(៦) អតីតានាគតវារោ

(ក) អនុលោមបុគ្គលោ

១១៨. (ក) យស្ស កាយសង្ខារោ និរុជ្ឈិត្ថ តស្ស វចីសង្ខារោ និរុជ្ឈិស្សតីតិ?

សវិតក្កសវិចារបច្ឆិមចិត្តស្ស ភង្គក្ខណេ អវិតក្កអវិចារបច្ឆិមចិត្តសមង្គីនំ យស្ស ចិត្តស្ស អនន្តរា អវិតក្កអវិចារំ បច្ឆិមចិត្តំ ឧប្បជ្ជិស្សតិ តេសំ កាយសង្ខារោ និរុជ្ឈិត្ថ, នោ ច តេសំ វចីសង្ខារោ និរុជ្ឈិស្សតិ. ឥតរេសំ តេសំ កាយសង្ខារោ ច និរុជ្ឈិត្ថ វចីសង្ខារោ ច និរុជ្ឈិស្សតិ.

(ខ) យស្ស វា បន…បេ…? អាមន្តា.

(ក) យស្ស កាយសង្ខារោ និរុជ្ឈិត្ថ តស្ស ចិត្តសង្ខារោ និរុជ្ឈិស្សតីតិ?

បច្ឆិមចិត្តស្ស ភង្គក្ខណេ តេសំ កាយសង្ខារោ និរុជ្ឈិត្ថ, នោ ច តេសំ ចិត្តសង្ខារោ និរុជ្ឈិស្សតិ. ឥតរេសំ តេសំ កាយសង្ខារោ ច និរុជ្ឈិត្ថ ចិត្តសង្ខារោ ច និរុជ្ឈិស្សតិ.

(ខ) យស្ស វា បន…បេ…? អាមន្តា.

១១៩. (ក) យស្ស វចីសង្ខារោ និរុជ្ឈិត្ថ តស្ស ចិត្តសង្ខារោ និរុជ្ឈិស្សតីតិ?

បច្ឆិមចិត្តស្ស ភង្គក្ខណេ តេសំ វចីសង្ខារោ និរុជ្ឈិត្ថ, នោ ច តេសំ ចិត្តសង្ខារោ និរុជ្ឈិស្សតិ. ឥតរេសំ តេសំ វចីសង្ខារោ ច និរុជ្ឈិត្ថ ចិត្តសង្ខារោ ច និរុជ្ឈិស្សតិ.

(ខ) យស្ស វា បន…បេ…? អាមន្តា.

(ខ) អនុលោមឱកាសោ

១២០. យត្ថ កាយសង្ខារោ និរុជ្ឈិត្ថ…បេ….

(គ) អនុលោមបុគ្គលោកាសា

១២១. (ក) យស្ស យត្ថ កាយសង្ខារោ និរុជ្ឈិត្ថ តស្ស តត្ថ វចីសង្ខារោ និរុជ្ឈិស្សតីតិ?

កាមាវចរេ បច្ឆិមចិត្តស្ស ភង្គក្ខណេ ទុតិយជ្ឈានំ តតិយជ្ឈានំ សមាបន្នានំ តេសំ តត្ថ កាយសង្ខារោ និរុជ្ឈិត្ថ, នោ ច តេសំ តត្ថ វចីសង្ខារោ និរុជ្ឈិស្សតិ. បឋមជ្ឈានំ សមាបន្នានំ ឥតរេសំ កាមាវចរានំ តេសំ តត្ថ កាយសង្ខារោ ន និរុជ្ឈិត្ថ វចីសង្ខារោ ច និរុជ្ឈិស្សតិ.

(ខ) យស្ស វា បន យត្ថ វចីសង្ខារោ និរុជ្ឈិស្សតិ តស្ស តត្ថ កាយសង្ខារោ និរុជ្ឈិត្ថាតិ?

