សមន្តកូដវណ្ណនា |ឱ០.០០០១|

នមោ តស្ស ភគវតោ អរហតោ សម្មាសម្ពុទ្ធស្ស

១. សតតវិតត កិត្តិំ ធស្តកន្ទប្បទប្បំ

តិភវហិតវិធានំ សព្ពលោកេកកេតុំ,

អមិតមតិមនគ្ឃំ សន្តិទំ មេរុសារំ

សុគតមហមុទារំ រូបសារំ នមាមិ;

២. ហតទុរិតតុសារំ មោហបង្កោបតាបំ

មនកមលវិកាសំ ជន្តុនំ សេសកានំ,

កុមតិកុមុទនាសំ ពុទ្ធបុព្ពាចលគ្គា

ឧទិតមហមុទារំ ធម្មភានុំ នមាមិ;

៣. សកលវិមលសីលំ ធុតបាបារិជាលំ

សុរនរមហនីយំ បាហុនេយ្យាហុនេយ្យំ,

ឧជុបថបដិបន្នំ បុញ្ញខេត្តំ ជនានំ

គណមហមភិវន្ទេ សារទំ សាទរេន;

៤. ឥតិ កឡិត បណាមា ហន្ត្វ សព្ពោបសគ្គេ

សុគតវិមល បាទម្ភោជសម្បាត បូតំ,

សុមនសិខរិរាជំ វណ្ណយិស្សំ សុរានំ

វសតិ មតុលមេតំ សាធុជន្តុ សុណន្តុ;

៥. សវណា លបនា ចេវ សតិយា ចាបិ វន្ទនា,

យស្ស សម្មា សុខី ហោតី និព្ពាណញ្ចាធិគច្ឆតិ;

៦. |ឱ០.០០០២|

តស្មា សប្បុរិសេហេ’ទំ បត្ថេន្តេហិ តិសម្បទំ,

សវណីយញ្ហិ សាធូហិ អចិក្ខិត្តេន ចេតសា;

៧. យោ លោកតិលកោ នាថោ បូរេត្វា ទស បារមី,

ជាតោសិ តុសិតេ កាយេ សន្តុសិតោ’តិ វិស្សុតោ;

៨. អារាធិតោ សុរាទីហិ កាលោ មារិស តេ អយំ,

តិណ្ណោ តារយិមំ លោកំ ពហូ អប្បរជក្ខកា;

៩. ឯតទត្ថាយ តេ វីរ បូរិតា ទស បារមី,

ពាហុំ បិតុស្ស បុត្តោ’វ លោកោ អាលម្ពតេ តុវំ;

១០. តេសំ តំ វចនំ សុត្វា មហាសត្តោ មហាមតី,

វិលោកនេ វិលោកេត្វា បញ្ចាមល វិលោចនោ;

១១. ជម្ពុទីបគ្គកមលេ កណ្ណិកា’វ មនោរមា,

បុរី កបិឡវត្ថូ’សិ វិសាណា’វ សុធាសិនំ;

១២. សិង្គីនិក្ខមយាភាស តុង្គសិង្គសមង្គិតា,

មណិសីហបញ្ជរាកិណ្ណ បាសាទា យត្ថ ភាសរេ;

១៣. សឃនេ គគនេ និច្ចំ សតេរតសតានិ’វ,

អនិលេរិតបជ្ជោត សោណ្ណកេតុ អហូ យហិំ;

១៤. ជនានំ នីលនេត្តេហិ វទនេហិ តុ យា បុរី,

មធុបាលិសមោនទ្ធ កញ្ជិនី សិរិមាវហេ;

១៥. រង្គតុង្គតុរង្គេហិ គជ្ជិតេហិ ច យា បុរី,

សឃោសុត្តុង្គកល្លោល លោលសាគរសន្តិភា;

១៦. អវ្ហមានា’វ ទេវានំ បុរលខ្យា ភុជា ឥវ,

មន្ទានិលេរិតា តុង្គ នានារាគទ្ធជា យហិំ;

១៧. នានាវេសធរា យស្មិំ នានាភូសណ ភូសិតា,

នានាសម្បត្តិសំយុត្តា នានាវិជ្ជាសុ បារគា;

១៨. |ឱ០.០០០៣|

នវយោព្ពន ឧទ្ទាមា រូបេន ច មនោហរា,

សច្ចេសុ និរតា និច្ចំ អនក្កុដ្ឋកុលា សិយុំ;

១៩. និច្ចំ កីឡា វិទទ្ធាហិ នរនារីហិ សេវិតា,

យា បុរី សាធុរូបា’សិ មធុរាលាបិនីហិ ច;

២០. តស្មិំ សទ្ធាទយោបេត ឱក្កាកកុលកេតុកោ,

សុទ្ធោទនវ្ហយោ អាសី វិស្សុតោ ភុវនត្តយេ;

