១. វិភង្គវារោ

ហេតុបច្ចយោ

១. ទស្សនេន បហាតព្ពហេតុកំ ធម្មំ បដិច្ច ទស្សនេន បហាតព្ពហេតុកោ ធម្មោ ឧប្បជ្ជតិ ហេតុបច្ចយា – ទស្សនេន បហាតព្ពហេតុកំ ឯកំ ខន្ធំ បដិច្ច តយោ ខន្ធា…បេ… ទ្វេ ខន្ធា. (១)

ទស្សនេន បហាតព្ពហេតុកំ ធម្មំ បដិច្ច នេវទស្សនេន នភាវនាយ បហាតព្ពហេតុកោ ធម្មោ ឧប្បជ្ជតិ ហេតុបច្ចយា – ទស្សនេន បហាតព្ពហេតុកេ ខន្ធេ បដិច្ច ចិត្តសមុដ្ឋានំ រូបំ. (២)

ទស្សនេន បហាតព្ពហេតុកំ ធម្មំ បដិច្ច ទស្សនេន បហាតព្ពហេតុកោ ច នេវទស្សនេន នភាវនាយ បហាតព្ពហេតុកោ ច ធម្មា ឧប្បជ្ជន្តិ ហេតុបច្ចយា – ទស្សនេន បហាតព្ពហេតុកំ ឯកំ ខន្ធំ បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធា…បេ…. (៣)

២. ភាវនាយ បហាតព្ពហេតុកំ ធម្មំ បដិច្ច ភាវនាយ បហាតព្ពហេតុកោ ធម្មោ ឧប្បជ្ជតិ ហេតុបច្ចយា – ភាវនាយ បហាតព្ពហេតុកំ ឯកំ ខន្ធំ បដិច្ច តយោ ខន្ធា…បេ… ទ្វេ ខន្ធា. (១)

ភាវនាយ បហាតព្ពហេតុកំ ធម្មំ បដិច្ច នេវទស្សនេន នភាវនាយ បហាតព្ពហេតុកោ ធម្មោ ឧប្បជ្ជតិ ហេតុបច្ចយា – ភាវនាយ បហាតព្ពហេតុកេ ខន្ធេ បដិច្ច ចិត្តសមុដ្ឋានំ រូបំ. (២)

ភាវនាយ បហាតព្ពហេតុកំ ធម្មំ បដិច្ច ភាវនាយ បហាតព្ពហេតុកោ ច នេវទស្សនេន នភាវនាយ បហាតព្ពហេតុកោ ច ធម្មា ឧប្បជ្ជន្តិ ហេតុបច្ចយា – ភាវនាយ បហាតព្ពហេតុកំ ឯកំ ខន្ធំ បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ…. (៣)

៣. នេវទស្សនេន នភាវនាយ បហាតព្ពហេតុកំ ធម្មំ បដិច្ច នេវទស្សនេន នភាវនាយ បហាតព្ពហេតុកោ ធម្មោ ឧប្បជ្ជតិ ហេតុបច្ចយា – នេវទស្សនេន នភាវនាយ បហាតព្ពហេតុកំ ឯកំ ខន្ធំ បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ បដិច្ច ទ្វេ ខន្ធា ចិត្តសមុដ្ឋានញ្ច រូបំ; វិចិកិច្ឆាសហគតំ ឧទ្ធច្ចសហគតំ មោហំ បដិច្ច ចិត្តសមុដ្ឋានំ រូបំ. បដិសន្ធិក្ខណេ នេវទស្សនេន នភាវនាយ បហាតព្ពហេតុកំ ឯកំ ខន្ធំ បដិច្ច តយោ ខន្ធា កដត្តា ច រូបំ…បេ… ទ្វេ ខន្ធា…បេ… ខន្ធេ បដិច្ច វត្ថុ, វត្ថុំ បដិច្ច ខន្ធា; ឯកំ មហាភូតំ បដិច្ច…បេ… មហាភូតេ បដិច្ច ចិត្តសមុដ្ឋានំ រូបំ កដត្តារូបំ ឧបាទារូបំ. (១)

