១. វិភង្គវារោ

ហេតុបច្ចយោ

២៧. មគ្គារម្មណោ ធម្មោ មគ្គារម្មណស្ស ធម្មស្ស ហេតុបច្ចយេន បច្ចយោ – មគ្គារម្មណា ហេតូ សម្បយុត្តកានំ ខន្ធានំ ហេតុបច្ចយេន បច្ចយោ. (១)

មគ្គារម្មណោ ធម្មោ មគ្គាធិបតិស្ស ធម្មស្ស ហេតុបច្ចយេន បច្ចយោ – មគ្គារម្មណា ហេតូ សម្បយុត្តកានំ មគ្គាធិបតីនំ ខន្ធានំ ហេតុបច្ចយេន បច្ចយោ. (២)

មគ្គារម្មណោ ធម្មោ មគ្គារម្មណស្ស ច មគ្គាធិបតិស្ស ច ធម្មស្ស ហេតុបច្ចយេន បច្ចយោ (ឥមិនា ការណេន សត្តរស បញ្ហា កាតព្ពា).

អារម្មណបច្ចយោ

២៨. មគ្គហេតុកោ ធម្មោ មគ្គារម្មណស្ស ធម្មស្ស អារម្មណបច្ចយេន បច្ចយោ – អរិយា មគ្គា វុដ្ឋហិត្វា មគ្គំ បច្ចវេក្ខន្តិ, ចេតោបរិយញាណេន មគ្គហេតុកចិត្តសមង្គិស្ស ចិត្តំ ជានន្តិ, មគ្គហេតុកា ខន្ធា ចេតោបរិយញាណស្ស, បុព្ពេនិវាសានុស្សតិញាណស្ស, អនាគតំសញាណស្ស, អាវជ្ជនាយ អារម្មណបច្ចយេន បច្ចយោ. (១)

មគ្គហេតុកោ ធម្មោ មគ្គាធិបតិស្ស ធម្មស្ស អារម្មណបច្ចយេន បច្ចយោ – អរិយា មគ្គា វុដ្ឋហិត្វា មគ្គំ គរុំ កត្វា បច្ចវេក្ខន្តិ. (២)

មគ្គហេតុកោ ធម្មោ មគ្គារម្មណស្ស ច មគ្គាធិបតិស្ស ច ធម្មស្ស អារម្មណបច្ចយេន បច្ចយោ – អរិយា មគ្គា វុដ្ឋហិត្វា មគ្គំ គរុំ កត្វា បច្ចវេក្ខន្តិ. (៣)

២៩. មគ្គាធិបតិ ធម្មោ មគ្គាធិបតិស្ស ធម្មស្ស អារម្មណបច្ចយេន បច្ចយោ – អរិយា មគ្គា វុដ្ឋហិត្វា មគ្គំ គរុំ កត្វា បច្ចវេក្ខន្តិ. (១)

មគ្គាធិបតិ ធម្មោ មគ្គារម្មណស្ស ធម្មស្ស អារម្មណបច្ចយេន បច្ចយោ – អរិយា មគ្គា វុដ្ឋហិត្វា មគ្គំ បច្ចវេក្ខន្តិ, ចេតោបរិយញាណេន មគ្គាធិបតិចិត្តសមង្គិស្ស ចិត្តំ ជានន្តិ, មគ្គាធិបតី ខន្ធា ចេតោបរិយញាណស្ស, បុព្ពេនិវាសានុស្សតិញាណស្ស, អនាគតំសញាណស្ស, អាវជ្ជនាយ អារម្មណបច្ចយេន បច្ចយោ. (២)

មគ្គាធិបតិ ធម្មោ មគ្គារម្មណស្ស ច មគ្គាធិបតិស្ស ច ធម្មស្ស អារម្មណបច្ចយេន បច្ចយោ – អរិយា មគ្គា វុដ្ឋហិត្វា មគ្គំ គរុំ កត្វា បច្ចវេក្ខន្តិ. (៣)

