១. វិភង្គវារោ

ហេតុបច្ចយោ

៦៩. ទស្សនេន បហាតព្ពោ ធម្មោ ទស្សនេន បហាតព្ពស្ស ធម្មស្ស ហេតុបច្ចយេន បច្ចយោ – ទស្សនេន បហាតព្ពា ហេតូ សម្បយុត្តកានំ ខន្ធានំ ហេតុបច្ចយេន បច្ចយោ. (១)

ទស្សនេន បហាតព្ពោ ធម្មោ នេវទស្សនេន នភាវនាយ បហាតព្ពស្ស ធម្មស្ស ហេតុបច្ចយេន បច្ចយោ – ទស្សនេន បហាតព្ពា ហេតូ ចិត្តសមុដ្ឋានានំ រូបានំ ហេតុបច្ចយេន បច្ចយោ. (២)

ទស្សនេន បហាតព្ពោ ធម្មោ ទស្សនេន បហាតព្ពស្ស ច នេវទស្សនេន នភាវនាយ បហាតព្ពស្ស ច ធម្មស្ស ហេតុបច្ចយេន បច្ចយោ – ទស្សនេន បហាតព្ពា ហេតូ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ ហេតុបច្ចយេន បច្ចយោ. (៣)

៧០. ភាវនាយ បហាតព្ពោ ធម្មោ…បេ… ធម្មស្ស ហេតុបច្ចយេន បច្ចយោ – ភាវនាយ បហាតព្ពា ហេតូ សម្បយុត្តកានំ ខន្ធានំ ហេតុបច្ចយេន បច្ចយោ. (១)

ភាវនាយ បហាតព្ពោ ធម្មោ នេវទស្សនេន នភាវនាយ បហាតព្ពស្ស…បេ… ភាវនាយ បហាតព្ពា ហេតូ ចិត្តសមុដ្ឋានានំ រូបានំ ហេតុបច្ចយេន បច្ចយោ. (២)

ភាវនាយ បហាតព្ពោ ធម្មោ ភាវនាយ បហាតព្ពស្ស ច នេវទស្សនេន នភាវនាយ បហាតព្ពស្ស ច ធម្មស្ស…បេ… ភាវនាយ បហាតព្ពា ហេតូ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ ហេតុបច្ចយេន បច្ចយោ. (៣)

នេវទស្សនេន នភាវនាយ បហាតព្ពោ ធម្មោ នេវទស្សនេន នភាវនាយ បហាតព្ពស្ស ធម្មស្ស…បេ… នេវទស្សនេន នភាវនាយ បហាតព្ពា ហេតូ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ ហេតុបច្ចយេន បច្ចយោ. បដិសន្ធិក្ខណេ នេវទស្សនេន នភាវនាយ បហាតព្ពា ហេតូ សម្បយុត្តកានំ ខន្ធានំ កដត្តា ច រូបានំ ហេតុបច្ចយេន បច្ចយោ. (១)

អារម្មណបច្ចយោ

៧១. ទស្សនេន បហាតព្ពោ ធម្មោ ទស្សនេន បហាតព្ពស្ស ធម្មស្ស អារម្មណបច្ចយេន បច្ចយោ – ទស្សនេន បហាតព្ពំ រាគំ អស្សាទេតិ អភិនន្ទតិ, តំ អារព្ភ ទស្សនេន បហាតព្ពោ រាគោ ឧប្បជ្ជតិ, ទិដ្ឋិ ឧប្បជ្ជតិ, វិចិកិច្ឆា ឧប្បជ្ជតិ. ទស្សនេន បហាតព្ពំ ទោមនស្សំ ឧប្បជ្ជតិ, ទិដ្ឋិំ អស្សាទេតិ អភិនន្ទតិ, តំ អារព្ភ ទស្សនេន បហាតព្ពោ រាគោ ឧប្បជ្ជតិ, ទិដ្ឋិ ឧប្បជ្ជតិ, វិចិកិច្ឆា ឧប្បជ្ជតិ. ទស្សនេន បហាតព្ពំ ទោមនស្សំ ឧប្បជ្ជតិ, វិចិកិច្ឆំ អារព្ភ វិចិកិច្ឆា ឧប្បជ្ជតិ, ទិដ្ឋិ ឧប្បជ្ជតិ, ទស្សនេន បហាតព្ពំ ទោមនស្សំ ឧប្បជ្ជតិ. ទស្សនេន បហាតព្ពំ ទោមនស្សំ អារព្ភ ទស្សនេន បហាតព្ពំ ទោមនស្សំ ឧប្បជ្ជតិ, ទិដ្ឋិ ឧប្បជ្ជតិ, វិចិកិច្ឆា ឧប្បជ្ជតិ. (១)

ទស្សនេន បហាតព្ពោ ធម្មោ នេវទស្សនេន នភាវនាយ បហាតព្ពស្ស ធម្មស្ស អារម្មណបច្ចយេន បច្ចយោ – អរិយា ទស្សនេន បហាតព្ពេ បហីនេ កិលេសេ បច្ចវេក្ខន្តិ, បុព្ពេ សមុទាចិណ្ណេ កិលេសេ ជានន្តិ. ទស្សនេន បហាតព្ពេ ខន្ធេ អនិច្ចតោ ទុក្ខតោ អនត្តតោ វិបស្សន្តិ. ចេតោបរិយញាណេន ទស្សនេន បហាតព្ពចិត្តសមង្គិស្ស ចិត្តំ ជានន្តិ. ទស្សនេន បហាតព្ពា ខន្ធា ចេតោបរិយញាណស្ស, បុព្ពេនិវាសានុស្សតិញាណស្ស, យថាកម្មូបគញាណស្ស, អនាគតំសញាណស្ស, អាវជ្ជនាយ អារម្មណបច្ចយេន បច្ចយោ. (២)

៧២. ភាវនាយ បហាតព្ពោ ធម្មោ ភាវនាយ បហាតព្ពស្ស ធម្មស្ស អារម្មណបច្ចយេន បច្ចយោ – ភាវនាយ បហាតព្ពំ រាគំ អស្សាទេតិ អភិនន្ទតិ, តំ អារព្ភ ភាវនាយ បហាតព្ពោ រាគោ ឧប្បជ្ជតិ, ឧទ្ធច្ចំ ឧប្បជ្ជតិ. ភាវនាយ បហាតព្ពំ ទោមនស្សំ ឧប្បជ្ជតិ, ឧទ្ធច្ចំ អារព្ភ ឧទ្ធច្ចំ ឧប្បជ្ជតិ. ភាវនាយ បហាតព្ពំ ទោមនស្សំ ឧប្បជ្ជតិ, ភាវនាយ បហាតព្ពំ ទោមនស្សំ អារព្ភ ភាវនាយ បហាតព្ពំ ទោមនស្សំ ឧប្បជ្ជតិ, ឧទ្ធច្ចំ ឧប្បជ្ជតិ. (១)

ភាវនាយ បហាតព្ពោ ធម្មោ ទស្សនេន បហាតព្ពស្ស ធម្មស្ស អារម្មណបច្ចយេន បច្ចយោ – ភាវនាយ បហាតព្ពំ រាគំ អស្សាទេតិ អភិនន្ទតិ, តំ អារព្ភ ទស្សនេន បហាតព្ពោ រាគោ ឧប្បជ្ជតិ, ទិដ្ឋិ ឧប្បជ្ជតិ, វិចិកិច្ឆា ឧប្បជ្ជតិ, ទស្សនេន បហាតព្ពំ ទោមនស្សំ ឧប្បជ្ជតិ. ឧទ្ធច្ចំ អារព្ភ ទិដ្ឋិ ឧប្បជ្ជតិ, វិចិកិច្ឆា ឧប្បជ្ជតិ, ទស្សនេន បហាតព្ពំ ទោមនស្សំ ឧប្បជ្ជតិ. ភាវនាយ បហាតព្ពំ ទោមនស្សំ អារព្ភ ទស្សនេន បហាតព្ពំ ទោមនស្សំ ឧប្បជ្ជតិ, ទិដ្ឋិ ឧប្បជ្ជតិ, វិចិកិច្ឆា ឧប្បជ្ជតិ. (២)