២១. យស្សង្ឃិកមលេ សព្ព ភុភុជានំ មហីតលេ,

កិរីដមណិហិង្គាលិ កីឡន្តី’វ និរន្តរំ;

២២. យស្ស បត្ថដតេជេន បុរនេតាបិ ទិវាករោ,

វហនីច’ម្ពរេ លីលំ ឱសធីបតិនោ ទិវា;

២៣. យស្ស ទានប្បវាហោ តុ នានាយាចក ជន្តុនំ,

មនោទធីសុ វេលន្តេតិក្កមន្តោវ សត្តតំ;

២៤. មតិយា សុរមន្តីវ ធនេន ធនទោ វិយ,

រូបេន កុសុមេសុ’វ យោ ជុម្ហតិ មហីតលេ;

២៥. តស្សាភិសិត្តា រជ្ជេន មហាមាយាតិ វិស្សុតា,

ចន្ទិកា វិយ ចន្ទស្ស គិរិរាជា’វ កបាលិតោ;

២៦. លក្ខី’វ វាសុទេវស្ស សីតា’វ រាមរាជិនោ,

មហេសីសិ វរារោហា សុន្ទរី សុន្ទរាធរា;

២៧. តស្សា កុច្ឆិករណ្ឌម្ហិ អនគ្ឃរតនំ វិយ,

ខត្តិំសាហិ និមិត្តេហិ វិម្ហាបេន្តោ សទេវកំ;

២៨. សិតម្ពុជករោ សន្តោ សិតេភច្ឆាបកោ វិយ,

កត្វា បទក្ខិណំ មាតុ បដិសន្ធិមគណ្ហិ សោ;

២៩. ទសេកាទសមាសេន តស្សេវំ អាសិ ចេតនា,

បស្សិតុំ សកញាតីនំ គន្ត្វាន នគរំ តទា;

៣០. |ឱ០.០០០៤|

និវេទេត្វា តមត្ថំ សា រញ្ញោ តេន សុសជ្ជិតេ,

សបរិច្ឆទា តទា មគ្គេ គច្ឆន្តិ អន្តរាបថេ;

៣១. ទេវតានំ មនោនន្ទករ នន្ទន សន្និភំ,

ទិស្វាន លុម្ពិនិំ នាម ឧយ្យានំ មននន្ទនំ;

៣២. តស្មិំ កីឡិតុមុស្សាហា បវិសិត្វាន តំ វនំ,

កីឡន្តិ ឧបគន្ត្វាន មង្គលំ សាលបាទបំ;

៣៣. វិលោល បល្លវាកិណ្ណំ សុផុល្លកុសុមោនតំ,

គហេត្វា សាលសាខំ សា សុរត្តករ បល្លវា;

៣៤. ទេវេហិ គហិតា’រក្ខា មហមានេ សទេវកេ,

ជនេសិ តនយំ មាយា តត្រដ្ឋា លោកលោចនំ;

៣៥. ព្រហ្មានោ លោកបាលា ច មនុស្សា កមតោ តទា,

សោណ្ណជាលាជិនាទីហិ គណ្ហិំសុ ជននន្ទនំ;

៣៦. មហិំ បតិដ្ឋិតោ ធីរោ បស្សិត្វាន តតោ ទិសា,

ឧត្តរាភិមុខោ សត្តបទំ គណ្ត្វា’ម្ពុជេ ឋិតោ;

៣៧. ទិសន្តមវលោកេត្វា សុផុល្លម្ពុជលោចនោ,

និច្ឆារេសាសភិំ វាចំ អគ្គោ សេដ្ឋោ’តិអាទិនា;

៣៨. ព្រហ្មាមរនរាទីហិ បូជិតោ ច នមស្សិតោ,

កមេន អភិវឌ្ឍន្តោ ជុណ្ហបក្ខេ សសី យថា;

៣៩. ព្រហ្មូនំ ឆត្តឆាយាយ មន្ទារកុសុមន្តរេ,

សានន្ទាមន្ទទេវេហិ ធុតចាមរមជ្ឈគោ;

៤០. ទិព្ពេហិ រូបសទ្ទេហិ គន្ធេហិ ច រសេហិ ច,

ផោដ្ឋព្ពេហិ ច ទិព្ពេហិ មោទមានោ អនេកធា;

៤១. ទិព្ពេហិ រមណីយេហិ នច្ចេហិ វាទិតេហិ ច,

បទានេកសហស្សេហិ ថូយមានគុណាករោ;

៤២. |ឱ០.០០០៥|

បត្វា សោឡសមំ វស្សំ ញាតិសង្ឃស្ស មជ្ឈគោ,

ទស្សេត្វា’សេសសិប្បំ តំ លោកេ វិជ្ជតិ យំ តទា;

៤៣. ញាតិសង្ឃំ បមោទេន្តោ ទេវេ ច មនុជេ’បិ ច,

លទ្ធា យសោធរំ ទេវិំ’នុកូលំ ជាតិជាតិយំ;

