១. បឋមនយោ

១. សង្គហាសង្គហបទនិទ្ទេសោ

១. ខន្ធោ

៦. រូបក្ខន្ធោ កតិហិ ខន្ធេហិ កតិហាយតនេហិ កតិហិ ធាតូហិ សង្គហិតោ? រូបក្ខន្ធោ ឯកេន ខន្ធេន ឯកាទសហាយតនេហិ ឯកាទសហិ ធាតូហិ សង្គហិតោ. កតិហិ អសង្គហិតោ? ចតូហិ ខន្ធេហិ ឯកេនាយតនេន សត្តហិ ធាតូហិ អសង្គហិតោ.

៧. វេទនាក្ខន្ធោ កតិហិ ខន្ធេហិ កតិហាយតនេហិ កតិហិ ធាតូហិ សង្គហិតោ? វេទនាក្ខន្ធោ ឯកេន ខន្ធេន ឯកេនាយតនេន ឯកាយ ធាតុយា សង្គហិតោ. កតិហិ អសង្គហិតោ? ចតូហិ ខន្ធេហិ ឯកាទសហាយតនេហិ សត្តរសហិ ធាតូហិ អសង្គហិតោ.

៨. សញ្ញាក្ខន្ធោ កតិហិ ខន្ធេហិ កតិហាយតនេហិ កតិហិ ធាតូហិ សង្គហិតោ? សញ្ញាក្ខន្ធោ ឯកេន ខន្ធេន ឯកេនាយតនេន ឯកាយ ធាតុយា សង្គហិតោ. កតិហិ អសង្គហិតោ? ចតូហិ ខន្ធេហិ ឯកាទសហាយតនេហិ សត្តរសហិ ធាតូហិ អសង្គហិតោ.

៩. សង្ខារក្ខន្ធោ កតិហិ ខន្ធេហិ កតិហាយតនេហិ កតិហិ ធាតូហិ សង្គហិតោ? សង្ខារក្ខន្ធោ ឯកេន ខន្ធេន ឯកេនាយតនេន ឯកាយ ធាតុយា សង្គហិតោ. កតិហិ អសង្គហិតោ? ចតូហិ ខន្ធេហិ ឯកាទសហាយតនេហិ សត្តរសហិ ធាតូហិ អសង្គហិតោ.

១០. វិញ្ញាណក្ខន្ធោ កតិហិ ខន្ធេហិ កតិហាយតនេហិ កតិហិ ធាតូហិ សង្គហិតោ? វិញ្ញាណក្ខន្ធោ ឯកេន ខន្ធេន ឯកេនាយតនេន សត្តហិ ធាតូហិ សង្គហិតោ. កតិហិ អសង្គហិតោ? ចតូហិ ខន្ធេហិ ឯកាទសហាយតនេហិ ឯកាទសហិ ធាតូហិ អសង្គហិតោ.

(ឯកមូលកំ.)

១១. រូបក្ខន្ធោ ច វេទនាក្ខន្ធោ ច កតិហិ ខន្ធេហិ កតិហាយតនេហិ កតិហិ ធាតូហិ សង្គហិតា? រូបក្ខន្ធោ ច វេទនាក្ខន្ធោ ច ទ្វីហិ ខន្ធេហិ ឯកាទសហាយតនេហិ ឯកាទសហិ ធាតូហិ សង្គហិតា. កតិហិ អសង្គហិតា? តីហិ ខន្ធេហិ ឯកេនាយតនេន សត្តហិ ធាតូហិ អសង្គហិតា.

១២. រូបក្ខន្ធោ ច សញ្ញាក្ខន្ធោ ច…បេ… ទ្វីហិ ខន្ធេហិ ឯកាទសហាយតនេហិ ឯកាទសហិ ធាតូហិ សង្គហិតា. កតិហិ អសង្គហិតា? តីហិ ខន្ធេហិ ឯកេនាយតនេន សត្តហិ ធាតូហិ អសង្គហិតា.

១៣. រូបក្ខន្ធោ ច សង្ខារក្ខន្ធោ ច…បេ… ទ្វីហិ ខន្ធេហិ ឯកាទសហាយតនេហិ ឯកាទសហិ ធាតូហិ សង្គហិតា. កតិហិ អសង្គហិតា? តីហិ ខន្ធេហិ ឯកេនាយតនេន សត្តហិ ធាតូហិ អសង្គហិតា.

១៤. រូបក្ខន្ធោ ច វិញ្ញាណក្ខន្ធោ ច…បេ… ទ្វីហិ ខន្ធេហិ ទ្វាទសហាយតនេហិ អដ្ឋារសហិ ធាតូហិ សង្គហិតា. កតិហិ អសង្គហិតា? តីហិ ខន្ធេហិ, ន កេហិចិ អាយតនេហិ ន កាហិចិ ធាតូហិ អសង្គហិតា.

(ទុកមូលកំ.)

១៥. រូបក្ខន្ធោ ច វេទនាក្ខន្ធោ ច សញ្ញាក្ខន្ធោ ច កតិហិ ខន្ធេហិ កតិហាយតនេហិ កតិហិ ធាតូហិ សង្គហិតា? រូបក្ខន្ធោ ច វេទនាក្ខន្ធោ ច សញ្ញាក្ខន្ធោ ច តីហិ ខន្ធេហិ ឯកាទសហាយតនេហិ ឯកាទសហិ ធាតូហិ សង្គហិតា. កតិហិ អសង្គហិតា? ទ្វីហិ ខន្ធេហិ ឯកេនាយតនេន សត្តហិ ធាតូហិ អសង្គហិតា.

១៦. រូបក្ខន្ធោ ច វេទនាក្ខន្ធោ ច សង្ខារក្ខន្ធោ ច…បេ… តីហិ ខន្ធេហិ ឯកាទសហាយតនេហិ ឯកាទសហិ ធាតូហិ សង្គហិតា. កតិហិ អសង្គហិតា? ទ្វីហិ ខន្ធេហិ ឯកេនាយតនេន សត្តហិ ធាតូហិ អសង្គហិតា.

១៧. រូបក្ខន្ធោ ច វេទនាក្ខន្ធោ ច វិញ្ញាណក្ខន្ធោ ច…បេ… តីហិ ខន្ធេហិ ទ្វាទសហាយតនេហិ អដ្ឋារសហិ ធាតូហិ សង្គហិតា. កតិហិ អសង្គហិតា? ទ្វីហិ ខន្ធេហិ, ន កេហិចិ អាយតនេហិ ន កាហិចិ ធាតូហិ អសង្គហិតា.

(តិកមូលកំ.)

១៨. រូបក្ខន្ធោ ច វេទនាក្ខន្ធោ ច សញ្ញាក្ខន្ធោ ច សង្ខារក្ខន្ធោ ច កតិហិ ខន្ធេហិ កតិហាយតនេហិ កតិហិ ធាតូហិ សង្គហិតា? រូបក្ខន្ធោ ច វេទនាក្ខន្ធោ ច សញ្ញាក្ខន្ធោ ច សង្ខារក្ខន្ធោ ច ចតូហិ ខន្ធេហិ ឯកាទសហាយតនេហិ ឯកាទសហិ ធាតូហិ សង្គហិតា. កតិហិ អសង្គហិតា? ឯកេន ខន្ធេន ឯកេនាយតនេន សត្តហិ ធាតូហិ អសង្គហិតា.

១៩. រូបក្ខន្ធោ ច វេទនាក្ខន្ធោ ច សញ្ញាក្ខន្ធោ ច វិញ្ញាណក្ខន្ធោ ច…បេ… ចតូហិ ខន្ធេហិ ទ្វាទសហាយតនេហិ អដ្ឋារសហិ ធាតូហិ សង្គហិតា. កតិហិ អសង្គហិតា? ឯកេន ខន្ធេន, ន កេហិចិ អាយតនេហិ ន កាហិចិ ធាតូហិ អសង្គហិតា.

(ចតុក្កមូលកំ.)

