១៨. អតីតត្តិកំ

៧. បញ្ហាវារោ

១. បច្ចយានុលោមំ

១. វិភង្គវារោ

ហេតុបច្ចយោ

១. បច្ចុប្បន្នោ ធម្មោ បច្ចុប្បន្នស្ស ធម្មស្ស ហេតុបច្ចយេន បច្ចយោ – បច្ចុប្បន្នា ហេតូ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ ហេតុបច្ចយេន បច្ចយោ. បដិសន្ធិក្ខណេ…បេ…. (១)

អារម្មណបច្ចយោ

២. អតីតោ ធម្មោ បច្ចុប្បន្នស្ស ធម្មស្ស អារម្មណបច្ចយេន បច្ចយោ – ទានំ ទត្វា សីលំ សមាទិយិត្វា ឧបោសថកម្មំ…បេ… បច្ចវេក្ខតិ, បុព្ពេ សុចិណ្ណានិ បច្ចវេក្ខតិ, ឈានា វុដ្ឋហិត្វា ឈានំ បច្ចវេក្ខតិ. អរិយា មគ្គា វុដ្ឋហិត្វា មគ្គំ បច្ចវេក្ខន្តិ, ផលំ បច្ចវេក្ខន្តិ, បហីនេ កិលេសេ បច្ចវេក្ខន្តិ, វិក្ខម្ភិតេ កិលេសេ បច្ចវេក្ខន្តិ, បុព្ពេ សមុទាចិណ្ណេ កិលេសេ ជានន្តិ. អតីតំ ចក្ខុំ អនិច្ចតោ ទុក្ខតោ អនត្តតោ វិបស្សតិ…បេ… ទោមនស្សំ ឧប្បជ្ជតិ. អតីតំ សោតំ…បេ… ឃានំ… ជិវ្ហំ… កាយំ… រូបេ… សទ្ទេ… គន្ធេ… រសេ… ផោដ្ឋព្ពេ… វត្ថុំ… អតីតេ ខន្ធេ អនិច្ចតោ ទុក្ខតោ អនត្តតោ វិបស្សតិ, អស្សាទេតិ អភិនន្ទតិ, តំ អារព្ភ រាគោ ឧប្បជ្ជតិ, ទិដ្ឋិ ឧប្បជ្ជតិ, វិចិកិច្ឆា… ឧទ្ធច្ចំ… ទោមនស្សំ ឧប្បជ្ជតិ, អាកាសានញ្ចាយតនំ វិញ្ញាណញ្ចាយតនស្ស អារម្មណបច្ចយេន បច្ចយោ. អាកិញ្ចញ្ញាយតនំ នេវសញ្ញានាសញ្ញាយតនស្ស អារម្មណបច្ចយេន បច្ចយោ. អតីតា ខន្ធា ឥទ្ធិវិធញាណស្ស, ចេតោបរិយញាណស្ស, បុព្ពេនិវាសានុស្សតិញាណស្ស, យថាកម្មូបគញាណស្ស, អាវជ្ជនាយ អារម្មណបច្ចយេន បច្ចយោ. (១)

៣. អនាគតោ ធម្មោ បច្ចុប្បន្នស្ស ធម្មស្ស អារម្មណបច្ចយេន បច្ចយោ – អនាគតំ ចក្ខុំ…បេ… វត្ថុំ… អនាគតេ ខន្ធេ អនិច្ចតោ…បេ… ទោមនស្សំ ឧប្បជ្ជតិ. អនាគតា ខន្ធា ឥទ្ធិវិធញាណស្ស, ចេតោបរិយញាណស្ស, អនាគតំសញាណស្ស, អាវជ្ជនាយ អារម្មណបច្ចយេន បច្ចយោ. (១)

បច្ចុប្បន្នោ ធម្មោ បច្ចុប្បន្នស្ស ធម្មស្ស អារម្មណបច្ចយេន បច្ចយោ – បច្ចុប្បន្នំ ចក្ខុំ…បេ… កាយំ… រូបេ… សទ្ទេ… គន្ធេ… រសេ… ផោដ្ឋព្ពេ… វត្ថុំ… បច្ចុប្បន្នេ ខន្ធេ អនិច្ចតោ…បេ… ទោមនស្សំ ឧប្បជ្ជតិ, ទិព្ពេន ចក្ខុនា រូបំ បស្សតិ, ទិព្ពាយ សោតធាតុយា សទ្ទំ សុណាតិ, រូបាយតនំ ចក្ខុវិញ្ញាណស្ស…បេ… ផោដ្ឋព្ពាយតនំ កាយវិញ្ញាណស្ស…បេ… បច្ចុប្បន្នា ខន្ធា ឥទ្ធិវិធញាណស្ស, អាវជ្ជនាយ អារម្មណបច្ចយេន បច្ចយោ. (១)