៣០. មគ្គហេតុកោ ច មគ្គាធិបតិ ច ធម្មា មគ្គារម្មណស្ស ធម្មស្ស អារម្មណបច្ចយេន បច្ចយោ – អរិយា មគ្គា វុដ្ឋហិត្វា មគ្គំ បច្ចវេក្ខន្តិ, ចេតោបរិយញាណេន មគ្គហេតុកមគ្គាធិបតិចិត្តសមង្គិស្ស ចិត្តំ ជានន្តិ, មគ្គហេតុកា ច មគ្គាធិបតី ច ខន្ធា ចេតោបរិយញាណស្ស, បុព្ពេនិវាសានុស្សតិញាណស្ស, អនាគតំសញាណស្ស, អាវជ្ជនាយ អារម្មណបច្ចយេន បច្ចយោ. (១)

មគ្គហេតុកោ ច មគ្គាធិបតិ ច ធម្មា មគ្គាធិបតិស្ស ធម្មស្ស អារម្មណបច្ចយេន បច្ចយោ – អរិយា មគ្គា វុដ្ឋហិត្វា មគ្គំ គរុំ កត្វា បច្ចវេក្ខន្តិ. (២)

មគ្គហេតុកោ ច មគ្គាធិបតិ ច ធម្មា មគ្គារម្មណស្ស ច មគ្គាធិបតិស្ស ច ធម្មស្ស អារម្មណបច្ចយេន បច្ចយោ – អរិយា មគ្គា វុដ្ឋហិត្វា មគ្គំ គរុំ កត្វា បច្ចវេក្ខន្តិ. (៣)

អធិបតិបច្ចយោ

៣១. មគ្គារម្មណោ ធម្មោ មគ្គារម្មណស្ស ធម្មស្ស អធិបតិបច្ចយេន បច្ចយោ. សហជាតាធិបតិ – មគ្គារម្មណាធិបតិ សម្បយុត្តកានំ ខន្ធានំ អធិបតិបច្ចយេន បច្ចយោ. (១)

មគ្គារម្មណោ ធម្មោ មគ្គាធិបតិស្ស ធម្មស្ស អធិបតិបច្ចយេន បច្ចយោ. សហជាតាធិបតិ – មគ្គារម្មណាធិបតិ សម្បយុត្តកានំ មគ្គាធិបតីនំ ខន្ធានំ អធិបតិបច្ចយេន បច្ចយោ. (២)

មគ្គារម្មណោ ធម្មោ មគ្គារម្មណស្ស ច មគ្គាធិបតិស្ស ច ធម្មស្ស អធិបតិបច្ចយេន បច្ចយោ. សហជាតាធិបតិ – មគ្គារម្មណាធិបតិ សម្បយុត្តកានំ មគ្គារម្មណានញ្ច មគ្គាធិបតីនញ្ច ខន្ធានំ អធិបតិបច្ចយេន បច្ចយោ. (៣)

៣២. មគ្គហេតុកោ ធម្មោ មគ្គហេតុកស្ស ធម្មស្ស អធិបតិបច្ចយេន បច្ចយោ. សហជាតាធិបតិ – មគ្គហេតុកាធិបតិ សម្បយុត្តកានំ ខន្ធានំ អធិបតិបច្ចយេន បច្ចយោ. (១)

មគ្គហេតុកោ ធម្មោ មគ្គារម្មណស្ស ធម្មស្ស អធិបតិបច្ចយេន បច្ចយោ. អារម្មណាធិបតិ – អរិយា មគ្គា វុដ្ឋហិត្វា មគ្គំ គរុំ កត្វា បច្ចវេក្ខន្តិ. (២)

មគ្គហេតុកោ ធម្មោ មគ្គាធិបតិស្ស ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – អរិយា មគ្គា វុដ្ឋហិត្វា មគ្គំ គរុំ កត្វា បច្ចវេក្ខន្តិ. សហជាតាធិបតិ – មគ្គហេតុកាធិបតិ សម្បយុត្តកានំ មគ្គាធិបតីនំ ខន្ធានំ អធិបតិបច្ចយេន បច្ចយោ. (៣)