២០. រូបក្ខន្ធោ ច វេទនាក្ខន្ធោ ច សញ្ញាក្ខន្ធោ ច សង្ខារក្ខន្ធោ ច វិញ្ញាណក្ខន្ធោ ច កតិហិ ខន្ធេហិ កតិហាយតនេហិ កតិហិ ធាតូហិ សង្គហិតា? រូបក្ខន្ធោ ច វេទនាក្ខន្ធោ ច សញ្ញាក្ខន្ធោ ច សង្ខារក្ខន្ធោ ច វិញ្ញាណក្ខន្ធោ ច បញ្ចហិ ខន្ធេហិ ទ្វាទសាយតនេហិ អដ្ឋារសហិ ធាតូហិ សង្គហិតា. កតិហិ អសង្គហិតា? ន កេហិចិ ខន្ធេហិ ន កេហិចិ អាយតនេហិ ន កាហិចិ ធាតូហិ អសង្គហិតា.

២១. បញ្ចក្ខន្ធា កតិហិ ខន្ធេហិ កតិហាយតនេហិ កតិហិ ធាតូហិ សង្គហិតា? បញ្ចក្ខន្ធា បញ្ចហិ ខន្ធេហិ ទ្វាទសហាយតនេហិ អដ្ឋារសហិ ធាតូហិ សង្គហិតា. កតិហិ អសង្គហិតា? ន កេហិចិ ខន្ធេហិ ន កេហិចិ អាយតនេហិ ន កាហិចិ ធាតូហិ អសង្គហិតា.

(បញ្ចកំ.)

២. អាយតនំ

២២. ចក្ខាយតនំ កតិហិ ខន្ធេហិ កតិហាយតនេហិ កតិហិ ធាតូហិ សង្គហិតំ? ចក្ខាយតនំ ឯកេន ខន្ធេន ឯកេនាយតនេន ឯកាយ ធាតុយា សង្គហិតំ. កតិហិ អសង្គហិតំ? ចតូហិ ខន្ធេហិ ឯកាទសហាយតនេហិ សត្តរសហិ ធាតូហិ អសង្គហិតំ.

២៣. សោតាយតនំ … ឃានាយតនំ… ជិវ្ហាយតនំ… កាយាយតនំ… រូបាយតនំ… សទ្ទាយតនំ… គន្ធាយតនំ… រសាយតនំ… ផោដ្ឋព្ពាយតនំ…បេ… ឯកេន ខន្ធេន ឯកេនាយតនេន ឯកាយ ធាតុយា សង្គហិតំ. កតិហិ អសង្គហិតំ? ចតូហិ ខន្ធេហិ ឯកាទសហាយតនេហិ សត្តរសហិ ធាតូហិ អសង្គហិតំ.

២៤. មនាយតនំ ឯកេន ខន្ធេន ឯកេនាយតនេន សត្តហិ ធាតូហិ សង្គហិតំ. កតិហិ អសង្គហិតំ? ចតូហិ ខន្ធេហិ ឯកាទសហាយតនេហិ ឯកាទសហិ ធាតូហិ អសង្គហិតំ.

២៥. ធម្មាយតនំ អសង្ខតំ ខន្ធតោ ឋបេត្វា ចតូហិ ខន្ធេហិ ឯកេនាយតនេន ឯកាយ ធាតុយា សង្គហិតំ. កតិហិ អសង្គហិតំ? ឯកេន ខន្ធេន ឯកាទសហាយតនេហិ សត្តរសហិ ធាតូហិ អសង្គហិតំ.

(ឯកមូលកំ.)

២៦. ចក្ខាយតនញ្ច សោតាយតនញ្ច ឯកេន ខន្ធេន ទ្វីហាយតនេហិ ទ្វីហិ ធាតូហិ សង្គហិតា. កតិហិ អសង្គហិតា? ចតូហិ ខន្ធេហិ ទសហាយតនេហិ សោឡសហិ ធាតូហិ អសង្គហិតា.

២៧. ចក្ខាយតនញ្ច ឃានាយតនញ្ច… ចក្ខាយតនញ្ច ជិវ្ហាយតនញ្ច… ចក្ខាយតនញ្ច កាយាយតនញ្ច… ចក្ខាយតនញ្ច រូបាយតនញ្ច… ចក្ខាយតនញ្ច សទ្ទាយតនញ្ច… ចក្ខាយតនញ្ច គន្ធាយតនញ្ច… ចក្ខាយតនញ្ច រសាយតនញ្ច… ចក្ខាយតនញ្ច ផោដ្ឋព្ពាយតនញ្ច ឯកេន ខន្ធេន ទ្វីហាយតនេហិ ទ្វីហិ ធាតូហិ សង្គហិតា. កតិហិ អសង្គហិតា? ចតូហិ ខន្ធេហិ ទសហាយតនេហិ សោឡសហិ ធាតូហិ អសង្គហិតា.

២៨. ចក្ខាយតនញ្ច មនាយតនញ្ច ទ្វីហិ ខន្ធេហិ ទ្វីហាយតនេហិ អដ្ឋហិ ធាតូហិ សង្គហិតា. កតិហិ អសង្គហិតា? តីហិ ខន្ធេហិ ទសហាយតនេហិ ទសហិ ធាតូហិ អសង្គហិតា.

២៩. ចក្ខាយតនញ្ច ធម្មាយតនញ្ច អសង្ខតំ ខន្ធតោ ឋបេត្វា ចតូហិ ខន្ធេហិ ទ្វីហាយតនេហិ ទ្វីហិ ធាតូហិ សង្គហិតា. កតិហិ អសង្គហិតា? ឯកេន ខន្ធេន ទសហាយតនេហិ សោឡសហិ ធាតូហិ អសង្គហិតា.

(ទុកមូលកំ.)

៣០. ទ្វាទសាយតនានិ កតិហិ ខន្ធេហិ កតិហាយតនេហិ កតិហិ ធាតូហិ សង្គហិតា? ទ្វាទសាយតនានិ អសង្ខតំ ខន្ធតោ ឋបេត្វា បញ្ចហិ ខន្ធេហិ ទ្វាទសហាយតនេហិ អដ្ឋារសហិ ធាតូហិ សង្គហិតា. កតិហិ អសង្គហិតា? ន កេហិចិ ខន្ធេហិ ន កេហិចិ អាយតនេហិ ន កាហិចិ ធាតូហិ អសង្គហិតា.

(ទ្វាទសកំ.)

៣. ធាតុ

៣១. ចក្ខុធាតុ កតិហិ ខន្ធេហិ កតិហាយតនេហិ កតិហិ ធាតូហិ សង្គហិតា? ចក្ខុធាតុ ឯកេន ខន្ធេន ឯកេនាយតនេន ឯកាយ ធាតុយា សង្គហិតា. កតិហិ អសង្គហិតា? ចតូហិ ខន្ធេហិ ឯកាទសហាយតនេហិ សត្តរសហិ ធាតូហិ អសង្គហិតា.

៣២. សោតធាតុ… ឃានធាតុ… ជិវ្ហាធាតុ… កាយធាតុ… រូបធាតុ… សទ្ទធាតុ… គន្ធធាតុ… រសធាតុ… ផោដ្ឋព្ពធាតុ… ចក្ខុវិញ្ញាណធាតុ… សោតវិញ្ញាណធាតុ… ឃានវិញ្ញាណធាតុ… ជិវ្ហាវិញ្ញាណធាតុ… កាយវិញ្ញាណធាតុ… មនោធាតុ… មនោវិញ្ញាណធាតុ ឯកេន ខន្ធេន ឯកេនាយតនេន ឯកាយ ធាតុយា សង្គហិតា. កតិហិ អសង្គហិតា? ចតូហិ ខន្ធេហិ ឯកាទសហាយតនេហិ សត្តរសហិ ធាតូហិ អសង្គហិតា.

៣៣. ធម្មធាតុ អសង្ខតំ ខន្ធតោ ឋបេត្វា ចតូហិ ខន្ធេហិ ឯកេនាយតនេន ឯកាយ ធាតុយា សង្គហិតា. កតិហិ អសង្គហិតា? ឯកេន ខន្ធេន ឯកាទសហាយតនេហិ សត្តរសហិ ធាតូហិ អសង្គហិតា.

