(៤) បច្ចុប្បន្នាតីតវារោ

(ក) អនុលោមបុគ្គលោ

៦៩. (ក) យស្ស កុសលា ធម្មា ឧប្បជ្ជន្តិ តស្ស អកុសលា ធម្មា ឧប្បជ្ជិត្ថាតិ? អាមន្តា.

(ខ) យស្ស វា បន អកុសលា ធម្មា ឧប្បជ្ជិត្ថ តស្ស កុសលា ធម្មា ឧប្បជ្ជន្តីតិ?

សព្ពេសំ ចិត្តស្ស ភង្គក្ខណេ កុសលវិប្បយុត្តចិត្តស្ស ឧប្បាទក្ខណេ និរោធសមាបន្នានំ អសញ្ញសត្តានំ តេសំ អកុសលា ធម្មា ឧប្បជ្ជិត្ថ, នោ ច តេសំ កុសលា ធម្មា ឧប្បជ្ជន្តិ. កុសលានំ ឧប្បាទក្ខណេ តេសំ អកុសលា ច ធម្មា ឧប្បជ្ជិត្ថ កុសលា ច ធម្មា ឧប្បជ្ជន្តិ.

(ក) យស្ស កុសលា ធម្មា ឧប្បជ្ជន្តិ តស្ស អព្យាកតា ធម្មា ឧប្បជ្ជិត្ថាតិ? អាមន្តា.

(ខ) យស្ស វា បន អព្យាកតា ធម្មា ឧប្បជ្ជិត្ថ តស្ស កុសលា ធម្មា ឧប្បជ្ជន្តីតិ?

សព្ពេសំ ចិត្តស្ស ភង្គក្ខណេ កុសលវិប្បយុត្តចិត្តស្ស ឧប្បាទក្ខណេ និរោធសមាបន្នានំ អសញ្ញសត្តានំ តេសំ អព្យាកតា ធម្មា ឧប្បជ្ជិត្ថ, នោ ច តេសំ កុសលា ធម្មា ឧប្បជ្ជន្តិ. កុសលានំ ឧប្បាទក្ខណេ តេសំ អព្យាកតា ច ធម្មា ឧប្បជ្ជិត្ថ កុសលា ច ធម្មា ឧប្បជ្ជន្តិ.

៧០. (ក) យស្ស អកុសលា ធម្មា ឧប្បជ្ជន្តិ តស្ស អព្យាកតា ធម្មា ឧប្បជ្ជិត្ថាតិ? អាមន្តា.

(ខ) យស្ស វា បន អព្យាកតា ធម្មា ឧប្បជ្ជិត្ថ តស្ស អកុសលា ធម្មា ឧប្បជ្ជន្តីតិ?

សព្ពេសំ ចិត្តស្ស ភង្គក្ខណេ អកុសលវិប្បយុត្តចិត្តស្ស ឧប្បាទក្ខណេ និរោធសមាបន្នានំ អសញ្ញសត្តានំ តេសំ អព្យាកតា ធម្មា ឧប្បជ្ជិត្ថ, នោ ច តេសំ អកុសលា ធម្មា ឧប្បជ្ជន្តិ. អកុសលានំ ឧប្បាទក្ខណេ តេសំ អព្យាកតា ច ធម្មា ឧប្បជ្ជិត្ថ អកុសលា ច ធម្មា ឧប្បជ្ជន្តិ.

(ខ) អនុលោមឱកាសោ

៧១. យត្ថ កុសលា ធម្មា ឧប្បជ្ជន្តិ តត្ថ អកុសលា ធម្មា ឧប្បជ្ជិត្ថាតិ?…បេ….

(គ) អនុលោមបុគ្គលោកាសា

៧២. (ក) យស្ស យត្ថ កុសលា ធម្មា ឧប្បជ្ជន្តិ តស្ស តត្ថ អកុសលា ធម្មា ឧប្បជ្ជិត្ថាតិ? អាមន្តា.

(ខ) យស្ស វា បន យត្ថ អកុសលា ធម្មា ឧប្បជ្ជិត្ថ តស្ស តត្ថ កុសលា ធម្មា ឧប្បជ្ជន្តីតិ?

