១. វិភង្គវារោ

នហេតុបច្ចយោ

២៣. សវិតក្កសវិចារំ ធម្មំ បដិច្ច សវិតក្កសវិចារោ ធម្មោ ឧប្បជ្ជតិ នហេតុបច្ចយា – អហេតុកំ សវិតក្កសវិចារំ ឯកំ ខន្ធំ បដិច្ច តយោ ខន្ធា…បេ… ទ្វេ ខន្ធេ បដិច្ច ទ្វេ ខន្ធា. អហេតុកបដិសន្ធិក្ខណេ…បេ… វិចិកិច្ឆាសហគតេ ឧទ្ធច្ចសហគតេ ខន្ធេ បដិច្ច វិចិកិច្ឆាសហគតោ ឧទ្ធច្ចសហគតោ មោហោ. (១)

សវិតក្កសវិចារំ ធម្មំ បដិច្ច អវិតក្កវិចារមត្តោ ធម្មោ ឧប្បជ្ជតិ នហេតុបច្ចយា – អហេតុកេ សវិតក្កសវិចារេ ខន្ធេ បដិច្ច វិតក្កោ. អហេតុកបដិសន្ធិក្ខណេ…បេ…. (២)

សវិតក្កសវិចារំ ធម្មំ បដិច្ច អវិតក្កអវិចារោ ធម្មោ ឧប្បជ្ជតិ នហេតុបច្ចយា – អហេតុកេ សវិតក្កសវិចារេ ខន្ធេ បដិច្ច ចិត្តសមុដ្ឋានំ រូបំ. អហេតុកបដិសន្ធិក្ខណេ…បេ…. (៣)

សវិតក្កសវិចារំ ធម្មំ បដិច្ច សវិតក្កសវិចារោ ច អវិតក្កអវិចារោ ច ធម្មា ឧប្បជ្ជន្តិ នហេតុបច្ចយា – អហេតុកំ សវិតក្កសវិចារំ ឯកំ ខន្ធំ បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ បដិច្ច ទ្វេ ខន្ធា ចិត្តសមុដ្ឋានញ្ច រូបំ. អហេតុកបដិសន្ធិក្ខណេ…បេ…. (៤)

សវិតក្កសវិចារំ ធម្មំ បដិច្ច អវិតក្កវិចារមត្តោ ច អវិតក្កអវិចារោ ច ធម្មា ឧប្បជ្ជន្តិ នហេតុបច្ចយា – អហេតុកេ សវិតក្កសវិចារេ ខន្ធេ បដិច្ច វិតក្កោ ច ចិត្តសមុដ្ឋានញ្ច រូបំ. អហេតុកបដិសន្ធិក្ខណេ…បេ…. (៥)

សវិតក្កសវិចារំ ធម្មំ បដិច្ច សវិតក្កសវិចារោ ច អវិតក្កវិចារមត្តោ ច ធម្មា ឧប្បជ្ជន្តិ នហេតុបច្ចយា – អហេតុកំ សវិតក្កសវិចារំ ឯកំ ខន្ធំ បដិច្ច តយោ ខន្ធា វិតក្កោ ច…បេ… ទ្វេ ខន្ធេ បដិច្ច ទ្វេ ខន្ធា វិតក្កោ ច. អហេតុកបដិសន្ធិក្ខណេ…បេ…. (៦)

សវិតក្កសវិចារំ ធម្មំ បដិច្ច សវិតក្កសវិចារោ ច អវិតក្កវិចារមត្តោ ច អវិតក្កអវិចារោ ច ធម្មា ឧប្បជ្ជន្តិ នហេតុបច្ចយា – អហេតុកំ សវិតក្កសវិចារំ ឯកំ ខន្ធំ បដិច្ច តយោ ខន្ធា វិតក្កោ ច ចិត្តសមុដ្ឋានញ្ច រូបំ…បេ… អហេតុកបដិសន្ធិក្ខណេ…បេ…. (៧)

២៤. អវិតក្កវិចារមត្តំ ធម្មំ បដិច្ច សវិតក្កសវិចារោ ធម្មោ ឧប្បជ្ជតិ នហេតុបច្ចយា – អហេតុកំ វិតក្កំ បដិច្ច សវិតក្កសវិចារា ខន្ធា. អហេតុកបដិសន្ធិក្ខណេ វិតក្កំ បដិច្ច សវិតក្កសវិចារា ខន្ធា; វិចិកិច្ឆាសហគតំ ឧទ្ធច្ចសហគតំ វិតក្កំ បដិច្ច វិចិកិច្ឆាសហគតោ ឧទ្ធច្ចសហគតោ មោហោ. (១)

អវិតក្កវិចារមត្តំ ធម្មំ បដិច្ច អវិតក្កអវិចារោ ធម្មោ ឧប្បជ្ជតិ នហេតុបច្ចយា – អហេតុកំ វិតក្កំ បដិច្ច ចិត្តសមុដ្ឋានំ រូបំ. អហេតុកបដិសន្ធិក្ខណេ វិតក្កំ បដិច្ច កដត្តារូបំ. (២)

អវិតក្កវិចារមត្តំ ធម្មំ បដិច្ច សវិតក្កសវិចារោ ច អវិតក្កអវិចារោ ច ធម្មា ឧប្បជ្ជន្តិ នហេតុបច្ចយា – អហេតុកំ វិតក្កំ បដិច្ច សវិតក្កសវិចារា ខន្ធា ចិត្តសមុដ្ឋានញ្ច រូបំ. អហេតុកបដិសន្ធិក្ខណេ វិតក្កំ បដិច្ច សវិតក្កសវិចារា ខន្ធា កដត្តា ច រូបំ. (៣)