(ឯកមូលកំ.)

៣៤. ចក្ខុធាតុ ច សោតធាតុ ច ឯកេន ខន្ធេន ទ្វីហាយតនេហិ ទ្វីហិ ធាតូហិ សង្គហិតា. កតិហិ អសង្គហិតា? ចតូហិ ខន្ធេហិ ទសហាយតនេហិ សោឡសហិ ធាតូហិ អសង្គហិតា.

៣៥. ចក្ខុធាតុ ច ឃានធាតុ ច… ចក្ខុធាតុ ច ជិវ្ហាធាតុ ច… ចក្ខុធាតុ ច កាយធាតុ ច… ចក្ខុធាតុ ច រូបធាតុ ច… ចក្ខុធាតុ ច សទ្ទធាតុ ច… ចក្ខុធាតុ ច គន្ធធាតុ ច… ចក្ខុធាតុ ច រសធាតុ ច… ចក្ខុធាតុ ច ផោដ្ឋព្ពធាតុ ច ឯកេន ខន្ធេន ទ្វីហាយតនេហិ ទ្វីហិ ធាតូហិ សង្គហិតា. កតិហិ អសង្គហិតា? ចតូហិ ខន្ធេហិ ទសហាយតនេហិ សោឡសហិ ធាតូហិ អសង្គហិតា.

៣៦. ចក្ខុធាតុ ច ចក្ខុវិញ្ញាណធាតុ ច ទ្វីហិ ខន្ធេហិ ទ្វីហាយតនេហិ ទ្វីហិ ធាតូហិ សង្គហិតា. កតិហិ អសង្គហិតា? តីហិ ខន្ធេហិ ទសហាយតនេហិ សោឡសហិ ធាតូហិ អសង្គហិតា.

៣៧. ចក្ខុធាតុ ច សោតវិញ្ញាណធាតុ ច… ចក្ខុធាតុ ច ឃានវិញ្ញាណធាតុ ច… ចក្ខុធាតុ ច ជិវ្ហាវិញ្ញាណធាតុ ច… ចក្ខុធាតុ ច កាយវិញ្ញាណធាតុ ច… ចក្ខុធាតុ ច មនោធាតុ ច… ចក្ខុធាតុ ច មនោវិញ្ញាណធាតុ ច ទ្វីហិ ខន្ធេហិ ទ្វីហាយតនេហិ ទ្វីហិ ធាតូហិ សង្គហិតា. កតិហិ អសង្គហិតា? តីហិ ខន្ធេហិ ទសហាយតនេហិ សោឡសហិ ធាតូហិ អសង្គហិតា.

៣៨. ចក្ខុធាតុ ច ធម្មធាតុ ច អសង្ខតំ ខន្ធតោ ឋបេត្វា ចតូហិ ខន្ធេហិ ទ្វីហាយតនេហិ ទ្វីហិ ធាតូហិ សង្គហិតា. កតិហិ អសង្គហិតា? ឯកេន ខន្ធេន ទសហាយតនេហិ សោឡសហិ ធាតូហិ អសង្គហិតា.

(ទុកមូលកំ.)

៣៩. អដ្ឋារស ធាតុយោ កតិហិ ខន្ធេហិ កតិហាយតនេហិ កតិហិ ធាតូហិ សង្គហិតា? អដ្ឋារស ធាតុយោ អសង្ខតំ ខន្ធតោ ឋបេត្វា បញ្ចហិ ខន្ធេហិ ទ្វាទសហាយតនេហិ អដ្ឋារសហិ ធាតូហិ សង្គហិតា. កតិហិ អសង្គហិតា? ន កេហិចិ ខន្ធេហិ ន កេហិចិ អាយតនេហិ ន កាហិចិ ធាតូហិ អសង្គហិតា.

(អដ្ឋារសកំ.)

៤. សច្ចំ

៤០. ទុក្ខសច្ចំ កតិហិ ខន្ធេហិ កតិហាយតនេហិ កតិហិ ធាតូហិ សង្គហិតំ? ទុក្ខសច្ចំ បញ្ចហិ ខន្ធេហិ ទ្វាទសហាយតនេហិ អដ្ឋារសហិ ធាតូហិ សង្គហិតំ. កតិហិ អសង្គហិតំ? ន កេហិចិ ខន្ធេហិ ន កេហិចិ អាយតនេហិ ន កាហិចិ ធាតូហិ អសង្គហិតំ.

៤១. សមុទយសច្ចំ … មគ្គសច្ចំ ឯកេន ខន្ធេន ឯកេនាយតនេន ឯកាយ ធាតុយា សង្គហិតំ. កតិហិ អសង្គហិតំ? ចតូហិ ខន្ធេហិ ឯកាទសហាយតនេហិ សត្តរសហិ ធាតូហិ អសង្គហិតំ.

៤២. និរោធសច្ចំ ន កេហិចិ ខន្ធេហិ ឯកេនាយតនេន ឯកាយ ធាតុយា សង្គហិតំ. កតិហិ អសង្គហិតំ? បញ្ចហិ ខន្ធេហិ ឯកាទសហាយតនេហិ សត្តរសហិ ធាតូហិ អសង្គហិតំ.

(ឯកមូលកំ.)

៤៣. ទុក្ខសច្ចញ្ច សមុទយសច្ចញ្ច បញ្ចហិ ខន្ធេហិ ទ្វាទសហាយតនេហិ អដ្ឋារសហិ ធាតូហិ សង្គហិតា. កតិហិ អសង្គហិតា? ន កេហិចិ ខន្ធេហិ ន កេហិចិ អាយតនេហិ ន កាហិចិ ធាតូហិ អសង្គហិតា.

៤៤. ទុក្ខសច្ចញ្ច មគ្គសច្ចញ្ច បញ្ចហិ ខន្ធេហិ ទ្វាទសហាយតនេហិ អដ្ឋារសហិ ធាតូហិ សង្គហិតា. កតិហិ អសង្គហិតា? ន កេហិចិ ខន្ធេហិ ន កេហិចិ អាយតនេហិ ន កាហិចិ ធាតូហិ អសង្គហិតា.

៤៥. ទុក្ខសច្ចញ្ច និរោធសច្ចញ្ច អសង្ខតំ ខន្ធតោ ឋបេត្វា បញ្ចហិ ខន្ធេហិ ទ្វាទសហាយតនេហិ អដ្ឋារសហិ ធាតូហិ សង្គហិតា. កតិហិ អសង្គហិតា? ន កេហិចិ ខន្ធេហិ ន កេហិចិ អាយតនេហិ ន កាហិចិ ធាតូហិ អសង្គហិតា.

(ទុកមូលកំ.)

៤៦. ទុក្ខសច្ចញ្ច សមុទយសច្ចញ្ច មគ្គសច្ចញ្ច បញ្ចហិ ខន្ធេហិ ទ្វាទសហាយតនេហិ អដ្ឋារសហិ ធាតូហិ សង្គហិតា. កតិហិ អសង្គហិតា? ន កេហិចិ ខន្ធេហិ ន កេហិចិ អាយតនេហិ ន កាហិចិ ធាតូហិ អសង្គហិតា.

៤៧. ទុក្ខសច្ចញ្ច សមុទយសច្ចញ្ច និរោធសច្ចញ្ច អសង្ខតំ ខន្ធតោ ឋបេត្វា បញ្ចហិ ខន្ធេហិ ទ្វាទសហាយតនេហិ អដ្ឋារសហិ ធាតូហិ សង្គហិតា. កតិហិ អសង្គហិតា? ន កេហិចិ ខន្ធេហិ ន កេហិចិ អាយតនេហិ ន កាហិចិ ធាតូហិ អសង្គហិតា.

(តិកមូលកំ.)