រូបាវចរានំ អរូបាវចរានំ តេសំ តត្ថ វចីសង្ខារោ និរុជ្ឈិស្សតិ, នោ ច តេសំ តត្ថ កាយសង្ខារោ និរុជ្ឈិត្ថ. បឋមជ្ឈានំ សមាបន្នានំ កាមាវចរានំ តេសំ តត្ថ វចីសង្ខារោ ច និរុជ្ឈិស្សតិ កាយសង្ខារោ ច និរុជ្ឈិត្ថ.

(ក) យស្ស យត្ថ កាយសង្ខារោ និរុជ្ឈិត្ថ តស្ស តត្ថ ចិត្តសង្ខារោ និរុជ្ឈិស្សតីតិ?

កាមាវចរេ បច្ឆិមចិត្តស្ស ភង្គក្ខណេ តេសំ តត្ថ កាយសង្ខារោ និរុជ្ឈិត្ថ, នោ ច តេសំ តត្ថ ចិត្តសង្ខារោ និរុជ្ឈិស្សតិ. បឋមជ្ឈានំ ទុតិយជ្ឈានំ តតិយជ្ឈានំ សមាបន្នានំ ឥតរេសំ កាមាវចរានំ តេសំ តត្ថ កាយសង្ខារោ ច និរុជ្ឈិត្ថ ចិត្តសង្ខារោ ច និរុជ្ឈិស្សតិ.

(ខ) យស្ស វា បន យត្ថ ចិត្តសង្ខារោ និរុជ្ឈិស្សតិ តស្ស តត្ថ កាយសង្ខារោ និរុជ្ឈិត្ថាតិ?

ចតុត្ថជ្ឈានំ សមាបន្នានំ រូបាវចរានំ អរូបាវចរានំ តេសំ តត្ថ ចិត្តសង្ខារោ និរុជ្ឈិស្សតិ, នោ ច តេសំ តត្ថ កាយសង្ខារោ និរុជ្ឈិត្ថ. បឋមជ្ឈានំ ទុតិយជ្ឈានំ តតិយជ្ឈានំ សមាបន្នានំ កាមាវចរានំ តេសំ តត្ថ ចិត្តសង្ខារោ ច និរុជ្ឈិស្សតិ កាយសង្ខារោ ច និរុជ្ឈិត្ថ.

១២២. (ក) យស្ស យត្ថ វចីសង្ខារោ និរុជ្ឈិត្ថ តស្ស តត្ថ ចិត្តសង្ខារោ និរុជ្ឈិស្សតីតិ?

សវិតក្កសវិចារភូមិយំ បច្ឆិមចិត្តស្ស ភង្គក្ខណេ តេសំ តត្ថ វចីសង្ខារោ និរុជ្ឈិត្ថ, នោ ច តេសំ តត្ថ ចិត្តសង្ខារោ និរុជ្ឈិស្សតិ. ឥតរេសំ សវិតក្កសវិចារភូមិយំ តេសំ តត្ថ វចីសង្ខារោ ច និរុជ្ឈិត្ថ ចិត្តសង្ខារោ ច និរុជ្ឈិស្សតិ.

(ខ) យស្ស វា បន យត្ថ ចិត្តសង្ខារោ និរុជ្ឈិស្សតិ តស្ស តត្ថ វចីសង្ខារោ និរុជ្ឈិត្ថាតិ?

អវិតក្កអវិចារភូមិយំ តេសំ តត្ថ ចិត្តសង្ខារោ និរុជ្ឈិស្សតិ, នោ ច តេសំ តត្ថ វចីសង្ខារោ និរុជ្ឈិត្ថ. សវិតក្កសវិចារភូមិយំ តេសំ តត្ថ ចិត្តសង្ខារោ ច និរុជ្ឈិស្សតិ វចីសង្ខារោ ច និរុជ្ឈិត្ថ.

