ខន្ធវគ្គសំយុត្តបាឡិ

សំគាយនស្ស បុច្ឆា វិស្សជ្ជនា

នកុលបិតុសុត្ត

បុច្ឆា – តេនាវុសោ ភគវតា ជានតា…បេ… សម្មាសម្ពុទ្ធេន ខន្ធវគ្គសំយុត្តេ បឋមំ នកុលបិតុសុត្តំ កត្ថ កំ អារព្ភ កិស្មិំ វត្ថុស្មិំ កថញ្ច ភាសិតំ.

វិស្សជ្ជនា – ភគ្គេសុ ភន្តេ សុសុមារគិរេ ភេសកឡាវនេ មិគទាយេ នកុលបិតរំ គហបតិំ អារព្ភ ភាសិតំ. នកុលបិតា ភន្តេ គហបតិ ភគវន្តំ ‘‘អហមស្មិ ភន្តេ ជិណ្ណោ វុឌ្ឍោ មហល្លកោ អទ្ធគតោ វយោអនុប្បត្តោ អាតុរកាយោ អភិក្ខណាតង្កោ, អនិច្ចទស្សាវី ខោ បនាហំ ភន្តេ ភគវតោ មនោភាវនីយានញ្ច ភិក្ខូនំ, ឱវទតុ មំ ភន្តេ ភគវា, អនុសាសតុ មំ ភន្តេ ភគវា, យំ មមស្ស ទីឃរត្តំ ហិតាយ សុខាយា’’តិ. តស្មិំ ភន្តេ វត្ថុស្មិំ ‘‘ឯវមេតំ គហបតិ, ឯវមេតំ គហបតិ, អាតុរោ ហាយំ គហបតិ កាយោ អណ្ឌភូតោ បរិយោនទ្ធោ, យោ ហិ គហបតិ ឥមំ កាយំ បរិហរន្តោ មុហុត្តម្បិ អារោគ្យំ បដិជានេយ្យ, កិមញ្ញត្រ ពាល្យា. តស្មាតិហ តេ គហបតិ ឯវំ សិក្ខិតព្ពំ ‘អាតុរកាយស្ស មេ សតោ ចិត្តំ អនាតុរំ ភវិស្សតី’តិ. ឯវញ្ហិ តេ គហបតិ សិក្ខិតព្ព’’ន្តិ. ឯវំ ខោ ភន្តេ ភគវតា ភាសិតំ.

តស្មាតិហ តេ គហបតិ ឯវំ សិក្ខិតព្ពំ.

បុច្ឆា – តញ្ចាវុសោ ភគវតា សំខិត្តេន ភាសិតំ វិត្ថារេន កេន កថញ្ច វិភត្តំ.

វិស្សជ្ជនា – តំ ខោ ភន្តេ ភគវតា សំខិត្តេន ទេសិតំ ‘‘កថញ្ច គហបតិ អាតុរកាយោ ចេវ ហោតិ អាតុរចិត្តោ ច. ឥធ គហបតិ អស្សុតវា បុថុជ្ជនោ អរិយានំ អទស្សាវី អរិយធម្មស្ស អកោវិទោ អរិយធម្មេ អវិនីតោ, សប្បុរិសានំ អទស្សាវី សប្បុរិសធម្មស្ស អកោវិទោ សប្បុរិសធម្មេ អវិនីតោ រូបំ អត្តតោ សមនុបស្សតិ រូបវន្តំ វា អត្តានំ, អត្តនិ វា រូបំ, រូបស្មិំ វា អត្តានំ, ‘‘អហំ រូបំ មម រូប’’ន្តិ បរិយុដ្ឋដ្ឋាយី ហោតិ. តស្ស ‘‘អហំ រូបំ មម រូប’’ន្តិ បរិយុដ្ឋដ្ឋាយិនោ តំ រូបំ វិបរិណមតិ អញ្ញថា ហោតិ. តស្ស រូបវិបរិណាមញ្ញថាភាវា ឧប្បជ្ជន្តិ សោកបរិទេវទុក្ខទោមនស្សុបាយាសា’’តិ ឯវមាទិនា ភន្តេ អាយស្មតា សារិបុត្តេន ធម្មសេនាបតិនា វិត្ថារេន វិភត្តំ.

អនិច្ចសុត្ត

បុច្ឆា – តត្ថេវ អាវុសោ ទុតិយវគ្គេ បោរាណកេហិ ធម្មសំគាហក មហាថេរេហិ បឋមំ សំគីតំ អនិច្ចសុត្តំ ភគវតា កត្ថ កំ អារព្ភ កថញ្ច ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ ‘‘រូបំ ភិក្ខវេអនិច្ចំ, វេទនា អនិច្ចា, សញ្ញា អនិច្ចា, សង្ខារា អនិច្ចា, វិញ្ញាណំ អនិច្ចំ. ឯវំ បស្សំ ភិក្ខវេ សុតវា អរិយសាវកោ រូបស្មិម្បិ និព្ពិន្ទតិ, វេទនាយបិ និព្ពិន្ទតិ, សញ្ញាយបិ និព្ពិន្ទតិ, សង្ខារេសុបិ និព្ពិន្ទតិ, វិញ្ញាណស្មិម្បិ និព្ពិន្ទតិ, និព្ពិន្ទំ វិរជ្ជតិ, វិរាគា វិមុច្ចតិ, វិមុត្តស្មិំ ‘វិមុត្ត’មិតិ ញាណំ ហោតី’’តិ. ឯវំ ខោ ភន្តេ ភគវតា ភាសិតំ.

