អាសីវិសវគ្គ

បឋមទារុក្ខន្ធោបមសុត្ត

បុច្ឆា – អាសីវិសវគ្គេ អាវុសោ បោរាណកេហិ ធម្មសំគាហកមហាថេរេហិ ចតុត្ថំ សំគីតំ បឋមទារុក្ខន្ធោបមសុត្តំ ភគវតា កត្ថ កំ អារព្ភ កថញ្ច ភាសិតំ.

វិស្សជ្ជនា – កោសម្ពិយំ ភន្តេ គង្គាយ នទិយា តីរេ សម្ពហុលេ ភិក្ខូ អារព្ភ ‘‘បស្សថ នោ តុម្ហេ ភិក្ខវេ អម្ហំ មហន្តំ ទារុក្ខន្ធំ គង្គាយ នទិយា សោតេន វុយ្ហមាន’’ន្តិ ឯវមាទិនា ភគវតា ភាសិតា.

ឧបចារវចនំ

បុច្ឆា – កថញ្ចាវុសោ តត្ថ ភគវតា ឱរិមតីរាទីនំ ឧបចារវចនានំ អត្ថោ វិត្ថារេន វិភជិត្វា បកាសិតោ.

វិស្សជ្ជនា – ឱរិមំ តីរន្តិ ខោ ភិក្ខុ ឆន្នេតំ អជ្ឈត្តិកានំ អាយតនានំ អធិវចនំ. បារិមំ តីរន្តិ ខោ ភិក្ខុ ឆន្នេតំ ពាហិរានំ អាយតនានំ អធិវចនំ. មជ្ឈេ សំសីទោតិ ខោ ភិក្ខុ នន្ទិរាគស្សេតំ អធិវចនំ. ថលេ ឧស្សាទោតិ ខោ ភិក្ខុ អស្មិមានស្សេតំ អធិវចនន្តិ ឯវមាទិនា ភន្តេ ភគវតា តត្ថ ឱរិមតីរាទីនំ ឧបចារវចនានំ អត្ថោ វិត្ថារេន វិភជិត្វា បកាសិតោ.

បុច្ឆា – ឥមស្មិំ ខោ បន អាវុសោ សុត្តេ ភគវតា ភាសិតេ វិសេសតោ កស្ស កីទិសោ អត្ថោ កថញ្ច បដិលទ្ធោ.

វិស្សជ្ជនា – ឥមស្មិំ ភន្តេ សុត្តេ ភគវតា ភាសិតេ វិសេសតោ នន្ទស្ស គោបាលកស្ស បព្ពជ្ជា ច ឧបសម្បទា ច យាវ អរហត្តាច វិសេសតោ អត្ថោ អធិគតោ.

លភេយ្យាហំ ភន្តេ ភគវតោ សន្តិកេ បព្ពជ្ជំ, លភេយ្យំ ឧបសម្បទំ.

តេន ហិ ត្វំ នន្ទ សាមិកានំ គាវោ និយ្យាតេហិ.

គមិស្សន្តិ ភន្តេ គាវោ វច្ឆគិទ្ធិនិយោ.

កិំសុកោបមសុត្ត

បុច្ឆា – តត្ថេវ អាវុសោ បោរាណកេហិ ធម្មសំគាហកមហាថេរេហិ អដ្ឋមំ សំគីតំ កិំសុកោបមសុត្តំ ភគវតា កត្ថ កំ អារព្ភ កិស្មិំ វត្ថុស្មិំ កថញ្ច ភាសិតំ.

វិស្សជ្ជនា – សក្កេសុ ភន្តេ កបិលវត្ថុស្មិំ និគ្រោធារាមេ អញ្ញតរំ ការកំ ភិក្ខុំ អារព្ភ ភាសិតំ. អញ្ញតរោ ភន្តេ ការកោ ភិក្ខុ ចត្តារោ ខាណាសវេ ភិក្ខូ ញាណទស្សនវិសុទ្ធំ បុច្ឆិត្វា អសន្តុដ្ឋោ តេសំ ភិក្ខូនំ បញ្ហាវេយ្យាករណេន យេន ភគវា តេនុបសង្កមិ. ឧបសង្កមិត្វា ភគវន្តំ ឯតទវោច ‘‘កិត្តាវតា នុ ខោ ភន្តេ ភិក្ខុនោ ទស្សនំ សុវិសុទ្ធំ ហោតី’’តិ. តស្មិំ វត្ថុស្មិំ ‘‘សេយ្យថាបិ ភិក្ខុ បុរិសស្ស កិំសុកោ អទិដ្ឋបុព្ពោ អស្ស, សោ យេនញ្ញតរោ បុរិសោ កិំសុកស្ស ទស្សាវី តេនុបសង្កមេយ្យា’’តិ ឯវមាទិនា ភន្តេ ភគវតា ភាសិតំ.

ឆប្បាណកោបមសុត្ត

បុច្ឆា – តត្ថេវ អាវុសោ បោរាណកេហិ ធម្មសំគាហកមហាថេរេហិ ទសមំ សំគីតំ ឆប្បាណកោបមសុត្តំ ភគវតា កត្ថ កំ អារព្ភ កថញ្ច ភាសិតំ.

វិស្សជ្ជនា – សក្កេសុយេវ ភន្តេ សម្ពហុលេ ភិក្ខូ អារព្ភ ‘‘សេយ្យថាបិ, ភិក្ខវេ បុរិសោ អរុគត្តោ បក្កគត្តោ សរវនំ បវិសេយ្យា’តិ ឯវមាទិនា ភគវតា ភាសិតំ.

បុច្ឆា – កថញ្ចាវុសោ តត្ថ ភគវតា អសំវរោ វិត្ថារេន វិភជិត្វា ទេសិតោ.

វិស្សជ្ជនា – កថញ្ច ភិក្ខវេ អសំវរោ ហោតិ, ឥធ ភិក្ខវេ ភិក្ខុ ចក្ខុនា រូបំ ទិស្វា បិយរូបេ រូបេ អធិមុច្ចតិ, អប្បិយរូបេ រូបេ ព្យាបជ្ជតិ, អនុបដ្ឋិតកាយស្សតិ ច វិហរតិ បរិត្តចេតសោ. តញ្ច ចេតោវិមុត្តិំ បញ្ញាវិមុត្តិំ យថាភូតំ នប្បជានាតិ, យត្ថស្ស តេ ឧប្បន្នា បាបកា អកុសលា ធម្មា អបរិសេសា និរុជ្ឈន្តីតិ ឯវមាទិនា ភន្តេ ភគវតា តត្ថ អសំវរោ វិត្ថារេន វិភជិត្វា ទេសិតោ.

បុច្ឆា – កថញ្ចាវុសោ តត្ថ ភគវតា សំវរោ វិភជិត្វា វិត្ថារេន ទេសិតោ.

វិស្សជ្ជនា – កថញ្ច ភិក្ខវេ សំវរោ ហោតិ, ឥធ ភិក្ខវេ ភិក្ខុ ចក្ខុនា រូបំ ទិស្វា បិយរូបេ រូបេ នាធិមុច្ចតិ, អប្បិយរូបេ រូបេ ន ព្យាបជ្ជតីតិ, ឯវមាទិនា ភន្តេ ភគវតា តត្ថ សំវរោ វិភជិត្វា វិត្ថារេន ទេសិតោ.