១. វិភង្គវារោ

នហេតុបច្ចយោ

២២. អជ្ឈត្តំ ធម្មំ បច្ចយា អជ្ឈត្តោ ធម្មោ ឧប្បជ្ជតិ នហេតុបច្ចយា – អហេតុកំ អជ្ឈត្តំ ឯកំ ខន្ធំ បច្ចយា តយោ ខន្ធា…បេ… អហេតុកបដិសន្ធិក្ខណេ…បេ… ខន្ធេ បច្ចយា វត្ថុ, វត្ថុំ បច្ចយា ខន្ធា. ឯកំ មហាភូតំ…បេ… អាហារសមុដ្ឋានំ… ឧតុសមុដ្ឋានំ… អសញ្ញសត្តានំ…បេ… ចក្ខាយតនំ…បេ… កាយាយតនំ…បេ… វត្ថុំ បច្ចយា អហេតុកា អជ្ឈត្តា ខន្ធា. វិចិកិច្ឆាសហគតេ ឧទ្ធច្ចសហគតេ ខន្ធេ ច វត្ថុញ្ច បច្ចយា វិចិកិច្ឆាសហគតោ ឧទ្ធច្ចសហគតោ មោហោ. (១)

ពហិទ្ធា ធម្មំ បច្ចយា ពហិទ្ធា ធម្មោ ឧប្បជ្ជតិ នហេតុបច្ចយា (បវត្តិបដិសន្ធិបិ មហាភូតាបិ កាតព្ពា) – ចក្ខាយតនំ…បេ… កាយាយតនំ…បេ… វត្ថុំ បច្ចយា អហេតុកា ពហិទ្ធា ខន្ធា. វិចិកិច្ឆាសហគតេ ឧទ្ធច្ចសហគតេ ខន្ធេ ច វត្ថុញ្ច បច្ចយា វិចិកិច្ឆាសហគតោ ឧទ្ធច្ចសហគតោ មោហោ. (១)

នអារម្មណបច្ចយាទិ

២៣. នអារម្មណបច្ចយា… នអធិបតិបច្ចយា (សហជាតសទិសំ)… នអនន្តរបច្ចយា… នសមនន្តរបច្ចយា… នអញ្ញមញ្ញបច្ចយា… នឧបនិស្សយបច្ចយា… នបុរេជាតបច្ចយា (បដិច្ចវារសទិសំ)… នបច្ឆាជាតបច្ចយា… នអាសេវនបច្ចយា… នកម្មបច្ចយា…បេ… នវិប្បយុត្តបច្ចយា (បដិច្ចវារបច្ចនីយេ វិប្បយុត្តសទិសំ)… នោនត្ថិបច្ចយា… នោវិគតបច្ចយា….