១៨. អដ្ឋារសមវគ្គោ

(១៧៨) ២. ធម្មទេសនាកថា

៨០៤. ន វត្តព្ពំ – ‘‘ពុទ្ធេន ភគវតា ធម្មោ ទេសិតោ’’តិ? អាមន្តា. កេន ទេសិតោតិ? អភិនិម្មិតេន ទេសិតោតិ. អភិនិម្មិតោ ជិនោ សត្ថា សម្មាសម្ពុទ្ធោ សព្ពញ្ញូ សព្ពទស្សាវី ធម្មស្សាមី ធម្មប្បដិសរណោតិ? ន ហេវំ វត្តព្ពេ…បេ….

ន វត្តព្ពំ – ‘‘ពុទ្ធេន ភគវតា ធម្មោ ទេសិតោ’’តិ? អាមន្តា. កេន ទេសិតោតិ? អាយស្មតា អានន្ទេន ទេសិតោតិ. អាយស្មា អានន្ទោ ជិនោ សត្ថា សម្មាសម្ពុទ្ធោ សព្ពញ្ញូ សព្ពទស្សាវី ធម្មស្សាមី ធម្មប្បដិសរណោតិ? ន ហេវំ វត្តព្ពេ…បេ….

៨០៥. ន វត្តព្ពំ – ‘‘ពុទ្ធេន ភគវតា ធម្មោ ទេសិតោ’’តិ? អាមន្តា. ននុ វុត្តំ ភគវតា – ‘‘សំខិត្តេនបិ ខោ អហំ, សារិបុត្ត, ធម្មំ ទេសេយ្យំ; វិត្ថារេនបិ ខោ អហំ, សារិបុត្ត, ធម្មំ ទេសេយ្យំ; សំខិត្តវិត្ថារេនបិ ខោ អហំ, សារិបុត្ត, ធម្មំ ទេសេយ្យំ; អញ្ញាតារោ ច ទុល្លភា’’តិ [អ. និ. ៣.៣៣ សារិបុត្តសុត្តេ]! អត្ថេវ សុត្តន្តោតិ? អាមន្តា. តេន ហិ ពុទ្ធេន ភគវតា ធម្មោ ទេសិតោតិ.

៨០៦. ន វត្តព្ពំ – ‘‘ពុទ្ធេន ភគវតា ធម្មោ ទេសិតោ’’តិ? អាមន្តា. ននុ វុត្តំ ភគវតា – ‘‘‘អភិញ្ញាយាហំ, ភិក្ខវេ, ធម្មំ ទេសេមិ, នោ អនភិញ្ញាយ; សនិទានាហំ, ភិក្ខវេ, ធម្មំ ទេសេមិ, នោ អនិទានំ; សប្បាដិហារិយាហំ, ភិក្ខវេ, ធម្មំ ទេសេមិ, នោ អប្បាដិហារិយំ; តស្ស [យញ្ចស្ស (សី. បី. ក.)] មយ្ហំ, ភិក្ខវេ, អភិញ្ញាយ ធម្មំ ទេសយតោ នោ អនភិញ្ញាយ, សនិទានំ ធម្មំ ទេសយតោ នោ អនិទានំ, សប្បាដិហារិយំ ធម្មំ ទេសយតោ នោ អប្បាដិហារិយំ ករណីយោ ឱវាទោ ករណីយា អនុសាសនី; អលញ្ច បន វោ, ភិក្ខវេ, តុដ្ឋិយា អលំ អត្តមនតាយ អលំ សោមនស្សាយ – សម្មាសម្ពុទ្ធោ ភគវា, ស្វាក្ខាតោ ធម្មោ, សុប្បដិបន្នោ សង្ឃោ’តិ. ឥមស្មិញ្ច បន វេយ្យាករណស្មិំ ភញ្ញមានេ ទសសហស្សិលោកធាតុ អកម្បិត្ថា’’តិ [អ. និ. ៣.១២៦]! អត្ថេវ សុត្តន្តោតិ? អាមន្តា. តេន ហិ ពុទ្ធេន ភគវតា ធម្មោ ទេសិតោតិ.

ធម្មទេសនាកថា និដ្ឋិតា.