មគ្គហេតុកោ ធម្មោ មគ្គារម្មណស្ស ច មគ្គាធិបតិស្ស ច ធម្មស្ស អធិបតិបច្ចយេន បច្ចយោ. អារម្មណាធិបតិ – អរិយា មគ្គា វុដ្ឋហិត្វា មគ្គំ គរុំ កត្វា បច្ចវេក្ខន្តិ. (៤)

មគ្គហេតុកោ ធម្មោ មគ្គហេតុកស្ស ច មគ្គាធិបតិស្ស ច ធម្មស្ស អធិបតិបច្ចយេន បច្ចយោ. សហជាតាធិបតិ – មគ្គហេតុកាធិបតិ សម្បយុត្តកានំ មគ្គហេតុកានញ្ច មគ្គាធិបតីនញ្ច ខន្ធានំ អធិបតិបច្ចយេន បច្ចយោ. (៥)

៣៣. មគ្គាធិបតិ ធម្មោ មគ្គាធិបតិស្ស ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – អរិយា មគ្គា វុដ្ឋហិត្វា មគ្គំ គរុំ កត្វា បច្ចវេក្ខន្តិ. សហជាតាធិបតិ – មគ្គាធិបតិ អធិបតិ សម្បយុត្តកានំ ខន្ធានំ អធិបតិបច្ចយេន បច្ចយោ. (១)

មគ្គាធិបតិ ធម្មោ មគ្គារម្មណស្ស ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – អរិយា មគ្គា វុដ្ឋហិត្វា មគ្គំ គរុំ កត្វា បច្ចវេក្ខន្តិ. សហជាតាធិបតិ – មគ្គាធិបតិ អធិបតិ សម្បយុត្តកានំ មគ្គារម្មណានំ ខន្ធានំ អធិបតិបច្ចយេន បច្ចយោ. (២)

មគ្គាធិបតិ ធម្មោ មគ្គហេតុកស្ស ធម្មស្ស អធិបតិបច្ចយេន បច្ចយោ. សហជាតាធិបតិ – មគ្គាធិបតិ អធិបតិ សម្បយុត្តកានំ មគ្គហេតុកានំ ខន្ធានំ អធិបតិបច្ចយេន បច្ចយោ. (៣)

មគ្គាធិបតិ ធម្មោ មគ្គារម្មណស្ស ច មគ្គាធិបតិស្ស ច អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – អរិយា មគ្គា វុដ្ឋហិត្វា មគ្គំ គរុំ កត្វា បច្ចវេក្ខន្តិ. សហជាតាធិបតិ – មគ្គាធិបតិ អធិបតិ សម្បយុត្តកានំ មគ្គារម្មណានញ្ច មគ្គាធិបតីនញ្ច ខន្ធានំ អធិបតិបច្ចយេន បច្ចយោ. (៤)

មគ្គាធិបតិ ធម្មោ មគ្គហេតុកស្ស ច មគ្គាធិបតិស្ស ច ធម្មស្ស អធិបតិបច្ចយេន បច្ចយោ. សហជាតាធិបតិ – មគ្គាធិបតិ អធិបតិ សម្បយុត្តកានំ មគ្គាហេតុកានញ្ច មគ្គាធិបតីនញ្ច ខន្ធានំ អធិបតិបច្ចយេន បច្ចយោ. (៥)

៣៤. មគ្គារម្មណោ ច មគ្គាធិបតិ ច ធម្មា មគ្គារម្មណស្ស ធម្មស្ស អធិបតិបច្ចយេន បច្ចយោ. សហជាតាធិបតិ – មគ្គារម្មណា ច មគ្គាធិបតី ច អធិបតិ សម្បយុត្តកានំ មគ្គារម្មណានំ ខន្ធានំ អធិបតិបច្ចយេន បច្ចយោ. (១)