អវិតក្កអវិចារំ ធម្មំ បដិច្ច អវិតក្កអវិចារោ ធម្មោ ឧប្បជ្ជតិ នហេតុបច្ចយា – អហេតុកំ អវិតក្កអវិចារំ ឯកំ ខន្ធំ បដិច្ច តយោ ខន្ធា, តយោ ខន្ធេ បដិច្ច ឯកោ ខន្ធោ, ទ្វេ ខន្ធេ បដិច្ច ទ្វេ ខន្ធា; ឯកំ មហាភូតំ បដិច្ច តយោ មហាភូតា…បេ… មហាភូតេ បដិច្ច ចិត្តសមុដ្ឋានំ រូបំ កដត្តារូបំ ឧបាទារូបំ; ពាហិរំ… អាហារសមុដ្ឋានំ… ឧតុសមុដ្ឋានំ… អសញ្ញសត្តានំ ឯកំ មហាភូតំ បដិច្ច…បេ… មហាភូតេ បដិច្ច កដត្តារូបំ ឧបាទារូបំ. (១)

អវិតក្កអវិចារំ ធម្មំ បដិច្ច សវិតក្កសវិចារោ ធម្មោ ឧប្បជ្ជតិ នហេតុបច្ចយា – អហេតុកបដិសន្ធិក្ខណេ វត្ថុំ បដិច្ច សវិតក្កសវិចារា ខន្ធា. (២)

អវិតក្កអវិចារំ ធម្មំ បដិច្ច អវិតក្កវិចារមត្តោ ធម្មោ ឧប្បជ្ជតិ នហេតុបច្ចយា – អហេតុកបដិសន្ធិក្ខណេ វត្ថុំ បដិច្ច វិតក្កោ. (៣)

អវិតក្កអវិចារំ ធម្មំ បដិច្ច សវិតក្កសវិចារោ ច អវិតក្កអវិចារោ ច ធម្មា ឧប្បជ្ជន្តិ នហេតុបច្ចយា – អហេតុកបដិសន្ធិក្ខណេ វត្ថុំ បដិច្ច សវិតក្កសវិចារា ខន្ធា; មហាភូតេ បដិច្ច កដត្តារូបំ. (៤)

អវិតក្កអវិចារំ ធម្មំ បដិច្ច អវិតក្កវិចារមត្តោ ច អវិតក្កអវិចារោ ច ធម្មា ឧប្បជ្ជន្តិ នហេតុបច្ចយា – អហេតុកបដិសន្ធិក្ខណេ វត្ថុំ បដិច្ច វិតក្កោ; មហាភូតេ បដិច្ច កដត្តារូបំ. (៥)

អវិតក្កអវិចារំ ធម្មំ បដិច្ច សវិតក្កសវិចារោ ច អវិតក្កវិចារមត្តោ ច ធម្មា ឧប្បជ្ជន្តិ នហេតុបច្ចយា – អហេតុកបដិសន្ធិក្ខណេ វត្ថុំ បដិច្ច សវិតក្កសវិចារា ខន្ធា ច វិតក្កោ ច. (៦)

អវិតក្កអវិចារំ ធម្មំ បដិច្ច សវិតក្កសវិចារោ ច អវិតក្កវិចារមត្តោ ច អវិតក្កអវិចារោ ច ធម្មា ឧប្បជ្ជន្តិ នហេតុបច្ចយា – អហេតុកបដិសន្ធិក្ខណេ វត្ថុំ បដិច្ច សវិតក្កសវិចារា ខន្ធា ច វិតក្កោ ច; មហាភូតេ បដិច្ច កដត្តារូបំ. (៧)

២៥. សវិតក្កសវិចារញ្ច អវិតក្កអវិចារញ្ច ធម្មំ បដិច្ច សវិតក្កសវិចារោ ធម្មោ ឧប្បជ្ជតិ នហេតុបច្ចយា – អហេតុកបដិសន្ធិក្ខណេ សវិតក្កសវិចារំ ឯកំ ខន្ធញ្ច វត្ថុញ្ច បដិច្ច តយោ ខន្ធា…បេ… ទ្វេ ខន្ធេ ច វត្ថុញ្ច បដិច្ច ទ្វេ ខន្ធា. (១)

សវិតក្កសវិចារញ្ច អវិតក្កអវិចារញ្ច ធម្មំ បដិច្ច អវិតក្កវិចារមត្តោ ធម្មោ ឧប្បជ្ជតិ នហេតុបច្ចយា – អហេតុកបដិសន្ធិក្ខណេ សវិតក្កសវិចារេ ខន្ធេ ច វត្ថុញ្ច បដិច្ច វិតក្កោ. (២)

សវិតក្កសវិចារញ្ច អវិតក្កអវិចារញ្ច ធម្មំ បដិច្ច អវិតក្កអវិចារោ ធម្មោ ឧប្បជ្ជតិ នហេតុបច្ចយា – អហេតុកេ សវិតក្កសវិចារេ ខន្ធេ ច មហាភូតេ ច បដិច្ច ចិត្តសមុដ្ឋានំ រូបំ. អហេតុកបដិសន្ធិក្ខណេ សវិតក្កសវិចារេ ខន្ធេ ច មហាភូតេ ច បដិច្ច កដត្តារូបំ. (៣)

សវិតក្កសវិចារញ្ច អវិតក្កអវិចារញ្ច ធម្មំ បដិច្ច សវិតក្កសវិចារោ ច អវិតក្កអវិចារោ ច ធម្មា ឧប្បជ្ជន្តិ នហេតុបច្ចយា – អហេតុកបដិសន្ធិក្ខណេ សវិតក្កសវិចារំ ឯកំ ខន្ធញ្ច វត្ថុញ្ច បដិច្ច តយោ ខន្ធា…បេ… ទ្វេ ខន្ធេ ច វត្ថុញ្ច បដិច្ច ទ្វេ ខន្ធា; សវិតក្កសវិចារេ ខន្ធេ ច មហាភូតេ ច បដិច្ច កដត្តារូបំ. (៤)

