៧. បញ្ហាវារោ

បច្ចយចតុក្កំ

ហេតុ-អារម្មណបច្ចយា

៥៤. អាសវវិប្បយុត្តោ សាសវោ អព្យាកតោ ធម្មោ អាសវវិប្បយុត្តស្ស សាសវស្ស អព្យាកតស្ស ធម្មស្ស ហេតុបច្ចយេន បច្ចយោ.

អាសវវិប្បយុត្តោ អនាសវោ អព្យាកតោ ធម្មោ អាសវវិប្បយុត្តស្ស អនាសវស្ស អព្យាកតស្ស ធម្មស្ស ហេតុបច្ចយេន បច្ចយោ. អាសវវិប្បយុត្តោ អនាសវោ អព្យាកតោ ធម្មោ អាសវវិប្បយុត្តស្ស សាសវស្ស អព្យាកតស្ស ធម្មស្ស ហេតុបច្ចយេន បច្ចយោ. អាសវវិប្បយុត្តោ អនាសវោ អព្យាកតោ ធម្មោ អាសវវិប្បយុត្តស្ស សាសវស្ស អព្យាកតស្ស ច អាសវវិប្បយុត្តស្ស អនាសវស្ស អព្យាកតស្ស ច ធម្មស្ស ហេតុបច្ចយេន បច្ចយោ. (៣)

អាសវវិប្បយុត្តោ សាសវោ អព្យាកតោ ធម្មោ អាសវវិប្បយុត្តស្ស សាសវស្ស អព្យាកតស្ស ធម្មស្ស អារម្មណបច្ចយេន បច្ចយោ. (១)

អាសវវិប្បយុត្តោ អនាសវោ អព្យាកតោ ធម្មោ អាសវវិប្បយុត្តស្ស អនាសវស្ស អព្យាកតស្ស ធម្មស្ស អារម្មណបច្ចយេន បច្ចយោ. អាសវវិប្បយុត្តោ អនាសវោ អព្យាកតោ ធម្មោ អាសវវិប្បយុត្តស្ស សាសវស្ស អព្យាកតស្ស ធម្មស្ស អារម្មណបច្ចយេន បច្ចយោ. (២) (សំខិត្តំ.)

៥៥. ហេតុយា ចត្តារិ, អារម្មណេ តីណិ, អធិបតិយា ចត្តារិ, អនន្តរេ ចត្តារិ, សមនន្តរេ ចត្តារិ, សហជាតេ បញ្ច, អញ្ញមញ្ញេ ទ្វេ, និស្សយេ សត្ត, ឧបនិស្សយេ ចត្តារិ, បុរេជាតេ ទ្វេ, អាសេវនេ ឯកំ, កម្មេ ចត្តារិ, វិបាកេ ចត្តារិ, អាហារេ ចត្តារិ…បេ… អវិគតេ សត្ត (សំខិត្តំ).

បច្ចនីយុទ្ធារោ

៥៦. អាសវវិប្បយុត្តោ សាសវោ អព្យាកតោ ធម្មោ អាសវវិប្បយុត្តស្ស សាសវស្ស អព្យាកតស្ស ធម្មស្ស អារម្មណបច្ចយេន បច្ចយោ… សហជាតបច្ចយេន បច្ចយោ… ឧបនិស្សយបច្ចយេន បច្ចយោ… បុរេជាតបច្ចយេន បច្ចយោ… បច្ឆាជាតបច្ចយេន បច្ចយោ… អាហារបច្ចយេន បច្ចយោ… ឥន្ទ្រិយបច្ចយេន បច្ចយោ (សំខិត្តំ).

៥៧. នហេតុយា សត្ត, នអារម្មណេ សត្ត (សំខិត្តំ).

ហេតុបច្ចយា នអារម្មណេ ចត្តារិ (សំខិត្តំ).

នហេតុបច្ចយា អារម្មណេ តីណិ (សំខិត្តំ).

(យថា កុសលត្តិកេ បញ្ហាវារស្ស អនុលោមម្បិ បច្ចនីយម្បិ អនុលោមបច្ចនីយម្បិ បច្ចនីយានុលោមម្បិ គណិតំ, ឯវំ គណេតព្ពំ.)

អាសវវិប្បយុត្តសាសវទុកកុសលត្តិកំ និដ្ឋិតំ.

អាសវគោច្ឆកំ និដ្ឋិតំ.