៤៨. ទុក្ខសច្ចញ្ច សមុទយសច្ចញ្ច មគ្គសច្ចញ្ច និរោធសច្ចញ្ច អសង្ខតំ ខន្ធតោ ឋបេត្វា បញ្ចហិ ខន្ធេហិ ទ្វាទសហាយតនេហិ អដ្ឋារសហិ ធាតូហិ សង្គហិតា. កតិហិ អសង្គហិតា? ន កេហិចិ ខន្ធេហិ ន កេហិចិ អាយតនេហិ ន កាហិចិ ធាតូហិ អសង្គហិតា.

៤៩. ចត្តារិ សច្ចានិ កតិហិ ខន្ធេហិ កតិហាយតនេហិ កតិហិ ធាតូហិ សង្គហិតានិ? ចត្តារិ សច្ចានិ អសង្ខតំ ខន្ធតោ ឋបេត្វា បញ្ចហិ ខន្ធេហិ ទ្វាទសហាយតនេហិ អដ្ឋារសហិ ធាតូហិ សង្គហិតានិ. កតិហិ អសង្គហិតានិ? ន កេហិចិ ខន្ធេហិ ន កេហិចិ អាយតនេហិ ន កាហិចិ ធាតូហិ អសង្គហិតានិ.

(ចតុក្កំ.)

៥. ឥន្ទ្រិយំ

៥០. ចក្ខុន្ទ្រិយំ កតិហិ ខន្ធេហិ កតិហាយតនេហិ កតិហិ ធាតូហិ សង្គហិតំ? ចក្ខុន្ទ្រិយំ ឯកេន ខន្ធេន ឯកេនាយតនេន ឯកាយ ធាតុយា សង្គហិតំ. កតិហិ អសង្គហិតំ? ចតូហិ ខន្ធេហិ ឯកាទសហាយតនេហិ សត្តរសហិ ធាតូហិ អសង្គហិតំ.

៥១. សោតិន្ទ្រិយំ… ឃានិន្ទ្រិយំ… ជិវ្ហិន្ទ្រិយំ… កាយិន្ទ្រិយំ… ឥត្ថិន្ទ្រិយំ … បុរិសិន្ទ្រិយំ ឯកេន ខន្ធេន ឯកេនាយតនេន ឯកាយ ធាតុយា សង្គហិតំ. កតិហិ អសង្គហិតំ? ចតូហិ ខន្ធេហិ ឯកាទសហាយតនេហិ សត្តរសហិ ធាតូហិ អសង្គហិតំ.

៥២. មនិន្ទ្រិយំ ឯកេន ខន្ធេន ឯកេនាយតនេន សត្តហិ ធាតូហិ សង្គហិតំ. កតិហិ អសង្គហិតំ? ចតូហិ ខន្ធេហិ ឯកាទសហាយតនេហិ ឯកាទសហិ ធាតូហិ អសង្គហិតំ.

៥៣. ជីវិតិន្ទ្រិយំ ទ្វីហិ ខន្ធេហិ ឯកេនាយតនេន ឯកាយ ធាតុយា សង្គហិតំ. កតិហិ អសង្គហិតំ? តីហិ ខន្ធេហិ ឯកាទសហាយតនេហិ សត្តរសហិ ធាតូហិ អសង្គហិតំ.

៥៤. សុខិន្ទ្រិយំ … ទុក្ខិន្ទ្រិយំ… សោមនស្សិន្ទ្រិយំ… ទោមនស្សិន្ទ្រិយំ… ឧបេក្ខិន្ទ្រិយំ… សទ្ធិន្ទ្រិយំ… វីរិយិន្ទ្រិយំ… សតិន្ទ្រិយំ… សមាធិន្ទ្រិយំ… បញ្ញិន្ទ្រិយំ… អនញ្ញាតញ្ញស្សាមីតិន្ទ្រិយំ… អញ្ញិន្ទ្រិយំ… អញ្ញាតាវិន្ទ្រិយំ ឯកេន ខន្ធេន ឯកេនាយតនេន ឯកាយ ធាតុយា សង្គហិតំ. កតិហិ អសង្គហិតំ? ចតូហិ ខន្ធេហិ ឯកាទសហាយតនេហិ សត្តរសហិ ធាតូហិ អសង្គហិតំ.

(ឯកមូលកំ.)

៥៥. ចក្ខុន្ទ្រិយញ្ច សោតិន្ទ្រិយញ្ច ឯកេន ខន្ធេន ទ្វីហាយតនេហិ ទ្វីហិ ធាតូហិ សង្គហិតា. កតិហិ អសង្គហិតា? ចតូហិ ខន្ធេហិ ទសហាយតនេហិ សោឡសហិ ធាតូហិ អសង្គហិតា.

៥៦. ចក្ខុន្ទ្រិយញ្ច ឃានិន្ទ្រិយញ្ច… ចក្ខុន្ទ្រិយញ្ច ជិវ្ហិន្ទ្រិយញ្ច… ចក្ខុន្ទ្រិយញ្ច កាយិន្ទ្រិយញ្ច… ចក្ខុន្ទ្រិយញ្ច ឥត្ថិន្ទ្រិយញ្ច… ចក្ខុន្ទ្រិយញ្ច បុរិសិន្ទ្រិយញ្ច ឯកេន ខន្ធេន ទ្វីហាយតនេហិ ទ្វីហិ ធាតូហិ សង្គហិតា. កតិហិ អសង្គហិតា? ចតូហិ ខន្ធេហិ ទសហាយតនេហិ សោឡសហិ ធាតូហិ អសង្គហិតា.

៥៧. ចក្ខុន្ទ្រិយញ្ច មនិន្ទ្រិយញ្ច ទ្វីហិ ខន្ធេហិ ទ្វីហាយតនេហិ អដ្ឋហិ ធាតូហិ សង្គហិតា. កតិហិ អសង្គហិតា? តីហិ ខន្ធេហិ ទសហាយតនេហិ ទសហិ ធាតូហិ អសង្គហិតា.

៥៨. ចក្ខុន្ទ្រិយញ្ច ជីវិតិន្ទ្រិយញ្ច ទ្វីហិ ខន្ធេហិ ទ្វីហាយតនេហិ ទ្វីហិ ធាតូហិ សង្គហិតា. កតិហិ អសង្គហិតា? តីហិ ខន្ធេហិ ទសហាយតនេហិ សោឡសហិ ធាតូហិ អសង្គហិតា.

៥៩. ចក្ខុន្ទ្រិយញ្ច សុខិន្ទ្រិយញ្ច… ចក្ខុន្ទ្រិយញ្ច ទុក្ខិន្ទ្រិយញ្ច… ចក្ខុន្ទ្រិយញ្ច សោមនស្សិន្ទ្រិយញ្ច… ចក្ខុន្ទ្រិយញ្ច ទោមនស្សិន្ទ្រិយញ្ច… ចក្ខុន្ទ្រិយញ្ច ឧបេក្ខិន្ទ្រិយញ្ច… ចក្ខុន្ទ្រិយញ្ច សទ្ធិន្ទ្រិយញ្ច… ចក្ខុន្ទ្រិយញ្ច វីរិយិន្ទ្រិយញ្ច… ចក្ខុន្ទ្រិយញ្ច សតិន្ទ្រិយញ្ច… ចក្ខុន្ទ្រិយញ្ច សមាធិន្ទ្រិយញ្ច… ចក្ខុន្ទ្រិយញ្ច បញ្ញិន្ទ្រិយញ្ច… ចក្ខុន្ទ្រិយញ្ច អនញ្ញាតញ្ញស្សាមីតិន្ទ្រិយញ្ច… ចក្ខុន្ទ្រិយញ្ច អញ្ញិន្ទ្រិយញ្ច… ចក្ខុន្ទ្រិយញ្ច អញ្ញាតាវិន្ទ្រិយញ្ច ទ្វីហិ ខន្ធេហិ ទ្វីហាយតនេហិ ទ្វីហិ ធាតូហិ សង្គហិតា. កតិហិ អសង្គហិតា? តីហិ ខន្ធេហិ ទសហាយតនេហិ សោឡសហិ ធាតូហិ អសង្គហិតា.

(ទុកមូលកំ.)

