១. វិភង្គវារោ

ហេតុបច្ចយោ

៤២. សេក្ខោ ធម្មោ សេក្ខស្ស ធម្មស្ស ហេតុបច្ចយេន បច្ចយោ – សេក្ខា ហេតូ សម្បយុត្តកានំ ខន្ធានំ ហេតុបច្ចយេន បច្ចយោ. (១)

សេក្ខោ ធម្មោ នេវសេក្ខនាសេក្ខស្ស ធម្មស្ស ហេតុបច្ចយេន បច្ចយោ – សេក្ខា ហេតូ ចិត្តសមុដ្ឋានានំ រូបានំ ហេតុបច្ចយេន បច្ចយោ. (២)

សេក្ខោ ធម្មោ សេក្ខស្ស ច នេវសេក្ខនាសេក្ខស្ស ច ធម្មស្ស ហេតុបច្ចយេន បច្ចយោ – សេក្ខា ហេតូ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ ហេតុបច្ចយេន បច្ចយោ. (៣)

អសេក្ខោ ធម្មោ អសេក្ខស្ស ធម្មស្ស (តីណិ).

នេវសេក្ខនាសេក្ខោ ធម្មោ នេវសេក្ខនាសេក្ខស្ស ធម្មស្ស ហេតុបច្ចយេន បច្ចយោ – នេវសេក្ខនាសេក្ខា ហេតូ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ ហេតុបច្ចយេន បច្ចយោ. បដិសន្ធិក្ខណេ…បេ…. (១)

អារម្មណបច្ចយោ

៤៣. សេក្ខោ ធម្មោ នេវសេក្ខនាសេក្ខស្ស ធម្មស្ស អារម្មណបច្ចយេន បច្ចយោ – អរិយា មគ្គា វុដ្ឋហិត្វា មគ្គំ បច្ចវេក្ខន្តិ, សេក្ខំ ផលំ បច្ចវេក្ខន្តិ, ចេតោបរិយញាណេន សេក្ខចិត្តសមង្គិស្ស ចិត្តំ ជានន្តិ, សេក្ខា ខន្ធា ចេតោបរិយញាណស្ស, បុព្ពេនិវាសានុស្សតិញាណស្ស, អនាគតំសញាណស្ស, អាវជ្ជនាយ អារម្មណបច្ចយេន បច្ចយោ. (១)

អសេក្ខោ ធម្មោ នេវសេក្ខនាសេក្ខស្ស ធម្មស្ស អារម្មណបច្ចយេន បច្ចយោ – អរហា អសេក្ខំ ផលំ បច្ចវេក្ខតិ, ចេតោបរិយញាណេន អសេក្ខចិត្តសមង្គិស្ស ចិត្តំ ជានាតិ, អសេក្ខា ខន្ធា ចេតោបរិយញាណស្ស, បុព្ពេនិវាសានុស្សតិញាណស្ស, អនាគតំសញាណស្ស, អាវជ្ជនាយ អារម្មណបច្ចយេន បច្ចយោ. (១)

៤៤. នេវសេក្ខនាសេក្ខោ ធម្មោ នេវសេក្ខនាសេក្ខស្ស ធម្មស្ស អារម្មណបច្ចយេន បច្ចយោ – ទានំ ទត្វា សីលំ សមាទិយិត្វា ឧបោសថកម្មំ កត្វា តំ បច្ចវេក្ខតិ, បុព្ពេ សុចិណ្ណានិ…បេ… ឈានា វុដ្ឋហិត្វា ឈានំ បច្ចវេក្ខតិ, អរិយា និព្ពានំ បច្ចវេក្ខន្តិ. និព្ពានំ គោត្រភុស្ស, វោទានស្ស, អាវជ្ជនាយ អារម្មណបច្ចយេន បច្ចយោ. អរិយា បហីនេ កិលេសេ បច្ចវេក្ខន្តិ វិក្ខម្ភិតេ កិលេសេ បច្ចវេក្ខន្តិ, បុព្ពេ សមុទាចិណ្ណេ កិលេសេ ជានន្តិ, ចក្ខុំ អនិច្ចតោ ទុក្ខតោ អនត្តតោ វិបស្សន្តិ, អស្សាទេន្តិ អភិនន្ទន្តិ, តំ អារព្ភ រាគោ ឧប្បជ្ជតិ…បេ… ទោមនស្សំ ឧប្បជ្ជតិ, សោតំ…បេ… វត្ថុំ នេវសេក្ខនាសេក្ខេ ខន្ធេ អនិច្ចតោ ទុក្ខតោ អនត្តតោ វិបស្សន្តិ, អស្សាទេន្តិ…បេ… ទោមនស្សំ ឧប្បជ្ជតិ, ទិព្ពេន ចក្ខុនា រូបំ បស្សតិ, ទិព្ពាយ សោតធាតុយា សទ្ទំ សុណាតិ, ចេតោបរិយញាណេន នេវសេក្ខនាសេក្ខចិត្តសមង្គិស្ស ចិត្តំ ជានាតិ, អាកាសានញ្ចាយតនំ វិញ្ញាណញ្ចាយតនស្ស…បេ… អាកិញ្ចញ្ញាយតនំ នេវសញ្ញានាសញ្ញាយតនស្ស អារម្មណបច្ចយេន បច្ចយោ. រូបាយតនំ ចក្ខុវិញ្ញាណស្ស…បេ… ផោដ្ឋព្ពាយតនំ កាយវិញ្ញាណស្ស…បេ… នេវសេក្ខនាសេក្ខា ខន្ធា ឥទ្ធិវិធញាណស្ស, ចេតោបរិយញាណស្ស, បុព្ពេនិវាសានុស្សតិញាណស្ស, យថាកម្មូបគញាណស្ស, អនាគតំសញាណស្ស, អាវជ្ជនាយ អារម្មណបច្ចយេន បច្ចយោ. (១)

