៤. សច្ចាទិ

២៣៥. សមុទយសច្ចំ… មគ្គសច្ចំ តីហិ ខន្ធេហិ ឯកេនាយតនេន ឯកាយ ធាតុយា សម្បយុត្តំ; ឯកេន ខន្ធេន ឯកេនាយតនេន ឯកាយ ធាតុយា កេហិចិ សម្បយុត្តំ. កតិហិ វិប្បយុត្តំ? ឯកេន ខន្ធេន ទសហាយតនេហិ សោឡសហិ ធាតូហិ វិប្បយុត្តំ; ឯកេនាយតនេន ឯកាយ ធាតុយា កេហិចិ វិប្បយុត្តំ.

២៣៦. និរោធសច្ចំ… ចក្ខុន្ទ្រិយំ…បេ… កាយិន្ទ្រិយំ… ឥត្ថិន្ទ្រិយំ… បុរិសិន្ទ្រិយំ…បេ… សម្បយុត្តន្តិ? នត្ថិ. កតិហិ វិប្បយុត្តំ? ចតូហិ ខន្ធេហិ ឯកេនាយតនេន សត្តហិ ធាតូហិ វិប្បយុត្តំ; ឯកេនាយតនេន ឯកាយ ធាតុយា កេហិចិ វិប្បយុត្តំ.

២៣៧. មនិន្ទ្រិយំ តីហិ ខន្ធេហិ សម្បយុត្តំ; ឯកេនាយតនេន ឯកាយ ធាតុយា កេហិចិ សម្បយុត្តំ. កតិហិ វិប្បយុត្តំ? ឯកេន ខន្ធេន ទសហាយតនេហិ ទសហិ ធាតូហិ វិប្បយុត្តំ; ឯកេនាយតនេន ឯកាយ ធាតុយា កេហិចិ វិប្បយុត្តំ.

២៣៨. សុខិន្ទ្រិយំ… ទុក្ខិន្ទ្រិយំ… សោមនស្សិន្ទ្រិយំ… ទោមនស្សិន្ទ្រិយំ តីហិ ខន្ធេហិ ឯកេនាយតនេន ឯកាយ ធាតុយា សម្បយុត្តំ; ឯកេនាយតនេន ឯកាយ ធាតុយា កេហិចិ សម្បយុត្តំ. កតិហិ វិប្បយុត្តំ? ឯកេន ខន្ធេន ទសហាយតនេហិ សោឡសហិ ធាតូហិ វិប្បយុត្តំ; ឯកេនាយតនេន ឯកាយ ធាតុយា កេហិចិ វិប្បយុត្តំ.

២៣៩. ឧបេក្ខិន្ទ្រិយំ តីហិ ខន្ធេហិ ឯកេនាយតនេន ឆហិ ធាតូហិ សម្បយុត្តំ; ឯកេនាយតនេន ឯកាយ ធាតុយា កេហិចិ សម្បយុត្តំ. កតិហិ វិប្បយុត្តំ? ឯកេន ខន្ធេន ទសហាយតនេហិ ឯកាទសហិ ធាតូហិ វិប្បយុត្តំ; ឯកេនាយតនេន ឯកាយ ធាតុយា កេហិចិ វិប្បយុត្តំ.

២៤០. សទ្ធិន្ទ្រិយំ… វីរិយិន្ទ្រិយំ… សតិន្ទ្រិយំ… សមាធិន្ទ្រិយំ… បញ្ញិន្ទ្រិយំ… អនញ្ញាតញ្ញស្សាមីតិន្ទ្រិយំ… អញ្ញិន្ទ្រិយំ… អញ្ញាតាវិន្ទ្រិយំ… អវិជ្ជា… អវិជ្ជាបច្ចយា សង្ខារា តីហិ ខន្ធេហិ ឯកេនាយតនេន ឯកាយ ធាតុយា សម្បយុត្តា; ឯកេន ខន្ធេន ឯកេនាយតនេន ឯកាយ ធាតុយា កេហិចិ សម្បយុត្តា. កតិហិ វិប្បយុត្តា? ឯកេន ខន្ធេន ទសហាយតនេហិ សោឡសហិ ធាតូហិ វិប្បយុត្តា; ឯកេនាយតនេន ឯកាយ ធាតុយា កេហិចិ វិប្បយុត្តា.

២៤១. សង្ខារបច្ចយា វិញ្ញាណំ តីហិ ខន្ធេហិ សម្បយុត្តំ; ឯកេនាយតនេន ឯកាយ ធាតុយា កេហិចិ សម្បយុត្តំ. កតិហិ វិប្បយុត្តំ? ឯកេន ខន្ធេន ទសហាយតនេហិ ទសហិ ធាតូហិ វិប្បយុត្តំ; ឯកេនាយតនេន ឯកាយ ធាតុយា កេហិចិ វិប្បយុត្តំ.