មគ្គារម្មណោ ច មគ្គាធិបតិ ច ធម្មា មគ្គាធិបតិស្ស ធម្មស្ស អធិបតិបច្ចយេន បច្ចយោ. សហជាតាធិបតិ – មគ្គារម្មណា ច មគ្គាធិបតី ច អធិបតិ សម្បយុត្តកានំ មគ្គាធិបតីនំ ខន្ធានំ អធិបតិបច្ចយេន បច្ចយោ. (២)

មគ្គារម្មណោ ច មគ្គាធិបតិ ច ធម្មា មគ្គារម្មណស្ស ច មគ្គាធិបតិស្ស ច ធម្មស្ស អធិបតិបច្ចយេន បច្ចយោ. សហជាតាធិបតិ – មគ្គារម្មណា ច មគ្គាធិបតី ច អធិបតិ សម្បយុត្តកានំ មគ្គារម្មណានញ្ច មគ្គាធិបតីនញ្ច ខន្ធានំ អធិបតិបច្ចយេន បច្ចយោ. (៣)

៣៥. មគ្គហេតុកោ ច មគ្គាធិបតិ ច ធម្មា មគ្គារម្មណស្ស ធម្មស្ស អធិបតិបច្ចយេន បច្ចយោ. អារម្មណាធិបតិ – អរិយា មគ្គា វុដ្ឋហិត្វា មគ្គំ គរុំ កត្វា បច្ចវេក្ខន្តិ. (១)

មគ្គហេតុកោ ច មគ្គាធិបតិ ច ធម្មា មគ្គហេតុកស្ស ធម្មស្ស អធិបតិបច្ចយេន បច្ចយោ. សហជាតាធិបតិ – មគ្គហេតុកា ច មគ្គាធិបតី ច អធិបតិ សម្បយុត្តកានំ មគ្គហេតុកានំ ខន្ធានំ អធិបតិបច្ចយេន បច្ចយោ. (២)

មគ្គហេតុកោ ច មគ្គាធិបតិ ច ធម្មា មគ្គាធិបតិស្ស ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – អរិយា មគ្គា វុដ្ឋហិត្វា មគ្គំ គរុំ កត្វា បច្ចវេក្ខន្តិ. សហជាតាធិបតិ – មគ្គហេតុកា ច មគ្គាធិបតី ច អធិបតិ សម្បយុត្តកានំ មគ្គាធិបតីនំ ខន្ធានំ អធិបតិបច្ចយេន បច្ចយោ. (៣)

មគ្គហេតុកោ ច មគ្គាធិបតិ ច ធម្មា មគ្គារម្មណស្ស ច មគ្គាធិបតិស្ស ច ធម្មស្ស អធិបតិបច្ចយេន បច្ចយោ. អារម្មណាធិបតិ – អរិយា មគ្គា វុដ្ឋហិត្វា មគ្គំ គរុំ កត្វា បច្ចវេក្ខន្តិ. (៤)

មគ្គហេតុកោ ច មគ្គាធិបតិ ច ធម្មា មគ្គហេតុកស្ស ច មគ្គាធិបតិស្ស ច ធម្មស្ស អធិបតិបច្ចយេន បច្ចយោ. សហជាតាធិបតិ – មគ្គហេតុកា ច មគ្គាធិបតី ច អធិបតិ សម្បយុត្តកានំ មគ្គហេតុកានញ្ច មគ្គាធិបតីនញ្ច ខន្ធានំ អធិបតិបច្ចយេន បច្ចយោ. (៥)

អនន្តរបច្ចយោ

៣៦. មគ្គារម្មណោ ធម្មោ មគ្គារម្មណស្ស ធម្មស្ស អនន្តរបច្ចយេន បច្ចយោ – បុរិមា បុរិមា មគ្គារម្មណា ខន្ធា បច្ឆិមានំ បច្ឆិមានំ មគ្គារម្មណានំ ខន្ធានំ អនន្តរបច្ចយេន បច្ចយោ. អាវជ្ជនា មគ្គារម្មណានំ ខន្ធានំ អនន្តរបច្ចយេន បច្ចយោ. (១)

