១. វិភង្គវារោ

នហេតុបច្ចយោ

៧. នេវសេក្ខនាសេក្ខំ ធម្មំ បដិច្ច នេវសេក្ខនាសេក្ខោ ធម្មោ ឧប្បជ្ជតិ នហេតុបច្ចយា – អហេតុកំ នេវសេក្ខនាសេក្ខំ ឯកំ ខន្ធំ បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… អហេតុកបដិសន្ធិក្ខណេ…បេ… ខន្ធេ បដិច្ច វត្ថុ, វត្ថុំ បដិច្ច ខន្ធា, ឯកំ មហាភូតំ…បេ… ពាហិរំ… អាហារសមុដ្ឋានំ… ឧតុសមុដ្ឋានំ… អសញ្ញសត្តានំ ឯកំ មហាភូតំ…បេ… វិចិកិច្ឆាសហគតេ ឧទ្ធច្ចសហគតេ ខន្ធេ បដិច្ច វិចិកិច្ឆាសហគតោ ឧទ្ធច្ចសហគតោ មោហោ. (១)

នអារម្មណបច្ចយោ

៨. សេក្ខំ ធម្មំ បដិច្ច នេវសេក្ខនាសេក្ខោ ធម្មោ ឧប្បជ្ជតិ នអារម្មណបច្ចយា – សេក្ខេ ខន្ធេ បដិច្ច ចិត្តសមុដ្ឋានំ រូបំ. (១)

អសេក្ខំ ធម្មំ បដិច្ច នេវសេក្ខនាសេក្ខោ ធម្មោ ឧប្បជ្ជតិ នអារម្មណបច្ចយា – អសេក្ខេ ខន្ធេ បដិច្ច ចិត្តសមុដ្ឋានំ រូបំ. (១)

នេវសេក្ខនាសេក្ខំ ធម្មំ បដិច្ច នេវសេក្ខនាសេក្ខោ ធម្មោ ឧប្បជ្ជតិ នអារម្មណបច្ចយា – នេវសេក្ខនាសេក្ខេ ខន្ធេ បដិច្ច ចិត្តសមុដ្ឋានំ រូបំ…បេ… បដិសន្ធិក្ខណេ…បេ… ខន្ធេ បដិច្ច វត្ថុ…បេ… ឯកំ មហាភូតំ…បេ… អសញ្ញសត្តានំ…បេ…. (១)

សេក្ខញ្ច នេវសេក្ខនាសេក្ខញ្ច ធម្មំ បដិច្ច នេវសេក្ខនាសេក្ខោ ធម្មោ ឧប្បជ្ជតិ នអារម្មណបច្ចយា – សេក្ខេ ខន្ធេ ច មហាភូតេ ច បដិច្ច ចិត្តសមុដ្ឋានំ រូបំ. (១)

អសេក្ខញ្ច នេវសេក្ខនាសេក្ខញ្ច ធម្មំ បដិច្ច នេវសេក្ខនាសេក្ខោ ធម្មោ ឧប្បជ្ជតិ នអារម្មណបច្ចយា – អសេក្ខេ ខន្ធេ ច មហាភូតេ ច បដិច្ច ចិត្តសមុដ្ឋានំ រូបំ. (១)

នអធិបតិបច្ចយាទិ

៩. សេក្ខំ ធម្មំ បដិច្ច សេក្ខោ ធម្មោ ឧប្បជ្ជតិ នអធិបតិបច្ចយា – សេក្ខេ ខន្ធេ បដិច្ច សេក្ខោ អធិបតិ. (១)

អសេក្ខំ ធម្មំ បដិច្ច អសេក្ខោ ធម្មោ ឧប្បជ្ជតិ នអធិបតិបច្ចយា – អសេក្ខេ ខន្ធេ បដិច្ច អសេក្ខោ អធិបតិ. (១)

នេវសេក្ខនាសេក្ខំ ធម្មំ បដិច្ច នេវសេក្ខនាសេក្ខោ ធម្មោ ឧប្បជ្ជតិ នអធិបតិបច្ចយា… (បរិបុណ្ណំ, បដិសន្ធិបិ មហាភូតាបិ សព្ពេ) នអនន្តរបច្ចយា… នសមនន្តរបច្ចយា… នអញ្ញមញ្ញបច្ចយា… នឧបនិស្សយបច្ចយា… នបុរេជាតបច្ចយា… សត្ត (កុសលត្តិកសទិសា)… នបច្ឆាជាតបច្ចយា…បេ… នអាសេវនបច្ចយា. វិបាកំ សេក្ខំ ឯកំ ខន្ធំ បដិច្ច តយោ ខន្ធា…បេ… ទ្វេ ខន្ធេ…បេ…. (១)

១០. សេក្ខំ ធម្មំ បដិច្ច នេវសេក្ខនាសេក្ខោ ធម្មោ ឧប្បជ្ជតិ នអាសេវនបច្ចយា – សេក្ខេ ខន្ធេ បដិច្ច ចិត្តសមុដ្ឋានំ រូបំ. (២)

សេក្ខំ ធម្មំ បដិច្ច សេក្ខោ ច នេវសេក្ខនាសេក្ខោ ច ធម្មា ឧប្បជ្ជន្តិ នអាសេវនបច្ចយា – វិបាកំ សេក្ខំ ឯកំ ខន្ធំ បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ…. (៣)

អសេក្ខំ ធម្មំ បដិច្ច អសេក្ខោ ធម្មោ… តីណិ.

