មូលបណ្ណាសបាឡិ

សំគាយនស្ស បុច្ឆា វិស្សជ្ជនា

បុច្ឆា – បឋមមហាសំគីតិកាលេ អាវុសោ ធម្មសំគាហកា មហាកស្សបាទយោ មហាថេរវរា ទីឃនិកាយំ សំគាយិត្វា តទនន្តរំ កិំ នាម បាវចនំ សំគាយិំសុ.

វិស្សជ្ជនា – បឋមមហាសំគីតិកាលេ ភន្តេ ធម្មសំគាហកា មហាកស្សបាទយោ មហាថេរវរា ទីឃនិកាយំ សំគាយិត្វា តទនន្តរំ មជ្ឈិមំ នាម និកាយំ សំគាយិំសុ.

បុច្ឆា – មជ្ឈិមនិកាយោ នាម អាវុសោ មូលបណ្ណាសកោ មជ្ឈិម បណ្ណាសកោ ឧបរិបណ្ណាសកោតិ បណ្ណាសកវសេន តិវិធោ, តត្ថ កតរំ បណ្ណាសកំ បឋមំ សំគាយិំសុ.

វិស្សជ្ជនា – តីសុ ភន្តេ បណ្ណាសកេសុ មូលបណ្ណាសកំ នាម បាវចនំ ធម្មសំគាហកា មហាថេរវរា បឋមំ សំគាយិំសុ.

បុច្ឆា – មូលបណ្ណាសកេបិ អាវុសោ បញ្ចវគ្គា បណ្ណាស ច សុត្តានិ, តេសុ កតរំ វគ្គំ កតរញ្ច សុត្តំ បឋមំ សំគាយិំសុ.

វិស្សជ្ជនា – មូលបណ្ណាសកេ ភន្តេ បញ្ចសុ វគ្គេសុ បឋមំ មូលបរិយាយវគ្គំ បណ្ណាសកេសុ ច សុត្តេសុ បឋមំ មូលបរិយាយសុត្តំ សំគាយិំសុ.

សាធុ អាវុសោ មយម្បិ ទានិ តតោយេវ បដ្ឋាយ សំគីតិបុព្ពង្គមានិ បុច្ឆាវិស្សជ្ជនកិច្ចានិ កាតុំ សមារភាម.

មូលបរិយាយសុត្ត

បុច្ឆា – តេន អាវុសោ ភគវតា ជានតា បស្សតា អរហតា សម្មាសម្ពុទ្ធេន មូលបរិយាយសុត្តំ កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – ឧក្កដ្ឋាយំ ភន្តេ បញ្ចសតេ ព្រាហ្មណកុលា បព្ពជិតេ អារព្ភ ភាសិតំ, បញ្ចសតា ភន្តេ ព្រាហ្មណកុលា បព្ពជិតា ភិក្ខូ បរិយត្តិំ និស្សាយ មានំ ឧប្បាទេសុំ, តស្មិំ ភន្តេ វត្ថុស្មិំ ភាសិតំ.

បុច្ឆា – តំ បនាវុសោ សុត្តំ ភគវតា កតិហិ វារេហិ កតិហិ ច អន្តោគធបទេហិ វិភជិត្វា ភាសិតំ.

វិស្សជ្ជនា – តំ បន ភន្តេ មូលបរិយាយសុត្តំ ភគវតា អដ្ឋហិ ច វារេហិ ចតុវីសតិយា ច អន្តោគធបទេហិ វិភជិត្វា ទេសិតំ.

សព្ពាសវសុត្ត

បុច្ឆា – ទុតិយំ បនាវុសោ សព្ពាសវសុត្តំ ភគវតា កត្ថ កំ អារព្ភ ភាសិតំ.

វិស្សជ្ជនា – សព្ពាសវសុត្តំ បន ភន្តេ ភគវតា សាវត្ថិយំ សម្ពហុលេ ភិក្ខូ អារព្ភ ភាសិតំ.

បុច្ឆា – តត្ថាវុសោ ភគវតា អាសវា កតិហិ បការេហិ វិភជិត្វា ទស្សិតា.

វិស្សជ្ជនា – សត្តហិ ភន្តេ បការេហិ វិភជិត្វា អាសវា ភគវតា បកាសិតា.

ធម្មទាយាទសុត្ត

បុច្ឆា – ធម្មទាយាទសុត្តំ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ ភាសិតំ, ភគវតោ ច ភន្តេ ភិក្ខុសង្ឃស្ស ច តទា មហាលាភសក្ការោ ឧទបាទិ, តស្មិំ ភន្តេ វត្ថុស្មិំ ភាសិតំ.

បុច្ឆា – តត្ថាវុសោ ទ្វេ អនុសន្ធយោ, តេសុ បឋមេ អនុសន្ធិម្ហិ កថំ ភគវតា ភិក្ខូនំ ឱវាទោ ទិន្នោ.

វិស្សជ្ជនា – បឋមេ ភន្តេ អនុសន្ធិម្ហិ ធម្មទាយាទា មេ ភិក្ខវេ ភវថ មា អាមិសទាយាទា, អត្ថិ មេ តុម្ហេសុ អនុកម្បា, កិន្តិ មេ សាវកា ធម្មទាយាទា ភវេយ្យុំ នោ អាមិសទាយាទាតិ ឯវមាទិនា ភគវតា ភិក្ខូនំ ឱវាទោ ទិន្នោ.

ធម្មទាយាទា មេ ភិក្ខវេ ភវថ មា អាមិសទាយាទា, អត្ថិ មេ តុម្ហេសុ អនុកម្បា កិន្តិ មេ សាវកា ធម្មទាយាទា ភវេយ្យុំ, នោ អាមិសទាយាទា.