ភាវនាយ បហាតព្ពោ ធម្មោ នេវទស្សនេន នភាវនាយ បហាតព្ពស្ស ធម្មស្ស អារម្មណបច្ចយេន បច្ចយោ – អរិយា ភាវនាយ បហាតព្ពេ បហីនេ កិលេសេ បច្ចវេក្ខន្តិ, វិក្ខម្ភិតេ កិលេសេ បច្ចវេក្ខន្តិ, បុព្ពេ សមុទាចិណ្ណេ កិលេសេ ជានន្តិ. ភាវនាយ បហាតព្ពេ ខន្ធេ អនិច្ចតោ ទុក្ខតោ អនត្តតោ វិបស្សន្តិ, ចេតោបរិយញាណេន ភាវនាយ បហាតព្ពចិត្តសមង្គិស្ស ចិត្តំ ជានន្តិ. ភាវនាយ បហាតព្ពា ខន្ធា ចេតោបរិយញាណស្ស, បុព្ពេនិវាសានុស្សតិញាណស្ស, យថាកម្មូបគញាណស្ស, អនាគតំសញាណស្ស, អាវជ្ជនាយ អារម្មណបច្ចយេន បច្ចយោ. (៣)

៧៣. នេវទស្សនេន នភាវនាយ បហាតព្ពោ ធម្មោ នេវទស្សនេន នភាវនាយ បហាតព្ពស្ស ធម្មស្ស អារម្មណបច្ចយេន បច្ចយោ – ទានំ ទត្វា សីលំ សមាទិយិត្វា ឧបោសថកម្មំ កត្វា តំ បច្ចវេក្ខតិ, បុព្ពេ សុចិណ្ណានិ បច្ចវេក្ខតិ, ឈានា វុដ្ឋហិត្វា ឈានំ បច្ចវេក្ខតិ. អរិយា មគ្គា វុដ្ឋហិត្វា មគ្គំ បច្ចវេក្ខន្តិ, ផលំ បច្ចវេក្ខន្តិ, និព្ពានំ បច្ចវេក្ខន្តិ; និព្ពានំ គោត្រភុស្ស, វោទានស្ស, មគ្គស្ស, ផលស្ស, អាវជ្ជនាយ អារម្មណបច្ចយេន បច្ចយោ. ចក្ខុំ អនិច្ចតោ ទុក្ខតោ អនត្តតោ វិបស្សតិ; សោតំ… ឃានំ… ជិវ្ហំ… កាយំ… រូបេ… សទ្ទេ… គន្ធេ… រសេ… ផោដ្ឋព្ពេ… វត្ថុំ… នេវទស្សនេន នភាវនាយ បហាតព្ពេ ខន្ធេ អនិច្ចតោ ទុក្ខតោ អនត្តតោ វិបស្សតិ; ទិព្ពេន ចក្ខុនា រូបំ បស្សតិ, ទិព្ពាយ សោតធាតុយា សទ្ទំ សុណាតិ, ចេតោបរិយញាណេន នេវទស្សនេន នភាវនាយ បហាតព្ពចិត្តសមង្គិស្ស ចិត្តំ ជានន្តិ, អាកាសានញ្ចាយតនំ វិញ្ញាណញ្ចាយតនស្ស…បេ… អាកិញ្ចញ្ញាយតនំ នេវសញ្ញានាសញ្ញាយតនស្ស…បេ… រូបាយតនំ ចក្ខុវិញ្ញាណស្ស អារម្មណបច្ចយេន បច្ចយោ…បេ… ផោដ្ឋព្ពាយតនំ កាយវិញ្ញាណស្ស អារម្មណបច្ចយេន បច្ចយោ…បេ… នេវទស្សនេន នភាវនាយ បហាតព្ពា ខន្ធា ឥទ្ធិវិធញាណស្ស, ចេតោបរិយញាណស្ស, បុព្ពេនិវាសានុស្សតិញាណស្ស, យថាកម្មូបគញាណស្ស, អនាគតំសញាណស្ស, អាវជ្ជនាយ អារម្មណបច្ចយេន បច្ចយោ. (១)

នេវទស្សនេន នភាវនាយ បហាតព្ពោ ធម្មោ ទស្សនេន បហាតព្ពស្ស ធម្មស្ស អារម្មណបច្ចយេន បច្ចយោ – ទានំ ទត្វា សីលំ សមាទិយិត្វា ឧបោសថកម្មំ កត្វា តំ អស្សាទេតិ អភិនន្ទតិ, តំ អារព្ភ ទស្សនេន បហាតព្ពោ រាគោ ឧប្បជ្ជតិ, ទិដ្ឋិ ឧប្បជ្ជតិ, វិចិកិច្ឆា ឧប្បជ្ជតិ, ទស្សនេន បហាតព្ពំ ទោមនស្សំ ឧប្បជ្ជតិ. បុព្ពេ សុចិណ្ណានិ អស្សាទេតិ អភិនន្ទតិ…បេ… ឈានា វុដ្ឋហិត្វា ឈានំ អស្សាទេតិ អភិនន្ទតិ, តំ អារព្ភ ទស្សនេន បហាតព្ពោ រាគោ…បេ… ទិដ្ឋិ…បេ… វិចិកិច្ឆា…បេ… ឈានេ បរិហីនេ វិប្បដិសារិស្ស ទស្សនេន បហាតព្ពំ ទោមនស្សំ ឧប្បជ្ជតិ. ចក្ខុំ អស្សាទេតិ អភិនន្ទតិ…បេ… សោតំ… ឃានំ… ជិវ្ហំ… កាយំ… រូបេ… សទ្ទេ… គន្ធេ… រសេ… ផោដ្ឋព្ពេ… វត្ថុំ… នេវទស្សនេន នភាវនាយ បហាតព្ពេ ខន្ធេ អស្សាទេតិ អភិនន្ទតិ, តំ អារព្ភ ទស្សនេន បហាតព្ពោ រាគោ…បេ… ទិដ្ឋិ…បេ… វិចិកិច្ឆា…បេ… ទស្សនេន បហាតព្ពំ ទោមនស្សំ ឧប្បជ្ជតិ. (២)

នេវទស្សនេន នភាវនាយ បហាតព្ពោ ធម្មោ ភាវនាយ បហាតព្ពស្ស ធម្មស្ស អារម្មណបច្ចយេន បច្ចយោ – ទានំ ទត្វា សីលំ សមាទិយិត្វា ឧបោសថកម្មំ កត្វា តំ អស្សាទេតិ អភិនន្ទតិ, តំ អារព្ភ ភាវនាយ បហាតព្ពោ រាគោ ឧប្បជ្ជតិ, ឧទ្ធច្ចំ ឧប្បជ្ជតិ, ភាវនាយ បហាតព្ពំ ទោមនស្សំ ឧប្បជ្ជតិ. បុព្ពេ សុចិណ្ណានិ…បេ… ឈានា វុដ្ឋហិត្វា…បេ… ចក្ខុំ…បេ… វត្ថុំ… នេវទស្សនេន នភាវនាយ បហាតព្ពេ ខន្ធេ អស្សាទេតិ…បេ… តំ អារព្ភ ភាវនាយ បហាតព្ពោ រាគោ ឧប្បជ្ជតិ, ឧទ្ធច្ចំ ឧប្បជ្ជតិ, ភាវនាយ បហាតព្ពំ ទោមនស្សំ ឧប្បជ្ជតិ. (៣)

អធិបតិបច្ចយោ

៧៤. ទស្សនេន បហាតព្ពោ ធម្មោ ទស្សនេន បហាតព្ពស្ស ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – ទស្សនេន បហាតព្ពំ រាគំ គរុំ កត្វា អស្សាទេតិ អភិនន្ទតិ, តំ គរុំ កត្វា ទស្សនេន បហាតព្ពោ រាគោ ឧប្បជ្ជតិ, ទិដ្ឋិ ឧប្បជ្ជតិ; ទិដ្ឋិំ គរុំ កត្វា អស្សាទេតិ អភិនន្ទតិ, តំ គរុំ កត្វា ទស្សនេន បហាតព្ពោ រាគោ ឧប្បជ្ជតិ, ទិដ្ឋិ ឧប្បជ្ជតិ. សហជាតាធិបតិ – ទស្សនេន បហាតព្ពាធិបតិ សម្បយុត្តកានំ ខន្ធានំ អធិបតិបច្ចយេន បច្ចយោ. (១)

ទស្សនេន បហាតព្ពោ ធម្មោ នេវទស្សនេន នភាវនាយ បហាតព្ពស្ស ធម្មស្ស អធិបតិបច្ចយេន បច្ចយោ. សហជាតាធិបតិ – ទស្សនេន បហាតព្ពាធិបតិ ចិត្តសមុដ្ឋានានំ រូបានំ អធិបតិបច្ចយេន បច្ចយោ. (២)