នេវទស្សនេន នភាវនាយ បហាតព្ពហេតុកំ ធម្មំ បដិច្ច ទស្សនេន បហាតព្ពហេតុកោ ធម្មោ ឧប្បជ្ជតិ ហេតុបច្ចយា – វិចិកិច្ឆាសហគតំ មោហំ បដិច្ច សម្បយុត្តកា ខន្ធា. (២)

នេវទស្សនេន នភាវនាយ បហាតព្ពហេតុកំ ធម្មំ បដិច្ច ភាវនាយ បហាតព្ពហេតុកោ ធម្មោ ឧប្បជ្ជតិ ហេតុបច្ចយា – ឧទ្ធច្ចសហគតំ មោហំ បដិច្ច សម្បយុត្តកា ខន្ធា. (៣)

នេវទស្សនេន នភាវនាយ បហាតព្ពហេតុកំ ធម្មំ បដិច្ច ទស្សនេន បហាតព្ពហេតុកោ ច នេវទស្សនេន នភាវនាយ បហាតព្ពហេតុកោ ច ធម្មា ឧប្បជ្ជន្តិ ហេតុបច្ចយា – វិចិកិច្ឆាសហគតំ មោហំ បដិច្ច សម្បយុត្តកា ខន្ធា ចិត្តសមុដ្ឋានញ្ច រូបំ. (៤)

នេវទស្សនេន នភាវនាយ បហាតព្ពហេតុកំ ធម្មំ បដិច្ច ភាវនាយ បហាតព្ពហេតុកោ ច នេវទស្សនេន នភាវនាយ បហាតព្ពហេតុកោ ច ធម្មា ឧប្បជ្ជន្តិ ហេតុបច្ចយា – ឧទ្ធច្ចសហគតំ មោហំ បដិច្ច សម្បយុត្តកា ខន្ធា ចិត្តសមុដ្ឋានញ្ច រូបំ. (៥)

៤. ទស្សនេន បហាតព្ពហេតុកញ្ច នេវទស្សនេន នភាវនាយ បហាតព្ពហេតុកញ្ច ធម្មំ បដិច្ច ទស្សនេន បហាតព្ពហេតុកោ ធម្មោ ឧប្បជ្ជតិ ហេតុបច្ចយា – វិចិកិច្ឆាសហគតំ ឯកំ ខន្ធញ្ច មោហញ្ច បដិច្ច តយោ ខន្ធា…បេ… ទ្វេ ខន្ធេ ច មោហញ្ច បដិច្ច ទ្វេ ខន្ធា. (១)

ទស្សនេន បហាតព្ពហេតុកញ្ច នេវទស្សនេន នភាវនាយ បហាតព្ពហេតុកញ្ច ធម្មំ បដិច្ច នេវទស្សនេន នភាវនាយ បហាតព្ពហេតុកោ ធម្មោ ឧប្បជ្ជតិ ហេតុបច្ចយា – ទស្សនេន បហាតព្ពហេតុកេ ខន្ធេ ច មហាភូតេ ច បដិច្ច ចិត្តសមុដ្ឋានំ រូបំ; វិចិកិច្ឆាសហគតេ ខន្ធេ ច មោហញ្ច បដិច្ច ចិត្តសមុដ្ឋានំ រូបំ. (២)

ទស្សនេន បហាតព្ពហេតុកញ្ច នេវទស្សនេន នភាវនាយ បហាតព្ពហេតុកញ្ច ធម្មំ បដិច្ច ទស្សនេន បហាតព្ពហេតុកោ ច នេវទស្សនេន នភាវនាយ បហាតព្ពហេតុកោ ច ធម្មា ឧប្បជ្ជន្តិ ហេតុបច្ចយា – វិចិកិច្ឆាសហគតំ ឯកំ ខន្ធញ្ច មោហញ្ច បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ ច មោហញ្ច បដិច្ច ទ្វេ ខន្ធា…បេ…. (៣)

