១. វិភង្គវារោ

ហេតុបច្ចយោ

១. ឧប្បន្នោ ធម្មោ ឧប្បន្នស្ស ធម្មស្ស ហេតុបច្ចយេន បច្ចយោ – ឧប្បន្នា ហេតូ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ ហេតុបច្ចយេន បច្ចយោ. បដិសន្ធិក្ខណេ ឧប្បន្នា ហេតូ សម្បយុត្តកានំ ខន្ធានំ កដត្តា ច រូបានំ ហេតុបច្ចយេន បច្ចយោ. (១)

អារម្មណបច្ចយោ

២. ឧប្បន្នោ ធម្មោ ឧប្បន្នស្ស ធម្មស្ស អារម្មណបច្ចយេន បច្ចយោ – ឧប្បន្នំ ចក្ខុំ អនិច្ចតោ ទុក្ខតោ អនត្តតោ វិបស្សតិ, អស្សាទេតិ អភិនន្ទតិ, តំ អារព្ភ រាគោ ឧប្បជ្ជតិ, ទិដ្ឋិ ឧប្បជ្ជតិ, វិចិកិច្ឆា…បេ… ឧទ្ធច្ចំ…បេ… ទោមនស្សំ ឧប្បជ្ជតិ. ឧប្បន្នំ សោតំ… ឃានំ… ជិវ្ហំ… កាយំ… រូបេ… សទ្ទេ… គន្ធេ… រសេ… ផោដ្ឋព្ពេ… វត្ថុំ… ឧប្បន្នេ ខន្ធេ អនិច្ចតោ ទុក្ខតោ អនត្តតោ វិបស្សតិ…បេ… ទោមនស្សំ ឧប្បជ្ជតិ. ទិព្ពេន ចក្ខុនា រូបំ បស្សតិ, ទិព្ពាយ សោតធាតុយា សទ្ទំ សុណាតិ, រូបាយតនំ ចក្ខុវិញ្ញាណស្ស …បេ… ផោដ្ឋព្ពាយតនំ កាយវិញ្ញាណស្ស…បេ… ឧប្បន្នា ខន្ធា ឥទ្ធិវិធញាណស្ស អាវជ្ជនាយ អារម្មណបច្ចយេន បច្ចយោ. (១)

៣. អនុប្បន្នោ ធម្មោ ឧប្បន្នស្ស ធម្មស្ស អារម្មណបច្ចយេន បច្ចយោ – អនុប្បន្នេ រូបេ… សទ្ទេ… គន្ធេ… រសេ… ផោដ្ឋព្ពេ… អនុប្បន្នេ ខន្ធេ អនិច្ចតោ ទុក្ខតោ អនត្តតោ វិបស្សតិ…បេ… ទោមនស្សំ ឧប្បជ្ជតិ. អនុប្បន្នា ខន្ធា ឥទ្ធិវិធញាណស្ស, ចេតោបរិយញាណស្ស, អនាគតំសញាណស្ស, អាវជ្ជនាយ អារម្មណបច្ចយេន បច្ចយោ. (១)

៤. ឧប្បាទី ធម្មោ ឧប្បន្នស្ស ធម្មស្ស អារម្មណបច្ចយេន បច្ចយោ – ឧប្បាទិំ ចក្ខុំ…បេ… កាយំ… រូបេ… គន្ធេ… រសេ… ផោដ្ឋព្ពេ… វត្ថុំ… ឧប្បាទី ខន្ធេ អនិច្ចតោ ទុក្ខតោ អនត្តតោ…បេ… ទោមនស្សំ ឧប្បជ្ជតិ. ឧប្បាទី ខន្ធា ឥទ្ធិវិធញាណស្ស, ចេតោបរិយញាណស្ស, អនាគតំសញាណស្ស, អាវជ្ជនាយ អារម្មណបច្ចយេន បច្ចយោ. (១)

អធិបតិបច្ចយោ

៥. ឧប្បន្នោ ធម្មោ ឧប្បន្នស្ស ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – ឧប្បន្នំ ចក្ខុំ គរុំ កត្វា អស្សាទេតិ អភិនន្ទតិ, តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ. ឧប្បន្នំ សោតំ… ឃានំ… ជិវ្ហំ… កាយំ… រូបេ… សទ្ទេ… គន្ធេ… រសេ… ផោដ្ឋព្ពេ… វត្ថុំ… ឧប្បន្នេ ខន្ធេ គរុំ កត្វា អស្សាទេតិ អភិនន្ទតិ, តំ គរុំ កត្វា រាគោ ឧប្បជ្ជតិ…បេ…. សហជាតាធិបតិ – ឧប្បន្នា អធិបតិ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ អធិបតិបច្ចយេន បច្ចយោ. (១)