នេវសេក្ខនាសេក្ខោ ធម្មោ សេក្ខស្ស ធម្មស្ស អារម្មណបច្ចយេន បច្ចយោ – និព្ពានំ មគ្គស្ស, សេក្ខស្ស ផលស្ស អារម្មណបច្ចយេន បច្ចយោ. (២)

នេវសេក្ខនាសេក្ខោ ធម្មោ អសេក្ខស្ស ធម្មស្ស អារម្មណបច្ចយេន បច្ចយោ – និព្ពានំ អសេក្ខស្ស ផលស្ស អារម្មណបច្ចយេន បច្ចយោ. (៣)

អធិបតិបច្ចយោ

៤៥. សេក្ខោ ធម្មោ សេក្ខស្ស ធម្មស្ស អធិបតិបច្ចយេន បច្ចយោ. សហជាតាធិបតិ – សេក្ខាធិបតិ សម្បយុត្តកានំ ខន្ធានំ អធិបតិបច្ចយេន បច្ចយោ. (១)

សេក្ខោ ធម្មោ នេវសេក្ខនាសេក្ខស្ស ធម្មស្ស អធិបតិបច្ចយេន បច្ចយោ. អារម្មណាធិបតិ, សហជាតាធិបតិ. អារម្មណាធិបតិ – អរិយា មគ្គា វុដ្ឋហិត្វា មគ្គំ គរុំ កត្វា បច្ចវេក្ខន្តិ, សេក្ខំ ផលំ គរុំ កត្វា បច្ចវេក្ខន្តិ. សហជាតាធិបតិ – សេក្ខាធិបតិ ចិត្តសមុដ្ឋានានំ រូបានំ អធិបតិបច្ចយេន បច្ចយោ. (២)

សេក្ខោ ធម្មោ សេក្ខស្ស ច នេវសេក្ខនាសេក្ខស្ស ច ធម្មស្ស អធិបតិបច្ចយេន បច្ចយោ. សហជាតាធិបតិ – សេក្ខាធិបតិ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ អធិបតិបច្ចយេន បច្ចយោ. (៣)

៤៦. អសេក្ខោ ធម្មោ អសេក្ខស្ស ធម្មស្ស អធិបតិបច្ចយេន បច្ចយោ. សហជាតាធិបតិ – អសេក្ខាធិបតិ សម្បយុត្តកានំ ខន្ធានំ អធិបតិបច្ចយេន បច្ចយោ. (១)

អសេក្ខោ ធម្មោ នេវសេក្ខនាសេក្ខស្ស ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – អរហា អសេក្ខំ ផលំ គរុំ កត្វា បច្ចវេក្ខតិ. សហជាតាធិបតិ – អសេក្ខាធិបតិ ចិត្តសមុដ្ឋានានំ រូបានំ អធិបតិបច្ចយេន បច្ចយោ. (២)

អសេក្ខោ ធម្មោ អសេក្ខស្ស ច នេវសេក្ខនាសេក្ខស្ស ច ធម្មស្ស អធិបតិបច្ចយេន បច្ចយោ. សហជាតាធិបតិ – អសេក្ខាធិបតិ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ អធិបតិបច្ចយេន បច្ចយោ. (៣)

៤៧. នេវសេក្ខនាសេក្ខោ ធម្មោ នេវសេក្ខនាសេក្ខស្ស ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – ទានំ ទត្វា សីលំ សមាទិយិត្វា ឧបោសថកម្មំ កត្វា តំ គរុំ កត្វា បច្ចវេក្ខតិ, បុព្ពេ សុចិណ្ណានិ គរុំ កត្វា បច្ចវេក្ខតិ, ឈានា វុដ្ឋហិត្វា ឈានំ គរុំ កត្វា បច្ចវេក្ខតិ, អរិយា និព្ពានំ គរុំ កត្វា បច្ចវេក្ខន្តិ, និព្ពានំ គោត្រភុស្ស, វោទានស្ស អធិបតិបច្ចយេន បច្ចយោ. ចក្ខុំ គរុំ កត្វា អស្សាទេតិ អភិនន្ទតិ, តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ. សោតំ…បេ… វត្ថុំ នេវសេក្ខនាសេក្ខេ ខន្ធេ គរុំ កត្វា អស្សាទេតិ អភិនន្ទតិ, តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ. សហជាតាធិបតិ – នេវសេក្ខនាសេក្ខាធិបតិ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ អធិបតិបច្ចយេន បច្ចយោ. (១)