៥. ភាវនាយ បហាតព្ពហេតុកញ្ច នេវទស្សនេន នភាវនាយ បហាតព្ពហេតុកញ្ច ធម្មំ បដិច្ច ភាវនាយ បហាតព្ពហេតុកោ ធម្មោ ឧប្បជ្ជតិ ហេតុបច្ចយា – ឧទ្ធច្ចសហគតំ ឯកំ ខន្ធញ្ច មោហញ្ច បដិច្ច តយោ ខន្ធា…បេ… ទ្វេ ខន្ធេ ច មោហញ្ច បដិច្ច ទ្វេ ខន្ធា. (១)

ភាវនាយ បហាតព្ពហេតុកញ្ច នេវទស្សនេន នភាវនាយ បហាតព្ពហេតុកញ្ច ធម្មំ បដិច្ច នេវទស្សនេន នភាវនាយ បហាតព្ពហេតុកោ ធម្មោ ឧប្បជ្ជតិ ហេតុបច្ចយា – ភាវនាយ បហាតព្ពហេតុកេ ខន្ធេ ច មហាភូតេ ច បដិច្ច ចិត្តសមុដ្ឋានំ រូបំ; ឧទ្ធច្ចសហគតេ ខន្ធេ ច មោហញ្ច បដិច្ច ចិត្តសមុដ្ឋានំ រូបំ. (២)

ភាវនាយ បហាតព្ពហេតុកញ្ច នេវទស្សនេន នភាវនាយ បហាតព្ពហេតុកញ្ច ធម្មំ បដិច្ច ភាវនាយ បហាតព្ពហេតុកោ ច នេវទស្សនេន នភាវនាយ បហាតព្ពហេតុកោ ច ធម្មា ឧប្បជ្ជន្តិ ហេតុបច្ចយា – ឧទ្ធច្ចសហគតំ ឯកំ ខន្ធញ្ច មោហញ្ច បដិច្ច តយោ ខន្ធា ចិត្តសមុដ្ឋានញ្ច រូបំ…បេ…. (៣)

អារម្មណបច្ចយោ

៦. ទស្សនេន បហាតព្ពហេតុកំ ធម្មំ បដិច្ច ទស្សនេន បហាតព្ពហេតុកោ ធម្មោ ឧប្បជ្ជតិ អារម្មណបច្ចយា – ទស្សនេន បហាតព្ពហេតុកំ ឯកំ ខន្ធំ បដិច្ច តយោ ខន្ធា…បេ… ទ្វេ ខន្ធេ បដិច្ច ទ្វេ ខន្ធា. (១)

ទស្សនេន បហាតព្ពហេតុកំ ធម្មំ បដិច្ច នេវទស្សនេន នភាវនាយ បហាតព្ពហេតុកោ ធម្មោ ឧប្បជ្ជតិ អារម្មណបច្ចយា – វិចិកិច្ឆាសហគតេ ខន្ធេ បដិច្ច វិចិកិច្ឆាសហគតោ មោហោ. (២)

ទស្សនេន បហាតព្ពហេតុកំ ធម្មំ បដិច្ច ទស្សនេន បហាតព្ពហេតុកោ ច នេវទស្សនេន នភាវនាយ បហាតព្ពហេតុកោ ច ធម្មា ឧប្បជ្ជន្តិ អារម្មណបច្ចយា – វិចិកិច្ឆាសហគតំ ឯកំ ខន្ធំ បដិច្ច តយោ ខន្ធា ច មោហោ ច…បេ… ទ្វេ ខន្ធេ បដិច្ច ទ្វេ ខន្ធា ច មោហោ ច. (៣)

ភាវនាយ បហាតព្ពហេតុកំ ធម្មំ បដិច្ច ភាវនាយ បហាតព្ពហេតុកោ ធម្មោ ឧប្បជ្ជតិ អារម្មណបច្ចយា… តីណិ. (ទស្សនេន សទិសំ វិភជិតព្ពំ.)

