១. វិភង្គវារោ

ហេតុបច្ចយោ

៥៥. បរិត្តោ ធម្មោ បរិត្តស្ស ធម្មស្ស ហេតុបច្ចយេន បច្ចយោ – បរិត្តា ហេតូ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ ហេតុបច្ចយេន បច្ចយោ. បដិសន្ធិក្ខណេ…បេ…. (១)

មហគ្គតោ ធម្មោ មហគ្គតស្ស ធម្មស្ស ហេតុបច្ចយេន បច្ចយោ… តីណិ (បវត្តិបដិសន្ធិ កាតព្ពា).

អប្បមាណោ ធម្មោ អប្បមាណស្ស ធម្មស្ស ហេតុបច្ចយេន បច្ចយោ… តីណិ.

អារម្មណបច្ចយោ

៥៦. បរិត្តោ ធម្មោ បរិត្តស្ស ធម្មស្ស អារម្មណបច្ចយេន បច្ចយោ – ទានំ ទត្វា សីលំ សមាទិយិត្វា ឧបោសថកម្មំ កត្វា តំ បច្ចវេក្ខតិ, បុព្ពេ សុចិណ្ណានិ បច្ចវេក្ខតិ, អរិយា គោត្រភុំ បច្ចវេក្ខន្តិ, វោទានំ បច្ចវេក្ខន្តិ, បហីនេ កិលេសេ បច្ចវេក្ខន្តិ, វិក្ខម្ភិតេ កិលេសេ បច្ចវេក្ខន្តិ, បុព្ពេ សមុទាចិណ្ណេ កិលេសេ ជានន្តិ. ចក្ខុំ…បេ… វត្ថុំ… បរិត្តេ ខន្ធេ អនិច្ចតោ…បេ… វិបស្សន្តិ អស្សាទេន្តិ អភិនន្ទន្តិ, តំ អារព្ភ រាគោ ឧប្បជ្ជតិ …បេ… ទោមនស្សំ ឧប្បជ្ជតិ. រូបាយតនំ ចក្ខុវិញ្ញាណស្ស…បេ… ផោដ្ឋព្ពាយតនំ កាយវិញ្ញាណស្ស អារម្មណបច្ចយេន បច្ចយោ. (១)

បរិត្តោ ធម្មោ មហគ្គតស្ស ធម្មស្ស អារម្មណបច្ចយេន បច្ចយោ – ទិព្ពេន ចក្ខុនា រូបំ បស្សតិ, ទិព្ពាយ សោតធាតុយា សទ្ទំ សុណាតិ, ចេតោបរិយញាណេន បរិត្តចិត្តសមង្គិស្ស ចិត្តំ ជានាតិ. បរិត្តា ខន្ធា ឥទ្ធិវិធញាណស្ស, ចេតោបរិយញាណស្ស បុព្ពេនិវាសានុស្សតិញាណស្ស យថាកម្មូបគញាណស្ស អនាគតំសញាណស្ស អារម្មណបច្ចយេន បច្ចយោ. (២)

៥៧. មហគ្គតោ ធម្មោ មហគ្គតស្ស ធម្មស្ស អារម្មណបច្ចយេន បច្ចយោ – ចេតោបរិយញាណេន មហគ្គតចិត្តសមង្គិស្ស ចិត្តំ ជានាតិ, អាកាសានញ្ចាយតនំ វិញ្ញាណញ្ចាយតនស្ស… អាកិញ្ចញ្ញាយតនំ នេវសញ្ញានាសញ្ញាយតនស្ស អារម្មណបច្ចយេន បច្ចយោ. មហគ្គតា ខន្ធា ឥទ្ធិវិធញាណស្ស, ចេតោបរិយញាណស្ស បុព្ពេនិវាសានុស្សតិញាណស្ស យថាកម្មូបគញាណស្ស អនាគតំសញាណស្ស អារម្មណបច្ចយេន បច្ចយោ. (១)

មហគ្គតោ ធម្មោ បរិត្តស្ស ធម្មស្ស អារម្មណបច្ចយេន បច្ចយោ – បឋមំ ឈានំ បច្ចវេក្ខតិ…បេ… នេវសញ្ញានាសញ្ញាយតនំ បច្ចវេក្ខតិ, ទិព្ពំ ចក្ខុំ បច្ចវេក្ខតិ, ទិព្ពំ សោតធាតុំ បច្ចវេក្ខតិ, ឥទ្ធិវិធញាណំ បច្ចវេក្ខតិ, ចេតោបរិយញាណំ បច្ចវេក្ខតិ, បុព្ពេនិវាសានុស្សតិញាណំ បច្ចវេក្ខតិ, យថាកម្មូបគញាណំ បច្ចវេក្ខតិ, អនាគតំសញាណំ បច្ចវេក្ខតិ. មហគ្គតេ ខន្ធេ អនិច្ចតោ…បេ… វិប្បស្សតិ អស្សាទេតិ អភិនន្ទតិ, តំ អារព្ភ រាគោ ឧប្បជ្ជតិ…បេ… ទោមនស្សំ ឧប្បជ្ជតិ. (២)

៥៨. អប្បមាណោ ធម្មោ អប្បមាណស្ស ធម្មស្ស អារម្មណបច្ចយេន បច្ចយោ – និព្ពានំ មគ្គស្ស, ផលស្ស អារម្មណបច្ចយេន បច្ចយោ. (១)

អប្បមាណោ ធម្មោ បរិត្តស្ស ធម្មស្ស អារម្មណបច្ចយេន បច្ចយោ – អរិយា មគ្គា វុដ្ឋហិត្វា មគ្គំ បច្ចវេក្ខន្តិ, ផលំ បច្ចវេក្ខន្តិ, និព្ពានំ បច្ចវេក្ខន្តិ, និព្ពានំ គោត្រភុស្ស, វោទានស្ស, អាវជ្ជនាយ អារម្មណបច្ចយេន បច្ចយោ. (២)

អប្បមាណោ ធម្មោ មហគ្គតស្ស ធម្មស្ស អារម្មណបច្ចយេន បច្ចយោ – អរិយា ចេតោបរិយញាណេន អប្បមាណចិត្តសមង្គិស្ស ចិត្តំ ជានន្តិ, អប្បមាណា ខន្ធា ចេតោបរិយញាណស្ស, បុព្ពេនិវាសានុស្សតិញាណស្ស, អនាគតំសញាណស្ស អារម្មណបច្ចយេន បច្ចយោ. (៣)

អធិបតិបច្ចយោ

៥៩. បរិត្តោ ធម្មោ បរិត្តស្ស ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – ទានំ ទត្វា សីលំ សមាទិយិត្វា ឧបោសថកម្មំ កត្វា តំ គរុំ កត្វា បច្ចវេក្ខតិ, បុព្ពេ សុចិណ្ណានិ គរុំ កត្វា បច្ចវេក្ខតិ. សេក្ខា គោត្រភុំ គរុំ កត្វា បច្ចវេក្ខន្តិ, វោទានំ គរុំ កត្វា បច្ចវេក្ខន្តិ. ចក្ខុំ…បេ… វត្ថុំ… បរិត្តេ ខន្ធេ គរុំ កត្វា អស្សាទេតិ អភិនន្ទតិ, តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ. សហជាតាធិបតិ – បរិត្តាធិបតិ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ អធិបតិបច្ចយេន បច្ចយោ. (១)

មហគ្គតោ ធម្មោ មហគ្គតស្ស ធម្មស្ស អធិបតិបច្ចយេន បច្ចយោ. សហជាតាធិបតិ – មហគ្គតាធិបតិ សម្បយុត្តកានំ ខន្ធានំ អធិបតិបច្ចយេន បច្ចយោ. (១)

មហគ្គតោ ធម្មោ បរិត្តស្ស ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – បឋមំ ឈានំ គរុំ កត្វា…បេ… នេវសញ្ញានាសញ្ញាយតនំ…បេ… ទិព្ពំ ចក្ខុំ…បេ… អនាគតំសញាណំ គរុំ កត្វា បច្ចវេក្ខតិ. មហគ្គតេ ខន្ធេ គរុំ កត្វា អស្សាទេតិ អភិនន្ទតិ, តំ គរុំ កត្វា រាគោ ឧប្បជ្ជតិ… ទិដ្ឋិ ឧប្បជ្ជតិ. សហជាតាធិបតិ – មហគ្គតាធិបតិ ចិត្តសមុដ្ឋានានំ រូបានំ អធិបតិបច្ចយេន បច្ចយោ. (២)

