តេលកដាហគាថា |ឱ០.០០០១|

នមោ តស្ស ភគវតោ អរហតោ សម្មាសម្ពុទ្ធស្ស

១. លំកិស្សរោ ជយតុ វារណរាជគាមី

ភោគិន្ទភោគ រុចិរាយត បីណ ពាហុ,

សាធុបចារនិរតោ គុណសន្និវាសោ

ធម្មេ ឋិតោ វីគតកោធមទាវលេបោ;

២. យោ សព្ពលោកមហិតោ ករុណាធិវាសោ

មោក្ខាករោ រវិកុលម្ពរ បុណ្ណ ចន្ទោ,

ញេយ្យោទធិំ សុវិបុលំ សកលំ វិពុទ្ធោ

លោកុត្តមំ នមថ តំ សិរសា មុនិន្ទំ;

៣. សោបានមាលមមលំ តិទសាលយស្ស

សំសារ សាគរសមុត្តរណាយ សេតុំ,

សព្ពាគតីភយ វិវជ្ជិត ខេម មគ្គំ

ធម្មំ នមស្សថ សទា មុនិនា បណីតំ;

៤. |ឱ០.០០០២|

ទេយ្យំ តទប្បមបិ យត្ថ បសន្ន ចិត្តា

ទត្វា នរា ផលមុឡារតរំ លភន្តេ,

តំ សព្ពទា ទសពលេនបិ សុប្បសត្ថំ

សង្ឃំ នមស្សថ សទាមិតបុញ្ញខេត្តំ;

៥. តេជោ ពលេន មហតា រតនត្តយស្ស

លោកត្តយំ សមធិគច្ឆតិ យេន មោក្ខំ,

រក្ខា ន ចត្ថិ ច សមា រតនត្តយស្ស

តស្មា សទា ភជថ តំ រតនត្តយំ ភោ;

៦. លំកិស្សរោ បរហិតេករតោ និរាសោ

រត្តិម្បិ ជាគររតោ ករុណាធិវាសោ,

លោកំ វិពោធយតិ លោកហិតាយ កាមំ

ធម្មំ សមាចរថ ជាគរិយានុយុត្តា;

៧. |ឱ០.០០០៣|

សត្តោបការ និរតា កុសលេ សហាយា

ភោ ទុល្លភា ភុវិ នរា វិហតប្បមាទា,

លំកាធិបំ គុណធនំ កុសលេ សហាយំ

អាគម្ម សំចរថ ធម្មមលំ បមាទំ;

៨. ធម្មោ តិលោក សរណោ បរមោ រសានំ

ធម្មោ មហគ្ឃរតនោ រតនេសុ លោកេ,

ធម្មោ ភវេ តិភវទុក្ខ វិនាសហេតុ

ធម្មំ សមាចរថ ជាគរិយានុយុត្តា;

៩. និទ្ទំ វិនោទយថ ភាវយថប្បមេយ្យំ

ទុក្ខំ អនិច្ចម្បិ ចេហ អនត្តតញ្ច,

ទេហេ រតិំ ជហថ ជ ជជ្ជរភាជនាភោ

ធម្មំ សមាចរថ ជាគរិយានុយុត្តា;

១០. |ឱ០.០០០៤|

ឱកាស មជ្ជ មម នត្ថិ សុវេ ករិស្សំ

ធម្មំ ឥតីហលសតា កុសលប្បយោគេ,

នា’លំ តិយទ្ធសុ តថា ភុវនត្តយេ ច

កាមំ ន ចត្ថិ មនុជោ មរណា បមុត្តោ;

១១. ខិត្តោ យថា នភសិ កេនចិទេវ លេឌ្ឌុ

ភូមិំ សមាបត្តិ ភារតយា ខណេន,

ជាតត្តមេវ ខលុ ការណមេកមត្រ

លោកំ សទា ននុ ធុវំ មរណាយ គន្តុំ;