៧. នេវទស្សនេន នភាវនាយ បហាតព្ពហេតុកំ ធម្មំ បដិច្ច នេវទស្សនេន នភាវនាយ បហាតព្ពហេតុកោ ធម្មោ ឧប្បជ្ជតិ អារម្មណបច្ចយា – នេវទស្សនេន នភាវនាយ បហាតព្ពហេតុកំ ឯកំ ខន្ធំ បដិច្ច តយោ ខន្ធា…បេ… ទ្វេ ខន្ធេ បដិច្ច ទ្វេ ខន្ធា. បដិសន្ធិក្ខណេ…បេ… វត្ថុំ បដិច្ច ខន្ធា. (១)

នេវទស្សនេន នភាវនាយ បហាតព្ពហេតុកំ ធម្មំ បដិច្ច ទស្សនេន បហាតព្ពហេតុកោ ធម្មោ ឧប្បជ្ជតិ អារម្មណបច្ចយា – វិចិកិច្ឆាសហគតំ មោហំ បដិច្ច សម្បយុត្តកា ខន្ធា. (២)

នេវទស្សនេន នភាវនាយ បហាតព្ពហេតុកំ ធម្មំ បដិច្ច ភាវនាយ បហាតព្ពហេតុកោ ធម្មោ ឧប្បជ្ជតិ អារម្មណបច្ចយា – ឧទ្ធច្ចសហគតំ មោហំ បដិច្ច សម្បយុត្តកា ខន្ធា. (៣)

៨. ទស្សនេន បហាតព្ពហេតុកញ្ច នេវទស្សនេន នភាវនាយ បហាតព្ពហេតុកញ្ច ធម្មំ បដិច្ច ទស្សនេន បហាតព្ពហេតុកោ ធម្មោ ឧប្បជ្ជតិ អារម្មណបច្ចយា – វិចិកិច្ឆាសហគតំ ឯកំ ខន្ធញ្ច មោហញ្ច បដិច្ច តយោ ខន្ធា…បេ… ទ្វេ ខន្ធេ ច មោហញ្ច បដិច្ច ទ្វេ ខន្ធា. (១)

ភាវនាយ បហាតព្ពហេតុកញ្ច នេវទស្សនេន នភាវនាយ បហាតព្ពហេតុកញ្ច ធម្មំ បដិច្ច ភាវនាយ បហាតព្ពហេតុកោ ធម្មោ ឧប្បជ្ជតិ អារម្មណបច្ចយា – ឧទ្ធច្ចសហគតំ ឯកំ ខន្ធញ្ច មោហញ្ច បដិច្ច តយោ ខន្ធា…បេ… ទ្វេ ខន្ធេ ច មោហញ្ច បដិច្ច ទ្វេ ខន្ធា. (១)

អធិបតិបច្ចយោ

៩. ទស្សនេន បហាតព្ពហេតុកំ ធម្មំ បដិច្ច ទស្សនេន បហាតព្ពហេតុកោ ធម្មោ ឧប្បជ្ជតិ អធិបតិបច្ចយា… តីណិ (ហេតុសទិសា).

ភាវនាយ បហាតព្ពហេតុកំ ធម្មំ បដិច្ច…បេ… តីណិ (ហេតុសទិសា, អធិបតិយា មោហោ នត្ថិ).

នេវទស្សនេន នភាវនាយ បហាតព្ពហេតុកំ ធម្មំ បដិច្ច នេវទស្សនេន នភាវនាយ បហាតព្ពហេតុកោ ធម្មោ ឧប្បជ្ជតិ អធិបតិបច្ចយា – នេវទស្សនេន នភាវនាយ បហាតព្ពហេតុកំ ឯកំ ខន្ធំ បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធា. ឯកំ មហាភូតំ បដិច្ច តយោ មហាភូតា…បេ… មហាភូតេ បដិច្ច ចិត្តសមុដ្ឋានំ រូបំ ឧបាទារូបំ. (១)