បុច្ឆា – ទុតិយេ បនាវុសោ អនុសន្ធិម្ហិ អាយស្មតា សារិបុត្តត្ថេរេន ធម្មសេនាបតិនា កីទិសី ធម្មទេសនា វិភជិត្វា បកាសិតា.

វិស្សជ្ជនា – ទុតិយេ បន ភន្តេ អនុសន្ធិម្ហិ អាយស្មតា សារិបុត្តត្ថេរេន ធម្មសេនាបតិនា សត្ថុ បវិវិត្តស្ស វិហរតោ សាវកានំ វិវេកំ អននុសិក្ខតំ តីហិ ឋានេហិ គារយុតំ, អនុសិក្ខន្តានញ្ច តីហិ ឋានេហិ បាសំសតំ, សោឡស ច បាបកេ ធម្មេ តេសញ្ច បហានាយ មជ្ឈិមា បដិបទា វិភជិត្វា បកាសិតា.

ភយភេរវសុត្ត

បុច្ឆា – ភយភេរវសុត្តំ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សាវត្ថិយំ ភន្តេ ជាណុស្សោណិំ ព្រាហ្មណំ អារព្ភ ភាសិតំ, ជាណុស្សោណិ ភន្តេ ព្រាហ្មណោ ភគវន្តំ ឧបសង្កមិត្វា ឯតទវោច ‘‘យេ មេ ភោ គោតម កុលបុត្តា ភវន្តំ គោតមំ ឧទ្ទិស្ស សទ្ធា អគារស្មា អនគារិយំ បព្ពជិតា, ភវំ តេសំ គោតមោ បុព្ពង្គមោ, ភវំ

តេសំ គោតមោ ពហុការោ, ភវំ តេសំ គោតមោ សមាទបេតា, ភោតោ ច បន គោតមស្ស សា ជនតា ទិដ្ឋានុគតិំ អាបជ្ជតី’’តិ, តស្មិំ ភន្តេ វត្ថុស្មិំ ភាសិតំ.

អនង្គណសុត្ត

បុច្ឆា – អនង្គណសុត្តំ បនាវុសោ កត្ថ កំ អារព្ភ កេន ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ អាយស្មតា សារិបុត្តត្ថេរេន ធម្មសេនាបតិនា ភាសិតំ.

អាកង្ខេយ្យសុត្ត

បុច្ឆា – អាកង្ខេយ្យសុត្តំ បនាវុសោ ភគវតា កត្ថ កំ អារព្ភ ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ ភាសិតំ.

វត្ថសុត្ត

បុច្ឆា – វត្ថសុត្តំ បនាវុសោ ភគវតា កត្ថ កំ អារព្ភ ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ ភាសិតំ.

សល្លេខសុត្ត

បុច្ឆា – សល្លេខសុត្តំ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សាវត្ថិយំ ភន្តេ អាយស្មន្តំ មហាចុន្ទំ អារព្ភ ភាសិតំ, អាយស្មា មហាចុន្ទោ ភន្តេ ភគវន្តំ ឧបសង្កមិត្វា ឯតទវោច ‘‘យា ឥមា ភន្តេ អនេកវិហិតា ទិដ្ឋិយោ លោកេ ឧប្បជ្ជន្តិ, អត្តវាទបដិសំយុត្តា វា លោកវាទបដិសំយុត្តា វា, អាទិមេវ នុ ខោ ភន្តេ ភិក្ខុនោ មនសិករោតោ ឯវមេតាសំ ទិដ្ឋីនំ បហានំ ហោតិ, ឯវមេតាសំ ទិដ្ឋីនំ បដិនិស្សគ្គោ ហោតី’’តិ, តស្មិំ ភន្តេ វត្ថុស្មិំ ភាសិតំ.

បុច្ឆា – តត្ថ ច អាវុសោ កតិ បរិយាយា កតិ ច អន្តោគធបទានិ ភគវតា វិភជិត្វា បកាសិតានិ.

វិស្សជ្ជនា – តត្ថ ភន្តេ បញ្ច បរិយាយា ចតុចត្តាលីស ច អន្តោគធបទានិ ភគវតា វិត្ថារេន ភាសិតានិ.

សម្មាដ្ឋិសុត្ត

បុច្ឆា – សម្មាទិដ្ឋិសុត្តំ បនាវុសោ កត្ថ កំ អារព្ភ កេន ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ អាយស្មតា សារិបុត្តត្ថេរេន ធម្មសេនាបតិនា ភាសិតំ.

បុច្ឆា – កស្ស អាវុសោ វចនំ.

វិស្សជ្ជនា – ភគវតោ ភន្តេ វចនំ អរហតោ សម្មាសម្ពុទ្ធស្ស.

បុច្ឆា – កេនាវុសោ អាភតំ.

វិស្សជ្ជនា – បរម្បរាយ ភន្តេ អាភតំ.

មហាសតិបដ្ឋានសុត្ត

បុច្ឆា – មហាសតិបដ្ឋានសុត្តំ បនាវុសោ យោគាវចរានំ ពហុបការត្តា ទីឃនិកាយេ ច ឥធ ចាតិ ទ្វីសុ និកាយេសុ បោរាណកេហិ សំគីតិការេហិ ទ្វិក្ខត្តុំ សំគាយិត្វា វិត្ថារេន បតិដ្ឋាបិតំ, តំ អម្ហេហិ ទីឃនិកាយេ យថានុប្បត្តវសេន បុច្ឆិតញ្ច វិស្សជ្ជិតញ្ច. តថាបិ យោគាវចរានំ ពហុបការត្តាយេវ តំ ឥទានិបិ យថានុប្បត្តវសេន បុន បុច្ឆិស្សាមិ, តំ បនេតំ អាវុសោ មហាសតិបដ្ឋានសុត្តំ ភគវតា កត្ថ កំ អារព្ភ ភាសិតំ.