អធិបតិបច្ចយោ

៤. អតីតោ ធម្មោ បច្ចុប្បន្នស្ស ធម្មស្ស អធិបតិបច្ចយេន បច្ចយោ. អារម្មណាធិបតិ – ទានំ ទត្វា សីលំ សមាទិយិត្វា…បេ… បុព្ពេ សុចិណ្ណានិ គរុំ កត្វា បច្ចវេក្ខតិ, ឈានា វុដ្ឋហិត្វា ឈានំ គរុំ កត្វា បច្ចវេក្ខតិ. អរិយា មគ្គា វុដ្ឋហិត្វា មគ្គំ គរុំ កត្វា បច្ចវេក្ខន្តិ, ផលំ គរុំ កត្វា បច្ចវេក្ខន្តិ. អតីតំ ចក្ខុំ…បេ… កាយំ… រូបេ… សទ្ទេ… គន្ធេ… រសេ… ផោដ្ឋព្ពេ… វត្ថុំ… អតីតេ ខន្ធេ គរុំ កត្វា អស្សាទេតិ អភិនន្ទតិ, តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ. (១) អនាគតោ ធម្មោ បច្ចុប្បន្នស្ស ធម្មស្ស អធិបតិបច្ចយេន បច្ចយោ. អារម្មណាធិបតិ – អនាគតំ ចក្ខុំ…បេ… វត្ថុំ… អនាគតេ ខន្ធេ គរុំ កត្វា អស្សាទេតិ អភិនន្ទតិ, តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ. (១)

បច្ចុប្បន្នោ ធម្មោ បច្ចុប្បន្នស្ស ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – បច្ចុប្បន្នំ ចក្ខុំ…បេ… វត្ថុំ… បច្ចុប្បន្នេ ខន្ធេ គរុំ កត្វា អស្សាទេតិ អភិនន្ទតិ, តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ. សហជាតាធិបតិ – បច្ចុប្បន្នាធិបតិ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ អធិបតិបច្ចយេន បច្ចយោ. (១)

អនន្តរបច្ចយោ

៥. អតីតោ ធម្មោ បច្ចុប្បន្នស្ស ធម្មស្ស អនន្តរបច្ចយេន បច្ចយោ – បុរិមា បុរិមា អតីតា ខន្ធា បច្ឆិមានំ បច្ឆិមានំ បច្ចុប្បន្នានំ ខន្ធានំ អនន្តរបច្ចយេន បច្ចយោ. អនុលោមំ គោត្រភុស្ស… អនុលោមំ វោទានស្ស… គោត្រភុ មគ្គស្ស… វោទានំ មគ្គស្ស… មគ្គោ ផលស្ស… ផលំ ផលស្ស… អនុលោមំ ផលសមាបត្តិយា… និរោធា វុដ្ឋហន្តស្ស នេវសញ្ញានាសញ្ញាយតនំ ផលសមាបត្តិយា អនន្តរបច្ចយេន បច្ចយោ. (១)

សមនន្តរបច្ចយោ

៦. អតីតោ ធម្មោ បច្ចុប្បន្នស្ស ធម្មស្ស សមនន្តរបច្ចយេន បច្ចយោ (អនន្តរសទិសំ). (១)

សហជាតបច្ចយាទិ

៧. បច្ចុប្បន្នោ ធម្មោ បច្ចុប្បន្នស្ស ធម្មស្ស សហជាតបច្ចយេន បច្ចយោ… អញ្ញមញ្ញបច្ចយេន បច្ចយោ… និស្សយបច្ចយេន បច្ចយោ (សំខិត្តំ). (១)

