១. បទសោធនវារោ

(ក) អនុលោមំ

៩៤. (ក) ចក្ខុ ចក្ខុន្ទ្រិយន្តិ?

ទិព្ពចក្ខុ បញ្ញាចក្ខុ ចក្ខុ, ន ចក្ខុន្ទ្រិយំ. ចក្ខុន្ទ្រិយំ ចក្ខុ ចេវ ចក្ខុន្ទ្រិយញ្ច.

(ខ) ចក្ខុន្ទ្រិយំ ចក្ខូតិ? អាមន្តា.

(ក) សោតំ សោតិន្ទ្រិយន្តិ?

ទិព្ពសោតំ តណ្ហាសោតំ សោតំ, ន សោតិន្ទ្រិយំ. សោតិន្ទ្រិយំ សោតញ្ចេវ សោតិន្ទ្រិយញ្ច.

(ខ) សោតិន្ទ្រិយំ សោតន្តិ? អាមន្តា.

(ក) ឃានំ ឃានិន្ទ្រិយន្តិ? អាមន្តា.

(ខ) ឃានិន្ទ្រិយំ ឃានន្តិ? អាមន្តា.

(ក) ជិវ្ហា ជិវ្ហិន្ទ្រិយន្តិ? អាមន្តា.

(ខ) ជិវ្ហិន្ទ្រិយំ ជិវ្ហាតិ? អាមន្តា.

(ក) កាយោ កាយិន្ទ្រិយន្តិ?

កាយិន្ទ្រិយំ ឋបេត្វា អវសេសោ កាយោ [អវសេសា កាយោ (សី. ស្យា. ក.)], ន កាយិន្ទ្រិយំ. កាយិន្ទ្រិយំ កាយោ ចេវ កាយិន្ទ្រិយញ្ច.

(ខ) កាយិន្ទ្រិយំ កាយោតិ? អាមន្តា.

(ក) មនោ មនិន្ទ្រិយន្តិ? អាមន្តា.

(ខ) មនិន្ទ្រិយំ មនោតិ? អាមន្តា.

(ក) ឥត្ថី ឥត្ថិន្ទ្រិយន្តិ? នោ.

(ខ) ឥត្ថិន្ទ្រិយំ ឥត្ថីតិ? នោ.

(ក) បុរិសោ បុរិសិន្ទ្រិយន្តិ? នោ.

(ខ) បុរិសិន្ទ្រិយំ បុរិសោតិ? នោ.

(ក) ជីវិតំ ជីវិតិន្ទ្រិយន្តិ? អាមន្តា.

(ខ) ជីវិតិន្ទ្រិយំ ជីវិតន្តិ? អាមន្តា.

(ក) សុខំ សុខិន្ទ្រិយន្តិ? អាមន្តា.

(ខ) សុខិន្ទ្រិយំ សុខន្តិ? អាមន្តា.

(ក) ទុក្ខំ ទុក្ខិន្ទ្រិយន្តិ? អាមន្តា.

(ខ) ទុក្ខិន្ទ្រិយំ ទុក្ខន្តិ? អាមន្តា.

(ក) សោមនស្សំ សោមនស្សិន្ទ្រិយន្តិ? អាមន្តា.

(ខ) សោមនស្សិន្ទ្រិយំ សោមនស្សន្តិ? អាមន្តា.

(ក) ទោមនស្សំ ទោមនស្សិន្ទ្រិយន្តិ? អាមន្តា.

(ខ) ទោមនស្សិន្ទ្រិយំ ទោមនស្សន្តិ? អាមន្តា.

(ក) ឧបេក្ខា ឧបេក្ខិន្ទ្រិយន្តិ?

ឧបេក្ខិន្ទ្រិយំ ឋបេត្វា អវសេសា ឧបេក្ខា, ន ឧបេក្ខិន្ទ្រិយំ. ឧបេក្ខិន្ទ្រិយំ ឧបេក្ខា ចេវ ឧបេក្ខិន្ទ្រិយញ្ច.

(ខ) ឧបេក្ខិន្ទ្រិយំ ឧបេក្ខាតិ? អាមន្តា.

(ក) សទ្ធា សទ្ធិន្ទ្រិយន្តិ? អាមន្តា.

(ខ) សទ្ធិន្ទ្រិយំ សទ្ធាតិ? អាមន្តា.

(ក) វីរិយំ វីរិយិន្ទ្រិយន្តិ? អាមន្តា.

(ខ) វីរិយិន្ទ្រិយំ វីរិយន្តិ? អាមន្តា.

(ក) សតិ សតិន្ទ្រិយន្តិ? អាមន្តា.