អនុប្បន្នោ ធម្មោ ឧប្បន្នស្ស ធម្មស្ស អធិបតិបច្ចយេន បច្ចយោ. អារម្មណាធិបតិ – អនុប្បន្នេ រូបេ… សទ្ទេ… គន្ធេ… រសេ… ផោដ្ឋព្ពេ… អនុប្បន្នេ ខន្ធេ គរុំ កត្វា អស្សាទេតិ អភិនន្ទតិ, តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ. (១)

ឧប្បាទី ធម្មោ ឧប្បន្នស្ស ធម្មស្ស អធិបតិបច្ចយេន បច្ចយោ. អារម្មណាធិបតិ – ឧប្បាទិំ ចក្ខុំ…បេ… កាយំ… រូបេ…បេ… ផោដ្ឋព្ពេ… វត្ថុំ… ឧប្បាទី ខន្ធេ គរុំ កត្វា អស្សាទេតិ អភិនន្ទតិ, តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ. (១)

សហជាតបច្ចយោ

៦. ឧប្បន្នោ ធម្មោ ឧប្បន្នស្ស ធម្មស្ស សហជាតបច្ចយេន បច្ចយោ – ឧប្បន្នោ ឯកោ ខន្ធោ តិណ្ណន្នំ ខន្ធានំ ចិត្តសមុដ្ឋានានញ្ច រូបានំ សហជាតបច្ចយេន បច្ចយោ…បេ… ទ្វេ ខន្ធា ទ្វិន្នំ ខន្ធានំ ចិត្តសមុដ្ឋានានញ្ច រូបានំ សហជាតបច្ចយេន បច្ចយោ. បដិសន្ធិក្ខណេ ឧប្បន្នោ ឯកោ ខន្ធោ តិណ្ណន្នំ ខន្ធានំ កដត្តា ច រូបានំ សហជាតបច្ចយេន បច្ចយោ…បេ… ទ្វេ ខន្ធា ទ្វិន្នំ ខន្ធានំ កដត្តា ច រូបានំ សហជាតបច្ចយេន បច្ចយោ. ខន្ធា វត្ថុស្ស សហជាតបច្ចយេន បច្ចយោ. វត្ថុ ខន្ធានំ សហជាតបច្ចយេន បច្ចយោ. ឯកំ មហាភូតំ តិណ្ណន្នំ មហាភូតានំ សហជាតបច្ចយេន បច្ចយោ…បេ… ទ្វេ មហាភូតា…បេ… មហាភូតា ចិត្តសមុដ្ឋានានំ រូបានំ កដត្តារូបានំ ឧបាទារូបានំ សហជាតបច្ចយេន បច្ចយោ. ពាហិរំ… អាហារសមុដ្ឋានំ… ឧតុសមុដ្ឋានំ… អសញ្ញសត្តានំ ឯកំ មហាភូតំ…បេ… ទ្វេ មហាភូតា…បេ… មហាភូតា កដត្តារូបានំ ឧបាទារូបានំ សហជាតបច្ចយេន បច្ចយោ. (១)

អញ្ញមញ្ញបច្ចយោ

៧. ឧប្បន្នោ ធម្មោ ឧប្បន្នស្ស ធម្មស្ស អញ្ញមញ្ញបច្ចយេន បច្ចយោ – ឧប្បន្នោ ឯកោ ខន្ធោ តិណ្ណន្នំ ខន្ធានំ អញ្ញមញ្ញបច្ចយេន បច្ចយោ…បេ… ទ្វេ ខន្ធា…បេ… បដិសន្ធិក្ខណេ ឧប្បន្នោ ឯកោ ខន្ធោ តិណ្ណន្នំ ខន្ធានំ វត្ថុស្ស ច អញ្ញមញ្ញបច្ចយេន បច្ចយោ. ទ្វេ ខន្ធា…បេ… ខន្ធា វត្ថុស្ស អញ្ញមញ្ញបច្ចយេន បច្ចយោ. វត្ថុ ខន្ធានំ អញ្ញមញ្ញបច្ចយេន បច្ចយោ. ឯកំ មហាភូតំ…បេ… ពាហិរំ… អាហារសមុដ្ឋានំ… ឧតុសមុដ្ឋានំ… អសញ្ញសត្តានំ ឯកំ មហាភូតំ តិណ្ណន្នំ មហាភូតានំ អញ្ញមញ្ញបច្ចយេន បច្ចយោ…បេ… ទ្វេ មហាភូតា…បេ…. (១)

