(១) បច្ចុប្បន្នវារោ

(ក) អនុលោមបុគ្គលោ

៧៩. (ក) យស្ស កាយសង្ខារោ និរុជ្ឈតិ តស្ស វចីសង្ខារោ និរុជ្ឈតីតិ?

វិនា វិតក្កវិចារេហិ អស្សាសបស្សាសានំ ភង្គក្ខណេ តេសំ កាយសង្ខារោ និរុជ្ឈតិ, នោ ច តេសំ វចីសង្ខារោ និរុជ្ឈតិ. បឋមជ្ឈានំ សមាបន្នានំ កាមាវចរានំ អស្សាសបស្សាសានំ ភង្គក្ខណេ តេសំ កាយសង្ខារោ ច និរុជ្ឈតិ វចីសង្ខារោ ច និរុជ្ឈតិ.

(ខ) យស្ស វា បន វចីសង្ខារោ និរុជ្ឈតិ តស្ស កាយសង្ខារោ និរុជ្ឈតីតិ?

វិនា អស្សាសបស្សាសេហិ វិតក្កវិចារានំ ភង្គក្ខណេ តេសំ វចីសង្ខារោ និរុជ្ឈតិ, នោ ច តេសំ កាយសង្ខារោ និរុជ្ឈតិ. បឋមជ្ឈានំ សមាបន្នានំ កាមាវចរានំ អស្សាសបស្សាសានំ ភង្គក្ខណេ តេសំ វចីសង្ខារោ ច និរុជ្ឈតិ កាយសង្ខារោ ច និរុជ្ឈតិ.

(ក) យស្ស កាយសង្ខារោ និរុជ្ឈតិ តស្ស ចិត្តសង្ខារោ និរុជ្ឈតីតិ? អាមន្តា.

(ខ) យស្ស វា បន ចិត្តសង្ខារោ និរុជ្ឈតិ តស្ស កាយសង្ខារោ និរុជ្ឈតីតិ?

វិនា អស្សាសបស្សាសេហិ ចិត្តស្ស ភង្គក្ខណេ តេសំ ចិត្តសង្ខារោ និរុជ្ឈតិ, នោ ច តេសំ កាយសង្ខារោ និរុជ្ឈតិ. អស្សាសបស្សាសានំ ភង្គក្ខណេ តេសំ ចិត្តសង្ខារោ ច និរុជ្ឈតិ កាយសង្ខារោ ច និរុជ្ឈតិ.

៨០. (ក) យស្ស វចីសង្ខារោ និរុជ្ឈតិ តស្ស ចិត្តសង្ខារោ និរុជ្ឈតីតិ? អាមន្តា.

(ខ) យស្ស វា បន ចិត្តសង្ខារោ និរុជ្ឈតិ តស្ស វចីសង្ខារោ និរុជ្ឈតីតិ?

វិនា វិតក្កវិចារេហិ ចិត្តស្ស ភង្គក្ខណេ តេសំ ចិត្តសង្ខារោ និរុជ្ឈតិ, នោ ច តេសំ វចីសង្ខារោ និរុជ្ឈតិ. វិតក្កវិចារានំ ភង្គក្ខណេ តេសំ ចិត្តសង្ខារោ ច និរុជ្ឈតិ វចីសង្ខារោ ច និរុជ្ឈតិ.

(ខ) អនុលោមឱកាសោ

៨១. យត្ថ កាយសង្ខារោ និរុជ្ឈតិ តត្ថ វចីសង្ខារោ និរុជ្ឈតីតិ?…បេ….

(គ) អនុលោមបុគ្គលោកាសា

៨២. យស្ស យត្ថ កាយសង្ខារោ និរុជ្ឈតិ តស្ស តត្ថ វចីសង្ខារោ និរុជ្ឈតីតិ?…បេ…. (យស្សកម្បិ យស្សយត្ថកម្បិ សទិសំ.)

(ឃ) បច្ចនីកបុគ្គលោ

៨៣. (ក) យស្ស កាយសង្ខារោ ន និរុជ្ឈតិ តស្ស វចីសង្ខារោ ន និរុជ្ឈតីតិ?