៦០. ពាវីសតិន្ទ្រិយានិ កតិហិ ខន្ធេហិ កតិហាយតនេហិ កតិហិ ធាតូហិ សង្គហិតានិ? ពាវីសតិន្ទ្រិយានិ ចតូហិ ខន្ធេហិ សត្តហាយតនេហិ តេរសហិ ធាតូហិ សង្គហិតានិ. កតិហិ អសង្គហិតានិ? ឯកេន ខន្ធេន បញ្ចហាយតនេហិ បញ្ចហិ ធាតូហិ អសង្គហិតានិ.

៦. បដិច្ចសមុប្បាទាទិ

៦១. អវិជ្ជា ឯកេន ខន្ធេន ឯកេនាយតនេន ឯកាយ ធាតុយា សង្គហិតា. កតិហិ អសង្គហិតា? ចតូហិ ខន្ធេហិ ឯកាទសហាយតនេហិ សត្តរសហិ ធាតូហិ អសង្គហិតា.

៦២. អវិជ្ជាបច្ចយា សង្ខារា ឯកេន ខន្ធេន ឯកេនាយតនេន ឯកាយ ធាតុយា សង្គហិតា. កតិហិ អសង្គហិតា? ចតូហិ ខន្ធេហិ ឯកាទសហាយតនេហិ សត្តរសហិ ធាតូហិ អសង្គហិតា.

៦៣. សង្ខារបច្ចយា វិញ្ញាណំ ឯកេន ខន្ធេន ឯកេនាយតនេន សត្តហិ ធាតូហិ សង្គហិតំ. កតិហិ អសង្គហិតំ? ចតូហិ ខន្ធេហិ ឯកាទសហាយតនេហិ ឯកាទសហិ ធាតូហិ អសង្គហិតំ.

៦៤. វិញ្ញាណបច្ចយា នាមរូបំ ចតូហិ ខន្ធេហិ ឯកាទសហាយតនេហិ ឯកាទសហិ ធាតូហិ សង្គហិតំ. កតិហិ អសង្គហិតំ? ឯកេន ខន្ធេន ឯកេនាយតនេន សត្តហិ ធាតូហិ អសង្គហិតំ.

៦៥. នាមរូបបច្ចយា សឡាយតនំ ទ្វីហិ ខន្ធេហិ ឆហាយតនេហិ ទ្វាទសហិ ធាតូហិ សង្គហិតំ. កតិហិ អសង្គហិតំ? តីហិ ខន្ធេហិ ឆហាយតនេហិ ឆហិ ធាតូហិ អសង្គហិតំ.

៦៦. សឡាយតនបច្ចយា ផស្សោ… ផស្សបច្ចយា វេទនា… វេទនាបច្ចយា តណ្ហា… តណ្ហាបច្ចយា ឧបាទានំ… កម្មភវោ [ឧបាទានបច្ចយា កម្មភវោ (សី. ស្យា.)] ឯកេន ខន្ធេន ឯកេនាយតនេន ឯកាយ ធាតុយា សង្គហិតោ. កតិហិ អសង្គហិតោ? ចតូហិ ខន្ធេហិ ឯកាទសហាយតនេហិ សត្តរសហិ ធាតូហិ អសង្គហិតោ.

៦៧. ឧបបត្តិភវោ … កាមភវោ… សញ្ញាភវោ… បញ្ចវោការភវោ បញ្ចហិ ខន្ធេហិ ឯកាទសហាយតនេហិ សត្តរសហិ ធាតូហិ សង្គហិតោ. កតិហិ អសង្គហិតោ? ន កេហិចិ ខន្ធេហិ ឯកេនាយតនេន ឯកាយ ធាតុយា អសង្គហិតោ.

៦៨. រូបភវោ បញ្ចហិ ខន្ធេហិ បញ្ចហាយតនេហិ អដ្ឋហិ ធាតូហិ សង្គហិតោ. កតិហិ អសង្គហិតោ? ន កេហិចិ ខន្ធេហិ សត្តហាយតនេហិ ទសហិ ធាតូហិ អសង្គហិតោ.

៦៩. អរូបភវោ… នេវសញ្ញានាសញ្ញាភវោ… ចតុវោការភវោ ចតូហិ ខន្ធេហិ ទ្វីហាយតនេហិ ទ្វីហិ ធាតូហិ សង្គហិតោ. កតិហិ អសង្គហិតោ? ឯកេន ខន្ធេន ទសហាយតនេហិ សោឡសហិ ធាតូហិ អសង្គហិតោ.

៧០. អសញ្ញាភវោ… ឯកវោការភវោ ឯកេន ខន្ធេន ទ្វីហាយតនេហិ ទ្វីហិ ធាតូហិ សង្គហិតោ. កតិហិ អសង្គហិតោ? ចតូហិ ខន្ធេហិ ទសហាយតនេហិ សោឡសហិ ធាតូហិ អសង្គហិតោ.

៧១. ជាតិ ទ្វីហិ ខន្ធេហិ… ជរា ទ្វីហិ ខន្ធេហិ… មរណំ ទ្វីហិ ខន្ធេហិ ឯកេនាយតនេន ឯកាយ ធាតុយា សង្គហិតំ. កតិហិ អសង្គហិតំ? តីហិ ខន្ធេហិ ឯកាទសហាយតនេហិ សត្តរសហិ ធាតូហិ អសង្គហិតំ.

៧២. សោកោ… បរិទេវោ… ទុក្ខំ… ទោមនស្សំ… ឧបាយាសោ… សតិបដ្ឋានំ… សម្មប្បធានំ ឯកេន ខន្ធេន ឯកេនាយតនេន ឯកាយ ធាតុយា សង្គហិតំ. កតិហិ អសង្គហិតំ? ចតូហិ ខន្ធេហិ ឯកាទសហាយតនេហិ សត្តរសហិ ធាតូហិ អសង្គហិតំ.

៧៣. ឥទ្ធិបាទោ ទ្វីហិ ខន្ធេហិ ទ្វីហាយតនេហិ ទ្វីហិ ធាតូហិ សង្គហិតោ. កតិហិ អសង្គហិតោ? តីហិ ខន្ធេហិ ទសហាយតនេហិ សោឡសហិ ធាតូហិ អសង្គហិតោ.

៧៤. ឈានំ ទ្វីហិ ខន្ធេហិ ឯកេនាយតនេន ឯកាយ ធាតុយា សង្គហិតំ. កតិហិ អសង្គហិតំ? តីហិ ខន្ធេហិ ឯកាទសហាយតនេហិ សត្តរសហិ ធាតូហិ អសង្គហិតំ.

៧៥. អប្បមញ្ញា … បញ្ចិន្ទ្រិយានិ… បញ្ច ពលានិ… សត្ត ពោជ្ឈង្គា… អរិយោ អដ្ឋង្គិកោ មគ្គោ… ផស្សោ… វេទនា… សញ្ញា… ចេតនា… អធិមោក្ខោ… មនសិការោ ឯកេន ខន្ធេន ឯកេនាយតនេន ឯកាយ ធាតុយា សង្គហិតោ. កតិហិ អសង្គហិតោ? ចតូហិ ខន្ធេហិ ឯកាទសហាយតនេហិ សត្តរសហិ ធាតូហិ អសង្គហិតោ.

៧៦. ចិត្តំ ឯកេន ខន្ធេន ឯកេនាយតនេន សត្តហិ ធាតូហិ សង្គហិតំ. កតិហិ អសង្គហិតំ? ចតូហិ ខន្ធេហិ ឯកាទសហាយតនេហិ ឯកាទសហិ ធាតូហិ អសង្គហិតំ.

៧. តិកំ

៧៧. កុសលា ធម្មា… អកុសលា ធម្មា កតិហិ ខន្ធេហិ កតិហាយតនេហិ កតិហិ ធាតូហិ សង្គហិតា? កុសលា ធម្មា… អកុសលា ធម្មា ចតូហិ ខន្ធេហិ ទ្វីហាយតនេហិ ទ្វីហិ ធាតូហិ សង្គហិតា. កតិហិ អសង្គហិតា? ឯកេន ខន្ធេន ទសហាយតនេហិ សោឡសហិ ធាតូហិ អសង្គហិតា.