និស្សយបច្ចយោ

៨. ឧប្បន្នោ ធម្មោ ឧប្បន្នស្ស ធម្មស្ស និស្សយបច្ចយេន បច្ចយោ – ឧប្បន្នោ ឯកោ ខន្ធោ តិណ្ណន្នំ ខន្ធានំ ចិត្តសមុដ្ឋានានញ្ច រូបានំ និស្សយបច្ចយេន បច្ចយោ…បេ… ទ្វេ ខន្ធា…បេ… បដិសន្ធិក្ខណេ…បេ… ខន្ធា វត្ថុស្ស…បេ… វត្ថុ ខន្ធានំ…បេ… ឯកំ មហាភូតំ…បេ… ពាហិរំ… អាហារសមុដ្ឋានំ… ឧតុសមុដ្ឋានំ… អសញ្ញសត្តានំ ឯកំ មហាភូតំ…បេ… មហាភូតា ចិត្តសមុដ្ឋានានំ រូបានំ កដត្តារូបានំ ឧបាទារូបានំ ចក្ខាយតនំ ចក្ខុវិញ្ញាណស្ស…បេ… កាយាយតនំ កាយវិញ្ញាណស្ស…បេ… វត្ថុ ឧប្បន្នានំ ខន្ធានំ និស្សយបច្ចយេន បច្ចយោ. (១)

ឧបនិស្សយបច្ចយោ

៩. ឧប្បន្នោ ធម្មោ ឧប្បន្នស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, បកតូបនិស្សយោ…បេ… បកតូបនិស្សយោ – ឧប្បន្នំ ឧតុំ ឧបនិស្សាយ ឈានំ ឧប្បាទេតិ, វិបស្សនំ…បេ… មគ្គំ…បេ… អភិញ្ញំ…បេ… សមាបត្តិំ ឧប្បាទេតិ, មានំ ជប្បេតិ, ទិដ្ឋិំ គណ្ហាតិ. ឧប្បន្នំ ភោជនំ…បេ… សេនាសនំ ឧបនិស្សាយ ឈានំ ឧប្បាទេតិ វិបស្សនំ…បេ… មគ្គំ…បេ… អភិញ្ញំ…បេ… សមាបត្តិំ ឧប្បាទេតិ, មានំ ជប្បេតិ, ទិដ្ឋិំ គណ្ហាតិ. ឧប្បន្នំ ឧតុ… ភោជនំ… សេនាសនំ ឧប្បន្នាយ សទ្ធាយ…បេ… បញ្ញាយ, កាយិកស្ស សុខស្ស, កាយិកស្ស ទុក្ខស្ស, មគ្គស្ស, ផលសមាបត្តិយា ឧបនិស្សយបច្ចយេន បច្ចយោ. (១)

អនុប្បន្នោ ធម្មោ ឧប្បន្នស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, បកតូបនិស្សយោ…បេ…. បកតូបនិស្សយោ – អនុប្បន្នំ វណ្ណសម្បទំ បត្ថយមានោ ទានំ ទេតិ, សីលំ សមាទិយតិ, ឧបោសថកម្មំ ករោតិ. អនុប្បន្នំ សទ្ទសម្បទំ… គន្ធសម្បទំ… រសសម្បទំ… ផោដ្ឋព្ពសម្បទំ… អនុប្បន្នេ ខន្ធេ បត្ថយមានោ ទានំ ទេតិ, សីលំ សមាទិយតិ, ឧបោសថកម្មំ ករោតិ. អនុប្បន្នា វណ្ណសម្បទា…បេ… អនុប្បន្នា ខន្ធា ឧប្បន្នាយ សទ្ធាយ…បេ… បញ្ញាយ, កាយិកស្ស សុខស្ស, កាយិកស្ស ទុក្ខស្ស, មគ្គស្ស, ផលសមាបត្តិយា ឧបនិស្សយបច្ចយេន បច្ចយោ. (១)