(ឃ) បច្ចនីកបុគ្គលោ

១២៣. (ក) យស្ស កាយសង្ខារោ ន និរុជ្ឈិត្ថ តស្ស វចីសង្ខារោ ន និរុជ្ឈិស្សតីតិ? នត្ថិ.

(ខ) យស្ស វា បន វចីសង្ខារោ ន និរុជ្ឈិស្សតិ តស្ស កាយសង្ខារោ ន និរុជ្ឈិត្ថាតិ? និរុជ្ឈិត្ថ.

(ក) យស្ស កាយសង្ខារោ ន និរុជ្ឈិត្ថ តស្ស ចិត្តសង្ខារោ ន និរុជ្ឈិស្សតីតិ? នត្ថិ.

(ខ) យស្ស វា បន ចិត្តសង្ខារោ ន និរុជ្ឈិស្សតិ តស្ស កាយសង្ខារោ ន និរុជ្ឈិត្ថាតិ? និរុជ្ឈិត្ថ.

១២៤. (ក) យស្ស វចីសង្ខារោ ន និរុជ្ឈិត្ថ តស្ស ចិត្តសង្ខារោ ន និរុជ្ឈិស្សតីតិ? នត្ថិ.

(ខ) យស្ស វា បន ចិត្តសង្ខារោ ន និរុជ្ឈិស្សតិ តស្ស វចីសង្ខារោ ន និរុជ្ឈិត្ថាតិ? និរុជ្ឈិត្ថ.

(ង) បច្ចនីកឱកាសោ

១២៥. យត្ថ កាយសង្ខារោ ន និរុជ្ឈិត្ថ…បេ….

(ច) បច្ចនីកបុគ្គលោកាសា

១២៦. (ក) យស្ស យត្ថ កាយសង្ខារោ ន និរុជ្ឈិត្ថ តស្ស តត្ថ វចីសង្ខារោ ន និរុជ្ឈិស្សតីតិ?

រូបាវចរានំ អរូបាវចរានំ តេសំ តត្ថ កាយសង្ខារោ ន និរុជ្ឈិត្ថ, នោ ច តេសំ តត្ថ វចីសង្ខារោ ន និរុជ្ឈិស្សតិ. រូបាវចរេ អរូបាវចរេ សវិតក្កសវិចារបច្ឆិមចិត្តស្ស ភង្គក្ខណេ អវិតក្កអវិចារបច្ឆិមចិត្តសមង្គីនំ យស្ស ចិត្តស្ស អនន្តរា អវិតក្កអវិចារំ បច្ឆិមចិត្តំ ឧប្បជ្ជិស្សតិ ចតុត្ថជ្ឈានំ សមាបន្នានំ អសញ្ញសត្តានំ តេសំ តត្ថ កាយសង្ខារោ ច ន និរុជ្ឈិត្ថ វចីសង្ខារោ ច ន និរុជ្ឈិស្សតិ.

(ខ) យស្ស វា បន យត្ថ វចីសង្ខារោ ន និរុជ្ឈិស្សតិ តស្ស តត្ថ កាយសង្ខារោ ន និរុជ្ឈិត្ថាតិ?

កាមាវចរេ បច្ឆិមចិត្តស្ស ភង្គក្ខណេ ទុតិយជ្ឈានំ តតិយជ្ឈានំ សមាបន្នានំ តេសំ តត្ថ វចីសង្ខារោ ន និរុជ្ឈិស្សតិ, នោ ច តេសំ តត្ថ កាយសង្ខារោ ន និរុជ្ឈិត្ថ. រូបាវចរេ អរូបាវចរេ សវិតក្កសវិចារបច្ឆិមចិត្តស្ស ភង្គក្ខណេ អវិតក្កអវិចារបច្ឆិមចិត្តសមង្គីនំ យស្ស ចិត្តស្ស អនន្តរា អវិតក្កអវិចារំ បច្ឆិមចិត្តំ ឧប្បជ្ជិស្សតិ ចតុត្ថជ្ឈានំ សមាបន្នានំ អសញ្ញសត្តានំ តេសំ តត្ថ វចីសង្ខារោ ច ន និរុជ្ឈិស្សតិ កាយសង្ខារោ ច ន និរុជ្ឈិត្ថ.

