ទុក្ខំ សុបតីតិ នានាវិធំ សុបិនំ បស្សន្តោ ទុក្ខំ សុបតិ. ទុក្ខំ បដិពុជ្ឈតីតិ បដិពុជ្ឈន្តោបិ ឧត្តសិត្វា សលោមហំសោ បដិពុជ្ឈតិ. ឥមស្មិំ សុត្តេ សតិសម្បជញ្ញំ មិស្សកំ កថិតំ.

កិមិលវគ្គោ បឋមោ.

(២២) ២. អក្កោសកវគ្គោ

១. អក្កោសកសុត្តវណ្ណនា

២១១. ទុតិយស្ស បឋមេ អក្កោសកបរិភាសកោតិ ទសហិ អក្កោសវត្ថូហិ អក្កោសកោ, ភយទស្សនេន បរិភាសកោ. ឆិន្នបរិបន្ថោតិ លោកុត្តរបរិបន្ថស្ស ឆិន្នត្តា ឆិន្នបរិបន្ថោ. រោគាតង្កន្តិ រោគោយេវ កិច្ឆជីវិកាយាវហនតោ រោគាតង្កោ នាម.

២. ភណ្ឌនការកសុត្តវណ្ណនា

២១២. ទុតិយេ អធិករណការកោតិ ចតុន្នំ អធិករណានំ អញ្ញតរស្ស ការកោ. អនធិគតន្តិ បុព្ពេ អប្បត្តវិសេសំ.

៣. សីលសុត្តវណ្ណនា

២១៣. តតិយេ ទុស្សីលោតិ អសីលោ និស្សីលោ. សីលវិបន្នោតិ វិបន្នសីលោ ភិន្នសំវរោ. បមាទាធិករណន្តិ បមាទការណា. ឥទញ្ច សុត្តំ គហដ្ឋានំ វសេន អាគតំ, បព្ពជិតានម្បិ បន លព្ភតេវ. គហដ្ឋោ ហិ យេន យេន សិប្បដ្ឋានេន ជីវិកំ កប្បេតិ, យទិ កសិយា, យទិ វណិជ្ជាយ, បាណាតិបាតាទិវសេន បមត្តោ តំ តំ យថាកាលំ សម្បាទេតុំ ន សក្កោតិ, អថស្ស មូលំ វិនស្សតិ. មាឃាតកាលេបិ បាណាតិបាតំ អទិន្នាទានាទីនិ ច ករោន្តោ ទណ្ឌវសេន មហតិំ ភោគជានិំ និគច្ឆតិ. បព្ពជិតោ ទុស្សីលោ បមាទការណា សីលតោ ពុទ្ធវចនតោ ឈានតោ សត្តអរិយធនតោ ច ជានិំ និគច្ឆតិ. គហដ្ឋស្ស ‘‘អសុកោ អសុកកុលេ ជាតោ ទុស្សីលោ បាបធម្មោ បរិច្ចត្តឥធលោកបរលោកោ សលាកភត្តមត្តម្បិ ន ទេតី’’តិ ចតុបរិសមជ្ឈេ បាបកោ កិត្តិសទ្ទោ អព្ភុគ្គច្ឆតិ. បព្ពជិតស្ស ‘‘អសុកោ នាសក្ខិ សីលំ រក្ខិតុំ ពុទ្ធវចនំ គហេតុំ, វេជ្ជកម្មាទីហិ ជីវតិ, ឆហិ អគារវេហិ សមន្នាគតោ’’តិ ឯវំ អព្ភុគ្គច្ឆតិ.

អវិសារទោតិ គហដ្ឋោ តាវ ‘‘អវស្សំ ពហូនំ សន្និបាតដ្ឋានេ កោចិ មម កម្មំ ជានិស្សតិ, អថ មំ និគ្គណ្ហិស្សន្តិ វា, រាជកុលស្ស វា ទស្សន្តី’’តិ សភយោ ឧបសង្កមតិ. មង្កុភូតោ ច បតិតក្ខន្ធោ អធោមុខោ អង្គុដ្ឋកេន ភូមិំ កសន្តោ និសីទតិ, វិសារទោ ហុត្វា កថេតុំ ន សក្កោតិ. បព្ពជិតោបិ ‘‘ពហូ ភិក្ខូ សន្និបតិតា, អវស្សំ កោចិ មម កម្មំ ជានិស្សតិ, អថ មេ ឧបោសថម្បិ បវារណម្បិ ឋបេត្វា សាមញ្ញា ចាវេត្វា និក្កឌ្ឍិស្សន្តី’’តិ សភយោ ឧបសង្កមតិ, វិសារទោ ហុត្វា កថេតុំ ន សក្កោតិ. ឯកច្ចោ បន ទុស្សីលោបិ ទប្បិតោ វិយ ចរតិ, សោបិ អជ្ឈាសយេន មង្កុ ហោតិយេវ.