នេវសេក្ខនាសេក្ខំ ធម្មំ បដិច្ច នេវសេក្ខនាសេក្ខោ ធម្មោ ឧប្បជ្ជតិ នអាសេវនបច្ចយា… នេវសេក្ខនាសេក្ខំ (ឯកំ, បរិបុណ្ណំ, សេក្ខញ្ច, នេវសេក្ខនាសេក្ខញ្ច, ឃដនា បរិបុណ្ណា, ទ្វេបិ កាតព្ពា. នវ) នកម្មបច្ចយា – សេក្ខេ ខន្ធេ បដិច្ច សេក្ខា ចេតនា.

នេវសេក្ខនាសេក្ខំ ធម្មំ បដិច្ច នេវសេក្ខនាសេក្ខោ ធម្មោ ឧប្បជ្ជតិ នកម្មបច្ចយា – នេវសេក្ខនាសេក្ខេ ខន្ធេ បដិច្ច នេវសេក្ខនាសេក្ខា ចេតនា; ពាហិរំ… អាហារសមុដ្ឋានំ… ឧតុសមុដ្ឋានំ… ឯកំ មហាភូតំ…បេ….

នវិបាកបច្ចយោ

១១. សេក្ខំ ធម្មំ បដិច្ច សេក្ខោ ធម្មោ ឧប្បជ្ជតិ នវិបាកបច្ចយា – សេក្ខំ ឯកំ ខន្ធំ បដិច្ច តយោ ខន្ធា…បេ…. (១)

សេក្ខំ ធម្មំ បដិច្ច នេវសេក្ខនាសេក្ខោ ធម្មោ ឧប្បជ្ជតិ នវិបាកបច្ចយា – សេក្ខេ ខន្ធេ បដិច្ច ចិត្តសមុដ្ឋានំ រូបំ.(២)

សេក្ខំ ធម្មំ បដិច្ច សេក្ខោ ច នេវសេក្ខនាសេក្ខោ ច ធម្មា ឧប្បជ្ជន្តិ នវិបាកបច្ចយា – សេក្ខំ ឯកំ ខន្ធំ បដិច្ច តយោ ខន្ធា ចិត្តសមុដ្ឋានញ្ច រូបំ…បេ…. (៣)

១២. នេវសេក្ខនាសេក្ខំ ធម្មំ បដិច្ច នេវសេក្ខនាសេក្ខោ ធម្មោ ឧប្បជ្ជតិ នវិបាកបច្ចយា (បរិបុណ្ណំ, បដិសន្ធិ នត្ថិ ).

សេក្ខញ្ច នេវសេក្ខនាសេក្ខញ្ច ធម្មំ បដិច្ច នេវសេក្ខនាសេក្ខោ ធម្មោ ឧប្បជ្ជតិ នវិបាកបច្ចយា – សេក្ខេ ខន្ធេ ច មហាភូតេ ច បដិច្ច ចិត្តសមុដ្ឋានំ រូបំ. (១)

នអាហារបច្ចយាទិ

១៣. នេវសេក្ខនាសេក្ខំ ធម្មំ បដិច្ច នេវសេក្ខនាសេក្ខោ ធម្មោ ឧប្បជ្ជតិ នអាហារបច្ចយា… នឥន្ទ្រិយបច្ចយា… នឈានបច្ចយា… នមគ្គបច្ចយា.

នសម្បយុត្តបច្ចយោ

១៤. សេក្ខំ ធម្មំ បដិច្ច នេវសេក្ខនាសេក្ខោ ធម្មោ ឧប្បជ្ជតិ នសម្បយុត្តបច្ចយា…បេ… (នអារម្មណបច្ចយសទិសំ).

នវិប្បយុត្តបច្ចយាទិ

សេក្ខំ ធម្មំ បដិច្ច សេក្ខោ ធម្មោ ឧប្បជ្ជតិ នវិប្បយុត្តបច្ចយា. អរូបេ សេក្ខំ ឯកំ ខន្ធំ បដិច្ច តយោ ខន្ធា…បេ…. (១)

អសេក្ខំ ធម្មំ បដិច្ច អសេក្ខោ ធម្មោ ឧប្បជ្ជតិ នវិប្បយុត្តបច្ចយា – អរូបេ អសេក្ខំ ឯកំ ខន្ធំ បដិច្ច តយោ ខន្ធា…បេ…. (១)

នេវសេក្ខនាសេក្ខំ ធម្មំ បដិច្ច នេវសេក្ខនាសេក្ខោ ធម្មោ ឧប្បជ្ជតិ នវិប្បយុត្តបច្ចយា – អរូបេ នេវសេក្ខនាសេក្ខំ ឯកំ ខន្ធំ បដិច្ច តយោ ខន្ធា…បេ… ពាហិរំ… អាហារសមុដ្ឋានំ… ឧតុសមុដ្ឋានំ… អសញ្ញសត្តានំ…បេ… នោនត្ថិបច្ចយា… នោវិគតបច្ចយា.