ទុក្ខអនត្តសុត្ត

បុច្ឆា – ទុក្ខអនត្តសុត្តានិ បនាវុសោ ភគវតា កត្ថ កំ អារព្ភ កថញ្ច ភាសិតានិ.

វិស្សជ្ជនា – សាវត្ថិយំយេវ ភន្តេ សម្ពហុលេ ភិក្ខូ អារព្ភ ‘‘រូបំ ភិក្ខវេ ទុក្ខំ, វេទនា ទុក្ខា, សញ្ញា ទុក្ខា, សង្ខារា ទុក្ខា, វិញ្ញាណំ ទុក្ខំ. រូបំ ភិក្ខវេ អនត្តា, វេទនា អនត្តា, សញ្ញា អនត្តា, សង្ខារា អនត្តា, វិញ្ញាណំ អនត្តា. ឯវំ បស្សំ ភិក្ខវេ សុតវា អរិយសាវកោ រូបស្មិម្បិ និព្ពិន្ទតិ, វេទនាយបិ និព្ពិន្ទតិ, សញ្ញាយបិ និព្ពិន្ទតិ, សង្ខារេសុបិ និព្ពិន្ទតិ, វិញ្ញាណស្មិម្បិ និព្ពិន្ទតិ, និព្ពិន្ទំ វិរជ្ជតិ, វិរាគា វិមុច្ចតិ, វិមុត្តស្មិំ ‘វិមុត្ត’មិតិ ញាណំ ហោតិ, ខីណា ជាតិ, វុសិតំ ព្រហ្មចរិយំ, កតំ ករណីយំ, នាបរំ ឥត្ថត្តាយាតិ បជានាតី’’តិ ឯវំ ខោ ភន្តេ ភគវតា ភាសិតានិ.

ភារសុត្ត

បុច្ឆា – ភារសុត្តំ បនាវុសោ ភគវតា កត្ថ កំ អារព្ភ កថញ្ច ភាសិតំ.

វិស្សជ្ជនា – សាវត្ថិយំយេវ ភន្តេ សម្ពហុលេ ភិក្ខូ អារព្ភ ‘‘ភារញ្ច វោ ភិក្ខវេ ទេសេស្សាមិ ភារហារញ្ច ភារាទានញ្ច ភារនិក្ខេបនញ្ច, តំ សុណាថ. កតមោ ច ភិក្ខវេភារោ, ‘បញ្ចុបាទានក្ខន្ធា’ តិស្ស វចនីយំ. កតមេ បញ្ច, រូបុបាទានក្ខន្ធោ វេទនុបាទានក្ខន្ធោ សញ្ញុបាទានក្ខន្ធោ សង្ខារុបាទានក្ខន្ធោ វិញ្ញាណុបាទានក្ខន្ធោ. អយំ វុច្ចតិ ភិក្ខវេ ភារោ’’តិ ឯវមាទិនា ភគវតា ភាសិតំ.

ភារា ហវេ បញ្ចក្ខន្ធា, ភារហារោ ច បុគ្គលោ;

ភារាទានំ ទុខំ លោកេ, ភារនិក្ខេបនំ សុខំ;

និក្ខិបិត្វា គរុំ ភារំ, អញ្ញំ ភារំ អនាទិយ;

សមូលំ តណ្ហមព្ពុយ្ហ, និច្ឆាតោ បរិនិព្ពុតោ.

នតុម្ហាកសុត្ត

បុច្ឆា – ន តុម្ហាកសុត្តំ បនាវុសោ ភគវតា កត្ថ កំ អារព្ភ កថញ្ច ភាសិតំ.

វិស្សជ្ជនា – សាវត្ថិយំយេវ ភន្តេ សម្ពហុលេ ភិក្ខុ អារព្ភ ‘‘យំ ភិក្ខវេ នតុម្ហាកំ តំ បជហថ, តំ វោ បហីនំ ហិតាយ សុខាយភវិស្សតី’’តិ ឯវមាទិនា ភគវតា ភាសិតំ.

អនត្តលក្ខណសុត្ត

បុច្ឆា – អនត្តលក្ខណសុត្តំ បនាវុសោ ភគវតា កត្ថ កំ អារព្ភ កថញ្ច ភាសិតំ.

វិស្សជ្ជនា – ពារាណសិយំ ភន្តេ ឥសិបតនេ មិគទាយេ បញ្ចវគ្គិយេ ភិក្ខូ អារព្ភ ‘‘រូបំ ភិក្ខវេ អនត្តា, រូបញ្ច ហិទំ ភិក្ខវេ អត្តា អភវិស្ស, នយិទំ រូបំ អាពាធាយ សំវត្តេយ្យ, លព្ភេថ ច រូបេ ឯវំ មេ រូបំ ហោតុ, ឯវំ មេ រូបំ មា អហោសី’’តិ ឯវមាទិនា ភគវតា ភាសិតំ.

