១. វិភង្គវារោ

នហេតុបច្ចយោ

៥២. ទស្សនេន បហាតព្ពហេតុកំ ធម្មំ បច្ចយា នេវទស្សនេន នភាវនាយ បហាតព្ពហេតុកោ ធម្មោ ឧប្បជ្ជតិ នហេតុបច្ចយា – វិចិកិច្ឆាសហគតេ ខន្ធេ បច្ចយា វិចិកិច្ឆាសហគតោ មោហោ. (១)

ភាវនាយ បហាតព្ពហេតុកំ ធម្មំ បច្ចយា នេវទស្សនេន នភាវនាយ បហាតព្ពហេតុកោ ធម្មោ ឧប្បជ្ជតិ នហេតុបច្ចយា – ឧទ្ធច្ចសហគតេ ខន្ធេ បច្ចយា ឧទ្ធច្ចសហគតោ មោហោ. (១)

នេវទស្សនេន នភាវនាយ បហាតព្ពហេតុកំ ធម្មំ បច្ចយា នេវទស្សនេន នភាវនាយ បហាតព្ពហេតុកោ ធម្មោ ឧប្បជ្ជតិ នហេតុបច្ចយា – អហេតុកំ នេវទស្សនេន នភាវនាយ បហាតព្ពហេតុកំ ឯកំ ខន្ធំ បច្ចយា តយោ ខន្ធា ចិត្តសមុដ្ឋានញ្ច រូបំ…បេ… អហេតុកបដិសន្ធិក្ខណេ (បរិបុណ្ណំ) ចក្ខាយតនំ បច្ចយា ចក្ខុវិញ្ញាណំ…បេ… កាយាយតនំ បច្ចយា កាយវិញ្ញាណំ; វត្ថុំ បច្ចយា អហេតុកា នេវទស្សនេន នភាវនាយ បហាតព្ពហេតុកា ខន្ធា; វត្ថុំ បច្ចយា វិចិកិច្ឆាសហគតោ ឧទ្ធច្ចសហគតោ មោហោ. (១)

៥៣. ទស្សនេន បហាតព្ពហេតុកញ្ច នេវទស្សនេន នភាវនាយ បហាតព្ពហេតុកញ្ច ធម្មំ បច្ចយា នេវទស្សនេន នភាវនាយ បហាតព្ពហេតុកោ ធម្មោ ឧប្បជ្ជតិ នហេតុបច្ចយា – វិចិកិច្ឆាសហគតេ ខន្ធេ ច វត្ថុញ្ច បច្ចយា វិចិកិច្ឆាសហគតោ មោហោ. (១)

ភាវនាយ បហាតព្ពហេតុកញ្ច នេវទស្សនេន នភាវនាយ បហាតព្ពហេតុកញ្ច ធម្មំ បច្ចយា នេវទស្សនេន នភាវនាយ បហាតព្ពហេតុកោ ធម្មោ ឧប្បជ្ជតិ នហេតុបច្ចយា – ឧទ្ធច្ចសហគតេ ខន្ធេ ច វត្ថុញ្ច បច្ចយា ឧទ្ធច្ចសហគតោ មោហោ. (១)

នអារម្មណបច្ចយោ

៥៤. ទស្សនេន បហាតព្ពហេតុកំ ធម្មំ បច្ចយា នេវទស្សនេន នភាវនាយ បហាតព្ពហេតុកោ ធម្មោ ឧប្បជ្ជតិ នអារម្មណបច្ចយា – ទស្សនេន បហាតព្ពហេតុកេ ខន្ធេ បច្ចយា ចិត្តសមុដ្ឋានំ រូបំ. (១)

ភាវនាយ បហាតព្ពហេតុកំ ធម្មំ បច្ចយា នេវទស្សនេន នភាវនាយ បហាតព្ពហេតុកោ ធម្មោ ឧប្បជ្ជតិ នអារម្មណបច្ចយា – ភាវនាយ បហាតព្ពហេតុកេ ខន្ធេ បច្ចយា ចិត្តសមុដ្ឋានំ រូបំ. (១)