មគ្គារម្មណោ ធម្មោ មគ្គាធិបតិស្ស ធម្មស្ស អនន្តរបច្ចយេន បច្ចយោ – បុរិមា បុរិមា មគ្គារម្មណា ខន្ធា បច្ឆិមានំ បច្ឆិមានំ មគ្គាធិបតីនំ ខន្ធានំ អនន្តរបច្ចយេន បច្ចយោ. អាវជ្ជនា មគ្គាធិបតីនំ ខន្ធានំ អនន្តរបច្ចយេន បច្ចយោ. (២)

មគ្គារម្មណោ ធម្មោ មគ្គារម្មណស្ស ច មគ្គាធិបតិស្ស ច ធម្មស្ស អនន្តរបច្ចយេន បច្ចយោ – បុរិមា បុរិមា មគ្គារម្មណា ខន្ធា បច្ឆិមានំ បច្ឆិមានំ មគ្គារម្មណានញ្ច មគ្គាធិបតីនញ្ច ខន្ធានំ អនន្តរបច្ចយេន បច្ចយោ. អាវជ្ជនា មគ្គារម្មណានញ្ច មគ្គាធិបតីនញ្ច ខន្ធានំ អនន្តរបច្ចយេន បច្ចយោ. (៣)

៣៧. មគ្គាធិបតិ ធម្មោ មគ្គាធិបតិស្ស ធម្មស្ស អនន្តរបច្ចយេន បច្ចយោ – បុរិមា បុរិមា មគ្គាធិបតី ខន្ធា បច្ឆិមានំ បច្ឆិមានំ មគ្គាធិបតីនំ ខន្ធានំ អនន្តរបច្ចយេន បច្ចយោ. (១)

មគ្គាធិបតិ ធម្មោ មគ្គារម្មណស្ស ធម្មស្ស អនន្តរបច្ចយេន បច្ចយោ – បុរិមា បុរិមា មគ្គាធិបតី ខន្ធា បច្ឆិមានំ បច្ឆិមានំ មគ្គារម្មណានំ ខន្ធានំ អនន្តរបច្ចយេន បច្ចយោ. (២)

មគ្គាធិបតិ ធម្មោ មគ្គារម្មណស្ស ច មគ្គាធិបតិស្ស ច ធម្មស្ស អនន្តរបច្ចយេន បច្ចយោ – បុរិមា បុរិមា មគ្គាធិបតី ខន្ធា បច្ឆិមានំ បច្ឆិមានំ មគ្គារម្មណានញ្ច មគ្គាធិបតីនញ្ច ខន្ធានំ អនន្តរបច្ចយេន បច្ចយោ. (៣)

៣៨. មគ្គារម្មណោ ច មគ្គាធិបតិ ច ធម្មា មគ្គារម្មណស្ស ធម្មស្ស អនន្តរបច្ចយេន បច្ចយោ – បុរិមា បុរិមា មគ្គារម្មណា ច មគ្គាធិបតី ច ខន្ធា បច្ឆិមានំ បច្ឆិមានំ មគ្គារម្មណានំ ខន្ធានំ អនន្តរបច្ចយេន បច្ចយោ. (១)

មគ្គារម្មណោ ច មគ្គាធិបតិ ច ធម្មា មគ្គាធិបតិស្ស ធម្មស្ស អនន្តរបច្ចយេន បច្ចយោ – បុរិមា បុរិមា មគ្គារម្មណា ច មគ្គាធិបតី ច ខន្ធា បច្ឆិមានំ បច្ឆិមានំ មគ្គាធិបតីនំ ខន្ធានំ អនន្តរបច្ចយេន បច្ចយោ. (២)

