៣. តតិយនយោ

៣. អសង្គហិតេនសង្គហិតបទនិទ្ទេសោ

១៧៩. វេទនាក្ខន្ធេន យេ ធម្មា… សញ្ញាក្ខន្ធេន យេ ធម្មា… សង្ខារក្ខន្ធេន យេ ធម្មា… សមុទយសច្ចេន យេ ធម្មា… មគ្គសច្ចេន យេ ធម្មា ខន្ធសង្គហេន អសង្គហិតា អាយតនសង្គហេន សង្គហិតា ធាតុសង្គហេន សង្គហិតា, តេ ធម្មា កតិហិ ខន្ធេហិ កតិហាយតនេហិ កតិហិ ធាតូហិ សង្គហិតា? តេ ធម្មា អសង្ខតំ ខន្ធតោ ឋបេត្វា តីហិ ខន្ធេហិ ឯកេនាយតនេន ឯកាយ ធាតុយា សង្គហិតា.

១៨០. និរោធសច្ចេន យេ ធម្មា ខន្ធសង្គហេន អសង្គហិតា អាយតនសង្គហេន សង្គហិតា ធាតុសង្គហេន សង្គហិតា…បេ… តេ ធម្មា ចតូហិ ខន្ធេហិ ឯកេនាយតនេន ឯកាយ ធាតុយា សង្គហិតា.

១៨១. ជីវិតិន្ទ្រិយេន យេ ធម្មា ខន្ធសង្គហេន អសង្គហិតា អាយតនសង្គហេន សង្គហិតា ធាតុសង្គហេន សង្គហិតា…បេ… តេ ធម្មា អសង្ខតំ ខន្ធតោ ឋបេត្វា ទ្វីហិ ខន្ធេហិ ឯកេនាយតនេន ឯកាយ ធាតុយា សង្គហិតា.

១៨២. ឥត្ថិន្ទ្រិយេន យេ ធម្មា… បុរិសិន្ទ្រិយេន យេ ធម្មា… សុខិន្ទ្រិយេន យេ ធម្មា… ទុក្ខិន្ទ្រិយេន យេ ធម្មា… សោមនស្សិន្ទ្រិយេន យេ ធម្មា… ទោមនស្សិន្ទ្រិយេន យេ ធម្មា… ឧបេក្ខិន្ទ្រិយេន យេ ធម្មា… សទ្ធិន្ទ្រិយេន យេ ធម្មា… វីរិយិន្ទ្រិយេន យេ ធម្មា… សតិន្ទ្រិយេន យេ ធម្មា… សមាធិន្ទ្រិយេន យេ ធម្មា… បញ្ញិន្ទ្រិយេន យេ ធម្មា… អនញ្ញាតញ្ញស្សាមីតិន្ទ្រិយេន យេ ធម្មា… អញ្ញិន្ទ្រិយេន យេ ធម្មា… អញ្ញាតាវិន្ទ្រិយេន យេ ធម្មា… អវិជ្ជាយ យេ ធម្មា… អវិជ្ជាបច្ចយា សង្ខារេន យេ ធម្មា… សឡាយតនបច្ចយា ផស្សេន យេ ធម្មា… ផស្សបច្ចយា វេទនាយ យេ ធម្មា… វេទនាបច្ចយា តណ្ហាយ យេ ធម្មា… តណ្ហាបច្ចយា ឧបាទានេន យេ ធម្មា… កម្មភវេន [ឧបាទានបច្ចយា កម្មភវេន (ស្យា.)] យេ ធម្មា ខន្ធសង្គហេន អសង្គហិតា អាយតនសង្គហេន សង្គហិតា ធាតុសង្គហេន សង្គហិតា…បេ… តេ ធម្មា អសង្ខតំ ខន្ធតោ ឋបេត្វា តីហិ ខន្ធេហិ ឯកេនាយតនេន ឯកាយ ធាតុយា សង្គហិតា.

១៨៣. ជាតិយា យេ ធម្មា… ជរាយ យេ ធម្មា… មរណេន យេ ធម្មា… ឈានេន យេ ធម្មា ខន្ធសង្គហេន អសង្គហិតា អាយតនសង្គហេន សង្គហិតា ធាតុសង្គហេន សង្គហិតា…បេ… តេ ធម្មា អសង្ខតំ ខន្ធតោ ឋបេត្វា ទ្វីហិ ខន្ធេហិ ឯកេនាយតនេន ឯកាយ ធាតុយា សង្គហិតា.

១៨៤. សោកេន យេ ធម្មា… ទុក្ខេន យេ ធម្មា… ទោមនស្សេន យេ ធម្មា… ឧបាយាសេន យេ ធម្មា… សតិបដ្ឋានេន យេ ធម្មា… សម្មប្បធានេន យេ ធម្មា… អប្បមញ្ញាយ យេ ធម្មា… បញ្ចហិ ឥន្ទ្រិយេហិ យេ ធម្មា… បញ្ចហិ ពលេហិ យេ ធម្មា… សត្តហិ ពោជ្ឈង្គេហិ យេ ធម្មា… អរិយេន អដ្ឋង្គិកេន មគ្គេន យេ ធម្មា… ផស្សេន យេ ធម្មា… វេទនាយ យេ ធម្មា… សញ្ញាយ យេ ធម្មា… ចេតនាយ យេ ធម្មា… អធិមោក្ខេន យេ ធម្មា… មនសិការេន យេ ធម្មា… ហេតូហិ ធម្មេហិ យេ ធម្មា… ហេតូហិ ចេវ សហេតុកេហិ ច ធម្មេហិ យេ ធម្មា… ហេតូហិ ចេវ ហេតុសម្បយុត្តេហិ ច ធម្មេហិ យេ ធម្មា ខន្ធសង្គហេន អសង្គហិតា អាយតនសង្គហេន សង្គហិតា ធាតុសង្គហេន សង្គហិតា…បេ… តេ ធម្មា អសង្ខតំ ខន្ធតោ ឋបេត្វា តីហិ ខន្ធេហិ ឯកេនាយតនេន ឯកាយ ធាតុយា សង្គហិតា.