ទស្សនេន បហាតព្ពោ ធម្មោ ទស្សនេន បហាតព្ពស្ស ច នេវទស្សនេន នភាវនាយ បហាតព្ពស្ស ច ធម្មស្ស អធិបតិបច្ចយេន បច្ចយោ. សហជាតាធិបតិ – ទស្សនេន បហាតព្ពាធិបតិ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ អធិបតិបច្ចយេន បច្ចយោ. (៣)

៧៥. ភាវនាយ បហាតព្ពោ ធម្មោ ភាវនាយ បហាតព្ពស្ស ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – ភាវនាយ បហាតព្ពំ រាគំ គរុំ កត្វា អស្សាទេតិ អភិនន្ទតិ, តំ គរុំ កត្វា ភាវនាយ បហាតព្ពោ រាគោ ឧប្បជ្ជតិ. សហជាតាធិបតិ – ភាវនាយ បហាតព្ពាធិបតិ សម្បយុត្តកានំ ខន្ធានំ អធិបតិបច្ចយេន បច្ចយោ. (១)

ភាវនាយ បហាតព្ពោ ធម្មោ ទស្សនេន បហាតព្ពស្ស ធម្មស្ស អធិបតិបច្ចយេន បច្ចយោ. អារម្មណាធិបតិ – ភាវនាយ បហាតព្ពំ រាគំ គរុំ កត្វា អស្សាទេតិ អភិនន្ទតិ, តំ គរុំ កត្វា ទស្សនេន បហាតព្ពោ រាគោ ឧប្បជ្ជតិ, ទិដ្ឋិ ឧប្បជ្ជតិ. (២)

ភាវនាយ បហាតព្ពោ ធម្មោ នេវទស្សនេន នភាវនាយ បហាតព្ពស្ស ធម្មស្ស អធិបតិបច្ចយេន បច្ចយោ. សហជាតាធិបតិ – ភាវនាយ បហាតព្ពាធិបតិ ចិត្តសមុដ្ឋានានំ រូបានំ អធិបតិបច្ចយេន បច្ចយោ. (៣)

ភាវនាយ បហាតព្ពោ ធម្មោ ភាវនាយ បហាតព្ពស្ស ច នេវទស្សនេន នភាវនាយ បហាតព្ពស្ស ច ធម្មស្ស អធិបតិបច្ចយេន បច្ចយោ. សហជាតាធិបតិ – ភាវនាយ បហាតព្ពាធិបតិ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ អធិបតិបច្ចយេន បច្ចយោ. (៤)

៧៦. នេវទស្សនេន នភាវនាយ បហាតព្ពោ ធម្មោ នេវទស្សនេន នភាវនាយ បហាតព្ពស្ស ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – ទានំ ទត្វា សីលំ សមាទិយិត្វា ឧបោសថកម្មំ កត្វា តំ គរុំ កត្វា បច្ចវេក្ខតិ, បុព្ពេ សុចិណ្ណានិ…បេ… ឈានា វុដ្ឋហិត្វា ឈានំ គរុំ កត្វា បច្ចវេក្ខតិ, អរិយា មគ្គា វុដ្ឋហិត្វា មគ្គំ គរុំ កត្វា បច្ចវេក្ខន្តិ, ផលំ គរុំ កត្វា បច្ចវេក្ខន្តិ, និព្ពានំ គរុំ កត្វា បច្ចវេក្ខន្តិ; និព្ពានំ គោត្រភុស្ស, វោទានស្ស, មគ្គស្ស, ផលស្ស អធិបតិបច្ចយេន បច្ចយោ. សហជាតាធិបតិ – នេវទស្សនេន នភាវនាយ បហាតព្ពាធិបតិ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ អធិបតិបច្ចយេន បច្ចយោ. (១)

នេវទស្សនេន នភាវនាយ បហាតព្ពោ ធម្មោ ទស្សនេន បហាតព្ពស្ស ធម្មស្ស អធិបតិបច្ចយេន បច្ចយោ. អារម្មណាធិបតិ – ទានំ ទត្វា សីលំ សមាទិយិត្វា ឧបោសថកម្មំ កត្វា តំ គរុំ កត្វា អស្សាទេតិ អភិនន្ទតិ, តំ គរុំ កត្វា ទស្សនេន បហាតព្ពោ រាគោ ឧប្បជ្ជតិ, ទិដ្ឋិ ឧប្បជ្ជតិ. បុព្ពេ សុចិណ្ណានិ គរុំ កត្វា…បេ… ឈានា វុដ្ឋហិត្វា ឈានំ គរុំ កត្វា…បេ… ចក្ខុំ…បេ… វត្ថុំ… នេវទស្សនេន នភាវនាយ បហាតព្ពេ ខន្ធេ គរុំ កត្វា អស្សាទេតិ អភិនន្ទតិ, តំ គរុំ កត្វា ទស្សនេន បហាតព្ពោ រាគោ ឧប្បជ្ជតិ, ទិដ្ឋិ ឧប្បជ្ជតិ. (២)

នេវទស្សនេន នភាវនាយ បហាតព្ពោ ធម្មោ ភាវនាយ បហាតព្ពស្ស ធម្មស្ស អធិបតិបច្ចយេន បច្ចយោ. អារម្មណាធិបតិ – ទានំ ទត្វា សីលំ សមាទិយិត្វា ឧបោសថកម្មំ កត្វា តំ គរុំ កត្វា អស្សាទេតិ អភិនន្ទតិ, តំ គរុំ កត្វា ភាវនាយ បហាតព្ពោ រាគោ ឧប្បជ្ជតិ. បុព្ពេ…បេ… នេវទស្សនេន នភាវនាយ បហាតព្ពេ ខន្ធេ គរុំ កត្វា អស្សាទេតិ អភិនន្ទតិ, តំ គរុំ កត្វា ភាវនាយ បហាតព្ពោ រាគោ ឧប្បជ្ជតិ. (៣)

អនន្តរបច្ចយោ

៧៧. ទស្សនេន បហាតព្ពោ ធម្មោ ទស្សនេន បហាតព្ពស្ស ធម្មស្ស អនន្តរបច្ចយេន បច្ចយោ – បុរិមា បុរិមា ទស្សនេន បហាតព្ពា ខន្ធា បច្ឆិមានំ បច្ឆិមានំ ទស្សនេន បហាតព្ពានំ ខន្ធានំ អនន្តរបច្ចយេន បច្ចយោ.

ទស្សនេន បហាតព្ពោ ធម្មោ នេវទស្សនេន នភាវនាយ បហាតព្ពស្ស ធម្មស្ស អនន្តរបច្ចយេន បច្ចយោ – ទស្សនេន បហាតព្ពា ខន្ធា វុដ្ឋានស្ស អនន្តរបច្ចយេន បច្ចយោ. (២)

ភាវនាយ បហាតព្ពោ ធម្មោ ភាវនាយ បហាតព្ពស្ស ធម្មស្ស អនន្តរបច្ចយេន បច្ចយោ – បុរិមា បុរិមា ភាវនាយ បហាតព្ពា ខន្ធា បច្ឆិមានំ បច្ឆិមានំ ភាវនាយ បហាតព្ពានំ ខន្ធានំ អនន្តរបច្ចយេន បច្ចយោ. (១)

ភាវនាយ បហាតព្ពោ ធម្មោ នេវទស្សនេន នភាវនាយ បហាតព្ពស្ស ធម្មស្ស អនន្តរបច្ចយេន បច្ចយោ – ភាវនាយ បហាតព្ពា ខន្ធា វុដ្ឋានស្ស អនន្តរបច្ចយេន បច្ចយោ. (២)

នេវទស្សនេន នភាវនាយ បហាតព្ពោ ធម្មោ នេវទស្សនេន នភាវនាយ បហាតព្ពស្ស ធម្មស្ស អនន្តរបច្ចយេន បច្ចយោ – បុរិមា បុរិមា នេវទស្សនេន នភាវនាយ បហាតព្ពា ខន្ធា បច្ឆិមានំ បច្ឆិមានំ នេវទស្សនេន នភាវនាយ បហាតព្ពានំ ខន្ធានំ អនន្តរបច្ចយេន បច្ចយោ. អនុលោមំ គោត្រភុស្ស… អនុលោមំ វោទានស្ស… គោត្រភុ មគ្គស្ស… វោទានំ មគ្គស្ស… មគ្គោ ផលស្ស… ផលំ ផលស្ស… អនុលោមំ ផលសមាបត្តិយា… និរោធា វុដ្ឋហន្តស្ស នេវសញ្ញានាសញ្ញាយតនំ ផលសមាបត្តិយា អនន្តរបច្ចយេន បច្ចយោ. (១)

