(២១) ១. សប្បុរិសវគ្គោ

១-៦. សិក្ខាបទសុត្តវណ្ណនា

២០១. បញ្ចមស្ស បឋមេ អសប្បុរិសន្តិ លាមកបុរិសំ តុច្ឆបុរិសំ មូឡ្ហបុរិសំ អវិជ្ជាយ អន្ធីកតំ ពាលំ. អសប្បុរិសតរន្តិ អតិរេកេន អសប្បុរិសំ. ឥតរេ ទ្វេ វុត្តបដិបក្ខវសេន វេទិតព្ពា. សេសមេត្ថ ឧត្តានត្ថមេវ. យថា ចេត្ថ, ឯវំ ឥតោ បរេសុ បញ្ចសុ. ឯតេសុ ហិ បឋមំ បញ្ចវេរវសេន ទេសិតំ, ទុតិយំ អស្សទ្ធម្មវសេន, តតិយំ កាយវចីទ្វារវសេន, ចតុត្ថំ មនោទ្វារវសេន, បញ្ចមំ អដ្ឋមិច្ឆត្តវសេន, ឆដ្ឋំ ទសមិច្ឆត្តវសេន.

៧-១០. បាបធម្មសុត្តចតុក្កវណ្ណនា

២០៧-២១០. សត្តមេ បាបន្តិ លាមកំ សំកិលិដ្ឋបុគ្គលំ. កល្យាណន្តិ ភទ្ទកំ អនវជ្ជបុគ្គលំ. សេសមេត្ថ ឧត្តានត្ថមេវ. អដ្ឋមេបិ ឯសេវ នយោ. នវមេ បាបធម្មន្តិ លាមកធម្មំ. កល្យាណធម្មន្តិ អនវជ្ជធម្មំ. សេសមេត្ថ ឧត្តានត្ថមេវ. ទសមេបិ ឯសេវ នយោ. ឥមស្មិំ វគ្គេ ទសសុបិ សុត្តេសុ អគារិយប្បដិបទា កថិតា. សចេបិ សោតាបន្នសកទាគាមិនោ ហោន្តិ, វដ្ដតិយេវាតិ.

សប្បុរិសវគ្គោ បឋមោ.