(១) បច្ចុប្បន្នវារោ

(ក) អនុលោមបុគ្គលោ

១២៨. (ក) យស្ស កាយសង្ខារោ ឧប្បជ្ជតិ តស្ស វចីសង្ខារោ និរុជ្ឈតីតិ? នោ.

(ខ) យស្ស វា បន វចីសង្ខារោ និរុជ្ឈតិ តស្ស កាយសង្ខារោ ឧប្បជ្ជតីតិ? នោ.

(ក) យស្ស កាយសង្ខារោ ឧប្បជ្ជតិ តស្ស ចិត្តសង្ខារោ និរុជ្ឈតីតិ? នោ.

(ខ) យស្ស វា បន ចិត្តសង្ខារោ និរុជ្ឈតិ តស្ស កាយសង្ខារោ ឧប្បជ្ជតីតិ? នោ.

១២៩. (ក) យស្ស វចីសង្ខារោ ឧប្បជ្ជតិ តស្ស ចិត្តសង្ខារោ និរុជ្ឈតីតិ? នោ.

(ខ) យស្ស វា បន…បេ…? នោ.

(ខ) អនុលោមឱកាសោ

១៣០. យត្ថ កាយសង្ខារោ ឧប្បជ្ជតិ តត្ថ វចីសង្ខារោ និរុជ្ឈតីតិ?

ទុតិយជ្ឈានេ តតិយជ្ឈានេ តត្ថ…បេ… (ឥតរេសំ យត្ថកានំ សទិសំ).

(គ) អនុលោមបុគ្គលោកាសា

១៣១. យស្ស យត្ថ កាយសង្ខារោ ឧប្បជ្ជតិ…បេ… (យស្សកម្បិ យស្សយត្ថកម្បិ សទិសំ).

(ឃ) បច្ចនីកបុគ្គលោ

១៣២. (ក) យស្ស កាយសង្ខារោ នុប្បជ្ជតិ តស្ស វចីសង្ខារោ ន និរុជ្ឈតីតិ?

វិតក្កវិចារានំ ភង្គក្ខណេ តេសំ កាយសង្ខារោ នុប្បជ្ជតិ, នោ ច តេសំ វចីសង្ខារោ ន និរុជ្ឈតិ. វិនា អស្សាសបស្សាសេហិ ចិត្តស្ស ឧប្បាទក្ខណេ វិនា វិតក្កវិចារេហិ ចិត្តស្ស ភង្គក្ខណេ និរោធសមាបន្នានំ អសញ្ញសត្តានំ តេសំ កាយសង្ខារោ ច នុប្បជ្ជតិ វចីសង្ខារោ ច ន និរុជ្ឈតិ.

(ខ) យស្ស វា បន វចីសង្ខារោ ន និរុជ្ឈតិ តស្ស កាយសង្ខារោ នុប្បជ្ជតីតិ?

អស្សាសបស្សាសានំ ឧប្បាទក្ខណេ តេសំ វចីសង្ខារោ ន និរុជ្ឈតិ, នោ ច តេសំ កាយសង្ខារោ នុប្បជ្ជតិ. វិនា អស្សាសបស្សាសេហិ ចិត្តស្ស ឧប្បាទក្ខណេ វិនា វិតក្កវិចារេហិ ចិត្តស្ស ភង្គក្ខណេ និរោធសមាបន្នានំ អសញ្ញសត្តានំ តេសំ វចីសង្ខារោ ច ន និរុជ្ឈតិ កាយសង្ខារោ ច នុប្បជ្ជតិ.

(ក) យស្ស កាយសង្ខារោ នុប្បជ្ជតិ តស្ស ចិត្តសង្ខារោ និរុជ្ឈតីតិ?

សព្ពេសំ ចិត្តស្ស ភង្គក្ខណេ តេសំ កាយសង្ខារោ នុប្បជ្ជតិ, នោ ច តេសំ ចិត្តសង្ខារោ ន និរុជ្ឈតិ. វិនា អស្សាសបស្សាសេហិ ចិត្តស្ស ឧប្បាទក្ខណេ និរោធសមាបន្នានំ អសញ្ញសត្តានំ តេសំ កាយសង្ខារោ ច នុប្បជ្ជតិ ចិត្តសង្ខារោ ច ន និរុជ្ឈតិ.

(ខ) យស្ស វា បន ចិត្តសង្ខារោ ន និរុជ្ឈតិ តស្ស កាយសង្ខារោ នុប្បជ្ជតីតិ?

អស្សាសបស្សាសានំ ឧប្បាទក្ខណេ តេសំ ចិត្តសង្ខារោ ន និរុជ្ឈតិ, នោ ច តេសំ កាយសង្ខារោ នុប្បជ្ជតិ. វិនា អស្សាសបស្សាសេហិ ចិត្តស្ស ឧប្បាទក្ខណេ និរោធសមាបន្នានំ អសញ្ញសត្តានំ តេសំ ចិត្តសង្ខារោ ច ន និរុជ្ឈតិ កាយសង្ខារោ ច នុប្បជ្ជតិ.

១៣៣. (ក) យស្ស វចីសង្ខារោ នុប្បជ្ជតិ តស្ស ចិត្តសង្ខារោ ន និរុជ្ឈតីតិ?

សព្ពេសំ ចិត្តស្ស ភង្គក្ខណេ តេសំ វចីសង្ខារោ នុប្បជ្ជតិ, នោ ច តេសំ ចិត្តសង្ខារោ ន និរុជ្ឈតិ. វិនា វិតក្កវិចារេហិ ចិត្តស្ស ឧប្បាទក្ខណេ និរោធសមាបន្នានំ អសញ្ញសត្តានំ តេសំ វចីសង្ខារោ ច នុប្បជ្ជតិ ចិត្តសង្ខារោ ច ន និរុជ្ឈតិ.

(ខ) យស្ស វា បន ចិត្តសង្ខារោ ន និរុជ្ឈតិ តស្ស វចីសង្ខារោ នុប្បជ្ជតីតិ?

វិតក្កវិចារានំ ឧប្បាទក្ខណេ តេសំ ចិត្តសង្ខារោ ន និរុជ្ឈតិ, នោ ច តេសំ វចីសង្ខារោ នុប្បជ្ជតិ. វិនា វិតក្កវិចារេហិ ចិត្តស្ស ឧប្បាទក្ខណេ និរោធសមាបន្នានំ អសញ្ញសត្តានំ តេសំ ចិត្តសង្ខារោ ច ន និរុជ្ឈតិ វចីសង្ខារោ ច នុប្បជ្ជតិ.

(ង) បច្ចនីកឱកាសោ

១៣៤. យត្ថ កាយសង្ខារោ នុប្បជ្ជតិ…បេ….

(ច) បច្ចនីកបុគ្គលោកាសា

១៣៥. យស្ស យត្ថ កាយសង្ខារោ នុប្បជ្ជតិ…បេ….

(យស្សកម្បិ យស្សយត្ថកម្បិ សទិសំ, យស្សយត្ថកេ និរោធសមាបន្នានន្តិ ន លព្ភតិ).