១. វិភង្គវារោ

ហេតុបច្ចយោ

១១. អជ្ឈត្តារម្មណោ ធម្មោ អជ្ឈត្តារម្មណស្ស ធម្មស្ស ហេតុបច្ចយេន បច្ចយោ – អជ្ឈត្តារម្មណា ហេតូ សម្បយុត្តកានំ ខន្ធានំ ហេតុបច្ចយេន បច្ចយោ. បដិសន្ធិក្ខណេ អជ្ឈត្តារម្មណា ហេតូ សម្បយុត្តកានំ ខន្ធានំ ហេតុបច្ចយេន បច្ចយោ. (១)

ពហិទ្ធារម្មណោ ធម្មោ ពហិទ្ធារម្មណស្ស ធម្មស្ស ហេតុបច្ចយេន បច្ចយោ – ពហិទ្ធារម្មណា ហេតូ សម្បយុត្តកានំ ខន្ធានំ…បេ… បដិសន្ធិក្ខណេ…បេ…. (១)

អារម្មណបច្ចយោ

១២. អជ្ឈត្តារម្មណោ ធម្មោ អជ្ឈត្តារម្មណស្ស ធម្មស្ស អារម្មណបច្ចយេន បច្ចយោ – អជ្ឈត្តំ វិញ្ញាណញ្ចាយតនំ បច្ចវេក្ខតិ, នេវសញ្ញានាសញ្ញាយតនំ បច្ចវេក្ខតិ, អជ្ឈត្តារម្មណំ អជ្ឈត្តំ ទិព្ពំ ចក្ខុំ បច្ចវេក្ខតិ, ទិព្ពំ សោតធាតុំ…បេ… ឥទ្ធិវិធញាណំ…បេ… បុព្ពេនិវាសានុស្សតិញាណំ…បេ… យថាកម្មូបគញាណំ…បេ… អនាគតំសញាណំ បច្ចវេក្ខតិ. អរិយា អជ្ឈត្តារម្មណេ បហីនេ កិលេសេ បច្ចវេក្ខន្តិ, វិក្ខម្ភិតេ កិលេសេ បច្ចវេក្ខន្តិ, បុព្ពេ សមុទាចិណ្ណេ កិលេសេ ជានន្តិ. អជ្ឈត្តារម្មណេ អជ្ឈត្តេ ខន្ធេ អនិច្ចតោ…បេ… វិបស្សតិ, អស្សាទេតិ អភិនន្ទតិ, តំ អារព្ភ អជ្ឈត្តារម្មណោ រាគោ ឧប្បជ្ជតិ…បេ… ទោមនស្សំ ឧប្បជ្ជតិ. អជ្ឈត្តារម្មណា អជ្ឈត្តា ខន្ធា បុព្ពេនិវាសានុស្សតិញាណស្ស, យថាកម្មូបគញាណស្ស, អនាគតំសញាណស្ស, អាវជ្ជនាយ អារម្មណបច្ចយេន បច្ចយោ. (១)

អជ្ឈត្តារម្មណោ ធម្មោ ពហិទ្ធារម្មណស្ស ធម្មស្ស អារម្មណបច្ចយេន បច្ចយោ – ពហិទ្ធា វិញ្ញាណញ្ចាយតនំ បច្ចវេក្ខតិ, នេវសញ្ញានាសញ្ញាយតនំ បច្ចវេក្ខតិ. អជ្ឈត្តារម្មណំ ពហិទ្ធា ទិព្ពំ ចក្ខុំ បច្ចវេក្ខតិ, ទិព្ពំ សោតធាតុំ…បេ… ឥទ្ធិវិធញាណំ…បេ… បុព្ពេនិវាសានុស្សតិញាណំ…បេ… យថាកម្មូបគញាណំ…បេ… អនាគតំសញាណំ បច្ចវេក្ខតិ, អជ្ឈត្តារម្មណេ ពហិទ្ធា ខន្ធេ អនិច្ចតោ ទុក្ខតោ អនត្តតោ វិបស្សតិ…បេ… ចេតោបរិយញាណេន អជ្ឈត្តារម្មណពហិទ្ធាចិត្តសមង្គិស្ស ចិត្តំ ជានាតិ, អជ្ឈត្តារម្មណា ពហិទ្ធា ខន្ធា ចេតោបរិយញាណស្ស, បុព្ពេនិវាសានុស្សតិញាណស្ស, យថាកម្មូបគញាណស្ស, អនាគតំសញាណស្ស, អាវជ្ជនាយ អារម្មណបច្ចយេន បច្ចយោ. (២)

