៧. ចតុក្កនយសំសន្ទនំ

៤៦. បុគ្គលោ ឧបលព្ភតិ សច្ចិកដ្ឋបរមត្ថេនាតិ? អាមន្តា. រូបំ បុគ្គលោតិ? ន ហេវំ វត្តព្ពេ.

អាជានាហិ និគ្គហំ. ហញ្ចិ បុគ្គលោ ឧបលព្ភតិ សច្ចិកដ្ឋបរមត្ថេន, តេន វត រេ វត្តព្ពេ – ‘‘រូបំ បុគ្គលោ’’តិ. យំ តត្ថ វទេសិ – ‘‘វត្តព្ពេ ខោ – ‘បុគ្គលោ ឧបលព្ភតិ សច្ចិកដ្ឋបរមត្ថេន,’ នោ ច វត្តព្ពេ – ‘រូបំ បុគ្គលោ’’’តិ មិច្ឆា.

នោ ចេ បន វត្តព្ពេ – ‘‘រូបំ បុគ្គលោ’’តិ, នោ ច វត រេ វត្តព្ពេ – ‘‘បុគ្គលោ ឧបលព្ភតិ សច្ចិកដ្ឋបរមត្ថេនា’’តិ. យំ តត្ថ វទេសិ – ‘‘វត្តព្ពេ ខោ – ‘បុគ្គលោ ឧបលព្ភតិ សច្ចិកដ្ឋបរមត្ថេន,’ នោ ច វត្តព្ពេ – ‘រូបំ បុគ្គលោ’’’តិ មិច្ឆា…បេ….

៤៧. បុគ្គលោ ឧបលព្ភតិ សច្ចិកដ្ឋបរមត្ថេនាតិ? អាមន្តា. រូបស្មិំ បុគ្គលោ…បេ… អញ្ញត្រ រូបា បុគ្គលោ…បេ… បុគ្គលស្មិំ រូបន្តិ? ន ហេវំ វត្តព្ពេ.

អាជានាហិ និគ្គហំ. ហញ្ចិ បុគ្គលោ ឧបលព្ភតិ សច្ចិកដ្ឋបរមត្ថេន, តេន វត រេ វត្តព្ពេ – ‘‘បុគ្គលស្មិំ រូប’’ន្តិ. យំ តត្ថ វទេសិ – ‘‘វត្តព្ពេ ខោ – ‘បុគ្គលោ ឧបលព្ភតិ សច្ចិកដ្ឋបរមត្ថេន,’ នោ ច វត្តព្ពេ – ‘បុគ្គលស្មិំ រូប’’’ន្តិ មិច្ឆា.

នោ ចេ បន វត្តព្ពេ – ‘‘បុគ្គលស្មិំ រូប’’ន្តិ, នោ ច វត រេ វត្តព្ពេ – ‘‘បុគ្គលោ ឧបលព្ភតិ សច្ចិកដ្ឋបរមត្ថេនា’’តិ. យំ តត្ថ វទេសិ – ‘‘វត្តព្ពេ ខោ – ‘បុគ្គលោ ឧបលព្ភតិ សច្ចិកដ្ឋបរមត្ថេន,’ នោ ច វត្តព្ពេ – ‘បុគ្គលស្មិំ រូប’’’ន្តិ មិច្ឆា…បេ….

៤៨. បុគ្គលោ ឧបលព្ភតិ សច្ចិកដ្ឋបរមត្ថេនាតិ? អាមន្តា. វេទនា បុគ្គលោ…បេ… វេទនាយ បុគ្គលោ…បេ… អញ្ញត្រ វេទនាយ បុគ្គលោ…បេ… បុគ្គលស្មិំ វេទនា…បេ….

សញ្ញា បុគ្គលោ…បេ… សញ្ញាយ បុគ្គលោ…បេ… អញ្ញត្រ សញ្ញាយ បុគ្គលោ…បេ… បុគ្គលស្មិំ សញ្ញា…បេ….

សង្ខារា បុគ្គលោ…បេ… សង្ខារេសុ បុគ្គលោ…បេ… អញ្ញត្រ សង្ខារេហិ បុគ្គលោ…បេ… បុគ្គលស្មិំ សង្ខារា…បេ….