មហគ្គតោ ធម្មោ បរិត្តស្ស ច មហគ្គតស្ស ច ធម្មស្ស អធិបតិបច្ចយេន បច្ចយោ. សហជាតាធិបតិ – មហគ្គតាធិបតិ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ អធិបតិបច្ចយេន បច្ចយោ. (៣)

៦០. អប្បមាណោ ធម្មោ អប្បមាណស្ស ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – និព្ពានំ មគ្គស្ស… ផលស្ស អធិបតិបច្ចយេន បច្ចយោ. សហជាតាធិបតិ – អប្បមាណាធិបតិ សម្បយុត្តកានំ ខន្ធានំ អធិបតិបច្ចយេន បច្ចយោ. (១)

អប្បមាណោ ធម្មោ បរិត្តស្ស ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – អរិយា មគ្គា វុដ្ឋហិត្វា មគ្គំ គរុំ កត្វា បច្ចវេក្ខន្តិ, ផលំ គរុំ កត្វា បច្ចវេក្ខន្តិ, និព្ពានំ គរុំ កត្វា បច្ចវេក្ខន្តិ, និព្ពានំ គោត្រភុស្ស, វោទានស្ស អធិបតិបច្ចយេន បច្ចយោ. សហជាតាធិបតិ – អប្បមាណាធិបតិ ចិត្តសមុដ្ឋានានំ រូបានំ អធិបតិបច្ចយេន បច្ចយោ. (២)

អប្បមាណោ ធម្មោ បរិត្តស្ស ច អប្បមាណស្ស ច ធម្មស្ស អធិបតិបច្ចយេន បច្ចយោ. សហជាតាធិបតិ – អប្បមាណាធិបតិ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ អធិបតិបច្ចយេន បច្ចយោ. (៣)

អនន្តរបច្ចយោ

៦១. បរិត្តោ ធម្មោ បរិត្តស្ស ធម្មស្ស អនន្តរបច្ចយេន បច្ចយោ – បុរិមា បុរិមា បរិត្តា ខន្ធា បច្ឆិមានំ បច្ឆិមានំ បរិត្តានំ ខន្ធានំ អនន្តរបច្ចយេន បច្ចយោ. អនុលោមំ គោត្រភុស្ស… អនុលោមំ វោទានស្ស… អាវជ្ជនា បរិត្តានំ ខន្ធានំ អនន្តរបច្ចយេន បច្ចយោ. (១)

បរិត្តោ ធម្មោ មហគ្គតស្ស ធម្មស្ស អនន្តរបច្ចយេន បច្ចយោ – បរិត្តំ ចុតិចិត្តំ មហគ្គតស្ស ឧបបត្តិចិត្តស្ស អនន្តរបច្ចយេន បច្ចយោ. បរិត្តា ខន្ធា មហគ្គតស្ស វុដ្ឋានស្ស អនន្តរបច្ចយេន បច្ចយោ. បឋមស្ស ឈានស្ស បរិកម្មំ…បេ… នេវសញ្ញានាសញ្ញាយតនស្ស បរិកម្មំ…បេ… ទិព្ពស្ស ចក្ខុស្ស បរិកម្មំ…បេ… អនាគតំសញាណស្ស បរិកម្មំ អនាគតំសញាណស្ស អនន្តរបច្ចយេន បច្ចយោ. (២)

បរិត្តោ ធម្មោ អប្បមាណស្ស ធម្មស្ស អនន្តរបច្ចយេន បច្ចយោ – គោត្រភុ មគ្គស្ស… វោទានំ មគ្គស្ស… អនុលោមំ ផលសមាបត្តិយា អនន្តរបច្ចយេន បច្ចយោ. (៣)

៦២. មហគ្គតោ ធម្មោ មហគ្គតស្ស ធម្មស្ស អនន្តរបច្ចយេន បច្ចយោ – បុរិមា បុរិមា មហគ្គតា ខន្ធា បច្ឆិមានំ បច្ឆិមានំ មហគ្គតានំ ខន្ធានំ អនន្តរបច្ចយេន បច្ចយោ. (១)

មហគ្គតោ ធម្មោ បរិត្តស្ស ធម្មស្ស អនន្តរបច្ចយេន បច្ចយោ – មហគ្គតំ ចុតិចិត្តំ បរិត្តស្ស ឧបបត្តិចិត្តស្ស អនន្តរបច្ចយេន បច្ចយោ. មហគ្គតំ ភវង្គំ អាវជ្ជនាយ អនន្តរបច្ចយេន បច្ចយោ. មហគ្គតា ខន្ធា បរិត្តស្ស វុដ្ឋានស្ស អនន្តរបច្ចយេន បច្ចយោ. (២)

មហគ្គតោ ធម្មោ អប្បមាណស្ស ធម្មស្ស អនន្តរបច្ចយេន បច្ចយោ – នេវសញ្ញានាសញ្ញាយតនំ និរោធា វុដ្ឋហន្តស្ស ផលសមាបត្តិយា អនន្តរបច្ចយេន បច្ចយោ. (៣)

៦៣. អប្បមាណោ ធម្មោ អប្បមាណស្ស ធម្មស្ស អនន្តរបច្ចយេន បច្ចយោ – បុរិមា បុរិមា អប្បមាណា ខន្ធា បច្ឆិមានំ បច្ឆិមានំ អប្បមាណានំ ខន្ធានំ អនន្តរបច្ចយេន បច្ចយោ. មគ្គោ ផលស្ស… ផលំ ផលស្ស អនន្តរបច្ចយេន បច្ចយោ. (១)

អប្បមាណោ ធម្មោ បរិត្តស្ស ធម្មស្ស អនន្តរបច្ចយេន បច្ចយោ – ផលំ បរិត្តស្ស វុដ្ឋានស្ស អនន្តរបច្ចយេន បច្ចយោ. (២)

អប្បមាណោ ធម្មោ មហគ្គតស្ស ធម្មស្ស អនន្តរបច្ចយេន បច្ចយោ – ផលំ មហគ្គតស្ស វុដ្ឋានស្ស អនន្តរបច្ចយេន បច្ចយោ. (៣)

(សមនន្តរបច្ចយំ អនន្តរបច្ចយសទិសំ.)

សហជាតបច្ចយោ

៦៤. បរិត្តោ ធម្មោ បរិត្តស្ស ធម្មស្ស សហជាតបច្ចយេន បច្ចយោ – បរិត្តោ ឯកោ ខន្ធោ តិណ្ណន្នំ ខន្ធានំ ចិត្តសមុដ្ឋានានញ្ច រូបានំ សហជាតបច្ចយេន បច្ចយោ…បេ… ទ្វេ ខន្ធា…បេ… បដិសន្ធិក្ខណេ…បេ… ខន្ធា វត្ថុស្ស, វត្ថុ ខន្ធានំ សហជាតបច្ចយេន បច្ចយោ; ឯកំ មហាភូតំ…បេ… អសញ្ញសត្តានំ…បេ…. (១)

បរិត្តោ ធម្មោ មហគ្គតស្ស ធម្មស្ស សហជាតបច្ចយេន បច្ចយោ – បដិសន្ធិក្ខណេ វត្ថុ មហគ្គតានំ ខន្ធានំ សហជាតបច្ចយេន បច្ចយោ. (២)

៦៥. មហគ្គតោ ធម្មោ មហគ្គតស្ស ធម្មស្ស សហជាតបច្ចយេន បច្ចយោ – មហគ្គតោ ឯកោ ខន្ធោ តិណ្ណន្នំ ខន្ធានំ…បេ… ទ្វេ ខន្ធា…បេ… បដិសន្ធិក្ខណេ…បេ…. (១)

