មហាវគ្គសំយុត្តបាឡិ

អវិជ្ជាវគ្គ

ឧបឌ្ឍសុត្ត

បុច្ឆា – មហាវគ្គសំយុត្តេ បនាវុសោ បោរាណកេហិ ធម្មសំគាហកមហាថេរេហិ ទុតិយំ សំគីតំ ឧបឌ្ឍសុត្តំ ភគវតា កត្ថ កំ អារព្ភ កិស្មិំ វត្ថុស្មិំ កថញ្ច ភាសិតំ.

វិស្សជ្ជនា – សក្កេសុ ភន្តេ សក្ករេ នាម សក្យានំ និគមេ អាយស្មន្តំ អានន្ទត្ថេរំ អារព្ភ ភាសិតំ. អាយស្មា ភន្តេ អានន្ទត្ថេរោ ភគវន្តំ ឯតទវោច ‘‘ឧបឌ្ឍមិទំ ភន្តេ ព្រហ្មចរិយំ យទិទំ កល្យាណមិត្តតា កល្យាណសហាយតា កល្យាណសម្បវង្កតា’’តិ. តស្មិំ ភន្តេ វត្ថុស្មិំ ‘‘មា ហេវំ អានន្ទ, មា ហេវំ អានន្ទ, សកលមេវិទំ អានន្ទ ព្រហ្មចរិយំ យទិទំ កល្យាណមិត្តតា កល្យាណសហាយតា កល្យាណសម្បវង្កតា’’តិ ឯវមាទិនា ភគវតា ភាសិតំ.

មមំ ហិ អានន្ទ កល្យាណមិត្តំ អាគម្ម ជាតិធម្មា សត្តា ជាតិយា បរិមុច្ចន្តិ.

ពោជ្ឈង្គសំយុត្ត

កុណ្ឌលិយសុត្ត

បុច្ឆា – ពោជ្ឈង្គសំយុត្តេ បនាវុសោ បោរាណកេហិ ធម្មសំគាហកមហាថេរេហិ ឆដ្ឋំ សំគីតំ កុណ្ឌលិយសុត្តំ ភគវតា កត្ថ កំ អារព្ភ កិស្មិំ វត្ថុស្មិំ កថញ្ច ភាសិតំ.

វិស្សជ្ជនា – សាកេតេ ភន្តេ អញ្ជនវនេ មិគទាយេ កុណ្ឌលិយំ បរិព្ពាជកំ អារព្ភ ភាសិតំ. កុណ្ឌលិយោ ភន្តេ បរិព្ពាជកោ ភគវន្តំ ឧបសង្កមិត្វា ‘‘អហមស្មិ ភោ គោតម អារាមនិស្សយី បរិសាវចរោ, តស្ស មយ្ហំ ភោ គោតម បច្ឆាភត្តំ ភុត្តបាតរាសស្ស អយមាចារោ ហោតិ អារាមេន អារាមំ ឧយ្យានេន ឧយ្យានំ អនុចង្កមាមិ អនុវិចរាមិ, សោ តត្ថ បស្សាមិ ឯកេ សមណព្រាហ្មណេ ឥតិវាទប្បមោក្ខានិសំសញ្ចេវ កថំ កថន្តេ ឧបារម្ភានិសំសញ្ច, ភវំ បន គោតមោ កិមានិសំសោ វិហរតី’’តិ ឯតំ វចនំ អវោច. តស្មិំ ភន្តេ វត្ថុស្មិំ ‘‘វិជ្ជាវិមុត្តិផលានិសំសោ ខោ កុណ្ឌលិយ តថាគតោ វិហរតី’’តិ ឯវមាទិនា ភគវតា ភាសិតំ.

បឋម គិលានសុត្ត

បុច្ឆា – តេនាវុសោ ភគវ្វតា ជានតា…បេ… សម្មាសម្ពុទ្ធេន ពោជ្ឈង្គសំយុត្តេ ទុតិយេ គិលានវគ្គេ បឋមគិលានសុត្តំ កត្ថ កំ អារព្ភ កិស្មិំ វត្ថុស្មិំ កថញ្ច ភាសិតំ.

វិស្សជ្ជនា – រាជគហេ ភន្តេ បិប្បលិគុហាយំ អាយស្មន្តំ មហាកស្សបត្ថេរំ អារព្ភ ភាសិតំ. អាយស្មា ភន្តេ មហាកស្សបត្ថេរោ បិប្បលិគុហាយំ វិហរតិ អាពាធិកោ ទុក្ខិតោ ពាឡ្ហគិលានោ. អថ ខោ ភន្តេ ភគវា សាយន្ហសមយំ បដិសល្លានា វុដ្ឋិតោ យេនាយស្មា មហាកស្សបោ តេនុបសង្កមិ, ឧបសង្កមិត្វា បញ្ញត្តេ អាសនេ និសីទិ, និសជ្ជ ខោ ភគវា អាយស្មន្តំ មហាកស្សបំ ឯតទវោច– ‘‘កច្ចិ តេ កស្សប ខមនីយំ, កច្ចិ យាបនីយំ, កច្ចិ ទុក្ខា វេទនា បដិក្កមន្តិ នោ អភិក្កមន្តិ, បដិក្កមោសានំ បញ្ញាយតិ នោ អភិក្កមោតិ. ន មេ ភន្តេ ខមនីយំ ន យាបនីយំ, ពាឡ្ហា មេ ទុក្ខា វេទនា អភិក្កមន្តិ នោ បដិក្កមន្តិ, អភិក្កមោសានំ បញ្ញាយតិ នោ បដិក្កមោ’’តិ. តស្មិំ ភន្តេ វត្ថុស្មិំ ‘‘សត្តិមេ កស្សប ពោជ្ឈង្គា មយា សម្មទក្ខាតា ភាវិតា ពហុលីកតា អភិញ្ញាយ សម្ពោធាយ និព្ពានាយ សំវត្តន្តី’’តិ ឯវមាទិនា ភគវតា ភាសិតំ.

ឧទាយិសុត្ត

បុច្ឆា – តត្ថេវ អាវុសោ តតិយេ ឧទាយិវគ្គេ បោរាណកេហិ ធម្មសំគាហកមហាថេរេហិ ទសមំ សំគីតំ ឧទាយិសុត្តំ ភគវតា កត្ថ កំ អារព្ភ កិស្មិំ វត្ថុស្មិំ កថញ្ច ភាសិតំ.