នេវសេក្ខនាសេក្ខោ ធម្មោ សេក្ខស្ស ធម្មស្ស អធិបតិបច្ចយេន បច្ចយោ. អារម្មណាធិបតិ – និព្ពានំ មគ្គស្ស, សេក្ខស្ស ផលស្ស អធិបតិបច្ចយេន បច្ចយោ. (២)

នេវសេក្ខនាសេក្ខោ ធម្មោ អសេក្ខស្ស ធម្មស្ស អធិបតិបច្ចយេន បច្ចយោ. អារម្មណាធិបតិ – និព្ពានំ អសេក្ខស្ស ផលស្ស អធិបតិបច្ចយេន បច្ចយោ. (៣)

អនន្តរបច្ចយោ

៤៨. សេក្ខោ ធម្មោ សេក្ខស្ស ធម្មស្ស អនន្តរបច្ចយេន បច្ចយោ – បុរិមា បុរិមា សេក្ខា ខន្ធា បច្ឆិមានំ បច្ឆិមានំ សេក្ខានំ ខន្ធានំ អនន្តរបច្ចយេន បច្ចយោ. មគ្គោ សេក្ខស្ស ផលស្ស… សេក្ខំ ផលំ សេក្ខស្ស ផលស្ស អនន្តរបច្ចយេន បច្ចយោ. (១)

សេក្ខោ ធម្មោ អសេក្ខស្ស ធម្មស្ស អនន្តរបច្ចយេន បច្ចយោ – មគ្គោ អសេក្ខស្ស ផលស្ស អនន្តរបច្ចយេន បច្ចយោ. (២)

សេក្ខោ ធម្មោ នេវសេក្ខនាសេក្ខស្ស ធម្មស្ស អនន្តរបច្ចយេន បច្ចយោ – សេក្ខំ ផលំ វុដ្ឋានស្ស អនន្តរបច្ចយេន បច្ចយោ. (៣)

៤៩. អសេក្ខោ ធម្មោ អសេក្ខស្ស ធម្មស្ស អនន្តរបច្ចយេន បច្ចយោ – បុរិមា បុរិមា អសេក្ខា ខន្ធា បច្ឆិមានំ បច្ឆិមានំ អសេក្ខានំ ខន្ធានំ អនន្តរបច្ចយេន បច្ចយោ. អសេក្ខំ ផលំ អសេក្ខស្ស ផលស្ស អនន្តរបច្ចយេន បច្ចយោ. (១)

អសេក្ខោ ធម្មោ នេវសេក្ខនាសេក្ខស្ស ធម្មស្ស អនន្តរបច្ចយេន បច្ចយោ – អសេក្ខំ ផលំ វុដ្ឋានស្ស អនន្តរបច្ចយេន បច្ចយោ. (២)

៥០. នេវសេក្ខនាសេក្ខោ ធម្មោ នេវសេក្ខនាសេក្ខស្ស ធម្មស្ស អនន្តរបច្ចយេន បច្ចយោ – បុរិមា បុរិមា នេវសេក្ខនាសេក្ខា ខន្ធា បច្ឆិមានំ បច្ឆិមានំ នេវសេក្ខនាសេក្ខានំ ខន្ធានំ…បេ… អនុលោមំ គោត្រភុស្ស… អនុលោមំ វោទានស្ស… អាវជ្ជនា នេវសេក្ខនាសេក្ខានំ ខន្ធានំ អនន្តរបច្ចយេន បច្ចយោ. (១)

នេវសេក្ខនាសេក្ខោ ធម្មោ សេក្ខស្ស ធម្មស្ស អនន្តរបច្ចយេន បច្ចយោ – គោត្រភុ មគ្គស្ស… វោទានំ មគ្គស្ស… អនុលោមំ សេក្ខាយ ផលសមាបត្តិយា… និរោធា វុដ្ឋហន្តស្ស នេវសញ្ញានាសញ្ញាយតនកុសលំ សេក្ខាយ ផលសមាបត្តិយា អនន្តរបច្ចយេន បច្ចយោ. (២)

នេវសេក្ខនាសេក្ខោ ធម្មោ អសេក្ខស្ស ធម្មស្ស អនន្តរបច្ចយេន បច្ចយោ – អនុលោមំ អសេក្ខាយ ផលសមាបត្តិយា… និរោធា វុដ្ឋហន្តស្ស នេវសញ្ញានាសញ្ញាយតនកិរិយំ អសេក្ខាយ ផលសមាបត្តិយា អនន្តរបច្ចយេន បច្ចយោ. (៣)

សមនន្តរបច្ចយោ

៥១. សេក្ខោ ធម្មោ សេក្ខស្ស ធម្មស្ស សមនន្តរបច្ចយេន បច្ចយោ…បេ… (អនន្តរសទិសំ, អដ្ឋ បញ្ហា).

