(៦) អតីតានាគតវារោ

(ក) អនុលោមបុគ្គលោ

៨៩. (ក) យស្ស កុសលា ធម្មា ឧប្បជ្ជិត្ថ តស្ស អកុសលា ធម្មា ឧប្បជ្ជិស្សន្តីតិ?

អគ្គមគ្គសមង្គីនំ អរហន្តានំ យស្ស ចិត្តស្ស អនន្តរា អគ្គមគ្គំ បដិលភិស្សន្តិ តេសំ កុសលា ធម្មា ឧប្បជ្ជិត្ថ, នោ ច តេសំ អកុសលា ធម្មា ឧប្បជ្ជិស្សន្តិ. ឥតរេសំ តេសំ កុសលា ច ធម្មា ឧប្បជ្ជិត្ថ អកុសលា ច ធម្មា ឧប្បជ្ជិស្សន្តិ.

(ខ) យស្ស វា បន អកុសលា ធម្មា ឧប្បជ្ជិស្សន្តិ តស្ស កុសលា ធម្មា ឧប្បជ្ជិត្ថាតិ? អាមន្តា.

(ក) យស្ស កុសលា ធម្មា ឧប្បជ្ជិត្ថ តស្ស អព្យាកតា ធម្មា ឧប្បជ្ជិស្សន្តីតិ?

បច្ឆិមចិត្តសមង្គីនំ តេសំ កុសលា ធម្មា ឧប្បជ្ជិត្ថ, នោ ច តេសំ អព្យាកតា ធម្មា ឧប្បជ្ជិស្សន្តិ. ឥតរេសំ តេសំ កុសលា ច ធម្មា ឧប្បជ្ជិត្ថ អព្យាកតា ច ធម្មា ឧប្បជ្ជិស្សន្តិ.

(ខ) យស្ស វា បន អព្យាកតា ធម្មា ឧប្បជ្ជិស្សន្តិ តស្ស កុសលា ធម្មា ឧប្បជ្ជិត្ថាតិ? អាមន្តា.

៩០. (ក) យស្ស អកុសលា ធម្មា ឧប្បជ្ជិត្ថ តស្ស អព្យាកតា ធម្មា ឧប្បជ្ជិស្សន្តីតិ?

បច្ឆិមចិត្តសមង្គីនំ តេសំ អកុសលា ធម្មា ឧប្បជ្ជិត្ថ, នោ ច តេសំ អព្យាកតា ធម្មា ឧប្បជ្ជិស្សន្តិ. ឥតរេសំ តេសំ អកុសលា ច ធម្មា ឧប្បជ្ជិត្ថ អព្យាកតា ច ធម្មា ឧប្បជ្ជិស្សន្តិ.

(ខ) យស្ស វា បន អព្យាកតា ធម្មា ឧប្បជ្ជិស្សន្តិ តស្ស អកុសលា ធម្មា ឧប្បជ្ជិត្ថាតិ? អាមន្តា.

(ខ) អនុលោមឱកាសោ

៩១. យត្ថ កុសលា ធម្មា ឧប្បជ្ជិត្ថ តត្ថ អកុសលា ធម្មា ឧប្បជ្ជិស្សន្តីតិ?…បេ….

(គ) អនុលោមបុគ្គលោកាសា

៩២. (ក) យស្ស យត្ថ កុសលា ធម្មា ឧប្បជ្ជិត្ថ តស្ស តត្ថ អកុសលា ធម្មា ឧប្បជ្ជិស្សន្តីតិ?

អគ្គមគ្គសមង្គីនំ អរហន្តានំ យស្ស ចិត្តស្ស អនន្តរា អគ្គមគ្គំ បដិលភិស្សន្តិ តេសំ តត្ថ កុសលា ធម្មា ឧប្បជ្ជិត្ថ, នោ ច តេសំ តត្ថ អកុសលា ធម្មា ឧប្បជ្ជិស្សន្តិ. ឥតរេសំ ចតុវោការានំ បញ្ចវោការានំ តេសំ តត្ថ កុសលា ច ធម្មា ឧប្បជ្ជិត្ថ អកុសលា ច ធម្មា ឧប្បជ្ជិស្សន្តិ.

(ខ) យស្ស វា បន យត្ថ អកុសលា ធម្មា ឧប្បជ្ជិស្សន្តិ តស្ស តត្ថ កុសលា ធម្មា ឧប្បជ្ជិត្ថាតិ?