មគ្គារម្មណោ ច មគ្គាធិបតិ ច ធម្មា មគ្គារម្មណស្ស ច មគ្គាធិបតិស្ស ច ធម្មស្ស អនន្តរបច្ចយេន បច្ចយោ – បុរិមា បុរិមា មគ្គារម្មណា ច មគ្គាធិបតី ច ខន្ធា បច្ឆិមានំ បច្ឆិមានំ មគ្គារម្មណានញ្ច មគ្គាធិបតីនញ្ច ខន្ធានំ អនន្តរបច្ចយេន បច្ចយោ. (៣)

សមនន្តរបច្ចយាទិ

៣៩. មគ្គារម្មណោ ធម្មោ មគ្គារម្មណស្ស ធម្មស្ស សមនន្តរបច្ចយេន បច្ចយោ…បេ… (អនន្តរសទិសំ) សហជាតបច្ចយេន បច្ចយោ… អញ្ញមញ្ញបច្ចយេន បច្ចយោ… និស្សយបច្ចយេន បច្ចយោ… (តីសុបិ សត្តរស បញ្ហា កាតព្ពា).

ឧបនិស្សយបច្ចយោ

៤០. មគ្គារម្មណោ ធម្មោ មគ្គារម្មណស្ស ធម្មស្ស ឧបនិស្សយបច្ចយេន បច្ចយោ – អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – បច្ចវេក្ខណា បច្ចវេក្ខណាយ ឧបនិស្សយបច្ចយេន បច្ចយោ. (១)

មគ្គារម្មណោ ធម្មោ មគ្គាធិបតិស្ស ធម្មស្ស ឧបនិស្សយបច្ចយេន បច្ចយោ – អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – បច្ចវេក្ខណា បច្ចវេក្ខណាយ ឧបនិស្សយបច្ចយេន បច្ចយោ. (២)

មគ្គារម្មណោ ធម្មោ មគ្គារម្មណស្ស ច មគ្គាធិបតិស្ស ច ធម្មស្ស ឧបនិស្សយបច្ចយេន បច្ចយោ – អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – បច្ចវេក្ខណា បច្ចវេក្ខណាយ ឧបនិស្សយបច្ចយេន បច្ចយោ. (៣)

៤១. មគ្គហេតុកោ ធម្មោ មគ្គហេតុកស្ស ធម្មស្ស ឧបនិស្សយបច្ចយេន បច្ចយោ. បកតូបនិស្សយោ – បឋមោ មគ្គោ ទុតិយស្ស មគ្គស្ស ឧបនិស្សយបច្ចយេន បច្ចយោ…បេ… តតិយោ មគ្គោ ចតុត្ថស្ស មគ្គស្ស ឧបនិស្សយបច្ចយេន បច្ចយោ. (១)

មគ្គហេតុកោ ធម្មោ មគ្គារម្មណស្ស ធម្មស្ស ឧបនិស្សយបច្ចយេន បច្ចយោ. អារម្មណូបនិស្សយោ – អរិយា មគ្គា វុដ្ឋហិត្វា មគ្គំ គរុំ កត្វា បច្ចវេក្ខន្តិ. (២)

មគ្គហេតុកោ ធម្មោ មគ្គាធិបតិស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, បកតូបនិស្សយោ…បេ…. បកតូបនិស្សយោ – បឋមោ មគ្គោ ទុតិយស្ស មគ្គស្ស…បេ… តតិយោ មគ្គោ ចតុត្ថស្ស មគ្គស្ស ឧបនិស្សយបច្ចយេន បច្ចយោ. (៣)

មគ្គហេតុកោ ធម្មោ មគ្គារម្មណស្ស ច មគ្គាធិបតិស្ស ច ធម្មស្ស ឧបនិស្សយបច្ចយេន បច្ចយោ. អារម្មណូបនិស្សយោ – អរិយា មគ្គា វុដ្ឋហិត្វា មគ្គំ គរុំ កត្វា បច្ចវេក្ខន្តិ. (៤)