វិស្សជ្ជនា – កុរូសុ ភន្តេ កម្មាសធម្មេ នាម កុរូនំ និគមេ សម្ពហុលេ ភិក្ខូ អារព្ភ ភាសិតំ.

បុច្ឆា – កថញ្ចាវុសោ តត្ថ អានាបានស្សតិ កាយានុបស្សនា ភគវតា វិភជិត្វា បកាសិតា.

វិស្សជ្ជនា – ឥធ ភិក្ខវេ ភិក្ខុ អរញ្ញគតោ វា រុក្ខមូលគតោ វា សុញ្ញាគារគតោ វា និសីទតិ បល្លង្កំ អាភុជិត្វា ឧជុំ កាយំ បណិធាយ បរិមុខំ សតិំ ឧបដ្ឋបេត្វា សោ សតោវ អស្សសតិ, សតោវ បស្សសតិ, ទីឃំ វា អស្សសន្តោ ‘ទីឃំ អស្សសាមី’តិ បជានាតិ, ទីឃំ វា បស្សសន្តោ ‘ទីឃំ បស្សសាមី’តិ បជានាតិ, ឯវមាទិនា ភន្តេ តត្ថ អានាបានស្សតិ កាយានុបស្សនា ភគវតា វិភជិត្វា បកាសិតា.

បុច្ឆា – កថញ្ចាវុសោ តត្ថ ឥរិយាបថកាយានុបស្សនា ភគវតា វិភជិត្វា បកាសិតា.

វិស្សជ្ជនា – បុន ចបរំ ភិក្ខវេ ភិក្ខុ គច្ឆន្តោ វា គច្ឆាមីតិ បជានាតិ, ឋិតោ វា ឋិតោម្ហីតិ បជានាតិ, និសិន្នោ វា និសិន្នោម្ហីតិ បជានាតិ, សយានោ វា សយានោម្ហីតិ បជានាតិ, ឯវមាទិនា ភន្តេ ភគវតា ឥរិយាបថកាយានុបស្សនា ភាវនា វិភជិត្វា បកាសិតា.

បុច្ឆា – កថញ្ចាវុសោ តត្ថ សម្បជញ្ញកាយានុបស្សនា ភគវតា វិភជិត្វា បកាសិតា.

វិស្សជ្ជនា – បុន ចបរំ ភិក្ខវេ ភិក្ខុ អភិក្កន្តេ បដិក្កន្តេ សម្បជានការី ហោតិ, អាលោកិតេ វិលោកិតេ សម្បជានការី ហោតិ, សមិញ្ជិតេ បសារិតេ សម្បជានការី ហោតិ, សង្ឃាដិបត្តចីវរធារណេ សម្បជានការី ហោតិ, អសិតេ បីតេ ខាយិតេ សាយិតេ សម្បជានការី ហោតិ, ឧច្ចារបស្សាវកម្មេ សម្បជានការី ហោតិ, គតេ ឋិតេ និសិន្នេ សុត្តេ ជាគរិតេ ភាសិតេ តុណ្ហីភាវេ សម្បជានការី ហោតិ, ឯវមាទិនា ភន្តេ ភគវតា តត្ថ សម្បជញ្ញកាយានុបស្សនា វិភជិត្វា បកាសិតា.

បុច្ឆា – កថញ្ចាវុសោ តត្ថ បដិកូលមនសិការកាយានុបស្សនា ភគវតា វិភជិត្វា បកាសិតា.

វិស្សជ្ជនា – បុន ចបរំ ភិក្ខវេ ភិក្ខុ ឥមមេវ កាយំ ឧទ្ធំ បាទតលា អធោ កេសមត្ថកា តចបរិយន្តំ បូរំ នានប្បការស្ស អសុចិនោ បច្ចវេក្ខតិ អត្ថិ ឥមស្មិំ កាយេ កេសាលោមា នខា ទន្តា តចោ ឯវមាទិនា ភន្តេ តត្ថ ភគវតា បដិកូលមនសិការកាយានុបស្សនា វិភជិត្វា បកាសិតា.

បុច្ឆា – កថញ្ចាវុសោ តត្ថ ធាតុមនសិការកាយានុបស្សនា ភគវតា វិភជិត្វា បកាសិតា.

វិស្សជ្ជនា – បុន ចបរំ ភិក្ខវេ ភិក្ខុ ឥមមេវ កាយំ យថាឋិតំ យថាបណិហិតំ ធាតុសោ បច្ចវេក្ខតិ អត្ថិ ឥមស្មិំ កាយេ បថវីធាតុ អាបោធាតុ តេជោធាតុ វាយោធាតុ ឯវមាទិនា ភន្តេ ភគវតា ធាតុមនសិការកាយានុបស្សនា វិភជិត្វា បកាសិតា.

បុច្ឆា – កថញ្ចាវុសោ តត្ថ នវ សិវថិកកាយានុបស្សនា ភគវតា វិភជិត្វា បកាសិតា.