ឧប្បាទី ធម្មោ ឧប្បន្នស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, បកតូបនិស្សយោ…បេ…. បកតូបនិស្សយោ – ឧប្បាទិំ ចក្ខុសម្បទំ បត្ថយមានោ ទានំ ទេតិ, សីលំ សមាទិយតិ, ឧបោសថកម្មំ ករោតិ. ឧប្បាទិំ សោតសម្បទំ…បេ… កាយសម្បទំ…បេ… វណ្ណសម្បទំ … គន្ធសម្បទំ… រសសម្បទំ… ផោដ្ឋព្ពសម្បទំ… ឧប្បាទី ខន្ធេ បត្ថយមានោ ទានំ ទេតិ, សីលំ សមាទិយតិ, ឧបោសថកម្មំ ករោតិ. ឧប្បាទី ចក្ខុសម្បទា…បេ… កាយសម្បទា… វណ្ណសម្បទា…បេ… ផោដ្ឋព្ពសម្បទា… ឧប្បាទី ខន្ធា ឧប្បន្នាយ សទ្ធាយ…បេ… បញ្ញាយ, កាយិកស្ស សុខស្ស, កាយិកស្ស ទុក្ខស្ស, មគ្គស្ស, ផលសមាបត្តិយា ឧបនិស្សយបច្ចយេន បច្ចយោ. (១)

បុរេជាតបច្ចយោ

១០. ឧប្បន្នោ ធម្មោ ឧប្បន្នស្ស ធម្មស្ស បុរេជាតបច្ចយេន បច្ចយោ – អារម្មណបុរេជាតំ, វត្ថុបុរេជាតំ. អារម្មណបុរេជាតំ – ចក្ខុំ…បេ… វត្ថុំ អនិច្ចតោ ទុក្ខតោ អនត្តតោ វិបស្សតិ, អស្សាទេតិ អភិនន្ទតិ, តំ អារព្ភ រាគោ ឧប្បជ្ជតិ…បេ… ទោមនស្សំ ឧប្បជ្ជតិ ទិព្ពេន ចក្ខុនា រូបំ បស្សតិ, ទិព្ពាយ សោតធាតុយា សទ្ទំ សុណាតិ, រូបាយតនំ ចក្ខុវិញ្ញាណស្ស…បេ… ផោដ្ឋព្ពាយតនំ កាយវិញ្ញាណស្ស បុរេជាតបច្ចយេន បច្ចយោ. វត្ថុបុរេជាតំ – ចក្ខាយតនំ ចក្ខុវិញ្ញាណស្ស…បេ… វត្ថុ ឧប្បន្នានំ ខន្ធានំ បុរេជាតបច្ចយេន បច្ចយោ. (១)

បច្ឆាជាតបច្ចយោ

១១. ឧប្បន្នោ ធម្មោ ឧប្បន្នស្ស ធម្មស្ស បច្ឆាជាតបច្ចយេន បច្ចយោ – បច្ឆាជាតា ឧប្បន្នា ខន្ធា បុរេជាតស្ស ឥមស្ស កាយស្ស បច្ឆាជាតបច្ចយេន បច្ចយោ. (១)

កម្មបច្ចយោ

១២. ឧប្បន្នោ ធម្មោ ឧប្បន្នស្ស ធម្មស្ស កម្មបច្ចយេន បច្ចយោ – ឧប្បន្នា ចេតនា សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ កម្មបច្ចយេន បច្ចយោ. បដិសន្ធិក្ខណេ ឧប្បន្នា ចេតនា សម្បយុត្តកានំ ខន្ធានំ កដត្តា ច រូបានំ កម្មបច្ចយេន បច្ចយោ. (១)

វិបាកបច្ចយោ

១៣. ឧប្បន្នោ ធម្មោ ឧប្បន្នស្ស ធម្មស្ស វិបាកបច្ចយេន បច្ចយោ – វិបាកោ ឧប្បន្នោ ឯកោ ខន្ធោ តិណ្ណន្នំ ខន្ធានំ ចិត្តសមុដ្ឋានានញ្ច រូបានំ វិបាកបច្ចយេន បច្ចយោ…បេ… ទ្វេ ខន្ធា…បេ… បដិសន្ធិក្ខណេ ឧប្បន្នោ ឯកោ ខន្ធោ តិណ្ណន្នំ ខន្ធានំ កដត្តា ច រូបានំ…បេ… ទ្វេ ខន្ធា…បេ… ខន្ធា វត្ថុស្ស វិបាកបច្ចយេន បច្ចយោ. (១)

អាហារបច្ចយោ

១៤. ឧប្បន្នោ ធម្មោ ឧប្បន្នស្ស ធម្មស្ស អាហារបច្ចយេន បច្ចយោ – ឧប្បន្នា អាហារា សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ អាហារបច្ចយេន បច្ចយោ. បដិសន្ធិក្ខណេ…បេ… កពឡីការោ អាហារោ ឥមស្ស កាយស្ស អាហារបច្ចយេន បច្ចយោ. (១)

