៣៥. ឆដ្ឋី ចា+នាទរេ

យស្ស ភាវោ ភាវន្តរស្ស លក្ខណំ ភវតិ, តតោ ឆដ្ឋី ហោតិ សត្តមី ចា+នាទរេ គម្យមានេ. អកាមកានំ មាតាបិតូនំ រុទន្តានំ បព្ពជិ, មាតាបិតូសុ រុទន្តេសុ វា. ‘‘អាកោដយន្តោ សោ នេតិ, សិវិរាជស្ស បេក្ខតេ’’, ‘‘មច្ចុ អាទាយ គច្ឆតិ, បេក្ខមានេ មហាជនេ’’.

គុន្នំ សាមីតិ សម្ពន្ធេ ឆដ្ឋី, គោសុ សាមីតិ វិសយសត្តមី. ឯវំ គុន្នមិស្សរោ, គោស្វិ+ស្សរោ, គុន្នំ អធិបតិ, គោសុ អធិបតិ, គុន្នំ ទាយាទោ, គោសុ ទាយាទោ, គុន្នំ សក្ខី, គោសុ សក្ខី, គុន្នំ បតិភូ, គោសុ បតិភូ, គុន្នំ បសុតោ, គោសុ បសុតោ, កុសលា នច្ចគីតស្ស, កុសលា នច្ចគីតេ, អាយុត្តោ កដករណស្ស, អាយុត្តោ កដករណេ. តថា អាធារវចនិច្ឆាយំ សត្តមី, ភិក្ខូសុ អភិវាទេន្តិ, មុទ្ធនិ ចុម្ពិត្វា, ពាហាសុ គហេត្វា, ហត្ថេសុ បិណ្ឌាយ ចរន្តិ, កទលីសុ គជេ រក្ខន្តិ, ញាណស្មិំ បសន្នោ, ញាណស្មិំ ឧស្សុក្កោតិ វិសយសត្តមី.