៧៨. អព្យាកតា ធម្មា អសង្ខតំ ខន្ធតោ ឋបេត្វា បញ្ចហិ ខន្ធេហិ ទ្វាទសហាយតនេហិ អដ្ឋារសហិ ធាតូហិ សង្គហិតា. កតិហិ អសង្គហិតា? ន កេហិចិ ខន្ធេហិ ន កេហិចិ អាយតនេហិ ន កាហិចិ ធាតូហិ អសង្គហិតា.

៧៩. សុខាយ វេទនាយ សម្បយុត្តា ធម្មា… ទុក្ខាយ វេទនាយ សម្បយុត្តា ធម្មា តីហិ ខន្ធេហិ ទ្វីហាយតនេហិ តីហិ ធាតូហិ សង្គហិតា. កតិហិ អសង្គហិតា? ទ្វីហិ ខន្ធេហិ ទសហាយតនេហិ បន្នរសហិ ធាតូហិ អសង្គហិតា.

៨០. អទុក្ខមសុខាយ វេទនាយ សម្បយុត្តា ធម្មា តីហិ ខន្ធេហិ ទ្វីហាយតនេហិ សត្តហិ ធាតូហិ សង្គហិតា. កតិហិ អសង្គហិតា? ទ្វីហិ ខន្ធេហិ ទសហាយតនេហិ ឯកាទសហិ ធាតូហិ អសង្គហិតា.

៨១. វិបាកា ធម្មា ចតូហិ ខន្ធេហិ ទ្វីហាយតនេហិ អដ្ឋហិ ធាតូហិ សង្គហិតា. កតិហិ អសង្គហិតា? ឯកេន ខន្ធេន ទសហាយតនេហិ ទសហិ ធាតូហិ អសង្គហិតា.

៨២. វិបាកធម្មធម្មា… សំកិលិដ្ឋសំកិលេសិកា ធម្មា ចតូហិ ខន្ធេហិ ទ្វីហាយតនេហិ ទ្វីហិ ធាតូហិ សង្គហិតា. កតិហិ អសង្គហិតា? ឯកេន ខន្ធេន ទសហាយតនេហិ សោឡសហិ ធាតូហិ អសង្គហិតា.

៨៣. នេវវិបាកនវិបាកធម្មធម្មា អសង្ខតំ ខន្ធតោ ឋបេត្វា បញ្ចហិ ខន្ធេហិ ទ្វាទសហាយតនេហិ តេរសហិ ធាតូហិ សង្គហិតា. កតិហិ អសង្គហិតា? ន កេហិចិ ខន្ធេហិ ន កេហិចិ អាយតនេហិ បញ្ចហិ ធាតូហិ អសង្គហិតា.

៨៤. ឧបាទិន្នុបាទានិយា ធម្មា បញ្ចហិ ខន្ធេហិ ឯកាទសហាយតនេហិ សត្តរសហិ ធាតូហិ សង្គហិតា. កតិហិ អសង្គហិតា? ន កេហិចិ ខន្ធេហិ ឯកេនាយតនេន ឯកាយ ធាតុយា អសង្គហិតា.

៨៥. អនុបាទិន្នុបាទានិយា ធម្មា បញ្ចហិ ខន្ធេហិ សត្តហាយតនេហិ អដ្ឋហិ ធាតូហិ សង្គហិតា. កតិហិ អសង្គហិតា? ន កេហិចិ ខន្ធេហិ បញ្ចហាយតនេហិ ទសហិ ធាតូហិ អសង្គហិតា.

៨៦. អនុបាទិន្នអនុបាទានិយា ធម្មា… អសំកិលិដ្ឋអសំកិលេសិកា ធម្មា អសង្ខតំ ខន្ធតោ ឋបេត្វា ចតូហិ ខន្ធេហិ ទ្វីហាយតនេហិ ទ្វីហិ ធាតូហិ សង្គហិតា. កតិហិ អសង្គហិតា? ឯកេន ខន្ធេន ទសហាយតនេហិ សោឡសហិ ធាតូហិ អសង្គហិតា.

៨៧. អសំកិលិដ្ឋសំកិលេសិកា ធម្មា បញ្ចហិ ខន្ធេហិ ទ្វាទសហាយតនេហិ អដ្ឋារសហិ ធាតូហិ សង្គហិតា. កតិហិ អសង្គហិតា? ន កេហិចិ ខន្ធេហិ ន កេហិចិ អាយតនេហិ ន កាហិចិ ធាតូហិ អសង្គហិតា.

៨៨. សវិតក្កសវិចារា ធម្មា ចតូហិ ខន្ធេហិ ទ្វីហាយតនេហិ តីហិ ធាតូហិ សង្គហិតា. កតិហិ អសង្គហិតា? ឯកេន ខន្ធេន ទសហាយតនេហិ បន្នរសហិ ធាតូហិ អសង្គហិតា.

៨៩. អវិតក្កវិចារមត្តា ធម្មា… បីតិសហគតា ធម្មា ចតូហិ ខន្ធេហិ ទ្វីហាយតនេហិ ទ្វីហិ ធាតូហិ សង្គហិតា. កតិហិ អសង្គហិតា? ឯកេន ខន្ធេន ទសហាយតនេហិ សោឡសហិ ធាតូហិ អសង្គហិតា.

៩០. អវិតក្កអវិចារា ធម្មា អសង្ខតំ ខន្ធតោ ឋបេត្វា បញ្ចហិ ខន្ធេហិ ទ្វាទសហាយតនេហិ សត្តរសហិ ធាតូហិ សង្គហិតា. កតិហិ អសង្គហិតា? ន កេហិចិ ខន្ធេហិ ន កេហិចិ អាយតនេហិ ឯកាយ ធាតុយា អសង្គហិតា.

៩១. សុខសហគតា ធម្មា តីហិ ខន្ធេហិ ទ្វីហាយតនេហិ តីហិ ធាតូហិ សង្គហិតា. កតិហិ អសង្គហិតា? ទ្វីហិ ខន្ធេហិ ទសហាយតនេហិ បន្នរសហិ ធាតូហិ អសង្គហិតា.

៩២. ឧបេក្ខាសហគតា ធម្មា តីហិ ខន្ធេហិ ទ្វីហាយតនេហិ សត្តហិ ធាតូហិ សង្គហិតា. កតិហិ អសង្គហិតា? ទ្វីហិ ខន្ធេហិ ទសហាយតនេហិ ឯកាទសហិ ធាតូហិ អសង្គហិតា.

៩៣. ទស្សនេន បហាតព្ពា ធម្មា… ភាវនាយ បហាតព្ពា ធម្មា… ទស្សនេន បហាតព្ពហេតុកា ធម្មា… ភាវនាយ បហាតព្ពហេតុកា ធម្មា… អាចយគាមិនោ ធម្មា… អបចយគាមិនោ ធម្មា… សេក្ខា ធម្មា… អសេក្ខា ធម្មា… មហគ្គតា ធម្មា ចតូហិ ខន្ធេហិ ទ្វីហាយតនេហិ ទ្វីហិ ធាតូហិ សង្គហិតា. កតិហិ អសង្គហិតា? ឯកេន ខន្ធេន ទសហាយតនេហិ សោឡសហិ ធាតូហិ អសង្គហិតា.

៩៤. នេវ ទស្សនេន ន ភាវនាយ បហាតព្ពា ធម្មា… នេវ ទស្សនេន ន ភាវនាយ បហាតព្ពហេតុកា ធម្មា… នេវាចយគាមិនាបចយគាមិនោ ធម្មា… នេវសេក្ខនាសេក្ខា ធម្មា អសង្ខតំ ខន្ធតោ ឋបេត្វា បញ្ចហិ ខន្ធេហិ ទ្វាទសហាយតនេហិ អដ្ឋារសហិ ធាតូហិ សង្គហិតា. កតិហិ អសង្គហិតា? ន កេហិចិ ខន្ធេហិ ន កេហិចិ អាយតនេហិ ន កាហិចិ ធាតូហិ អសង្គហិតា.

