១. វិភង្គវារោ

នហេតុបច្ចយោ

៣៣. បរិត្តំ ធម្មំ បច្ចយា បរិត្តោ ធម្មោ ឧប្បជ្ជតិ នហេតុបច្ចយា – អហេតុកំ បរិត្តំ ឯកំ ខន្ធំ បច្ចយា តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… អហេតុកបដិសន្ធិក្ខណេ…បេ… ខន្ធេ បច្ចយា វត្ថុ, វត្ថុំ បច្ចយា ខន្ធា; ឯកំ មហាភូតំ…បេ… អសញ្ញសត្តានំ…បេ… ចក្ខាយតនំ បច្ចយា ចក្ខុវិញ្ញាណំ…បេ… កាយាយតនំ បច្ចយា កាយវិញ្ញាណំ, វត្ថុំ បច្ចយា អហេតុកា បរិត្តា ខន្ធា, វិចិកិច្ឆាសហគតេ ឧទ្ធច្ចសហគតេ ខន្ធេ ច វត្ថុញ្ច បច្ចយា វិចិកិច្ឆាសហគតោ ឧទ្ធច្ចសហគតោ មោហោ. (១)

នអារម្មណបច្ចយោ

៣៤. បរិត្តំ ធម្មំ បច្ចយា បរិត្តោ ធម្មោ ឧប្បជ្ជតិ នអារម្មណបច្ចយា (បដិច្ចវារសទិសំ. បញ្ច).

នអធិបតិបច្ចយោ

៣៥. បរិត្តំ ធម្មំ បច្ចយា បរិត្តោ ធម្មោ ឧប្បជ្ជតិ នអធិបតិបច្ចយា – បរិត្តំ ឯកំ ខន្ធំ បច្ចយា តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… បដិសន្ធិក្ខណេ…បេ… ៥៣អសញ្ញសត្តានំ…បេ… ចក្ខាយតនំ…បេ… កាយាយតនំ…បេ… វត្ថុំ បច្ចយា បរិត្តា ខន្ធា. (១)

បរិត្តំ ធម្មំ បច្ចយា មហគ្គតោ ធម្មោ ឧប្បជ្ជតិ នអធិបតិបច្ចយា – វត្ថុំ បច្ចយា មហគ្គតាធិបតិ, វត្ថុំ បច្ចយា វិបាកា មហគ្គតា ខន្ធា. បដិសន្ធិក្ខណេ វត្ថុំ បច្ចយា មហគ្គតា ខន្ធា. (២)

បរិត្តំ ធម្មំ បច្ចយា អប្បមាណោ ធម្មោ ឧប្បជ្ជតិ នអធិបតិបច្ចយា – វត្ថុំ បច្ចយា អប្បមាណាធិបតិ. (៣)

បរិត្តំ ធម្មំ បច្ចយា បរិត្តោ ច មហគ្គតោ ច ធម្មា ឧប្បជ្ជន្តិ នអធិបតិបច្ចយា – វត្ថុំ បច្ចយា វិបាកា មហគ្គតា ខន្ធា, មហាភូតេ បច្ចយា ចិត្តសមុដ្ឋានំ រូបំ. បដិសន្ធិក្ខណេ…បេ…. (៤)

៣៦. មហគ្គតំ ធម្មំ បច្ចយា មហគ្គតោ ធម្មោ ឧប្បជ្ជតិ នអធិបតិបច្ចយា – មហគ្គតេ ខន្ធេ បច្ចយា មហគ្គតាធិបតិ, វិបាកំ មហគ្គតំ ឯកំ ខន្ធំ បច្ចយា តយោ ខន្ធា…បេ… ទ្វេ ខន្ធេ…បេ… បដិសន្ធិក្ខណេ…បេ…. (១)

មហគ្គតំ ធម្មំ បច្ចយា បរិត្តោ ធម្មោ ឧប្បជ្ជតិ នអធិបតិបច្ចយា – វិបាកេ មហគ្គតេ ខន្ធេ បច្ចយា ចិត្តសមុដ្ឋានំ រូបំ. បដិសន្ធិក្ខណេ…បេ…. (២)

