១. វិភង្គវារោ

នហេតុបច្ចយោ

៦. បីតិសហគតំ ធម្មំ បដិច្ច បីតិសហគតោ ធម្មោ ឧប្បជ្ជតិ នហេតុបច្ចយា – អហេតុកំ បីតិសហគតំ ឯកំ ខន្ធំ បដិច្ច តយោ ខន្ធា…បេ… ទ្វេ ខន្ធេ បដិច្ច ទ្វេ ខន្ធា. (១)

បីតិសហគតំ ធម្មំ បដិច្ច សុខសហគតោ ធម្មោ ឧប្បជ្ជតិ នហេតុបច្ចយា – អហេតុកំ បីតិសហគតំ ឯកំ ខន្ធំ បដិច្ច សុខសហគតា តយោ ខន្ធា…បេ… ទ្វេ ខន្ធេ បដិច្ច ទ្វេ ខន្ធា. (២)

បីតិសហគតំ ធម្មំ បដិច្ច បីតិសហគតោ ច សុខសហគតោ ច ធម្មា ឧប្បជ្ជន្តិ នហេតុបច្ចយា – អហេតុកំ បីតិសហគតំ ឯកំ ខន្ធំ បដិច្ច បីតិសហគតា ច សុខសហគតា ច តយោ ខន្ធា…បេ… ទ្វេ ខន្ធេ បដិច្ច ទ្វេ ខន្ធា. (៣)

៧. សុខសហគតំ ធម្មំ បដិច្ច សុខសហគតោ ធម្មោ ឧប្បជ្ជតិ នហេតុបច្ចយា – អហេតុកំ សុខសហគតំ ឯកំ ខន្ធំ បដិច្ច ទ្វេ ខន្ធា, ទ្វេ ខន្ធេ បដិច្ច ឯកោ ខន្ធោ. (១)

សុខសហគតំ ធម្មំ បដិច្ច បីតិសហគតោ ធម្មោ ឧប្បជ្ជតិ នហេតុបច្ចយា – អហេតុកំ សុខសហគតំ ឯកំ ខន្ធំ បដិច្ច បីតិសហគតា តយោ ខន្ធា…បេ… ទ្វេ ខន្ធេ បដិច្ច ទ្វេ ខន្ធា. (២)

សុខសហគតំ ធម្មំ បដិច្ច បីតិសហគតោ ច សុខសហគតោ ច ធម្មា ឧប្បជ្ជន្តិ នហេតុបច្ចយា – អហេតុកំ សុខសហគតំ ឯកំ ខន្ធំ បដិច្ច បីតិសហគតា ច សុខសហគតា ច ទ្វេ ខន្ធា, ទ្វេ ខន្ធេ បដិច្ច ឯកោ ខន្ធោ. (៣)

៨. ឧបេក្ខាសហគតំ ធម្មំ បដិច្ច ឧបេក្ខាសហគតោ ធម្មោ ឧប្បជ្ជតិ នហេតុបច្ចយា – អហេតុកំ ឧបេក្ខាសហគតំ ឯកំ ខន្ធំ បដិច្ច ទ្វេ ខន្ធា, ទ្វេ ខន្ធេ បដិច្ច ឯកោ ខន្ធោ. អហេតុកបដិសន្ធិក្ខណេ ឧបេក្ខាសហគតំ ឯកំ ខន្ធំ បដិច្ច ទ្វេ ខន្ធា, ទ្វេ ខន្ធេ បដិច្ច ឯកោ ខន្ធោ. វិចិកិច្ឆាសហគតេ ឧទ្ធច្ចសហគតេ ខន្ធេ បដិច្ច វិចិកិច្ឆាសហគតោ ឧទ្ធច្ចសហគតោ មោហោ. (១)

៩. បីតិសហគតញ្ច សុខសហគតញ្ច ធម្មំ បដិច្ច បីតិសហគតោ ធម្មោ ឧប្បជ្ជតិ នហេតុបច្ចយា – អហេតុកំ បីតិសហគតញ្ច សុខសហគតញ្ច ឯកំ ខន្ធំ បដិច្ច បីតិសហគតា តយោ ខន្ធា…បេ… ទ្វេ ខន្ធេ បដិច្ច ទ្វេ ខន្ធា. (១)