(ខ) សតិន្ទ្រិយំ សតីតិ? អាមន្តា.

(ក) សមាធិ សមាធិន្ទ្រិយន្តិ? អាមន្តា.

(ខ) សមាធិន្ទ្រិយំ សមាធីតិ? អាមន្តា.

(ក) បញ្ញា បញ្ញិន្ទ្រិយន្តិ? អាមន្តា.

(ខ) បញ្ញិន្ទ្រិយំ បញ្ញាតិ? អាមន្តា.

(ក) អនញ្ញាតញ្ញស្សាមីតិ អនញ្ញាតញ្ញស្សាមីតិន្ទ្រិយន្តិ? អាមន្តា.

(ខ) អនញ្ញាតញ្ញស្សាមីតិន្ទ្រិយំ អនញ្ញាតញ្ញស្សាមីតិ? អាមន្តា.

(ក) អញ្ញំ អញ្ញិន្ទ្រិយន្តិ? អាមន្តា.

(ខ) អញ្ញិន្ទ្រិយំ អញ្ញន្តិ? អាមន្តា.

(ក) អញ្ញាតាវី អញ្ញាតាវិន្ទ្រិយន្តិ? អាមន្តា.

(ខ) អញ្ញាតាវិន្ទ្រិយំ អញ្ញាតាវីតិ? អាមន្តា.

(ខ) បច្ចនីកំ

៩៥. (ក) ន ចក្ខុ ន ចក្ខុន្ទ្រិយន្តិ? អាមន្តា.

(ខ) ន ចក្ខុន្ទ្រិយំ ន ចក្ខូតិ?

ទិព្ពចក្ខុ បញ្ញាចក្ខុ ន ចក្ខុន្ទ្រិយំ, ចក្ខុ. ចក្ខុញ្ច ចក្ខុន្ទ្រិយញ្ច ឋបេត្វា អវសេសា ន ចេវ ចក្ខុ ន ច ចក្ខុន្ទ្រិយំ.

(ក) ន សោតំ ន សោតិន្ទ្រិយន្តិ? អាមន្តា.

(ខ) ន សោតិន្ទ្រិយំ ន សោតន្តិ?

ទិព្ពសោតំ តណ្ហាសោតំ ន សោតិន្ទ្រិយំ, សោតំ. សោតញ្ច សោតិន្ទ្រិយញ្ច ឋបេត្វា អវសេសា ន ចេវ សោតំ ន ច សោតិន្ទ្រិយំ.

(ក) ន ឃានំ ន ឃានិន្ទ្រិយន្តិ? អាមន្តា.

(ខ) ន ឃានិន្ទ្រិយំ ន ឃានន្តិ? អាមន្តា.

(ក) ន ជិវ្ហា ន ជិវ្ហិន្ទ្រិយន្តិ? អាមន្តា.

(ខ) ន ជិវ្ហិន្ទ្រិយំ ន ជិវ្ហាតិ? អាមន្តា.

(ក) ន កាយោ ន កាយិន្ទ្រិយន្តិ? អាមន្តា.

(ខ) ន កាយិន្ទ្រិយំ ន កាយោតិ?

កាយិន្ទ្រិយំ ឋបេត្វា អវសេសោ ន កាយិន្ទ្រិយំ, កាយោ. កាយញ្ច កាយិន្ទ្រិយញ្ច ឋបេត្វា អវសេសោ ន ចេវ កាយោ ន ច កាយិន្ទ្រិយំ.

(ក) ន មនោ ន មនិន្ទ្រិយន្តិ? អាមន្តា.

(ខ) ន មនិន្ទ្រិយំ ន មនោតិ? អាមន្តា.

(ក) ន ឥត្ថី ន ឥត្ថិន្ទ្រិយន្តិ?

ឥត្ថិន្ទ្រិយំ ន ឥត្ថី, ឥត្ថិន្ទ្រិយំ. ឥត្ថិញ្ច ឥត្ថិន្ទ្រិយញ្ច ឋបេត្វា អវសេសា ន ចេវ ឥត្ថី ន ច ឥត្ថិន្ទ្រិយំ.

(ខ) ន ឥត្ថិន្ទ្រិយំ ន ឥត្ថីតិ?

ឥត្ថី ន ឥត្ថិន្ទ្រិយំ, ឥត្ថី. ឥត្ថិញ្ច ឥត្ថិន្ទ្រិយញ្ច ឋបេត្វា អវសេសា ន ចេវ ឥត្ថី ន ច ឥត្ថិន្ទ្រិយំ.

(ក) ន បុរិសោ ន បុរិសិន្ទ្រិយន្តិ?