យមកសុត្ត

បុច្ឆា – ថេរវគ្គេ បនាវុសោ តតិយំ សំគីតំ យមកសុត្តំ កត្ថ កំ អារព្ភ កិស្មិំ វត្ថុស្មិំ កេន កថញ្ច ភាសិតំ.

វិស្សជ្ជនា – សាវត្ថិយំ ភន្តេ អាយស្មន្តំ យមកត្ថេរំ អារព្ភ អាយស្មតា សារិបុត្តត្ថេរេន ធម្មសេនាបតិនា ភាសិតំ. អាយស្មតោ ភន្តេ យមកត្ថេរស្ស ឯវរូបំ បាបកំ ទិដ្ឋិគតំ ឧប្បន្នំ ហោតិ ‘‘តថាហំ ភគវតា ធម្មំ ទេសិតំ អាជានាមិ, យថា ខីណាសវោ ភិក្ខុ កាយស្ស ភេទា ឧច្ឆិជ្ជតិ វិនស្សតិ, ន ហោតិ បរំមរណា’’តិ. តស្មិំ ភន្តេ វត្ថុស្មិំ ‘‘តំ កិំ មញ្ញសិ អាវុសោ យមក, រូបំ និច្ចំ វា អនិច្ចំ វា’’តិ ឯវមាទិនា ភន្តេ អាយស្មតា សារិបុត្តត្ថេរេន ធម្មសេនាបតិនា ភាសិតំ.

បុច្ឆា – កថញ្ចាវុសោ តត្ថ អាយស្មា សារិបុត្តត្ថេរោ ធម្មសេនាបតិ អាយស្មតោ យមកត្ថេរស្ស បដិវិទ្ធសច្ចស្ស ទិដ្ឋិសម្បន្នស្ស អនុយោគវត្តឈាបនវសេន បដិបុច្ឆិត្វា ឧត្តរិ ធម្មទេសនំ វិត្ថារេន ទេសេសិ.

វិស្សជ្ជនា – តំ កិំ មញ្ញសិ អាវុសោ យមក, រូបំ ‘តថាគតោ’តិ សមនុបស្សសីតិ. ‘នោ ហេតំ អាវុសោ’. វេទនំ. សញ្ញំ. សង្ខារេ. វិញ្ញាណំ ‘តថាគតោ’តិ សមនុបស្សសីតិ. ‘នោ ហេតំ អាវុសោ’តិ ឯវមាទិនា ភន្តេ អាយស្មា សារិបុត្តត្ថេរោ ធម្មសេនាបតិ អាយស្មតោ យមកត្ថេរស្ស អនុយោគវត្តឈាបនវសេន បដិបុច្ឆិត្វា បដិបុច្ឆិត្វា ឧត្តរិ ធម្មទេសនំ បវត្តេសិ.

តំ កិំ មញ្ញសិ អាវុសោ យមក, រូបំ, វេទនំ, សញ្ញំ, សង្ខារេ, វិញ្ញាណំ ‘តថាគតោ’តិ សមនុបស្សសិ–

វក្កលិសុត្ត

បុច្ឆា – តេនាវុសោ ភគវតា…បេ… សម្មាសម្ពុទ្ធេន ខន្ធវគ្គសំយុត្តេ ថេរវគ្គេ បញ្ចមំ វក្កលិសុត្តំ កត្ថ កំ អារព្ភ កិស្មិំ វត្ថុស្មិំ កថញ្ច ភាសិតំ.

វិស្សជ្ជនា – រាជគហេ ភន្តេ អាយស្មន្តំ វក្កលិំ ថេរំ អារព្ភ ភាសិតំ. អាយស្មា ភន្តេ វក្កលិថេរោ អាពាធិកោ ទុក្ខិតោ ពាឡ្ហគិលានោ ភគវន្តំ ឯតទវោច ‘‘ចិរបដិកាហំ ភន្តេ ភគវន្តំ ទស្សនាយ ឧបសង្កមិតុកាមោ, នត្ថិ ច មេ កាយស្មិំ តាវតិកា ពលមត្តា, យាវតាហំ ភគវន្តំ ទស្សនាយ ឧបសង្កមេយ្យ’’ន្តិ. តស្មិំ ភន្តេ វត្ថុស្មិំ ‘‘អលំ វក្កលិ, កិំ តេ ឥមិនា បូតិកាយេន ទិដ្ឋេន, យោ ខោ វក្កលិ ធម្មំ បស្សតិ, សោ មំ បស្សតិ, យោ មំ បស្សតិ, សោ ធម្មំ បស្សតិ. ធម្មញ្ហិ វក្កលិ បស្សន្តោ មំ បស្សតិ, មំ បស្សន្តោ ធម្មំ បស្សតិ. តំ កិំ មញ្ញសិ វក្កលិ, រូបំ និច្ចំ វា អនិច្ចំ វា’’តិ ឯវមាទិនា ភន្តេ ភគវតា ភាសិតំ.