សវិតក្កសវិចារញ្ច អវិតក្កអវិចារញ្ច ធម្មំ បដិច្ច អវិតក្កវិចារមត្តោ ច អវិតក្កអវិចារោ ច ធម្មា ឧប្បជ្ជន្តិ នហេតុបច្ចយា – អហេតុកបដិសន្ធិក្ខណេ សវិតក្កសវិចារេ ខន្ធេ ច វត្ថុញ្ច បដិច្ច វិតក្កោ; សវិតក្កសវិចារេ ខន្ធេ ច មហាភូតេ ច បដិច្ច កដត្តារូបំ. (៥)

សវិតក្កសវិចារញ្ច អវិតក្កអវិចារញ្ច ធម្មំ បដិច្ច សវិតក្កសវិចារោ ច អវិតក្កវិចារមត្តោ ច ធម្មា ឧប្បជ្ជន្តិ នហេតុបច្ចយា – អហេតុកបដិសន្ធិក្ខណេ សវិតក្កសវិចារំ ឯកំ ខន្ធញ្ច វត្ថុញ្ច បដិច្ច តយោ ខន្ធា វិតក្កោ ច…បេ… ទ្វេ ខន្ធេ ច វត្ថុញ្ច បដិច្ច ទ្វេ ខន្ធា វិតក្កោ ច. (៦)

សវិតក្កសវិចារញ្ច អវិតក្កអវិចារញ្ច ធម្មំ បដិច្ច សវិតក្កសវិចារោ ច អវិតក្កវិចារមត្តោ ច អវិតក្កអវិចារោ ច ធម្មា ឧប្បជ្ជន្តិ នហេតុបច្ចយា – អហេតុកបដិសន្ធិក្ខណេ សវិតក្កសវិចារំ ឯកំ ខន្ធញ្ច វត្ថុញ្ច បដិច្ច តយោ ខន្ធា វិតក្កោ ច…បេ… ទ្វេ ខន្ធេ ច វត្ថុញ្ច បដិច្ច ទ្វេ ខន្ធា វិតក្កោ ច; សវិតក្កសវិចារេ ខន្ធេ ច មហាភូតេ ច បដិច្ច កដត្តារូបំ. (៧)

២៦. អវិតក្កវិចារមត្តញ្ច អវិតក្កអវិចារញ្ច ធម្មំ បដិច្ច សវិតក្កសវិចារោ ធម្មោ ឧប្បជ្ជតិ នហេតុបច្ចយា – អហេតុកបដិសន្ធិក្ខណេ វិតក្កញ្ច វត្ថុញ្ច បដិច្ច សវិតក្កសវិចារា ខន្ធា. (១)

អវិតក្កវិចារមត្តញ្ច អវិតក្កអវិចារញ្ច ធម្មំ បដិច្ច អវិតក្កអវិចារោ ធម្មោ ឧប្បជ្ជតិ នហេតុបច្ចយា – អហេតុកំ វិតក្កញ្ច មហាភូតេ ច បដិច្ច ចិត្តសមុដ្ឋានំ រូបំ. អហេតុកបដិសន្ធិក្ខណេ វិតក្កញ្ច មហាភូតេ ច បដិច្ច កដត្តារូបំ. (២)

អវិតក្កវិចារមត្តញ្ច អវិតក្កអវិចារញ្ច ធម្មំ បដិច្ច សវិតក្កសវិចារោ ច អវិតក្កអវិចារោ ច ធម្មា ឧប្បជ្ជន្តិ នហេតុបច្ចយា – អហេតុកបដិសន្ធិក្ខណេ វិតក្កញ្ច វត្ថុញ្ច បដិច្ច សវិតក្កសវិចារា ខន្ធា; វិតក្កញ្ច មហាភូតេ ច បដិច្ច កដត្តារូបំ. (៣)

២៧. សវិតក្កសវិចារញ្ច អវិតក្កវិចារមត្តញ្ច ធម្មំ បដិច្ច សវិតក្កសវិចារោ ធម្មោ ឧប្បជ្ជតិ នហេតុបច្ចយា – អហេតុកំ សវិតក្កសវិចារំ ឯកំ ខន្ធញ្ច វិតក្កញ្ច បដិច្ច តយោ ខន្ធា…បេ… ទ្វេ ខន្ធេ ច វិតក្កញ្ច បដិច្ច ទ្វេ ខន្ធា. អហេតុកបដិសន្ធិក្ខណេ សវិតក្កសវិចារំ ឯកំ ខន្ធញ្ច វិតក្កញ្ច បដិច្ច តយោ ខន្ធា…បេ… ទ្វេ ខន្ធេ ច វិតក្កញ្ច បដិច្ច ទ្វេ ខន្ធា; វិចិកិច្ឆាសហគតេ ឧទ្ធច្ចសហគតេ ខន្ធេ ច វិតក្កញ្ច បដិច្ច វិចិកិច្ឆាសហគតោ ឧទ្ធច្ចសហគតោ មោហោ. (១)

សវិតក្កសវិចារញ្ច អវិតក្កវិចារមត្តញ្ច ធម្មំ បដិច្ច អវិតក្កអវិចារោ ធម្មោ ឧប្បជ្ជតិ នហេតុបច្ចយា – អហេតុកេ សវិតក្កសវិចារេ ខន្ធេ ច វិតក្កញ្ច បដិច្ច ចិត្តសមុដ្ឋានំ រូបំ. អហេតុកបដិសន្ធិក្ខណេ…បេ…. (២)