មហគ្គតោ ធម្មោ បរិត្តស្ស ធម្មស្ស សហជាតបច្ចយេន បច្ចយោ – មហគ្គតា ខន្ធា ចិត្តសមុដ្ឋានានំ រូបានំ សហជាតបច្ចយេន បច្ចយោ. បដិសន្ធិក្ខណេ មហគ្គតា ខន្ធា កដត្តារូបានំ សហជាតបច្ចយេន បច្ចយោ. (២)

មហគ្គតោ ធម្មោ បរិត្តស្ស ច មហគ្គតស្ស ច ធម្មស្ស សហជាតបច្ចយេន បច្ចយោ – មហគ្គតោ ឯកោ ខន្ធោ តិណ្ណន្នំ ខន្ធានំ ចិត្តសមុដ្ឋានានញ្ច រូបានំ សហជាតបច្ចយេន បច្ចយោ…បេ… ទ្វេ ខន្ធា…បេ… បដិសន្ធិក្ខណេ…បេ…. (៣)

៦៦. អប្បមាណោ ធម្មោ អប្បមាណស្ស ធម្មស្ស សហជាតបច្ចយេន បច្ចយោ – អប្បមាណោ ឯកោ ខន្ធោ តិណ្ណន្នំ ខន្ធានំ សហជាតបច្ចយេន បច្ចយោ…បេ…. (១)

អប្បមាណោ ធម្មោ បរិត្តស្ស ធម្មស្ស សហជាតបច្ចយេន បច្ចយោ – អប្បមាណា ខន្ធា ចិត្តសមុដ្ឋានានំ រូបានំ សហជាតបច្ចយេន បច្ចយោ. (២)

អប្បមាណោ ធម្មោ បរិត្តស្ស ច អប្បមាណស្ស ច ធម្មស្ស សហជាតបច្ចយេន បច្ចយោ – អប្បមាណោ ឯកោ ខន្ធោ តិណ្ណន្នំ ខន្ធានំ ចិត្តសមុដ្ឋានានញ្ច រូបានំ សហជាតបច្ចយេន បច្ចយោ…បេ…. (៣)

៦៧. បរិត្តោ ច អប្បមាណោ ច ធម្មា បរិត្តស្ស ធម្មស្ស សហជាតបច្ចយេន បច្ចយោ – អប្បមាណា ខន្ធា ច មហាភូតា ច ចិត្តសមុដ្ឋានានំ រូបានំ សហជាតបច្ចយេន បច្ចយោ. (១)

បរិត្តោ ច មហគ្គតោ ច ធម្មា បរិត្តស្ស ធម្មស្ស សហជាតបច្ចយេន បច្ចយោ – មហគ្គតា ខន្ធា ច មហាភូតា ច ចិត្តសមុដ្ឋានានំ រូបានំ សហជាតបច្ចយេន បច្ចយោ. បដិសន្ធិក្ខណេ មហគ្គតា ខន្ធា ច មហាភូតា ច កដត្តារូបានំ សហជាតបច្ចយេន បច្ចយោ. (១)

បរិត្តោ ច មហគ្គតោ ច ធម្មា មហគ្គតស្ស ធម្មស្ស សហជាតបច្ចយេន បច្ចយោ – បដិសន្ធិក្ខណេ មហគ្គតោ ឯកោ ខន្ធោ ច វត្ថុ ច តិណ្ណន្នំ ខន្ធានំ សហជាតបច្ចយេន បច្ចយោ…បេ…. (២)

អញ្ញមញ្ញបច្ចយោ

៦៨. បរិត្តោ ធម្មោ បរិត្តស្ស ធម្មស្ស អញ្ញមញ្ញបច្ចយេន បច្ចយោ – បរិត្តោ ឯកោ ខន្ធោ តិណ្ណន្នំ ខន្ធានំ អញ្ញមញ្ញបច្ចយេន បច្ចយោ…បេ… បដិសន្ធិក្ខណេ…បេ… ខន្ធា វត្ថុស្ស…បេ… វត្ថុ ខន្ធានំ អញ្ញមញ្ញបច្ចយេន បច្ចយោ; ឯកំ មហាភូតំ…បេ… អសញ្ញសត្តានំ…បេ…. (១)

បរិត្តោ ធម្មោ មហគ្គតស្ស ធម្មស្ស អញ្ញមញ្ញបច្ចយេន បច្ចយោ…បេ… បដិសន្ធិក្ខណេ វត្ថុ មហគ្គតានំ ខន្ធានំ អញ្ញមញ្ញបច្ចយេន បច្ចយោ…បេ…. (២)

មហគ្គតោ ធម្មោ មហគ្គតស្ស ធម្មស្ស អញ្ញមញ្ញបច្ចយេន បច្ចយោ – មហគ្គតោ ឯកោ ខន្ធោ តិណ្ណន្នំ ខន្ធានំ អញ្ញមញ្ញបច្ចយេន បច្ចយោ…បេ… បដិសន្ធិក្ខណេ…បេ…. (១)

មហគ្គតោ ធម្មោ បរិត្តស្ស ធម្មស្ស អញ្ញមញ្ញបច្ចយេន បច្ចយោ – បដិសន្ធិក្ខណេ មហគ្គតា ខន្ធា វត្ថុស្ស អញ្ញមញ្ញបច្ចយេន បច្ចយោ. (២)

មហគ្គតោ ធម្មោ បរិត្តស្ស ច មហគ្គតស្ស ច ធម្មស្ស អញ្ញមញ្ញបច្ចយេន បច្ចយោ – បដិសន្ធិក្ខណេ មហគ្គតោ ឯកោ ខន្ធោ តិណ្ណន្នំ ខន្ធានំ វត្ថុស្ស ច អញ្ញមញ្ញបច្ចយេន បច្ចយោ…បេ…. (៣)

អប្បមាណោ ធម្មោ អប្បមាណស្ស ធម្មស្ស អញ្ញមញ្ញបច្ចយេន បច្ចយោ – អប្បមាណោ ឯកោ ខន្ធោ តិណ្ណន្នំ ខន្ធានំ អញ្ញមញ្ញបច្ចយេន បច្ចយោ…បេ… ទ្វេ ខន្ធា…បេ…. (១)

បរិត្តោ ច មហគ្គតោ ច ធម្មា មហគ្គតស្ស ធម្មស្ស អញ្ញមញ្ញបច្ចយេន បច្ចយោ – បដិសន្ធិក្ខណេ មហគ្គតោ ឯកោ ខន្ធោ ច វត្ថុ ច តិណ្ណន្នំ ខន្ធានំ អញ្ញមញ្ញបច្ចយេន បច្ចយោ…បេ…. (១)

និស្សយបច្ចយោ

៦៩. បរិត្តោ ធម្មោ បរិត្តស្ស ធម្មស្ស និស្សយបច្ចយេន បច្ចយោ – បរិត្តោ ឯកោ ខន្ធោ តិណ្ណន្នំ ខន្ធានំ ចិត្តសមុដ្ឋានានញ្ច រូបានំ និស្សយបច្ចយេន បច្ចយោ…បេ… ទ្វេ ខន្ធា…បេ… បដិសន្ធិក្ខណេ…បេ… ខន្ធា វត្ថុស្ស…បេ… វត្ថុ ខន្ធានំ និស្សយបច្ចយេន បច្ចយោ…បេ… ឯកំ មហាភូតំ…បេ… អសញ្ញសត្តានំ ឯកំ មហាភូតំ…បេ… ចក្ខាយតនំ ចក្ខុវិញ្ញាណស្ស…បេ… កាយាយតនំ កាយវិញ្ញាណស្ស… វត្ថុ បរិត្តានំ ខន្ធានំ និស្សយបច្ចយេន បច្ចយោ. (១)

បរិត្តោ ធម្មោ មហគ្គតស្ស ធម្មស្ស និស្សយបច្ចយេន បច្ចយោ – វត្ថុ មហគ្គតានំ ខន្ធានំ និស្សយបច្ចយេន បច្ចយោ. បដិសន្ធិក្ខណេ វត្ថុ មហគ្គតានំ ខន្ធានំ និស្សយបច្ចយេន បច្ចយោ. (២)