‘‘អហំ វក្កលិ, កិំ តេ ឥមិនា បូតិកាយេន ទិដ្ឋេន’’ –

‘‘តំ កិំ មញ្ញសិ វក្កលិ, រូបំ និច្ចំ វា អនិច្ចំ វា’’ –

អនិច្ចំ ភន្តេ.

‘‘យំ បនានិច្ចំ, ទុក្ខំ វា តំ សុខំ វា’’–

ទុក្ខំ ភន្តេ.

យំ បនានិច្ចំ ទុក្ខំ វិបរិណាមធម្មំ, កល្លំ នុ តំ សមនុបស្សិតុំ ‘‘ឯតំ មម, ឯសោហមស្មិ, ឯសោ មេ អត្តា’’–

បុច្ឆា – កថញ្ចាវុសោ បុនបិ ភគវា ភិក្ខូ បេសេត្វា អាយស្មតោ វក្កលិត្ថេរស្ស បគ្គហវចនំ អារោចាបេសិ. សោបិ កថំ អត្តនោ បវត្តិំ ភគវតោ បច្ចារោចាបេសិ. កថញ្ចស្ស អភិសម្បរាយោ អហោសិ.

វិស្សជ្ជនា – សុណាវុសោ ត្វំ វក្កលិ ភគវតោ វចនំ ទ្វិន្នញ្ច ទេវតានំ, ឥមំ អាវុសោ រត្តិំ ទ្វេ ទេវតាយោ អភិក្កន្តាយ រត្តិយា អភិក្កន្តវណ្ណា កេវលកប្បំ គិជ្ឈកូដំ ឱភាសេត្វា យេន

ភគវា តេនុបសង្កមិំសុ, ឧបសង្កមិត្វា ភគវន្តំ អភិវាទេត្វា ឯកមន្តំ អដ្ឋំសុ, ឯកមន្តំ ឋិតា ខោ អាវុសោ ឯកា ទេវតា ភគវន្តំ ឯតទវោច ‘វក្កលិ ភន្តេ ភិក្ខុ វិមោក្ខាយ ចេតេតី’តិ. អបរា ទេវតា ភគវន្តំ ឯតទវោច ‘សោ ហិ នូន ភន្តេ សុវិមុត្តោ វិមុច្ចិស្សតី’តិ. ភគវា ច តំ អាវុសោ វក្កលិ ឯវមាហ ‘មា ភាយិ វក្កលិ, មា ភាយិ វក្កលិ, អបាបកំ តេ មរណំ ភវិស្សតិ, អបាបិកា កាលកិរិយា’តិ. ឯវំ ខោ ភន្តេ ភគវា បុនបិ ភិក្ខូ បេសេត្វា អាយស្មតោ វក្កលិត្ថេរស្ស បគ្គហវចនំ អារោចាបេសិ. សោបិ ភន្តេ អាយស្មា តេនហាវុសោ មម វចនេន ភគវតោ បាទេ សិរសា វន្ទថ ‘‘វក្កលិ ភន្តេ ភិក្ខុ អាពាធិកោ ទុក្ខិតោ ពាឡ្ហគិលានោ, សោ ភគវតោ បាទេ សិរសា វន្ទតី’’តិ, ឯវញ្ច វទេថ ‘‘រូបំ អនិច្ចំ, តាហំ ភន្តេ ន កង្ខាមិ, យទនិច្ចំ តំ ទុក្ខន្តិ នវិចិកិច្ឆាមិ, យទនិច្ចំ ទុក្ខំ វិបរិណាមធម្មំ, នត្ថិ មេ តត្ថ ឆន្ទោ វា រាគោ វា បេមំវាតិ ន វិចិកិច្ឆាមី’’តិ ឯវមាទិនា ភគវតោ អត្តនោ បវត្តិំ បច្ចារោចាបេសិ. សោ ហិ ភន្តេ អាយស្មា អចិរបក្កន្តេសុ តេសុ ភិក្ខូសុ សត្ថំ អាហរិត្វា វេទនំ វិក្ខម្ភេត្វា មូលកម្មដ្ឋានំ អាទាយ សម្បជានោ អរហត្តំ សច្ឆិកត្វា កាលមកាសិ. ឯវំ ខោ ភន្តេ តស្ស អាយស្មតោ អភិសម្បរាយោ អហោសិ.

អស្សជិសុត្ត

បុច្ឆា – អស្សជិសុត្តំ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ កថញ្ច ភាសិតំ.

វិស្សជ្ជនា – រាជគហេ ភន្តេ អាយស្មន្តំ អស្សជិំ អារព្ភ ភាសិតំ. អាយស្មា ភន្តេ អស្សជិ អាពាធិកោ ទុក្ខិតោ ពាឡ្ហគិលានោ ភគវន្តំ ឯតទវោច ‘‘បុព្ពេ ខ្វាហំ ភន្តេ គេលញ្ញេ បស្សម្ភេត្វា បស្សម្ភេត្វា កាយសង្ខារេ វិហរាមិ, សោហំ សមាធិំ នប្បដិលភាមិ. តស្ស មយ្ហំ ភន្តេ តំ សមាធិំ អប្បដិលភតោ ឯវំ ហោតិ នោ ចស្សាហំ បរិហាយាមី’’តិ. តស្មិំ ភន្តេ វត្ថុស្មិំ ‘‘យេ តេ អស្សជិ សមណព្រាហ្មណា សមាធិសារកា សមាធិសាមញ្ញា, តេសំ តំ សមាធិំ អប្បដិលភតំ ឯវំ ហោតិ ‘នោ ចស្សុ មយំ បរិហាយាមា’តិ. តំ កិំ មញ្ញសិ អស្សជិ, រូបំ និច្ចំ វា អនិច្ចំ វា’’តិ ឯវមាទិនា ភន្តេ ភគវតា ភាសិតំ.