សវិតក្កសវិចារញ្ច អវិតក្កវិចារមត្តញ្ច ធម្មំ បដិច្ច សវិតក្កសវិចារោ ច អវិតក្កអវិចារោ ច ធម្មា ឧប្បជ្ជន្តិ នហេតុបច្ចយា – អហេតុកំ សវិតក្កសវិចារំ ឯកំ ខន្ធញ្ច វិតក្កញ្ច បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ ច វិតក្កញ្ច បដិច្ច ទ្វេ ខន្ធា ចិត្តសមុដ្ឋានញ្ច រូបំ. អហេតុកបដិសន្ធិក្ខណេ…បេ…. (៣)

២៨. សវិតក្កសវិចារញ្ច អវិតក្កវិចារមត្តញ្ច អវិតក្កអវិចារញ្ច ធម្មំ បដិច្ច សវិតក្កសវិចារោ ធម្មោ ឧប្បជ្ជតិ នហេតុបច្ចយា – អហេតុកបដិសន្ធិក្ខណេ សវិតក្កសវិចារំ ឯកំ ខន្ធញ្ច វិតក្កញ្ច វត្ថុញ្ច បដិច្ច តយោ ខន្ធា…បេ… ទ្វេ ខន្ធេ ច វិតក្កញ្ច វត្ថុញ្ច បដិច្ច ទ្វេ ខន្ធា. (១)

សវិតក្កសវិចារញ្ច អវិតក្កវិចារមត្តញ្ច អវិតក្កអវិចារញ្ច ធម្មំ បដិច្ច អវិតក្កអវិចារោ ធម្មោ ឧប្បជ្ជតិ នហេតុបច្ចយា – អហេតុកេ សវិតក្កសវិចារេ ខន្ធេ ច វិតក្កញ្ច មហាភូតេ ច បដិច្ច ចិត្តសមុដ្ឋានំ រូបំ. អហេតុកបដិសន្ធិក្ខណេ…បេ…. (២)

សវិតក្កសវិចារញ្ច អវិតក្កវិចារមត្តញ្ច អវិតក្កអវិចារញ្ច ធម្មំ បដិច្ច សវិតក្កសវិចារោ ច អវិតក្កអវិចារោ ច ធម្មា ឧប្បជ្ជន្តិ នហេតុបច្ចយា – អហេតុកបដិសន្ធិក្ខណេ សវិតក្កសវិចារំ ឯកំ ខន្ធញ្ច វិតក្កញ្ច វត្ថុញ្ច បដិច្ច តយោ ខន្ធា…បេ… ទ្វេ ខន្ធេ ច វិតក្កញ្ច វត្ថុញ្ច បដិច្ច ទ្វេ ខន្ធា; សវិតក្កសវិចារេ ខន្ធេ ច វិតក្កញ្ច មហាភូតេ ច បដិច្ច កដត្តារូបំ. (៣)

នអារម្មណបច្ចយោ

២៩. សវិតក្កសវិចារំ ធម្មំ បដិច្ច អវិតក្កអវិចារោ ធម្មោ ឧប្បជ្ជតិ នអារម្មណបច្ចយា – សវិតក្កសវិចារេ ខន្ធេ បដិច្ច ចិត្តសមុដ្ឋានំ រូបំ. បដិសន្ធិក្ខណេ សវិតក្កសវិចារេ ខន្ធេ បដិច្ច កដត្តារូបំ. (១)

អវិតក្កវិចារមត្តំ ធម្មំ បដិច្ច អវិតក្កអវិចារោ ធម្មោ ឧប្បជ្ជតិ នអារម្មណបច្ចយា – អវិតក្កវិចារមត្តេ ខន្ធេ បដិច្ច ចិត្តសមុដ្ឋានំ រូបំ, វិតក្កំ បដិច្ច ចិត្តសមុដ្ឋានំ រូបំ. បដិសន្ធិក្ខណេ អវិតក្កវិចារមត្តេ ខន្ធេ បដិច្ច កដត្តារូបំ. បដិសន្ធិក្ខណេ វិតក្កំ បដិច្ច កដត្តារូបំ. (១)

អវិតក្កអវិចារំ ធម្មំ បដិច្ច អវិតក្កអវិចារោ ធម្មោ ឧប្បជ្ជតិ នអារម្មណបច្ចយា – អវិតក្កអវិចារេ ខន្ធេ បដិច្ច ចិត្តសមុដ្ឋានំ រូបំ, វិចារំ បដិច្ច ចិត្តសមុដ្ឋានំ រូបំ. បដិសន្ធិក្ខណេ អវិតក្កអវិចារេ ខន្ធេ បដិច្ច កដត្តារូបំ, វិចារំ បដិច្ច កដត្តារូបំ, ខន្ធេ បដិច្ច វត្ថុ, វិចារំ បដិច្ច វត្ថុ; ឯកំ មហាភូតំ បដិច្ច…បេ… ពាហិរំ… អាហារសមុដ្ឋានំ… ឧតុសមុដ្ឋានំ… អសញ្ញសត្តានំ ឯកំ មហាភូតំ បដិច្ច…បេ…. (១)

៣០. សវិតក្កសវិចារញ្ច អវិតក្កអវិចារញ្ច ធម្មំ បដិច្ច អវិតក្កអវិចារោ ធម្មោ ឧប្បជ្ជតិ នអារម្មណបច្ចយា – សវិតក្កសវិចារេ ខន្ធេ ច មហាភូតេ ច បដិច្ច ចិត្តសមុដ្ឋានំ រូបំ. បដិសន្ធិក្ខណេ សវិតក្កសវិចារេ ខន្ធេ ច មហាភូតេ ច បដិច្ច កដត្តារូបំ. (១)