នេវទស្សនេន នភាវនាយ បហាតព្ពហេតុកំ ធម្មំ បច្ចយា នេវទស្សនេន នភាវនាយ បហាតព្ពហេតុកោ ធម្មោ ឧប្បជ្ជតិ នអារម្មណបច្ចយា – នេវទស្សនេន នភាវនាយ បហាតព្ពហេតុកេ ខន្ធេ បច្ចយា ចិត្តសមុដ្ឋានំ រូបំ. បដិសន្ធិក្ខណេ នេវទស្សនេន នភាវនាយ បហាតព្ពហេតុកេ ខន្ធេ បច្ចយា កដត្តារូបំ; ខន្ធេ បច្ចយា វត្ថុ…បេ… ឯកំ មហាភូតំ…បេ… ពាហិរំ… អាហារសមុដ្ឋានំ… ឧតុសមុដ្ឋានំ… អសញ្ញសត្តានំ…បេ…. (១)

៥៥. ទស្សនេន បហាតព្ពហេតុកញ្ច នេវទស្សនេន នភាវនាយ បហាតព្ពហេតុកញ្ច ធម្មំ បច្ចយា នេវទស្សនេន នភាវនាយ បហាតព្ពហេតុកោ ធម្មោ ឧប្បជ្ជតិ នអារម្មណបច្ចយា – ទស្សនេន បហាតព្ពហេតុកេ ខន្ធេ ច មហាភូតេ ច បច្ចយា ចិត្តសមុដ្ឋានំ រូបំ; វិចិកិច្ឆាសហគតេ ខន្ធេ ច មោហញ្ច បច្ចយា ចិត្តសមុដ្ឋានំ រូបំ. (១)

ភាវនាយ បហាតព្ពហេតុកញ្ច នេវទស្សនេន នភាវនាយ បហាតព្ពហេតុកញ្ច ធម្មំ បច្ចយា នេវទស្សនេន នភាវនាយ បហាតព្ពហេតុកោ ធម្មោ ឧប្បជ្ជតិ នអារម្មណបច្ចយា – ភាវនាយ បហាតព្ពហេតុកេ ខន្ធេ ច មហាភូតេ ច បច្ចយា ចិត្តសមុដ្ឋានំ រូបំ; ឧទ្ធច្ចសហគតេ ខន្ធេ ច មោហញ្ច បច្ចយា ចិត្តសមុដ្ឋានំ រូបំ. (១)

នអធិបតិបច្ចយាទិ

៥៦. ទស្សនេន បហាតព្ពហេតុកំ ធម្មំ បច្ចយា ទស្សនេន បហាតព្ពហេតុកោ ធម្មោ ឧប្បជ្ជតិ នអធិបតិបច្ចយា (សហជាតសទិសំ)… នអនន្តរបច្ចយា … នសមនន្តរបច្ចយា… នអញ្ញមញ្ញបច្ចយា… នឧបនិស្សយបច្ចយា… នបុរេជាតបច្ចយា (បដិច្ចវារេ បច្ចនីយសទិសំ, តេរស បញ្ហា. និន្នានំ)… នបច្ឆាជាតបច្ចយា… នអាសេវនបច្ចយា.

នកម្មបច្ចយោ

៥៧. ទស្សនេន បហាតព្ពហេតុកំ ធម្មំ បច្ចយា ទស្សនេន បហាតព្ពហេតុកោ ធម្មោ ឧប្បជ្ជតិ នកម្មបច្ចយា – ទស្សនេន បហាតព្ពហេតុកេ ខន្ធេ បច្ចយា ទស្សនេន បហាតព្ពហេតុកា ចេតនា. (១)

ភាវនាយ បហាតព្ពហេតុកំ ធម្មំ បច្ចយា ភាវនាយ បហាតព្ពហេតុកោ ធម្មោ ឧប្បជ្ជតិ នកម្មបច្ចយា – ភាវនាយ បហាតព្ពហេតុកេ ខន្ធេ បច្ចយា ភាវនាយ បហាតព្ពហេតុកា ចេតនា. (១)

នេវទស្សនេន នភាវនាយ បហាតព្ពហេតុកំ ធម្មំ បច្ចយា នេវទស្សនេន នភាវនាយ បហាតព្ពហេតុកោ ធម្មោ ឧប្បជ្ជតិ នកម្មបច្ចយា – នេវទស្សនេន នភាវនាយ បហាតព្ពហេតុកេ ខន្ធេ បច្ចយា នេវទស្សនេន នភាវនាយ បហាតព្ពហេតុកា ចេតនា; ពាហិរំ… អាហារសមុដ្ឋានំ… ឧតុសមុដ្ឋានំ…បេ… វត្ថុំ បច្ចយា នេវទស្សនេន នភាវនាយ បហាតព្ពហេតុកា ចេតនា. (១)