វិស្សជ្ជនា – សុម្ភេសុ ភន្តេ សេតកេនាម សុម្ភានំ និគមេ អាយស្មន្តំ ឧទាយិត្ថេរំ អារព្ភ ភាសិតំ. អាយស្មា ភន្តេ ឧទាយិត្ថេរោ ភគវន្តំ ឧបសង្កមិត្វា ‘‘អច្ឆរិយំ ភន្តេ, អព្ភុតំ ភន្តេ, យាវ ពហុកតញ្ច មេ ភន្តេ ភគវតិ បេមញ្ច គារវោ ច ហិរី ច ឱត្តប្បញ្ចាតិ ឯវមាទិកំ វចនំ អវោច. តស្មិំ ភន្តេ វត្ថុស្មិំ ‘‘សាធុ សាធុ ឧទាយិ ឯសោ ហិ តេ ឧទាយិ មគ្គោ បដិលទ្ធោ. យោ តេ ភាវិតោ ពហុលីកតោ, តថា តថា វិហរន្តំ តថត្តាយ ឧបនេស្សតិ, យថា ត្វំ ‘ខីណា ជាតិ, វុសិតំ ព្រហ្មចរិយំ, កតំ ករណីយំ, នាបរំ ឥត្ថត្តាយា’តិ បជានិស្សតី’’តិ. ឯវំ ខោ ភគវតា ភាសិតំ.

សតិបដ្ឋានសំយុត្ត

សតិសុត្ត

បុច្ឆា – សតិបដ្ឋានសំយុត្តេ អាវុសោ បោរាណកេហិ ធម្មសំគាហក មហាថេរេហិ ទុតិយំ សំគីតំ សតិសុត្តំ ភគវតា កត្ថ កំ ការព្ភ កថញ្ច ភាសិតំ.

វិស្សជ្ជនា – វេសាលិយំ ភន្តេ អម្ពបាលិវនេ សម្ពហុលេ ភិក្ខូ អារព្ភ ‘‘សតោ ភិក្ខវេ ភិក្ខុ វិហរេយ្យ សម្បជានោ អយំ វោ អម្ហាកំ អនុសាសនី’’តិ ឯវមាទិនា ភគវតា ភាសិតំ.

សាលសុត្ត

បុច្ឆា – តត្ថេវ អាវុសោ បោរាណកេហិ ធម្មសំគាហកមហាថេរេហិ ចតុត្ថំ សំគីតំ សាលសុត្តំ ភគវតា កត្ថ កំ អារព្ភ កថញ្ច ភាសិតំ.

វិស្សជ្ជនា – កោសលេសុ ភន្តេ សាលាយនាម កេសលានំ ព្រាហ្មណគាមេ សម្ពហុលេ ភិក្ខូ អារព្ភ ‘‘យេ តេ ភិក្ខវេ ភិក្ខូ នវា អចិរបព្ពជិតា អធុនាគតា ឥមំ ធម្មវិនយំ, តេ វោ ភិក្ខវេ ភិក្ខូ ចតុន្នំ សតិបដ្ឋានានំ ភាវនាយ សមាទបេតព្ពា និវេសេតព្ពា បតិដ្ឋាបេតព្ពា’’តិ ឯវមាទិនា ភន្តេ ភគវតា ភាសិតំ.

សកុណគ្ឃិសុត្ត

បុច្ឆា – តត្ថេវ អាវុសោ បោរាណកេហិ ធម្មសំគាហកមហាថេរេហិ ឆដ្ឋំ សំគីតំ សកុណគ្ឃិសុត្តំ ភគវតា កត្ថ កំ អារព្ភ កថញ្ច ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ ‘‘ភូតបុព្ពំ ភិក្ខវេ សកុណគ្ឃិ លាបំ សកុណំ សហសា អជ្ឈប្បត្តា អគ្គហេសិ. អថ ខោ ភិក្ខវេ លាបោ សកុណោ សកុណគ្ឃិយា ហរិយមានោ ឯវំ បរិទេវសិ មយមេវម្ហ អលក្ខិកា, មយំ អប្បបុញ្ញា, យេ មយំ អគោចរេ ចរិម្ហ បរវិសយេ, សចេជ្ជ មយំ គោចរេ ចរេយ្យាម សកេ បេត្តិកេ វិសយេ, ន ម្យាហំ សកុណគ្ឃិ អលំ អភវិស្ស យទិទំ យុទ្ធាយា’’តិ ឯវមាទិនា ភគវតា ភាសិតំ.

មយមេវម្ហ អលក្ខិកា, មយំ អប្បបុញ្ញា.

កោ បន តេ លាប គោចរោ សកោ បេត្តិកោ វិសយោ.

យទិទំ នង្គលកដ្ឋករណំ លេឌ្ឌុដ្ឋានំ.

ឯហិ ខោ ទានិ មេ សកុណគ្ឃិ, ឯហិ ខោ ទានិ មេ សកុណគ្ឃិ,

(ទារុគុឡោវិយ វិនិវត្តិត្វា តស្សេវ លេឌ្ឌុស្ស អន្តរេ បច្ចុបាទិ. អដ្ឋកថា)

ឯវញ្ហិ តំ ភិក្ខវេ ហោតិ យោ អគោចរេ ចរតិ បរវិសយេ.

តស្មាតិហ ភិក្ខវេ មា អគោចរេ ចរិត្ថ បរវិសយេ.

គោចរេ ភិក្ខវេ ចរថ សកេ បេត្តិកេ វិសយេ.

គោចរេ ភិក្ខវេ ចរតំ សកេ បេត្តិកេ វិសយេ ន លច្ឆតិ មារោ ឱតារំ, ន លច្ឆតិ មារោ អារម្មណំ.

ភិក្ខុនុបស្សយសុត្ត

បុច្ឆា – តត្ថេវ អាវុសោ បោរាណកេហិ ធម្មសំគាហកមហាថេរេហិ ទសមំ សំគីតំ ភិក្ខុនុបស្សយសុត្តំ ភគវតា កត្ថ កំ អារព្ភ កិស្មិំ វត្ថុស្មិំ កថញ្ច ភាសិតំ.

វិស្សជ្ជនា – សាវត្ថិយំ ភន្តេ អាយស្មន្តំ អានន្ទត្ថេរំ អារព្ភ ភាសិតំ. អាយស្មា ភន្តេ អានន្ទោ យាវត្តកោ អហោសិ ភិក្ខុនីហិ សទ្ធិំ កថាសល្លាបោ តំ សព្ពំ ភគវតោ អារោចេសិ. តស្មិំ ភន្តេ វត្ថុស្មិំ ‘‘ឯវមេតំ អានន្ទ, ឯវមេតំ អានន្ទ, យោហិ កោចិ អានន្ទ ភិក្ខុ វា ភិក្ខុនី វា ចតូសុ សតិបដ្ឋានេសុ សុប្បតិដ្ឋិតចិត្តោ វិហរតិ, តស្សេតំ បាដិកង្ខំ ឧឡារំ បុព្ពេនាបរំ វិសេសំ សញ្ជានិស្សតី’’តិ ឯវមាទិនា ភគវតា ភាសិតំ.