អវិតក្កវិចារមត្តញ្ច អវិតក្កអវិចារញ្ច ធម្មំ បដិច្ច អវិតក្កអវិចារោ ធម្មោ ឧប្បជ្ជតិ នអារម្មណបច្ចយា – អវិតក្កវិចារមត្តេ ខន្ធេ ច វិចារញ្ច បដិច្ច ចិត្តសមុដ្ឋានំ រូបំ, អវិតក្កវិចារមត្តេ ខន្ធេ ច មហាភូតេ ច បដិច្ច ចិត្តសមុដ្ឋានំ រូបំ, វិតក្កញ្ច មហាភូតេ ច បដិច្ច ចិត្តសមុដ្ឋានំ រូបំ. បដិសន្ធិក្ខណេ អវិតក្កវិចារមត្តេ ខន្ធេ ច វិចារញ្ច…បេ… កដត្តារូបំ. (១)

សវិតក្កសវិចារញ្ច អវិតក្កវិចារមត្តញ្ច ធម្មំ បដិច្ច អវិតក្កអវិចារោ ធម្មោ ឧប្បជ្ជតិ នអារម្មណបច្ចយា – សវិតក្កសវិចារេ ខន្ធេ ច វិតក្កញ្ច បដិច្ច ចិត្តសមុដ្ឋានំ រូបំ. បដិសន្ធិក្ខណេ…បេ…. (១)

សវិតក្កសវិចារញ្ច អវិតក្កវិចារមត្តញ្ច អវិតក្កអវិចារញ្ច ធម្មំ បដិច្ច អវិតក្កអវិចារោ ធម្មោ ឧប្បជ្ជតិ នអារម្មណបច្ចយា – សវិតក្កសវិចារេ ខន្ធេ ច វិតក្កញ្ច មហាភូតេ ច បដិច្ច ចិត្តសមុដ្ឋានំ រូបំ. បដិសន្ធិក្ខណេ…បេ… កដត្តារូបំ. (១)

នអធិបតិបច្ចយោ

៣១. សវិតក្កសវិចារំ ធម្មំ បដិច្ច សវិតក្កសវិចារោ ធម្មោ ឧប្បជ្ជតិ នអធិបតិបច្ចយា…បេ… សត្ត.

អវិតក្កវិចារមត្តំ ធម្មំ បដិច្ច អវិតក្កវិចារមត្តោ ធម្មោ ឧប្បជ្ជតិ នអធិបតិបច្ចយា – អវិតក្កវិចារមត្តេ ខន្ធេ បដិច្ច អវិតក្កវិចារមត្តា អធិបតិ, វិបាកំ អវិតក្កវិចារមត្តំ ឯកំ ខន្ធំ បដិច្ច តយោ ខន្ធា…បេ… បដិសន្ធិក្ខណេ…បេ…. (១)

អវិតក្កវិចារមត្តំ ធម្មំ បដិច្ច សវិតក្កសវិចារោ ធម្មោ ឧប្បជ្ជតិ នអធិបតិបច្ចយា – វិតក្កំ បដិច្ច សវិតក្កសវិចារា ខន្ធា. បដិសន្ធិក្ខណេ…បេ…. (២)

អវិតក្កវិចារមត្តំ ធម្មំ បដិច្ច អវិតក្កអវិចារោ ធម្មោ ឧប្បជ្ជតិ នអធិបតិបច្ចយា – វិបាកេ អវិតក្កវិចារមត្តេ ខន្ធេ បដិច្ច វិចារោ ច ចិត្តសមុដ្ឋានញ្ច រូបំ. បដិសន្ធិក្ខណេ…បេ…. (៣)

អវិតក្កវិចារមត្តំ ធម្មំ បដិច្ច សវិតក្កសវិចារោ ច អវិតក្កអវិចារោ ច ធម្មា ឧប្បជ្ជន្តិ នអធិបតិបច្ចយា – វិតក្កំ បដិច្ច សវិតក្កសវិចារា ខន្ធា ចិត្តសមុដ្ឋានញ្ច រូបំ. បដិសន្ធិក្ខណេ…បេ…. (៤)

អវិតក្កវិចារមត្តំ ធម្មំ បដិច្ច អវិតក្កវិចារមត្តោ ច អវិតក្កអវិចារោ ច ធម្មា ឧប្បជ្ជន្តិ នអធិបតិបច្ចយា – វិបាកំ អវិតក្កវិចារមត្តំ ឯកំ ខន្ធំ បដិច្ច តយោ ខន្ធា វិចារោ ច ចិត្តសមុដ្ឋានញ្ច រូបំ…បេ… បដិសន្ធិក្ខណេ…បេ…. (៥)

៣២. អវិតក្កអវិចារំ ធម្មំ បដិច្ច អវិតក្កអវិចារោ ធម្មោ ឧប្បជ្ជតិ នអធិបតិបច្ចយា – អវិតក្កអវិចារេ ខន្ធេ បដិច្ច អវិតក្កអវិចារា អធិបតិ, វិបាកំ អវិតក្កអវិចារំ ឯកំ ខន្ធំ បដិច្ច តយោ ខន្ធា…បេ… បដិសន្ធិក្ខណេ…បេ…. (១)

អវិតក្កអវិចារំ ធម្មំ បដិច្ច សវិតក្កសវិចារោ ធម្មោ ឧប្បជ្ជតិ នអធិបតិបច្ចយា – បដិសន្ធិក្ខណេ វត្ថុំ បដិច្ច សវិតក្កសវិចារា ខន្ធា. (២)

អវិតក្កអវិចារំ ធម្មំ បដិច្ច អវិតក្កវិចារមត្តោ ធម្មោ ឧប្បជ្ជតិ នអធិបតិបច្ចយា – វិចារំ បដិច្ច អវិតក្កវិចារមត្តា អធិបតិ, វិបាកំ វិចារំ បដិច្ច អវិតក្កវិចារមត្តា ខន្ធា. បដិសន្ធិក្ខណេ…បេ…. (៣)

អវិតក្កអវិចារំ ធម្មំ បដិច្ច… សត្ត.