សម្មូឡ្ហោ កាលំ ករោតីតិ តស្ស ហិ មរណមញ្ចេ និបន្នស្ស ទុស្សីលកម្មំ សមាទាយ វត្តិតដ្ឋានំ អាបាថំ អាគច្ឆតិ. សោ ឧម្មីលេត្វា ឥធលោកំ បស្សតិ, និម្មីលេត្វា បរលោកំ. តស្ស ចត្តារោ អបាយា ឧបដ្ឋហន្តិ, សត្តិសតេន សីសេ បហរិយមានោ វិយ ហោតិ. សោ ‘‘វារេថ វារេថា’’តិ វិរវន្តោ មរតិ. តេន វុត្តំ – ‘‘សម្មូឡ្ហោ កាលំ ករោតី’’តិ. បញ្ចមបទំ ឧត្តានមេវ. អានិសំសកថា វុត្តវិបរិយាយេន វេទិតព្ពា.

៤. ពហុភាណិសុត្តវណ្ណនា

២១៤. ចតុត្ថេ ពហុភាណិស្មិន្តិ បញ្ញាយ អបរិច្ឆិន្ទិត្វា ពហុំ ភណន្តេ. មន្តភាណិស្មិន្តិ មន្តា វុច្ចតិ បញ្ញា, តាយ បរិច្ឆិន្ទិត្វា ភណន្តេ.

៥. បឋមអក្ខន្តិសុត្តវណ្ណនា

២១៥. បញ្ចមេ វេរពហុលោតិ បុគ្គលវេរេនបិ អកុសលវេរេនបិ ពហុវេរោ. វជ្ជពហុលោតិ ទោសពហុលោ.

៦. ទុតិយអក្ខន្តិសុត្តវណ្ណនា

២១៦. ឆដ្ឋេ លុទ្ទោតិ ទារុណោ កក្ខឡោ. វិប្បដិសារីតិ មង្កុភាវេន សមន្នាគតោ.

៧.បឋមអបាសាទិកសុត្តវណ្ណនា

២១៧. សត្តមេ អបាសាទិកេតិ អបាសាទិកេហិ កាយកម្មាទីហិ សមន្នាគតេ. បាសាទិកេតិ បសាទាវហេ បរិសុទ្ធសមាចារេ. អដ្ឋមនវមានិ ឧត្តានត្ថានេវ.

១០. មធុរាសុត្តវណ្ណនា

២២០. ទសមេ បញ្ចិមេ, ភិក្ខវេ, អាទីនវា មធុរាយន្តិ ឯកំ សមយំ ភគវា ភិក្ខុសង្ឃបរិវុតោ ចារិកំ ចរមានោ មធុរានគរំ សម្បាបុណិត្វា អន្តោនគរំ បវិសិតុំ អារភិ. អថេកា មិច្ឆាទិដ្ឋិកា យក្ខិនី អចេលា ហុត្វា ទ្វេ ហត្ថេ បសារេត្វា ជិវ្ហំ និល្លាលេត្វា ទសពលស្ស បុរតោ អដ្ឋាសិ. សត្ថា អន្តោនគរំ អប្បវិសិត្វា តតោវ និក្ខមិត្វា វិហារំ អគមាសិ. មហាជនោ ខាទនីយភោជនីយញ្ចេវ សក្ការសម្មានញ្ច អាទាយ វិហារំ គន្ត្វា ពុទ្ធប្បមុខស្ស ភិក្ខុសង្ឃស្ស ទានំ អទាសិ. សត្ថា តស្ស នគរស្ស និគ្គណ្ហនត្ថាយ ឥមំ សុត្តំ អារភិ. តត្ថ វិសមាតិ ន សមតលា. ពហុរជាតិ វាតបហរណកាលេ ឧទ្ធតេន រជក្ខន្ធេន បរិយោនទ្ធា វិយ ហោតិ. សេសំ សព្ពត្ថ ឧត្តានមេវាតិ.

អក្កោសកវគ្គោ ទុតិយោ.