ចុន្ទសុត្ត

បុច្ឆា – តត្ថេវ អាវុសោ ទុតិយេ នាលន្ទវគ្គេ បោរាណកេហិ ធម្មសំគាហកមហាថេរេហិ តតិយំ សំគីតំ ចុន្ទសុត្តំ ភគវតា កត្ថ កំ អារព្ភ កិស្មិំ វត្ថុស្មិំ កថញ្ច ភាសិតំ.

វិស្សជ្ជនា – សាវត្ថិយំ ភន្តេ អាយស្មន្តំយេវ អានន្ទត្ថេរំ អារព្ភ ភាសិតំ. អាយស្មា ភន្តេ អានន្ទត្ថេរោ ចុន្ទេន សមណុទ្ទេសេន សទ្ធិំ យេន ភគវា តេនុបសង្កមិ. ឧបសង្កមិត្វា ភគវន្តំ អភិវាទេត្វា ឯកមន្តំ និសីទិ. ឯកមន្តំ និសិន្នោ ខោ ភន្តេ អាយស្មា អានន្ទោ ភគវន្តំ ឯតទវោច ‘‘អយំ ភន្តេ ចុន្ទោ សមណុទ្ទេសោ ឯវមាហ ‘អាយស្មា ភន្តេ សារិបុត្តោ បរិនិព្ពុតោ, ឥទមស្ស បត្តចីវរ’ន្តិ. អបិ ច មេ ភន្តេ មធុរកជាតោ វិយ កាយោ, ទិសាបិ មេ ន បក្ខាយន្តិ, ធម្មាបិ មំ នប្បដិភន្តិ ‘អាយស្មា សារិបុត្តោ បរិនិព្ពុតោ’តិ សុត្វា’’តិ. តស្មិំ ភន្តេ វត្ថុស្មិំ ‘‘កិំ នុ ខោ តេ អានន្ទ សារិបុត្តោ សីលក្ខន្ធំ វា អាទាយ បរិនិព្ពុតោ, សមាធិក្ខន្ធំ វា, បញ្ញាក្ខន្ធំវា, វិមុត្តិក្ខន្ធំវា, វិមុត្តិញាណទស្សនក្ខន្ធំ វា អាទាយ បរិនិព្ពុតោ’’តិ ឯវមាទិនា ភគវតា ភាសិតំ.

អយំ ភន្តេ ចុន្ទោសមណុទ្ទេសោ ឯវមាហ.

តស្មាតិហានន្ទ អត្តទីបា វិហរថ អត្តសរណា អនញ្ញសរណា ធម្មទីបា ធម្មសរណា អនញ្ញសរណា.

ពាហិយសុត្ត

បុច្ឆា – តត្ថេវ អាវុសោ បោរាណកេហិ ធម្មសំគាហកមហាថេរេហិ បញ្ចមំ សំគីតំ ពាហិយសុត្តំ ភគវតា កត្ថ កំ អារព្ភ កិស្មិំ វត្ថុស្មិំ កថញ្ច ភាសិតំ.

វិស្សជ្ជនា – សាវត្ថិយំ ភន្តេ អាយស្មន្តំ ពាហិយំ អារព្ភ ភាសិតំ. អាយស្មា ភន្តេ ពាហិយោ ភគវន្តំ ឯតទវោច ‘‘សាធុ មេ ភន្តេ ភគវា សំខិត្តេន ធម្មំ ទេសេតុ, យមហំ ភគវតោ ធម្មំ សុត្វា ឯកោ វូបកដ្ឋោ អប្បមត្តោ អាតាបី បហិតត្តោ វិហរេយ្យ’’ន្តិ. តស្មិំ ភន្តេ វត្ថុស្មិំ ‘‘តស្មាតិហ ត្វំ ពាហិយ អាទិមេវ វិសោធេហិ កុសលេសុ ធម្មេសុ. កោ ចាទិកុសលានំ ធម្មានំ, សីលញ្ច សុវិសុទ្ធំ ទិដ្ឋិច ឧជុកា’’តិ ឯវមាទិនា ភគវតា ភាសិតំ.

សីលដ្ឋិតិវគ្គ

ចិរដ្ឋិតិសុត្ត

បុច្ឆា – តត្ថេវ អាវុសោ តតិយេ សីលដ្ឋិតិវគ្គេ បោរាណកេហិ ធម្មសំគាហកមហាថេរេហិ ទុតិយំ សំគីតំ ចិរដ្ឋិតិសុត្តំ កត្ថ កំ អារព្ភ កិស្មិំ វត្ថុស្មិំ កេន កថញ្ច ភាសិតំ.

វិស្សជ្ជនា – បាដលិបុត្តេ ភន្តេ អាយស្មន្តំ ភទ្ទំ អារព្ភ អាយស្មតា អានន្ទត្ថេរេន ធម្មភណ្ឌាគារិកេន ភាសិតំ. អាយស្មា ភន្តេ ភទ្ទោ សាយន្ហសមយំ បដិសល្លានា វុដ្ឋិតោ យេនាយស្មា អានន្ទោ តេនុបសង្កមិ, ឧបសង្កមិត្វា អាយស្មន្តំ អានន្ទំ ឯតទវោច ‘‘កោ នុ ខោ អាវុសោ អានន្ទ ហេតុ កោ បច្ចយោ, យេន តថាគតេ បរិនិព្ពុតេ សទ្ធម្មោ ន ចិរដ្ឋិតិកោ ហោតិ, កោ បនាវុសោ អានន្ទ ហេតុ កោ បច្ចយោ, យេន តថាគតេ បរិនិព្ពុតេ សទ្ធម្មោ ចិរដ្ឋិតិកោ ហោតី’’តិ. តស្មិំ ភន្តេ វត្ថុស្មិំ ‘‘សាធុ សាធុ អាវុសោ ភទ្ទ, ភទ្ទកោ ខោ តេ អាវុសោ ភទ្ទ ឧម្មង្គោ’’តិ ឯវមាទិនា អាយស្មតា អានន្ទត្ថេរេន ធម្មភណ្ឌាគារិកេន ភាសិតំ.

ភទ្ទកោ តេ អាវុសោ ភទ្ទ ឧម្មង្គោ.

‘‘ចតុន្នំ ខោ អាវុសោ សតិបដ្ឋានានំ អភាវិតត្តា អពហុលីកតត្តា តថាគតេ បរិនិព្ពុតេ សទ្ធម្មោ ន ចិរដ្ឋិតិកោ ហោតី’’ –

សិរិវឌ្ឍសុត្ត

បុច្ឆា – តស្សាវុសោ ភគវតា អរហតោ សម្មាសម្ពុទ្ធស្ស បាវចនសមុទយភូតាយ មហាវគ្គបាឡិយា សតិបដ្ឋានសំយុត្តេ សីលដ្ឋិតិវគ្គេ នវមំ សិរិវឌ្ឍសុត្តំ កត្ថ កំ អារព្ភ កិស្មិំ វត្ថុស្មិំ កេន កថញ្ច ភាសិតំ.