៣៣. សវិតក្កសវិចារញ្ច អវិតក្កអវិចារញ្ច ធម្មំ បដិច្ច… សត្ត (សំខិត្តំ).

អវិតក្កវិចារមត្តញ្ច អវិតក្កអវិចារញ្ច ធម្មំ បដិច្ច សវិតក្កសវិចារោ ធម្មោ ឧប្បជ្ជតិ…បេ… អវិតក្កវិចារមត្តោ ធម្មោ ឧប្បជ្ជតិ នអធិបតិបច្ចយា, អវិតក្កវិចារមត្តេ ខន្ធេ ច វិចារញ្ច បដិច្ច អវិតក្កវិចារមត្តា អធិបតិ, វិបាកំ អវិតក្កវិចារមត្តំ ឯកំ ខន្ធញ្ច វិចារញ្ច បដិច្ច (សំខិត្តំ).

នអនន្តរបច្ចយាទិ

៣៤. សវិតក្កសវិចារំ ធម្មំ បដិច្ច អវិតក្កអវិចារោ ធម្មោ ឧប្បជ្ជតិ នអនន្តរបច្ចយា… នសមនន្តរបច្ចយា… នអញ្ញមញ្ញបច្ចយា… នឧបនិស្សយបច្ចយា (នអារម្មណសទិសំ).

នបុរេជាតបច្ចយោ

៣៥. សវិតក្កសវិចារំ ធម្មំ បដិច្ច សវិតក្កសវិចារោ ធម្មោ ឧប្បជ្ជតិ នបុរេជាតបច្ចយា… សត្ត.

អវិតក្កវិចារមត្តំ ធម្មំ បដិច្ច អវិតក្កវិចារមត្តោ ធម្មោ ឧប្បជ្ជតិ នបុរេជាតបច្ចយា – អរូបេ អវិតក្កវិចារមត្តំ ឯកំ ខន្ធំ បដិច្ច…បេ… បដិសន្ធិក្ខណេ…បេ…. (១)

អវិតក្កវិចារមត្តំ ធម្មំ បដិច្ច សវិតក្កសវិចារោ ធម្មោ ឧប្បជ្ជតិ នបុរេជាតបច្ចយា – អរូបេ វិតក្កំ បដិច្ច សវិតក្កសវិចារា ខន្ធា. បដិសន្ធិក្ខណេ…បេ…. (២)

អវិតក្កវិចារមត្តំ ធម្មំ បដិច្ច អវិតក្កអវិចារោ ធម្មោ ឧប្បជ្ជតិ នបុរេជាតបច្ចយា – អរូបេ អវិតក្កវិចារមត្តេ ខន្ធេ បដិច្ច វិចារោ, អវិតក្កវិចារមត្តេ ខន្ធេ បដិច្ច ចិត្តសមុដ្ឋានំ រូបំ, វិតក្កំ បដិច្ច ចិត្តសមុដ្ឋានំ រូបំ. បដិសន្ធិក្ខណេ…បេ…. (៣)

អវិតក្កវិចារមត្តំ ធម្មំ បដិច្ច សវិតក្កសវិចារោ ច អវិតក្កអវិចារោ ច ធម្មា ឧប្បជ្ជន្តិ នបុរេជាតបច្ចយា – បដិសន្ធិក្ខណេ វិតក្កំ បដិច្ច សវិតក្កសវិចារា ខន្ធា កដត្តា ច រូបំ. (៤)

អវិតក្កវិចារមត្តំ ធម្មំ បដិច្ច អវិតក្កវិចារមត្តោ ច អវិតក្កអវិចារោ ច ធម្មា ឧប្បជ្ជន្តិ នបុរេជាតបច្ចយា…បេ… អរូបេ អវិតក្កវិចារមត្តំ ឯកំ ខន្ធំ បដិច្ច តយោ ខន្ធា វិចារោ ច…បេ… បដិសន្ធិក្ខណេ…បេ…. (៥)

៣៦. អវិតក្កអវិចារំ ធម្មំ បដិច្ច អវិតក្កអវិចារោ ធម្មោ ឧប្បជ្ជតិ នបុរេជាតបច្ចយា – អរូបេ អវិតក្កអវិចារំ ឯកំ ខន្ធំ បដិច្ច តយោ ខន្ធា…បេ… អវិតក្កអវិចារេ ខន្ធេ បដិច្ច ចិត្តសមុដ្ឋានំ រូបំ, វិចារំ បដិច្ច ចិត្តសមុដ្ឋានំ រូបំ. បដិសន្ធិក្ខណេ…បេ…. (១)

អវិតក្កអវិចារំ ធម្មំ បដិច្ច សវិតក្កសវិចារោ ធម្មោ ឧប្បជ្ជតិ នបុរេជាតបច្ចយា – បដិសន្ធិក្ខណេ វត្ថុំ បដិច្ច សវិតក្កសវិចារា ខន្ធា. (២)

អវិតក្កអវិចារំ ធម្មំ បដិច្ច អវិតក្កវិចារមត្តោ ធម្មោ ឧប្បជ្ជតិ នបុរេជាតបច្ចយា – អរូបេ វិចារំ បដិច្ច អវិតក្កវិចារមត្តា ខន្ធា. បដិសន្ធិក្ខណេ…បេ… (សំខិត្តំ). (៧)

សវិតក្កសវិចារញ្ច អវិតក្កអវិចារញ្ច ធម្មំ បដិច្ច… សត្ត.