វិស្សជ្ជនា – បុន ចបរំ ភិក្ខវេ ភិក្ខុ សេយ្យថាបិ បស្សេយ្យ សរីរំ សិវថិកាយ ឆឌ្ឌិតំ ឯកាហមតំ វា ទ្វីហមតំ វា តីហមតំ វា ឧទ្ធុមាតកំ វិនីលកំ វិបុព្ពកជាតំ សោ ឥមមេវ កាយំ ឧបសំហរតិ ‘‘អយម្បិ ខោ កាយោ ឯវំធម្មោ ឯវំភាវី ឯវំអនតីតោ’’តិ ឯវមាទិនា ភន្តេ តត្ថ ភគវតា នវ សិវថិកកាយានុបស្សនា ភាវនា វិភជិត្វា បកាសិតា.

បុច្ឆា – កថញ្ចាវុសោ តត្ថ វេទនានុបស្សនា ភគវតា វិភជិត្វា ទេសិតា.

វិស្សជ្ជនា – ឥធ ភិក្ខវេ ភិក្ខុ សុខំ វា វេទនំ វេទយមានោ ‘‘សុខំ វេទនំ វេទយាមី’’តិ បជានាតិ, ទុក្ខំ វា វេទនំ វេទយមានោ ‘‘ទុក្ខ វេទនំ វេទយាមី’’តិ បជានាតិ, អទុក្ខមសុខំ វា វេទនំ វេទយមានោ ‘‘អទុក្ខមសុខំ វេទនំ វេទយាមី’’តិ បជានាតិ, ឯវមាទិនា ភន្តេ តត្ថ ភគវតា វេទនានុបស្សនា វិភជិត្វា បកាសិតា.

បុច្ឆា – កថញ្ចាវុសោ តត្ថ ចិត្តានុបស្សនា ភគវតា វិភជិត្វា ទេសិតា.

វិស្សជ្ជនា – ឥធ ភិក្ខវេ ភិក្ខុ សរាគំ វា ចិត្តំ ‘‘សរាគំ ចិត្ត’’ន្តិ បជានាតិ, វីតរាគំ វា ចិត្តំ ‘‘វីតរាគំ ចិត្ត’’ន្តិ បជានាតិ, សទោសំ វា វីតទោសំ វា សមោហំ វា វីតមោហំ វា សំខិត្តំ វា ចិត្តំ ‘‘សំខិត្តំ ចិត្ត’’ន្តិ បជានាតិ, វិក្ខិត្តំ វា ចិត្តំ ‘‘វិក្ខិត្តំ ចិត្ត’’ន្តិ បជានាតិ, ឯវមាទិនា តត្ថ ភគវតា ចិត្តានុបស្សនា វិភជិត្វា បកាសិតា.

បុច្ឆា – កថញ្ចាវុសោ តត្ថ ធម្មានុបស្សនា ភគវតា វិភជិត្វា ទេសិតា, តំ សង្ខេបមត្តេនេវ វិស្សជ្ជេហិ.

វិស្សជ្ជនា – ឥធ ភិក្ខវេ ភិក្ខុ ធម្មេសុ ធម្មានុបស្សី វិហរតិ, បញ្ចសុ នីវរណេសុ ឯវមាទិនា ភន្តេ តត្ថ ភគវតា បញ្ចហិ បព្ពេហិ ធម្មានុបស្សនា វិភជិត្វា បកាសិតា.

ចូឡសីហនាទសុត្ត

បុច្ឆា – ចូឡនសីហនាទសុត្តំ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សាវត្ថិយំ ភន្តេ បរិហីនលាភសក្ការេ នានាតិត្ថិយេ អារព្ភ ភាសិតំ, នានាតិត្ថិយា ភន្តេ បរិហីនលាភសក្ការា តេសុ តេសុ ឋានេសុ បរិទេវិំសុ, ចតស្សោ ច ភន្តេ បរិសា ភគវតោ ឯកមត្ថំ អារោចេសុំ, តស្មិំ ភន្តេ វត្ថុស្មិំ ភាសិតំ.

មហាសីហនាទសុត្ត

បុច្ឆា – តេនាវុសោ ភគវតា ជានតា បស្សតា អរហតា សម្មាសម្ពុទ្ធេន មហាសីហនាទសុត្តំ កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – វេសាលិយំ ភន្តេ សុនក្ខត្តំ លិច្ឆវិបុត្តំ អារព្ភ ភាសិតំ, សនុក្ខត្តោ ភន្តេ លិច្ឆវិបុត្តោ អចិរបក្កន្តោ ហោតិ ឥមស្មា ធម្មវិនយា, សោ វេសាលិយំ បរិសតិ ឯវំ វាចំ ភាសតិ ‘‘នត្ថិ សមណស្ស គោតមស្ស ឧត្តរិមនុស្សធម្មា អលមរិយញាណទស្សនវិសេសោ, តក្កបរិយាហតំ សមណោ គោតមោ ធម្មំ ទេសេតិ វីមំសានុចរិតំ សយំ បដិភានំ. យស្ស ច ខ្វាស្ស អត្ថាយ ធម្មោ ទេសិតោ, សោ និយ្យាតិ តក្ករស្ស សម្មា ទុក្ខក្ខយាយា’’តិ, ឯតមត្ថំ ភន្តេ អាយស្មា សារិបុត្តោ ភគវតោ អារោចេសិ, តស្មិំ ភន្តេ វត្ថុស្មិំ ភាសិតំ.

បុច្ឆា – កតិ បនាវុសោ តត្ថ ភគវតា តថាគតស្ស តថាគតពលានិ វិភជិត្វា បកាសិតានិ, យេហិ ពលេហិ សមន្នាគតោ តថាគតោ អាសភំ ឋានំ បដិជានាតិ, បរិសាសុ សីហនាទំ នទតិ, ព្រហ្មចក្កំ បវត្តេតិ.