ឧបនិស្សយបច្ចយោ

៨. អតីតោ ធម្មោ បច្ចុប្បន្នស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – អតីតំ សទ្ធំ ឧបនិស្សាយ ទានំ ទេតិ, សីលំ សមាទិយតិ, ឧបោសថកម្មំ ករោតិ, ឈានំ ឧប្បាទេតិ, វិបស្សនំ… មគ្គំ… អភិញ្ញំ… សមាបត្តិំ ឧប្បាទេតិ, មានំ ជប្បេតិ, ទិដ្ឋិំ គណ្ហាតិ. អតីតំ សីលំ…បេ… បញ្ញំ… រាគំ…បេ… បត្ថនំ… កាយិកំ សុខំ… កាយិកំ ទុក្ខំ ឧបនិស្សាយ ទានំ ទេតិ សីលំ សមាទិយតិ, ឧបោសថកម្មំ…បេ… សមាបត្តិំ ឧប្បាទេតិ, បាណំ ហនតិ…បេ… សង្ឃំ ភិន្ទតិ. អតីតា សទ្ធា…បេ… បញ្ញា, រាគោ…បេ… បត្ថនា, កាយិកំ សុខំ… កាយិកំ ទុក្ខំ… បច្ចុប្បន្នាយ សទ្ធាយ…បេ… បញ្ញាយ, រាគស្ស…បេ… បត្ថនាយ…បេ… ផលសមាបត្តិយា ឧបនិស្សយបច្ចយេន បច្ចយោ. (១)

អនាគតោ ធម្មោ បច្ចុប្បន្នស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, បកតូបនិស្សយោ…បេ…. បកតូបនិស្សយោ – អនាគតំ ចក្ខុសម្បទំ បត្ថយមានោ…បេ… សោតសម្បទំ… ឃានសម្បទំ ជិវ្ហាសម្បទំ… កាយសម្បទំ… វណ្ណសម្បទំ… សទ្ទសម្បទំ… គន្ធសម្បទំ… រសសម្បទំ… ផោដ្ឋព្ពសម្បទំ…បត្ថយមានោ…បេ… អនាគតេ ខន្ធេ បត្ថយមានោ ទានំ ទេតិ, សីលំ សមាទិយតិ, ឧបោសថកម្មំ… អនាគតា ចក្ខុសម្បទា…បេ… វណ្ណសម្បទា…បេ… ផោដ្ឋព្ពសម្បទា… អនាគតា ខន្ធា បច្ចុប្បន្នាយ សទ្ធាយ…បេ… បញ្ញាយ, កាយិកស្ស សុខស្ស, កាយិកស្ស ទុក្ខស្ស, មគ្គស្ស, ផលសមាបត្តិយា ឧបនិស្សយបច្ចយេន បច្ចយោ. (១)

បច្ចុប្បន្នោ ធម្មោ បច្ចុប្បន្នស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, បកតូបនិស្សយោ…បេ…. បកតូបនិស្សយោ – បច្ចុប្បន្នំ ឧតុំ ឧបនិស្សាយ ឈានំ ឧប្បាទេតិ, វិបស្សនំ…បេ… បច្ចុប្បន្នំ ភោជនំ សេនាសនំ ឧបនិស្សាយ ឈានំ ឧប្បាទេតិ…បេ… សមាបត្តិំ ឧប្បាទេតិ. បច្ចុប្បន្នំ ឧតុ… ភោជនំ… សេនាសនំ បច្ចុប្បន្នាយ សទ្ធាយ…បេ… បញ្ញាយ កាយិកស្ស…បេ… ផលសមាបត្តិយា ឧបនិស្សយបច្ចយេន បច្ចយោ. (១)

បុរេជាតបច្ចយោ

៩. បច្ចុប្បន្នោ ធម្មោ បច្ចុប្បន្នស្ស ធម្មស្ស បុរេជាតបច្ចយេន បច្ចយោ – អារម្មណបុរេជាតំ, វត្ថុបុរេជាតំ. អារម្មណបុរេជាតំ – ចក្ខុំ…បេ… វត្ថុំ អនិច្ចតោ…បេ… ទោមនស្សំ ឧប្បជ្ជតិ, ទិព្ពេន ចក្ខុនា រូបំ បស្សតិ, ទិព្ពាយ សោតធាតុយា សទ្ទំ សុណាតិ, រូបាយតនំ ចក្ខុវិញ្ញាណស្ស…បេ… ផោដ្ឋព្ពាយតនំ កាយវិញ្ញាណស្ស បុរេជាតបច្ចយេន បច្ចយោ. វត្ថុបុរេជាតំ – ចក្ខាយតនំ ចក្ខុវិញ្ញាណស្ស…បេ… កាយាយតនំ កាយវិញ្ញាណស្ស… វត្ថុ បច្ចុប្បន្នានំ ខន្ធានំ បុរេជាតបច្ចយេន បច្ចយោ. (១)