នេវទស្សនេន នភាវនាយ បហាតព្ពោ ធម្មោ ទស្សនេន បហាតព្ពស្ស ធម្មស្ស…បេ… អាវជ្ជនា ទស្សនេន បហាតព្ពានំ ខន្ធានំ អនន្តរបច្ចយេន បច្ចយោ. (២)

នេវទស្សនេន នភាវនាយ បហាតព្ពោ ធម្មោ ភាវនាយ បហាតព្ពស្ស ធម្មស្ស អនន្តរបច្ចយេន បច្ចយោ – អាវជ្ជនា ភាវនាយ បហាតព្ពានំ ខន្ធានំ អនន្តរបច្ចយេន បច្ចយោ. (៣)

សមនន្តរបច្ចយោ

៧៨. ទស្សនេន បហាតព្ពោ ធម្មោ ទស្សនេន បហាតព្ពស្ស ធម្មស្ស សមនន្តរបច្ចយេន បច្ចយោ (អនន្តរសទិសំ).

សហជាតបច្ចយោ

៧៩. ទស្សនេន បហាតព្ពោ ធម្មោ ទស្សនេន បហាតព្ពស្ស ធម្មស្ស សហជាតបច្ចយេន បច្ចយោ… តីណិ.

ភាវនាយ បហាតព្ពោ ធម្មោ ភាវនាយ បហាតព្ពស្ស ធម្មស្ស… តីណិ.

នេវទស្សនេន នភាវនាយ បហាតព្ពោ ធម្មោ នេវទស្សនេន នភាវនាយ បហាតព្ពស្ស ធម្មស្ស សហជាតបច្ចយេន បច្ចយោ – នេវទស្សនេន នភាវនាយ បហាតព្ពោ ឯកោ ខន្ធោ តិណ្ណន្នំ ខន្ធានំ ចិត្តសមុដ្ឋានានញ្ច រូបានំ សហជាតបច្ចយេន បច្ចយោ…បេ… ទ្វេ ខន្ធា…បេ… បដិសន្ធិក្ខណេ…បេ… ខន្ធា វត្ថុស្ស សហជាតបច្ចយេន បច្ចយោ. វត្ថុ ខន្ធានំ…បេ… ឯកំ មហាភូតំ តិណ្ណន្នំ មហាភូតានំ…បេ… មហាភូតា ចិត្តសមុដ្ឋានានំ រូបានំ…បេ… ពាហិរំ… អាហារសមុដ្ឋានំ… ឧតុសមុដ្ឋានំ… អសញ្ញសត្តានំ…បេ…. (១)

ទស្សនេន បហាតព្ពោ ច នេវទស្សនេន នភាវនាយ បហាតព្ពោ ច ធម្មា នេវទស្សនេន នភាវនាយ បហាតព្ពស្ស ធម្មស្ស សហជាតបច្ចយេន បច្ចយោ – ទស្សនេន បហាតព្ពា ខន្ធា ច មហាភូតា ច ចិត្តសមុដ្ឋានានំ រូបានំ សហជាតបច្ចយេន បច្ចយោ. (១)

ភាវនាយ បហាតព្ពោ ច នេវទស្សនេន នភាវនាយ បហាតព្ពោ ច ធម្មា នេវទស្សនេន នភាវនាយ បហាតព្ពស្ស ធម្មស្ស សហជាតបច្ចយេន បច្ចយោ – ភាវនាយ បហាតព្ពា ខន្ធា ច មហាភូតា ច ចិត្តសមុដ្ឋានានំ រូបានំ សហជាតបច្ចយេន បច្ចយោ. (១)

អញ្ញមញ្ញបច្ចយោ

៨០. ទស្សនេន បហាតព្ពោ ធម្មោ ទស្សនេន បហាតព្ពស្ស ធម្មស្ស អញ្ញមញ្ញបច្ចយេន បច្ចយោ – ទស្សនេន បហាតព្ពោ ឯកោ ខន្ធោ តិណ្ណន្នំ ខន្ធានំ…បេ…. (១)

ភាវនាយ បហាតព្ពោ ធម្មោ ភាវនាយ បហាតព្ពស្ស ធម្មស្ស…បេ… ភាវនាយ បហាតព្ពោ ឯកោ ខន្ធោ តិណ្ណន្នំ ខន្ធានំ…បេ…. (១)

នេវទស្សនេន នភាវនាយ បហាតព្ពោ ធម្មោ នេវទស្សនេន នភាវនាយ បហាតព្ពស្ស ធម្មស្ស…បេ… នេវទស្សនេន នភាវនាយ បហាតព្ពោ ឯកោ ខន្ធោ តិណ្ណន្នំ ខន្ធានំ អញ្ញមញ្ញបច្ចយេន បច្ចយោ…បេ… ទ្វេ ខន្ធា…បេ… បដិសន្ធិក្ខណេ នេវទស្សនេន នភាវនាយ បហាតព្ពោ ឯកោ ខន្ធោ តិណ្ណន្នំ ខន្ធានំ វត្ថុស្ស ច អញ្ញមញ្ញបច្ចយេន បច្ចយោ…បេ… ទ្វេ ខន្ធា…បេ… ខន្ធា វត្ថុស្ស…បេ… វត្ថុ ខន្ធានំ…បេ… ឯកំ មហាភូតំ តិណ្ណន្នំ មហាភូតានំ អញ្ញមញ្ញបច្ចយេន បច្ចយោ…បេ… អសញ្ញសត្តានំ…បេ…. (១)

និស្សយបច្ចយោ

៨១. ទស្សនេន បហាតព្ពោ ធម្មោ ទស្សនេន បហាតព្ពស្ស ធម្មស្ស និស្សយបច្ចយេន បច្ចយោ… តីណិ.

ភាវនាយ បហាតព្ពោ ធម្មោ ភាវនាយ បហាតព្ពស្ស ធម្មស្ស… តីណិ.

នេវទស្សនេន នភាវនាយ បហាតព្ពោ ធម្មោ នេវទស្សនេន នភាវនាយ បហាតព្ពស្ស ធម្មស្ស និស្សយបច្ចយេន បច្ចយោ – នេវទស្សនេន នភាវនាយ បហាតព្ពោ ឯកោ ខន្ធោ តិណ្ណន្នំ ខន្ធានំ ចិត្តសមុដ្ឋានានញ្ច រូបានំ…បេ… ទ្វេ ខន្ធា…បេ… បដិសន្ធិក្ខណេ…បេ… ខន្ធា វត្ថុស្ស…បេ… វត្ថុ ខន្ធានំ…បេ… ឯកំ មហាភូតំ…បេ… អសញ្ញសត្តានំ…បេ… ចក្ខាយតនំ ចក្ខុវិញ្ញាណស្ស…បេ… កាយាយតនំ កាយវិញ្ញាណស្ស…បេ… វត្ថុ…បេ…. (១)

នេវទស្សនេន នភាវនាយ បហាតព្ពោ ធម្មោ ទស្សនេន បហាតព្ពស្ស ធម្មស្ស និស្សយបច្ចយេន បច្ចយោ – វត្ថុ ទស្សនេន បហាតព្ពានំ ខន្ធានំ និស្សយបច្ចយេន បច្ចយោ. (២)

នេវទស្សនេន នភាវនាយ បហាតព្ពោ ធម្មោ ភាវនាយ បហាតព្ពស្ស ធម្មស្ស និស្សយបច្ចយេន បច្ចយោ – វត្ថុ ភាវនាយ បហាតព្ពានំ ខន្ធានំ និស្សយបច្ចយេន បច្ចយោ. (៣)

៨២. ទស្សនេន បហាតព្ពោ ច នេវទស្សនេន នភាវនាយ បហាតព្ពោ ច ធម្មា ទស្សនេន បហាតព្ពស្ស ធម្មស្ស និស្សយបច្ចយេន បច្ចយោ – ទស្សនេន បហាតព្ពោ ឯកោ ខន្ធោ ច វត្ថុ ច តិណ្ណន្នំ ខន្ធានំ និស្សយបច្ចយេន បច្ចយោ…បេ… ទ្វេ ខន្ធា…បេ…. (១)