១២. កាមំ នរស្ស បតតោ គិរិមុទ្ធនាតោ

មជ្ឈេ ន កិញ្ចិ ភយនិស្សរណាយ ហេតុ,

កាមំ វជន្តិ មរណំ តិភវេសុ សត្តា

ភោគេ រតិំ បជហថាបិ ច ជីវិតេ ច;

១៣. |ឱ០.០០០៥|

កាមំ បតន្តិ មហិយា ខលុ វស្សធារា

វិជ្ជុល្លតា វិតតមេឃ មុខា បមុត្តា,

ឯវំ នរា មរណភីម បបាតមជ្ឈេ

កាមំ បតន្តិ នហិ កោចិ ភវេសុ និច្ចោ;

១៤. វេលាតដេ បដុតរោរុ តរំគមាលា

នាសំ វជន្តិ សតតំ សលិលាលយស្ស,

នាសំ តថា សមុបយន្តិ នរាមរានំ

បាណានិ ទារុណតរេ មរណោទធិម្ហិ;

១៥. រុទ្ធោបិ សោ រថវរស្សគជាធិបេហិ

យោធេហិ ចាបិ សពលេហិ ច សាយុធេហិ,

លោកំ វិវំចិយ សទា មរណូសភោ សោ

កាមំ និហន្តិ ភុវនត្តយ សាលិ ទណ្ឌំ;

១៦. |ឱ០.០០០៦|

ភោ មារុតេន មហតា វិហតោ បទីបោ

ខិប្បំ វិនាស មុខមេតិ មហប្បភោបិ,

លោកេ តថា មរណចណ្ឌ សមីរណេន

ខិប្បំ វិនស្សតិ នរាយុមហា បទីបោ;

១៧. រាមជ្ជុនប្បភូតិ ភូបតិ បុំគវា ច

សូរា បុរេ រណមុខេ វិជិតារិ សង្ឃា,

តេបីហ ចណ្ឌ មរណោឃ និមុគ្គទេហា

នាសំ គតា ជគតិ កេ មរណា បមុត្តា?

១៨. លក្ខី ច សាគរបដា សធរាធរា ច

សម្បត្តិយោ ច វិវិធា អបិ រូបសោភា,

សព្ពា ច តា អបិ ច មិត្តសុតា ច ទារា

កេ ចាបិ កំ អនុគតា មរណំ វជន្តំ?

១៩. |ឱ០.០០០៧|

ព្រហ្មាសុរាសុរគណា ច មហានុភាវា

គន្ធព្ពកិន្នរមហោរគរក្ខសា ច,

តេ ចា បរេ ច មរណគ្គិសិខាយ សព្ពេ

អន្តេ បតន្តិ សលភា ឥវ ខីណបុញ្ញា;

២០. យេ សារិបុត្តបមុខា មុនិសាវកា ច

សុទ្ធា សទាសវនុទា បរមិទ្ធិបត្តា,

តេ ចាបិ មច្ចុវឡភា មុខ សន្និមុគ្គា

ទីបានិវានលហតា ខយតំ ឧបេតា;

២១. ពុទ្ធាបិ ពុទ្ធកមលាមលចារុនេត្តា

ពត្តិំសលក្ខណ វិរាជិត រូបសោភា,

សព្ពាសចក្ខយករាបិ ច លោកនាថា

សម្មទ្ទិតា មរណមត្តមហាគជេន;

២២. |ឱ០.០០០៨|

រោគាតុរេសុ ករុណា ន ជរាតុរេសុ

ខិឌ្ឌាបរេសុ សុកុមារកុមារកេសុ,

លោកំ សទា ហនតិ មច្ចុ មហាគជិន្ទោ

ទវានលោ វនមិវាវរតំ អសេសំ;

២៣. អាបុណ្ណតា ន សលិលេ ន ជលាសយស្ស

កដ្ឋស្ស ចាបិ ពហុតា ន ហុតាសនស្ស,

ភុត្វាន សោ តិភូវនម្បិ តថា អសេសំ

ភោ និទ្ទយោ ន ខលុ បីតិមុបេតិ មច្ចុ;

