១-៧. បដិច្ចវារាទិ

បច្ចយចតុក្កំ

ហេតុបច្ចយោ

១០. គន្ថនិយំ កុសលំ ធម្មំ បដិច្ច គន្ថនិយោ កុសលោ ធម្មោ ឧប្បជ្ជតិ ហេតុបច្ចយា. (១)

អគន្ថនិយំ កុសលំ ធម្មំ បដិច្ច អគន្ថនិយោ កុសលោ ធម្មោ ឧប្បជ្ជតិ ហេតុបច្ចយា. (១) (សំខិត្តំ.)

១១. ហេតុយា ទ្វេ, អារម្មណេ ទ្វេ…បេ… អវិគតេ ទ្វេ (សំខិត្តំ, លោកិយលោកុត្តរគមនសទិសំ).

(សហជាតវារោបិ…បេ… បញ្ហាវារោបិ វិត្ថារេតព្ពា.)

១២. គន្ថនិយំ អកុសលំ ធម្មំ បដិច្ច គន្ថនិយោ អកុសលោ ធម្មោ ឧប្បជ្ជតិ ហេតុបច្ចយា (សំខិត្តំ).

១៣. ហេតុយា ឯកំ, អារម្មណេ ឯកំ…បេ… អវិគតេ ឯកំ (សំខិត្តំ).

(សហជាតវារេបិ…បេ… បញ្ហាវារេបិ សព្ពត្ថ ឯកំ.)

១៤. គន្ថនិយំ អព្យាកតំ ធម្មំ បដិច្ច គន្ថនិយោ អព្យាកតោ ធម្មោ ឧប្បជ្ជតិ ហេតុបច្ចយា. (១)

អគន្ថនិយំ អព្យាកតំ ធម្មំ បដិច្ច អគន្ថនិយោ អព្យាកតោ ធម្មោ ឧប្បជ្ជតិ ហេតុបច្ចយា… តីណិ. (៣)

គន្ថនិយំ អព្យាកតញ្ច អគន្ថនិយំ អព្យាកតញ្ច ធម្មំ បដិច្ច គន្ថនិយោ អព្យាកតោ ធម្មោ ឧប្បជ្ជតិ ហេតុបច្ចយា. (១) (សំខិត្តំ.)

១៥. ហេតុយា បញ្ច, អារម្មណេ ទ្វេ…បេ… អវិគតេ បញ្ច (សំខិត្តំ, លោកិយលោកុត្តរគមនសទិសំ).

(សហជាតវារោបិ…បេ… បញ្ហាវារោបិ វិត្ថារេតព្ពា.)