សហជាតបច្ចយាទិ

៥២. សេក្ខោ ធម្មោ សេក្ខស្ស ធម្មស្ស សហជាតបច្ចយេន បច្ចយោ…បេ… (បដិច្ចវារេ សហជាតសទិសំ, នវ បញ្ហា) អញ្ញមញ្ញបច្ចយេន បច្ចយោ (បដិច្ចវារេ អញ្ញមញ្ញសទិសំ, តីណិ. និស្សយបច្ចយេ កុសលត្តិកេ និស្សយបច្ចយសទិសំ, តេរស បញ្ហា).

ឧបនិស្សយបច្ចយោ

៥៣. សេក្ខោ ធម្មោ សេក្ខស្ស ធម្មស្ស ឧបនិស្សយបច្ចយេន បច្ចយោ – អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – បឋមោ មគ្គោ ទុតិយស្ស មគ្គស្ស ឧបនិស្សយបច្ចយេន បច្ចយោ. ទុតិយោ មគ្គោ តតិយស្ស មគ្គស្ស ឧបនិស្សយបច្ចយេន បច្ចយោ. តតិយោ មគ្គោ ចតុត្ថស្ស មគ្គស្ស ឧបនិស្សយបច្ចយេន បច្ចយោ. មគ្គោ សេក្ខាយ ផលសមាបត្តិយា ឧបនិស្សយបច្ចយេន បច្ចយោ. (១)

សេក្ខោ ធម្មោ អសេក្ខស្ស ធម្មស្ស ឧបនិស្សយបច្ចយេន បច្ចយោ – អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – មគ្គោ អសេក្ខាយ ផលសមាបត្តិយា ឧបនិស្សយបច្ចយេន បច្ចយោ. (២)

សេក្ខោ ធម្មោ នេវសេក្ខនាសេក្ខស្ស ធម្មស្ស ឧបនិស្សយបច្ចយេន បច្ចយ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – អរិយា មគ្គំ ឧបនិស្សាយ អនុប្បន្នំ កុសលសមាបត្តិំ ឧប្បាទេន្តិ, ឧប្បន្នំ សមាបជ្ជន្តិ, សង្ខារេ អនិច្ចតោ…បេ… វិបស្សន្តិ, មគ្គោ អរិយានំ អត្ថប្បដិសម្ភិទាយ…បេ… បដិភានប្បដិសម្ភិទាយ… ឋានាឋានកោសល្លស្ស ឧបនិស្សយបច្ចយេន បច្ចយោ. សេក្ខា ផលសមាបត្តិយា កាយិកស្ស សុខស្ស ឧបនិស្សយបច្ចយេន បច្ចយោ. (៣)

៥៤. អសេក្ខោ ធម្មោ អសេក្ខស្ស ធម្មស្ស ឧបនិស្សយបច្ចយេន បច្ចយោ. អនន្តរូបនិស្សយោ – បុរិមា បុរិមា អសេក្ខា ខន្ធា បច្ឆិមានំ បច្ឆិមានំ អសេក្ខានំ ខន្ធានំ…បេ… អសេក្ខំ ផលំ អសេក្ខស្ស ផលស្ស ឧបនិស្សយបច្ចយេន បច្ចយោ. (១)

អសេក្ខោ ធម្មោ នេវសេក្ខនាសេក្ខស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – អសេក្ខា ផលសមាបត្តិ កាយិកស្ស សុខស្ស ឧបនិស្សយបច្ចយេន បច្ចយោ. (២)

៥៥. នេវសេក្ខនាសេក្ខោ ធម្មោ នេវសេក្ខនាសេក្ខស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – នេវសេក្ខនាសេក្ខំ សទ្ធំ ឧបនិស្សាយ ទានំ ទេតិ. សីលំ…បេ… ឧបោសថកម្មំ…បេ… ឈានំ…បេ… វិបស្សនំ…បេ… អភិញ្ញំ…បេ… សមាបត្តិំ ឧប្បាទេតិ, មានំ ជប្បេតិ, ទិដ្ឋិំ គណ្ហាតិ. នេវសេក្ខនាសេក្ខំ សីលំ…បេ… បញ្ញំ… រាគំ…បេ… បត្ថនំ… កាយិកំ សុខំ…បេ… ឧតុំ… ភោជនំ… សេនាសនំ ឧបនិស្សាយ ទានំ ទេតិ, សីលំ…បេ… សមាបត្តិំ ឧប្បាទេតិ, បាណំ ហនតិ…បេ… សង្ឃំ ភិន្ទតិ. នេវសេក្ខនាសេក្ខា សទ្ធា…បេ… បញ្ញា, រាគោ…បេ… បត្ថនា, កាយិកំ សុខំ…បេ… សេនាសនំ នេវសេក្ខនាសេក្ខាយ សទ្ធាយ…បេ… បញ្ញាយ, រាគស្ស…បេ… បត្ថនាយ, កាយិកស្ស សុខស្ស, កាយិកស្ស ទុក្ខស្ស ឧបនិស្សយបច្ចយេន បច្ចយោ. បឋមស្ស ឈានស្ស បរិកម្មំ បឋមស្ស ឈានស្ស ឧបនិស្សយបច្ចយេន បច្ចយោ…បេ… នេវសញ្ញានាសញ្ញាយតនស្ស បរិកម្មំ នេវសញ្ញានាសញ្ញាយតនស្ស…បេ… បឋមំ ឈានំ ទុតិយស្ស ឈានស្ស ឧបនិស្សយបច្ចយេន បច្ចយោ…បេ… អាកិញ្ចញ្ញាយតនំ នេវសញ្ញានាសញ្ញាយតនស្ស ឧបនិស្សយបច្ចយេន បច្ចយោ. (១)