(២៣) ៣. ទីឃចារិកវគ្គោ

១. បឋមទីឃចារិកសុត្តវណ្ណនា

២២១. តតិយស្ស បឋមេ អនវត្ថចារិកន្តិ អវវត្ថិតចារិកំ. សុតំ ន បរិយោទបេតីតិ យម្បិស្ស សុតំ អត្ថិ, តំ បរិយោទបេតុំ ន សក្កោតិ. សុតេនេកច្ចេន អវិសារទោ ហោតីតិ ថោកថោកេន សុតេន វិជ្ជមានេនាបិ ញាណេន សោមនស្សប្បត្តោ ន ហោតិ. សមវត្ថចារេតិ សមវត្ថិតចារេ. ទុតិយំ ឧត្តានត្ថមេវ.

៣-៤. អតិនិវាសសុត្តាទិវណ្ណនា

២២៣-២២៤. តតិយេ ពហុភណ្ឌោតិ ពហុបរិក្ខារោ. ពហុភេសជ្ជោតិ សប្បិនវនីតាទីនំ ពហុតាយ ពហុភេសជ្ជោ. ព្យត្តោតិ ព្យាសត្តោ. សំសដ្ឋោតិ បញ្ចវិធេន សំសគ្គេន សំសដ្ឋោ ហុត្វា. អននុលោមិកេនាតិ សាសនស្ស អននុច្ឆវិកេន. ចតុត្ថេ វណ្ណមច្ឆរីតិ គុណមច្ឆរី. ធម្មមច្ឆរីតិ បរិយត្តិមច្ឆរី.

៥-៦. កុលូបកសុត្តាទិវណ្ណនា

២២៥-២២៦. បញ្ចមេ អនាមន្តចារេ អាបជ្ជតីតិ ‘‘និមន្តិតោ សភត្តោ សមានោ សន្តំ ភិក្ខុំ អនាបុច្ឆា បុរេភត្តំ វា បច្ឆាភត្តំ វា កុលេសុ ចារិត្តំ អាបជ្ជេយ្យា’’តិ សិក្ខាបទេ (បារា. ២៩៤) វុត្តំ អាបត្តិំ អាបជ្ជតិ. រហោ និសជ្ជាយាតិអាទីនិបិ តេសំ តេសំ សិក្ខាបទានំ វសេន វេទិតព្ពានិ. ឆដ្ឋេ អតិវេលន្តិ អតិក្កន្តបមាណកាលំ. សត្តមំ ឧត្តានមេវ.

៨. ឧស្សូរភត្តសុត្តវណ្ណនា

២២៨. អដ្ឋមេ ឧស្សូរភត្តេតិ អតិទិវាបចនភត្តេ. ន កាលេន បដិបូជេន្តីតិ យាគុកាលេ យាគុំ, ខជ្ជកកាលេ ខជ្ជកំ, ភោជនកាលេ ភោជនំ អបចន្តា យុត្តប្បយុត្តកាលស្ស អតិនាមិតត្តា ន កាលេន បដិបូជេន្តិ, អត្តនោ ចិត្តេនេវ ទេន្តិ នាម. តតោ តេបិ តេសុ អត្តនោ គេហំ អាគតេសុ តថេវ ករោន្តិ. កុលបវេណិយា អាគតា ពលិបដិគ្គាហិកា ទេវតាបិ យុត្តប្បយុត្តកាលេន លាភំ លភមានាយេវ រក្ខន្តិ គោបយន្តិ បីឡំ អកត្វា. អកាលេ លភមានា បន ‘‘ឥមេ អម្ហេសុ អនាទរា’’តិ អារក្ខំ ន ករោន្តិ.

សមណព្រាហ្មណាបិ ‘‘ឯតេសំ គេហេ ភោជនវេលាយ ភោជនំ ន ហោតិ, ឋិតមជ្ឈន្ហិកេ ទេន្តី’’តិ មង្គលាមង្គលេសុ កាតព្ពំ ន ករោន្តិ. វិមុខា កម្មំ ករោន្តីតិ ‘‘បាតោ កិញ្ចិ ន លភាម, ខុទាយ បដិបីឡិតា កម្មំ កាតុំ ន សក្កោមា’’តិ កម្មំ វិស្សជ្ជេត្វា និសីទន្តិ. អនោជវន្តំ ហោតីតិ អកាលេ ភុត្តំ ឱជំ ហរិតុំ ន សក្កោតិ. សុក្កបក្ខោ វុត្តវិបល្លាសេន វេទិតព្ពោ.