វិញ្ញាណំ បុគ្គលោ…បេ… វិញ្ញាណស្មិំ បុគ្គលោ…បេ… អញ្ញត្រ វិញ្ញាណា បុគ្គលោ…បេ… បុគ្គលស្មិំ វិញ្ញាណន្តិ? ន ហេវំ វត្តព្ពេ.

អាជានាហិ និគ្គហំ. ហញ្ចិ បុគ្គលោ ឧបលព្ភតិ សច្ចិកដ្ឋបរមត្ថេន, តេន វត រេ វត្តព្ពេ – ‘‘បុគ្គលស្មិំ វិញ្ញាណ’’ន្តិ. យំ តត្ថ វទេសិ – ‘‘វត្តព្ពេ ខោ – ‘បុគ្គលោ ឧបលព្ភតិ សច្ចិកដ្ឋបរមត្ថេន,’ នោ ច វត្តព្ពេ – ‘បុគ្គលស្មិំ វិញ្ញាណ’’’ន្តិ មិច្ឆា.

នោ ចេ បន វត្តព្ពេ – ‘‘បុគ្គលស្មិំ វិញ្ញាណ’’ន្តិ, នោ ច វត រេ វត្តព្ពេ – ‘‘បុគ្គលោ ឧបលព្ភតិ សច្ចិកដ្ឋបរមត្ថេនា’’តិ. យំ តត្ថ វទេសិ – ‘‘វត្តព្ពេ ខោ – ‘បុគ្គលោ ឧបលព្ភតិ សច្ចិកដ្ឋបរមត្ថេន,’ នោ ច វត្តព្ពេ – ‘បុគ្គលស្មិំ វិញ្ញាណ’’’ន្តិ មិច្ឆា…បេ….

៤៩. បុគ្គលោ ឧបលព្ភតិ សច្ចិកដ្ឋបរមត្ថេនាតិ? អាមន្តា. ចក្ខាយតនំ បុគ្គលោ…បេ… ចក្ខាយតនស្មិំ បុគ្គលោ…បេ… អញ្ញត្រ ចក្ខាយតនា បុគ្គលោ…បេ… បុគ្គលស្មិំ ចក្ខាយតនំ…បេ… ធម្មាយតនំ បុគ្គលោ…បេ… ធម្មាយតនស្មិំ បុគ្គលោ…បេ… អញ្ញត្រ ធម្មាយតនា បុគ្គលោ…បេ… បុគ្គលស្មិំ ធម្មាយតនំ…បេ….

ចក្ខុធាតុ បុគ្គលោ…បេ… ចក្ខុធាតុយា បុគ្គលោ…បេ… អញ្ញត្រ ចក្ខុធាតុយា បុគ្គលោ…បេ… បុគ្គលស្មិំ ចក្ខុធាតុ…បេ… ធម្មធាតុ បុគ្គលោ…បេ… ធម្មធាតុយា បុគ្គលោ…បេ… អញ្ញត្រ ធម្មធាតុយា បុគ្គលោ…បេ… បុគ្គលស្មិំ ធម្មធាតុ…បេ….

ចក្ខុន្ទ្រិយំ បុគ្គលោ…បេ… ចក្ខុន្ទ្រិយស្មិំ បុគ្គលោ…បេ… អញ្ញត្រ ចក្ខុន្ទ្រិយា បុគ្គលោ …បេ… បុគ្គលស្មិំ ចក្ខុន្ទ្រិយំ…បេ… អញ្ញាតាវិន្ទ្រិយំ បុគ្គលោ…បេ… អញ្ញាតាវិន្ទ្រិយស្មិំ បុគ្គលោ…បេ… អញ្ញត្រ អញ្ញាតាវិន្ទ្រិយា បុគ្គលោ…បេ… បុគ្គលស្មិំ អញ្ញាតាវិន្ទ្រិយន្តិ? ន ហេវំ វត្តព្ពេ.

អាជានាហិ និគ្គហំ. ហញ្ចិ បុគ្គលោ ឧបលព្ភតិ សច្ចិកដ្ឋបរមត្ថេន, តេន វត រេ វត្តព្ពេ – ‘‘បុគ្គលស្មិំ អញ្ញាតាវិន្ទ្រិយ’’ន្តិ. យំ តត្ថ វទេសិ – ‘‘វត្តព្ពេ ខោ – ‘បុគ្គលោ ឧបលព្ភតិ សច្ចិកដ្ឋបរមត្ថេន,’ នោ ច វត្តព្ពេ – ‘បុគ្គលស្មិំ អញ្ញាតាវិន្ទ្រិយ’’’ន្តិ មិច្ឆា.