វិស្សជ្ជនា – រាជគហេ ភន្តេ សិរិវឌ្ឍំ គហបតិំ អារព្ភ អាយស្មតា អានន្ទត្ថេរេន ធម្មភណ្ឌាគារិកេន ភាសិតំ. សិរិវឌ្ឍោ ភន្តេ គហបតិ អាពាធិកោ ហោតិ ទុក្ខិតោ ពាឡ្ហគិលានោ. អថខោ ភន្តេ អាយស្មា អានន្ទោ យេនសិរិវឌ្ឍស្ស គហបតិស្ស និវេសនំ តេនុបសង្កមិ, ឧបសង្កមិត្វា បញ្ញត្តេ អាសនេ និសីទិ. និសជ្ជ ខោ អាយស្មា អានន្ទោ សិរិវឌ្ឍំ គហបតិំ ឯតទវោច ‘‘កច្ចិ តេ គហបតិ ខមនីយំ, កច្ចិ យាបនីយំ, កច្ចិ ទុក្ខា វេទនា បដិក្កមន្តិ នោ អភិក្កមន្តិ, បដិក្កមោសានំ បញ្ញាយតិ នោ អភិក្កមោ’’តិ. ន មេ ភន្តេ ខមនីយំ, ន យាបនីយំ, ពាឡ្ហា មេ ទុក្ខា វេទនា អភិក្កមន្តិ នោ បដិក្កមន្តិ, អភិក្កមោសានំ បញ្ញាយតិ នោ បដិក្កមោ’’តិ. តស្មិំ ភន្តេ វត្ថុស្មិំ ‘‘តស្មាតិហ តេ គហបតិ ឯវំ សិក្ខិតព្ពំ ‘កាយេ កាយានុបស្សី វិហរិស្សាមិ អាតាបី សម្បជានោ សតិមា វិនេយ្យ លោកេ អភិជ្ឈា ទោមនស្សំ. វេទនាសុ. ចិត្តេ. ធម្មេសុ ធម្មានុបស្សី វិហរិស្សាមិ អាតាបី សម្បជានោ សតិមា វិនេយ្យ លោកេ អភិជ្ឈា ទោមនស្ស’ន្តិ. ឯវញ្ហិ តេ គហបតិ សិក្ខិតព្ព’’ន្តិ. ឯវំ ខោ អាយស្មតា អានន្ទត្ថេរេន ធម្មភណ្ឌាគារិកេន ភាសិតំ.

ឥទ្ធិបាទសំយុត្ត

មោគ្គល្លានសុត្ត

បុច្ឆា – ឥទ្ធិបាទសំយុត្តេ អាវុសោ ចតុត្ថំ មោគ្គល្លានសុត្តំ ភគវតា កត្ថ កំ អារព្ភ កិស្មិំ វត្ថុស្មិំ កថញ្ច ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ ភាសិតំ. សម្ពហុលា ភន្តេ ភិក្ខូ ហេដ្ឋាមិគារមាតុបាសាទេ វិហរន្តិ ឧទ្ធតា ឧន្នឡា ចបលា មុខរា វិកិណ្ណវាចា មុដ្ឋស្សតិនោ អសម្បជានា អសមាហិតា ភន្តចិត្តា បាកតិន្ទ្រិយា. តស្មិំ ភន្តេ វត្ថុស្មិំ អាយស្មន្តំ មហាមោគ្គល្លានំ តេ ភិក្ខូ សំវេជេត្វា ‘‘កិំ នុ តុម្ហេ ភិក្ខវេ សំវិគ្គា លោមហដ្ឋជាតា ឯកមន្តំ ឋិតា’’តិ ឯវមាទិនា ភគវតា ភាសិតំ.

អច្ឆរិយំ វត ភោ, អព្ភុតំ វត ភោ.

និវាតញ្ច វត.

អយញ្ច មិគារមាតុបាសាទោ គម្ភីរនេមោ.

តុម្ហេវ ខោ ភិក្ខវេ សំវេជេតុកាមេន មោគ្គល្លានេន ភិក្ខុនា បាទង្គុដ្ឋកេន មិគារមាតុបាសាទោ សង្កម្បិតោ សម្បកម្បិតោ សម្បធាលិតោ.

តំ កិំ មញ្ញថ ភិក្ខវេ, កតមេសំ ធម្មានំ ភាវិតត្តា ពហុលីកតត្តា មោគ្គល្លានោ ភិក្ខុ ឯវំ មហិទ្ធិកោ ឯវំ មហានុភាវោ.

អនុរុទ្ធសំយុត្ត

ពាឡ្ហគិលានសុត្ត

បុច្ឆា – អនុរុទ្ធសំយុត្តេ អាវុសោ បោរាណកេហិ ធម្មសំគាហកមហាថេរេហិ ទសមំ សំគីតំ ពាឡ្ហគិនានសុត្តំ កត្ថ កំ អារព្ភ កិស្មិំ វត្ថុស្មិំ កេន កថញ្ច ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ អាយស្មតា អនុរុទ្ធត្ថេរេន ភាសិតំ. សម្ពហុលា ភន្តេ ភិក្ខូ អាយស្មន្តំ អនុរុទ្ធំ អាពាធិកំ ទុក្ខិតំ ពាឡ្ហគិលានំ ឯតទវោចុំ ‘‘កតមេនាយស្មតោ អនុរុទ្ធស្ស វិហារេន វិហរតោ ឧប្បន្នា សារីរិកា ទុក្ខា វេទនា ចិត្តំ ន បរិយាទាយ តិដ្ឋន្តី’’តិ. តស្មិំ ភន្តេ វត្ថុស្មិំ ‘‘ចតូសុ ខោ មេ អាវុសោ សតិបដ្ឋានេសុ សុប្បតិដ្ឋិតចិត្តស្ស វិហរតោ ឧប្បន្នា សារីរិកា ទុក្ខា វេទនា ចិត្តំ ន បរិយាទាយ តិដ្ឋន្តី’’តិ ឯវមាទិនា អាយស្មតា អនុរុទ្ធត្ថេរេន ភាសិតំ.

អានាបានសំយុត្ត

មហាកប្បិនសុត្ត

បុច្ឆា – អានាបានសំយុត្តេ អាវុសោ បោរាណកេហិ ធម្មសំគាហកមហាថេរេហិ សត្តមំ សំគីតំ មហាកប្បិនសុត្តំ ភគវតា កត្ថ កំ អារព្ភ កថញ្ច ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ ‘‘បស្សថ នោ តុម្ហេ ភិក្ខវេ ឯតស្ស ភិក្ខុនោ កាយស្ស ឥញ្ជិតត្តំ វា ផន្ទិតព្ពំ វា’’តិ ឯវមាទិនា ភគវតា ភាសិតំ.