ទស្សនេន បហាតព្ពោ ច នេវទស្សនេន នភាវនាយ បហាតព្ពោ ច ធម្មា នេវទស្សនេន នភាវនាយ បហាតព្ពស្ស ធម្មស្ស និស្សយបច្ចយេន បច្ចយោ – ទស្សនេន បហាតព្ពា ខន្ធា ច មហាភូតា ច ចិត្តសមុដ្ឋានានំ រូបានំ និស្សយបច្ចយេន បច្ចយោ. (២)

ភាវនាយ បហាតព្ពោ ច នេវទស្សនេន នភាវនាយ បហាតព្ពោ ច ធម្មា ភាវនាយ បហាតព្ពស្ស ធម្មស្ស និស្សយបច្ចយេន បច្ចយោ – ភាវនាយ បហាតព្ពោ ឯកោ ខន្ធោ ច វត្ថុ ច តិណ្ណន្នំ ខន្ធានំ និស្សយបច្ចយេន បច្ចយោ…បេ… ទ្វេ ខន្ធា…បេ…. (១)

ភាវនាយ បហាតព្ពោ ច នេវទស្សនេន នភាវនាយ បហាតព្ពោ ច ធម្មា នេវទស្សនេន នភាវនាយ បហាតព្ពស្ស ធម្មស្ស និស្សយបច្ចយេន បច្ចយោ – ភាវនាយ បហាតព្ពា ខន្ធា ច មហាភូតា ច ចិត្តសមុដ្ឋានានំ រូបានំ និស្សយបច្ចយេន បច្ចយោ. (២)

ឧបនិស្សយបច្ចយោ

៨៣. ទស្សនេន បហាតព្ពោ ធម្មោ ទស្សនេន បហាតព្ពស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – ទស្សនេន បហាតព្ពំ រាគំ ឧបនិស្សាយ បាណំ ហនតិ, អទិន្នំ អាទិយតិ…បេ… សង្ឃំ ភិន្ទតិ. ទស្សនេន បហាតព្ពំ ទោសំ… មោហំ… ទិដ្ឋិំ… បត្ថនំ ឧបនិស្សាយ បាណំ ហនតិ…បេ… សង្ឃំ ភិន្ទតិ. ទស្សនេន បហាតព្ពោ រាគោ… ទោសោ… មោហោ… ទិដ្ឋិ… បត្ថនា ទស្សនេន បហាតព្ពស្ស រាគស្ស.. ទោសស្ស… មោហស្ស… ទិដ្ឋិយា… បត្ថនាយ ឧបនិស្សយបច្ចយេន បច្ចយោ. (១)

ទស្សនេន បហាតព្ពោ ធម្មោ នេវទស្សនេន នភាវនាយ បហាតព្ពស្ស ធម្មស្ស ឧបនិស្សយបច្ចយេន បច្ចយោ – អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – ទស្សនេន បហាតព្ពំ រាគំ ឧបនិស្សាយ ទានំ ទេតិ, សីលំ សមាទិយតិ, ឧបោសថកម្មំ ករោតិ…បេ… សមាបត្តិំ ឧប្បាទេតិ. ទស្សនេន បហាតព្ពំ ទោសំ…បេ… បត្ថនំ ឧបនិស្សាយ ទានំ ទេតិ…បេ… សមាបត្តិំ ឧប្បាទេតិ. ទស្សនេន បហាតព្ពោ រាគោ… ទោសោ… មោហោ… ទិដ្ឋិ… បត្ថនា សទ្ធាយ…បេ… បញ្ញាយ កាយិកស្ស សុខស្ស, កាយិកស្ស ទុក្ខស្ស ផលសមាបត្តិយា ឧបនិស្សយបច្ចយេន បច្ចយោ. (២)

៨៤. ភាវនាយ បហាតព្ពោ ធម្មោ ភាវនាយ បហាតព្ពស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – ភាវនាយ បហាតព្ពោ រាគោ… ទោសោ… មោហោ… មានោ… បត្ថនា ភាវនាយ បហាតព្ពស្ស រាគស្ស… ទោសស្ស… មោហស្ស… មានស្ស… បត្ថនាយ ឧបនិស្សយបច្ចយេន បច្ចយោ. (១)

ភាវនាយ បហាតព្ពោ ធម្មោ ទស្សនេន បហាតព្ពស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, បកតូបនិស្សយោ…បេ…. បកតូបនិស្សយោ – ភាវនាយ បហាតព្ពំ រាគំ ឧបនិស្សាយ បាណំ ហនតិ…បេ… សង្ឃំ ភិន្ទតិ. ភាវនាយ បហាតព្ពំ ទោសំ… មោហំ… មានំ… បត្ថនំ ឧបនិស្សាយ បាណំ ហនតិ…បេ… សង្ឃំ ភិន្ទតិ. ភាវនាយ បហាតព្ពោ រាគោ… ទោសោ… មោហោ… មានោ… បត្ថនា ទស្សនេន បហាតព្ពស្ស រាគស្ស… ទោសស្ស… មោហស្ស… ទិដ្ឋិយា… បត្ថនាយ ឧបនិស្សយបច្ចយេន បច្ចយោ. សកភណ្ឌេ ឆន្ទរាគោ បរភណ្ឌេ ឆន្ទរាគស្ស ឧបនិស្សយបច្ចយេន បច្ចយោ. សកបរិគ្គហេ ឆន្ទរាគោ បរបរិគ្គហេ ឆន្ទរាគស្ស ឧបនិស្សយបច្ចយេន បច្ចយោ. (២)

ភាវនាយ បហាតព្ពោ ធម្មោ នេវទស្សនេន នភាវនាយ បហាតព្ពស្ស ធម្មស្ស ឧបនិស្សយបច្ចយេន បច្ចយោ – អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – ភាវនាយ បហាតព្ពំ រាគំ ឧបនិស្សាយ ទានំ ទេតិ…បេ… សមាបត្តិំ ឧប្បាទេតិ. ភាវនាយ បហាតព្ពំ ទោសំ… មោហំ… មានំ… បត្ថនំ ឧបនិស្សាយ ទានំ ទេតិ…បេ… សមាបត្តិំ ឧប្បាទេតិ. ភាវនាយ បហាតព្ពោ រាគោ… ទោសោ… មោហោ… មានោ… បត្ថនា សទ្ធាយ…បេ… ផលសមាបត្តិយា ឧបនិស្សយបច្ចយេន បច្ចយោ. (៣)

៨៥. នេវទស្សនេន នភាវនាយ បហាតព្ពោ ធម្មោ នេវទស្សនេន នភាវនាយ បហាតព្ពស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – សទ្ធំ ឧបនិស្សាយ ទានំ ទេតិ…បេ… សមាបត្តិំ ឧប្បាទេតិ. សីលំ… សុតំ… ចាគំ… បញ្ញំ… កាយិកំ… សុខំ… កាយិកំ ទុក្ខំ… ឧតុំ… ភោជនំ… សេនាសនំ… ឧបនិស្សាយ ទានំ ទេតិ…បេ… សមាបត្តិំ ឧប្បាទេតិ. សទ្ធា… សីលំ… សុតំ… ចាគោ … បញ្ញា… កាយិកំ សុខំ… កាយិកំ ទុក្ខំ… ឧតុ… ភោជនំ… សេនាសនំ… សទ្ធាយ…បេ… បញ្ញាយ កាយិកស្ស សុខស្ស, កាយិកស្ស ទុក្ខស្ស ផលសមាបត្តិយា ឧបនិស្សយបច្ចយេន បច្ចយោ. (១)

នេវទស្សនេន នភាវនាយ បហាតព្ពោ ធម្មោ ទស្សនេន បហាតព្ពស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – សទ្ធំ ឧបនិស្សាយ ទិដ្ឋិំ គណ្ហាតិ. សីលំ…បេ… សេនាសនំ ឧបនិស្សាយ បាណំ ហនតិ…បេ… សង្ឃំ ភិន្ទតិ. សទ្ធា…បេ… សេនាសនំ ទស្សនេន បហាតព្ពស្ស រាគស្ស… ទោសស្ស… មោហស្ស… ទិដ្ឋិយា… បត្ថនាយ ឧបនិស្សយបច្ចយេន បច្ចយោ. (២)