វិស្សជ្ជនា – ទស ភន្តេ តថាគតស្ស តថាគតពលានិ ភគវតា វិភជិត្វា បកាសិតានិ, យេហិ ពលេហិ សមន្នាគតោ តថាគតោ អាសភំ ឋានំ បដិជានាតិ, បរិសាសុ សីហនាទំ នទតិ, ព្រហ្មចក្កំ បវត្តេតិ.

បុច្ឆា – កថញ្ចាវុសោ តត្ថ ភគវតា ចតុវេរជ្ជញាណានិ វិភជិត្វា បកាសិតានិ, យេហិ វេសារជ្ជេហិ សមន្នាគតោ តថាគតោ អាសភំ ឋានំ បដិជានាតិ, បរិសាសុ សីហនាទំ នទតិ, ព្រហ្មចក្កំ បវត្តេតិ.

វិស្សជ្ជនា – ខីណាសវស្ស តេ បដិជានតោ ឥមេ អាសវា អបរិក្ខីណាតិ តត្រ វត មំ សមណោ វា ព្រាហ្មណោ វា ទេវោ វា មារោ វា ព្រហ្មា វា កោចិ វា លោកស្មិំ សហធម្មេន បដិចោទេស្សតីតិ និមិត្តមេតំ សារិបុត្ត ន សមនុបស្សាមិ, ឯតមហំ សារិបុត្ត និមិត្តំ អសមនុបស្សន្តោ ខេមប្បត្តោ អភយប្បត្តោ វេសារជ្ជប្បត្តោ វិហរាមិ. ឯវមាទិនា ភន្តេ តត្ថ ចតុវេសារជ្ជញាណានិ ភគវតា វិត្ថារេន វិភជិត្វា បកាសិតានិ.

បុច្ឆា – កថញ្ចាវុសោ តត្ថ ភគវតា បញ្ចគតិបរិច្ឆេទញាណំ វិភជិត្វា បកាសិតំ.

វិស្សជ្ជនា – បញ្ច ខោ ឥមា សារិបុត្ត គតិយោ, កតមា បញ្ច, និរយោ តិរច្ឆានយោនិ បេត្តិវិសយោ មនុស្សា ទេវា, ឯវមាទិនា ភន្តេ ភគវតា តត្ថ បញ្ចគតិបរិច្ឆេទកញាណំ វិភជិត្វា បកាសិតំ.

បុច្ឆា – កថញ្ចាវុសោ តត្ថ តថាគតោ អត្តនោ បញ្ញាវេយ្យត្តិយា អបរិហានិំ បកាសេសិ.

វិស្សជ្ជនា – សន្តិ ខោ បន សារិបុត្ត ឯកេ សមណព្រាហ្មណា ឯវំវាទិនោ ឯវំទិដ្ឋិនោ យាវទេវាយំ ភវំ បុរិសោ ទហរោ ហោតិ, ឯវមាទិនា ភន្តេ តត្ថ តថាគតោ អត្តនោ បញ្ញាវេយ្យត្តិយា អបរិហានិំ បកាសេសិ.

មហាទុក្ខក្ខន្ធសុត្ត

បុច្ឆា – មហាទុក្ខក្ខន្ធសុត្តំ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សាវត្ថិយំ ភន្តេ អញ្ញតិត្ថិយេ អារព្ភ ភាសិតំ, សម្ពហុលា ភន្តេ អញ្ញតិត្ថិយា ភិក្ខូ ឯតទវោចុំ ‘‘សមណោ អាវុសោ គោតមោ កាមានំ បរិញ្ញំ បញ្ញបេតិ, មយម្បិ កាមានំ បរិញ្ញំ បញ្ញបេម, សមណោ អាវុសោ គោតមោ រូបានំ វេទនានំ បរិញ្ញំ បញ្ញបេតិ, មយម្បិ រូបានំ វេទនានំ បរិញ្ញំ បញ្ញបេម, ឥធ នោ អាវុសោ កោ វិសេសោ, កោ អធិប្បយាសោ, កិំ នានាករណំ សមណស្ស វា គោតមស្ស អម្ហាកំ វា យទិទំ ធម្មទេសនាយ វា ធម្មទេសនំ អនុសាសនិយា វា អនុសាសនិ’’ន្តិ, ឯតមត្ថំ ភិក្ខូ ភគវតោ អារោចេសុំ, តស្មិំ ភន្តេ វត្ថុស្មិំ ភាសិតំ.

