៤. មាលុក្យបុត្តសុត្តវណ្ណនា

២៥៧. ចតុត្ថេ មាលុក្យបុត្តោតិ មាលុក្យព្រាហ្មណិយា បុត្តោ. ឯត្ថាតិ ឯតស្មិំ តវ ឱវាទយាចនេ. ឥមិនា ថេរំ អបសាទេតិបិ ឧស្សាទេតិបិ. កថំ? អយំ កិរ ទហរកាលេ បច្ចយេសុ លគ្គោ ហុត្វា បច្ឆា មហល្លកកាលេ អរញ្ញវាសំ បត្ថេន្តោ កម្មដ្ឋានំ យាចតិ. អថ ភគវា ‘‘ឯត្ថ ទហរេ កិំ វក្ខាម, មាលុក្យបុត្តោ វិយ តុម្ហេបិ តរុណកាលេ បច្ចយេសុ លគ្គិត្វា មហល្លកកាលេ អរញ្ញំ បវិសិត្វា សមណធម្មំ ករេយ្យាថា’’តិ ឥមិនា អធិប្បាយេន ភណន្តោ ថេរំ អបសាទេតិ នាម. យស្មា បន ថេរោ មហល្លកកាលេវ អរញ្ញំ បវិសិត្វា សមណធម្មំ កាតុកាមោ, តស្មា ភគវា ‘‘ឯត្ថ ទហរេ កិំ វក្ខាម, អយំ អម្ហាកំ មាលុក្យបុត្តោ មហល្លកកាលេបិ អរញ្ញំ បវិសិត្វា សមណធម្មំ កាតុកាមោ កម្មដ្ឋានំ យាចតិ. តុម្ហេ តាវ តរុណកាលេបិ វីរិយំ ន ករោថា’’តិ ឥមិនា អធិប្បាយេន ភណន្តោ ថេរំ ឧស្សាទេតិ នាមាតិ យោជនា.