១៨៥. អប្បច្ចយេហិ ធម្មេហិ យេ ធម្មា… អសង្ខតេហិ ធម្មេហិ យេ ធម្មា ខន្ធសង្គហេន អសង្គហិតា អាយតនសង្គហេន សង្គហិតា ធាតុសង្គហេន សង្គហិតា…បេ… តេ ធម្មា ចតូហិ ខន្ធេហិ ឯកេនាយតនេន ឯកាយ ធាតុយា សង្គហិតា.

១៨៦. អាសវេហិ ធម្មេហិ យេ ធម្មា… អាសវេហិ ចេវ សាសវេហិ ច ធម្មេហិ យេ ធម្មា… អាសវេហិ ចេវ អាសវសម្បយុត្តេហិ ច ធម្មេហិ យេ ធម្មា ខន្ធសង្គហេន អសង្គហិតា អាយតនសង្គហេន សង្គហិតា ធាតុសង្គហេន សង្គហិតា… តេ ធម្មា អសង្ខតំ ខន្ធតោ ឋបេត្វា តីហិ ខន្ធេហិ ឯកេនាយតនេន ឯកាយ ធាតុយា សង្គហិតា.

១៨៧. សំយោជនេហិ … គន្ថេហិ… ឱឃេហិ… យោគេហិ… នីវរណេហិ… បរាមាសេហិ ធម្មេហិ យេ ធម្មា… បរាមាសេហិ ចេវ បរាមដ្ឋេហិ ច ធម្មេហិ យេ ធម្មា ខន្ធសង្គហេន អសង្គហិតា អាយតនសង្គហេន សង្គហិតា ធាតុសង្គហេន សង្គហិតា… តេ ធម្មា អសង្ខតំ ខន្ធតោ ឋបេត្វា តីហិ ខន្ធេហិ ឯកេនាយតនេន ឯកាយ ធាតុយា សង្គហិតា.

១៨៨. ចេតសិកេហិ ធម្មេហិ យេ ធម្មា… ចិត្តសម្បយុត្តេហិ ធម្មេហិ យេ ធម្មា… ចិត្តសំសដ្ឋេហិ ធម្មេហិ យេ ធម្មា… ចិត្តសំសដ្ឋសមុដ្ឋានេហិ ធម្មេហិ យេ ធម្មា… ចិត្តសំសដ្ឋសមុដ្ឋានសហភូហិ ធម្មេហិ យេ ធម្មា… ចិត្តសំសដ្ឋសមុដ្ឋានានុបរិវត្តីហិ ធម្មេហិ យេ ធម្មា ខន្ធសង្គហេន អសង្គហិតា អាយតនសង្គហេន សង្គហិតា ធាតុសង្គហេន សង្គហិតា…បេ… តេ ធម្មា អសង្ខតំ ខន្ធតោ ឋបេត្វា ឯកេន ខន្ធេន ឯកេនាយតនេន ឯកាយ ធាតុយា សង្គហិតា.

១៨៩. ចិត្តសហភូមិ ធម្មេហិ យេ ធម្មា… ចិត្តានុបរិវត្តីហិ ធម្មេហិ យេ ធម្មា ខន្ធសង្គហេន អសង្គហិតា អាយតនសង្គហេន សង្គហិតា ធាតុសង្គហេន សង្គហិតា…បេ… តេ ធម្មា ន កេហិចិ ខន្ធេហិ ឯកេនាយតនេន ឯកាយ ធាតុយា សង្គហិតា.

១៩០. ឧបាទានេហិ ធម្មេហិ យេ ធម្មា… កិលេសេហិ ធម្មេហិ យេ ធម្មា… កិលេសេហិ ចេវ សំកិលេសិកេហិ ច ធម្មេហិ យេ ធម្មា… កិលេសេហិ ចេវ សំកិលិដ្ឋេហិ ច ធម្មេហិ យេ ធម្មា… កិលេសេហិ ចេវ កិលេសសម្បយុត្តេហិ ច ធម្មេហិ យេ ធម្មា ខន្ធសង្គហេន អសង្គហិតា អាយតនសង្គហេន សង្គហិតា ធាតុសង្គហេន សង្គហិតា, តេ ធម្មា កតិហិ ខន្ធេហិ កតិហាយតនេហិ កតិហិ ធាតូហិ សង្គហិតា? តេ ធម្មា អសង្ខតំ ខន្ធតោ ឋបេត្វា តីហិ ខន្ធេហិ ឯកេនាយតនេន ឯកាយ ធាតុយា សង្គហិតា.

តយោ ខន្ធា តថា សច្ចា, ឥន្ទ្រិយានិ ច សោឡស;

បទានិ បច្ចយាការេ, ចុទ្ទសូបរិ ចុទ្ទស.

សមតិំស បទា ហោន្តិ, គោច្ឆកេសុ ទសស្វថ;

ទុវេ ចូឡន្តរទុកា [ចុល្លន្តរទុកា (សី.)], អដ្ឋ ហោន្តិ មហន្តរាតិ.

អសង្គហិតេនសង្គហិតបទនិទ្ទេសោ តតិយោ.