៤. សង្គហិតេនសង្គហិតបទនិទ្ទេសោ

១៩១. សមុទយសច្ចេន យេ ធម្មា… មគ្គសច្ចេន យេ ធម្មា ខន្ធសង្គហេន សង្គហិតា អាយតនសង្គហេន សង្គហិតា ធាតុសង្គហេន សង្គហិតា, តេហិ ធម្មេហិ យេ ធម្មា ខន្ធសង្គហេន សង្គហិតា អាយតនសង្គហេន សង្គហិតា ធាតុសង្គហេន សង្គហិតា, តេ ធម្មា កតិហិ ខន្ធេហិ កតិហាយតនេហិ កតិហិ ធាតូហិ សង្គហិតា? តេ ធម្មា ឯកេន ខន្ធេន ឯកេនាយតនេន ឯកាយ ធាតុយា សង្គហិតា.

១៩២. ឥត្ថិន្ទ្រិយេន យេ ធម្មា… បុរិសិន្ទ្រិយេន យេ ធម្មា… សុខិន្ទ្រិយេន យេ ធម្មា… ទុក្ខិន្ទ្រិយេន យេ ធម្មា… សោមនស្សិន្ទ្រិយេន យេ ធម្មា… ទោមនស្សិន្ទ្រិយេន យេ ធម្មា… ឧបេក្ខិន្ទ្រិយេន យេ ធម្មា… សទ្ធិន្ទ្រិយេន យេ ធម្មា… វីរិយិន្ទ្រិយេន យេ ធម្មា… សតិន្ទ្រិយេន យេ ធម្មា… សមាធិន្ទ្រិយេន យេ ធម្មា… បញ្ញិន្ទ្រិយេន យេ ធម្មា… អនញ្ញាតញ្ញស្សាមីតិន្ទ្រិយេន យេ ធម្មា… អញ្ញិន្ទ្រិយេន យេ ធម្មា… អញ្ញាតាវិន្ទ្រិយេន យេ ធម្មា….

អវិជ្ជាយ យេ ធម្មា… អវិជ្ជាបច្ចយា សង្ខារេន យេ ធម្មា… សឡាយតនបច្ចយា ផស្សេន យេ ធម្មា… វេទនាបច្ចយា តណ្ហាយ យេ ធម្មា… តណ្ហាបច្ចយា ឧបាទានេន យេ ធម្មា… កម្មភវេន យេ ធម្មា… សោកេន យេ ធម្មា… បរិទេវេន យេ ធម្មា… ទុក្ខេន យេ ធម្មា… ទោមនស្សេន យេ ធម្មា… ឧបាយាសេន យេ ធម្មា….

សតិបដ្ឋានេន យេ ធម្មា… សម្មប្បធានេន យេ ធម្មា… អប្បមញ្ញាយ យេ ធម្មា… បញ្ចហិ ឥន្ទ្រិយេហិ យេ ធម្មា… បញ្ចហិ ពលេហិ យេ ធម្មា… សត្តហិ ពោជ្ឈង្គេហិ យេ ធម្មា… អរិយេន អដ្ឋង្គិកេន មគ្គេន យេ ធម្មា… ផស្សេន យេ ធម្មា… ចេតនាយ យេ ធម្មា… អធិមោក្ខេន យេ ធម្មា… មនសិការេន យេ ធម្មា ….

ហេតូហិ ធម្មេហិ យេ ធម្មា… ហេតូហិ ចេវ សហេតុកេហិ ច ធម្មេហិ យេ ធម្មា… ហេតូហិ ចេវ ហេតុសម្បយុត្តេហិ ច ធម្មេហិ យេ ធម្មា… អាសវេហិ… សំយោជនេហិ… គន្ថេហិ… ឱឃេហិ… យោគេហិ… នីវរណេហិ… បរាមាសេហិ… ឧបាទានេហិ… កិលេសេហិ ធម្មេហិ យេ ធម្មា… កិលេសេហិ ចេវ សំកិលេសិកេហិ ច ធម្មេហិ យេ ធម្មា… កិលេសេហិ ចេវ សំកិលិដ្ឋេហិ ច ធម្មេហិ យេ ធម្មា… កិលេសេហិ ចេវ កិលេសសម្បយុត្តេហិ ច ធម្មេហិ យេ ធម្មា ខន្ធសង្គហេន សង្គហិតា អាយតនសង្គហេន សង្គហិតា ធាតុសង្គហេន សង្គហិតា, តេហិ ធម្មេហិ យេ ធម្មា ខន្ធសង្គហេន សង្គហិតា អាយតនសង្គហេន សង្គហិតា ធាតុសង្គហេន សង្គហិតា, តេ ធម្មា កតិហិ ខន្ធេហិ កតិហាយតនេហិ កតិហិ ធាតូហិ សង្គហិតា? តេ ធម្មា ឯកេន ខន្ធេន ឯកេនាយតនេន ឯកាយ ធាតុយា សង្គហិតា.

ទ្វេ សច្ចា បន្នរសិន្ទ្រិយា, ឯកាទស បដិច្ចបទា;

ឧទ្ធំ បុន ឯកាទស, គោច្ឆកបទមេត្ថ តិំសវិធាតិ [តិំសវិធន្តិ (បី.)].

សង្គហិតេនសង្គហិតបទនិទ្ទេសោ ចតុត្ថោ.