វិនា អស្សាសបស្សាសេហិ វិតក្កវិចារានំ ភង្គក្ខណេ តេសំ កាយសង្ខារោ ន និរុជ្ឈតិ, នោ ច តេសំ វចីសង្ខារោ ន និរុជ្ឈតិ. សព្ពេសំ ចិត្តស្ស ឧប្បាទក្ខណេ វិនា អស្សាសបស្សាសេហិ អវិតក្កអវិចារចិត្តស្ស ភង្គក្ខណេ និរោធសមាបន្នានំ អសញ្ញសត្តានំ តេសំ កាយសង្ខារោ ច ន និរុជ្ឈតិ វចីសង្ខារោ ច ន និរុជ្ឈតិ.

(ខ) យស្ស វា បន វចីសង្ខារោ ន និរុជ្ឈតិ តស្ស កាយសង្ខារោ ន និរុជ្ឈតីតិ?

វិនា វិតក្កវិចារេហិ អស្សាសបស្សាសានំ ភង្គក្ខណេ តេសំ វចីសង្ខារោ ន និរុជ្ឈតិ, នោ ច តេសំ កាយសង្ខារោ ន និរុជ្ឈតិ. សព្ពេសំ ចិត្តស្ស ឧប្បាទក្ខណេ វិនា អស្សាសបស្សាសេហិ អវិតក្កអវិចារចិត្តស្ស ភង្គក្ខណេ និរោធសមាបន្នានំ អសញ្ញសត្តានំ តេសំ វចីសង្ខារោ ច ន និរុជ្ឈតិ កាយសង្ខារោ ច ន និរុជ្ឈតិ.

(ក) យស្ស កាយសង្ខារោ ន និរុជ្ឈតិ តស្ស ចិត្តសង្ខារោ ន និរុជ្ឈតីតិ?

វិនា អស្សាសបស្សាសេហិ ចិត្តស្ស ភង្គក្ខណេ តេសំ កាយសង្ខារោ ន និរុជ្ឈតិ, នោ ច តេសំ ចិត្តសង្ខារោ ន និរុជ្ឈតិ. សព្ពេសំ ចិត្តស្ស ឧប្បាទក្ខណេ និរោធសមាបន្នានំ អសញ្ញសត្តានំ តេសំ កាយសង្ខារោ ច ន និរុជ្ឈតិ ចិត្តសង្ខារោ ច ន និរុជ្ឈតិ.

(ខ) យស្ស វា បន…បេ…? អាមន្តា.

៨៤. (ក) យស្ស វចីសង្ខារោ ន និរុជ្ឈតិ តស្ស ចិត្តសង្ខារោ ន និរុជ្ឈតីតិ?

វិនា វិតក្កវិចារេហិ ចិត្តស្ស ភង្គក្ខណេ តេសំ វចីសង្ខារោ ន និរុជ្ឈតិ, នោ ច តេសំ ចិត្តសង្ខារោ ន និរុជ្ឈតិ. សព្ពេសំ ចិត្តស្ស ឧប្បាទក្ខណេ និរោធសមាបន្នានំ អសញ្ញសត្តានំ តេសំ វចីសង្ខារោ ច ន និរុជ្ឈតិ ចិត្តសង្ខារោ ច ន និរុជ្ឈតិ.

(ខ) យស្ស វា បន…បេ…? អាមន្តា.

(ង) បច្ចនីកឱកាសា

៨៥. យត្ថ កាយសង្ខារោ ន និរុជ្ឈតិ…បេ….

(ច) បច្ចនីកបុគ្គលោកាសា

៨៦. យស្ស យត្ថ កាយសង្ខារោ ន និរុជ្ឈតិ តស្ស តត្ថ វចីសង្ខារោ ន និរុជ្ឈតីតិ?

វិនា អស្សាសបស្សាសេហិ វិតក្កវិចារានំ ភង្គក្ខណេ តេសំ តត្ថ កាយសង្ខារោ ន និរុជ្ឈតិ, នោ ច តេសំ តត្ថ វចីសង្ខារោ ន និរុជ្ឈតិ. សព្ពេសំ ចិត្តស្ស ឧប្បាទក្ខណេ វិនា អស្សាសបស្សាសេហិ អវិតក្កអវិចារចិត្តស្ស ភង្គក្ខណេ អសញ្ញសត្តានំ តេសំ តត្ថ កាយសង្ខារោ ច ន និរុជ្ឈតិ វចីសង្ខារោ ច ន និរុជ្ឈតិ.

យស្ស វា បន យត្ថ វចីសង្ខារោ ន និរុជ្ឈតិ…បេ….

(យស្សកម្បិ យស្សយត្ថកម្បិ សទិសំ វិត្ថារេតព្ពំ, យស្សយត្ថកេ និរោធសមាបន្នានន្តិ ន កាតព្ពំ.)