ឥច្ឆានង្គលសុត្ត

បុច្ឆា – តត្ថេវ អាវុសោ ទុតិយវគ្គេ បឋមំ ឥច្ឆានង្គលសុត្តំ ភគវតា កត្ថ កំ អារព្ភ កថញ្ច ភាសិតំ.

វិស្សជ្ជនា – ឥច្ឆានង្គលេ ភន្តេ សម្ពហុលេ ភិក្ខូ អារព្ភ ‘‘សចេ ខោ ភិក្ខវេ អញ្ញតិត្ថិយា បរិព្ពាជកា ឯវំ បុច្ឆេយ្យុំ ‘កតមេ នាវុសោ វិហារេន សមណោ គោតមោ វស្សាវាសំ ពហុលំ វិហាសី’តិ. ឯវំ បុដ្ឋា តុម្ហេ ភិក្ខវេ តេសំ អញ្ញតិត្ថិយានំ បរិព្ពាជកានំ ឯវំ ព្យាករេយ្យាថ អានាបានស្សតិសមាធិនា ខោ អាវុសោ ភគវា វស្សាវាសំ ពហុលំ វិហាសី’’តិ ឯវមាទិនា ភន្តេ ភគវតា ភាសិតំ.

សោតាបត្តិសំយុត្ត

ចក្កវត្តិរាជសុត្ត

បុច្ឆា – សោតាបត្តិសំយុត្តេ អាវុសោ បោរាណកេហិ ធម្មសំគាហកមហាថេរេហិ បឋមំ សំគីតំ ចក្កវត្តិរាជសុត្តំ ភគវតា កត្ថ កំ អារព្ភ កថញ្ច ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ ‘‘កិញ្ចាបិ ភិក្ខវេ រាជា ចក្កវត្តី ចតុន្នំ ទីបានំ ឥស្សរិយាធិបច្ចំ រជ្ជំ ការេត្វា កាយស្ស ភេទា បរំ មរណា សុគតិំ សគ្គំ លោកំ ឧបបជ្ជតិ ទេវានំ តាវតិំសានំ សហព្យតំ, សោ តត្ថ នន្ទនេ វនេ អច្ឆរាសង្ឃបរិវុតោ ទិព្ពេហិ ច បញ្ចហិ កាមគុណេហិ សមប្បិតោ សមង្គីភូតោ បរិចារេតិ សោ ចតូហិ ធម្មេហិ អសមន្នាគតោ, អថ ខោ សោ អបរិមុត្តោវ និរយា, អបរិមុត្តោ តិរច្ឆានយោនិយា, អបរិមុត្តោ បេត្តិវិសយា, អបរិមុត្តោ អបាយទុគ្គតិវិនិបាតា’’តិ ឯវមាទិនា ភន្តេ ភគវតា ភាសិតំ.

ទីឃាវុ ឧបាសកសុត្ត

បុច្ឆា – តត្ថេវ អាវុសោ បោរាណកេហិ ធម្មសំគាហកមហាថេរេហិ តតិយំ សំគីតំ ទីឃាវុឧបាសកសុត្តំ ភគវតា កត្ថ កំ អារព្ភ កិស្មិំ វត្ថុស្មិំ កថញ្ច ភាសិតំ.

វិស្សជ្ជនា – រាជគហេ ភន្តេ ទីឃាវុំ ឧបាសកំ អារព្ភ ភាសិតំ. ភគវា ភន្តេ ទីឃាវុំ ឧបាសកំ អាពាធិកំ ទុក្ខិតំ ពាឡ្ហគិលានំ ឯតទវោច ‘‘កច្ចិ តេ ទីឃាវុ ខមនីយំ, កច្ចិ យាបនីយំ, កច្ចិ ទុក្ខា វេទនា បដិក្កមន្តិ នោ អភិក្កមន្តិ, បដិក្កមោសានំ បញ្ញាយតិ នោ អភិក្កមោ’’តិ. ន មេ ភន្តេ ខមនីយំ, ន យាបនីយំ ពាឡ្ហា មេ ទុក្ខា វេទនា អភិក្កមន្តិ នោ បដិក្កមន្តិ, អភិក្កមោសានំ បញ្ញាយតិ នោ បដិក្កមោតិ. តស្មិំ ភន្តេ វត្ថុស្មិំ ‘‘តស្មាតិហ តេ ទីឃាវុ ឯវំ សិក្ខិតព្ពំ ពុទ្ធេ អវេច្ចប្បសាទេន សមន្នាគតោ ភវិស្សាមី’’តិ ឯវមាទិនា ភគវតា ភាសិតំ.

យានិមានិ ភន្តេ ភគវតា ចត្តារិ សោតាបត្តិយង្គានិ ទេសិតានិ, សំវិជ្ជន្តេ តេ ធម្មា មយិ–

តស្មាតិហ ត្វំ ទីឃាវុ ឥមេសុ ចតូសុ សោតាបត្តិយង្គេសុ បតិដ្ឋាយ ឆ វិជ្ជាភាគិយេ ធម្មេ ឧត្តរិ ភាវេយ្យាសិ–

មា ត្វំ តាត ទីឃាវុ ឯវំ មនសាកាសិ.

ឥង្ឃ ត្វំ តាត ទីឃាវុ យទេវ តេ ភគវា អាហ, តទេវ ត្វំ សាធុកំ មនសិករោហិ.

បណ្ឌិតោ ភិក្ខវេ ទីឃាវុ ឧបាសកោ.

បច្ចបាទិ ធម្មស្សានុធម្មំ.

ន ច មំ ធម្មាធិករណំ វិហេឋេសិ.

ទីឃាវុ ភិក្ខវេ ឧបាសកោ បញ្ចន្នំ ឱរម្ភាគិយានំ សំយោជនានំ បរិក្ខយា ឱបបាតិកោ តត្ថ បរិនិព្ពាយី អនាវត្តិធម្មោ តស្មា លោកា.

វេឡុទ្វារេយ្យសុត្ត

បុច្ឆា – តេនាវុសោ ភគវតា…បេ… សម្មាសម្ពុទ្ធេន សោតាបត្តិសំយុត្តេ សត្តមំ សំគីតំ វេឡុទ្វារេយ្យសុត្តំ កត្ថ កំ អារព្ភ កិស្មិំ វត្ថុស្មិំ កថញ្ច ភាសិតំ.

វិស្សជ្ជនា – កោសលេសុ ភន្តេ វេឡុទ្វារេ នាម កោសលានំ ព្រាហ្មណ គាមេ វេឡុទ្វារេយ្យកេ ព្រាហ្មណគហបតិកេ អារព្ភ ភាសិតំ.

