១-៧. បដិច្ចវារាទិ

បច្ចយចតុក្កំ

៩៤. និយតំ កុសលំ ធម្មំ បដិច្ច និយតោ កុសលោ ធម្មោ ឧប្បជ្ជតិ ហេតុបច្ចយា. (១)

អនិយតំ កុសលំ ធម្មំ បដិច្ច អនិយតោ កុសលោ ធម្មោ ឧប្បជ្ជតិ ហេតុបច្ចយា. (១) (សំខិត្តំ.)

៩៥. ហេតុយា ទ្វេ, អារម្មណេ ទ្វេ…បេ… អវិគតេ ទ្វេ (សំខិត្តំ. លោកិយទុកកុសលសទិសំ. សហជាតវារម្បិ…បេ… បញ្ហាវារម្បិ វិត្ថារេតព្ពំ).

៩៦. និយតំ អកុសលំ ធម្មំ បដិច្ច និយតោ អកុសលោ ធម្មោ ឧប្បជ្ជតិ ហេតុបច្ចយា. (១)

អនិយតំ អកុសលំ ធម្មំ បដិច្ច អនិយតោ អកុសលោ ធម្មោ ឧប្បជ្ជតិ ហេតុបច្ចយា. (១) (សំខិត្តំ.)

៩៧. ហេតុយា ទ្វេ, អារម្មណេ ទ្វេ (សព្ពត្ថ ទ្វេ), អវិគតេ ទ្វេ (សំខិត្តំ).

នហេតុយា ឯកំ, នអធិបតិយា ទ្វេ, នបុរេជាតេ ឯកំ…បេ… នកម្មេ ទ្វេ…បេ… នវិប្បយុត្តេ ឯកំ (សំខិត្តំ. សហជាតវារាទិ វិត្ថារេតព្ពោ).

៩៨. និយតោ អកុសលោ ធម្មោ និយតស្ស អកុសលស្ស ធម្មស្ស ហេតុបច្ចយេន បច្ចយោ. (១)

អនិយតោ អកុសលោ ធម្មោ អនិយតស្ស អកុសលស្ស ធម្មស្ស ហេតុបច្ចយេន បច្ចយោ. (១) (សំខិត្តំ.)

៩៩. ហេតុយា ទ្វេ, អារម្មណេ តីណិ, អធិបតិយា ទ្វេ (និយតេ សហជាតាធិបតិ, ទុតិយេ អារម្មណាធិបតិ សហជាតាធិបតិ), អនន្តរេ ទ្វេ…បេ… និស្សយេ ទ្វេ, ឧបនិស្សយេ តីណិ, អាសេវនេ ទ្វេ, កម្មេ ទ្វេ…បេ… អវិគតេ ទ្វេ (សំខិត្តំ).

១០០. អនិយតំ អព្យាកតំ ធម្មំ បដិច្ច អនិយតោ អព្យាកតោ ធម្មោ ឧប្បជ្ជតិ ហេតុបច្ចយា (សំខិត្តំ).

ហេតុយា ឯកំ, អារម្មណេ ឯកំ…បេ… អវិគតេ ឯកំ (សំខិត្តំ. សហជាតវារេបិ…បេ… បញ្ហាវារេបិ សព្ពត្ថ ឯកំ).