៣. សុទ្ធសង្ខារវារោ

(ក) អនុលោមំ

១៦. (ក) កាយសង្ខារោ វចីសង្ខារោតិ? នោ.

(ខ) វចីសង្ខារោ កាយសង្ខារោតិ? នោ.

(ក) កាយសង្ខារោ ចិត្តសង្ខារោតិ? នោ.

(ខ) ចិត្តសង្ខារោ កាយសង្ខារោតិ? នោ.

(ក) វចីសង្ខារោ ចិត្តសង្ខារោតិ? នោ.

(ខ) ចិត្តសង្ខារោ វចីសង្ខារោតិ? នោ.

(ខ) បច្ចនីកំ

១៧. (ក) ន កាយសង្ខារោ ន វចីសង្ខារោតិ?

វចីសង្ខារោ ន កាយសង្ខារោ, វចីសង្ខារោ. កាយសង្ខារញ្ច វចីសង្ខារញ្ច ឋបេត្វា អវសេសា ន ចេវ កាយសង្ខារោ ន ច វចីសង្ខារោ.

(ខ) ន វចីសង្ខារោ ន កាយសង្ខារោតិ?

កាយសង្ខារោ ន វចីសង្ខារោ, កាយសង្ខារោ. វចីសង្ខារញ្ច កាយសង្ខារញ្ច ឋបេត្វា អវសេសា ន ចេវ វចីសង្ខារោ ន ច កាយសង្ខារោ.

(ក) ន កាយសង្ខារោ ន ចិត្តសង្ខារោតិ?

ចិត្តសង្ខារោ ន កាយសង្ខារោ, ចិត្តសង្ខារោ. កាយសង្ខារញ្ច ចិត្តសង្ខារញ្ច ឋបេត្វា អវសេសា ន ចេវ កាយសង្ខារោ ន ច ចិត្តសង្ខារោ.

(ខ) ន ចិត្តសង្ខារោ ន កាយសង្ខារោតិ?

កាយសង្ខារោ ន ចិត្តសង្ខារោ, កាយសង្ខារោ. ចិត្តសង្ខារញ្ច កាយសង្ខារញ្ច ឋបេត្វា អវសេសា ន ចេវ ចិត្តសង្ខារោ ន ច កាយសង្ខារោ.

១៨. (ក) ន វចីសង្ខារោ ន ចិត្តសង្ខារោតិ?

ចិត្តសង្ខារោ ន វចីសង្ខារោ, ចិត្តសង្ខារោ. វចីសង្ខារញ្ច ចិត្តសង្ខារញ្ច ឋបេត្វា អវសេសា ន ចេវ វចីសង្ខារោ ន ច ចិត្តសង្ខារោ.

(ខ) ន ចិត្តសង្ខារោ ន វចីសង្ខារោតិ?

វចីសង្ខារោ ន ចិត្តសង្ខារោ, វចីសង្ខារោ. ចិត្តសង្ខារញ្ច វចីសង្ខារញ្ច ឋបេត្វា អវសេសា ន ចេវ ចិត្តសង្ខារោ ន ច វចីសង្ខារោ.

បណ្ណត្តិនិទ្ទេសវារោ.