វេឡុទ្វារេយ្យកា ភន្តេ ព្រាហ្មណគហបតិកា ភគវន្តំ ឯតទវោចុំ ‘‘មយំ ភោ គោតម ឯវំកាមា ឯវំឆន្ទា ឯវំអធិប្បាយា បុត្តសម្ពាធសយនំ អជ្ឈាវសេយ្យាម…បេ… ជាតរូបរជតំ សាទិយេយ្យាម, កាយស្ស ភេទា បរំ មរណា សុគតិំ សគ្គំ លោកំ ឧបបជ្ជេយ្យាម, តេសំ នោ ភវំ គោតមោ អម្ហាកំ ឯវំកាមានំ ឯវំឆន្ទានំ ឯវំអធិប្បាយានំ តថា ទម្មំ ទេសេតុ, យថា មយំ បុត្តសម្ពាធសយនំ អជ្ឈាវសេយ្យាម…បេ… កាយស្ស ភេទា បរំ មរណា សុគតិំ សគ្គំ លោកំ ឧបបជ្ជេយ្យាមា’’តិ. តស្មិំ ភន្តេ វត្ថុស្មិំ ‘‘អត្តូបនាយិកំ វោ គហបតយោ ធម្មបរិយាយំ ទេសេស្សាមិ, តំ សុណាថ សាធុកំ មនសិ ករោថ, ភាសិស្សាមី’’តិ ឯវមាទិនា ភគវតា ភាសិតំ.

សរណានិវគ្គ

បឋម មហានាមសុត្ត

បុច្ឆា – តត្ថេវ អាវុសោ តតិយេ សរណានិវគ្គេ បោរាណកេហិ ធម្មសំគាហកមហាថេរេហិ បឋមំ សំគីតំ បឋមមហានាមសុត្តំ ភគវតា កត្ថ កំ អារព្ភ កិស្មិំ វត្ថុស្មិំ កថញ្ច ភាសិតំ.

វិស្សជ្ជនា – សក្កេសុ ភន្តេ កបិលវត្ថុស្មិំ និគ្រោធារាមេ មហានាមំ សក្កំ អារព្ភ ភាសិតំ. មហានាមោ ភន្តេ សក្កោ ភគវន្តំ ឯតទវោច ‘‘ឥទំ ភន្តេ កបិលវត្ថុ ឥទ្ធញ្ចេវ ផីតញ្ច ពាហុជញ្ញំ អាកិណ្ណមនុស្សំ សម្ពាធព្យូហំ, សោ ខ្វាហំ ភន្តេ ភគវន្តំ វា បយិរុបាសិត្វា មនោភាវនីយេ វា ភិក្ខូ សាយន្ហសមយំ កបិលវត្ថុំ បវិសន្តោ ភន្តេនបិ ហត្ថិនា សមាគច្ឆាមិ, ភន្តេនបិ អស្សេន សមាគច្ឆាមិ, ភន្តេនបិ រថេន សមាគច្ឆាមិ, ភន្តេនបិ សកដេន សមាគច្ឆាមិ, ភន្តេនបិ បុរិសេន សមាគច្ឆាមិ, តស្ស មយ្ហំ ភន្តេ តស្មិំ សមយេ មុស្សតេវ ភគវន្តំ អារព្ភ សតិ, មុស្សតិ ធម្មំ អារព្ភ សតិ, មុស្សតិ សង្ឃំ អារព្ភ សតិ, តស្ស មយ្ហំ ភន្តេ ឯវំ ហោតិ ឥមម្ហិ ចាហំ សមយេ កាលំ ករេយ្យំ, កា មយ្ហំ គតិ, កោ អភិសម្បរាយោ’’តិ. តស្មិំ ភន្តេ វត្ថុស្មិំ ‘‘មា ភាយិ មហានាម, មា ភាយិ មហានាម, អបាបកំ តេ មរណំ ភវិស្សតិ អបាបិកា កាលំ កិរិយា’’តិ ឯវមាទិនា ភគវតា ភាសិតំ.

ទុតិយ សរណានិសក្កសុត្ត

បុច្ឆា – តត្ថេវ អាវុសោ ធម្មសំគាហកមហាថេរេហិ បញ្ចមំ សំគីតំ ទុតិយសរណានិសក្កសុត្តំ ភគវតា កត្ថ កំ អារព្ភ កិស្មិំ វត្ថុស្មិំ កថញ្ច ភាសិតំ.

វិស្សជ្ជនា – សក្កេសុ ភន្តេ កបិលវត្ថុស្មិំ និគ្រោធារាមេ មហានាមំយេវ សក្កំ អារព្ភ ភាសិតំ.

មហានាមោ ភន្តេ សក្កោ ភគវន្តំ ឯតទវោច ‘‘ឥធ ភន្តេ សរណានិ សក្កោ កាលង្កតោ, សោ ភគវតា ព្យាកតោ ‘សោតាបន្នោ អវិនិបាតធម្មោ និយតោ សម្ពោធិបរាយណោ’តិ. តត្រ សុទំ ភន្តេ សម្ពហុលា សក្កា សង្គម្ម សមាគម្ម ឧជ្ឈាយន្តិ ខីយន្តិ វិបាចេន្តិ ‘អច្ឆរិយំ វត ភោ, អព្ភុតំ វត

ភោ, ឯត្ថ ទានិ កោ ន សោតាបន្នោ ភវិស្សតិ, យត្រ ហិ នាម សរណានិ សក្កោ កាលង្កតោ, សោ ភគវតា ព្យាកតោ ‘សោតាបន្នោ អវិនិបាតធម្មោ និយតោ សម្ពោធិបរាយណោ’តិ, សរណានិ សក្កោ សិក្ខាយ អបរិបូរការី អហោសី’’តិ តស្មិំ ភន្តេ វត្ថុស្មិំ ‘‘យោ សោ មហានាម ទីឃរត្តំ ឧបាសកោ ពុទ្ធំ សរណំ គតោ, ធម្មំ សរណំ គតោ, សង្ឃំ សរណំ គតោ, សោ កថំ វិនិបាតំ គច្ឆេយ្យា’’តិ ឯវមាទិនា ភគវតា ភាសិតំ.

បឋម អនាថបិណ្ឌិកសុត្ត

បុច្ឆា – តត្ថេវ អាវុសោ បោរាណកេហិ ធម្មសំគាហកមហាថេរេហិ ឆដ្ឋំ សំគីតំ បឋមអនាថបិណ្ឌិកសុត្តំ កត្ថ កំ អារព្ភ កិស្មិំ វត្ថុស្មិំ កេន កថញ្ច ភាសិតំ.

វិស្សជ្ជនា – សាវត្ថិយំ ភន្តេ អនាថបិណ្ឌិកំ គហបតិំ អារព្ភ អាយស្មតា សារិបុត្តត្ថេរេន ធម្មសេនាបតិនា ភាសិតំ.