៩៥. បរិត្តា ធម្មា បញ្ចហិ ខន្ធេហិ ទ្វាទសហាយតនេហិ អដ្ឋារសហិ ធាតូហិ សង្គហិតា. កតិហិ អសង្គហិតា? ន កេហិចិ ខន្ធេហិ ន កេហិចិ អាយតនេហិ ន កាហិចិ ធាតូហិ អសង្គហិតា.

៩៦. អប្បមាណា ធម្មា… បណីតា ធម្មា អសង្ខតំ ខន្ធតោ ឋបេត្វា ចតូហិ ខន្ធេហិ ទ្វីហាយតនេហិ ទ្វីហិ ធាតូហិ សង្គហិតា. កតិហិ អសង្គហិតា? ឯកេន ខន្ធេន ទសហាយតនេហិ សោឡសហិ ធាតូហិ អសង្គហិតា.

៩៧. បរិត្តារម្មណា [បរិត្តារមណា (?)] ធម្មា ចតូហិ ខន្ធេហិ ទ្វីហាយតនេហិ អដ្ឋហិ ធាតូហិ សង្គហិតា. កតិហិ អសង្គហិតា? ឯកេន ខន្ធេន ទសហាយតនេហិ ទសហិ ធាតូហិ អសង្គហិតា.

៩៨. មហគ្គតារម្មណា ធម្មា… អប្បមាណារម្មណា ធម្មា… ហីនា ធម្មា… មិច្ឆត្តនិយតា ធម្មា… សម្មត្តនិយតា ធម្មា… មគ្គារម្មណា ធម្មា… មគ្គហេតុកា ធម្មា… មគ្គាធិបតិនោ ធម្មា ចតូហិ ខន្ធេហិ ទ្វីហាយតនេហិ ទ្វីហិ ធាតូហិ សង្គហិតា. កតិហិ អសង្គហិតា? ឯកេន ខន្ធេន ទសហាយតនេហិ សោឡសហិ ធាតូហិ អសង្គហិតា.

៩៩. មជ្ឈិមា ធម្មា បញ្ចហិ ខន្ធេហិ ទ្វាទសហាយតនេហិ អដ្ឋារសហិ ធាតូហិ សង្គហិតា. កតិហិ អសង្គហិតា? ន កេហិចិ ខន្ធេហិ ន កេហិចិ អាយតនេហិ ន កាហិចិ ធាតូហិ អសង្គហិតា.

១០០. អនិយតា ធម្មា អសង្ខតំ ខន្ធតោ ឋបេត្វា បញ្ចហិ ខន្ធេហិ ទ្វាទសហាយតនេហិ អដ្ឋារសហិ ធាតូហិ សង្គហិតា. កតិហិ អសង្គហិតា? ន កេហិចិ ខន្ធេហិ ន កេហិចិ អាយតនេហិ ន កាហិចិ ធាតូហិ អសង្គហិតា.

១០១. ឧប្បន្នា ធម្មា បញ្ចហិ ខន្ធេហិ ទ្វាទសហាយតនេហិ អដ្ឋារសហិ ធាតូហិ សង្គហិតា. កតិហិ អសង្គហិតា? ន កេហិចិ ខន្ធេហិ ន កេហិចិ អាយតនេហិ ន កាហិចិ ធាតូហិ អសង្គហិតា.

១០២. អនុប្បន្នា ធម្មា បញ្ចហិ ខន្ធេហិ សត្តហាយតនេហិ អដ្ឋហិ ធាតូហិ សង្គហិតា. កតិហិ អសង្គហិតា? ន កេហិចិ ខន្ធេហិ បញ្ចហាយតនេហិ ទសហិ ធាតូហិ អសង្គហិតា.

១០៣. ឧប្បាទិនោ ធម្មា បញ្ចហិ ខន្ធេហិ ឯកាទសហាយតនេហិ សត្តរសហិ ធាតូហិ សង្គហិតា. កតិហិ អសង្គហិតា? ន កេហិចិ ខន្ធេហិ ឯកេនាយតនេន ឯកាយ ធាតុយា អសង្គហិតា.

១០៤. អតីតា ធម្មា… អនាគតា ធម្មា… បច្ចុប្បន្នា ធម្មា… អជ្ឈត្តា ធម្មា… អជ្ឈត្តពហិទ្ធា ធម្មា បញ្ចហិ ខន្ធេហិ ទ្វាទសហាយតនេហិ អដ្ឋារសហិ ធាតូហិ សង្គហិតា. កតិហិ អសង្គហិតា? ន កេហិចិ ខន្ធេហិ ន កេហិចិ អាយតនេហិ ន កាហិចិ ធាតូហិ អសង្គហិតា.

១០៥. ពហិទ្ធា ធម្មា អសង្ខតំ ខន្ធតោ ឋបេត្វា បញ្ចហិ ខន្ធេហិ ទ្វាទសហាយតនេហិ អដ្ឋារសហិ ធាតូហិ សង្គហិតា. កតិហិ អសង្គហិតា? ន កេហិចិ ខន្ធេហិ ន កេហិចិ អាយតនេហិ ន កាហិចិ ធាតូហិ អសង្គហិតា.

១០៦. អតីតារម្មណា ធម្មា… អនាគតារម្មណា ធម្មា ចតូហិ ខន្ធេហិ ទ្វីហាយតនេហិ ទ្វីហិ ធាតូហិ សង្គហិតា. កតិហិ អសង្គហិតា? ឯកេន ខន្ធេន ទសហាយតនេហិ សោឡសហិ ធាតូហិ អសង្គហិតា.

១០៧. បច្ចុប្បន្នារម្មណា ធម្មា… អជ្ឈត្តារម្មណា ធម្មា… ពហិទ្ធារម្មណា ធម្មា… អជ្ឈត្តពហិទ្ធារម្មណា ធម្មា ចតូហិ ខន្ធេហិ ទ្វីហាយតនេហិ អដ្ឋហិ ធាតូហិ សង្គហិតា. កតិហិ អសង្គហិតា? ឯកេន ខន្ធេន ទសហាយតនេហិ ទសហិ ធាតូហិ អសង្គហិតា.

១០៨. សនិទស្សនសប្បដិឃា ធម្មា ឯកេន ខន្ធេន ឯកេនាយតនេន ឯកាយ ធាតុយា សង្គហិតា. កតិហិ អសង្គហិតា? ចតូហិ ខន្ធេហិ ឯកាទសហាយតនេហិ សត្តរសហិ ធាតូហិ អសង្គហិតា.

១០៩. អនិទស្សនសប្បដិឃា ធម្មា ឯកេន ខន្ធេន នវហាយតនេហិ នវហិ ធាតូហិ សង្គហិតា. កតិហិ អសង្គហិតា? ចតូហិ ខន្ធេហិ តីហាយតនេហិ នវហិ ធាតូហិ អសង្គហិតា.

១១០. អនិទស្សនអប្បដិឃា ធម្មា អសង្ខតំ ខន្ធតោ ឋបេត្វា បញ្ចហិ ខន្ធេហិ ទ្វីហាយតនេហិ អដ្ឋហិ ធាតូហិ សង្គហិតា. កតិហិ អសង្គហិតា? ន កេហិចិ ខន្ធេហិ, ទសហាយតនេហិ ទសហិ ធាតូហិ អសង្គហិតា.

៨. ទុកំ

១១១. ហេតូ ធម្មា… ហេតូ ចេវ សហេតុកា ច ធម្មា… ហេតូ ចេវ ហេតុសម្បយុត្តា ច ធម្មា ឯកេន ខន្ធេន ឯកេនាយតនេន ឯកាយ ធាតុយា សង្គហិតា. កតិហិ អសង្គហិតា? ចតូហិ ខន្ធេហិ ឯកាទសហាយតនេហិ សត្តរសហិ ធាតូហិ អសង្គហិតា.

