១. សំខិត្តសុត្តវណ្ណនា

២៣២. ចតុត្ថស្ស បឋមេ កណ្ហន្តិ កាឡកំ ទសអកុសលកម្មបថកម្មំ. កណ្ហវិបាកន្តិ អបាយេ និព្ពត្តនតោ កាឡកវិបាកំ. សុក្កន្តិ បណ្ឌរកំ កុសលកម្មបថកម្មំ. សុក្កវិបាកន្តិ សគ្គេ និព្ពត្តនតោ បណ្ឌរកវិបាកំ. កណ្ហសុក្កន្តិ មិស្សកកម្មំ. កណ្ហសុក្កវិបាកន្តិ សុខទុក្ខវិបាកំ. មិស្សកកម្មញ្ហិ កត្វា អកុសលេន តិរច្ឆានយោនិយំ មង្គលហត្ថិដ្ឋានាទីសុ ឧប្បន្នោ កុសលេន បវត្តេ សុខំ វេទិយតិ. កុសលេន រាជកុលេបិ និព្ពត្តោ អកុសលេន បវត្តេ ទុក្ខំ វេទិយតិ. អកណ្ហំ អសុក្កន្តិ កម្មក្ខយករំ ចតុមគ្គញាណំ អធិប្បេតំ. តញ្ហិ យទិ កណ្ហំ ភវេយ្យ, កណ្ហវិបាកំ ទទេយ្យ. យទិ សុក្កំ ភវេយ្យ, សុក្កវិបាកំ ទទេយ្យ. ឧភយវិបាកស្ស បន អប្បទានតោ អកណ្ហំ អសុក្កន្តិ អយមេត្ថ អត្ថោ.