៧. បញ្ហាវារោ

ហេតុបច្ចយោ

៣៦. អាសវោ ចេវ សាសវោច អកុសលោ ធម្មោ អាសវស្ស ចេវ សាសវស្ស ច អកុសលស្ស ធម្មស្ស ហេតុបច្ចយេន បច្ចយោ (សំខិត្តំ).

៣៧. ហេតុយា សត្ត, អារម្មណេ នវ, អធិបតិយា នវ…បេ… ឧបនិស្សយេ អាសេវនេ នវ, កម្មេ អាហារេ ឥន្ទ្រិយេ ឈានេ តីណិ, មគ្គេ សម្បយុត្តេ នវ…បេ… អវិគតេ នវ (សំខិត្តំ).

បច្ចនីយុទ្ធារោ

៣៨. អាសវោ ចេវ សាសវោ ច អកុសលោ ធម្មោ អាសវស្ស ចេវ សាសវស្ស ច អកុសលស្ស ធម្មស្ស អារម្មណបច្ចយេន បច្ចយោ… សហជាតបច្ចយេន បច្ចយោ… ឧបនិស្សយបច្ចយេន បច្ចយោ (សំខិត្តំ).

៣៩. នហេតុយា នវ, នអារម្មណេ នវ (សំខិត្តំ).

ហេតុបច្ចយា នអារម្មណេ សត្ត (សំខិត្តំ).

នហេតុបច្ចយា អារម្មណេ នវ (សំខិត្តំ).

(យថា កុសលត្តិកេ បញ្ហាវារស្ស អនុលោមម្បិ បច្ចនីយម្បិ អនុលោមបច្ចនីយម្បិ បច្ចនីយានុលោមម្បិ គណិតំ, ឯវំ គណេតព្ពំ.)

៣. អព្យាកតបទំ

ហេតុបច្ចយោ

៤០. សាសវញ្ចេវ នោ ច អាសវំ អព្យាកតំ ធម្មំ បដិច្ច សាសវោ ចេវ នោ ច អាសវោ អព្យាកតោ ធម្មោ ឧប្បជ្ជតិ ហេតុបច្ចយា (សំខិត្តំ).

៤១. ហេតុយា ឯកំ, អារម្មណេ ឯកំ…បេ… អវិគតេ ឯកំ (សំខិត្តំ).

(សហជាតវារេបិ …បេ… បញ្ហាវារេបិ សព្ពត្ថ ឯកំ.)

អាសវសាសវទុកកុសលត្តិកំ និដ្ឋិតំ.