(ក) យស្ស យត្ថ កាយសង្ខារោ ន និរុជ្ឈិត្ថ តស្ស តត្ថ ចិត្តសង្ខារោ ន និរុជ្ឈិស្សតីតិ?

ចតុត្ថជ្ឈានំ សមាបន្នានំ រូបាវចរានំ អរូបាវចរានំ តេសំ តត្ថ កាយសង្ខារោ ន និរុជ្ឈិត្ថ, នោ ច តេសំ តត្ថ ចិត្តសង្ខារោ ន និរុជ្ឈិស្សតិ. រូបាវចរេ អរូបាវចរេ បច្ឆិមចិត្តស្ស ភង្គក្ខណេ អសញ្ញសត្តានំ តេសំ តត្ថ កាយសង្ខារោ ច ន និរុជ្ឈិត្ថ ចិត្តសង្ខារោ ច ន និរុជ្ឈិស្សតិ.

(ខ) យស្ស វា បន យត្ថ ចិត្តសង្ខារោ ន និរុជ្ឈិស្សតិ តស្ស តត្ថ កាយសង្ខារោ ន និរុជ្ឈិត្ថាតិ?

កាមាវចរេ បច្ឆិមចិត្តស្ស ភង្គក្ខណេ តេសំ តត្ថ ចិត្តសង្ខារោ ន និរុជ្ឈិស្សតិ, នោ ច តេសំ តត្ថ កាយសង្ខារោ ន និរុជ្ឈិត្ថ. រូបាវចរេ អរូបាវចរេ បច្ឆិមចិត្តស្ស ភង្គក្ខណេ អសញ្ញសត្តានំ តេសំ តត្ថ ចិត្តសង្ខារោ ច ន និរុជ្ឈិស្សតិ កាយសង្ខារោ ច ន និរុជ្ឈិត្ថ.

១២៧. (ក) យស្ស យត្ថ វចីសង្ខារោ ន និរុជ្ឈិត្ថ តស្ស តត្ថ ចិត្តសង្ខារោ ន និរុជ្ឈិស្សតីតិ?

អវិតក្កអវិចារភូមិយំ តេសំ តត្ថ វចីសង្ខារោ ន និរុជ្ឈិត្ថ, នោ ច តេសំ តត្ថ ចិត្តសង្ខារោ ន និរុជ្ឈិស្សតិ. អវិតក្កអវិចារភូមិយំ បច្ឆិមចិត្តស្ស ភង្គក្ខណេ អសញ្ញសត្តានំ តេសំ តត្ថ វចីសង្ខារោ ច ន និរុជ្ឈិត្ថ ចិត្តសង្ខារោ ច ន និរុជ្ឈិស្សតិ.

(ខ) យស្ស វា បន យត្ថ ចិត្តសង្ខារោ ន និរុជ្ឈិស្សតិ តស្ស តត្ថ វចីសង្ខារោ ន និរុជ្ឈិត្ថាតិ?

សវិតក្កសវិចារភូមិយំ បច្ឆិមចិត្តស្ស ភង្គក្ខណេ តេសំ តត្ថ ចិត្តសង្ខារោ ន និរុជ្ឈិស្សតិ, នោ ច តេសំ តត្ថ វចីសង្ខារោ ន និរុជ្ឈិត្ថ. អវិតក្កអវិចារភូមិយំ បច្ឆិមចិត្តស្ស ភង្គក្ខណេ អសញ្ញសត្តានំ តេសំ តត្ថ ចិត្តសង្ខារោ ច ន និរុជ្ឈិស្សតិ វចីសង្ខារោ ច ន និរុជ្ឈិត្ថ.

និរោធវារោ.