៩. បឋមកណ្ហសប្បសុត្តវណ្ណនា

២២៩. នវមេ សភីរូតិ សនិទ្ទោ មហានិទ្ទំ និទ្ទាយតិ. សប្បដិភយោតិ តំ និស្សាយ ភយំ ឧប្បជ្ជតិ, តស្មា សប្បដិភយោ. មិត្តទុព្ភីតិ បានភោជនទាយកម្បិ មិត្តំ ទុព្ភតិ ហិំសតិ. មាតុគាមេបិ ឯសេវ នយោ.

១០. ទុតិយកណ្ហសប្បសុត្តវណ្ណនា

២៣០. ទសមេ ឃោរវិសោតិ កក្ខឡវិសោ. ទុជ្ជិវ្ហោតិ ទ្វិធា ភិន្នជិវ្ហោ. ឃោរវិសតាតិ ឃោរវិសតាយ. សេសទ្វយេបិ ឯសេវ នយោ.

ទីឃចារិកវគ្គោ តតិយោ.

(២៤) ៤. អាវាសិកវគ្គោ

១. អាវាសិកសុត្តវណ្ណនា

២៣១. ចតុត្ថស្ស បឋមេ ន អាកប្បសម្បន្នោតិ សមណាកប្បេន សម្បន្នោ. អភាវនីយោ ហោតីតិ វឌ្ឍនីយោ ន ហោតិ. ទុតិយំ ឧត្តានមេវ.

៣. សោភនសុត្តវណ្ណនា

២៣៣. តតិយេ បដិពលោតិ កាយពលេន ច ញាណពលេន ច សមន្នាគតត្តា បដិពលោ.

៤. ពហូបការសុត្តវណ្ណនា

២៣៤. ចតុត្ថេ ខណ្ឌផុល្លន្តិ បតិតដ្ឋានញ្ច ភិន្នដ្ឋានញ្ច. បដិសង្ខរោតីតិ បដិបាកតិកំ ករោតិ. អារោចេតីតិ ឥទំ បវារិតកុលានំ វសេន វុត្តំ.

៥. អនុកម្បសុត្តវណ្ណនា

២៣៥. បញ្ចមេ អធិសីលេសូតិ បញ្ចសុ សីលេសុ. ធម្មទស្សនេ និវេសេតីតិ ចតុសច្ចធម្មទស្សនេ បតិដ្ឋាបេតិ. អរហគ្គតន្តិ សព្ពសក្ការានំ អរហេ រតនត្តយេវ គតំ, តីសុ វត្ថូសុ គរុចិត្តីការំ ឧបដ្ឋបេថាតិ អត្ថោ. ឆដ្ឋំ ឧត្តានមេវ.

៧. ទុតិយអវណ្ណារហសុត្តវណ្ណនា

២៣៧. សត្តមេ អាវាសបលិគេធីតិ អាវាសំ ពលវគិទ្ធិវសេន គិលិត្វា វិយ ឋិតោ. សេសំ សព្ពំ ឧត្តានមេវាតិ.

អាវាសិកវគ្គោ ចតុត្ថោ.

(២៥) ៥. ទុច្ចរិតវគ្គោ

១. បឋមទុច្ចរិតសុត្តវណ្ណនា

២៤១. បញ្ចមស្ស បឋមេ ទុច្ចរិតេ សុចរិតេតិ ឥទំ អភេទតោ វុត្តំ, កាយទុច្ចរិតេតិអាទិ កាយទ្វារាទីនំ វសេន ភេទតោ. សទ្ធម្មាតិ ទសកុសលកម្មបថធម្មតោ. អសទ្ធម្មេតិ អកុសលកម្មបថសង្ខាតេ អស្សទ្ធម្មេ.

៩. សិវថិកសុត្តវណ្ណនា

២៤៩. នវមេ សិវថិកាយាតិ សុសានេ. អារោទនាតិ អារោទនដ្ឋានំ. អសុចិនាតិ ជិគុច្ឆនីយេន.

១០. បុគ្គលប្បសាទសុត្តវណ្ណនា

២៥០. ទសមេ បុគ្គលប្បសាទេតិ ឯកបុគ្គលស្មិំ ឧប្បន្នប្បសាទេ. អន្តេ និសីទាបេតីតិ ភិក្ខូនំ អាសនបរិយន្តេ និសីទាបេតិ. សេសំ សព្ពត្ថ ឧត្តានត្ថមេវាតិ.

ទុច្ចរិតវគ្គោ បញ្ចមោ.

បញ្ចមបណ្ណាសកំ និដ្ឋិតំ.