បរិត្តោ ធម្មោ អប្បមាណស្ស ធម្មស្ស និស្សយបច្ចយេន បច្ចយោ – វត្ថុ អប្បមាណានំ ខន្ធានំ និស្សយបច្ចយេន បច្ចយោ. (៣)

៧០. មហគ្គតោ ធម្មោ មហគ្គតស្ស ធម្មស្ស និស្សយបច្ចយេន បច្ចយោ – មហគ្គតោ ឯកោ ខន្ធោ តិណ្ណន្នំ ខន្ធានំ…បេ… ទ្វេ ខន្ធា…បេ… បដិសន្ធិក្ខណេ…បេ…. (១)

មហគ្គតោ ធម្មោ បរិត្តស្ស ធម្មស្ស និស្សយបច្ចយេន បច្ចយោ – មហគ្គតា ខន្ធា ចិត្តសមុដ្ឋានានំ រូបានំ និស្សយបច្ចយេន បច្ចយោ. បដិសន្ធិក្ខណេ មហគ្គតា ខន្ធា កដត្តារូបានំ និស្សយបច្ចយេន បច្ចយោ. (២)

មហគ្គតោ ធម្មោ បរិត្តស្ស ច មហគ្គតស្ស ច ធម្មស្ស និស្សយបច្ចយេន បច្ចយោ – មហគ្គតោ ឯកោ ខន្ធោ តិណ្ណន្នំ ខន្ធានំ ចិត្តសមុដ្ឋានានញ្ច រូបានំ និស្សយបច្ចយេន បច្ចយោ…បេ… ទ្វេ ខន្ធា…បេ… បដិសន្ធិក្ខណេ…បេ…. (៣)

៧១. អប្បមាណោ ធម្មោ អប្បមាណស្ស ធម្មស្ស និស្សយបច្ចយេន បច្ចយោ – អប្បមាណោ ឯកោ ខន្ធោ តិណ្ណន្នំ ខន្ធានំ និស្សយបច្ចយេន បច្ចយោ…បេ…. (១)

អប្បមាណោ ធម្មោ បរិត្តស្ស ធម្មស្ស និស្សយបច្ចយេន បច្ចយោ – អប្បមាណា ខន្ធា ចិត្តសមុដ្ឋានានំ រូបានំ និស្សយបច្ចយេន បច្ចយោ. (២)

អប្បមាណោ ធម្មោ បរិត្តស្ស ច អប្បមាណស្ស ច ធម្មស្ស និស្សយបច្ចយេន បច្ចយោ – អប្បមាណោ ឯកោ ខន្ធោ តិណ្ណន្នំ ខន្ធានំ ចិត្តសមុដ្ឋានានញ្ច រូបានំ និស្សយបច្ចយេន បច្ចយោ…បេ…. (៣)

បរិត្តោ ច អប្បមាណោ ច ធម្មា បរិត្តស្ស ធម្មស្ស និស្សយបច្ចយេន បច្ចយោ – អប្បមាណា ខន្ធា ច មហាភូតា ច ចិត្តសមុដ្ឋានានំ រូបានំ និស្សយបច្ចយេន បច្ចយោ. (១)

បរិត្តោ ច អប្បមាណោ ច ធម្មា អប្បមាណស្ស ធម្មស្ស និស្សយបច្ចយេន បច្ចយោ – អប្បមាណោ ឯកោ ខន្ធោ ច វត្ថុ ច តិណ្ណន្នំ ខន្ធានំ និស្សយបច្ចយេន បច្ចយោ…បេ… ទ្វេ ខន្ធា…បេ…. (២)

បរិត្តោ ច មហគ្គតោ ច ធម្មា បរិត្តស្ស ធម្មស្ស និស្សយបច្ចយេន បច្ចយោ – មហគ្គតា ខន្ធា ច មហាភូតា ច ចិត្តសមុដ្ឋានានំ រូបានំ និស្សយបច្ចយេន បច្ចយោ. បដិសន្ធិក្ខណេ មហគ្គតា ខន្ធា ច មហាភូតា ច កដត្តារូបានំ និស្សយបច្ចយេន បច្ចយោ. (១)

បរិត្តោ ច មហគ្គតោ ច ធម្មា មហគ្គតស្ស ធម្មស្ស និស្សយបច្ចយេន បច្ចយោ – មហគ្គតោ ឯកោ ខន្ធោ ច វត្ថុ ច តិណ្ណន្នំ ខន្ធានំ និស្សយបច្ចយេន បច្ចយោ…បេ… បដិសន្ធិក្ខណេ មហគ្គតោ ឯកោ ខន្ធោ ច វត្ថុ ច តិណ្ណន្នំ ខន្ធានំ និស្សយបច្ចយេន បច្ចយោ…បេ… ទ្វេ ខន្ធា…បេ…. (២)

ឧបនិស្សយបច្ចយោ

៧២. បរិត្តោ ធម្មោ បរិត្តស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – បរិត្តំ សទ្ធំ ឧបនិស្សាយ ទានំ ទេតិ, សីលំ សមាទិយតិ, ឧបោសថកម្មំ ករោតិ, វិបស្សនំ ឧប្បាទេតិ, មានំ ជប្បេតិ, ទិដ្ឋិំ គណ្ហាតិ, បរិត្តំ សីលំ…បេ… បញ្ញំ… រាគំ…បេ… បត្ថនំ… កាយិកំ សុខំ…បេ… សេនាសនំ ឧបនិស្សាយ ទានំ ទេតិ, សីលំ…បេ… ឧបោសថំ…បេ… វិបស្សនំ ឧប្បាទេតិ, បាណំ ហនតិ…បេ… សង្ឃំ ភិន្ទតិ. បរិត្តា សទ្ធា…បេ… បញ្ញា, រាគោ…បេ… បត្ថនា, កាយិកំ សុខំ…បេ… សេនាសនំ បរិត្តាយ សទ្ធាយ…បេ… បញ្ញាយ, រាគស្ស…បេ… បត្ថនាយ, កាយិកស្ស សុខស្ស, កាយិកស្ស ទុក្ខស្ស ឧបនិស្សយបច្ចយេន បច្ចយោ. កុសលាកុសលំ កម្មំ វិបាកស្ស ឧបនិស្សយបច្ចយេន បច្ចយោ. បាណាតិបាតោ បាណាតិបាតស្ស ឧបនិស្សយបច្ចយេន បច្ចយោ (ចក្កំ កាតព្ពំ). មាតុឃាតិកម្មំ មាតុឃាតិកម្មស្ស ឧបនិស្សយបច្ចយេន បច្ចយោ (ចក្កំ កាតព្ពំ កុសលត្តិកសទិសំ). (១)

បរិត្តោ ធម្មោ មហគ្គតស្ស ធម្មស្ស ឧបនិស្សយបច្ចយេន បច្ចយោ – អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – បរិត្តំ សទ្ធំ ឧបនិស្សាយ មហគ្គតំ ឈានំ ឧប្បាទេតិ, អភិញ្ញំ ឧប្បាទេតិ, សមាបត្តិំ ឧប្បាទេតិ. បរិត្តំ សីលំ…បេ… បញ្ញំ… រាគំ…បេ… សេនាសនំ ឧបនិស្សាយ មហគ្គតំ ឈានំ ឧប្បាទេតិ, អភិញ្ញំ ឧប្បាទេតិ, សមាបត្តិំ ឧប្បាទេតិ. បរិត្តា សទ្ធា…បេ… សេនាសនំ មហគ្គតាយ សទ្ធាយ…បេ… បញ្ញាយ ឧបនិស្សយបច្ចយេន បច្ចយោ. បឋមស្ស ឈានស្ស បរិកម្មំ…បេ… នេវសញ្ញានាសញ្ញាយតនស្ស បរិកម្មំ នេវសញ្ញានាសញ្ញាយតនស្ស ឧបនិស្សយបច្ចយេន បច្ចយោ. ទិព្ពស្ស ចក្ខុស្ស បរិកម្មំ…បេ… អនាគតំសញាណស្ស បរិកម្មំ…បេ…. (២)