ខេមកសុត្ត

បុច្ឆា – ខេមកសុត្តំ បនាវុសោ កត្ថ កំ អារព្ភ កិស្មិំ វត្ថុស្មិំ កេន កថញ្ច ភាសិតំ.

វិស្សជ្ជនា – កោសម្ពិយំ ភន្តេ សម្ពហុលេ ថេរេ ភិក្ខូ អារព្ភ អាយស្មតា ខេមកត្ថេរេន ភាសិតំ. សម្ពហុលា ភន្តេ ថេរា ភិក្ខូ អាយស្មន្តំ ទាសកំ បេសេត្វា ចតុក្ខត្តុំ អាយស្មន្តំ ខេមកំ អាពាធិកំ ទុក្ខិតំ ពាឡ្ហគិលានំ គេលញ្ញការណញ្ច ធម្មញ្ច បុច្ឆិំសុ, តស្មិំ ភន្តេ វត្ថុស្មិំ ‘‘បញ្ចិមេ អាវុសោ ឧបាទានក្ខន្ធា វុត្តា ភគវតា. សេយ្យថិទំ, រូបុបាទានក្ខន្ធោ វេទនុបាទានក្ខន្ធោ សញ្ញុបាទានក្ខន្ធោ សង្ខារុបាទានក្ខន្ធោ វិញ្ញាណុបាទានក្ខន្ធោ, ឥមេសុ ខ្វាហំ អាវុសោ បញ្ចសុ ឧបាទានក្ខន្ធេសុ ន កិញ្ចិ អត្តំ វា អត្តនិយំ វា សមនុបស្សាមី’’តិ ឯវមាទិនា ភន្តេ អាយស្មតា ខេមកត្ថេរេន ភាសិតំ.

បុច្ឆា – កថញ្ចាវុសោ តត្ថ អាយស្មា ខេមកោ ឧត្តរិ ធម្មទេសនំ បវឌ្ឍេត្វា វិត្ថារេន ថេរានំ ភិក្ខូនំ ទេសេសិ. កីទិសោ ច នេសំ ធម្មទេសកធម្មប្បដិគ្គាហកានំ ធម្មទេសនាយ អានិសំសោ អធិគតោ.

វិស្សជ្ជនា – ចតុត្ថេ ភន្តេ វារេ អាយស្មា ខេមកោ ‘‘អលំ អាវុសោ ទាសក កិំ ឥមាយ សន្ធាវនិកាយ, អាហរាវុសោ ទណ្ឌំ, អហមេវ ថេរានំ សន្តិកំ គមិស្សាមី’’តិ ទណ្ឌមោលុព្ភ អាយស្មា ខេមកោ យេន ថេរា ភិក្ខូ តេនុបសង្កមិ, ឧបសង្កមិត្វា ថេរេហិ ភិក្ខូហិ បុច្ឆិតោ ‘‘នខ្វាហំ អាវុសោ រូបំ អស្មីតិ វទាមិ, នបិ អញ្ញត្រ រូបា អស្មីតិ វទាមិ. ន ខ្វាហំ អាវុសោ វេទនំ អស្មីតិ វទាមិ, នបិ អញ្ញត្រ វេទនា អស្មីតិ វទាមី’’តិ ឯវមាទិនា ភន្តេ អាយស្មា ខេមកោ ឧត្តរិបិ ធម្មទេសនំ បវឌ្ឍេត្វា វិត្ថារេន ទេសេសិ. ឥមស្មិញ្ច បន ភន្តេ វេយ្យាករណស្មិំ ភញ្ញមានេ សដ្ឋិមត្តានំ ថេរានំ ភិក្ខូនំ អនុបាទាយ អាសវេហិ ចិត្តានិ វិមុច្ចិំសុ អាយស្មតោច ខេមកស្ស. ឯវំ ខោ ភន្តេ តេសំ ថេរានំ ធម្មទេសកធម្មប្បដិគ្គាហកានំ ធម្មាភិសមយោ អហោសិ.

ឆន្នសុត្ត

បុច្ឆា – ឆន្នសុត្តំ បនាវុសោ កត្ថ កំ អារព្ភ កិស្មិំ វត្ថុស្មិំ កេន កថញ្ច ភាសិតំ.