បច្ឆាជាតបច្ចយោ

១០. បច្ចុប្បន្នោ ធម្មោ បច្ចុប្បន្នស្ស ធម្មស្ស បច្ឆាជាតបច្ចយេន បច្ចយោ – បច្ឆាជាតា បច្ចុប្បន្នា ខន្ធា បុរេជាតស្ស ឥមស្ស កាយស្ស បច្ឆាជាតបច្ចយេន បច្ចយោ. (១)

អាសេវនបច្ចយោ

១១. អតីតោ ធម្មោ បច្ចុប្បន្នស្ស ធម្មស្ស អាសេវនបច្ចយេន បច្ចយោ – បុរិមា បុរិមា អតីតា ខន្ធា បច្ឆិមានំ បច្ឆិមានំ បច្ចុប្បន្នានំ ខន្ធានំ អាសេវនបច្ចយេន បច្ចយោ. អនុលោមំ គោត្រភុស្ស… អនុលោមំ វោទានស្ស… គោត្រភុ មគ្គស្ស… វោទានំ មគ្គស្ស អាសេវនបច្ចយេន បច្ចយោ. (១)

កម្មបច្ចយោ

១២. អតីតោ ធម្មោ បច្ចុប្បន្នស្ស ធម្មស្ស កម្មបច្ចយេន បច្ចយោ. នានាក្ខណិកា – អតីតា ចេតនា បច្ចុប្បន្នានំ វិបាកានំ ខន្ធានំ កដត្តា ច រូបានំ កម្មបច្ចយេន បច្ចយោ. (១)

បច្ចុប្បន្នោ ធម្មោ បច្ចុប្បន្នស្ស ធម្មស្ស កម្មបច្ចយេន បច្ចយោ – បច្ចុប្បន្នា ចេតនា សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ កម្មបច្ចយេន បច្ចយោ. បដិសន្ធិក្ខណេ បច្ចុប្បន្នា ចេតនា សម្បយុត្តកានំ ខន្ធានំ កដត្តា ច រូបានំ កម្មបច្ចយេន បច្ចយោ. (១)

វិបាកបច្ចយោ

១៣. បច្ចុប្បន្នោ ធម្មោ បច្ចុប្បន្នស្ស ធម្មស្ស វិបាកបច្ចយេន បច្ចយោ – វិបាកោ បច្ចុប្បនោ ឯកោ ខន្ធោ តិណ្ណន្នំ ខន្ធានំ ចិត្តសមុដ្ឋានានញ្ច រូបានំ វិបាកបច្ចយេន បច្ចយោ…បេ… ទ្វេ ខន្ធា…បេ… បដិសន្ធិក្ខណេ…បេ… ខន្ធា វត្ថុស្ស វិបាកបច្ចយេន បច្ចយោ. (១)

អាហារបច្ចយាទិ

១៤. បច្ចុប្បន្នោ ធម្មោ បច្ចុប្បន្នស្ស ធម្មស្ស អាហារបច្ចយេន បច្ចយោ… ឥន្ទ្រិយបច្ចយេន បច្ចយោ… ឈានបច្ចយេន បច្ចយោ… មគ្គបច្ចយេន បច្ចយោ… សម្បយុត្តបច្ចយេន បច្ចយោ… វិប្បយុត្តបច្ចយេន បច្ចយោ – សហជាតំ, បុរេជាតំ, បច្ឆាជាតំ. សហជាតា – បច្ចុប្បន្នា ខន្ធា ចិត្តសមុដ្ឋានានំ រូបានំ វិប្បយុត្តបច្ចយេន បច្ចយោ. បដិសន្ធិក្ខណេ បច្ចុប្បន្នា ខន្ធា កដត្តារូបានំ វិប្បយុត្តបច្ចយេន បច្ចយោ, ខន្ធា វត្ថុស្ស វិប្បយុត្តបច្ចយេន បច្ចយោ, វត្ថុ ខន្ធានំ វិប្បយុត្តបច្ចយេន បច្ចយោ. បុរេជាតំ – ចក្ខាយតនំ ចក្ខុវិញ្ញាណស្ស…បេ… កាយាយតនំ កាយវិញ្ញាណស្ស… វត្ថុ បច្ចុប្បន្នានំ ខន្ធានំ វិប្បយុត្តបច្ចយេន បច្ចយោ. បច្ឆាជាតា – បច្ចុប្បន្នា ខន្ធា បុរេជាតស្ស ឥមស្ស កាយស្ស វិប្បយុត្តបច្ចយេន បច្ចយោ. (១)

អត្ថិបច្ចយោ

១៥. បច្ចុប្បន្នោ ធម្មោ បច្ចុប្បន្នស្ស ធម្មស្ស អត្ថិបច្ចយេន បច្ចយោ (ឧប្បន្នត្តិកេ អត្ថិសទិសំ). (១)

នត្ថិវិគតាវិគតបច្ចយា

១៦. អតីតោ ធម្មោ បច្ចុប្បន្នស្ស ធម្មស្ស នត្ថិបច្ចយេន បច្ចយោ… វិគតបច្ចយេន បច្ចយោ.