២៤. ភោ មោហ មោហិតតយា វិវសោ អធញ្ញោ

លោកោ បតត្យបិបិ មច្ចុមុខេ សុភីមេ,

ភោគេ រតិំ សមុបយាតិ និហីនបញ្ញោ

ទោលា តរង្គចបលេ សុបិនោបមេយ្យេ;

២៥. |ឱ០.០០០៩|

ឯកោបិ មច្ចុរភិហន្តុមលំ តិលោកំ

កិំ និទ្ទយា អបិ ជរាមរណានុយាយី,

កោ វា ករេយ្យ វិភសុវេសុ ច ជីវិតាសំ

ជាតោ នរោ សុបិន សំគម សន្និភេសុ;

២៦. និច្ចាតុរំ ជគទិទំ សភយំ សសោកំ

ទិស្វា ច កោធមទមោហជរាភិភូតំ,

ឧព្ពេគមត្តមបិ យស្ស ន វិជ្ជតី ចេ

សោ ទារុណោន មរណំ វត តំ ធិរត្ថុ!

ភោ ភោ ន បស្សថ ជរាសិធរញ្ហិ មច្ចុ

មាហញ្ញមានមខិលំ សតតំ តិលោកំ,

កិំ និទ្ទយា នយថ វីតភយា តិយាមំ

ធម្មំ សទា’សវនុទំ ចរថ’ប្បមត្តា;

២៨. |ឱ០.០០១០|

ភាវេថ ភោ មរណមារវិវជ្ជនាយ

លោកេ សទា មរណ សញ្ញមិមំ យតត្តា,

ឯវញ្ហិ ភាវនរតស្ស នរស្ស តស្ស

តណ្ហា បហីយតិ សរីរគតា អសេសា;

២៩. រូបំ ជរា បិយតរំ មលិនីករោតិ

សព្ពំ ពលំ ហរតិ អត្តនិ ឃោររោគោ,

នានូបភោគ បរិរក្ខិត មត្តភាវំ

ភោ មច្ចុ សំហរតិ កិំ ផលមត្តភាវេ?

៣០. កម្មានិលាបហតរោគតរំគភំគេ

សំសារ សាគរ មុខេ វិតតេ វិបន្នា,

មា មាបមាទមករិត្ថ ករោថ មោក្ខំ

ទុក្ខោទយោ ននុ បមាទមយំ នរានំ;

៣១. |ឱ០.០០១១|

ភោគា ច មិត្តសុតបោរិស ពន្ធវា ច

នារី ច ជីវិតសមា អបិ ខេត្តវត្ថុ,

សព្ពានិ តានិ បរលោកមិតោ វជន្តំ

នានុព្ពជន្តិ កុសលាកុសលំវ លោកេ;

៣២. ភោ វិជ្ជុចំចលតរេ ភវសាគរម្ហិ

ខិត្តា បុរា កតមហាបវនេន តេន,

កាមំ វិភិជ្ជតិ ខណេន សរីរនាវា

ហត្ថេ ករោថ បរមំ គុណហត្ថសារំ;

៣៣. និច្ចំ វិភិជ្ជតិហ អាមក ភាជនំវ

សំរក្ខិតោបិ ពហុធា ឥហ អត្តភាវោ,

ធម្មំ សមាចរថ សគ្គបតិប្បតិដ្ឋំ

ធម្មោ សុចិណ្ណមិហមេវ ផលំ ទទាតិ;

៣៤. |ឱ០.០០១២|

រន្ត្វា សទា បិយតរេ ទិវិ ទេវរជ្ជេ

នម្ហា ចវន្តិ វិពុធា អបិ ខីណបុញ្ញា,

សព្ពំ សុខំ ទិវិ ភុវីហ វិយោគនិដ្ឋំ

កោ បញ្ញវា ភវសុខេសុ រតិំ ករេយ្យ?

៣៥. ពុទ្ធោ សសាវកគណោ ជគទេកនាថោ