១៨. អដ្ឋារសមវគ្គោ

(១៨០) ៤. គន្ធជាតិកថា

៨០៩. ពុទ្ធស្ស ភគវតោ ឧច្ចារបស្សាវោ អតិវិយ អញ្ញេ គន្ធជាតេ អធិគ្គណ្ហាតីតិ? អាមន្តា. ភគវា គន្ធភោជីតិ? ន ហេវំ វត្តព្ពេ…បេ… ននុ ភគវា ឱទនកុម្មាសំ ភុញ្ជតីតិ? អាមន្តា. ហញ្ចិ ភគវា ឱទនកុម្មាសំ ភុញ្ជតិ, នោ ច វត រេ វត្តព្ពេ – ‘‘ពុទ្ធស្ស ភគវតោ ឧច្ចារបស្សាវោ អតិវិយ អញ្ញេ គន្ធជាតេ អធិគ្គណ្ហាតី’’តិ.

ពុទ្ធស្ស ភគវតោ ឧច្ចារបស្សាវោ អតិវិយ អញ្ញេ គន្ធជាតេ អធិគ្គណ្ហាតីតិ? អាមន្តា. អត្ថិ កេចិ ពុទ្ធស្ស ភគវតោ ឧច្ចារបស្សាវំ ន្ហាយន្តិ វិលិម្បន្តិ ឧច្ឆាទេន្តិ [ឧច្ចារេន្តិ (សី. បី. ក.)] បេឡាយ បដិសាមេន្តិ ករណ្ឌាយ និក្ខិបន្តិ អាបណេ បសារេន្តិ, តេន ច គន្ធេន គន្ធករណីយំ ករោន្តីតិ? ន ហេវំ វត្តព្ពេ…បេ….

គន្ធជាតិកថា និដ្ឋិតា.