ចូឡទុក្ខក្ខន្ធសុត្ត

បុច្ឆា – ចូឡទុក្ខក្ខន្ធសុត្តំ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សក្កេសុ ភន្តេ កបិលវត្ថុស្មិំ មហានាមំ សក្កំ អារព្ភ ភាសិតំ, មហានាមោ ភន្តេ សក្កោ ភគវន្តំ ឧបសង្កមិត្វា ឯតទវោច ‘‘ទីឃរត្តាហំ ភន្តេ ភគវតា ឯវំ ធម្មំ ទេសិតំ អាជានាមិ ‘លោភោ ចិត្តស្ស ឧបក្កិលេសោ, ទោសោ ចិត្តស្ស ឧបក្កិលេសោ, មោហោ ចិត្តស្ស ឧបក្កិលេសោ’តិ, ឯវញ្ចាហំ ភន្តេ ភគវតា ធម្មំ ទេសិតំ អាជានាមិ ‘លោភោ ចិត្តស្ស ឧបក្កិលេសោ, ទោសោ ចិត្តស្ស ឧបក្កិលេសោ, មោហោ ចិត្តស្ស ឧបក្កិលេសោ’តិ. អថ ច បន មេ ឯកទា លោភធម្មាបិ ចិត្តំ បរិយាទាយ តិដ្ឋន្តិ, ទោសធម្មាបិ ចិត្តំ បរិយាទាយ តិដ្ឋន្តិ, មោហធម្មាបិ ចិត្តំ បរិយាទាយ តិដ្ឋន្តិ, តស្ស មយ្ហំ ភន្តេ ឯវំ ហោតិ ‘កោ សុ នាម មេ ធម្មោ អជ្ឈត្តំ អប្បហិនោ, យេន មេ ឯកទា លោភធម្មាបិ ចិត្តំ បរិយាទាយ តិដ្ឋន្តិ, ទោសធម្មាបិ ចិត្តំ បរិយាទាយ តិដ្ឋន្តិ, មោហធម្មាបិ ចិត្តំ បរិយាទាយ តិដ្ឋន្តី’តិ’’, តស្មិំ ភន្តេ វត្ថុស្មិំ ភាសិតំ.

អនុមានសុត្ត

បុច្ឆា – អនុមានសុត្តំ បនាវុសោ កត្ថ កំ អារព្ភ កេន ភាសិតំ.

វិស្សជ្ជនា – ភគ្គេសុ ភន្តេ សុសុមារគិរេ ភេសកឡាវនេ អាយស្មតា មហាមោគ្គល្លានត្ថេរេន សម្ពហុលេ ភិក្ខូ អារព្ភ ភាសិតំ.

ចេតោខិលសុត្ត

បុច្ឆា – ចេតោខិលសុត្តំ បនាវុសោ ភគវតា កត្ថ កំ អារព្ភ ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ ភាសិតំ.

វនបត្ថសុត្ត

បុច្ឆា – វនបត្ថសុត្តំ បនាវុសោ ភគវតា កត្ថ កំ អារព្ភ ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ ភាសិតំ.

មធុបិណ្ឌិកសុត្ត

បុច្ឆា – មធុបិណ្ឌិកសុត្តំ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សក្កេសុ ភន្តេ ទណ្ឌបាណិំ សក្កំ អារព្ភ ភាសិតំ, ទណ្ឌបាណិ ភន្តេ សក្កោ ភគវន្តំ ឧបសង្កមិត្វា ឯតទវោច ‘‘កិំ វាទី សមណោ កិមក្ខាយី’’តិ, តស្មិំ ភន្តេ វត្ថុស្មិំ ភាសិតំ.

ទ្វេធាវិតក្កសុត្ត

បុច្ឆា – ទ្វេធាវិតក្កសុត្តំ បនាវុសោ ភគវតា កត្ថ កំ អារព្ភ ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ ភាសិតំ.

វិតក្កសណ្ឋានសុត្ត

បុច្ឆា – វិតក្កសណ្ឋានសុត្តំ បនាវុសោ ភគវតា កត្ថ កំ អារព្ភ ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ ភាសិតំ.

កកចូបមសុត្ត

បុច្ឆា – តេនាវុសោ ភគវតា…បេ… សម្មាសម្ពុទ្ធេន កកចូបមសុត្តំ កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សាវត្ថិយំ ភន្តេ អាយស្មន្តំ មោឡិយផគ្គុនំ អារព្ភ ភាសិតំ, អាយស្មា ភន្តេ មោឡិយផគ្គុនោ ភិក្ខុនីហិ សទ្ធិំ អតិវេលំ សំសដ្ឋោ វិហរតិ, តស្មិំ ភន្តេ វត្ថុស្មិំ ភាសិតំ.

បុច្ឆា – អថ ខោ អាវុសោ អាយស្មតោ មោឡិយផគ្គុនស្ស តំ ភគវតោ ឱវាទំ សុត្វា កថំ ចិត្តំ ឧប្បន្នំ, កថញ្ជ ភគវា ឧត្តរិ ភិក្ខូន ឱវាទមទាសិ.

វិស្សជ្ជនា – អថ ខោ ភន្តេ មោឡិយផគ្គុនស្ស ភគវតោ ឥមំ ឱវាទំ សុត្វា ភិក្ខុនិសំសគ្គតោ ឱរមិស្សាមិ វិរមិស្សាមីតិបិ ចិត្តំ ន ឧប្បន្នំ, អសំវរមេវ ភន្តេ ចិត្តំ ឧប្បន្នំ, ភគវា ច ភន្តេ អារាធយិំសុ វត មេ ភិក្ខវេ ភិក្ខូ ឯកំ សមយំ ចិត្តំ, ឯវមាទិនា ឧត្តរិ ភិក្ខូនំ ឱវាទមទាសិ.

ឧភតោ ទណ្ឌកេន ចេបិ ភិក្ខវេ កកចេន ចោរា ឱចរកា អង្គមង្គានិ ឱកន្តេយ្យុំ.

អលគទ្ទូបមសុត្ត

បុច្ឆា – អលគទ្ទូបមសុត្តំ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សាវត្ថិយំ ភន្តេ អរិដ្ឋំ ភិក្ខុំ គទ្ធពាធិបុព្ពំ អារព្ភ ភាសិតំ, អរិដ្ឋស្ស ភន្តេ ភិក្ខុនោ គទ្ធពាធិបុព្ពស្ស ឯវរូបំ បាបកំ ទិដ្ឋិគតំ ឧប្បន្នំ ‘‘តថាហំ ភគវតា ធម្មំ ទេសិតំ អាជាទាមិ, យថា យេមេ អន្តរាយិកា ធម្មា វុត្តា ភគវតា, តេ បដិសេវតោ នាលំ អន្តរាយាយា’’តិ, តស្មិំ ភន្តេ វត្ថុស្មិំ ភាសិតំ.