បច្ចុប្បន្នោ ធម្មោ បច្ចុប្បន្នស្ស ធម្មស្ស អវិគតបច្ចយេន បច្ចយោ…បេ….

១. បច្ចយានុលោមំ

២. សង្ខ្យាវារោ

១៧. ហេតុយា ឯកំ, អារម្មណេ តីណិ, អធិបតិយា តីណិ, អនន្តរេ ឯកំ, សមនន្តរេ ឯកំ, សហជាតេ អញ្ញមញ្ញេ និស្សយេ ឯកំ, ឧបនិស្សយេ តីណិ, បុរេជាតេ បច្ឆាជាតេ អាសេវនេ ឯកំ, កម្មេ ទ្វេ, វិបាកេ អាហារេ ឯកំ…បេ… អវិគតេ ឯកំ (ឯវំ គណេតព្ពំ).

អនុលោមំ.

បច្ចនីយុទ្ធារោ

១៨. អតីតោ ធម្មោ បច្ចុប្បន្នស្ស ធម្មស្ស អារម្មណបច្ចយេន បច្ចយោ… ឧបនិស្សយបច្ចយេន បច្ចយោ… កម្មបច្ចយេន បច្ចយោ. (១)

អនាគតោ ធម្មោ បច្ចុប្បន្នស្ស ធម្មស្ស អារម្មណបច្ចយេន បច្ចយោ… ឧបនិស្សយបច្ចយេន បច្ចយោ. (១)

បច្ចុប្បន្នោ ធម្មោ បច្ចុប្បន្នស្ស ធម្មស្ស អារម្មណបច្ចយេន បច្ចយោ… សហជាតបច្ចយេន បច្ចយោ… ឧបនិស្សយបច្ចយេន បច្ចយោ… បុរេជាតបច្ចយេន បច្ចយោ… បច្ឆាជាតបច្ចយេន បច្ចយោ… អាហារបច្ចយេន បច្ចយោ… ឥន្ទ្រិយបច្ចយេន បច្ចយោ. (១)

២. បច្ចយបច្ចនីយំ

២. សង្ខ្យាវារោ

១៩. នហេតុយា តីណិ, នអារម្មណេ តីណិ, នអធិបតិយា តីណិ, នអនន្តរេ តីណិ …បេ… នសម្បយុត្តេ តីណិ, នវិប្បយុត្តេ តីណិ, នោអត្ថិយា ទ្វេ, នោនត្ថិយា តីណិ, នោវិគតេ តីណិ, នោអវិគតេ ទ្វេ (ឯវំ គណេតព្ពំ).

បច្ចនីយំ.

៣. បច្ចយានុលោមបច្ចនីយំ

២០. ហេតុបច្ចយា នអារម្មណេ ឯកំ, នអធិបតិយា នអនន្តរេ នសមនន្តរេ នអញ្ញមញ្ញេ នឧបនិស្សយេ…បេ… នសម្បយុត្តេ នវិប្បយុត្តេ នោនត្ថិយា នោវិគតេ ឯកំ (ឯវំ គណេតព្ពំ).

អនុលោមបច្ចនីយំ.

៤. បច្ចយបច្ចនីយានុលោមំ

២១. នហេតុបច្ចយា អារម្មណេ តីណិ, អធិបតិយា តីណិ, អនន្តរេ សមនន្តរេ សហជាតេ អញ្ញមញ្ញេ និស្សយេ ឯកំ, ឧបនិស្សយេ តីណិ, បុរេជាតេ ឯកំ, បច្ឆាជាតេ អាសេវនេ ឯកំ…បេ… កម្មេ ទ្វេ, វិបាកេ ឯកំ (ឥមេសុ បទេសុ ឯកំយេវ), អវិគតេ ឯកំ (ឯវំ គណេតព្ពំ).

បច្ចនីយានុលោមំ.

បញ្ហាវារោ.

អតីតត្តិកំ និដ្ឋិតំ.