នោ ចេ បន វត្តព្ពេ – ‘‘បុគ្គលស្មិំ អញ្ញាតាវិន្ទ្រិយ’’ន្តិ, នោ ច វត រេ វត្តព្ពេ – ‘‘បុគ្គលោ ឧបលព្ភតិ សច្ចិកដ្ឋបរមត្ថេនា’’តិ. យំ តត្ថ វទេសិ – ‘‘វត្តព្ពេ ខោ – ‘បុគ្គលោ ឧបលព្ភតិ សច្ចិកដ្ឋបរមត្ថេន,’ នោ ច វត្តព្ពេ – ‘បុគ្គលស្មិំ អញ្ញាតាវិន្ទ្រិយ’’’ន្តិ មិច្ឆា…បេ….

៥០. បុគ្គលោ នុបលព្ភតិ សច្ចិកដ្ឋបរមត្ថេនាតិ? អាមន្តា. វុត្តំ ភគវតា – ‘‘អត្ថិ បុគ្គលោ អត្តហិតាយ បដិបន្នោ’’តិ? អាមន្តា. រូបំ បុគ្គលោតិ? ន ហេវំ វត្តព្ពេ.

អាជានាហិ បដិកម្មំ. ហញ្ចិ វុត្តំ ភគវតា – ‘‘អត្ថិ បុគ្គលោ អត្តហិតាយ បដិបន្នោ,’’ តេន វត រេ វត្តព្ពេ – ‘‘រូបំ បុគ្គលោ’’តិ. យំ តត្ថ វទេសិ – ‘‘វត្តព្ពេ ខោ – ‘វុត្តំ ភគវតា – អត្ថិ បុគ្គលោ អត្តហិតាយ បដិបន្នោ,’ នោ ច វត្តព្ពេ – ‘រូបំ បុគ្គលោតិ’’’ មិច្ឆា.

នោ ចេ បន វត្តព្ពេ – ‘‘រូបំ បុគ្គលោ’’តិ, នោ ច វត រេ វត្តព្ពេ – ‘‘វុត្តំ ភគវតា – ‘អត្ថិ បុគ្គលោ អត្តហិតាយ បដិបន្នោ’’’តិ. យំ តត្ថ វទេសិ – ‘‘វត្តព្ពេ ខោ – ‘វុត្តំ ភគវតា – អត្ថិ បុគ្គលោ អត្តហិតាយ បដិបន្នោ,’ នោ ច វត្តព្ពេ – ‘រូបំ បុគ្គលោ’’’តិ មិច្ឆា…បេ….

៥១. បុគ្គលោ នុបលព្ភតិ សច្ចិកដ្ឋបរមត្ថេនាតិ? អាមន្តា. វុត្តំ ភគវតា – ‘‘អត្ថិ បុគ្គលោ អត្តហិតាយ បដិបន្នោ’’តិ? អាមន្តា. រូបស្មិំ បុគ្គលោ…បេ… អញ្ញត្រ រូបា បុគ្គលោ…បេ… បុគ្គលស្មិំ រូបំ…បេ….

វេទនា បុគ្គលោ…បេ… វេទនាយ បុគ្គលោ…បេ… អញ្ញត្រ វេទនាយ បុគ្គលោ…បេ… បុគ្គលស្មិំ វេទនា…បេ….

អាជានាហិ បដិកម្មំ. ហញ្ចិ វុត្តំ ភគវតា – ‘‘អត្ថិ បុគ្គលោ អត្តហិតាយ បដិបន្នោ,’’ តេន វត រេ វត្តព្ពេ – ‘‘បុគ្គលស្មិំ វិញ្ញាណ’’ន្តិ. យំ តត្ថ វទេសិ – ‘‘វត្តព្ពេ ខោ – ‘វុត្តំ ភគវតា – អត្ថិ បុគ្គលោ អត្តហិតាយ បដិបន្នោ,’ នោ ច វត្តព្ពេ – ‘បុគ្គលស្មិំ វិញ្ញាណ’’’ន្តិ មិច្ឆា.