វិស្សជ្ជនា – កោសម្ពិយំ ភន្តេ អាយស្មន្តំ ឆន្នត្ថេរំ អារព្ភ ភាសិតំ. អាយស្មា ភន្តេ ឆន្នត្ថេរោ អាយស្មន្តំ អានន្ទំ ឯតទវោច ‘‘ឱវទតុ មំ អាយស្មា អានន្ទោ, អនុសាសតុ មំ អាយស្មា អានន្ទោ, ករោតុ មេ អាយស្មា អានន្ទោ ធម្មិំ កថំ, យថាហំ ធម្មំ បស្សេយ្យ’’ន្តិ. តស្មិំ ភន្តេ វត្ថុស្មិំ ‘‘សម្មុខា មេ តំ អាវុសោ ឆន្ន ភគវតោ សុតំ, សម្មុខា បដិគ្គហិតំ កច្ចានគោត្តំ ភិក្ខុំ ឱវទន្តស្ស, ទ្វយនិស្សិតោ ខ្វាយំ កច្ចាន លោកោ យេភុយ្យេន អត្ថិតញ្ចេវ នត្ថិតញ្ច, លោកសមុទយំ ខោ កច្ចាន យថាភូតំ សម្មប្បញ្ញាយ បស្សតោ យា លោកេ នត្ថិតា, សា ន ហោតី’’តិ ឯវមាទិនា ភន្តេ អាយស្មតា អានន្ទត្ថេរេន ធម្មភណ្ឌាគារិកេន ភាសិតំ.

ឱវទតុ មំ អាយស្មា អានន្ទោ, អនុសាសតុ មំ អាយស្មា អានន្ទោ.

បុប្ផសុត្ត

បុច្ឆា – តេនាវុសោ…បេ… សម្មាសម្ពុទ្ធេន ខន្ធវគ្គសំយុត្តេ បុប្ផវគ្គេ បុប្ផសុត្តំ កត្ថ កំ អារព្ភ កថញ្ច ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ ‘‘នាហំ ភិក្ខវេ លោកេន វិវទាមិ, លោកោវ មយា វិវទតិ, ន ភិក្ខវេ ធម្មវាទី កេនចិ លោកស្មិំ វិវទតិ, យំ ភិក្ខវេ នត្ថិ សម្មតំ លោកេ បណ្ឌិតានំ, អហម្បិតំ ‘‘នត្ថី’’តិ វទាមិ, យំ ភិក្ខវេ អត្ថិសម្មតំ លោកេ បណ្ឌិតានំ, អហម្បិតំ ‘‘អត្ថី’’តិ វទាមី’’តិ ឯវមាទិនា ភគវតា ភាសិតំ.

នាហំ ភិក្ខវេ លោកេន វិវទាមិ.

ន ភិក្ខវេ ធម្មវាទី កេនចិ លោកស្មិំ វិវទតិ.

ផេណបិណ្ឌូបមសុត្ត

បុច្ឆា – តត្ថេវ អាវុសោ ផេណបិណ្ឌូបមសុត្តំ ភគវតា កត្ថ កំ អារព្ភ កថញ្ច ភាសិតំ.

វិស្សជ្ជនា – អយុជ្ឈាយំ ភន្តេ គង្គាយ នទិយា តីរេ សម្ពហុលេ ភិក្ខូ អារព្ភ ‘‘សេយ្យថាបិ ភិក្ខវេ អយំ គង្គា នទី មហន្តំ ផេណបិណ្ឌំ អាវហេយ្យ, តមេនំ ចក្ខុមា បុរិសោ បស្សេយ្យ និជ្ឈាយេយ្យ យោនិសោ ឧបបរិក្ខេយ្យ, តស្ស តំ បស្សតោ និជ្ឈាយតោ យោនិសោ ឧបបរិក្ខតោ រិត្តកញ្ញេវ ខាយេយ្យ, តុច្ឆកញ្ញេវ ខាយេយ្យ, អសារកញ្ញេវ ខាយេយ្យ, កិំ សិយា ភិក្ខវេ ផេណបិណ្ឌេ សារោ. ឯវមេវ ខោ ភិក្ខវេ យំ កិញ្ចិ រូបំ អតីតានាគតបច្ចុប្បន្នំ អជ្ឈត្តំវា ពហិទ្ធា វា ឱឡារិកំ វា សុខុមំ វា ហីនំ វា បណីតំ វា យំ ទូរេ សន្តិកេ វា, តំ ភិក្ខុ បស្សតិ និជ្ឈាយតិ យោនិសោ ឧបបរិក្ខតិ, តស្ស តំ បស្សតោ និជ្ឈាយតោ យោនិសោ ឧបបរិក្ខតោ រិត្តកញ្ញេវ ខាយតិ, តុច្ឆកញ្ញេវ ខាយតិ, អសារកញ្ញេវ ខាយតិ, កិញ្ហិ សិយា ភិក្ខវេ រូបេ សារោ’’តិ ឯវមាទិនា ភគវតា ភាសិតំ.

ផេណបិណ្ឌូបមំ រូបំ, វេទនា បុព្ពុឡុបមា;

មរីចិកូបមា សញ្ញា, សង្ខារា កទលូបមា;

មាយូបមញ្ច វិញ្ញាណំ, ទេសិតាទិច្ចពន្ធុនា;

យថា យថា និជ្ឈាយតិ, យោនិសោ ឧបបរិក្ខតិ;

រិត្តកំ តុច្ឆកំ ហោតិ, យោ នំ បស្សតិ យោនិសោ.