អាយស្មា ភន្តេ សារិបុត្តត្ថេរោ អាយស្មតា អានន្ទត្ថេរេន បច្ឆាសមណេន សទ្ធិំ យេន អនាថបិណ្ឌិកស្ស គហបតិស្ស និវេសនំ តេនុបសង្កមិ, ឧបសង្កមិត្វា បញ្ញត្តេ អាសនេ និសីទិ, និសជ្ជ ខោ អាយស្មា សារិបុត្តោ អនាថបិណ្ឌិកំ គហបតិំ អាពាធិកំ ទុក្ខិតំ ពាឡ្ហគិលានំ ឯតទវោច ‘‘កច្ចិ តេ គហបតិ ខមនីយំ កច្ចិ យាបនីយំ, កច្ចិ ទុក្ខា វេទនា បដិក្កមន្តិ, នោ អភិក្កមន្តិ, បដិក្កមោសានំ បញ្ញាយតិ, នោ អភិក្កមោ’’តិ, ន មេ ភន្តេ ខមនីយំ, ន យាបនីយំ, ពាឡ្ហា មេ ទុក្ខា វេទនា អភិក្កមន្តិ, នោ បដិក្កមន្តិ, អភិក្កមោសានំ បញ្ញាយតិ, នោ បដិក្កមោតិ. តស្មិំ ភន្តេ វត្ថុស្មិំ ‘‘យថា រូបេន ខោ គហបតិ ពុទ្ធេ អប្បសាទេន សមន្នាគតោ អស្សុតវា បុថុជ្ជនោ កាយស្ស ភេទា បរំ មរណា អបាយំ ទុគ្គតិំ វិនិបាតំ និយរំ ឧបបជ្ជតិ តថារូបោ តេ ពុទ្ធេ អប្បសាទោ នត្ថិ, អត្ថិ ច ខោ តេ គហបតិ ពុទ្ធេ អវេច្ចប្បសាទោ ‘ឥតិបិ សោ ភគវា អរហំ សម្មាសម្ពុទ្ធោ…បេ… ភគវា’តិ តញ្ច បន តេ ពុទ្ធេ អវេច្ចប្បសាទំ អត្តនិ សមនុបស្សតោ ឋានសោ វេទនា បដិប្បស្សម្ភេយ្យា’’តិ ឯវមាទិនា អាយស្មតា សារិបុត្តត្ថេរេន ធម្មសេនាបតិនា ភាសិតំ.

យស្ស សទ្ធា តថាគតេ, អចលា សុប្បតិដ្ឋិតា;

សីលញ្ច យស្ស កល្យាណំ, អរិយកន្តំ បសំសិតំ.

សង្ឃេ បសាទោ យស្សត្ថិ, ឧជុភូតញ្ច ទស្សនំ;

អទលិទ្ទោតិ តំ អាហុ, អមោឃំ តស្ស ជីវិតំ.

តស្មា សទ្ធញ្ច សីលញ្ច, បសាទំ ធម្មទស្សនំ;

អនុយុញ្ជេថ មេធាវី, សរំ ពុទ្ធានសាសនំ.

បុញ្ញាភិសន្ទវគ្គ

មហានាមសុត្ត

បុច្ឆា – តត្ថេវ អាវុសោ បុញ្ញាភិសន្ទវគ្គោ បោរាណកេហិ ធម្មសំគាហកមហាថេរេហិ សត្តមំ សំគីតំ មហានាមសុត្តំ ភគវតា កត្ថ កំ អារព្ភ កិស្មិំ វត្ថុស្មិំ កថញ្ច ភាសិតំ.

វិស្សជ្ជនា – សក្កេសុ ភន្តេ កបិលវត្ថុស្មិំ មហានាមំ សក្កំ អារព្ភ ភាសិតំ.

មហានាមោ ភន្តេ សក្កោ ភគវន្តំ ឯតទវោច ‘‘កិត្តាវតា នុ ខោ ភន្តេ ឧបាសកោ ហោតី’’តិ. តស្មិំ ភន្តេ វត្ថុស្មិំ ‘‘យតោ ខោ មហានាម ពុទ្ធំ សរណំ គតោ ហោតិ, ធម្មំ សរណំ គតោ ហោតិ, សង្ឃំ សរណំ គតោ ហោតី’’តិ ឯវមាទិនា ភគវតា ភាសិតំ.

កិត្តាវតា នុ ខោ ភន្តេ ឧបាសកោ ហោតិ.

កាឡិគោធសុត្ត

បុច្ឆា – តត្ថេវ អាវុសោ បោរាណកេហិ ធម្មសំគាហកមហាថេរេហិ នវមំ សំគីតំ កាឡិគោធសុត្តំ ភគវតា កត្ថ កំ ការព្ភ កថញ្ច ភាសិតំ.

វិស្សជ្ជនា – សក្កេសុ ភន្តេ កាឡិគោធំ នាម សាកិយានិំ អារព្ភ ‘‘ចតូហិ ខោ គោធេ ធម្មេហិ សមន្នាគតា អរិយសាវិកា សោតាបន្នា ហោតិ អវិនិបាតធម្មា និយតា សម្ពោធិបរាយណា’’តិ ឯវមាទិនា ភគវតា ភាសិតំ.

លាភា តេ គោធេ, សុលទ្ធំ តេ គោធេ, សោតាបត្តិផលំ តយា គោធេ –

នន្ទិយសក្កសុត្ត

បុច្ឆា – តេនាវុសោ ជានតា…បេ… សម្មាសម្ពុទ្ធេន សោតាបត្តិសំយុត្តេ បុញ្ញាភិសន្ទវគ្គេ ទសមំ នន្ទិយសក្កសុត្តំ កត្ថ កំ អារព្ភ កិស្មិំ វត្ថុស្មិំ កថញ្ច ភាសិតំ.

វិស្សជ្ជនា – សក្កេសុ ភន្តេ កបិលវត្ថុស្មិំ និគ្រោធារាមេ នន្ទិយំ សក្កំ អារព្ភ ភាសិតំ. នន្ទិយោ ភន្តេ សក្កោ ភគវន្តំ ឯតទវោច ‘‘យស្សេវ នុ ខោ ភន្តេ អរិយសាវកស្ស ចត្តារិ សោតាបត្តិយង្គានិ សព្ពេន សព្ពំ សព្ពថាសព្ពំ នត្ថិ, ស្វេវ នុ ខោ ភន្តេ អរិយសាវកោ បមាទវិហារី’’តិ. តស្មិំ ភន្តេ វត្ថុស្មិំ ‘‘យស្ស ខោ នន្ទិយ ចត្តារិ សោតាបត្តិយង្គានិ សព្ពេនសព្ពំ សព្ពថាសព្ពំ នត្ថិ, តមហំ ពាហិរោ បុថុជ្ជនបក្ខេ ឋិតោតិ វទាមី’’តិ ឯវមាទិនា ភគវតា ភាសិតំ.