នេវទស្សនេន នភាវនាយ បហាតព្ពោ ធម្មោ ភាវនាយ បហាតព្ពស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – សទ្ធំ ឧបនិស្សាយ មានំ ជប្បេតិ. សីលំ…បេ… បញ្ញំ… កាយិកំ សុខំ… កាយិកំ ទុក្ខំ… ឧតុំ… ភោជនំ… សេនាសនំ… ឧបនិស្សាយ មានំ ជប្បេតិ. សទ្ធា…បេ… បញ្ញា… កាយិកំ សុខំ… កាយិកំ ទុក្ខំ… ឧតុ… ភោជនំ… សេនាសនំ ភាវនាយ បហាតព្ពស្ស រាគស្ស… ទោសស្ស… មោហស្ស… មានស្ស… បត្ថនាយ ឧបនិស្សយបច្ចយេន បច្ចយោ. (៣)

បុរេជាតបច្ចយោ

៨៦. នេវទស្សនេន នភាវនាយ បហាតព្ពោ ធម្មោ នេវទស្សនេន នភាវនាយ បហាតព្ពស្ស ធម្មស្ស បុរេជាតបច្ចយេន បច្ចយោ – អារម្មណបុរេជាតំ, វត្ថុបុរេជាតំ. អារម្មណបុរេជាតំ – ចក្ខុំ អនិច្ចតោ ទុក្ខតោ អនត្តតោ វិបស្សតិ, សោតំ… ឃានំ… ជិវ្ហំ… កាយំ… រូបេ… សទ្ទេ… គន្ធេ… រសេ… ផោដ្ឋព្ពេ… វត្ថុំ…បេ… ទិព្ពេន ចក្ខុនា រូបំ បស្សតិ, ទិព្ពាយ សោតធាតុយា សទ្ទំ សុណាតិ. រូបាយតនំ ចក្ខុវិញ្ញាណស្ស…បេ… ផោដ្ឋព្ពាយតនំ កាយវិញ្ញាណស្ស បុរេជាតបច្ចយេន បច្ចយោ. វត្ថុបុរេជាតំ – ចក្ខាយតនំ ចក្ខុវិញ្ញាណស្ស…បេ… កាយាយតនំ កាយវិញ្ញាណស្ស…បេ… វត្ថុ នេវទស្សនេន នភាវនាយ បហាតព្ពានំ ខន្ធានំ បុរេជាតបច្ចយេន បច្ចយោ. (១)

នេវទស្សនេន នភាវនាយ បហាតព្ពោ ធម្មោ ទស្សនេន បហាតព្ពស្ស ធម្មស្ស បុរេជាតបច្ចយេន បច្ចយោ – អារម្មណបុរេជាតំ, វត្ថុបុរេជាតំ. អារម្មណបុរេជាតំ – ចក្ខុំ អស្សាទេតិ អភិនន្ទតិ; តំ អារព្ភ ទស្សនេន បហាតព្ពោ រាគោ ឧប្បជ្ជតិ, ទិដ្ឋិ ឧប្បជ្ជតិ, វិចិកិច្ឆា ឧប្បជ្ជតិ, ទស្សនេន បហាតព្ពំ ទោមនស្សំ ឧប្បជ្ជតិ…បេ… វត្ថុំ អស្សាទេតិ អភិនន្ទតិ; តំ អារព្ភ ទស្សនេន បហាតព្ពោ រាគោ ឧប្បជ្ជតិ, ទិដ្ឋិ ឧប្បជ្ជតិ, វិចិកិច្ឆា ឧប្បជ្ជតិ, ទស្សនេន បហាតព្ពំ ទោមនស្សំ ឧប្បជ្ជតិ. វត្ថុបុរេជាតំ – វត្ថុ ទស្សនេន បហាតព្ពានំ ខន្ធានំ បុរេជាតបច្ចយេន បច្ចយោ. (២)

នេវទស្សនេន នភាវនាយ បហាតព្ពោ ធម្មោ ភាវនាយ បហាតព្ពស្ស ធម្មស្ស បុរេជាតបច្ចយេន បច្ចយោ – អារម្មណបុរេជាតំ, វត្ថុបុរេជាតំ. អារម្មណបុរេជាតំ – ចក្ខុំ អស្សាទេតិ អភិនន្ទតិ; តំ អារព្ភ ភាវនាយ បហាតព្ពោ រាគោ ឧប្បជ្ជតិ… ឧទ្ធច្ចំ ឧប្បជ្ជតិ… ភាវនាយ បហាតព្ពំ ទោមនស្សំ ឧប្បជ្ជតិ, សោតំ…បេ… កាយំ… រូបេ…បេ… ផោដ្ឋព្ពេ… វត្ថុំ អស្សាទេតិ អភិនន្ទតិ; តំ អារព្ភ ភាវនាយ បហាតព្ពោ រាគោ ឧប្បជ្ជតិ, ឧទ្ធច្ចំ ឧប្បជ្ជតិ, ភាវនាយ បហាតព្ពំ ទោមនស្សំ ឧប្បជ្ជតិ. វត្ថុបុរេជាតំ – វត្ថុ ភាវនាយ បហាតព្ពានំ ខន្ធានំ បុរេជាតបច្ចយេន បច្ចយោ. (៣)

បច្ឆាជាតបច្ចយោ

៨៧. ទស្សនេន បហាតព្ពោ ធម្មោ នេវទស្សនេន នភាវនាយ បហាតព្ពស្ស ធម្មស្ស បច្ឆាជាតបច្ចយេន បច្ចយោ – បច្ឆាជាតា ទស្សនេន បហាតព្ពា ខន្ធា បុរេជាតស្ស ឥមស្ស កាយស្ស បច្ឆាជាតបច្ចយេន បច្ចយោ. (១)

ភាវនាយ បហាតព្ពោ ធម្មោ នេវទស្សនេន នភាវនាយ បហាតព្ពស្ស ធម្មស្ស បច្ឆាជាតបច្ចយេន បច្ចយោ – បច្ឆាជាតា ភាវនាយ បហាតព្ពា ខន្ធា បុរេជាតស្ស ឥមស្ស កាយស្ស បច្ឆាជាតបច្ចយេន បច្ចយោ. (១)

នេវទស្សនេន នភាវនាយ បហាតព្ពោ ធម្មោ នេវទស្សនេន នភាវនាយ បហាតព្ពស្ស ធម្មស្ស បច្ឆាជាតបច្ចយេន បច្ចយោ – បច្ឆាជាតា នេវទស្សនេន នភាវនាយ បហាតព្ពា ខន្ធា បុរេជាតស្ស ឥមស្ស កាយស្ស បច្ឆាជាតបច្ចយេន បច្ចយោ. (១)

អាសេវនបច្ចយោ

៨៨. ទស្សនេន បហាតព្ពោ ធម្មោ ទស្សនេន បហាតព្ពស្ស ធម្មស្ស អាសេវនបច្ចយេន បច្ចយោ – បុរិមា បុរិមា ទស្សនេន បហាតព្ពា ខន្ធា បច្ឆិមានំ បច្ឆិមានំ…បេ… អាសេវនបច្ចយេន បច្ចយោ. (១)

ភាវនាយ បហាតព្ពោ ធម្មោ ភាវនាយ បហាតព្ពស្ស ធម្មស្ស អាសេវនបច្ចយេន បច្ចយោ – បុរិមា បុរិមា ភាវនាយ បហាតព្ពា ខន្ធា បច្ឆិមានំ បច្ឆិមានំ…បេ… អាសេវនបច្ចយេន បច្ចយោ. (១)

នេវទស្សនេន នភាវនាយ បហាតព្ពោ ធម្មោ នេវទស្សនេន នភាវនាយ បហាតព្ពស្ស ធម្មស្ស អាសេវនបច្ចយេន បច្ចយោ – បុរិមា បុរិមា នេវទស្សនេន នភាវនាយ បហាតព្ពា ខន្ធា បច្ឆិមានំ បច្ឆិមានំ…បេ… អាសេវនបច្ចយេន បច្ចយោ. អនុលោមំ គោត្រភុស្ស… អនុលោមំ វោទានស្ស… គោត្រភុ មគ្គស្ស… វោទានំ មគ្គស្ស អាសេវនបច្ចយេន បច្ចយោ. (១)

កម្មបច្ចយោ

៨៩. ទស្សនេន បហាតព្ពោ ធម្មោ ទស្សនេន បហាតព្ពស្ស ធម្មស្ស កម្មបច្ចយេន បច្ចយោ – ទស្សនេន បហាតព្ពា ចេតនា សម្បយុត្តកានំ ខន្ធានំ កម្មបច្ចយេន បច្ចយោ. (១)