បីតិសហគតញ្ច សុខសហគតញ្ច ធម្មំ បដិច្ច សុខសហគតោ ធម្មោ ឧប្បជ្ជតិ នហេតុបច្ចយា – អហេតុកំ បីតិសហគតញ្ច សុខសហគតញ្ច ឯកំ ខន្ធំ បដិច្ច សុខសហគតា ទ្វេ ខន្ធា, ទ្វេ ខន្ធេ បដិច្ច ឯកោ ខន្ធោ. (២)

បីតិសហគតញ្ច សុខសហគតញ្ច ធម្មំ បដិច្ច បីតិសហគតោ ច សុខសហគតោ ច ធម្មា ឧប្បជ្ជន្តិ នហេតុបច្ចយា – អហេតុកំ បីតិសហគតញ្ច សុខសហគតញ្ច ឯកំ ខន្ធំ បដិច្ច បីតិសហគតា ច សុខសហគតា ច ទ្វេ ខន្ធា, ទ្វេ ខន្ធេ បដិច្ច ឯកោ ខន្ធោ. (៣)

នអធិបតិ-នអាសេវនបច្ចយា

១០. បីតិសហគតំ ធម្មំ បដិច្ច បីតិសហគតោ ធម្មោ ឧប្បជ្ជតិ នអធិបតិបច្ចយា (នអធិបតិបដិសន្ធិក្ខណេ បរិបុណ្ណំ)… នបុរេជាតបច្ចយា… (‘‘អរូបេ’’តិ និយាមេតព្ពំ ‘‘បដិសន្ធិក្ខណេ’’តិ ច) នបច្ឆាជាតបច្ចយា… នអាសេវនបច្ចយា.

នកម្មបច្ចយោ

១១. បីតិសហគតំ ធម្មំ បដិច្ច បីតិសហគតោ ធម្មោ ឧប្បជ្ជតិ នកម្មបច្ចយា – បីតិសហគតេ ខន្ធេ បដិច្ច បីតិសហគតា ចេតនា.

បីតិសហគតំ ធម្មំ បដិច្ច សុខសហគតោ ធម្មោ ឧប្បជ្ជតិ នកម្មបច្ចយា – បីតិសហគតេ ខន្ធេ បដិច្ច សុខសហគតា ចេតនា.

(ឥមិនា ការណេន ទស បញ្ហា វិត្ថារេតព្ពា.)

នវិបាកបច្ចយោ

១២. បីតិសហគតំ ធម្មំ បដិច្ច បីតិសហគតោ ធម្មោ ឧប្បជ្ជតិ នវិបាកបច្ចយា…បេ… (បរិបុណ្ណំ, បដិសន្ធិ នត្ថិ).

នឈានបច្ចយាទិ

១៣. សុខសហគតំ ធម្មំ បដិច្ច សុខសហគតោ ធម្មោ ឧប្បជ្ជតិ នឈានបច្ចយា – សុខសហគតំ កាយវិញ្ញាណសហគតំ ឯកំ ខន្ធំ បដិច្ច ទ្វេ ខន្ធា, ទ្វេ ខន្ធេ បដិច្ច ឯកោ ខន្ធោ. (១)

ឧបេក្ខាសហគតំ ធម្មំ បដិច្ច ឧបេក្ខាសហគតោ ធម្មោ ឧប្បជ្ជតិ នឈានបច្ចយា – ចតុវិញ្ញាណសហគតំ ឯកំ ខន្ធំ បដិច្ច ទ្វេ ខន្ធា, ទ្វេ ខន្ធេ បដិច្ច ឯកោ ខន្ធោ. (១)

(នមគ្គបច្ចយា នហេតុបច្ចយសទិសំ. មោហោ នត្ថិ. នវិប្បយុត្តបច្ចយា បរិបុណ្ណំ អរូបបញ្ហមេវ.)