សុទ្ធាវាសានំ ទុតិយេ ចិត្តេ វត្តមានេ តេសំ តត្ថ អកុសលា ធម្មា ឧប្បជ្ជិស្សន្តិ, នោ ច តេសំ តត្ថ កុសលា ធម្មា ឧប្បជ្ជិត្ថ. ឥតរេសំ ចតុវោការានំ បញ្ចវោការានំ តេសំ តត្ថ អកុសលា ច ធម្មា ឧប្បជ្ជិស្សន្តិ កុសលា ច ធម្មា ឧប្បជ្ជិត្ថ.

(ក) យស្ស យត្ថ កុសលា ធម្មា ឧប្បជ្ជិត្ថ តស្ស តត្ថ អព្យាកតា ធម្មា ឧប្បជ្ជិស្សន្តីតិ?

បច្ឆិមចិត្តសមង្គីនំ តេសំ តត្ថ កុសលា ធម្មា ឧប្បជ្ជិត្ថ, នោ ច តេសំ តត្ថ អព្យាកតា ធម្មា ឧប្បជ្ជិស្សន្តិ. ឥតរេសំ ចតុវោការានំ បញ្ចវោការានំ តេសំ តត្ថ កុសលា ច ធម្មា ឧប្បជ្ជិត្ថ អព្យាកតា ច ធម្មា ឧប្បជ្ជិស្សន្តិ.

(ខ) យស្ស វា បន យត្ថ អព្យាកតា ធម្មា ឧប្បជ្ជិស្សន្តិ តស្ស តត្ថ កុសលា ធម្មា ឧប្បជ្ជិត្ថាតិ?

សុទ្ធាវាសានំ ទុតិយេ ចិត្តេ វត្តមានេ អសញ្ញសត្តានំ តេសំ តត្ថ អព្យាកតា ធម្មា ឧប្បជ្ជិស្សន្តិ, នោ ច តេសំ តត្ថ កុសលា ធម្មា ឧប្បជ្ជិត្ថ. ឥតរេសំ ចតុវោការានំ បញ្ចវោការានំ តេសំ តត្ថ អព្យាកតា ច ធម្មា ឧប្បជ្ជិស្សន្តិ កុសលា ច ធម្មា ឧប្បជ្ជិត្ថ.

៩៣. (ក) យស្ស យត្ថ អកុសលា ធម្មា ឧប្បជ្ជិត្ថ តស្ស តត្ថ អព្យាកតា ធម្មា ឧប្បជ្ជិស្សន្តីតិ?

បច្ឆិមចិត្តសមង្គីនំ តេសំ តត្ថ អកុសលា ធម្មា ឧប្បជ្ជិត្ថ, នោ ច តេសំ តត្ថ អព្យាកតា ធម្មា ឧប្បជ្ជិស្សន្តិ. ឥតរេសំ ចតុវោការានំ បញ្ចវោការានំ តេសំ តត្ថ អកុសលា ច ធម្មា ឧប្បជ្ជិត្ថ អព្យាកតា ច ធម្មា ឧប្បជ្ជិស្សន្តិ.

(ខ) យស្ស វា បន យត្ថ អព្យាកតា ធម្មា ឧប្បជ្ជិស្សន្តិ តស្ស តត្ថ អកុសលា ធម្មា ឧប្បជ្ជិត្ថាតិ?

សុទ្ធាវាសានំ ទុតិយេ ចិត្តេ វត្តមានេ អសញ្ញសត្តានំ តេសំ តត្ថ អព្យាកតា ធម្មា ឧប្បជ្ជិស្សន្តិ, នោ ច តេសំ តត្ថ អកុសលា ធម្មា ឧប្បជ្ជិត្ថ. ឥតរេសំ ចតុវោការានំ បញ្ចវោការានំ តេសំ តត្ថ អព្យាកតា ច ធម្មា ឧប្បជ្ជិស្សន្តិ អកុសលា ច ធម្មា ឧប្បជ្ជិត្ថ.

(ឃ) បច្ចនីកបុគ្គលោ

៩៤. (ក) យស្ស កុសលា ធម្មា ន ឧប្បជ្ជិត្ថ តស្ស អកុសលា ធម្មា ន ឧប្បជ្ជិស្សន្តីតិ? នត្ថិ.

(ខ) យស្ស វា បន អកុសលា ធម្មា ន ឧប្បជ្ជិស្សន្តិ តស្ស កុសលា ធម្មា ន ឧប្បជ្ជិត្ថាតិ? ឧប្បជ្ជិត្ថ.

