នមោ តស្ស ភគវតោ អរហតោ សម្មាសម្ពុទ្ធស្ស

នមក្ការបាឡិ

១. សុគតំ សុគតំ សេដ្ឋំ, កុសលំកុសលំ ជហំ;

អមតំ អមតំ សន្តំ, អសមំ អសមំ ទទំ.

សរណំ សរណំ លោកំ, អរណំ អរណំ ករំ;

អភយំ អភយំ ឋានំ, នាយកំ នាយកំ នមេ.

២. នយនសុភគកាយង្គំ,

មធុរវរសរោបេតំ;

អមិតគុណគណាធារំ,

ទសពលមតុលំ វន្ទេ.

៣. យោ ពុទ្ធោ ធិតិមាញ្ញធារកោ,

សំសារេ អនុភោសិ កាយិកំ;

ទុក្ខំ ចេតសិកញ្ច លោកតោ,

តំ វន្ទេ នរទេវមង្គលំ.

៤. ពាត្តិំសតិលក្ខណចិត្រទេហំ,

ទេហជ្ជុតិនិគ្គតបជ្ជលន្តំ;

បញ្ញាធិតិសីលគុណោឃវិន្ទំ,

វន្ទេ មុនិមន្តិមជាតិយុត្តំ.

៥. បាតោទយំ ពាលទិវាករំវ,

មជ្ឈេ យតីនំ លលិតំ សិរីហិ;

បុណ្ណិន្ទុសង្កាសមុខំ អនេជំ,

វន្ទាមិ សព្ពញ្ញុមហំ មុនិន្ទំ.

៦. ឧបេតបុញ្ញោ វរពោធិមូលេ,

សសេនមារំ សុគតោ ជិនិត្វា;

អពោជ្ឈិ ពោធិំ អរុណោទយម្ហិ,

នមាមិ តំ មារជិនំ អភង្គំ.

៧. រាគាទិឆេទាមលញាណខគ្គំ,

សតីសមញ្ញាផលកាភិគាហំ;

សីលោឃលង្ការវិភូសិតំ តំ,

នមាមិភិញ្ញាវរមិទ្ធុបេតំ.

៨. ទយាលយំ សព្ពធិ ទុក្ករំ ករំ,

ភវណ្ណវាតិក្កមមគ្គតំ គតំ;

តិលោកនាថំ សុសមាហិតំ ហិតំ,

សមន្តចក្ខុំ បណមាមិ តំមិតំ.

៩. តហិំ តហិំ បារមិសញ្ចយំ ចយំ,

គតំ គតំ សព្ភិ សុខប្បទំ បទំ;

នរានរានំ សុខសម្ភវំ ភវំ,

នមានមានំ ជិនបុង្គវំ គវំ.

១០. មគ្គង្គនាវំ មុនិទក្ខនាវិកោ,

ឦហាផិយំ ញាណករេន គាហកោ;

អារុយ្ហ យោ តាយ ពហូ ភវណ្ណវា,

តារេសិ តំ ពុទ្ធមឃប្បហំ នមេ.

១១. សមតិំសតិបារមិសម្ភរណំ,

វរពោធិទុមេ ចតុសច្ចទសំ;

វរមិទ្ធិគតំ នរទេវហិតំ,

តិភវូបសមំ បណមាមិ ជិនំ.

១២. សតបុញ្ញជលក្ខណិកំ វិរជំ,

គគនូបមធិំ ធិតិមេរុសមំ;

ជលជូបមសីតលសីលយុតំ,

បថវីសហនំ បណមាមិ ជិនំ.

១៣. យោ ពុទ្ធោ សុមតិ ទិវេ ទិវាករោវ,

សោភន្តោ រតិជននេ សិលាសនម្ហិ;

អាសីនោ សិវសុខទំ អទេសិ ធម្មំ,

ទេវានំ តមសទិសំ នមាមិ និច្ចំ.

១៤. យោ បាទបង្កជមុទុត្តលរាជិកេហិ,

លោកេហិ តីហិវិកលេហិ និរាកុលេហិ;

សម្បាបុណេ និរុបមេយ្យតមេវ នាថោ,

តំ សព្ពលោកមហិតំ អសមំ នមាមិ.

១៥. ពុទ្ធំ នរានរសមោសរណំ ធិតត្តំ,

បញ្ញាបទីបជុតិយា វិហតន្ធការំ;

អត្ថាភិកាមនរទេវហិតាវហំ តំ,

វន្ទាមិ ការុណិកមគ្គមនន្តញាណំ.

១៦. អខិលគុណនិធានោ យោ មុនិន្ទោបគន្ត្វា,

វនមិសិបតនវ្ហំ សញ្ញតានំ និកេតំ;

តហិមកុសលឆេទំ ធម្មចក្កំ បវត្តោ,

តមតុលមភិកន្តំ វន្ទនេយ្យំ នមាមិ.

១៧. សុចិបរិវារិតំ សុរុចិរប្បភាហិ រត្តំ,

សិរិវិសរាលយំ គុបិតមិន្ទ្រិយេហុបេតំ;

រវិសសិមណ្ឌលប្បភុតិលក្ខណោបចិត្តំ,

សុរនរបូជិតំ សុគតមាទរំ នមាមិ.