បរិត្តោ ធម្មោ អប្បមាណស្ស ធម្មស្ស ឧបនិស្សយបច្ចយេន បច្ចយោ – អនន្តរូបនិស្សយោ, បកតូបនិស្សយោ…បេ…. បកតូបនិស្សយោ បរិត្តំ សទ្ធំ ឧបនិស្សាយ អប្បមាណំ ឈានំ ឧប្បាទេតិ, មគ្គំ ឧប្បាទេតិ, ផលសមាបត្តិំ ឧប្បាទេតិ. បរិត្តំ សីលំ…បេ… បញ្ញំ… រាគំ…បេ… បត្ថនំ… កាយិកំ សុខំ…បេ… សេនាសនំ ឧបនិស្សាយ អប្បមាណំ ឈានំ ឧប្បាទេតិ, មគ្គំ ឧប្បាទេតិ, ផលសមាបត្តិំ ឧប្បាទេតិ. បរិត្តា សទ្ធា…បេ… សេនាសនំ អប្បមាណាយ សទ្ធាយ…បេ… បញ្ញាយ, មគ្គស្ស ផលសមាបត្តិយា ឧបនិស្សយបច្ចយេន បច្ចយោ. បឋមស្ស មគ្គស្ស បរិកម្មំ បឋមស្ស មគ្គស្ស…បេ… ចតុត្ថស្ស មគ្គស្ស បរិកម្មំ ចតុត្ថស្ស មគ្គស្ស ឧបនិស្សយបច្ចយេន បច្ចយោ. (៣)

៧៣. មហគ្គតោ ធម្មោ មហគ្គតស្ស ធម្មស្ស ឧបនិស្សយបច្ចយេន បច្ចយោ – អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – មហគ្គតំ សទ្ធំ ឧបនិស្សាយ មហគ្គតំ ឈានំ ឧប្បាទេតិ, អភិញ្ញំ ឧប្បាទេតិ, សមាបត្តិំ ឧប្បាទេតិ. មហគ្គតំ សីលំ…បេ… បញ្ញំ ឧបនិស្សាយ មហគ្គតំ ឈានំ ឧប្បាទេតិ, អភិញ្ញំ ឧប្បាទេតិ, សមាបត្តិំ ឧប្បាទេតិ. មហគ្គតា សទ្ធា…បេ… បញ្ញា មហគ្គតាយ សទ្ធាយ…បេ… បញ្ញាយ ឧបនិស្សយបច្ចយេន បច្ចយោ. បឋមំ ឈានំ ទុតិយស្ស ឈានស្ស…បេ… អាកិញ្ចញ្ញាយតនំ នេវសញ្ញានាសញ្ញាយតនស្ស ឧបនិស្សយបច្ចយេន បច្ចយោ. (១)

មហគ្គតោ ធម្មោ បរិត្តស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – មហគ្គតំ សទ្ធំ ឧបនិស្សាយ ទានំ ទេតិ, សីលំ សមាទិយតិ, ឧបោសថកម្មំ ករោតិ, វិបស្សនំ ឧប្បាទេតិ, មានំ ជប្បេតិ, ទិដ្ឋិំ គណ្ហាតិ, មហគ្គតំ សីលំ…បេ… បញ្ញំ ឧបនិស្សាយ ទានំ ទេតិ…បេ… វិបស្សនំ ឧប្បាទេតិ…បេ… មហគ្គតា សទ្ធា…បេ… បញ្ញា បរិត្តាយ សទ្ធាយ…បេ… បញ្ញាយ…បេ… កាយិកស្ស សុខស្ស, កាយិកស្ស ទុក្ខស្ស ឧបនិស្សយបច្ចយេន បច្ចយោ. (២)

មហគ្គតោ ធម្មោ អប្បមាណស្ស ធម្មស្ស ឧបនិស្សយបច្ចយេន បច្ចយោ – អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – មហគ្គតំ សទ្ធំ ឧបនិស្សាយ អប្បមាណំ ឈានំ ឧប្បាទេតិ, មគ្គំ ឧប្បាទេតិ, ផលសមាបត្តិំ ឧប្បាទេតិ. មហគ្គតំ សីលំ…បេ… បញ្ញំ ឧបនិស្សាយ អប្បមាណំ ឈានំ ឧប្បាទេតិ, មគ្គំ ឧប្បាទេតិ, ផលសមាបត្តិំ ឧប្បាទេតិ. មហគ្គតា សទ្ធា…បេ… បញ្ញា អប្បមាណាយ សទ្ធាយ…បេ… បញ្ញាយ មគ្គស្ស ផលសមាបត្តិយា ឧបនិស្សយបច្ចយេន បច្ចយោ. (៣)

៧៤. អប្បមាណោ ធម្មោ អប្បមាណស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – អប្បមាណំ សទ្ធំ ឧបនិស្សាយ អប្បមាណំ ឈានំ ឧប្បាទេតិ, មគ្គំ ឧប្បាទេតិ, ផលសមាបត្តិំ ឧប្បាទេតិ. អប្បមាណំ សីលំ…បេ… បញ្ញំ ឧបនិស្សាយ អប្បមាណំ ឈានំ ឧប្បាទេតិ, មគ្គំ ឧប្បាទេតិ, ផលសមាបត្តិំ ឧប្បាទេតិ. អប្បមាណា សទ្ធា…បេ… បញ្ញា អប្បមាណាយ សទ្ធាយ…បេ… បញ្ញាយ ឧបនិស្សយបច្ចយេន បច្ចយោ. បឋមោ មគ្គោ ទុតិយស្ស មគ្គស្ស…បេ… តតិយោ មគ្គោ ចតុត្ថស្ស មគ្គស្ស… មគ្គោ ផលសមាបត្តិយា ឧបនិស្សយបច្ចយេន បច្ចយោ. (១)

អប្បមាណោ ធម្មោ បរិត្តស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – អប្បមាណំ សទ្ធំ ឧបនិស្សាយ ទានំ ទេតិ, សីលំ…បេ… ឧបោសថកម្មំ… វិបស្សនំ ឧប្បាទេតិ. អប្បមាណំ សីលំ…បេ… បញ្ញំ ឧបនិស្សាយ ទានំ ទេតិ, សីលំ…បេ… ឧបោសថកម្មំ… វិបស្សនំ… អប្បមាណា សទ្ធា…បេ… បញ្ញា បរិត្តាយ សទ្ធាយ…បេ… បញ្ញាយ…បេ… កាយិកស្ស សុខស្ស, កាយិកស្ស ទុក្ខស្ស ឧបនិស្សយបច្ចយេន បច្ចយោ. ផលសមាបត្តិ កាយិកស្ស សុខស្ស ឧបនិស្សយបច្ចយេន បច្ចយោ. អរិយា មគ្គំ ឧបនិស្សាយ សង្ខារេ អនិច្ចតោ…បេ… វិបស្សន្តិ, មគ្គោ អរិយានំ អត្ថប្បដិសម្ភិទាយ…បេ… បដិភានប្បដិសម្ភិទាយ… ឋានាឋានកោសល្លស្ស ឧបនិស្សយបច្ចយេន បច្ចយោ. (២)

អប្បមាណោ ធម្មោ មហគ្គតស្ស ធម្មស្ស ឧបនិស្សយបច្ចយេន បច្ចយោ – អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – អប្បមាណំ សទ្ធំ ឧបនិស្សាយ មហគ្គតំ ឈានំ ឧប្បាទេតិ, អភិញ្ញំ ឧប្បាទេតិ, សមាបត្តិំ ឧប្បាទេតិ, អប្បមាណំ សីលំ…បេ… បញ្ញំ ឧបនិស្សាយ មហគ្គតំ ឈានំ ឧប្បាទេតិ, អភិញ្ញំ ឧប្បាទេតិ, សមាបត្តិំ ឧប្បាទេតិ. អប្បមាណា សទ្ធា…បេ… បញ្ញា មហគ្គតាយ សទ្ធាយ…បេ… បញ្ញាយ ឧបនិស្សយបច្ចយេន បច្ចយោ, អរិយា មគ្គំ ឧបនិស្សាយ អនុប្បន្នំ សមាបត្តិំ ឧប្បាទេន្តិ, ឧប្បន្នំ សមាបជ្ជន្តិ. (៣)