មគ្គហេតុកោ ធម្មោ មគ្គហេតុកស្ស ច មគ្គាធិបតិស្ស ច ធម្មស្ស ឧបនិស្សយបច្ចយេន បច្ចយោ. បកតូបនិស្សយោ – បឋមោ មគ្គោ ទុតិយស្ស មគ្គស្ស…បេ… តតិយោ មគ្គោ ចតុត្ថស្ស មគ្គស្ស ឧបនិស្សយបច្ចយេន បច្ចយោ. (៥)

៤២. មគ្គាធិបតិ ធម្មោ មគ្គាធិបតិស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – បឋមោ មគ្គោ ទុតិយស្ស មគ្គស្ស…បេ… តតិយោ មគ្គោ ចតុត្ថស្ស មគ្គស្ស ឧបនិស្សយបច្ចយេន បច្ចយោ; បច្ចវេក្ខណា បច្ចវេក្ខណាយ ឧបនិស្សយបច្ចយេន បច្ចយោ. (១)

មគ្គាធិបតិ ធម្មោ មគ្គារម្មណស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – បច្ចវេក្ខណា បច្ចវេក្ខណាយ ឧបនិស្សយបច្ចយេន បច្ចយោ. (២)

មគ្គាធិបតិ ធម្មោ មគ្គហេតុកស្ស ធម្មស្ស ឧបនិស្សយបច្ចយេន បច្ចយោ. បកតូបនិស្សយោ – បឋមោ មគ្គោ ទុតិយស្ស មគ្គស្ស…បេ… តតិយោ មគ្គោ ចតុត្ថស្ស មគ្គស្ស ឧបនិស្សយបច្ចយេន បច្ចយោ. (៣)

មគ្គាធិបតិ ធម្មោ មគ្គារម្មណស្ស ច មគ្គាធិបតិស្ស ច ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – បច្ចវេក្ខណា បច្ចវេក្ខណាយ ឧបនិស្សយបច្ចយេន បច្ចយោ. (៤)

មគ្គាធិបតិ ធម្មោ មគ្គហេតុកស្ស ច មគ្គាធិបតិស្ស ច ធម្មស្ស ឧបនិស្សយបច្ចយេន បច្ចយោ. បកតូបនិស្សយោ – បឋមោ មគ្គោ ទុតិយស្ស មគ្គស្ស…បេ… តតិយោ មគ្គោ ចតុត្ថស្ស មគ្គស្ស ឧបនិស្សយបច្ចយេន បច្ចយោ. (៥)

៤៣. មគ្គារម្មណោ ច មគ្គាធិបតិ ច ធម្មា មគ្គារម្មណស្ស ធម្មស្ស ឧបនិស្សយបច្ចយេន បច្ចយោ – អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – បច្ចវេក្ខណា បច្ចវេក្ខណាយ ឧបនិស្សយបច្ចយេន បច្ចយោ. (១)

មគ្គារម្មណោ ច មគ្គាធិបតិ ច ធម្មា មគ្គាធិបតិស្ស ធម្មស្ស ឧបនិស្សយបច្ចយេន បច្ចយោ – អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – បច្ចវេក្ខណា បច្ចវេក្ខណាយ ឧបនិស្សយបច្ចយេន បច្ចយោ. (២)

មគ្គារម្មណោ ច មគ្គាធិបតិ ច ធម្មា មគ្គារម្មណស្ស ច មគ្គាធិបតិស្ស ច ធម្មស្ស ឧបនិស្សយបច្ចយេន បច្ចយោ – អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – បច្ចវេក្ខណា បច្ចវេក្ខណាយ ឧបនិស្សយបច្ចយេន បច្ចយោ. (៣)

៤៤. មគ្គហេតុកោ ច មគ្គាធិបតិ ច ធម្មា មគ្គារម្មណស្ស ធម្មស្ស ឧបនិស្សយបច្ចយេន បច្ចយោ. អារម្មណូបនិស្សយោ – អរិយា មគ្គា វុដ្ឋហិត្វា មគ្គំ គរុំ កត្វា បច្ចវេក្ខន្តិ. (១)