មហគ្គតំ ធម្មំ បច្ចយា បរិត្តោ ច មហគ្គតោ ច ធម្មា ឧប្បជ្ជន្តិ នអធិបតិបច្ចយា – វិបាកំ មហគ្គតំ ឯកំ ខន្ធំ បច្ចយា តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… បដិសន្ធិក្ខណេ…បេ…. (៣)

អប្បមាណំ ធម្មំ បច្ចយា អប្បមាណោ ធម្មោ ឧប្បជ្ជតិ នអធិបតិបច្ចយា – អប្បមាណេ ខន្ធេ បច្ចយា អប្បមាណាធិបតិ. (១)

៣៧. បរិត្តញ្ច អប្បមាណញ្ច ធម្មំ បច្ចយា អប្បមាណោ ធម្មោ ឧប្បជ្ជតិ នអធិបតិបច្ចយា – អប្បមាណេ ខន្ធេ ច វត្ថុញ្ច បច្ចយា អប្បមាណាធិបតិ. (១)

បរិត្តញ្ច មហគ្គតញ្ច ធម្មំ បច្ចយា បរិត្តោ ធម្មោ ឧប្បជ្ជតិ នអធិបតិបច្ចយា – វិបាកេ មហគ្គតេ ខន្ធេ ច មហាភូតេ ច បច្ចយា ចិត្តសមុដ្ឋានំ រូបំ. បដិសន្ធិក្ខណេ…បេ…. (១)

បរិត្តញ្ច មហគ្គតញ្ច ធម្មំ បច្ចយា មហគ្គតោ ធម្មោ ឧប្បជ្ជតិ នអធិបតិបច្ចយា – មហគ្គតេ ខន្ធេ ច វត្ថុញ្ច បច្ចយា មហគ្គតាធិបតិ, វិបាកំ មហគ្គតំ ឯកំ ខន្ធញ្ច វត្ថុញ្ច បច្ចយា តយោ ខន្ធា…បេ… ទ្វេ ខន្ធេ…បេ… បដិសន្ធិក្ខណេ…បេ…. (២)

បរិត្តញ្ច មហគ្គតញ្ច ធម្មំ បច្ចយា បរិត្តោ ច មហគ្គតោ ច ធម្មា ឧប្បជ្ជន្តិ នអធិបតិបច្ចយា – វិបាកំ មហគ្គតំ ឯកំ ខន្ធញ្ច វត្ថុញ្ច បច្ចយា តយោ ខន្ធា…បេ… ទ្វេ ខន្ធេ…បេ… វិបាកេ មហគ្គតេ ខន្ធេ ច មហាភូតេ ច បច្ចយា ចិត្តសមុដ្ឋានំ រូបំ. បដិសន្ធិក្ខណេ វិបាកំ មហគ្គតំ ឯកំ ខន្ធញ្ច វត្ថុញ្ច បច្ចយា តយោ ខន្ធា…បេ… ទ្វេ ខន្ធេ…បេ… វិបាកេ មហគ្គតេ ខន្ធេ ច មហាភូតេ ច បច្ចយា កដត្តារូបំ. (៣)

នអនន្តរបច្ចយាទិ

៣៨. បរិត្តំ ធម្មំ បច្ចយា បរិត្តោ ធម្មោ ឧប្បជ្ជតិ នអនន្តរបច្ចយា… នសមនន្តរបច្ចយា… នអញ្ញមញ្ញបច្ចយា… នឧបនិស្សយបច្ចយា… នបុរេជាតបច្ចយា… (បដិច្ចវារសទិសា ទ្វាទស បញ្ហា) នបច្ឆាជាតបច្ចយា… នអាសេវនបច្ចយា… (បរិបុណ្ណំ, វិបាកោតិ និទ្ទិសិតព្ពំ ចិត្តសមុដ្ឋានំ រូបំ វិបាកោតិ ន កាតព្ពំ) នកម្មបច្ចយា… នវិបាកបច្ចយា… (បដិសន្ធិវិបាកោបិ នត្ថិ) នអាហារបច្ចយា… នឥន្ទ្រិយបច្ចយា… នឈានបច្ចយា… នមគ្គបច្ចយា… នសម្បយុត្តបច្ចយា… នវិប្បយុត្តបច្ចយា… នោនត្ថិបច្ចយា… នោវិគតបច្ចយា.