នេវសេក្ខនាសេក្ខោ ធម្មោ សេក្ខស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – បឋមស្ស មគ្គស្ស បរិកម្មំ បឋមស្ស មគ្គស្ស ឧបនិស្សយបច្ចយេន បច្ចយោ…បេ… ចតុត្ថស្ស មគ្គស្ស បរិកម្មំ ចតុត្ថស្ស មគ្គស្ស ឧបនិស្សយបច្ចយេន បច្ចយោ. (២)

នេវសេក្ខនាសេក្ខោ ធម្មោ អសេក្ខស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – កាយិកំ សុខំ… កាយិកំ ទុក្ខំ… ឧតុំ… ភោជនំ… សេនាសនំ អសេក្ខាយ ផលសមាបត្តិយា ឧបនិស្សយបច្ចយេន បច្ចយោ. (៣)

បុរេជាតបច្ចយោ

៥៦. នេវសេក្ខនាសេក្ខោ ធម្មោ នេវសេក្ខនាសេក្ខស្ស ធម្មស្ស បុរេជាតបច្ចយេន បច្ចយោ – អារម្មណបុរេជាតំ, វត្ថុបុរេជាតំ. អារម្មណបុរេជាតំ – ចក្ខុំ អនិច្ចតោ…បេ… វិបស្សតិ, អស្សាទេតិ អភិនន្ទតិ; តំ អារព្ភ រាគោ ឧប្បជ្ជតិ…បេ… ទោមនស្សំ ឧប្បជ្ជតិ. សោតំ…បេ… វត្ថុំ អនិច្ចតោ ទុក្ខតោ អនត្តតោ វិបស្សតិ…បេ… ទោមនស្សំ ឧប្បជ្ជតិ, ទិព្ពេន ចក្ខុនា រូបំ បស្សតិ, ទិព្ពាយ សោតធាតុយា សទ្ទំ សុណាតិ, រូបាយតនំ ចក្ខុវិញ្ញាណស្ស…បេ… ផោដ្ឋព្ពាយតនំ កាយវិញ្ញាណស្ស បុរេជាតបច្ចយេន បច្ចយោ. វត្ថុបុរេជាតំ – ចក្ខាយតនំ ចក្ខុវិញ្ញាណស្ស…បេ… កាយាយតនំ កាយវិញ្ញាណស្ស, វត្ថុ នេវសេក្ខនាសេក្ខានំ ខន្ធានំ បុរេជាតបច្ចយេន បច្ចយោ. (១)

នេវសេក្ខនាសេក្ខោ ធម្មោ សេក្ខស្ស ធម្មស្ស បុរេជាតបច្ចយេន បច្ចយោ. វត្ថុបុរេជាតំ – វត្ថុ សេក្ខានំ ខន្ធានំ បុរេជាតបច្ចយេន បច្ចយោ. (២)

នេវសេក្ខនាសេក្ខោ ធម្មោ អសេក្ខស្ស ធម្មស្ស បុរេជាតបច្ចយេន បច្ចយោ. វត្ថុបុរេជាតំ – វត្ថុ អសេក្ខានំ ខន្ធានំ បុរេជាតបច្ចយេន បច្ចយោ. (៣)

បច្ឆាជាតបច្ចយោ

៥៧. សេក្ខោ ធម្មោ នេវសេក្ខនាសេក្ខស្ស ធម្មស្ស បច្ឆាជាតបច្ចយេន បច្ចយោ – បច្ឆាជាតា សេក្ខា ខន្ធា បុរេជាតស្ស ឥមស្ស កាយស្ស បច្ឆាជាតបច្ចយេន បច្ចយោ. (១)

អសេក្ខោ ធម្មោ នេវសេក្ខនាសេក្ខស្ស ធម្មស្ស បច្ឆាជាតបច្ចយេន បច្ចយោ – បច្ឆាជាតា អសេក្ខា ខន្ធា បុរេជាតស្ស ឥមស្ស កាយស្ស បច្ឆាជាតបច្ចយេន បច្ចយោ. (១)

នេវសេក្ខនាសេក្ខោ ធម្មោ នេវសេក្ខនាសេក្ខស្ស ធម្មស្ស បច្ឆាជាតបច្ចយេន បច្ចយោ – បច្ឆាជាតា នេវសេក្ខនាសេក្ខា ខន្ធា បុរេជាតស្ស ឥមស្ស កាយស្ស បច្ឆាជាតបច្ចយេន បច្ចយោ. (១)

អាសេវនបច្ចយោ

៥៨. នេវសេក្ខនាសេក្ខោ ធម្មោ នេវសេក្ខនាសេក្ខស្ស ធម្មស្ស អាសេវនបច្ចយេន បច្ចយោ – បុរិមា បុរិមា នេវសេក្ខនាសេក្ខា ខន្ធា បច្ឆិមានំ បច្ឆិមានំ នេវសេក្ខនាសេក្ខានំ ខន្ធានំ អាសេវនបច្ចយេន បច្ចយោ. អនុលោមំ គោត្រភុស្ស… អនុលោមំ វោទានស្ស អាសេវនបច្ចយេន បច្ចយោ. (១)