១០. ទស្សនេន បហាតព្ពហេតុកញ្ច នេវទស្សនេន នភាវនាយ បហាតព្ពហេតុកញ្ច ធម្មំ បដិច្ច នេវទស្សនេន នភាវនាយ បហាតព្ពហេតុកោ ធម្មោ ឧប្បជ្ជតិ អធិបតិបច្ចយា – ទស្សនេន បហាតព្ពហេតុកេ ខន្ធេ ច មហាភូតេ ច បដិច្ច ចិត្តសមុដ្ឋានំ រូបំ. (១)

ភាវនាយ បហាតព្ពហេតុកញ្ច នេវទស្សនេន នភាវនាយ បហាតព្ពហេតុកញ្ច ធម្មំ បដិច្ច នេវទស្សនេន នភាវនាយ បហាតព្ពហេតុកោ ធម្មោ ឧប្បជ្ជតិ អធិបតិបច្ចយា – ភាវនាយ បហាតព្ពហេតុកេ ខន្ធេ ច មហាភូតេ ច បដិច្ច ចិត្តសមុដ្ឋានំ រូបំ. (១)

អនន្តរ-សមនន្តរបច្ចយា

១១. ទស្សនេន បហាតព្ពហេតុកំ ធម្មំ បដិច្ច ទស្សនេន បហាតព្ពហេតុកោ ធម្មោ ឧប្បជ្ជតិ អនន្តរបច្ចយា. សមនន្តរបច្ចយា (អារម្មណសទិសំ).

សហជាតបច្ចយោ

១២. ទស្សនេន បហាតព្ពហេតុកំ ធម្មំ បដិច្ច ទស្សនេន បហាតព្ពហេតុកោ ធម្មោ ឧប្បជ្ជតិ សហជាតបច្ចយា – ទស្សនេន បហាតព្ពហេតុកំ ឯកំ ខន្ធំ បដិច្ច តយោ ខន្ធា…បេ… ទ្វេ ខន្ធេ បដិច្ច ទ្វេ ខន្ធា. (១)

ទស្សនេន បហាតព្ពហេតុកំ ធម្មំ បដិច្ច នេវទស្សនេន នភាវនាយ បហាតព្ពហេតុកោ ធម្មោ ឧប្បជ្ជតិ សហជាតបច្ចយា – ទស្សនេន បហាតព្ពហេតុកេ ខន្ធេ បដិច្ច ចិត្តសមុដ្ឋានំ រូបំ; វិចិកិច្ឆាសហគតេ ខន្ធេ បដិច្ច មោហោ ចិត្តសមុដ្ឋានញ្ច រូបំ. (២)

ទស្សនេន បហាតព្ពហេតុកំ ធម្មំ បដិច្ច ទស្សនេន បហាតព្ពហេតុកោ ច នេវទស្សនេន នភាវនាយ បហាតព្ពហេតុកោ ច ធម្មា ឧប្បជ្ជន្តិ សហជាតបច្ចយា – ទស្សនេន បហាតព្ពហេតុកំ ឯកំ ខន្ធំ បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ បដិច្ច ទ្វេ ខន្ធា ចិត្តសមុដ្ឋានញ្ច រូបំ; វិចិកិច្ឆាសហគតំ ឯកំ ខន្ធំ បដិច្ច តយោ ខន្ធា មោហោ ច ចិត្តសមុដ្ឋានញ្ច រូបំ…បេ…. (៣)

១៣. ភាវនាយ បហាតព្ពហេតុកំ ធម្មំ បដិច្ច ភាវនាយ បហាតព្ពហេតុកោ ធម្មោ ឧប្បជ្ជតិ សហជាតបច្ចយា – ភាវនាយ បហាតព្ពហេតុកំ ឯកំ ខន្ធំ បដិច្ច តយោ ខន្ធា…បេ… ទ្វេ ខន្ធេ បដិច្ច ទ្វេ ខន្ធា. (១)