៣៧. អវិតក្កវិចារមត្តញ្ច អវិតក្កអវិចារញ្ច ធម្មំ បដិច្ច អវិតក្កវិចារមត្តោ ធម្មោ ឧប្បជ្ជតិ នបុរេជាតបច្ចយា – អរូបេ អវិតក្កវិចារមត្តំ ឯកំ ខន្ធញ្ច វិចារញ្ច បដិច្ច តយោ ខន្ធា…បេ… បដិសន្ធិក្ខណេ…បេ… (សំខិត្តំ). (៧)

អវិតក្កវិចារមត្តញ្ច អវិតក្កអវិចារញ្ច ធម្មំ បដិច្ច អវិតក្កវិចារមត្តោ ច អវិតក្កអវិចារោ ច ធម្មា ឧប្បជ្ជន្តិ…បេ… បដិសន្ធិក្ខណេ…បេ… (សំខិត្តំ).

(នបុរេជាតមូលកេ យថា សុទ្ធិកំ អរូបំ, តថា អរូបា កាតព្ពា).

នបច្ឆាជាតបច្ចយាទិ

៣៨. សវិតក្កសវិចារំ ធម្មំ បដិច្ច សវិតក្កសវិចារោ ធម្មោ ឧប្បជ្ជតិ នបច្ឆាជាតបច្ចយា…បេ… នអាសេវនបច្ចយា… សត្ត.

អវិតក្កវិចារមត្តំ ធម្មំ បដិច្ច អវិតក្កវិចារមត្តោ ធម្មោ ឧប្បជ្ជតិ នអាសេវនបច្ចយា – វិបាកំ អវិតក្កវិចារមត្តំ ឯកំ ខន្ធំ បដិច្ច… (សំខិត្តំ). (៥)

អវិតក្កអវិចារំ ធម្មំ បដិច្ច អវិតក្កអវិចារោ ធម្មោ ឧប្បជ្ជតិ នអាសេវនបច្ចយា – វិបាកំ អវិតក្កអវិចារំ ឯកំ ខន្ធំ បដិច្ច… (សំខិត្តំ).

(នអាសេវនមូលកេ អវិតក្កវិចារមត្តំ វិបាកេន សហ គច្ឆន្តេន នបុរេជាតសទិសំ កាតព្ពំ, អវិតក្កវិចារមត្តញ្ច អវិតក្កវិចារមត្តគច្ឆន្តេន វិបាកោ ទស្សេតព្ពោ.)

នកម្មបច្ចយោ

៣៩. សវិតក្កសវិចារំ ធម្មំ បដិច្ច សវិតក្កសវិចារោ ធម្មោ ឧប្បជ្ជតិ នកម្មបច្ចយា – សវិតក្កសវិចារេ ខន្ធេ បដិច្ច សវិតក្កសវិចារា ចេតនា. (១)

អវិតក្កវិចារមត្តំ ធម្មំ បដិច្ច អវិតក្កវិចារមត្តោ ធម្មោ ឧប្បជ្ជតិ នកម្មបច្ចយា – អវិតក្កវិចារមត្តេ ខន្ធេ បដិច្ច អវិតក្កវិចារមត្តា ចេតនា. (១)

អវិតក្កវិចារមត្តំ ធម្មំ បដិច្ច សវិតក្កសវិចារោ ធម្មោ ឧប្បជ្ជតិ នកម្មបច្ចយា – វិតក្កំ បដិច្ច សវិតក្កសវិចារា ចេតនា. (២)

អវិតក្កអវិចារំ ធម្មំ បដិច្ច អវិតក្កអវិចារោ ធម្មោ ឧប្បជ្ជតិ នកម្មបច្ចយា – អវិតក្កអវិចារេ ខន្ធេ បដិច្ច អវិតក្កអវិចារា ចេតនា; ពាហិរំ… អាហារសមុដ្ឋានំ… ឧតុសមុដ្ឋានំ ឯកំ មហាភូតំ បដិច្ច…បេ…. (១)

អវិតក្កអវិចារំ ធម្មំ បដិច្ច អវិតក្កវិចារមត្តោ ធម្មោ ឧប្បជ្ជតិ នកម្មបច្ចយា – វិចារំ បដិច្ច អវិតក្កវិចារមត្តា ចេតនា. (២)

អវិតក្កវិចារមត្តញ្ច អវិតក្កអវិចារញ្ច ធម្មំ បដិច្ច អវិតក្កវិចារមត្តោ ធម្មោ ឧប្បជ្ជតិ នកម្មបច្ចយា – អវិតក្កវិចារមត្តេ ខន្ធេ ច វិចារញ្ច បដិច្ច អវិតក្កវិចារមត្តា ចេតនា. (១)

សវិតក្កសវិចារញ្ច អវិតក្កវិចារមត្តញ្ច ធម្មំ បដិច្ច សវិតក្កសវិចារោ ធម្មោ ឧប្បជ្ជតិ នកម្មបច្ចយា – សវិតក្កសវិចារេ ខន្ធេ ច វិតក្កញ្ច បដិច្ច សវិតក្កសវិចារា ចេតនា. (១)

នវិបាកបច្ចយាទិ

៤០. សវិតក្កសវិចារំ ធម្មំ បដិច្ច សវិតក្កសវិចារោ ធម្មោ ឧប្បជ្ជតិ នវិបាកបច្ចយា…បេ… នអាហារបច្ចយា – ពាហិរំ… ឧតុសមុដ្ឋានំ…បេ… នឥន្ទ្រិយបច្ចយា – ពាហិរំ… អាហារសមុដ្ឋានំ… ឧតុសមុដ្ឋានំ…បេ… អសញ្ញសត្តានំ មហាភូតេ បដិច្ច រូបជីវិតិន្ទ្រិយំ…បេ… នឈានបច្ចយា – បញ្ចវិញ្ញាណសហគតំ ឯកំ ខន្ធំ…បេ… ពាហិរំ… អាហារសមុដ្ឋានំ… ឧតុសមុដ្ឋានំ… អសញ្ញសត្តានំ…បេ… នមគ្គបច្ចយា… នសម្បយុត្តបច្ចយា….