ទស្សនេន បហាតព្ពោ ធម្មោ នេវទស្សនេន នភាវនាយ បហាតព្ពស្ស ធម្មស្ស កម្មបច្ចយេន បច្ចយោ – សហជាតា, នានាក្ខណិកា. សហជាតា – ទស្សនេន បហាតព្ពា ចេតនា ចិត្តសមុដ្ឋានានំ រូបានំ កម្មបច្ចយេន បច្ចយោ. នានាក្ខណិកា – ទស្សនេន បហាតព្ពា ចេតនា វិបាកានំ ខន្ធានំ កដត្តា ច រូបានំ កម្មបច្ចយេន បច្ចយោ. (២)

ទស្សនេន បហាតព្ពោ ធម្មោ ទស្សនេន បហាតព្ពស្ស ច នេវទស្សនេន នភាវនាយ បហាតព្ពស្ស ច ធម្មស្ស កម្មបច្ចយេន បច្ចយោ – ទស្សនេន បហាតព្ពា ចេតនា សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ កម្មបច្ចយេន បច្ចយោ. (៣)

ភាវនាយ បហាតព្ពោ ធម្មោ ភាវនាយ បហាតព្ពស្ស ធម្មស្ស កម្មបច្ចយេន បច្ចយោ – ភាវនាយ បហាតព្ពា ចេតនា សម្បយុត្តកានំ ខន្ធានំ កម្មបច្ចយេន បច្ចយោ. (១)

ភាវនាយ បហាតព្ពោ ធម្មោ នេវទស្សនេន នភាវនាយ បហាតព្ពស្ស ធម្មស្ស កម្មបច្ចយេន បច្ចយោ – ភាវនាយ បហាតព្ពា ចេតនា ចិត្តសមុដ្ឋានានំ រូបានំ កម្មបច្ចយេន បច្ចយោ. (២)

ភាវនាយ បហាតព្ពោ ធម្មោ ភាវនាយ បហាតព្ពស្ស ច នេវទស្សនេន នភាវនាយ បហាតព្ពស្ស ច ធម្មស្ស កម្មបច្ចយេន បច្ចយោ – ភាវនាយ បហាតព្ពា ចេតនា សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ កម្មបច្ចយេន បច្ចយោ. (៣)

នេវទស្សនេន នភាវនាយ បហាតព្ពោ ធម្មោ នេវទស្សនេន នភាវនាយ បហាតព្ពស្ស ធម្មស្ស កម្មបច្ចយេន បច្ចយោ – សហជាតា, នានាក្ខណិកា. សហជាតា – នេវទស្សនេន នភាវនាយ បហាតព្ពា ចេតនា សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ កម្មបច្ចយេន បច្ចយោ. បដិសន្ធិក្ខណេ នេវទស្សនេន នភាវនាយ បហាតព្ពា ចេតនា សម្បយុត្តកានំ ខន្ធានំ កដត្តា ច រូបានំ…បេ…. នានាក្ខណិកា – នេវទស្សនេន នភាវនាយ បហាតព្ពា ចេតនា វិបាកានំ ខន្ធានំ កដត្តា ច រូបានំ កម្មបច្ចយេន បច្ចយោ. (១)

វិបាកបច្ចយោ

៩០. នេវទស្សនេន នភាវនាយ បហាតព្ពោ ធម្មោ នេវទស្សនេន នភាវនាយ បហាតព្ពស្ស ធម្មស្ស វិបាកបច្ចយេន បច្ចយោ – វិបាកោ នេវទស្សនេន នភាវនាយ បហាតព្ពោ ឯកោ ខន្ធោ តិណ្ណន្នំ ខន្ធានំ ចិត្តសមុដ្ឋានានញ្ច រូបានំ វិបាកបច្ចយេន បច្ចយោ…បេ… បដិសន្ធិក្ខណេ…បេ… ខន្ធា វត្ថុស្ស វិបាកបច្ចយេន បច្ចយោ.

អាហារបច្ចយាទិ

៩១. ទស្សនេន បហាតព្ពោ ធម្មោ ទស្សនេន បហាតព្ពស្ស ធម្មស្ស អាហារបច្ចយេន បច្ចយោ (សំខិត្តំ) កពឡីការោ… សត្ត បញ្ហា… ឥន្ទ្រិយបច្ចយេន បច្ចយោ… ចក្ខុន្ទ្រិយញ្ច…បេ… រូបជីវិតិន្ទ្រិយញ្ច …បេ… សត្ត បញ្ហា ឈានបច្ចយេន បច្ចយោ… មគ្គបច្ចយេន បច្ចយោ… សម្បយុត្តបច្ចយេន បច្ចយោ.

វិប្បយុត្តបច្ចយោ

៩២. ទស្សនេន បហាតព្ពោ ធម្មោ ទស្សនេន បហាតព្ពស្ស ធម្មស្ស វិប្បយុត្តបច្ចយេន បច្ចយោ – សហជាតំ, បច្ឆាជាតំ. សហជាតា – ទស្សនេន បហាតព្ពា ខន្ធា ចិត្តសមុដ្ឋានានំ រូបានំ វិប្បយុត្តបច្ចយេន បច្ចយោ. បច្ឆាជាតា – ទស្សនេន បហាតព្ពា ខន្ធា បុរេជាតស្ស ឥមស្ស កាយស្ស វិប្បយុត្តបច្ចយេន បច្ចយោ. (១)

ភាវនាយ បហាតព្ពោ ធម្មោ នេវទស្សនេន នភាវនាយ បហាតព្ពស្ស ធម្មស្ស វិប្បយុត្តបច្ចយេន បច្ចយោ – សហជាតំ, បច្ឆាជាតំ (ឥទម្បិ ទស្សនេន សទិសំ).

នេវទស្សនេន នភាវនាយ បហាតព្ពោ ធម្មោ នេវទស្សនេន នភាវនាយ បហាតព្ពស្ស ធម្មស្ស វិប្បយុត្តបច្ចយេន បច្ចយោ – សហជាតំ, បុរេជាតំ, បច្ឆាជាតំ. សហជាតា – នេវទស្សនេន នភាវនាយ បហាតព្ពា ខន្ធា ចិត្តសមុដ្ឋានានំ រូបានំ វិប្បយុត្តបច្ចយេន បច្ចយោ. បដិសន្ធិក្ខណេ នេវទស្សនេន នភាវនាយ បហាតព្ពា ខន្ធា កដត្តារូបានំ វិប្បយុត្តបច្ចយេន បច្ចយោ, ខន្ធា វត្ថុស្ស វិប្បយុត្តបច្ចយេន បច្ចយោ, វត្ថុ ខន្ធានំ វិប្បយុត្តបច្ចយេន បច្ចយោ. បុរេជាតំ – ចក្ខាយតនំ ចក្ខុវិញ្ញាណស្ស…បេ… កាយាយតនំ កាយវិញ្ញាណស្ស…បេ… វត្ថុ នេវទស្សនេន នភាវនាយ បហាតព្ពានំ ខន្ធានំ វិប្បយុត្តបច្ចយេន បច្ចយោ. បច្ឆាជាតា – នេវទស្សនេន នភាវនាយ បហាតព្ពា ខន្ធា បុរេជាតស្ស ឥមស្ស កាយស្ស វិប្បយុត្តបច្ចយេន បច្ចយោ. (១)

នេវទស្សនេន នភាវនាយ បហាតព្ពោ ធម្មោ ទស្សនេន បហាតព្ពស្ស ធម្មស្ស វិប្បយុត្តបច្ចយេន បច្ចយោ – បុរេជាតំ វត្ថុ ទស្សនេន បហាតព្ពានំ ខន្ធានំ វិប្បយុត្តបច្ចយេន បច្ចយោ. (២)

នេវទស្សនេន នភាវនាយ បហាតព្ពោ ធម្មោ ភាវនាយ បហាតព្ពស្ស ធម្មស្ស វិប្បយុត្តបច្ចយេន បច្ចយោ – បុរេជាតំ វត្ថុ ភាវនាយ បហាតព្ពានំ ខន្ធានំ វិប្បយុត្តបច្ចយេន បច្ចយោ. (៣)