បុរេជាតបច្ចយោ

៧៥. បរិត្តោ ធម្មោ បរិត្តស្ស ធម្មស្ស បុរេជាតបច្ចយេន បច្ចយោ – អារម្មណបុរេជាតំ, វត្ថុបុរេជាតំ. អារម្មណបុរេជាតំ – ចក្ខុំ អនិច្ចតោ…បេ… វិបស្សតិ អស្សាទេតិ អភិនន្ទតិ; តំ អារព្ភ រាគោ ឧប្បជ្ជតិ…បេ… ទោមនស្សំ ឧប្បជ្ជតិ. សោតំ…បេ… វត្ថុំ អនិច្ចតោ…បេ… ទោមនស្សំ ឧប្បជ្ជតិ. រូបាយតនំ ចក្ខុវិញ្ញាណស្ស…បេ… ផោដ្ឋព្ពាយតនំ កាយវិញ្ញាណស្ស បុរេជាតបច្ចយេន បច្ចយោ. វត្ថុបុរេជាតំ – ចក្ខាយតនំ ចក្ខុវិញ្ញាណស្ស…បេ… កាយាយតនំ កាយវិញ្ញាណស្ស… វត្ថុ បរិត្តានំ ខន្ធានំ បុរេជាតបច្ចយេន បច្ចយោ. (១)

បរិត្តោ ធម្មោ មហគ្គតស្ស ធម្មស្ស បុរេជាតបច្ចយេន បច្ចយោ – អារម្មណបុរេជាតំ, វត្ថុបុរេជាតំ. អារម្មណបុរេជាតំ – ទិព្ពេន ចក្ខុនា រូបំ បស្សតិ, ទិព្ពាយ សោតធាតុយា សទ្ទំ សុណាតិ. វត្ថុបុរេជាតំ – វត្ថុ មហគ្គតានំ ខន្ធានំ បុរេជាតបច្ចយេន បច្ចយោ. (២)

បរិត្តោ ធម្មោ អប្បមាណស្ស ធម្មស្ស បុរេជាតបច្ចយេន បច្ចយោ. វត្ថុបុរេជាតំ – វត្ថុ អប្បមាណានំ ខន្ធានំ បុរេជាតបច្ចយេន បច្ចយោ. (៣)

បច្ឆាជាតបច្ចយោ

៧៦. បរិត្តោ ធម្មោ បរិត្តស្ស ធម្មស្ស បច្ឆាជាតបច្ចយេន បច្ចយោ – បច្ឆាជាតា បរិត្តា ខន្ធា បុរេជាតស្ស ឥមស្ស កាយស្ស បច្ឆាជាតបច្ចយេន បច្ចយោ. (១)

មហគ្គតោ ធម្មោ បរិត្តស្ស ធម្មស្ស បច្ឆាជាតបច្ចយេន បច្ចយោ – បច្ឆាជាតា មហគ្គតា ខន្ធា បុរេជាតស្ស ឥមស្ស កាយស្ស បច្ឆាជាតបច្ចយេន បច្ចយោ. (១)

អប្បមាណោ ធម្មោ បរិត្តស្ស ធម្មស្ស បច្ឆាជាតបច្ចយេន បច្ចយោ – បច្ឆាជាតា អប្បមាណា ខន្ធា បុរេជាតស្ស ឥមស្ស កាយស្ស បច្ឆាជាតបច្ចយេន បច្ចយោ. (១)

អាសេវនបច្ចយោ

៧៧. បរិត្តោ ធម្មោ បរិត្តស្ស ធម្មស្ស អាសេវនបច្ចយេន បច្ចយោ – បុរិមា បុរិមា បរិត្តា ខន្ធា បច្ឆិមានំ បច្ឆិមានំ បរិត្តានំ ខន្ធានំ…បេ… អនុលោមំ គោត្រភុស្ស, អនុលោមំ វោទានស្ស អាសេវនបច្ចយេន បច្ចយោ. (១)

បរិត្តោ ធម្មោ មហគ្គតស្ស ធម្មស្ស អាសេវនបច្ចយេន បច្ចយោ – បឋមស្ស ឈានស្ស បរិកម្មំ តស្សេវ [បឋមស្ស ឈានស្ស (?)] អាសេវនបច្ចយេន បច្ចយោ…បេ… នេវសញ្ញានាសញ្ញាយតនស្ស បរិកម្មំ តស្សេវ [នេវសញ្ញានាសញ្ញាយតនស្ស (?) អញ្ញេសុ តិកេសុ ឱលោកេតព្ពំ] អាសេវនបច្ចយេន បច្ចយោ. ទិព្ពស្ស ចក្ខុស្ស បរិកម្មំ…បេ… អនាគតំសញាណស្ស បរិកម្មំ អនាគតំសញាណស្ស អាសេវនបច្ចយេន បច្ចយោ. (២)

បរិត្តោ ធម្មោ អប្បមាណស្ស ធម្មស្ស អាសេវនបច្ចយេន បច្ចយោ – គោត្រភុ មគ្គស្ស… វោទានំ មគ្គស្ស អាសេវនបច្ចយេន បច្ចយោ. (៣)

មហគ្គតោ ធម្មោ មហគ្គតស្ស ធម្មស្ស អាសេវនបច្ចយេន បច្ចយោ – បុរិមា បុរិមា មហគ្គតា ខន្ធា បច្ឆិមានំ បច្ឆិមានំ មហគ្គតានំ ខន្ធានំ…បេ… អាសេវនបច្ចយេន បច្ចយោ. (១)

កម្មបច្ចយោ

៧៨. បរិត្តោ ធម្មោ បរិត្តស្ស ធម្មស្ស កម្មបច្ចយេន បច្ចយោ – សហជាតា, នានាក្ខណិកា. សហជាតា – បរិត្តា ចេតនា សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ កម្មបច្ចយេន បច្ចយោ. បដិសន្ធិក្ខណេ បរិត្តា ចេតនា សម្បយុត្តកានំ ខន្ធានំ កដត្តា ច រូបានំ កម្មបច្ចយេន បច្ចយោ. នានាក្ខណិកា – បរិត្តា ចេតនា វិបាកានំ បរិត្តានំ ខន្ធានំ កដត្តា ច រូបានំ កម្មបច្ចយេន បច្ចយោ. (១)

មហគ្គតោ ធម្មោ មហគ្គតស្ស ធម្មស្ស កម្មបច្ចយេន បច្ចយោ – សហជាតា, នានាក្ខណិកា. សហជាតា – មហគ្គតា ចេតនា សម្បយុត្តកានំ ខន្ធានំ កម្មបច្ចយេន បច្ចយោ. បដិសន្ធិក្ខណេ មហគ្គតា ចេតនា សម្បយុត្តកានំ ខន្ធានំ កម្មបច្ចយេន បច្ចយោ. នានាក្ខណិកា – មហគ្គតា ចេតនា វិបាកានំ មហគ្គតានំ ខន្ធានំ កម្មបច្ចយេន បច្ចយោ. (១)

មហគ្គតោ ធម្មោ បរិត្តស្ស ធម្មស្ស កម្មបច្ចយេន បច្ចយោ – សហជាតា, នានាក្ខណិកា. សហជាតា – មហគ្គតា ចេតនា ចិត្តសមុដ្ឋានានំ រូបានំ កម្មបច្ចយេន បច្ចយោ. បដិសន្ធិក្ខណេ មហគ្គតា ចេតនា កដត្តារូបានំ កម្មបច្ចយេន បច្ចយោ. នានាក្ខណិកា – មហគ្គតា ចេតនា កដត្តារូបានំ កម្មបច្ចយេន បច្ចយោ. (២)

មហគ្គតោ ធម្មោ បរិត្តស្ស ច មហគ្គតស្ស ច ធម្មស្ស កម្មបច្ចយេន បច្ចយោ – សហជាតា, នានាក្ខណិកា. សហជាតា – មហគ្គតា ចេតនា សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ កម្មបច្ចយេន បច្ចយោ. បដិសន្ធិក្ខណេ មហគ្គតា ចេតនា សម្បយុត្តកានំ ខន្ធានំ កដត្តា ច រូបានំ កម្មបច្ចយេន បច្ចយោ. នានាក្ខណិកា – មហគ្គតា ចេតនា វិបាកានំ មហគ្គតានំ ខន្ធានំ កដត្តា ច រូបានំ កម្មបច្ចយេន បច្ចយោ. (៣)