២៤២. សឡាយតនបច្ចយា ផស្សោ តីហិ ខន្ធេហិ ឯកេនាយតនេន សត្តហិ ធាតូហិ សម្បយុត្តោ; ឯកេន ខន្ធេន ឯកេនាយតនេន ឯកាយ ធាតុយា កេហិចិ សម្បយុត្តោ. កតិហិ វិប្បយុត្តោ? ឯកេន ខន្ធេន ទសហាយតនេហិ ទសហិ ធាតូហិ វិប្បយុត្តោ; ឯកេនាយតនេន ឯកាយ ធាតុយា កេហិចិ វិប្បយុត្តោ.

២៤៣. ផស្សបច្ចយា វេទនា តីហិ ខន្ធេហិ ឯកេនាយតនេន សត្តហិ ធាតូហិ សម្បយុត្តា; ឯកេនាយតនេន ឯកាយ ធាតុយា កេហិចិ សម្បយុត្តា. កតិហិ វិប្បយុត្តា? ឯកេន ខន្ធេន ទសហាយតនេហិ ទសហិ ធាតូហិ វិប្បយុត្តា; ឯកេនាយតនេន ឯកាយ ធាតុយា កេហិចិ វិប្បយុត្តា.

២៤៤. វេទនាបច្ចយា តណ្ហា… តណ្ហាបច្ចយា ឧបាទានំ… កម្មភវោ តីហិ ខន្ធេហិ ឯកេនាយតនេន ឯកាយ ធាតុយា សម្បយុត្តោ; ឯកេន ខន្ធេន ឯកេនាយតនេន ឯកាយ ធាតុយា កេហិចិ សម្បយុត្តោ. កតិហិ វិប្បយុត្តោ? ឯកេន ខន្ធេន ទសហាយតនេហិ សោឡសហិ ធាតូហិ វិប្បយុត្តោ; ឯកេនាយតនេន ឯកាយ ធាតុយា កេហិចិ វិប្បយុត្តោ.

២៤៥. រូបភវោ…បេ… សម្បយុត្តោតិ? នត្ថិ. កតិហិ វិប្បយុត្តោ? ន កេហិចិ ខន្ធេហិ ន កេហិចិ អាយតនេហិ តីហិ ធាតូហិ វិប្បយុត្តោ.

២៤៦. អរូបភវោ… នេវសញ្ញានាសញ្ញាភវោ… ចតុវោការភវោ…បេ… សម្បយុត្តោតិ? នត្ថិ. កតិហិ វិប្បយុត្តោ? ឯកេន ខន្ធេន ទសហាយតនេហិ សោឡសហិ ធាតូហិ វិប្បយុត្តោ; ឯកេនាយតនេន ឯកាយ ធាតុយា កេហិចិ វិប្បយុត្តោ.

២៤៧. អសញ្ញាភវោ… ឯកវោការភវោ… បរិទេវោ…បេ… សម្បយុត្តោតិ? នត្ថិ. កតិហិ វិប្បយុត្តោ? ចតូហិ ខន្ធេហិ ឯកេនាយតនេន សត្តហិ ធាតូហិ វិប្បយុត្តោ; ឯកេនាយតនេន ឯកាយ ធាតុយា កេហិចិ វិប្បយុត្តោ.

២៤៨. សោកោ… ទុក្ខំ… ទោមនស្សំ តីហិ ខន្ធេហិ ឯកេនាយតនេន ឯកាយ ធាតុយា សម្បយុត្តំ; ឯកេនាយតនេន ឯកាយ ធាតុយា កេហិចិ សម្បយុត្តំ. កតិហិ វិប្បយុត្តំ? ឯកេន ខន្ធេន ទសហាយតនេហិ សោឡសហិ ធាតូហិ វិប្បយុត្តំ; ឯកេនាយតនេន ឯកាយ ធាតុយា កេហិចិ វិប្បយុត្តំ.

២៤៩. ឧបាយាសោ… សតិបដ្ឋានំ… សម្មប្បធានំ តីហិ ខន្ធេហិ ឯកេនាយតនេន ឯកាយ ធាតុយា សម្បយុត្តំ; ឯកេន ខន្ធេន ឯកេនាយតនេន ឯកាយ ធាតុយា កេហិចិ សម្បយុត្តំ. កតិហិ វិប្បយុត្តំ? ឯកេន ខន្ធេន ទសហាយតនេហិ សោឡសហិ ធាតូហិ វិប្បយុត្តំ; ឯកេនាយតនេន ឯកាយ ធាតុយា កេហិចិ វិប្បយុត្តំ.