នេវសេក្ខនាសេក្ខោ ធម្មោ សេក្ខស្ស ធម្មស្ស អាសេវនបច្ចយេន បច្ចយោ – គោត្រភុ មគ្គស្ស… វោទានំ មគ្គស្ស អាសេវនបច្ចយេន បច្ចយោ. (២)

កម្មបច្ចយោ

៥៩. សេក្ខោ ធម្មោ សេក្ខស្ស ធម្មស្ស កម្មបច្ចយេន បច្ចយោ – សហជាតា, នានាក្ខណិកា. សហជាតា – សេក្ខា ចេតនា សម្បយុត្តកានំ ខន្ធានំ កម្មបច្ចយេន បច្ចយោ. នានាក្ខណិកា – សេក្ខា ចេតនា វិបាកានំ សេក្ខានំ ខន្ធានំ កម្មបច្ចយេន បច្ចយោ. (១)

សេក្ខោ ធម្មោ អសេក្ខស្ស ធម្មស្ស កម្មបច្ចយេន បច្ចយោ. នានាក្ខណិកា – សេក្ខា ចេតនា អសេក្ខានំ ខន្ធានំ កម្មបច្ចយេន បច្ចយោ. (២)

សេក្ខោ ធម្មោ នេវសេក្ខនាសេក្ខស្ស ធម្មស្ស កម្មបច្ចយេន បច្ចយោ. សហជាតា – សេក្ខា ចេតនា ចិត្តសមុដ្ឋានានំ រូបានំ កម្មបច្ចយេន បច្ចយោ. (៣)

សេក្ខោ ធម្មោ សេក្ខស្ស ច នេវសេក្ខនាសេក្ខស្ស ច ធម្មស្ស កម្មបច្ចយេន បច្ចយោ – សេក្ខា ចេតនា សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ កម្មបច្ចយេន បច្ចយោ. (៤)

៦០. អសេក្ខោ ធម្មោ អសេក្ខស្ស ធម្មស្ស កម្មបច្ចយេន បច្ចយោ – អសេក្ខា ចេតនា សម្បយុត្តកានំ ខន្ធានំ កម្មបច្ចយេន បច្ចយោ. (១)

អសេក្ខោ ធម្មោ នេវសេក្ខនាសេក្ខស្ស ធម្មស្ស កម្មបច្ចយេន បច្ចយោ – អសេក្ខា ចេតនា ចិត្តសមុដ្ឋានានំ រូបានំ កម្មបច្ចយេន បច្ចយោ. (២)

អសេក្ខោ ធម្មោ អសេក្ខស្ស ច នេវសេក្ខនាសេក្ខស្ស ច ធម្មស្ស កម្មបច្ចយេន បច្ចយោ – អសេក្ខា ចេតនា សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ កម្មបច្ចយេន បច្ចយោ. (៣)

៦១. នេវសេក្ខនាសេក្ខោ ធម្មោ នេវសេក្ខនាសេក្ខស្ស ធម្មស្ស កម្មបច្ចយេន បច្ចយោ – សហជាតា, នានាក្ខណិកា. សហជាតា – នេវសេក្ខនាសេក្ខា ចេតនា សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ កម្មបច្ចយេន បច្ចយោ. បដិសន្ធិក្ខណេ…បេ…. នានាក្ខណិកា – នេវសេក្ខនាសេក្ខា ចេតនា វិបាកានំ នេវសេក្ខនាសេក្ខានំ ខន្ធានំ កដត្តា ច រូបានំ កម្មបច្ចយេន បច្ចយោ. (១)

វិបាកបច្ចយោ

៦២. សេក្ខោ ធម្មោ សេក្ខស្ស ធម្មស្ស វិបាកបច្ចយេន បច្ចយោ – វិបាកោ សេក្ខោ ឯកោ ខន្ធោ តិណ្ណន្នំ ខន្ធានំ…បេ… (សេក្ខមូលកេ តីណិ ).

អសេក្ខោ ធម្មោ អសេក្ខស្ស ធម្មស្ស វិបាកបច្ចយេន បច្ចយោ – អសេក្ខោ ឯកោ ខន្ធោ តិណ្ណន្នំ ខន្ធានំ…បេ… (អសេក្ខមូលកេ តីណិ).

នេវសេក្ខនាសេក្ខោ ធម្មោ នេវសេក្ខនាសេក្ខស្ស ធម្មស្ស វិបាកបច្ចយេន បច្ចយោ – វិបាកោ នេវសេក្ខនាសេក្ខោ ឯកោ ខន្ធោ តិណ្ណន្នំ ខន្ធានំ…បេ… បដិសន្ធិក្ខណេ…បេ… ខន្ធា វត្ថុស្ស វិបាកបច្ចយេន បច្ចយោ. (១)

អាហារបច្ចយាទិ

៦៣. សេក្ខោ ធម្មោ សេក្ខស្ស ធម្មស្ស អាហារបច្ចយេន បច្ចយោ… ឥន្ទ្រិយបច្ចយេន បច្ចយោ… ឈានបច្ចយេន បច្ចយោ… មគ្គបច្ចយេន បច្ចយោ… សម្បយុត្តបច្ចយេន បច្ចយោ…បេ….