១៣. ពហិទ្ធារម្មណោ ធម្មោ ពហិទ្ធារម្មណស្ស ធម្មស្ស អារម្មណបច្ចយេន បច្ចយោ – ពហិទ្ធារម្មណំ ពហិទ្ធា ទិព្ពំ ចក្ខុំ បច្ចវេក្ខតិ, ទិព្ពំ សោតធាតុំ បច្ចវេក្ខតិ. ឥទ្ធិវិធញាណំ…បេ… ចេតោបរិយញាណំ…បេ… បុព្ពេនិវាសានុស្សតិញាណំ…បេ… យថាកម្មូបគញាណំ…បេ… អនាគតំសញាណំ បច្ចវេក្ខតិ. ពហិទ្ធារម្មណេ ពហិទ្ធា ខន្ធេ អនិច្ចតោ ទុក្ខតោ អនត្តតោ វិបស្សតិ…បេ… ចេតោបរិយញាណេន ពហិទ្ធារម្មណពហិទ្ធាចិត្តសមង្គិស្ស ចិត្តំ ជានាតិ. ពហិទ្ធារម្មណា ពហិទ្ធា ខន្ធា ចេតោបរិយញាណស្ស, បុព្ពេនិវាសានុស្សតិញាណស្ស, យថាកម្មូបគញាណស្ស, អនាគតំសញាណស្ស, អាវជ្ជនាយ អារម្មណបច្ចយេន បច្ចយោ. (១)

ពហិទ្ធារម្មណោ ធម្មោ អជ្ឈត្តារម្មណស្ស ធម្មស្ស អារម្មណបច្ចយេន បច្ចយោ – ទានំ ទត្វា សីលំ សមាទិយិត្វា ឧបោសថកម្មំ កត្វា តំ បច្ចវេក្ខតិ, បុព្ពេ សុចិណ្ណានិ បច្ចវេក្ខតិ, ឈានា វុដ្ឋហិត្វា ឈានំ បច្ចវេក្ខតិ. អរិយា មគ្គា វុដ្ឋហិត្វា មគ្គំ បច្ចវេក្ខន្តិ, ផលំ បច្ចវេក្ខន្តិ, ពហិទ្ធារម្មណេ បហីនេ កិលេសេ បច្ចវេក្ខន្តិ, វិក្ខម្ភិតេ កិលេសេ បច្ចវេក្ខន្តិ, បុព្ពេ សមុទាចិណ្ណេ កិលេសេ ជានន្តិ. ពហិទ្ធារម្មណំ អជ្ឈត្តំ ទិព្ពំ ចក្ខុំ បច្ចវេក្ខតិ, ទិព្ពំ សោតធាតុំ… ឥទ្ធិវិធញាណំ… ចេតោបរិយញាណំ… បុព្ពេនិវាសានុស្សតិញាណំ… យថាកម្មូបគញាណំ… អនាគតំសញាណំ… ពហិទ្ធារម្មណេ អជ្ឈត្តេ ខន្ធេ អនិច្ចតោ…បេ… វិបស្សតិ, អស្សាទេតិ អភិនន្ទតិ, តំ អារព្ភ អជ្ឈត្តារម្មណោ រាគោ ឧប្បជ្ជតិ…បេ… ទោមនស្សំ ឧប្បជ្ជតិ. ពហិទ្ធារម្មណា អជ្ឈត្តា ខន្ធា ឥទ្ធិវិធញាណស្ស, បុព្ពេនិវាសានុស្សតិញាណស្ស, យថាកម្មូបគញាណស្ស, អនាគតំសញាណស្ស, អាវជ្ជនាយ អារម្មណបច្ចយេន បច្ចយោ. (២)