(ក) យស្ស កុសលា ធម្មា ន ឧប្បជ្ជិត្ថ តស្ស អព្យាកតា ធម្មា ន ឧប្បជ្ជិស្សន្តីតិ? នត្ថិ.

(ខ) យស្ស វា បន អព្យាកតា ធម្មា ន ឧប្បជ្ជិស្សន្តិ តស្ស កុសលា ធម្មា ន ឧប្បជ្ជិត្ថាតិ? ឧប្បជ្ជិត្ថ.

៩៥. (ក) យស្ស អកុសលា ធម្មា ន ឧប្បជ្ជិត្ថ តស្ស អព្យាកតា ធម្មា ន ឧប្បជ្ជិស្សន្តីតិ? នត្ថិ.

(ខ) យស្ស វា បន អព្យាកតា ធម្មា ន ឧប្បជ្ជិស្សន្តិ តស្ស អកុសលា ធម្មា ន ឧប្បជ្ជិត្ថាតិ? ឧប្បជ្ជិត្ថ.

(ង) បច្ចនីកឱកាសោ

៩៦. យត្ថ កុសលា ធម្មា ន ឧប្បជ្ជិត្ថ តត្ថ អកុសលា ធម្មា ន ឧប្បជ្ជិស្សន្តីតិ?…បេ….

(ច) បច្ចនីកបុគ្គលោកាសា

៩៧. (ក) យស្ស យត្ថ កុសលា ធម្មា ន ឧប្បជ្ជិត្ថ តស្ស តត្ថ អកុសលា ធម្មា ន ឧប្បជ្ជិស្សន្តីតិ?

សុទ្ធាវាសានំ ទុតិយេ ចិត្តេ វត្តមានេ តេសំ តត្ថ កុសលា ធម្មា ន ឧប្បជ្ជិត្ថ, នោ ច តេសំ តត្ថ អកុសលា ធម្មា ន ឧប្បជ្ជិស្សន្តិ. អសញ្ញសត្តានំ តេសំ តត្ថ កុសលា ច ធម្មា ន ឧប្បជ្ជិត្ថ អកុសលា ច ធម្មា ន ឧប្បជ្ជិស្សន្តិ.

(ខ) យស្ស វា បន យត្ថ អកុសលា ធម្មា ន ឧប្បជ្ជិស្សន្តិ តស្ស តត្ថ កុសលា ធម្មា ន ឧប្បជ្ជិត្ថាតិ?

អគ្គមគ្គសមង្គីនំ អរហន្តានំ យស្ស ចិត្តស្ស អនន្តរា អគ្គមគ្គំ បដិលភិស្សន្តិ តេសំ តត្ថ អកុសលា ធម្មា ន ឧប្បជ្ជិស្សន្តិ, នោ ច តេសំ តត្ថ កុសលា ធម្មា ន ឧប្បជ្ជិត្ថ. អសញ្ញសត្តានំ តេសំ តត្ថ អកុសលា ច ធម្មា ន ឧប្បជ្ជិស្សន្តិ កុសលា ច ធម្មា ន ឧប្បជ្ជិត្ថ.

(ក) យស្ស យត្ថ កុសលា ធម្មា ន ឧប្បជ្ជិត្ថ តស្ស តត្ថ អព្យាកតា ធម្មា ន ឧប្បជ្ជិស្សន្តីតិ? ឧប្បជ្ជិស្សន្តិ.

(ខ) យស្ស វា បន យត្ថ អព្យាកតា ធម្មា ន ឧប្បជ្ជិស្សន្តិ តស្ស តត្ថ កុសលា ធម្មា ន ឧប្បជ្ជិត្ថាតិ? ឧប្បជ្ជិត្ថ.

៩៨. (ក) យស្ស យត្ថ អកុសលា ធម្មា ន ឧប្បជ្ជិត្ថ តស្ស តត្ថ អព្យាកតា ធម្មា ន ឧប្បជ្ជិស្សន្តីតិ? ឧប្បជ្ជិស្សន្តិ.

(ខ) យស្ស វា បន យត្ថ អព្យាកតា ធម្មា ន ឧប្បជ្ជិស្សន្តិ តស្ស តត្ថ អកុសលា ធម្មា ន ឧប្បជ្ជិត្ថាតិ? ឧប្បជ្ជិត្ថ.

ឧប្បាទវារោ.