ឥមញ្ច កាយំ អារព្ភ, ភូរិបញ្ញេន ទេសិតំ;

បហានំ តិណ្ណំ ធម្មានំ, រូបំ បស្សថ ឆឌ្ឌិតំ.

អាយុ ឧស្មាច វិញ្ញាណំ, យទា កាយំ ជហន្តិមំ;

អបវិទ្ធោ តទា សេតិ, បរភត្តំ អចេតនំ.

ឯតាទិសាយំ សន្តានោ, មាយាយំ ពាលលាបិនី;

វធកោ ឯស អក្ខាតោ, សារោ ឯត្ថ ន វិជ្ជតិ.

ឯវំ ខន្ធេ អវេក្ខេយ្យ, ភិក្ខុ អារទ្ធវីរិយោ;

ទិវា វា យទិ វា រត្តិំ, សម្បជានោ បដិស្សតោ.

ជហេយ្យ សព្ពសំយោគំ, ករេយ្យ សរណត្តនោ;

ចរេយ្យាទិត្តសីសោវ, បត្ថយំ អច្ចុតំ បទំ.

ទុតិយធម្មកតិកសុត្ត

បុច្ឆា – តត្ថេវ អាវុសោ ធម្មកថិកវគ្គេ ទុតិយធម្មកថិកសុត្តំ ភគវតា កត្ថ កំ អារព្ភ កិស្មិំ វត្ថុស្មិំ កថញ្ច ភាសិតំ.

វិស្សជ្ជនា – សាវត្ថិយំ ភន្តេ អញ្ញតរំ ភិក្ខុំ អារព្ភ ភាសិតំ. អញ្ញតមោ ភន្តេ ភិក្ខុ ភគវន្តំ ឯតទវោច ‘‘ធម្មកថិកោ ធម្មកថិកោតិ ភន្តេ វុច្ចតិ, កិត្តាវតា នុ ខោ ភន្តេ ធម្មកថិកោ ហោតិ, កិត្តាវតា ធម្មានុធម្មប្បដិបន្នោ ហោតិ, កិត្តាវតា ទិដ្ឋធម្មនិព្ពានប្បត្តោ ហោតី’’តិ. តស្មិំ ភន្តេ វត្ថុស្មិំ ‘‘រូបស្ស ចេ ភិក្ខុ និព្ពិទាយ វិរាគាយ និរោធាយ ធម្មំ ទេសេតិ, ‘ធម្មកថិកោ ភិក្ខូ’តិ អលំ វចនាយា’’តិ ឯវមាទិនា ភគវតា ភាសិតំ.

សីលវន្តសុត្ត, សុតវន្តសុត្ត

បុច្ឆា – តត្ថេវ អាវុសោ បោរាណកេហិ ធម្មសំគាហកមហាថេរេហិ សំគីតំ សីលវន្តសុត្តញ្ច សុតវន្តសុត្តញ្ច កត្ថ កំ អារព្ភ កិស្មិំ វត្ថុស្មិំ កេន កថញ្ច ភាសិតំ.

វិស្សជ្ជនា – ពារាណសិយំ ភន្តេ អាយស្មន្តំ មហាកោដ្ឋិកំ អារព្ភ អាយស្មតា សារិបុត្តត្ថេរេន ធម្មសេនាបតិនា ភាសិតំ. អាយស្មា ភន្តេ មហាកោដ្ឋិកោ សាយន្ហសមយំ បដិសល្លានា វុដ្ឋិតោ យេនាយស្មា សារិបុត្តោ តេនុបសង្កមិ, ឧបសង្កមិត្វា អាយស្មន្តំ សារិបុត្តំ ឯតទវោច ‘‘សីលវតាវុសោ សារិបុត្ត ភិក្ខុនា កតមេ ធម្មា យោនិសោ មនសិកាតព្ពា. សុតាវតាវុសោ សារិបុត្ត ភិក្ខុនា កតមេ ធម្មា យោនិសោ មនសិកាតព្ពា’’តិ. តស្មិំ ភន្តេ វត្ថុស្មិំ ‘‘សីលវតាវុសោ កោដ្ឋិក ភិក្ខុនា, សុតាវតាវុសោ កោដ្ឋិក ភិក្ខុនា បញ្ចុបាទានក្ខន្ធា អនិច្ចតោ ទុក្ខតោ រោគតោ គណ្ឌតោ សល្លតោ អឃតោ អាពាធតោ បរតោ បលោកតោ សុញ្ញតោ អនត្តតោ យោនិសោ មនសិកាតព្ពា’’តិ ឯវមាទិនា អាយស្មតា សារិបុត្តត្ថេរេន ធម្មសេនាបតិនា ភាសិតំ.

រាធសំយុត្ត

សត្តសុត្ត

បុច្ឆា – រាធសំយុត្តេ បនាវុសោ ទុតិយំ សត្តសុត្តំ ភគវតា កត្ថ កំ អារព្ភ កិស្មិំ វត្ថុស្មិំ កថញ្ច ភាសិតំ.