បុច្ឆា – អថ ខោ អាវុសោ អាយស្មតោ អរិដ្ឋស្ស គទ្ធពាធិបុព្ពស្ស កថំ ចេតសោ បរិវិតក្កោ ឧទបាទិ, កថញ្ច ភគវា ឧត្តរិ ភិក្ខុនំ ធម្មទេសនំ បវត្តេសិ.

វិស្សជ្ជនា – អថ ខោ ភន្តេ អរិដ្ឋស្ស ភិក្ខុនោ គទ្ធពាធិបុព្ពស្ស ‘‘កិញ្ចាបិ មំ ភគវា មោឃបុរិសវាទេន វទេសិ, ន ខោ បន មេ មគ្គផលានំ ឧបនិស្សយោ ន ហោតិ, ស្វាហំ អារភិត្វា ឃដ្ដេត្វា មគ្គផលានិ និព្ពត្តេស្សាមី’’តិ, ឯវំ ខោ ភន្តេ ចេតសោ បរិវិតក្កោ ឧទបាទិ, ភគវា ច ភន្តេ ទុប្បញ្ញស្ស អលគទ្ទូបមំ ទស្សេត្វា អលគទ្ទូបមំ បរិយត្តិញ្ច ទស្សេត្វា បញ្ញវតោ អលគទ្ទូបមាយ ច កុល្លូបមាយ ច បញ្ញវតោ និស្សរណបរិយត្តិំ ទស្សេត្វា ឆ ច ទិដ្ឋិដ្ឋានានិ, តេសញ្ច ឆន្នំ ទិដ្ឋិដ្ឋានានំ វិនិវេឋនាការំ ទស្សេត្វា បរិយោសានេ ច ខន្ធកម្មដ្ឋានំ អរហត្តនិកូដេន ទស្សេត្វា ឧត្តរិ ភិក្ខូនំ ធម្មកថំ បវត្តេសិ.

វម្មិកសុត្ត

បុច្ឆា – ធម្មិកសុត្តំ បនាវុសោ ភគវតា កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សាវត្ថិយំ ភន្តេ អាយស្មន្តំ កុមារកស្សបំ អារព្ភ ភាសិតំ. អាយស្មា ភន្តេ កុមារកស្សបោ ភគវន្តំ ឧបសង្កមិត្វា វម្មិកបញ្ហំ បុច្ឆិ, តស្មិំ ភន្តេ វត្ថុស្មិំ ភាសិតំ.

រថវិនីតសុត្ត

បុច្ឆា – រថវិនីតសុត្តំ បនាវុសោ កត្ថ កេន ភាសិតំ.

វិស្សជ្ជនា – សាវត្ថិយំ ភន្តេ អាយស្មតា ច សារិបុត្តត្ថេរេន ធម្មសេនាបតិនា អាយស្មតា ច បុណ្ណេន មន្តាណិបុត្តេន អញ្ញមញ្ញំ បុច្ឆាវិស្សជ្ជនវសេន ភាសិតំ.

និវាបសុត្ត

បុច្ឆា – និវាបសុត្តំ បនាវុសោ ភគវតា កត្ថ កំ អារព្ភ ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ ភាសិតំ.

បុច្ឆា – ឥមស្មិំ អាវុសោ សុត្តេ កោ និវាបោ កោ នេវាបិកោ កា នេវាបិកបរិសា កា មិគជាតា កថញ្ចេតិស្សា ឧបមាយ អត្ថោ ទដ្ឋព្ពោ.

វិស្សជ្ជនា – ឥមស្មិំ ភន្តេ សុត្តេ និវាបោតិ ខោ ភន្តេ បញ្ចន្នេតំ កាមគុណានំ អធិវចនំ, នេវាបិកោតិ ខោ ភន្តេ មារស្សេតំ បាបិមតោ អធិវចនំ, នេវាបិកបរិសាតិ ខោ ភន្តេ មារបរិសាយេតំ អធិវចនំ, មិគជាតាតិ ខោ ភន្តេ សមណព្រាហ្មណានមេតំ អធិវចនំ, ឥមស្មិំ ភន្តេ សុត្តេ ឯតស្ស អត្ថោ ឯវំ ទដ្ឋព្ពោ.

បាសរាសិសុត្ត

បុច្ឆា – កេនាវុសោ ភគវតា…បេ… សម្មាសម្ពុទ្ធេន បាសរាសិសុត្តំ កត្ថ កំ អារព្ភ កិស្មិំ វត្ថុស្មិំ ភាសិតំ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ ភាសិតំ, សម្ពហុលា ភន្តេ ភិក្ខូ រម្មកស្ស ព្រាហ្មណស្ស អស្សមេ ភគវន្តំ អារព្ភ ធម្មិយា កថាយ សន្និសីទិំសុ, តស្មិំ ភន្តេ វត្ថុស្មិំ ភាសិតំ.

បុច្ឆា – អថ ខោ អាវុសោ តេសំ សម្ពហុលានំ ភិក្ខូនំ ធម្មិយា កថាយ សន្និសិន្នានំ កីទិសំ ធម្មកថំ កថេសិ.