សព្ពេសំ ចិត្តស្ស ភង្គក្ខណេ កុសលវិប្បយុត្តចិត្តស្ស ឧប្បាទក្ខណេ តេសំ តត្ថ អកុសលា ធម្មា ឧប្បជ្ជិត្ថ, នោ ច តេសំ តត្ថ កុសលា ធម្មា ឧប្បជ្ជន្តិ. កុសលានំ ឧប្បាទក្ខណេ តេសំ តត្ថ អកុសលា ច ធម្មា ឧប្បជ្ជិត្ថ កុសលា ច ធម្មា ឧប្បជ្ជន្តិ.

(ក) យស្ស យត្ថ កុសលា ធម្មា ឧប្បជ្ជន្តិ តស្ស តត្ថ អព្យាកតា ធម្មា ឧប្បជ្ជិត្ថាតិ? អាមន្តា.

(ខ) យស្ស វា បន យត្ថ អព្យាកតា ធម្មា ឧប្បជ្ជិត្ថ តស្ស តត្ថ កុសលា ធម្មា ឧប្បជ្ជន្តីតិ?

សព្ពេសំ ចិត្តស្ស ភង្គក្ខណេ កុសលវិប្បយុត្តចិត្តស្ស ឧប្បាទក្ខណេ អសញ្ញសត្តានំ តេសំ តត្ថ អព្យាកតា ធម្មា ឧប្បជ្ជិត្ថ, នោ ច តេសំ តត្ថ កុសលា ធម្មា ឧប្បជ្ជន្តិ. កុសលានំ ឧប្បាទក្ខណេ តេសំ តត្ថ អព្យាកតា ច ធម្មា ឧប្បជ្ជិត្ថ កុសលា ច ធម្មា ឧប្បជ្ជន្តិ.

៧៣. (ក) យស្ស យត្ថ អកុសលា ធម្មា ឧប្បជ្ជន្តិ តស្ស តត្ថ អព្យាកតា ធម្មា ឧប្បជ្ជិត្ថាតិ? អាមន្តា.

(ខ) យស្ស វា បន យត្ថ អព្យាកតា ធម្មា ឧប្បជ្ជិត្ថ តស្ស តត្ថ អកុសលា ធម្មា ឧប្បជ្ជន្តីតិ?

សព្ពេសំ ចិត្តស្ស ភង្គក្ខណេ អកុសលវិប្បយុត្តចិត្តស្ស ឧប្បាទក្ខណេ អសញ្ញសត្តានំ តេសំ តត្ថ អព្យាកតា ធម្មា ឧប្បជ្ជិត្ថ, នោ ច តេសំ តត្ថ អកុសលា ធម្មា ឧប្បជ្ជន្តិ. អកុសលានំ ឧប្បាទក្ខណេ តេសំ តត្ថ អព្យាកតា ច ធម្មា ឧប្បជ្ជិត្ថ អកុសលា ច ធម្មា ឧប្បជ្ជន្តិ.

(ឃ) បច្ចនីកបុគ្គលោ

៧៤. (ក) យស្ស កុសលា ធម្មា ន ឧប្បជ្ជន្តិ តស្ស អកុសលា ធម្មា ន ឧប្បជ្ជិត្ថាតិ? ឧប្បជ្ជិត្ថ.

(ខ) យស្ស វា បន អកុសលា ធម្មា ន ឧប្បជ្ជិត្ថ តស្ស កុសលា ធម្មា ន ឧប្បជ្ជន្តីតិ? នត្ថិ.

(ក) យស្ស កុសលា ធម្មា ន ឧប្បជ្ជន្តិ តស្ស អព្យាកតា ធម្មា ន ឧប្បជ្ជិត្ថាតិ? ឧប្បជ្ជិត្ថ.

(ខ) យស្ស វា បន អព្យាកតា ធម្មា ន ឧប្បជ្ជិត្ថ តស្ស កុសលា ធម្មា ន ឧប្បជ្ជន្តីតិ? នត្ថិ.

៧៥. (ក) យស្ស អកុសលា ធម្មា ន ឧប្បជ្ជន្តិ តស្ស អព្យាកតា ធម្មា ន ឧប្បជ្ជិត្ថាតិ? ឧប្បជ្ជិត្ថ.