ឥន្ទ្រិយបច្ចយោ

១៥. ឧប្បន្នោ ធម្មោ ឧប្បន្នស្ស ធម្មស្ស ឥន្ទ្រិយបច្ចយេន បច្ចយោ – ឧប្បន្នា ឥន្ទ្រិយា សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ ឥន្ទ្រិយបច្ចយេន បច្ចយោ. បដិសន្ធិក្ខណេ…បេ… ចក្ខុន្ទ្រិយំ ចក្ខុវិញ្ញាណស្ស…បេ… កាយិន្ទ្រិយំ កាយវិញ្ញាណស្ស…បេ… រូបជីវិតិន្ទ្រិយំ កដត្តារូបានំ ឥន្ទ្រិយបច្ចយេន បច្ចយោ. (១)

ឈានបច្ចយាទិ

១៦. ឧប្បន្នោ ធម្មោ ឧប្បន្នស្ស ធម្មស្ស ឈានបច្ចយេន បច្ចយោ… មគ្គបច្ចយេន បច្ចយោ… សម្បយុត្តបច្ចយេន បច្ចយោ… វិប្បយុត្តបច្ចយេន បច្ចយោ – សហជាតំ, បុរេជាតំ, បច្ឆាជាតំ. សហជាតា – ឧប្បន្នា ខន្ធា ចិត្តសមុដ្ឋានានំ រូបានំ វិប្បយុត្តបច្ចយេន បច្ចយោ. បដិសន្ធិក្ខណេ ឧប្បន្នា ខន្ធា កដត្តារូបានំ វិប្បយុត្តបច្ចយេន បច្ចយោ. ខន្ធា វត្ថុស្ស, វត្ថុ ខន្ធានំ វិប្បយុត្តបច្ចយេន បច្ចយោ. បុរេជាតំ – ចក្ខាយតនំ ចក្ខុវិញ្ញាណស្ស …បេ… កាយាយតនំ កាយវិញ្ញាណស្ស… វត្ថុ ឧប្បន្នានំ ខន្ធានំ វិប្បយុត្តបច្ចយេន បច្ចយោ. បច្ឆាជាតា – ឧប្បន្នា ខន្ធា បុរេជាតស្ស ឥមស្ស កាយស្ស វិប្បយុត្តបច្ចយេន បច្ចយោ. (១)

អត្ថិបច្ចយោ

១៧. ឧប្បន្នោ ធម្មោ ឧប្បន្នស្ស ធម្មស្ស អត្ថិបច្ចយេន បច្ចយោ – សហជាតំ, បុរេជាតំ, បច្ឆាជាតំ, អាហារំ, ឥន្ទ្រិយំ. សហជាតោ – ឧប្បន្នោ ឯកោ ខន្ធោ តិណ្ណន្នំ ខន្ធានំ ចិត្តសមុដ្ឋានានញ្ច រូបានំ អត្ថិបច្ចយេន បច្ចយោ…បេ… ទ្វេ ខន្ធា…បេ… បដិសន្ធិក្ខណេ…បេ… ឯកំ មហាភូតំ…បេ… ពាហិរំ… អាហារសមុដ្ឋានំ… ឧតុសមុដ្ឋានំ… អសញ្ញសត្តានំ…បេ…. បុរេជាតំ – ចក្ខុំ អនិច្ចតោ…បេ… វត្ថុំ អនិច្ចតោ…បេ… ទោមនស្សំ ឧប្បជ្ជតិ, ទិព្ពេន ចក្ខុនា រូបំ បស្សតិ, ទិព្ពាយ សោតុធាតុយា សទ្ទំ សុណាតិ, រូបាយតនំ ចក្ខុវិញ្ញាណស្ស…បេ… ផោដ្ឋព្ពាយតនំ កាយវិញ្ញាណស្ស អត្ថិបច្ចយេន បច្ចយោ. ចក្ខាយតនំ ចក្ខុវិញ្ញាណស្ស…បេ… កាយាយតនំ កាយវិញ្ញាណស្ស…បេ… វត្ថុ ឧប្បន្នានំ ខន្ធានំ អត្ថិបច្ចយេន បច្ចយោ. បច្ឆាជាតា – ឧប្បន្នា ខន្ធា បុរេជាតស្ស ឥមស្ស កាយស្ស អត្ថិបច្ចយេន បច្ចយោ. កពឡីការោ អាហារោ ឥមស្ស កាយស្ស អត្ថិបច្ចយេន បច្ចយោ. រូបជីវិតិន្ទ្រិយំ កដត្តារូបានំ អត្ថិបច្ចយេន បច្ចយោ. (១)

អវិគតបច្ចយោ

១៨. ឧប្បន្នោ ធម្មោ ឧប្បន្នស្ស ធម្មស្ស អវិគតបច្ចយេន បច្ចយោ…បេ….