៧៩. អប្បមាណោ ធម្មោ អប្បមាណស្ស ធម្មស្ស កម្មបច្ចយេន បច្ចយោ – សហជាតា, នានាក្ខណិកា. សហជាតា – អប្បមាណា ចេតនា សម្បយុត្តកានំ ខន្ធានំ កម្មបច្ចយេន បច្ចយោ. នានាក្ខណិកា – អប្បមាណា ចេតនា វិបាកានំ អប្បមាណានំ ខន្ធានំ កម្មបច្ចយេន បច្ចយោ. (១)

អប្បមាណោ ធម្មោ បរិត្តស្ស ធម្មស្ស កម្មបច្ចយេន បច្ចយោ – អប្បមាណា ចេតនា ចិត្តសមុដ្ឋានានំ រូបានំ កម្មបច្ចយេន បច្ចយោ. (២)

អប្បមាណោ ធម្មោ បរិត្តស្ស ច អប្បមាណស្ស ច ធម្មស្ស កម្មបច្ចយេន បច្ចយោ – អប្បមាណា ចេតនា សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ កម្មបច្ចយេន បច្ចយោ. (៣)

វិបាកបច្ចយោ

៨០. បរិត្តោ ធម្មោ បរិត្តស្ស ធម្មស្ស វិបាកបច្ចយេន បច្ចយោ – វិបាកោ បរិត្តោ ឯកោ ខន្ធោ តិណ្ណន្នំ ខន្ធានំ ចិត្តសមុដ្ឋានានញ្ច រូបានំ វិបាកបច្ចយេន បច្ចយោ…បេ… បដិសន្ធិក្ខណេ…បេ… ខន្ធា វត្ថុស្ស វិបាកបច្ចយេន បច្ចយោ. (១)

មហគ្គតោ ធម្មោ មហគ្គតស្ស ធម្មស្ស វិបាកបច្ចយេន បច្ចយោ…បេ… (តិស្សោ បញ្ហា, បវត្តិបដិសន្ធិ កាតព្ពា). (៣)

អប្បមាណោ ធម្មោ អប្បមាណស្ស ធម្មស្ស វិបាកបច្ចយេន បច្ចយោ… តីណិ (បវត្តិមេវ).

អាហារបច្ចយាទិ

៨១. បរិត្តោ ធម្មោ បរិត្តស្ស ធម្មស្ស អាហារបច្ចយេន បច្ចយោ…បេ… ឥន្ទ្រិយបច្ចយេន បច្ចយោ… ឈានបច្ចយេន បច្ចយោ… មគ្គបច្ចយេន បច្ចយោ… សម្បយុត្តបច្ចយេន បច្ចយោ… វិប្បយុត្តបច្ចយេន បច្ចយោ – សហជាតំ, បុរេជាតំ, បច្ឆាជាតំ. សហជាតា – បរិត្តា ខន្ធា ចិត្តសមុដ្ឋានានំ រូបានំ វិប្បយុត្តបច្ចយេន បច្ចយោ. បដិសន្ធិក្ខណេ បរិត្តា ខន្ធា កដត្តារូបានំ វិប្បយុត្តបច្ចយេន បច្ចយោ. ខន្ធា វត្ថុស្ស…បេ… វត្ថុ ខន្ធានំ វិប្បយុត្តបច្ចយេន បច្ចយោ. បុរេជាតំ – ចក្ខាយតនំ ចក្ខុវិញ្ញាណស្ស វិប្បយុត្តបច្ចយេន បច្ចយោ…បេ… កាយាយតនំ កាយវិញ្ញាណស្ស វិប្បយុត្តបច្ចយេន បច្ចយោ. វត្ថុ បរិត្តានំ ខន្ធានំ វិប្បយុត្តបច្ចយេន បច្ចយោ. បច្ឆាជាតា – បរិត្តា ខន្ធា បុរេជាតស្ស ឥមស្ស កាយស្ស វិប្បយុត្តបច្ចយេន បច្ចយោ. (១)

បរិត្តោ ធម្មោ មហគ្គតស្ស ធម្មស្ស វិប្បយុត្តបច្ចយេន បច្ចយោ – សហជាតំ, បុរេជាតំ. សហជាតំ – បដិសន្ធិក្ខណេ វត្ថុ មហគ្គតានំ ខន្ធានំ វិប្បយុត្តបច្ចយេន បច្ចយោ. បុរេជាតំ – វត្ថុ មហគ្គតានំ ខន្ធានំ វិប្បយុត្តបច្ចយេន បច្ចយោ. (២)

បរិត្តោ ធម្មោ អប្បមាណស្ស ធម្មស្ស វិប្បយុត្តបច្ចយេន បច្ចយោ. បុរេជាតំ – វត្ថុ អប្បមាណានំ ខន្ធានំ វិប្បយុត្តបច្ចយេន បច្ចយោ. (៣)

៨២. មហគ្គតោ ធម្មោ បរិត្តស្ស ធម្មស្ស វិប្បយុត្តបច្ចយេន បច្ចយោ – សហជាតំ, បច្ឆាជាតំ. សហជាតា – មហគ្គតា ខន្ធា ចិត្តសមុដ្ឋានានំ រូបានំ វិប្បយុត្តបច្ចយេន បច្ចយោ. បដិសន្ធិក្ខណេ…បេ… បច្ឆាជាតា – មហគ្គតា ខន្ធា បុរេជាតស្ស ឥមស្ស កាយស្ស វិប្បយុត្តបច្ចយេន បច្ចយោ. (១)

អប្បមាណោ ធម្មោ បរិត្តស្ស ធម្មស្ស វិប្បយុត្តបច្ចយេន បច្ចយោ – សហជាតំ, បច្ឆាជាតំ. សហជាតា – អប្បមាណា ខន្ធា ចិត្តសមុដ្ឋានានំ រូបានំ វិប្បយុត្តបច្ចយេន បច្ចយោ. បច្ឆាជាតា – អប្បមាណា ខន្ធា បុរេជាតស្ស ឥមស្ស កាយស្ស វិប្បយុត្តបច្ចយេន បច្ចយោ. (១)

អត្ថិបច្ចយោ

៨៣. បរិត្តោ ធម្មោ បរិត្តស្ស ធម្មស្ស អត្ថិបច្ចយេន បច្ចយោ – សហជាតំ, បុរេជាតំ, បច្ឆាជាតំ, អាហារំ, ឥន្ទ្រិយំ. សហជាតោ – បរិត្តោ ឯកោ ខន្ធោ តិណ្ណន្នំ ខន្ធានំ ចិត្តសមុដ្ឋានានញ្ច រូបានំ អត្ថិបច្ចយេន បច្ចយោ…បេ… ទ្វេ ខន្ធា…បេ… បដិសន្ធិក្ខណេ…បេ… ខន្ធា វត្ថុស្ស អត្ថិបច្ចយេន បច្ចយោ. វត្ថុ ខន្ធានំ អត្ថិបច្ចយេន បច្ចយោ; ឯកំ មហាភូតំ…បេ… អសញ្ញសត្តានំ…បេ…. បុរេជាតំ – ចក្ខុំ…បេ… វត្ថុំ អនិច្ចតោ…បេ… វិបស្សតិ អស្សាទេតិ អភិនន្ទតិ, តំ អារព្ភ រាគោ ឧប្បជ្ជតិ…បេ… ទោមនស្សំ ឧប្បជ្ជតិ, រូបាយតនំ ចក្ខុវិញ្ញាណស្ស…បេ… ផោដ្ឋព្ពាយតនំ កាយវិញ្ញាណស្ស អត្ថិបច្ចយេន បច្ចយោ. ចក្ខាយតនំ ចក្ខុវិញ្ញាណស្ស អត្ថិបច្ចយេន បច្ចយោ…បេ… កាយាយតនំ កាយវិញ្ញាណស្ស…បេ… វត្ថុ បរិត្តានំ ខន្ធានំ អត្ថិបច្ចយេន បច្ចយោ. បច្ឆាជាតា – បរិត្តា ខន្ធា បុរេជាតស្ស ឥមស្ស កាយស្ស អត្ថិបច្ចយេន បច្ចយោ. កពឡីការោ អាហារោ ឥមស្ស កាយស្ស អត្ថិបច្ចយេន បច្ចយោ. រូបជីវិតិន្ទ្រិយំ កដត្តារូបានំ អត្ថិបច្ចយេន បច្ចយោ. (១)