៤៤. សោណ្ណទប្បណសង្កាស សោម្មានន វិភុសិតំ,

នីលនីរជសង្កាស វិសាលាយត លោចនំ;

៤៥. សិង្គារមន្ទិរទ្វារេ ធជោបមភមុទ្វយំ,

ហេមកាហលសង្កាស នាសិកំ រូបលក្ខិយា

៤៦. នីលវេល្លិតធម្មិល្ល ជិមុតោភយ កោដិយំ,

និច្ចវិជ្ជុល្លតាចក្ក មនុញ្ញកណ្ណបាសកំ;

៤៧. សាតកុម្ភនិភាភាស បយោធរឃដទ្វំ,

សុវណ្ណទ្ទិតដាយាត និជ្ឈរាការហារកំ

៤៨. ទេហទេវទ្ទុមាលម្ព បារោហាភភុជទ្វយំ,

អង្គុលីបល្លវន្តម្ពុ ពិន្ទុចារុ នខាវលិំ;

៤៩. ទេហមាលាលិមាលាភ រោមរាជិវិរាជិតំ,

រូបណ្ណវតរង្គាហ វលិត្តយ វិចិត្តកំ;

៥០. សោណ្ណរម្ភាសមាវដ្ដ បិណោរុទ្វយ សុន្ទរំ,

សន្និរកលិកាការ ចារុជង្ឃា វិភូសិតំ;

៥១. បច្ចក្ខរូបលក្ខិញ្ច លីលានិចយ សន្និភំ,

គុណានមាករំ សាធុ វេលំវ រតិសាគរេ;

៥២. កន្តោ វសន្តរាជា’វ កន្ទប្បោ’វ សុរូបវា,

សសី’វ ទស្សនីយោ ច សូរិយោ វិយ តេជវា;

៥៣. អចលត្តេន មេរូវ គម្ភីរេនណ្ណវោ វិយ,

ព្រហ្មស្សរោ បិយំវាទី បញ្គ្ញាយ ច អនូបមោ;

៥៤. |ឱ០.០០០៦|

វសន្តោ សោ មហាវីរោ បុរស្មិំ កបិលវ្ហយេ,

ទិស្វា និមិត្តេ ចតុរោ ឧយ្យាន គមនញ្ជសេ;

៥៥. បព្ពជ្ជាភិរតោ នាថោ គន្ត្វា ឧយ្យានភូមិយំ,

សុផុល្លចម្បកាសោក នាគាទា’គេហិ មណ្ឌិតំ;

៥៦. ផុល្លបង្កជ កឡ្ហារ ជលាជលយ សតាកុលំ,

មន្ទមន្ទានិលាយាត នានាមោទេហិ វាសិតំ;

៥៧. សរា សរំ សមាយាត មធុព្ពត និសេវិតំ,

ផលបុប្ផរសុទ្ទាម ទ្វិជ សង្ឃ និកូជិតំ;

៥៨. នច្ចន្ត មត្តមោរានំ និច្ចំ មណ្ឌបសន្តិភំ,

ទិព្ពន្ត មិគសគ្ឃានំ កីឡាមណ្ឌប សន្និភំ;

៥៩. សមីរ សិសិរោទារ ធារាសីករ វារិហិ,

ធារាមណ្ឌប បន្តីហិ ជនានន្ទករំ វរំ;

៦០. ឧយ្យានវនមាគម្ម ទេវរាជាវ នន្ទនំ,

កីឡន្តោ និជបុត្តស្ស សុត្វាន ជាតសាសនំ;

៦១. និវត្តោ វិស្សកម្មេន សហស្សក្ខោវ ភូសិតោ,

បុរំ បវិសមានោវ កិសា គោតមិ ភាសិតំ;

៦២. សុត្វាន និព្ពុតបទំ តទា ចិត្តានុកូលកំ,

សន្តុដ្ឋោ សានុរាគោ ច លក្ខគ្ឃំ តារភាសុរំ;

៦៣. ហារំ តិស្សាយ បេសេត្វា គន្ត្វាន សកមន្ទិរំ,

ទេវរាជវិលាសេន និសីទិ បវរាសនេ;

៦៤. អថាគម្ម តទា នេកនាដិកា បរិវារយុំ,

វជ្ជន្តិ ភេរិយោ តាសុ បគ្គយ្ហ កាចិ នារិយោ;

៦៥. នានាលយសមាកិណ្ណំ គីតំ គាយន្តិ កាចិ’បិ,

ធមន្តិ សុសិរំ កាចិ កាចិ វាទេន្តិ តន្តិយោ;

៦៦. |ឱ០.០០០៧|

ចារុ ពិម្ពាធរារម្ម បយោធរភរា សុភា,

វិសាលាយត នីលក្ខា សោមសោម្មាននា តទា;

៦៧. នច្ចន្តិ បុរតោ តស្ស ភេរិមណ្ឌល មជ្ឈគា,

ទេវកញ្ញាវ រង្គម្ហី រសភាវនិរន្តរំ;