ភាវនាយ បហាតព្ពហេតុកំ ធម្មំ បដិច្ច នេវទស្សនេន នភាវនាយ បហាតព្ពហេតុកោ ធម្មោ ឧប្បជ្ជតិ សហជាតបច្ចយា – ភាវនាយ បហាតព្ពហេតុកេ ខន្ធេ បដិច្ច ចិត្តសមុដ្ឋានំ រូបំ; ឧទ្ធច្ចសហគតេ ខន្ធេ បដិច្ច មោហោ ច ចិត្តសមុដ្ឋានញ្ច រូបំ. (២)

ភាវនាយ បហាតព្ពហេតុកំ ធម្មំ បដិច្ច ភាវនាយ បហាតព្ពហេតុកោ ច នេវទស្សនេន នភាវនាយ បហាតព្ពហេតុកោ ច ធម្មា ឧប្បជ្ជន្តិ សហជាតបច្ចយា – ភាវនាយ បហាតព្ពហេតុកំ ឯកំ ខន្ធំ បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ បដិច្ច ទ្វេ ខន្ធា ចិត្តសមុដ្ឋានញ្ច រូបំ; ឧទ្ធច្ចសហគតំ ឯកំ ខន្ធំ បដិច្ច តយោ ខន្ធា មោហោ ច ចិត្តសមុដ្ឋានញ្ច រូបំ…បេ…. (៣)

១៤. នេវទស្សនេន នភាវនាយ បហាតព្ពហេតុកំ ធម្មំ បដិច្ច នេវទស្សនេន នភាវនាយ បហាតព្ពហេតុកោ ធម្មោ ឧប្បជ្ជតិ សហជាតបច្ចយា – នេវទស្សនេន នភាវនាយ បហាតព្ពហេតុកំ ឯកំ ខន្ធំ បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… វិចិកិច្ឆាសហគតំ ឧទ្ធច្ចសហគតំ មោហំ បដិច្ច ចិត្តសមុដ្ឋានំ រូបំ. បដិសន្ធិក្ខណេ…បេ… ខន្ធេ បដិច្ច វត្ថុ, វត្ថុំ បដិច្ច ខន្ធា; ឯកំ មហាភូតំ បដិច្ច តយោ មហាភូតា…បេ… ពាហិរំ… អាហារសមុដ្ឋានំ… ឧតុសមុដ្ឋានំ… អសញ្ញសត្តានំ ឯកំ…បេ…. (១)

នេវទស្សនេន នភាវនាយ បហាតព្ពហេតុកំ ធម្មំ បដិច្ច ទស្សនេន បហាតព្ពហេតុកោ ធម្មោ ឧប្បជ្ជតិ សហជាតបច្ចយា – វិចិកិច្ឆាសហគតំ មោហំ បដិច្ច សម្បយុត្តកា ខន្ធា. (២)

នេវទស្សនេន នភាវនាយ បហាតព្ពហេតុកំ ធម្មំ បដិច្ច ភាវនាយ បហាតព្ពហេតុកោ ធម្មោ ឧប្បជ្ជតិ សហជាតបច្ចយា (សំខិត្តំ. ហេតុសទិសំ កាតព្ពំ). (៣)

អញ្ញមញ្ញបច្ចយាទិ

១៥. ទស្សនេន បហាតព្ពហេតុកំ ធម្មំ បដិច្ច ទស្សនេន បហាតព្ពហេតុកោ ធម្មោ ឧប្បជ្ជតិ អញ្ញមញ្ញបច្ចយា, និស្សយបច្ចយា, ឧបនិស្សយបច្ចយា, បុរេជាតបច្ចយា, អាសេវនបច្ចយា, កម្មបច្ចយា, វិបាកបច្ចយា, អាហារបច្ចយា, ឥន្ទ្រិយបច្ចយា, ឈានបច្ចយា, មគ្គបច្ចយា, សម្បយុត្តបច្ចយា, វិប្បយុត្តបច្ចយា, អត្ថិបច្ចយា, នត្ថិបច្ចយា, វិគតបច្ចយា, អវិគតបច្ចយា.