នេវទស្សនេន នភាវនាយ បហាតព្ពហេតុកំ ធម្មំ បច្ចយា ទស្សនេន បហាតព្ពហេតុកោ ធម្មោ ឧប្បជ្ជតិ នកម្មបច្ចយា – វត្ថុំ បច្ចយា ទស្សនេន បហាតព្ពហេតុកា ចេតនា; វិចិកិច្ឆាសហគតំ មោហំ បច្ចយា សម្បយុត្តកា ចេតនា. (២)

នេវទស្សនេន នភាវនាយ បហាតព្ពហេតុកំ ធម្មំ បច្ចយា ភាវនាយ បហាតព្ពហេតុកោ ធម្មោ ឧប្បជ្ជតិ នកម្មបច្ចយា – វត្ថុំ បច្ចយា ភាវនាយ បហាតព្ពហេតុកា ចេតនា; ឧទ្ធច្ចសហគតំ មោហំ បច្ចយា សម្បយុត្តកា ចេតនា. (៣)

៥៨. ទស្សនេន បហាតព្ពហេតុកញ្ច នេវទស្សនេន នភាវនាយ បហាតព្ពហេតុកញ្ច ធម្មំ បច្ចយា ទស្សនេន បហាតព្ពហេតុកោ ធម្មោ ឧប្បជ្ជតិ នកម្មបច្ចយា – ទស្សនេន បហាតព្ពហេតុកេ ខន្ធេ ច វត្ថុញ្ច បច្ចយា ទស្សនេន បហាតព្ពហេតុកា ចេតនា; វិចិកិច្ឆាសហគតេ ខន្ធេ ច មោហញ្ច បច្ចយា សម្បយុត្តកា ចេតនា. (១)

ភាវនាយ បហាតព្ពហេតុកញ្ច នេវទស្សនេន នភាវនាយ បហាតព្ពហេតុកញ្ច ធម្មំ បច្ចយា ភាវនាយ បហាតព្ពហេតុកោ ធម្មោ ឧប្បជ្ជតិ នកម្មបច្ចយា – ភាវនាយ បហាតព្ពហេតុកេ ខន្ធេ ច វត្ថុញ្ច បច្ចយា ភាវនាយ បហាតព្ពហេតុកា ចេតនា; ឧទ្ធច្ចសហគតេ ខន្ធេ ច មោហញ្ច បច្ចយា សម្បយុត្តកា ចេតនា. (១)

នវិបាកបច្ចយាទិ

៥៩. ទស្សនេន បហាតព្ពហេតុកំ ធម្មំ បច្ចយា ទស្សនេន បហាតព្ពហេតុកោ ធម្មោ ឧប្បជ្ជតិ នវិបាកបច្ចយា (បរិបុណ្ណំ, បដិសន្ធិ នត្ថិ), នអាហារបច្ចយា – ពាហិរំ… ឧតុសមុដ្ឋានំ… អសញ្ញសត្តានំ…បេ… នឥន្ទ្រិយបច្ចយា – ពាហិរំ… អាហារសមុដ្ឋានំ… ឧតុសមុដ្ឋានំ… អសញ្ញសត្តានំ…បេ… មហាភូតេ បច្ចយា រូបជីវិតិន្ទ្រិយំ… នឈានបច្ចយា – បញ្ចវិញ្ញាណសហគតំ ឯកំ ខន្ធំ…បេ… ពាហិរំ… អាហារសមុដ្ឋានំ… ឧតុសមុដ្ឋានំ… អសញ្ញសត្តានំ…បេ… នមគ្គបច្ចយា – អហេតុកំ ឯកំ…បេ… នសម្បយុត្តបច្ចយា… នវិប្បយុត្តបច្ចយា… (បដិច្ចវារបច្ចនីយេ នវិប្បយុត្តសទិសំ, និន្នានំ. ឯកាទស). នោនត្ថិបច្ចយា… នោវិគតបច្ចយា.