(២១០) ៣. អានេញ្ជកថា

៨៩៦. អរហា អានេញ្ជេ ឋិតោ បរិនិព្ពាយតីតិ? អាមន្តា. ននុ អរហា បកតិចិត្តេ ឋិតោ បរិនិព្ពាយតីតិ? អាមន្តា. ហញ្ចិ អរហា បកតិចិត្តេ ឋិតោ បរិនិព្ពាយតិ, នោ ច វត រេ វត្តព្ពេ – ‘‘អរហា អានេញ្ជេ ឋិតោ បរិនិព្ពាយតី’’តិ.

អរហា អានេញ្ជេ ឋិតោ បរិនិព្ពាយតីតិ? អាមន្តា. អរហា កិរិយមយេ ចិត្តេ ឋិតោ បរិនិព្ពាយតីតិ? ន ហេវំ វត្តព្ពេ…បេ… ននុ អរហា វិបាកចិត្តេ ឋិតោ បរិនិព្ពាយតីតិ? អាមន្តា. ហញ្ចិ អរហា វិបាកចិត្តេ ឋិតោ បរិនិព្ពាយតិ, នោ ច វត រេ វត្តព្ពេ – ‘‘អរហា អានេញ្ជេ ឋិតោ បរិនិព្ពាយតី’’តិ.

អរហា អានេញ្ជេ ឋិតោ បរិនិព្ពាយតីតិ? អាមន្តា. អរហា កិរិយាព្យាកតេ ចិត្តេ ឋិតោ បរិនិព្ពាយតីតិ? ន ហេវំ វត្តព្ពេ…បេ… ននុ អរហា វិបាកាព្យាកតេ ចិត្តេ ឋិតោ បរិនិព្ពាយតីតិ? អាមន្តា. ហញ្ចិ អរហា វិបាកាព្យាកតេ ចិត្តេ ឋិតោ បរិនិព្ពាយតិ, នោ ច វត រេ វត្តព្ពេ – ‘‘អរហា អានេញ្ជេ ឋិតោ បរិនិព្ពាយតី’’តិ.

អរហា អានេញ្ជេ ឋិតោ បរិនិព្ពាយតីតិ? អាមន្តា. ននុ ភគវា ចតុត្ថជ្ឈានា វុដ្ឋហិត្វា សមនន្តរា បរិនិព្ពុតោតិ [ទី. និ. ២.២១៩]? អាមន្តា. ហញ្ចិ ភគវា ចតុត្ថជ្ឈានា វុដ្ឋហិត្វា សមនន្តរា បរិនិព្ពុតោ, នោ ច វត រេ វត្តព្ពេ – ‘‘អរហា អានេញ្ជេ ឋិតោ បរិនិព្ពាយតី’’តិ.

អានេញ្ជកថា និដ្ឋិតា.