២៥០. ឥទ្ធិបាទោ ទ្វីហិ ខន្ធេហិ សម្បយុត្តោ; ឯកេន ខន្ធេន ឯកេនាយតនេន ឯកាយ ធាតុយា កេហិចិ សម្បយុត្តោ. កតិហិ វិប្បយុត្តោ? ឯកេន ខន្ធេន ទសហាយតនេហិ សោឡសហិ ធាតូហិ វិប្បយុត្តោ; ឯកេនាយតនេន ឯកាយ ធាតុយា កេហិចិ វិប្បយុត្តោ.

២៥១. ឈានំ ទ្វីហិ ខន្ធេហិ ឯកេនាយតនេន ឯកាយ ធាតុយា សម្បយុត្តំ; ឯកេន ខន្ធេន ឯកេនាយតនេន ឯកាយ ធាតុយា កេហិចិ សម្បយុត្តំ. កតិហិ វិប្បយុត្តំ? ឯកេន ខន្ធេន ទសហាយតនេហិ សោឡសហិ ធាតូហិ វិប្បយុត្តំ; ឯកេនាយតនេន ឯកាយ ធាតុយា កេហិចិ វិប្បយុត្តំ.

២៥២. អប្បមញ្ញា… បញ្ចិន្ទ្រិយានិ… បញ្ច ពលានិ… សត្ត ពោជ្ឈង្គា… អរិយោ អដ្ឋង្គិកោ មគ្គោ តីហិ ខន្ធេហិ ឯកេនាយតនេន ឯកាយ ធាតុយា សម្បយុត្តោ; ឯកេន ខន្ធេន ឯកេនាយតនេន ឯកាយ ធាតុយា កេហិចិ សម្បយុត្តោ. កតិហិ វិប្បយុត្តោ? ឯកេន ខន្ធេន ទសហាយតនេហិ សោឡសហិ ធាតូហិ វិប្បយុត្តោ; ឯកេនាយតនេន ឯកាយ ធាតុយា កេហិចិ វិប្បយុត្តោ.

២៥៣. ផស្សោ … ចេតនា… មនសិការោ តីហិ ខន្ធេហិ ឯកេនាយតនេន សត្តហិ ធាតូហិ សម្បយុត្តោ; ឯកេន ខន្ធេន ឯកេនាយតនេន ឯកាយ ធាតុយា កេហិចិ សម្បយុត្តោ. កតិហិ វិប្បយុត្តោ? ឯកេន ខន្ធេន ទសហាយតនេហិ ទសហិ ធាតូហិ វិប្បយុត្តោ; ឯកេនាយតនេន ឯកាយ ធាតុយា កេហិចិ វិប្បយុត្តោ.

២៥៤. វេទនា… សញ្ញា តីហិ ខន្ធេហិ ឯកេនាយតនេន សត្តហិ ធាតូហិ សម្បយុត្តា; ឯកេនាយតនេន ឯកាយ ធាតុយា កេហិចិ សម្បយុត្តា. កតិហិ វិប្បយុត្តា? ឯកេន ខន្ធេន ទសហាយតនេហិ ទសហិ ធាតូហិ វិប្បយុត្តា; ឯកេនាយតនេន ឯកាយ ធាតុយា កេហិចិ វិប្បយុត្តា.

២៥៥. ចិត្តំ តីហិ ខន្ធេហិ សម្បយុត្តំ; ឯកេនាយតនេន ឯកាយ ធាតុយា កេហិចិ សម្បយុត្តំ. កតិហិ វិប្បយុត្តំ? ឯកេន ខន្ធេន ទសហាយតនេហិ ទសហិ ធាតូហិ វិប្បយុត្តំ; ឯកេនាយតនេន ឯកាយ ធាតុយា កេហិចិ វិប្បយុត្តំ.

២៥៦. អធិមោក្ខោ តីហិ ខន្ធេហិ ឯកេនាយតនេន ទ្វីហិ ធាតូហិ សម្បយុត្តោ; ឯកេន ខន្ធេន ឯកេនាយតនេន ឯកាយ ធាតុយា កេហិចិ សម្បយុត្តោ. កតិហិ វិប្បយុត្តោ? ឯកេន ខន្ធេន ទសហាយតនេហិ បន្នរសហិ ធាតូហិ វិប្បយុត្តោ; ឯកេនាយតនេន ឯកាយ ធាតុយា កេហិចិ វិប្បយុត្តោ.