អធិបតិបច្ចយោ

១៤. អជ្ឈត្តារម្មណោ ធម្មោ អជ្ឈត្តារម្មណស្ស ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – អជ្ឈត្តំ វិញ្ញាណញ្ចាយតនំ គរុំ កត្វា បច្ចវេក្ខតិ, នេវសញ្ញានាសញ្ញាយតនំ គរុំ កត្វា បច្ចវេក្ខតិ. អជ្ឈត្តារម្មណំ អជ្ឈត្តំ ទិព្ពំ ចក្ខុំ គរុំ កត្វា…បេ… ទិព្ពំ សោតធាតុំ…បេ… ឥទ្ធិវិធញាណំ… បុព្ពេនិវាសានុស្សតិញាណំ… យថាកម្មូបគញាណំ… អនាគតំសញាណំ គរុំ កត្វា…បេ… អជ្ឈត្តារម្មណេ អជ្ឈត្តេ ខន្ធេ គរុំ កត្វា អស្សាទេតិ អភិនន្ទតិ, តំ គរុំ កត្វា អជ្ឈត្តារម្មណោ រាគោ ឧប្បជ្ជតិ, ទិដ្ឋិ ឧប្បជ្ជតិ. សហជាតាធិបតិ – អជ្ឈត្តារម្មណាធិបតិ សម្បយុត្តកានំ ខន្ធានំ អធិបតិបច្ចយេន បច្ចយោ. (១)

១៥. ពហិទ្ធារម្មណោ ធម្មោ ពហិទ្ធារម្មណស្ស ធម្មស្ស អធិបតិបច្ចយេន បច្ចយោ. សហជាតាធិបតិ – ពហិទ្ធារម្មណាធិបតិ សម្បយុត្តកានំ ខន្ធានំ អធិបតិបច្ចយេន បច្ចយោ. (១)

ពហិទ្ធារម្មណោ ធម្មោ អជ្ឈត្តារម្មណស្ស ធម្មស្ស អធិបតិបច្ចយេន បច្ចយោ. អារម្មណាធិបតិ – ទានំ ទត្វា សីលំ សមាទិយិត្វា ឧបោសថកម្មំ កត្វា តំ គរុំ កត្វា បច្ចវេក្ខតិ, បុព្ពេ សុចិណ្ណានិ…បេ… ឈានា វុដ្ឋហិត្វា…បេ… អរិយា មគ្គា វុដ្ឋហិត្វា មគ្គំ… ផលំ គរុំ កត្វា បច្ចវេក្ខន្តិ. ពហិទ្ធារម្មណំ អជ្ឈត្តំ ទិព្ពំ ចក្ខុំ គរុំ កត្វា…បេ… ទិព្ពំ សោតធាតុំ… ឥទ្ធិវិធញាណំ… ចេតោបរិយញាណំ… បុព្ពេនិវាសានុស្សតិញាណំ… យថាកម្មូបគញាណំ… អនាគតំសញាណំ គរុំ កត្វា បច្ចវេក្ខតិ, ពហិទ្ធារម្មណេ អជ្ឈត្តេ ខន្ធេ គរុំ កត្វា អស្សាទេតិ អភិនន្ទតិ, តំ គរុំ កត្វា អជ្ឈត្តារម្មណោ រាគោ ឧប្បជ្ជតិ, ទិដ្ឋិ ឧប្បជ្ជតិ. (២)

អនន្តរបច្ចយោ

១៦. អជ្ឈត្តារម្មណោ ធម្មោ អជ្ឈត្តារម្មណស្ស ធម្មស្ស អនន្តរបច្ចយេន បច្ចយោ – បុរិមា បុរិមា អជ្ឈត្តារម្មណា ខន្ធា បច្ឆិមានំ បច្ឆិមានំ អជ្ឈត្តារម្មណានំ ខន្ធានំ អនន្តរបច្ចយេន បច្ចយោ. (១)

អជ្ឈត្តារម្មណោ ធម្មោ ពហិទ្ធារម្មណស្ស ធម្មស្ស អនន្តរបច្ចយេន បច្ចយោ – អជ្ឈត្តារម្មណំ ចុតិចិត្តំ ពហិទ្ធារម្មណស្ស ឧបបត្តិចិត្តស្ស អនន្តរបច្ចយេន បច្ចយោ. អជ្ឈត្តារម្មណំ ភវង្គំ ពហិទ្ធារម្មណាយ អាវជ្ជនាយ អនន្តរបច្ចយេន បច្ចយោ. អជ្ឈត្តារម្មណា ខន្ធា ពហិទ្ធារម្មណស្ស វុដ្ឋានស្ស អនន្តរបច្ចយេន បច្ចយោ. អជ្ឈត្តារម្មណំ អនុលោមំ គោត្រភុស្ស… អនុលោមំ វោទានស្ស… អនុលោមំ ផលសមាបត្តិយា… និរោធា វុដ្ឋហន្តស្ស… នេវសញ្ញានាសញ្ញាយតនំ ផលសមាបត្តិយា អនន្តរបច្ចយេន បច្ចយោ. (២)