វិស្សជ្ជនា – សាវត្ថិយំ ភន្តេ អាយស្មន្តំ រាធត្ថេរំ អារព្ភ ភាសិតំ. អាយស្មា ភន្តេ រាធត្ថេរោ ភគវន្តំ ឯតទវោច ‘‘សត្តោ សត្តោតិ ភន្តេ វុច្ចតិ, កិត្តាវតា នុ ខោ ភន្តេ សត្តោតិ វុច្ចតី’’តិ. តស្មិំ ភន្តេ វត្ថុស្មិំ ‘‘រូបេ ខោ រាធ យោ ឆន្ទោ យោ រាគោ យា នន្ទី យា តណ្ហា, តត្រ សត្តោ តត្រ វិសត្តោ, តស្មា សត្តោតិ វុច្ចតី’’តិ ឯវមាទិនា ភគវតា ភាសិតំ.

ទិដ្ឋិសំយុត្ត

សោអត្តាសុត្ត

បុច្ឆា – ទិដ្ឋិសំយុត្តេ បនាវុសោ តតិយំ សំគីតំ សោអត្តា សុត្តំ ភគវតា កត្ថ កំ អារព្ភ កថញ្ច ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ ‘‘កិស្មិំ នុ ខោ ភិក្ខវេ សតិ កិំ ឧបាទាយ កិំ អភិនិវិស្ស ឯវំ ទិដ្ឋិ ឧប្បជ្ជតិ សោ អត្តា សោ លោកោ សោ បេច្ច ភវិស្សាមិ និច្ចោ ធុវោ សស្សតោ អវិបរិណាមធម្មោ’’តិ ឯវមាទិនា ភន្តេ ភគវតា ភាសិតំ.

នត្ថិទិន្នសុត្ត

បុច្ឆា – តត្ថេវ អាវុសោ បញ្ចមំ នត្ថិទិន្នសុត្តំ ភគវតា កត្ថ កំ អារព្ភ កថញ្ច ភាសិតំ.

វិស្សជ្ជនា – សាវត្ថិយំយេវ ភន្តេ សម្ពហុលេ ភិក្ខូ អារព្ភ ‘‘កិស្មិំ នុ ខោ ភិក្ខវេ សតិ កិំ ឧបាទាយ កិំ អភិនិវិស្ស ឯវំ ទិដ្ឋិ ឧប្បជ្ជតិ នត្ថិ ទិន្នំ, នត្ថិ យិដ្ឋំ, នត្ថិ ហុតំ, នត្ថិ សុកតទុក្កដានំ កម្មានំ ផលំ វិបាកោ’’តិ ឯវមាទិនា ភគវតា ភាសិតំ.

ឱក្កន្តសំយុត្ត

ចក្ខុសុត្ត

បុច្ឆា – ឱក្កន្តសំយុត្តេ បនាវុសោ បឋមំ ចក្ខុសុត្តំ ភគវតា កត្ថ កំ អារព្ភ កថញ្ច ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ ‘‘ចក្ខុំ ភិក្ខវេ អនិច្ចំ វិបរិណាមិ អញ្ញថាភាវិ. សោតំ. ឃានំ. ជិវ្ហំ. កាយោ. មនោ អនិច្ចោ វិបរិណាមី អញ្ញថាភាវី’’តិ ឯវមាទិនា ភគវតា ភាសិតំ.

សារិបុត្តសំយុត្ត

សុចិមុខីសុត្ត

បុច្ឆា – សារិបុត្តសំយុត្តេ បនាវុសោ ទសមំ សុចិមុខីសុត្តំ កត្ថ កំ អារព្ភ កិស្មិំ វត្ថុស្មិំ កេន កថញ្ច ភាសិតំ.

វិស្សជ្ជនា – រាជគហេ ភន្តេ សុចិមុខិំ បរិព្ពាជិកំ អារព្ភ អាយស្មតា សារិបុត្តត្ថេរេន ធម្មសេនាបតិនា ភាសិតំ. សុចិមុខី ភន្តេ បរិព្ពាជិកា អាយស្មន្តំ សារិបុត្តំ ឯតទវោច ‘‘កិំ នុ ខោ សមណ អធោមុខោ ភុញ្ជសី’’តិ. តស្មិំ ភន្តេ វត្ថុស្មិំ ‘‘ន ខ្វាហំ ភគិនិ អធោមុខោ ភុញ្ជាមី’’តិ ឯវមាទិនា បដិក្ខិបិត្វា ‘‘យេ ហិ កេចិ ភគិនិ សមណព្រាហ្មណា វត្ថុវិជ្ជា តិរច្ឆានវិជ្ជាយ មិច្ឆាជីវេន ជីវិកំ កប្បេន្តិ, ឥមេ វុច្ចន្តិ ភគិនិ សមណព្រាហ្មណា អធោមុខា ភុញ្ជន្តី’’តិ ឯវមាទិនា អាយស្មតា សារិបុត្តត្ថេរេន ធម្មសេនាបតិនា ភាសិតំ.

កិំ នុ ខោ សមណ អធោ មុខោ ភុញ្ជសិ.

ន ខ្វាហំ ភគិនិ អធោមុខោ ភុញ្ជាមិ.

តេន ហិ សមណ ឧព្ភមុខោ ភុញ្ជសិ.

ន ខ្វាហំ ភគិនិ ឧព្ភមុខោ ភុញ្ជាមិ.