បរិត្តោ ធម្មោ មហគ្គតស្ស ធម្មស្ស អត្ថិបច្ចយេន បច្ចយោ – សហជាតំ, បុរេជាតំ. សហជាតំ – បដិសន្ធិក្ខណេ វត្ថុ មហគ្គតានំ ខន្ធានំ អត្ថិបច្ចយេន បច្ចយោ. បុរេជាតំ – ទិព្ពេន ចក្ខុនា រូបំ បស្សតិ, ទិព្ពាយ សោតធាតុយា សទ្ទំ សុណាតិ, វត្ថុ មហគ្គតានំ ខន្ធានំ អត្ថិបច្ចយេន បច្ចយោ. (២)

បរិត្តោ ធម្មោ អប្បមាណស្ស ធម្មស្ស អត្ថិបច្ចយេន បច្ចយោ. បុរេជាតំ – វត្ថុ អប្បមាណានំ ខន្ធានំ អត្ថិបច្ចយេន បច្ចយោ. (៣)

៨៤. មហគ្គតោ ធម្មោ មហគ្គតស្ស ធម្មស្ស អត្ថិបច្ចយេន បច្ចយោ. មហគ្គតោ ឯកោ ខន្ធោ តិណ្ណន្នំ ខន្ធានំ…បេ… ទ្វេ ខន្ធា…បេ… បដិសន្ធិក្ខណេ…បេ…. (១)

មហគ្គតោ ធម្មោ បរិត្តស្ស ធម្មស្ស អត្ថិបច្ចយេន បច្ចយោ – សហជាតំ, បច្ឆាជាតំ. សហជាតា – មហគ្គតា ខន្ធា ចិត្តសមុដ្ឋានានំ រូបានំ អត្ថិបច្ចយេន បច្ចយោ. បដិសន្ធិក្ខណេ មហគ្គតា ខន្ធា កដត្តារូបានំ អត្ថិបច្ចយេន បច្ចយោ. បច្ឆាជាតា – មហគ្គតា ខន្ធា បុរេជាតស្ស ឥមស្ស កាយស្ស អត្ថិបច្ចយេន បច្ចយោ. (២)

មហគ្គតោ ធម្មោ បរិត្តស្ស ច មហគ្គតស្ស ច ធម្មស្ស អត្ថិបច្ចយេន បច្ចយោ – មហគ្គតោ ឯកោ ខន្ធោ តិណ្ណន្នំ ខន្ធានំ ចិត្តសមុដ្ឋានានញ្ច រូបានំ អត្ថិបច្ចយេន បច្ចយោ…បេ… ទ្វេ ខន្ធា…បេ… បដិសន្ធិក្ខណេ…បេ…. (៣)

៨៥. អប្បមាណោ ធម្មោ អប្បមាណស្ស ធម្មស្ស អត្ថិបច្ចយេន បច្ចយោ – អប្បមាណោ ឯកោ ខន្ធោ តិណ្ណន្នំ ខន្ធានំ…បេ…. (១)

អប្បមាណោ ធម្មោ បរិត្តស្ស ធម្មស្ស អត្ថិបច្ចយេន បច្ចយោ – សហជាតំ, បច្ឆាជាតំ. សហជាតា – អប្បមាណា ខន្ធា ចិត្តសមុដ្ឋានានំ រូបានំ អត្ថិបច្ចយេន បច្ចយោ. បច្ឆាជាតា – អប្បមាណា ខន្ធា បុរេជាតស្ស ឥមស្ស កាយស្ស អត្ថិបច្ចយេន បច្ចយោ. (២)

អប្បមាណោ ធម្មោ បរិត្តស្ស ច អប្បមាណស្ស ច ធម្មស្ស អត្ថិបច្ចយេន បច្ចយោ – អប្បមាណោ ឯកោ ខន្ធោ តិណ្ណន្នំ ខន្ធានំ ចិត្តសមុដ្ឋានានញ្ច រូបានំ អត្ថិបច្ចយេន បច្ចយោ…បេ…. (៣)

៨៦. បរិត្តោ ច អប្បមាណោ ច ធម្មា បរិត្តស្ស ធម្មស្ស អត្ថិបច្ចយេន បច្ចយោ – សហជាតំ, បច្ឆាជាតំ, អាហារំ, ឥន្ទ្រិយំ. សហជាតា – អប្បមាណា ខន្ធា ច មហាភូតា ច ចិត្តសមុដ្ឋានានំ រូបានំ អត្ថិបច្ចយេន បច្ចយោ. បច្ឆាជាតា – អប្បមាណា ខន្ធា ច កពឡីការោ អាហារោ ច ឥមស្ស កាយស្ស អត្ថិបច្ចយេន បច្ចយោ. បច្ឆាជាតា – អប្បមាណា ខន្ធា ច រូបជីវិតិន្ទ្រិយញ្ច កដត្តារូបានំ អត្ថិបច្ចយេន បច្ចយោ. (១)

បរិត្តោ ច អប្បមាណោ ច ធម្មា អប្បមាណស្ស ធម្មស្ស អត្ថិបច្ចយេន បច្ចយោ – សហជាតំ, បុរេជាតំ. សហជាតោ – អប្បមាណោ ឯកោ ខន្ធោ ច វត្ថុ ច តិណ្ណន្នំ ខន្ធានំ អត្ថិបច្ចយេន បច្ចយោ…បេ… ទ្វេ ខន្ធា…បេ…. (២)

បរិត្តោ ច មហគ្គតោ ច ធម្មា បរិត្តស្ស ធម្មស្ស អត្ថិបច្ចយេន បច្ចយោ – សហជាតំ, បច្ឆាជាតំ, អាហារំ, ឥន្ទ្រិយំ. សហជាតា – មហគ្គតា ខន្ធា ច មហាភូតា ច ចិត្តសមុដ្ឋានានំ រូបានំ អត្ថិបច្ចយេន បច្ចយោ. បដិសន្ធិក្ខណេ មហគ្គតា ខន្ធា ច មហាភូតា ច កដត្តារូបានំ អត្ថិបច្ចយេន បច្ចយោ. បច្ឆាជាតា – មហគ្គតា ខន្ធា ច កពឡីការោ អាហារោ ច ឥមស្ស កាយស្ស អត្ថិបច្ចយេន បច្ចយោ. បច្ឆាជាតា – មហគ្គតា ខន្ធា ច រូបជីវិតិន្ទ្រិយញ្ច កដត្តារូបានំ អត្ថិបច្ចយេន បច្ចយោ. (១)

បរិត្តោ ច មហគ្គតោ ច ធម្មា មហគ្គតស្ស ធម្មស្ស អត្ថិបច្ចយេន បច្ចយោ – សហជាតំ, បុរេជាតំ. សហជាតោ – មហគ្គតោ ឯកោ ខន្ធោ ច វត្ថុ ច តិណ្ណន្នំ ខន្ធានំ អត្ថិបច្ចយេន បច្ចយោ…បេ… ទ្វេ ខន្ធា…បេ… បដិសន្ធិក្ខណេ មហគ្គតោ ឯកោ ខន្ធោ ច វត្ថុ ច តិណ្ណន្នំ ខន្ធានំ អត្ថិបច្ចយេន បច្ចយោ…បេ… ទ្វេ ខន្ធា ច វត្ថុ ច…បេ… នត្ថិបច្ចយេន បច្ចយោ… វិគតបច្ចយេន បច្ចយោ… អវិគតបច្ចយេន បច្ចយោ. (២)