១. វិភង្គវារោ

ហេតុបច្ចយោ

២៨. បរិត្តំ ធម្មំ បច្ចយា បរិត្តោ ធម្មោ ឧប្បជ្ជតិ ហេតុបច្ចយា – បរិត្តំ ឯកំ ខន្ធំ បច្ចយា តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… បដិសន្ធិក្ខណេ…បេ… ខន្ធេ បច្ចយា វត្ថុ, វត្ថុំ បច្ចយា ខន្ធា; ឯកំ មហាភូតំ បច្ចយា…បេ… ឧបាទារូបំ, វត្ថុំ បច្ចយា បរិត្តា ខន្ធា. (១)

បរិត្តំ ធម្មំ បច្ចយា មហគ្គតោ ធម្មោ ឧប្បជ្ជតិ ហេតុបច្ចយា – វត្ថុំ បច្ចយា មហគ្គតា ខន្ធា. បដិសន្ធិក្ខណេ វត្ថុំ បច្ចយា មហគ្គតា ខន្ធា. (២)

បរិត្តំ ធម្មំ បច្ចយា អប្បមាណោ ធម្មោ ឧប្បជ្ជតិ ហេតុបច្ចយា – វត្ថុំ បច្ចយា អប្បមាណា ខន្ធា. (៣)

បរិត្តំ ធម្មំ បច្ចយា បរិត្តោ ច អប្បមាណោ ច ធម្មា ឧប្បជ្ជន្តិ ហេតុបច្ចយា – វត្ថុំ បច្ចយា អប្បមាណា ខន្ធា, មហាភូតេ បច្ចយា ចិត្តសមុដ្ឋានំ រូបំ. (៤)

បរិត្តំ ធម្មំ បច្ចយា បរិត្តោ ច មហគ្គតោ ច ធម្មា ឧប្បជ្ជន្តិ ហេតុបច្ចយា – វត្ថុំ បច្ចយា មហគ្គតា ខន្ធា, មហាភូតេ បច្ចយា ចិត្តសមុដ្ឋានំ រូបំ. បដិសន្ធិក្ខណេ វត្ថុំ បច្ចយា មហគ្គតា ខន្ធា. (៥)

២៩. មហគ្គតំ ធម្មំ បច្ចយា មហគ្គតោ ធម្មោ ឧប្បជ្ជតិ ហេតុបច្ចយា – មហគ្គតំ ឯកំ ខន្ធំ បច្ចយា តយោ ខន្ធា…បេ… បដិសន្ធិក្ខណេ មហគ្គតំ ឯកំ ខន្ធំ…បេ…. (១)

មហគ្គតំ ធម្មំ បច្ចយា បរិត្តោ ធម្មោ ឧប្បជ្ជតិ ហេតុបច្ចយា – មហគ្គតេ ខន្ធេ បច្ចយា ចិត្តសមុដ្ឋានំ រូបំ. បដិសន្ធិក្ខណេ…បេ…. (២)

មហគ្គតំ ធម្មំ បច្ចយា បរិត្តោ ច មហគ្គតោ ច ធម្មា ឧប្បជ្ជន្តិ ហេតុបច្ចយា – មហគ្គតំ ឯកំ ខន្ធំ បច្ចយា តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… បដិសន្ធិក្ខណេ មហគ្គតំ ឯកំ ខន្ធំ…បេ…. (៣)

អប្បមាណំ ធម្មំ បច្ចយា អប្បមាណោ ធម្មោ ឧប្បជ្ជតិ ហេតុបច្ចយា – អប្បមាណេ… តីណិ.

៣០. បរិត្តញ្ច អប្បមាណញ្ច ធម្មំ បច្ចយា បរិត្តោ ធម្មោ ឧប្បជ្ជតិ ហេតុបច្ចយា – អប្បមាណេ ខន្ធេ ច មហាភូតេ ច បច្ចយា ចិត្តសមុដ្ឋានំ រូបំ. (១)

បរិត្តញ្ច អប្បមាណញ្ច ធម្មំ បច្ចយា អប្បមាណោ ធម្មោ ឧប្បជ្ជតិ ហេតុបច្ចយា – អប្បមាណំ ឯកំ ខន្ធញ្ច វត្ថុញ្ច បច្ចយា តយោ ខន្ធា…បេ…. (២)

បរិត្តញ្ច អប្បមាណញ្ច ធម្មំ បច្ចយា បរិត្តោ ច អប្បមាណោ ច ធម្មា ឧប្បជ្ជន្តិ ហេតុបច្ចយា – អប្បមាណំ ឯកំ ខន្ធញ្ច វត្ថុញ្ច បច្ចយា តយោ ខន្ធា…បេ… ទ្វេ ខន្ធេ…បេ… អប្បមាណេ ខន្ធេ ច មហាភូតេ ច បច្ចយា ចិត្តសមុដ្ឋានំ រូបំ. (៣)

បរិត្តញ្ច មហគ្គតញ្ច ធម្មំ បច្ចយា បរិត្តោ ធម្មោ ឧប្បជ្ជតិ ហេតុបច្ចយា… តីណិ (បដិសន្ធិក្ខណេ តីណិបិ កាតព្ពា).

អារម្មណបច្ចយាទិ

៣១. បរិត្តំ ធម្មំ បច្ចយា បរិត្តោ ធម្មោ ឧប្បជ្ជតិ អារម្មណបច្ចយា – បរិត្តំ ឯកំ ខន្ធំ បច្ចយា តយោ ខន្ធា…បេ… ទ្វេ ខន្ធេ…បេ… បដិសន្ធិក្ខណេ…បេ… វត្ថុំ បច្ចយា ខន្ធា, ចក្ខាយតនំ បច្ចយា ចក្ខុវិញ្ញាណំ…បេ… កាយាយតនំ បច្ចយា កាយវិញ្ញាណំ, វត្ថុំ បច្ចយា បរិត្តា ខន្ធា (អវសេសា ឆ បញ្ហា ហេតុបច្ចយសទិសា សត្ត កាតព្ពា), អធិបតិបច្ចយា (បដិសន្ធិ នត្ថិ, សត្តរស បញ្ហា បរិបុណ្ណា), អនន្តរបច្ចយា…បេ… អវិគតបច្ចយា.

១. បច្ចយានុលោមំ

២. សង្ខ្យាវារោ

៣២. ហេតុយា សត្តរស, អារម្មណេ សត្ត, អធិបតិយា សត្តរស, អនន្តរេ សត្ត, សមនន្តរេ សត្ត, សហជាតេ សត្តរស, អញ្ញមញ្ញេ នវ, និស្សយេ សត្តរស, ឧបនិស្សយេ សត្ត, បុរេជាតេ សត្ត, អាសេវនេ សត្ត, កម្មេ សត្តរស, វិបាកេ សត្តរស, អាហារេ សត្តរស, ឥន្ទ្រិយេ ឈានេ មគ្គេ សត្តរស, សម្បយុត្តេ សត្ត, វិប្បយុត្តេ សត្តរស, អត្ថិយា សត្តរស, នត្ថិយា សត្ត, វិគតេ សត្ត, អវិគតេ សត្តរស (ឯវំ គណេតព្ពំ)

អនុលោមំ.