វិស្សជ្ជនា – សាធុ ភិក្ខវេ ឯតំ ខោ ភិក្ខវេ តុម្ហាកំ បតិរូបំ កុលបុត្តានំ សទ្ធា អគារស្មា អនគារិយំ បព្ពជិតានំ, យំ តុម្ហេ ធម្មិយា កថាយ សន្និសីទេយ្យាថ, សន្និបតិតានំ វោ ភិក្ខវេ ទ្វយំ ករណីយំ ធម្មី វា កថា អរិយោ វា តុណ្ហីភាវោ. ទ្វេមា ភិក្ខវេ បរិយេសនា អរិយា ច បរិយេសនា អនរិយា ច បរិយេសនា. ឯវមាទិនា ភន្តេ ភគវា សន្និបតិតានំ តេសំ ភិក្ខូនំ អរិយបរិយេសនញ្ច អនរិយបរិយេសនញ្ច វិភជិត្វា ទេសេសិ.

បុច្ឆា – កថញ្ចាវុសោ ភគវា អត្តនាបិ អនរិយបរិយេសនំ បហាយ អរិយបរិយេសនាយ បរិយេសិតភាវំ បកាសេសិ.

វិស្សជ្ជនា – អហម្បិ សុទំ ភិក្ខវេ បុព្ពេវ សម្ពោធា អនភិសម្ពុទ្ធោ ពោធិសត្តោវ សមានោ អត្តនា ជាតិធម្មោ សមានោ ជាតិធម្មំយេវ បរិយេសាមិ, អត្តនា ជរាធម្មោ ព្យាធិធម្មោ មរណធម្មោ សោកធម្មោ សំកិលេសធម្មោ សមានោ សំកិលេសធម្មំយេវ បរិយេសាមិ. ឯវមាទិនា ភន្តេ ភគវា អត្តនាបិ អនរិយបរិយេសនំ បហាយ អរិយបរិយេសនាយ បរិយេសិតភាវំ បកាសេសិ.

បុច្ឆា – ឯវំ បឋមាភិសម្ពុទ្ធស្ស អាវុសោ ភគវតោ អជបាលនិគ្រោធរុក្ខមូលេ និសិន្នស្ស ធម្មទេសនាយ កតសន្និដ្ឋានស្ស កីទិសោ

ចេតសោ បរិវិតក្កោ ឧទបាទិ, កថញ្ច ធម្មទេសនាយ ចារិកា អហោសិ, កថញ្ច បឋមា ធម្មទេសនា អហោសិ.

វិស្សជ្ជនា – ‘‘កស្ស នុ ខោ អហំ បឋមំ ធម្មំ ទេសេយ្យំ, កោ ឥមំ ធម្មំ ខិប្បមេវ អាជានិស្សតី’’តិ ឯវំ ខោ ភន្តេ ភគវតោ បឋមាភិសម្ពុទ្ធស្ស អជបាលនិគ្រោធមូលេ ធម្មទេសនាយ កតសន្និដ្ឋានស្ស បរិវិតក្កោ ឧទបាទិ, អថ ភន្តេ ភគវា ឧរុវេលាយំ យថាភិរន្តំ វិហរិត្វា យេន ពារាណសី, តេន បទសាយេវ ចារិកំ បក្កាមិ ធម្មទេសនាយ, ទ្វេមេ ភិក្ខវេ អន្តា បព្ពជិតេន ន សេវិតព្ពា, កតមេ ទ្វេ, យោ ចាយំ កាមេសុ កាមសុខល្លិកានុយោគោ ហីនោ គាម្មោ បោថុជ្ជនិកោ អនរិយោ អនត្តសំហិតោ, ឯវមាទិនា ភន្តេ ភគវតោ បឋមា ធម្មទេសនា អហោសិ.

សព្ពាភិភូ សព្ពវិទូហមស្មិ,

សព្ពធម្មេសុ អនូបលិត្តោ;

សព្ពញ្ជហោ តណ្ហាក្ខយេ វិមុត្តោ,

សយំ អភិញ្ញាយ កមុទ្ទិសេយ្យំ.

បុច្ឆា – កថញ្ចាវុសោ ភគវា បាសរាសិឧបមាយ តំ ទេសនំ បរិនិដ្ឋាបេសិ.

វិស្សជ្ជនា – បញ្ចិមេ ភិក្ខវេ កាមគុណា, កតមេ បញ្ច, ចក្ខុវិញ្ញេយ្យា រូបា ឥដ្ឋា កន្តា មនាបា បិយរូបា កាមូបសំហិតា រជនីយា. សោតវិញ្ញេយ្យា សទ្ទា. ឃានវិញ្ញេយ្យា គន្ធា. ជិវ្ហាវិញ្ញេយ្យា រសា. កាយវិញ្ញេយ្យា ផោដ្ឋព្ពា ឥដ្ឋា កន្តា មនាបា បិយរូបា កាមូបសំហិតា រជនីយា. ឥមេ ខោ ភិក្ខវេ បញ្ច កាមគុណា. យេ ហិ កេចិ ភិក្ខវេ សមណា វា ព្រាហ្មណា វា ឥមេ កាមគុណេ គថិតា មុច្ឆិតា អជ្ឈោបន្នា អនាទីនវទស្សាវិនោ អនិស្សរណបញ្ញា បរិភុញ្ជន្តិ, តេ ឯវមស្សុ វេទិតព្ពា ‘‘អនយមាបន្នា ព្យាសនមាបន្នា យថាកាមករណីយា បាបិមតោ’’, ឯវមាទិនា ភន្តេ ភគវា បាសរាសិឧបមាយ ធម្មទេសនំ បរិនិដ្ឋាបេសិ.

ចូឡហត្ថិបទោបមសុត្ត