វិប្បយុត្តបច្ចយោ

៦៤. សេក្ខោ ធម្មោ នេវសេក្ខនាសេក្ខស្ស ធម្មស្ស វិប្បយុត្តបច្ចយេន បច្ចយោ – សហជាតំ, បច្ឆាជាតំ. សហជាតា – សេក្ខា ខន្ធា ចិត្តសមុដ្ឋានានំ រូបានំ វិប្បយុត្តបច្ចយេន បច្ចយោ. បច្ឆាជាតា – សេក្ខា ខន្ធា បុរេជាតស្ស ឥមស្ស កាយស្ស វិប្បយុត្តបច្ចយេន បច្ចយោ (១).

អសេក្ខោ ធម្មោ នេវសេក្ខនាសេក្ខស្ស ធម្មស្ស វិប្បយុត្តបច្ចយេន បច្ចយោ – សហជាតំ, បច្ឆាជាតំ (សេក្ខសទិសំ).

នេវសេក្ខនាសេក្ខោ ធម្មោ នេវសេក្ខនាសេក្ខស្ស ធម្មស្ស វិប្បយុត្តបច្ចយេន បច្ចយោ – សហជាតំ, បុរេជាតំ, បច្ឆាជាតំ. សហជាតា – នេវសេក្ខនាសេក្ខា ខន្ធា ចិត្តសមុដ្ឋានានំ រូបានំ វិប្បយុត្តបច្ចយេន បច្ចយោ. បដិសន្ធិក្ខណេ នេវសេក្ខនាសេក្ខា ខន្ធា កដត្តារូបានំ វិប្បយុត្តបច្ចយេន បច្ចយោ. ខន្ធា វត្ថុស្ស វិប្បយុត្តបច្ចយេន បច្ចយោ. វត្ថុ ខន្ធានំ វិប្បយុត្តបច្ចយេន បច្ចយោ. បុរេជាតំ – ចក្ខាយតនំ ចក្ខុវិញ្ញាណស្ស…បេ… កាយាយតនំ កាយវិញ្ញាណស្ស, វត្ថុ នេវសេក្ខនាសេក្ខានំ ខន្ធានំ វិប្បយុត្តបច្ចយេន បច្ចយោ. បច្ឆាជាតា – នេវសេក្ខនាសេក្ខា ខន្ធា បុរេជាតស្ស ឥមស្ស កាយស្ស វិប្បយុត្តបច្ចយេន បច្ចយោ. (១)

នេវសេក្ខនាសេក្ខោ ធម្មោ សេក្ខស្ស ធម្មស្ស វិប្បយុត្តបច្ចយេន បច្ចយោ. បុរេជាតំ – វត្ថុ សេក្ខានំ ខន្ធានំ វិប្បយុត្តបច្ចយេន បច្ចយោ. (២)

នេវសេក្ខនាសេក្ខោ ធម្មោ អសេក្ខស្ស ធម្មស្ស វិប្បយុត្តបច្ចយេន បច្ចយោ. បុរេជាតំ – វត្ថុ អសេក្ខានំ ខន្ធានំ វិប្បយុត្តបច្ចយេន បច្ចយោ. (៣)

អត្ថិបច្ចយោ

៦៥. សេក្ខោ ធម្មោ សេក្ខស្ស ធម្មស្ស អត្ថិបច្ចយេន បច្ចយោ – សេក្ខោ ឯកោ ខន្ធោ តិណ្ណន្នំ ខន្ធានំ…បេ…. (១)

សេក្ខោ ធម្មោ នេវសេក្ខនាសេក្ខស្ស ធម្មស្ស អត្ថិបច្ចយេន បច្ចយោ – សហជាតំ, បច្ឆាជាតំ. សហជាតា – សេក្ខា ខន្ធា ចិត្តសមុដ្ឋានានំ រូបានំ អត្ថិបច្ចយេន បច្ចយោ. បច្ឆាជាតា – សេក្ខា ខន្ធា បុរេជាតស្ស ឥមស្ស កាយស្ស អត្ថិបច្ចយេន បច្ចយោ. (២)

សេក្ខោ ធម្មោ សេក្ខស្ស ច នេវសេក្ខនាសេក្ខស្ស ច ធម្មស្ស អត្ថិបច្ចយេន បច្ចយោ – សេក្ខោ ឯកោ ខន្ធោ តិណ្ណន្នំ ខន្ធានំ ចិត្តសមុដ្ឋានានញ្ច រូបានំ អត្ថិបច្ចយេន បច្ចយោ…បេ… ទ្វេ ខន្ធា…បេ…. (៣)

អសេក្ខោ ធម្មោ អសេក្ខស្ស ធម្មស្ស អត្ថិបច្ចយេន បច្ចយោ…បេ… តីណិ (សេក្ខសទិសំ).