នោ ចេ បន វត្តព្ពេ – ‘‘បុគ្គលស្មិំ វិញ្ញាណ’’ន្តិ, នោ ច វត រេ វត្តព្ពេ – ‘‘វុត្តំ ភគវតា – ‘អត្ថិ បុគ្គលោ អត្តហិតាយ បដិបន្នោ’’’តិ. យំ តត្ថ វទេសិ – ‘‘វត្តព្ពេ ខោ – ‘វុត្តំ ភគវតា – អត្ថិ បុគ្គលោ អត្តហិតាយ បដិបន្នោ,’ នោ ច វត្តព្ពេ – ‘បុគ្គលស្មិំ វិញ្ញាណ’’’ន្តិ មិច្ឆា…បេ….

៥២. បុគ្គលោ នុបលព្ភតិ សច្ចិកដ្ឋបរមត្ថេនាតិ? អាមន្តា. វុត្តំ ភគវតា – ‘‘អត្ថិ បុគ្គលោ អត្តហិតាយ បដិបន្នោ’’តិ? អាមន្តា. ចក្ខាយតនំ បុគ្គលោ…បេ… ចក្ខាយតនស្មិំ បុគ្គលោ…បេ… អញ្ញត្រ ចក្ខាយតនា បុគ្គលោ…បេ… បុគ្គលស្មិំ ចក្ខាយតនំ…បេ… ធម្មាយតនំ បុគ្គលោ…បេ… ធម្មាយតនស្មិំ បុគ្គលោ…បេ… អញ្ញត្រ ធម្មាយតនា បុគ្គលោ…បេ… បុគ្គលស្មិំ ធម្មាយតនំ…បេ….

ចក្ខុន្ទ្រិយំ បុគ្គលោ…បេ… ចក្ខុន្ទ្រិយស្មិំ បុគ្គលោ…បេ… អញ្ញត្រ ចក្ខុន្ទ្រិយា បុគ្គលោ…បេ… បុគ្គលស្មិំ ចក្ខុន្ទ្រិយំ…បេ… អញ្ញាតាវិន្ទ្រិយំ បុគ្គលោ…បេ… អញ្ញាតាវិន្ទ្រិយស្មិំ បុគ្គលោ…បេ… អញ្ញត្រ អញ្ញាតាវិន្ទ្រិយា បុគ្គលោ…បេ… បុគ្គលស្មិំ អញ្ញាតាវិន្ទ្រិយន្តិ? ន ហេវំ វត្តព្ពេ.

អាជានាហិ បដិកម្មំ. ហញ្ចិ វុត្តំ ភគវតា – ‘‘អត្ថិ បុគ្គលោ អត្តហិតាយ បដិបន្នោ,’’ តេន វត រេ វត្តព្ពេ – ‘‘បុគ្គលស្មិំ អញ្ញាតាវិន្ទ្រិយ’’ន្តិ. យំ តត្ថ វទេសិ – ‘‘វត្តព្ពេ ខោ – ‘វុត្តំ ភគវតា – អត្ថិ បុគ្គលោ អត្តហិតាយ បដិបន្នោ,’ នោ ច វត្តព្ពេ – ‘បុគ្គលស្មិំ អញ្ញាតាវិន្ទ្រិយ’’’ន្តិ មិច្ឆា.

នោ ចេ បន វត្តព្ពេ – ‘‘បុគ្គលស្មិំ អញ្ញាតាវិន្ទ្រិយ’’ន្តិ, នោ ច វត រេ វត្តព្ពេ – ‘‘វុត្តំ ភគវតា – ‘អត្ថិ បុគ្គលោ អត្តហិតាយ បដិបន្នោ’’’តិ. យំ តត្ថ វទេសិ – ‘‘វត្តព្ពេ ខោ – ‘វុត្តំ ភគវតា – អត្ថិ បុគ្គលោ អត្តហិតាយ បដិបន្នោ,’ នោ ច វត្តព្ពេ – ‘បុគ្គលស្មិំ អញ្ញាតាវិន្ទ្រិយ’’’ន្តិ មិច្ឆា…បេ….

ចតុក្កនយសំសន្ទនំ.