១. វិភង្គវារោ

នហេតុបច្ចយោ

២៥. នេវសេក្ខនាសេក្ខំ ធម្មំ បច្ចយា នេវសេក្ខនាសេក្ខោ ធម្មោ ឧប្បជ្ជតិ នហេតុបច្ចយា – អហេតុកំ នេវសេក្ខនាសេក្ខំ ឯកំ ខន្ធំ បច្ចយា តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធា. អហេតុកបដិសន្ធិក្ខណេ…បេ… ខន្ធេ បច្ចយា វត្ថុ, វត្ថុំ បច្ចយា ខន្ធា, ឯកំ មហាភូតំ បច្ចយា…បេ… ពាហិរំ… អាហារសមុដ្ឋានំ… ឧតុសមុដ្ឋានំ… អសញ្ញសត្តានំ…បេ… ចក្ខាយតនំ បច្ចយា ចក្ខុវិញ្ញាណំ…បេ… កាយាយតនំ បច្ចយា កាយវិញ្ញាណំ, វត្ថុំ បច្ចយា អហេតុកា នេវសេក្ខនាសេក្ខា ខន្ធា, វិចិកិច្ឆាសហគតេ ឧទ្ធច្ចសហគតេ ខន្ធេ ច វត្ថុញ្ច បច្ចយា វិចិកិច្ឆាសហគតោ ឧទ្ធច្ចសហគតោ មោហោ. (១)

នអារម្មណបច្ចយាទិ

២៦. សេក្ខំ ធម្មំ បច្ចយា នេវសេក្ខនាសេក្ខោ ធម្មោ ឧប្បជ្ជតិ នអារម្មណបច្ចយា…បេ…. (១)

សេក្ខំ ធម្មំ បច្ចយា សេក្ខោ ធម្មោ ឧប្បជ្ជតិ នអធិបតិបច្ចយា – សេក្ខេ ខន្ធេ បច្ចយា សេក្ខោ អធិបតិ. (១)

អសេក្ខំ ធម្មំ បច្ចយា អសេក្ខោ ធម្មោ ឧប្បជ្ជតិ នអធិបតិបច្ចយា – អសេក្ខេ ខន្ធេ បច្ចយា អសេក្ខោ អធិបតិ. (១)

នេវសេក្ខនាសេក្ខំ ធម្មំ បច្ចយា នេវសេក្ខនាសេក្ខោ ធម្មោ ឧប្បជ្ជតិ នអធិបតិបច្ចយា (បរិបុណ្ណំ) អសញ្ញសត្តានំ…បេ… ចក្ខាយតនំ…បេ… វត្ថុំ បច្ចយា នេវសេក្ខនាសេក្ខា ខន្ធា. (១)

នេវសេក្ខនាសេក្ខំ ធម្មំ បច្ចយា សេក្ខោ ធម្មោ ឧប្បជ្ជតិ នអធិបតិបច្ចយា – វត្ថុំ បច្ចយា សេក្ខោ អធិបតិ. (២)

នេវសេក្ខនាសេក្ខំ ធម្មំ បច្ចយា អសេក្ខោ ធម្មោ ឧប្បជ្ជតិ នអធិបតិបច្ចយា – វត្ថុំ បច្ចយា អសេក្ខោ អធិបតិ. (៣)

សេក្ខញ្ច នេវសេក្ខនាសេក្ខញ្ច ធម្មំ បច្ចយា សេក្ខោ ធម្មោ ឧប្បជ្ជតិ នអធិបតិបច្ចយា – សេក្ខេ ខន្ធេ ច វត្ថុញ្ច បច្ចយា សេក្ខោ អធិបតិ. (១)

អសេក្ខញ្ច នេវសេក្ខនាសេក្ខញ្ច ធម្មំ បច្ចយា អសេក្ខោ ធម្មោ ឧប្បជ្ជតិ នអធិបតិបច្ចយា – អសេក្ខេ ខន្ធេ ច វត្ថុញ្ច បច្ចយា អសេក្ខោ អធិបតិ. (១)

នអនន្តរបច្ចយាទិ

២៧. សេក្ខំ ធម្មំ បច្ចយា នេវសេក្ខនាសេក្ខោ ធម្មោ ឧប្បជ្ជតិ នអនន្តរបច្ចយា… នសមនន្តរបច្ចយា… នអញ្ញមញ្ញបច្ចយា… នឧបនិស្សយបច្ចយា… នបុរេជាតបច្ចយា… នបច្ឆាជាតបច្ចយា (សត្ត)… នអាសេវនបច្ចយា… នកម្មបច្ចយា – សេក្ខេ ខន្ធេ បច្ចយា សេក្ខា ចេតនា.

នេវសេក្ខនាសេក្ខំ ធម្មំ បច្ចយា នេវសេក្ខនាសេក្ខោ ធម្មោ ឧប្បជ្ជតិ នកម្មបច្ចយា – នេវសេក្ខនាសេក្ខេ ខន្ធេ បច្ចយា នេវសេក្ខនាសេក្ខា ចេតនា. ពាហិរំ… អាហារសមុដ្ឋានំ… ឧតុសមុដ្ឋានំ…បេ… វត្ថុំ បច្ចយា នេវសេក្ខនាសេក្ខា ចេតនា. (១)

នេវសេក្ខនាសេក្ខំ ធម្មំ បច្ចយា សេក្ខោ ធម្មោ ឧប្បជ្ជតិ នកម្មបច្ចយា – វត្ថុំ បច្ចយា សេក្ខា ចេតនា. (២)

សេក្ខញ្ច នេវសេក្ខនាសេក្ខញ្ច ធម្មំ បច្ចយា សេក្ខោ ធម្មោ ឧប្បជ្ជតិ នកម្មបច្ចយា – សេក្ខេ ខន្ធេ ច វត្ថុញ្ច បច្ចយា សេក្ខា ចេតនា. (១)

នវិបាកបច្ចយោ

២៨. សេក្ខំ ធម្មំ បច្ចយា សេក្ខោ ធម្មោ ឧប្បជ្ជតិ នវិបាកបច្ចយា (សេក្ខមូលកេ តីណិ).

នេវសេក្ខនាសេក្ខំ ធម្មំ បច្ចយា នេវសេក្ខនាសេក្ខោ ធម្មោ ឧប្បជ្ជតិ នវិបាកបច្ចយា (នេវសេក្ខនាសេក្ខមូលកេ តីណិ).

សេក្ខញ្ច នេវសេក្ខនាសេក្ខញ្ច ធម្មំ បច្ចយា សេក្ខោ ធម្មោ ឧប្បជ្ជតិ នវិបាកបច្ចយា (សេក្ខឃដនេសុ តីណិ).

នអាហារបច្ចយាទិ

២៩. នេវសេក្ខនាសេក្ខំ ធម្មំ បច្ចយា នេវសេក្ខនាសេក្ខោ ធម្មោ ឧប្បជ្ជតិ នអាហារបច្ចយា… នឥន្ទ្រិយបច្ចយា… នឈានបច្ចយា… នមគ្គបច្ចយា… នសម្បយុត្តបច្ចយា… នវិប្បយុត្តបច្ចយា… នោនត្ថិបច្ចយា… នោវិគតបច្ចយា…បេ….