៦៦. នេវសេក្ខនាសេក្ខោ ធម្មោ នេវសេក្ខនាសេក្ខស្ស ធម្មស្ស អត្ថិបច្ចយេន បច្ចយោ – សហជាតំ, បុរេជាតំ, បច្ឆាជាតំ, អាហារំ, ឥន្ទ្រិយំ. សហជាតោ – នេវសេក្ខនាសេក្ខោ ឯកោ ខន្ធោ តិណ្ណន្នំ ខន្ធានំ ចិត្តសមុដ្ឋានានញ្ច រូបានំ អត្ថិបច្ចយេន បច្ចយោ…បេ… ទ្វេ ខន្ធា…បេ… បដិសន្ធិក្ខណេ…បេ… ខន្ធា វត្ថុស្ស អត្ថិបច្ចយេន បច្ចយោ. វត្ថុ ខន្ធានំ អត្ថិបច្ចយេន បច្ចយោ, ឯកំ មហាភូតំ…បេ… ពាហិរំ…បេ… អសញ្ញសត្តានំ…បេ…. បុរេជាតំ – ចក្ខុំ អនិច្ចតោ ទុក្ខតោ អនត្តតោ វិបស្សតិ; អស្សាទេតិ អភិនន្ទតិ; តំ អារព្ភ រាគោ ឧប្បជ្ជតិ…បេ… ទោមនស្សំ ឧប្បជ្ជតិ. សោតំ…បេ… វត្ថុំ អនិច្ចតោ…បេ… វិបស្សតិ, ទិព្ពេន ចក្ខុនា រូបំ បស្សតិ, ទិព្ពាយ សោតធាតុយា សទ្ទំ សុណាតិ, រូបាយតនំ ចក្ខុវិញ្ញាណស្ស…បេ… ផោដ្ឋព្ពាយតនំ កាយវិញ្ញាណស្ស…បេ… ចក្ខាយតនំ ចក្ខុវិញ្ញាណស្ស…បេ… កាយាយតនំ កាយវិញ្ញាណស្ស… វត្ថុ នេវសេក្ខនាសេក្ខានំ ខន្ធានំ អត្ថិបច្ចយេន បច្ចយោ. បច្ឆាជាតា – នេវសេក្ខនាសេក្ខា ខន្ធា បុរេជាតស្ស ឥមស្ស កាយស្ស អត្ថិបច្ចយេន បច្ចយោ. កពឡីការោ អាហារោ ឥមស្ស កាយស្ស អត្ថិបច្ចយេន បច្ចយោ. រូបជីវិតិន្ទ្រិយំ កដត្តារូបានំ អត្ថិបច្ចយេន បច្ចយោ. (១)

នេវសេក្ខនាសេក្ខោ ធម្មោ សេក្ខស្ស ធម្មស្ស អត្ថិបច្ចយេន បច្ចយោ. បុរេជាតំ – វត្ថុ សេក្ខានំ ខន្ធានំ អត្ថិបច្ចយេន បច្ចយោ. (២)

នេវសេក្ខនាសេក្ខោ ធម្មោ អសេក្ខស្ស ធម្មស្ស អត្ថិបច្ចយេន បច្ចយោ. បុរេជាតំ – វត្ថុ អសេក្ខានំ ខន្ធានំ អត្ថិបច្ចយេន បច្ចយោ. (៣)

៦៧. សេក្ខោ ច នេវសេក្ខនាសេក្ខោ ច ធម្មា សេក្ខស្ស ធម្មស្ស អត្ថិបច្ចយេន បច្ចយោ – សហជាតំ, បុរេជាតំ. សហជាតោ – សេក្ខោ ឯកោ ខន្ធោ ច វត្ថុ ច តិណ្ណន្នំ ខន្ធានំ អត្ថិបច្ចយេន បច្ចយោ…បេ… ទ្វេ ខន្ធា…បេ…. (១)

សេក្ខោ ច នេវសេក្ខនាសេក្ខោ ច ធម្មា នេវសេក្ខនាសេក្ខស្ស ធម្មស្ស អត្ថិបច្ចយេន បច្ចយោ – សហជាតំ, បច្ឆាជាតំ, អាហារំ, ឥន្ទ្រិយំ. សហជាតា – សេក្ខា ខន្ធា ច មហាភូតា ច ចិត្តសមុដ្ឋានានំ រូបានំ អត្ថិបច្ចយេន បច្ចយោ. បច្ឆាជាតា – សេក្ខា ខន្ធា ច កពឡីការោ អាហារោ ច ឥមស្ស កាយស្ស អត្ថិបច្ចយេន បច្ចយោ. បច្ឆាជាតា – សេក្ខា ខន្ធា ច រូបជីវិតិន្ទ្រិយញ្ច កដត្តារូបានំ អត្ថិបច្ចយេន បច្ចយោ. (២)

អសេក្ខោ ច នេវសេក្ខនាសេក្ខោ ច ធម្មា អសេក្ខស្ស ធម្មស្ស អត្ថិបច្ចយេន បច្ចយោ…បេ… (ទ្វេ បញ្ហា កាតព្ពា, សេក្ខសទិសា).