នវិប្បយុត្តបច្ចយោ

៤១. នវិប្បយុត្តបច្ចយា… អរូបេ សវិតក្កសវិចារំ ឯកំ ខន្ធំ បដិច្ច តយោ ខន្ធា…បេ… ទ្វេ ខន្ធេ បដិច្ច ទ្វេ ខន្ធា. (១)

សវិតក្កសវិចារំ ធម្មំ បដិច្ច អវិតក្កវិចារមត្តោ ធម្មោ ឧប្បជ្ជតិ នវិប្បយុត្តបច្ចយា – អរូបេ សវិតក្កសវិចារេ ខន្ធេ បដិច្ច វិតក្កោ. (២)

សវិតក្កសវិចារំ ធម្មំ បដិច្ច សវិតក្កសវិចារោ ច អវិតក្កវិចារមត្តោ ច ធម្មា ឧប្បជ្ជន្តិ នវិប្បយុត្តបច្ចយា – អរូបេ សវិតក្កសវិចារំ ឯកំ ខន្ធំ បដិច្ច តយោ ខន្ធា វិតក្កោ ច…បេ… ទ្វេ ខន្ធេ បដិច្ច ទ្វេ ខន្ធា វិតក្កោ ច. (៣)

៤២. អវិតក្កវិចារមត្តំ ធម្មំ បដិច្ច អវិតក្កវិចារមត្តោ ធម្មោ ឧប្បជ្ជតិ នវិប្បយុត្តបច្ចយា – អរូបេ អវិតក្កវិចារមត្តំ ឯកំ ខន្ធំ បដិច្ច តយោ ខន្ធា…បេ… ទ្វេ ខន្ធេ បដិច្ច ទ្វេ ខន្ធា. (១)

អវិតក្កវិចារមត្តំ ធម្មំ បដិច្ច សវិតក្កសវិចារោ ធម្មោ ឧប្បជ្ជតិ នវិប្បយុត្តបច្ចយា – អរូបេ វិតក្កំ បដិច្ច សវិតក្កសវិចារា ខន្ធា. (២)

អវិតក្កវិចារមត្តំ ធម្មំ បដិច្ច អវិតក្កអវិចារោ ធម្មោ ឧប្បជ្ជតិ នវិប្បយុត្តបច្ចយា – អរូបេ អវិតក្កវិចារមត្តេ ខន្ធេ បដិច្ច វិចារោ. (៣)

អវិតក្កវិចារមត្តំ ធម្មំ បដិច្ច អវិតក្កវិចារមត្តោ ច អវិតក្កអវិចារោ ច ធម្មា ឧប្បជ្ជន្តិ នវិប្បយុត្តបច្ចយា – អរូបេ អវិតក្កវិចារមត្តំ ឯកំ ខន្ធំ បដិច្ច តយោ ខន្ធា វិចារោ ច…បេ… ទ្វេ ខន្ធេ បដិច្ច ទ្វេ ខន្ធា វិចារោ ច. (៤)

អវិតក្កអវិចារំ ធម្មំ បដិច្ច អវិតក្កអវិចារោ ធម្មោ ឧប្បជ្ជតិ នវិប្បយុត្តបច្ចយា – អរូបេ អវិតក្កអវិចារំ ឯកំ ខន្ធំ បដិច្ច តយោ ខន្ធា…បេ… ទ្វេ ខន្ធេ បដិច្ច ទ្វេ ខន្ធា; ពាហិរំ… អាហារសមុដ្ឋានំ… ឧតុសមុដ្ឋានំ… អសញ្ញសត្តានំ ឯកំ មហាភូតំ បដិច្ច…បេ…. (១)

អវិតក្កអវិចារំ ធម្មំ បដិច្ច អវិតក្កវិចារមត្តោ ធម្មោ ឧប្បជ្ជតិ នវិប្បយុត្តបច្ចយា – អរូបេ វិចារំ បដិច្ច អវិតក្កវិចារមត្តា ខន្ធា. (២)

អវិតក្កវិចារមត្តញ្ច អវិតក្កអវិចារញ្ច ធម្មំ បដិច្ច អវិតក្កវិចារមត្តោ ធម្មោ ឧប្បជ្ជតិ នវិប្បយុត្តបច្ចយា – អរូបេ អវិតក្កវិចារមត្តំ ឯកំ ខន្ធញ្ច វិចារញ្ច បដិច្ច តយោ ខន្ធា…បេ… ទ្វេ ខន្ធេ ច វិចារញ្ច បដិច្ច ទ្វេ ខន្ធា. (១)

សវិតក្កសវិចារញ្ច អវិតក្កវិចារមត្តញ្ច ធម្មំ បដិច្ច សវិតក្កសវិចារោ ធម្មោ ឧប្បជ្ជតិ នវិប្បយុត្តបច្ចយា – អរូបេ សវិតក្កសវិចារំ ឯកំ ខន្ធញ្ច វិតក្កញ្ច បដិច្ច តយោ ខន្ធា…បេ… ទ្វេ ខន្ធេ ច វិតក្កញ្ច បដិច្ច ទ្វេ ខន្ធា. (១)

នោនត្ថិ-នោវិគតបច្ចយា

៤៣. សវិតក្កសវិចារំ ធម្មំ បដិច្ច អវិតក្កអវិចារោ ធម្មោ ឧប្បជ្ជតិ នោនត្ថិបច្ចយា… នោវិគតបច្ចយា… (សំខិត្តំ).