សច្ចសំយុត្ត

តិរច្ឆានកថាសុត្ត

បុច្ឆា – សច្ចសំយុត្តេ អាវុសោ បោរាណកេហិ ធម្មសំគាយកមហាថេរេហិ ទសមំ សំគីតំ តិរច្ឆានកថាសុត្តំ ភគវតា កត្ថ កំ អារព្ភ កថញ្ច ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ មា ភិក្ខវេ អនេកវិហិតំ តិរច្ឆានកថំ កថេយ្យាថ. សេយ្យថិទំ, រាជកថំ ចោរកថំ មហាមត្តកថំ សេនាកថំ ភយកថំ យុទ្ធកថំ អន្នកថំ បានកថំ វត្ថកថំ សយនកថំ ឯវមាទិនា ភន្តេ ភគវតា ភាសិតំ.

ឥទំ ទុក្ខន្តិ កថេយ្យាថ.

តស្មាតិហ ភិក្ខវេ ឥទំ ទុក្ខន្តិ យោគោ ករណីយោ…បេ… អយំ ទុក្ខនិរោធគាមិនី បដិបទាតិ យោគោ ករណីយោ.

ធម្មចក្កបវត្តនសុត្ត

បុច្ឆា – តត្ថេវ អាវុសោ ធម្មចក្កប្បវត្តនវគ្គេ បោរាណកេហិ ធម្មសំគាហកមហាថេរេហិ បឋមំ សំគីតំ ធម្មចក្កបវត្តនសុត្តំ ភគវតា កត្ថ កំ អារព្ភ កថញ្ច ភាសិតំ.

វិស្សជ្ជនា – ពារាណសិយំ ភន្តេ ឥសិបតនេ មិគទាយេ បញ្ចវគ្គិយេ ភិក្ខូ អារព្ភ ‘‘ទ្វេ មេ ភិក្ខវេ អន្តា បព្ពជិតេន នសេវិតព្ពា. កតមេ ទ្វេ, យោ ចាយំ កាមេសុ កាមសុខល្លិកានុយោគោ ហីនោ គម្មោ បោថុជ្ជនិកោ អនរិយោ អនត្ថសំហិតោ, យោ ចាយំ អត្តកិលមថានុយោគោ ទុក្ខោ អនរិយោ អនត្ថសំហិតោ, ឯតេ ខោ ភិក្ខវេ ឧភោ អន្តេ អនុបគម្ម មជ្ឈិមាបដិបទា តថាគតេន អភិសម្ពុទ្ធា’’តិ ឯវមាទិនា ភគវតា ភាសិតំ.

អាសវក្ខយសុត្ត

បុច្ឆា – តត្ថេវ អាវុសោ កោដិគាមវគ្គេ បោរាណកេហិ ធម្មសំគាហកមហាថេរេហិ បញ្ចមំ សំគីតំ អាសវក្ខយសុត្តំ ភគវតា កត្ថ កំ អារព្ភ កថញ្ច ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ ‘‘ជានតោហំ ភិក្ខវេ បស្សតោ អាសវានំ ខយំ វទាមិ, នោ អជានតោ អបស្សតោ. កិញ្ច ភិក្ខវេ ជានតោ បស្សតោ អាសវានំ ខយោ ហោតិ, ឥទំ ទុក្ខន្តិ ភិក្ខវេ ជានតោ បស្សតោ អាសវានំ ខយោ ហោតិ, អយំ ទុក្ខសមុទយោតិ, អយំ ទុក្ខនិរោធោតិ, អយំ ទុក្ខនិរោធគាមិនីបដិបទាតិ ជានតោ បស្សតោ អាសវានំ ខយោ ហោតិ. ឯវំ ខោ ភិក្ខវេ ជានតោ ឯវំ បស្សតោ អាសវានំ ខយោ ហោតិ. តស្មាតិហ ភិក្ខវេ ‘‘ឥទំ ទុក្ខ’’ន្តិ យោគោ ករណីយោ, អយំ ទុក្ខសមុទយោតិ, អយំ ទុក្ខនិរោធោតិ, អយំ ទុក្ខនិរោធគាមិនីបដិបទាតិ យោគោ ករណីយោ’’តិ ឯវំ ខោ ភគវតា ភាសិតំ.

សីសបាវនសុត្ត

បុច្ឆា – តត្ថេវ អាវុសោ សីសបាវនវគ្គេ បោរាណកេហិ ធម្មសំគាហកមហាថេរេហិ បឋមំ សំគីតំ សីសបាវនសុត្តំ ភគវតា កត្ថ កំ អារព្ភ កថញ្ច ភាសិតំ.

វិស្សជ្ជនា – កោសម្ពិយំ ភន្តេ សីសបាវនេ សម្ពហុលេ ភិក្ខូ អារព្ភ ‘‘តំ កិំ មញ្ញថ ភិក្ខវេ, កតមំ នុខោ ពហុតរំ យានិ វា មយា បរិត្តានិ សីសបាបណ្ណានិ បាណិនា គហិតានិ យទិទំ ឧបរិ សីសបាវនេ’’តិ ឯវមាទិនា ភគវតា ភាសិតំ.

បញ្ចគតិបេយ្យាលវគ្គ

បុច្ឆា – តត្ថេវ អាវុសោ បោរាណកេហិ ធម្មសំគាហកមហាថេរេហិ បរិយោសានភាវេន សំគីតោ បញ្ចគតិបេយ្យាលវគ្គេ, ភគវតា កត្ថ កំ អារព្ភ កថញ្ច ភាសិតោ.

វិស្សជ្ជនា – វេសាលិយំ ភន្តេ សម្ពហុលេ ភិក្ខូ អារព្ភ ‘‘តំ កិំ មញ្ញថ ភិក្ខវេ, កតមំ នុ ខោ ពហុតរំ, យោ វាយំ មយា បរិត្តោ នខសិខាយំ បំសុ អារោបិតោ, អយំ វា មហាបថវី’’តិ ឯវមាទិនា ភគវតា ភាសិតោ.

បុច្ឆា – កេ អាវុសោ សិក្ខន្តិ.

វិស្សជ្ជនា – សេក្ខា ច ភន្តេ បុថុជ្ជនកល្យាណកា ច សិក្ខន្តិ.

បុច្ឆា – កេ អាវុសោ សិក្ខិតសិក្ខា.

វិស្សជ្ជនា – អរហន្តោ ភន្តេ សិក្ខិតសិក្ខា.

បុច្ឆា – កត្ថ អាវុសោ ឋិតំ.

វិស្សជ្ជនា – សិក្ខាកាមេសុ ភន្តេ ឋិតំ.