អត្ថិបច្ចយោ

៩៣. ទស្សនេន បហាតព្ពោ ធម្មោ ទស្សនេន បហាតព្ពស្ស ធម្មស្ស អត្ថិបច្ចយេន បច្ចយោ – ទស្សនេន បហាតព្ពោ ឯកោ ខន្ធោ តិណ្ណន្នំ ខន្ធានំ អត្ថិបច្ចយេន បច្ចយោ…បេ… ទ្វេ ខន្ធា…បេ…. (១)

ទស្សនេន បហាតព្ពោ ធម្មោ នេវទស្សនេន នភាវនាយ បហាតព្ពស្ស ធម្មស្ស អត្ថិបច្ចយេន បច្ចយោ – សហជាតំ, បច្ឆាជាតំ. សហជាតា – ទស្សនេន បហាតព្ពា ខន្ធា ចិត្តសមុដ្ឋានានំ រូបានំ អត្ថិបច្ចយេន បច្ចយោ. បច្ឆាជាតា – ទស្សនេន បហាតព្ពា ខន្ធា បុរេជាតស្ស ឥមស្ស កាយស្ស អត្ថិបច្ចយេន បច្ចយោ. (២)

ទស្សនេន បហាតព្ពោ ធម្មោ ទស្សនេន បហាតព្ពស្ស ច នេវទស្សនេន នភាវនាយ បហាតព្ពស្ស ច ធម្មស្ស អត្ថិបច្ចយេន បច្ចយោ – ទស្សនេន បហាតព្ពោ ឯកោ ខន្ធោ តិណ្ណន្នំ ខន្ធានំ ចិត្តសមុដ្ឋានានញ្ច រូបានំ…បេ… ទ្វេ ខន្ធា…បេ…. (៣)

ភាវនាយ បហាតព្ពោ ធម្មោ ភាវនាយ បហាតព្ពស្ស… តីណិ (ទស្សនេន សទិសំ កាតព្ពំ).

៩៤. នេវទស្សនេន នភាវនាយ បហាតព្ពោ ធម្មោ នេវទស្សនេន នភាវនាយ បហាតព្ពស្ស ធម្មស្ស អត្ថិបច្ចយេន បច្ចយោ – សហជាតំ, បុរេជាតំ, បច្ឆាជាតំ, អាហារំ, ឥន្ទ្រិយំ. សហជាតោ – នេវទស្សនេន នភាវនាយ បហាតព្ពោ ឯកោ ខន្ធោ តិណ្ណន្នំ ខន្ធានំ ចិត្តសមុដ្ឋានានញ្ច រូបានំ អត្ថិបច្ចយេន បច្ចយោ…បេ… បដិសន្ធិក្ខណេ…បេ… ខន្ធា វត្ថុស្ស…បេ… វត្ថុ ខន្ធានំ អត្ថិបច្ចយេន បច្ចយោ; ឯកំ មហាភូតំ…បេ… អសញ្ញសត្តានំ ឯកំ មហាភូតំ…បេ…. បុរេជាតំ – ចក្ខុំ អនិច្ចតោ ទុក្ខតោ អនត្តតោ វិបស្សតិ, សោតំ…បេ… កាយំ… រូបេ…បេ… ផោដ្ឋព្ពេ… វត្ថុំ អនិច្ចតោ ទុក្ខតោ អនត្តតោ វិបស្សតិ; ទិព្ពេន ចក្ខុនា រូបំ បស្សតិ, ទិព្ពាយ សោតធាតុយា សទ្ទំ សុណាតិ, រូបាយតនំ ចក្ខុវិញ្ញាណស្ស…បេ… ផោដ្ឋព្ពាយតនំ កាយវិញ្ញាណស្ស…បេ… ចក្ខាយតនំ ចក្ខុវិញ្ញាណស្ស…បេ… កាយាយតនំ កាយវិញ្ញាណស្ស…បេ… វត្ថុ នេវទស្សនេន នភាវនាយ បហាតព្ពានំ ខន្ធានំ អត្ថិបច្ចយេន បច្ចយោ. បច្ឆាជាតា – នេវទស្សនេន នភាវនាយ បហាតព្ពា ខន្ធា បុរេជាតស្ស ឥមស្ស កាយស្ស អត្ថិបច្ចយេន បច្ចយោ. កពឡីការោ អាហារោ ឥមស្ស កាយស្ស…បេ… រូបជីវិតិន្ទ្រិយំ កដត្តារូបានំ អត្ថិបច្ចយេន បច្ចយោ. (១)

នេវទស្សនេន នភាវនាយ បហាតព្ពោ ធម្មោ ទស្សនេន បហាតព្ពស្ស ធម្មស្ស អត្ថិបច្ចយេន បច្ចយោ – បុរេជាតំ ចក្ខុំ អស្សាទេតិ អភិនន្ទតិ; តំ អារព្ភ ទស្សនេន បហាតព្ពោ រាគោ ឧប្បជ្ជតិ, ទិដ្ឋិ ឧប្បជ្ជតិ, វិចិកិច្ឆា ឧប្បជ្ជតិ, ទស្សនេន បហាតព្ពំ ទោមនស្សំ ឧប្បជ្ជតិ, សោតំ…បេ… វត្ថុំ អស្សាទេតិ…បេ… វត្ថុ ទស្សនេន បហាតព្ពានំ ខន្ធានំ អត្ថិបច្ចយេន បច្ចយោ. (២)

នេវទស្សនេន នភាវនាយ បហាតព្ពោ ធម្មោ ភាវនាយ បហាតព្ពស្ស ធម្មស្ស អត្ថិបច្ចយេន បច្ចយោ – បុរេជាតំ ចក្ខុំ អស្សាទេតិ អភិនន្ទតិ; តំ អារព្ភ ភាវនាយ បហាតព្ពោ រាគោ ឧប្បជ្ជតិ, ឧទ្ធច្ចំ ឧប្បជ្ជតិ, ភាវនាយ បហាតព្ពំ ទោមនស្សំ ឧប្បជ្ជតិ, សោតំ…បេ… វត្ថុំ អស្សាទេតិ អភិនន្ទតិ…បេ… វត្ថុ ភាវនាយ បហាតព្ពានំ ខន្ធានំ អត្ថិបច្ចយេន បច្ចយោ. (៣)

៩៥. ទស្សនេន បហាតព្ពោ ច នេវទស្សនេន នភាវនាយ បហាតព្ពោ ច ធម្មា ទស្សនេន បហាតព្ពស្ស ធម្មស្ស អត្ថិបច្ចយេន បច្ចយោ – សហជាតំ, បុរេជាតំ. សហជាតោ – ទស្សនេន បហាតព្ពោ ឯកោ ខន្ធោ ច វត្ថុ ច តិណ្ណន្នំ ខន្ធានំ អត្ថិបច្ចយេន បច្ចយោ…បេ… ទ្វេ ខន្ធា ច វត្ថុ ច…បេ…. (១)

ទស្សនេន បហាតព្ពោ ច នេវទស្សនេន នភាវនាយ បហាតព្ពោ ច ធម្មា នេវទស្សនេន នភាវនាយ បហាតព្ពស្ស ធម្មស្ស អត្ថិបច្ចយេន បច្ចយោ – សហជាតំ, បច្ឆាជាតំ, អាហារំ, ឥន្ទ្រិយំ. សហជាតា – ទស្សនេន បហាតព្ពា ខន្ធា ច មហាភូតា ច ចិត្តសមុដ្ឋានានំ រូបានំ អត្ថិបច្ចយេន បច្ចយោ. បច្ឆាជាតា – ទស្សនេន បហាតព្ពា ខន្ធា ច កពឡីការោ អាហារោ ច ឥមស្ស កាយស្ស អត្ថិបច្ចយេន បច្ចយោ. បច្ឆាជាតា – ទស្សនេន បហាតព្ពា ខន្ធា ច រូបជីវិតិន្ទ្រិយញ្ច កដត្តារូបានំ អត្ថិបច្ចយេន បច្ចយោ. (២)

ភាវនាយ បហាតព្ពោ ច នេវទស្សនេន នភាវនាយ បហាតព្ពោ ច ធម្មា ភាវនាយ បហាតព្ពស្ស…បេ… (ទ្វេ បញ្ហា កាតព្ពា).

នត្ថិវិគតាវិគតបច្ចយា

៩៦. ទស្សនេន បហាតព្ពោ ធម្មោ ទស្សនេន បហាតព្ពស្ស ធម្មស្ស នត្ថិបច្ចយេន បច្ចយោ… វិគតបច្ចយេន បច្ចយោ… អវិគតបច្ចយេន បច្ចយោ.