បុរិសិន្ទ្រិយំ ន បុរិសោ, បុរិសិន្ទ្រិយំ. បុរិសញ្ច បុរិសិន្ទ្រិយញ្ច ឋបេត្វា អវសេសា ន ចេវ បុរិសោ ន ច បុរិសិន្ទ្រិយំ.

(ខ) ន បុរិសិន្ទ្រិយំ ន បុរិសោតិ?

បុរិសោ ន បុរិសិន្ទ្រិយំ, បុរិសោ. បុរិសញ្ច បុរិសិន្ទ្រិយញ្ច ឋបេត្វា អវសេសា ន ចេវ បុរិសោ ន ច បុរិសិន្ទ្រិយំ.

(ក) ន ជីវិតំ ន ជីវិតិន្ទ្រិយន្តិ? អាមន្តា.

(ខ) ន ជីវិតិន្ទ្រិយំ ន ជីវិតន្តិ? អាមន្តា.

(ក) ន សុខំ ន សុខិន្ទ្រិយន្តិ? អាមន្តា.

(ខ) ន សុខិន្ទ្រិយំ ន សុខន្តិ? អាមន្តា.

(ក) ន ទុក្ខំ ន ទុក្ខិន្ទ្រិយន្តិ? អាមន្តា.

(ខ) ន ទុក្ខិន្ទ្រិយំ ន ទុក្ខន្តិ? អាមន្តា.

(ក) ន សោមនស្សំ ន សោមនស្សិន្ទ្រិយន្តិ? អាមន្តា.

(ខ) ន សោមនស្សិន្ទ្រិយំ ន សោមនស្សន្តិ? អាមន្តា.

(ក) ន ទោមនស្សំ ន ទោមនស្សិន្ទ្រិយន្តិ? អាមន្តា.

(ខ) ន ទោមនស្សិន្ទ្រិយំ ន ទោមនស្សន្តិ? អាមន្តា.

(ក) ន ឧបេក្ខា ន ឧបេក្ខិន្ទ្រិយន្តិ? អាមន្តា.

(ខ) ន ឧបេក្ខិន្ទ្រិយំ ន ឧបេក្ខាតិ?

ឧបេក្ខិន្ទ្រិយំ ឋបេត្វា អវសេសា ន ឧបេក្ខិន្ទ្រិយំ, ឧបេក្ខា. ឧបេក្ខញ្ច ឧបេក្ខិន្ទ្រិយញ្ច ឋបេត្វា អវសេសា ន ចេវ ឧបេក្ខា ន ច ឧបេក្ខិន្ទ្រិយំ.

(ក) ន សទ្ធា ន សទ្ធិន្ទ្រិយន្តិ? អាមន្តា.

(ខ) ន សទ្ធិន្ទ្រិយំ ន សទ្ធាតិ? អាមន្តា.

(ក) ន វីរិយំ ន វីរិយិន្ទ្រិយន្តិ? អាមន្តា.

(ខ) ន វីរិយិន្ទ្រិយំ ន វីរិយន្តិ? អាមន្តា.

(ក) ន សតិ ន សតិន្ទ្រិយន្តិ? អាមន្តា.

(ខ) ន សតិន្ទ្រិយំ ន សតីតិ? អាមន្តា.

(ក) ន សមាធិ ន សមាធិន្ទ្រិយន្តិ? អាមន្តា.

(ខ) ន សមាធិន្ទ្រិយំ ន សមាធីតិ? អាមន្តា.

(ក) ន បញ្ញា ន បញ្ញិន្ទ្រិយន្តិ? អាមន្តា.

(ខ) ន បញ្ញិន្ទ្រិយំ ន បញ្ញាតិ? អាមន្តា.

(ក) ន អនញ្ញាតញ្ញស្សាមីតិ ន អនញ្ញាតញ្ញស្សាមីតិន្ទ្រិយន្តិ? អាមន្តា.

(ខ) ន អនញ្ញាតញ្ញស្សាមីតិន្ទ្រិយំ ន អនញ្ញាតញ្ញស្សាមីតិ? អាមន្តា.

(ក) ន អញ្ញំ ន អញ្ញិន្ទ្រិយន្តិ? អាមន្តា.

(ខ) ន អញ្ញិន្ទ្រិយំ ន អញ្ញន្តិ? អាមន្តា.

(ក) ន អញ្ញាតាវី ន អញ្ញាតាវិន្ទ្រិយន្តិ? អាមន្តា.

(ខ) ន អញ្ញាតាវិន្ទ្រិយំ ន អញ្ញាតាវីតិ? អាមន្តា.