១៧. ពហិទ្ធារម្មណោ ធម្មោ ពហិទ្ធារម្មណស្ស ធម្មស្ស អនន្តរបច្ចយេន បច្ចយោ – បុរិមា បុរិមា ពហិទ្ធារម្មណា ខន្ធា បច្ឆិមានំ បច្ឆិមានំ ពហិទ្ធារម្មណានំ ខន្ធានំ អនន្តរបច្ចយេន បច្ចយោ. ពហិទ្ធារម្មណំ អនុលោមំ គោត្រភុស្ស… អនុលោមំ វោទានស្ស… គោត្រភុ មគ្គស្ស… វោទានំ មគ្គស្ស… មគ្គោ ផលស្ស… ផលំ ផលស្ស… អនុលោមំ ផលសមាបត្តិយា អនន្តរបច្ចយេន បច្ចយោ. (១)

ពហិទ្ធារម្មណោ ធម្មោ អជ្ឈត្តារម្មណស្ស ធម្មស្ស អនន្តរបច្ចយេន បច្ចយោ – ពហិទ្ធារម្មណំ ចុតិចិត្តំ អជ្ឈត្តារម្មណស្ស ឧបបត្តិចិត្តស្ស អនន្តរបច្ចយេន បច្ចយោ. ពហិទ្ធារម្មណំ ភវង្គំ អជ្ឈត្តារម្មណាយ អាវជ្ជនាយ អនន្តរបច្ចយេន បច្ចយោ. ពហិទ្ធារម្មណា ខន្ធា អជ្ឈត្តារម្មណស្ស វុដ្ឋានស្ស អនន្តរបច្ចយេន បច្ចយោ. (២)

សមនន្តរបច្ចយាទិ

១៨. អជ្ឈត្តារម្មណោ ធម្មោ អជ្ឈត្តារម្មណស្ស ធម្មស្ស សមនន្តរបច្ចយេន បច្ចយោ…បេ… សហជាតបច្ចយេន បច្ចយោ… អញ្ញមញ្ញបច្ចយេន បច្ចយោ… និស្សយបច្ចយេន បច្ចយោ.

ឧបនិស្សយបច្ចយោ

១៩. អជ្ឈត្តារម្មណោ ធម្មោ អជ្ឈត្តារម្មណស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – អជ្ឈត្តារម្មណា អនិច្ចានុបស្សនា, ទុក្ខានុបស្សនា, អនត្តានុបស្សនា, អជ្ឈត្តារម្មណាយ អនិច្ចានុបស្សនាយ, ទុក្ខានុបស្សនាយ, អនត្តានុបស្សនាយ ឧបនិស្សយបច្ចយេន បច្ចយោ. (១)

អជ្ឈត្តារម្មណោ ធម្មោ ពហិទ្ធារម្មណស្ស ធម្មស្ស ឧបនិស្សយបច្ចយេន បច្ចយោ – អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – អជ្ឈត្តារម្មណា អនិច្ចានុបស្សនា, ទុក្ខានុបស្សនា, អនត្តានុបស្សនា ពហិទ្ធារម្មណាយ អនិច្ចានុបស្សនាយ, ទុក្ខានុបស្សនាយ, អនត្តានុបស្សនាយ ឧបនិស្សយបច្ចយេន បច្ចយោ. (២)

២០. ពហិទ្ធារម្មណោ ធម្មោ ពហិទ្ធារម្មណស្ស ធម្មស្ស ឧបនិស្សយបច្ចយេន បច្ចយោ – អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – ពហិទ្ធារម្មណា អនិច្ចានុបស្សនា, ទុក្ខានុបស្សនា, អនត្តានុបស្សនា ពហិទ្ធារម្មណាយ អនិច្ចានុបស្សនាយ, ទុក្ខានុបស្សនាយ, អនត្តានុបស្សនាយ ឧបនិស្សយបច្ចយេន បច្ចយោ. (១)

ពហិទ្ធារម្មណោ ធម្មោ អជ្ឈត្តារម្មណស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – ពហិទ្ធារម្មណា អនិច្ចានុបស្សនា, ទុក្ខានុបស្សនា, អនត្តានុបស្សនា អជ្ឈត្តារម្មណាយ អនិច្ចានុបស្សនាយ, ទុក្ខានុបស្សនាយ, អនត្តានុបស្សនាយ ឧបនិស្សយបច្ចយេន បច្ចយោ. (២)