១១២. ន ហេតូ ធម្មា… អហេតុកា ធម្មា… ហេតុវិប្បយុត្តា ធម្មា… ន ហេតូ អហេតុកា [ន ហេតូ អហេតុកា (ស្យា. ក.) វិភ. ទុកបញ្ហាបុច្ឆកេបិ] ធម្មា អសង្ខតំ ខន្ធតោ ឋបេត្វា បញ្ចហិ ខន្ធេហិ ទ្វាទសហាយតនេហិ អដ្ឋារសហិ ធាតូហិ សង្គហិតា. កតិហិ អសង្គហិតា? ន កេហិចិ ខន្ធេហិ ន កេហិចិ អាយតនេហិ ន កាហិចិ ធាតូហិ អសង្គហិតា.

១១៣. សហេតុកា ធម្មា… ហេតុសម្បយុត្តា ធម្មា… សហេតុកា ចេវ ន ច ហេតូ ធម្មា… ហេតុសម្បយុត្តា ចេវ ន ច ហេតូ ធម្មា… ន ហេតូ សហេតុកា ធម្មា ចតូហិ ខន្ធេហិ ទ្វីហាយតនេហិ ទ្វីហិ ធាតូហិ សង្គហិតា. កតិហិ អសង្គហិតា? ឯកេន ខន្ធេន ទសហាយតនេហិ សោឡសហិ ធាតូហិ អសង្គហិតា.

១១៤. សប្បច្ចយា ធម្មា… សង្ខតា ធម្មា បញ្ចហិ ខន្ធេហិ ទ្វាទសហាយតនេហិ អដ្ឋារសហិ ធាតូហិ សង្គហិតា. កតិហិ អសង្គហិតា? ន កេហិចិ ខន្ធេហិ ន កេហិចិ អាយតនេហិ ន កាហិចិ ធាតូហិ អសង្គហិតា.

១១៥. អប្បច្ចយា ធម្មា… អសង្ខតា ធម្មា ន កេហិចិ ខន្ធេហិ ឯកេនាយតនេន ឯកាយ ធាតុយា សង្គហិតា. កតិហិ អសង្គហិតា? បញ្ចហិ ខន្ធេហិ ឯកាទសហាយតនេហិ សត្តរសហិ ធាតូហិ អសង្គហិតា.

១១៦. សនិទស្សនា ធម្មា ឯកេន ខន្ធេន ឯកេនាយតនេន ឯកាយ ធាតុយា សង្គហិតា. កតិហិ អសង្គហិតា? ចតូហិ ខន្ធេហិ ឯកាទសហាយតនេហិ សត្តរសហិ ធាតូហិ អសង្គហិតា.

១១៧. អនិទស្សនា ធម្មា អសង្ខតំ ខន្ធតោ ឋបេត្វា បញ្ចហិ ខន្ធេហិ ឯកាទសហាយតនេហិ សត្តរសហិ ធាតូហិ សង្គហិតា. កតិហិ អសង្គហិតា? ន កេហិចិ ខន្ធេហិ, ឯកេនាយតនេន ឯកាយ ធាតុយា អសង្គហិតា.

១១៨. សប្បដិឃា ធម្មា ឯកេន ខន្ធេន ទសហាយតនេហិ ទសហិ ធាតូហិ សង្គហិតា. កតិហិ អសង្គហិតា? ចតូហិ ខន្ធេហិ ទ្វីហាយតនេហិ អដ្ឋហិ ធាតូហិ អសង្គហិតា.

១១៩. អប្បដិឃា ធម្មា អសង្ខតំ ខន្ធតោ ឋបេត្វា បញ្ចហិ ខន្ធេហិ ទ្វីហាយតនេហិ អដ្ឋហិ ធាតូហិ សង្គហិតា. កតិហិ អសង្គហិតា? ន កេហិចិ ខន្ធេហិ, ទសហាយតនេហិ ទសហិ ធាតូហិ អសង្គហិតា.

១២០. រូបិនោ ធម្មា ឯកេន ខន្ធេន ឯកាទសហាយតនេហិ ឯកាទសហិ ធាតូហិ សង្គហិតា. កតិហិ អសង្គហិតា? ចតូហិ ខន្ធេហិ ឯកេនាយតនេន សត្តហិ ធាតូហិ អសង្គហិតា.

១២១. អរូបិនោ ធម្មា អសង្ខតំ ខន្ធតោ ឋបេត្វា ចតូហិ ខន្ធេហិ ទ្វីហាយតនេហិ អដ្ឋហិ ធាតូហិ សង្គហិតា. កតិហិ អសង្គហិតា? ឯកេន ខន្ធេន ទសហាយតនេហិ ទសហិ ធាតូហិ អសង្គហិតា.

១២២. លោកិយា ធម្មា បញ្ចហិ ខន្ធេហិ ទ្វាទសហាយតនេហិ អដ្ឋារសហិ ធាតូហិ សង្គហិតា. កតិហិ អសង្គហិតា? ន កេហិចិ ខន្ធេហិ ន កេហិចិ អាយតនេហិ ន កាហិចិ ធាតូហិ អសង្គហិតា.

១២៣. លោកុត្តរា ធម្មា អសង្ខតំ ខន្ធតោ ឋបេត្វា ចតូហិ ខន្ធេហិ ទ្វីហាយតនេហិ ទ្វីហិ ធាតូហិ សង្គហិតា. កតិហិ អសង្គហិតា? ឯកេន ខន្ធេន ទសហាយតនេហិ សោឡសហិ ធាតូហិ អសង្គហិតា.

១២៤. កេនចិ វិញ្ញេយ្យា ធម្មា… កេនចិ ន វិញ្ញេយ្យា ធម្មា អសង្ខតំ ខន្ធតោ ឋបេត្វា បញ្ចហិ ខន្ធេហិ ទ្វាទសហាយតនេហិ អដ្ឋារសហិ ធាតូហិ សង្គហិតា. កតិហិ អសង្គហិតា? ន កេហិចិ ខន្ធេហិ ន កេហិចិ អាយតនេហិ ន កាហិចិ ធាតូហិ អសង្គហិតា.

១២៥. អាសវា ធម្មា… អាសវា ចេវ សាសវា ច ធម្មា… អាសវា ចេវ អាសវសម្បយុត្តា ច ធម្មា ឯកេន ខន្ធេន ឯកេនាយតនេន ឯកាយ ធាតុយា សង្គហិតា. កតិហិ អសង្គហិតា? ចតូហិ ខន្ធេហិ ឯកាទសហាយតនេហិ សត្តរសហិ ធាតូហិ អសង្គហិតា.

១២៦. នោ អាសវា ធម្មា… អាសវវិប្បយុត្តា ធម្មា អសង្ខតំ ខន្ធតោ ឋបេត្វា បញ្ចហិ ខន្ធេហិ ទ្វាទសហាយតនេហិ អដ្ឋារសហិ ធាតូហិ សង្គហិតា. កតិហិ អសង្គហិតា? ន កេហិចិ ខន្ធេហិ ន កេហិចិ អាយតនេហិ ន កាហិចិ ធាតូហិ អសង្គហិតា.

១២៧. សាសវា ធម្មា… សាសវា ចេវ នោ ច អាសវា ធម្មា… អាសវវិប្បយុត្តា សាសវា ធម្មា បញ្ចហិ ខន្ធេហិ ទ្វាទសហាយតនេហិ អដ្ឋារសហិ ធាតូហិ សង្គហិតា. កតិហិ អសង្គហិតា? ន កេហិចិ ខន្ធេហិ ន កេហិចិ អាយតនេហិ ន កាហិចិ ធាតូហិ អសង្គហិតា.

១២៨. អនាសវា ធម្មា… អាសវវិប្បយុត្តា អនាសវា ធម្មា អសង្ខតំ ខន្ធតោ ឋបេត្វា ចតូហិ ខន្ធេហិ ទ្វីហាយតនេហិ ទ្វីហិ ធាតូហិ សង្គហិតា. កតិហិ អសង្គហិតា? ឯកេន ខន្ធេន ទសហាយតនេហិ សោឡសហិ ធាតូហិ អសង្គហិតា.