មគ្គហេតុកោ ច មគ្គាធិបតិ ច ធម្មា មគ្គហេតុកស្ស ធម្មស្ស ឧបនិស្សយបច្ចយេន បច្ចយោ. បកតូបនិស្សយោ – បឋមោ មគ្គោ ទុតិយស្ស មគ្គស្ស…បេ… តតិយោ មគ្គោ ចតុត្ថស្ស មគ្គស្ស ឧបនិស្សយបច្ចយេន បច្ចយោ. (២)

មគ្គហេតុកោ ច មគ្គាធិបតិ ច ធម្មា មគ្គាធិបតិស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, បកតូបនិស្សយោ…បេ…. បកតូបនិស្សយោ – បឋមោ មគ្គោ ទុតិយស្ស មគ្គស្ស…បេ… តតិយោ មគ្គោ ចតុត្ថស្ស មគ្គស្ស ឧបនិស្សយបច្ចយេន បច្ចយោ. (៣)

មគ្គហេតុកោ ច មគ្គាធិបតិ ច ធម្មា មគ្គារម្មណស្ស ច មគ្គាធិបតិស្ស ច ធម្មស្ស ឧបនិស្សយបច្ចយេន បច្ចយោ. អារម្មណូបនិស្សយោ – អរិយា មគ្គា វុដ្ឋហិត្វា មគ្គំ គរុំ កត្វា បច្ចវេក្ខន្តិ. (៤)

មគ្គហេតុកោ ច មគ្គាធិបតិ ច ធម្មា មគ្គហេតុកស្ស ច មគ្គាធិបតិស្ស ច ធម្មស្ស ឧបនិស្សយបច្ចយេន បច្ចយោ. បកតូបនិស្សយោ – បឋមោ មគ្គោ ទុតិយស្ស មគ្គស្ស…បេ… តតិយោ មគ្គោ ចតុត្ថស្ស មគ្គស្ស ឧបនិស្សយបច្ចយេន បច្ចយោ. (៥)

អាសេវនបច្ចយោ

៤៥. មគ្គារម្មណោ ធម្មោ មគ្គារម្មណស្ស ធម្មស្ស អាសេវនបច្ចយេន បច្ចយោ – បុរិមា បុរិមា មគ្គារម្មណា ខន្ធា បច្ឆិមានំ បច្ឆិមានំ មគ្គារម្មណានំ ខន្ធានំ អាសេវនបច្ចយេន បច្ចយោ.

មគ្គារម្មណោ ធម្មោ មគ្គាធិបតិស្ស ធម្មស្ស អាសេវនបច្ចយេន បច្ចយោ (អនន្តរសទិសំ. នវ បញ្ហា កាតព្ពា, អាវជ្ជនា ន កាតព្ពា).

កម្មបច្ចយាទិ

៤៦. មគ្គារម្មណោ ធម្មោ មគ្គារម្មណស្ស ធម្មស្ស កម្មបច្ចយេន បច្ចយោ – សហជាតា…បេ… (នានាក្ខណិកា នត្ថិ, សត្តរស បញ្ហា កាតព្ពា).

អាហារបច្ចយាទិ

៤៧. មគ្គារម្មណោ ធម្មោ មគ្គារម្មណស្ស ធម្មស្ស អាហារបច្ចយេន បច្ចយោ… ឥន្ទ្រិយបច្ចយេន បច្ចយោ… ឈានបច្ចយេន បច្ចយោ… មគ្គបច្ចយេន បច្ចយោ… សម្បយុត្តបច្ចយេន បច្ចយោ… អត្ថិបច្ចយេន បច្ចយោ (ឥមេ សត្ត បច្ចយា សត្តរស បញ្ហា ហេតុសទិសា)… នត្ថិបច្ចយេន បច្ចយោ… វិគតបច្ចយេន បច្ចយោ (អនន្តរសទិសា)… អវិគតបច្ចយេន បច្ចយោ (សត្តរស បញ្ហា).