រាហុលសំយុត្ត

បុច្ឆា – រាហុលសំយុត្តំ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ កថញ្ច ភាសិតំ.

វិស្សជ្ជនា – សាវត្ថិយំ ភន្តេ អាយស្មន្តំ រាហុលំ អារព្ភ ភាសិតំ. អាយស្មា ភន្តេ រាហុលោ ភគវន្តំ ឯតទវោច ‘‘សាធុ មេ ភន្តេ ភគវា សំខិត្តេន ធម្មំ ទេសេតុ, យមហំ ភគវតោ ធម្មំ សុត្វា ឯកោ វូបកដ្ឋោ អប្បមត្តោ អាតាបី បហិតត្តោ វិហរេយ្យ’’ន្តិ, តស្មិំ ភន្តេ វត្ថុស្មិំ ‘‘តំ កិំ មញ្ញសិ រាហុល, ចក្ខុនិច្ចំ វា អនិច្ចំ វាតិ. អនិច្ចំ ភន្តេ. យំ បនានិច្ចំ, ទុក្ខំ វា តំ សុខំ វាតិ. ទុក្ខំ ភន្តេ. យំ បនានិច្ចំ ទុក្ខំ វិបរិណាមធម្មំ, កល្លំ នុ តំ សមនុបស្សិតុំ ‘ឯតំ មម, ឯសោ ហមស្មិ, ឯសោ មេ អត្តា’តិ. នោ ហេតំ ភន្តេ’’តិ ឯវមាទិនា ភន្តេ ភគវតា ភាសិតំ.