អាសេវនបច្ចយោ

២១. អជ្ឈត្តារម្មណោ ធម្មោ អជ្ឈត្តារម្មណស្ស ធម្មស្ស អាសេវនបច្ចយេន បច្ចយោ – បុរិមា បុរិមា អជ្ឈត្តារម្មណា ខន្ធា បច្ឆិមានំ បច្ឆិមានំ អជ្ឈត្តារម្មណានំ ខន្ធានំ អាសេវនបច្ចយេន បច្ចយោ. (១)

អជ្ឈត្តារម្មណោ ធម្មោ ពហិទ្ធារម្មណស្ស ធម្មស្ស អាសេវនបច្ចយេន បច្ចយោ – អជ្ឈត្តារម្មណំ អនុលោមំ គោត្រភុស្ស, អនុលោមំ វោទានស្ស អាសេវនបច្ចយេន បច្ចយោ. (២)

ពហិទ្ធារម្មណោ ធម្មោ ពហិទ្ធារម្មណស្ស ធម្មស្ស អាសេវនបច្ចយេន បច្ចយោ – បុរិមា បុរិមា ពហិទ្ធារម្មណា ខន្ធា បច្ឆិមានំ បច្ឆិមានំ ពហិទ្ធារម្មណានំ ខន្ធានំ អាសេវនបច្ចយេន បច្ចយោ. ពហិទ្ធារម្មណំ អនុលោមំ គោត្រភុស្ស… អនុលោមំ វោទានស្ស… គោត្រភុ មគ្គស្ស… វោទានំ មគ្គស្ស អាសេវនបច្ចយេន បច្ចយោ. (១)

កម្មបច្ចយោ

២២. អជ្ឈត្តារម្មណោ ធម្មោ អជ្ឈត្តារម្មណស្ស ធម្មស្ស កម្មបច្ចយេន បច្ចយោ – សហជាតា, នានាក្ខណិកា. សហជាតា – អជ្ឈត្តារម្មណា ចេតនា សម្បយុត្តកានំ ខន្ធានំ កម្មបច្ចយេន បច្ចយោ. បដិសន្ធិក្ខណេ…បេ…. នានាក្ខណិកា – អជ្ឈត្តារម្មណា ចេតនា វិបាកានំ អជ្ឈត្តារម្មណានំ ខន្ធានំ កម្មបច្ចយេន បច្ចយោ. (១)

អជ្ឈត្តារម្មណោ ធម្មោ ពហិទ្ធារម្មណស្ស ធម្មស្ស កម្មបច្ចយេន បច្ចយោ. នានាក្ខណិកា – អជ្ឈត្តារម្មណា ចេតនា វិបាកានំ ពហិទ្ធារម្មណានំ ខន្ធានំ កម្មបច្ចយេន បច្ចយោ. (២)

ពហិទ្ធារម្មណោ ធម្មោ ពហិទ្ធារម្មណស្ស ធម្មស្ស កម្មបច្ចយេន បច្ចយោ – សហជាតា, នានាក្ខណិកា. សហជាតា – ពហិទ្ធារម្មណា ចេតនា សម្បយុត្តកានំ ខន្ធានំ កម្មបច្ចយេន បច្ចយោ. បដិសន្ធិក្ខណេ…បេ…. នានាក្ខណិកា – ពហិទ្ធារម្មណា ចេតនា វិបាកានំ ពហិទ្ធារម្មណានំ ខន្ធានំ កម្មបច្ចយេន បច្ចយោ. (១)

ពហិទ្ធារម្មណោ ធម្មោ អជ្ឈត្តារម្មណស្ស ធម្មស្ស កម្មបច្ចយេន បច្ចយោ. នានាក្ខណិកា – ពហិទ្ធារម្មណា ចេតនា វិបាកានំ អជ្ឈត្តារម្មណានំ ខន្ធានំ កម្មបច្ចយេន បច្ចយោ. (២)

វិបាកបច្ចយាទិ

២៣. អជ្ឈត្តារម្មណោ ធម្មោ អជ្ឈត្តារម្មណស្ស ធម្មស្ស វិបាកបច្ចយេន បច្ចយោ…បេ… អាហារបច្ចយេន បច្ចយោ… ឥន្ទ្រិយបច្ចយេន បច្ចយោ… ឈានបច្ចយេន បច្ចយោ … មគ្គបច្ចយេន បច្ចយោ… សម្បយុត្តបច្ចយេន បច្ចយោ… អត្ថិបច្ចយេន បច្ចយោ… នត្ថិបច្ចយេន បច្ចយោ…វិគតបច្ចយេន បច្ចយោ… អវិគតបច្ចយេន បច្ចយោ.