(ខ) យស្ស វា បន អព្យាកតា ធម្មា ន ឧប្បជ្ជិត្ថ តស្ស អកុសលា ធម្មា ន ឧប្បជ្ជន្តីតិ? នត្ថិ.

(ង) បច្ចនីកឱកាសោ

៧៦. យត្ថ កុសលា ធម្មា ន ឧប្បជ្ជន្តិ តត្ថ អកុសលា ធម្មា ន ឧប្បជ្ជិត្ថាតិ?…បេ….

(ច) បច្ចនីកបុគ្គលោកាសា

៧៧. (ក) យស្ស យត្ថ កុសលា ធម្មា ន ឧប្បជ្ជន្តិ តស្ស តត្ថ អកុសលា ធម្មា ន ឧប្បជ្ជិត្ថាតិ?

សព្ពេសំ ចិត្តស្ស ភង្គក្ខណេ កុសលវិប្បយុត្តចិត្តស្ស ឧប្បាទក្ខណេ តេសំ តត្ថ កុសលា ធម្មា ន ឧប្បជ្ជន្តិ, នោ ច តេសំ តត្ថ អកុសលា ធម្មា ន ឧប្បជ្ជិត្ថ. សុទ្ធាវាសានំ ទុតិយេ ចិត្តេ វត្តមានេ អសញ្ញសត្តានំ តេសំ តត្ថ កុសលា ច ធម្មា ន ឧប្បជ្ជន្តិ អកុសលា ច ធម្មា ន ឧប្បជ្ជិត្ថ.

(ខ) យស្ស វា បន យត្ថ អកុសលា ធម្មា ន ឧប្បជ្ជិត្ថ តស្ស តត្ថ កុសលា ធម្មា ន ឧប្បជ្ជន្តីតិ? អាមន្តា.

(ក) យស្ស យត្ថ កុសលា ធម្មា ន ឧប្បជ្ជន្តិ តស្ស តត្ថ អព្យាកតា ធម្មា ន ឧប្បជ្ជិត្ថាតិ?

សព្ពេសំ ចិត្តស្ស ភង្គក្ខណេ កុសលវិប្បយុត្តចិត្តស្ស ឧប្បាទក្ខណេ អសញ្ញសត្តានំ តេសំ តត្ថ កុសលា ធម្មា ន ឧប្បជ្ជន្តិ, នោ ច តេសំ តត្ថ អព្យាកតា ធម្មា ន ឧប្បជ្ជិត្ថ. សុទ្ធាវាសំ ឧបបជ្ជន្តានំ តេសំ តត្ថ កុសលា ច ធម្មា ន ឧប្បជ្ជន្តិ អព្យាកតា ច ធម្មា ន ឧប្បជ្ជិត្ថ.

(ខ) យស្ស វា បន យត្ថ អព្យាកតា ធម្មា ន ឧប្បជ្ជិត្ថ តស្ស តត្ថ កុសលា ធម្មា ន ឧប្បជ្ជន្តីតិ? អាមន្តា.

៧៨. (ក) យស្ស យត្ថ អកុសលា ធម្មា ន ឧប្បជ្ជន្តិ តស្ស តត្ថ អព្យាកតា ធម្មា ន ឧប្បជ្ជិត្ថាតិ?

សព្ពេសំ ចិត្តស្ស ភង្គក្ខណេ អកុសលវិប្បយុត្តចិត្តស្ស ឧប្បាទក្ខណេ អសញ្ញសត្តានំ តេសំ តត្ថ អកុសលា ធម្មា ន ឧប្បជ្ជន្តិ, នោ ច តេសំ តត្ថ អព្យាកតា ធម្មា ន ឧប្បជ្ជិត្ថ. សុទ្ធាវាសំ ឧបបជ្ជន្តានំ តេសំ តត្ថ អកុសលា ច ធម្មា ន ឧប្បជ្ជន្តិ អព្យាកតា ច ធម្មា ន ឧប្បជ្ជិត្ថ.

(ខ) យស្ស វា បន យត្ថ អព្យាកតា ធម្មា ន ឧប្បជ្ជិត្ថ តស្ស តត្ថ អកុសលា ធម្មា ន ឧប្បជ្ជន្តីតិ? អាមន្តា.