១៨. មគ្គោឡុម្បេន មុហបដិឃាសាទិឧល្លោលវីចិំ,

សំសារោឃំ តរិ តមភយំ បារបត្តំ បជានំ;

តាណំ លេណំ អសមសរណំ ឯកតិត្ថំ បតិដ្ឋំ,

បុញ្ញក្ខេត្តំ បរមសុខទំ ធម្មរាជំ នមាមិ.

១៩. កណ្ឌម្ពំមូលេ បរហិតករោ យោ មុនិន្ទោ និសិន្នោ,

អច្ឆេរំ សីឃំ នយនសុភគំ អាកុលណ្ណគ្គិជាលំ;

ទុជ្ជាលទ្ធំសំ មុនិភិជហិតំ បាដិហេរំ អកាសិ,

វន្ទេ តំ សេដ្ឋំ បរមរតិជំ ឥទ្ធិធម្មេហុបេតំ.

២០. មុនិន្ទក្កោ យ្វេកោ ទយុទយរុណោ ញាណវិត្ថិណ្ណពិម្ពោ,

វិនេយ្យប្បាណោឃំ កមលកថិតំ ធម្មរំសីវរេហិ;

សុពោធេសី សុទ្ធេ តិភវកុហរេ ព្យាបិតក្កិត្តិនញ្ច,

តិលោកេកច្ចក្ខុំ ទុខមសហនំ តំ មហេសិំ នមាមិ.

២១. យោ ជិនោ អនេកជាតិយំ សបុត្តទារមង្គជីវិតម្បិ,

ពោធិបេមតោ អលគ្គមានសោ អទាសិយេវ អត្ថិកស្ស;

ទានបារមិំ តតោ បរំ អបូរិ សីលបារមាទិកម្បិ,

តាសមិទ្ធិយោបយាតមគ្គតំ តមេកទីបកំ នមាមិ.

២២. ទេវាទេវាតិទេវំ និធនវបុធរំ មារភង្គំ អភង្គំ,

ទីបំ ទីបំ បជានំ ជយវរសយនេ ពោធិបត្តំធិបត្តំ;

ព្រហ្មាព្រហ្មាគតានំ វរគិរកថិកំ បាបហីនំ បហីនំ,

លោកាលោកាភិរាមំ សតតមភិនមេ តំ មុនិន្ទំ មុនិន្ទំ.

២៣. ពុទ្ធោ និគ្រោធពិម្ពោ មុទុករចរណោ ព្រហ្មឃោសេណិជង្ឃោ,

កោសច្ឆាទង្គជាតោ បុនរបិ សុគតោ សុប្បតិដ្ឋិតបាទោ;

មូទោទាតុណ្ណលោមោ អថមបិ សុគតោ ព្រហ្មុជុគ្គត្តភាវោ,

នីលក្ខី ទីឃបណ្ហី សុខុមមលឆវី ថោម្យរសគ្គសគ្គី.

២៤. ចត្តាលីសគ្គទន្តោ សមកលបនជោ អន្តរំសប្បបីនោ,

ចក្កេនង្កិតបាទោ អវិរឡទសនោ មារជុស្សង្ខបាទោ.

តិដ្ឋន្តោ នោនមន្តោភយករមុទុនា ជណ្ណុកានាមសន្តោ,

វដ្ដក្ខន្ធោ ជិនោ គោតរុណបខុមកោ សីហបុព្ពឌ្ឍកាយោ.

២៥. សត្តប្បីនោ ច ទីឃង្គុលិ មថ សុគតោ លោមកូបេកលោមោ,

សម្បន្នោទាតទាឋោ កនកសមតចោ នីលមុទ្ធគ្គលោមោ.

សម្ពុទ្ធោ ថូលជិវ្ហោ អថ សីហហនុកោ ជាលិកប្បាទហត្ថោ,

នាថោ ឧណ្ហីសសីសោ ឥតិគុណសហិតំ តំ មហេសិំ នមាមិ.

២៦. ពុទ្ធោពុទ្ធោតិឃោសោ អតិទុលភតរោ កា កថា ពុទ្ធភាវោ,

លោកេ តស្មា វិភាវី វិវិធហិតសុខំ សាធវោ បត្ថយន្តា.

ឥដ្ឋំ អត្ថំ វហន្តំ សុរនរមហិតំ និព្ភយំ ទក្ខិណេយ្យំ,

លោកានំ នន្ទិវឌ្ឍំ ទសពលមសមំ តំ នមស្សន្តុ និច្ចំ.

២៧. បុញ្ញេនេតេន សោហំ និបុណមតិ សតោ សម្បរាយេ ច តិត្តោ,

ទក្ខោ ទិដ្ឋុជ្ជុបញ្ញោ អវិកលវីរិយោ ភោគវា សំវិភាគី.

តិក្ខោ សូរោ ធិតត្តោ សបរហិតចរោ ទីឃជីវី អរោគោ,

ធញ្ញោ វណ្ណោ យសស្សី អតិពលវធរោ កិត្តិមា ខន្តុបេតោ.

២៨. សទ្ធោ ទាតង្គុបេតោ បរមសិរិធរោ ទិដ្ឋធម្មេ វិរត្តោ,

លជ្ជី កល្យាណមិត្តោ អភិរតកុសលោ បញ្ចសីលាទិរក្ខោ.

អប្បិច្ឆោ អប្បកោធោ អតិវុជុហទយោ ឥទ្ធិមា អប្បមេយ្យោ,

បាសំសោ បេមវាចោ សុជនគុណវិទូ មាមកោ សោ ភវេយ្យំ.

២៩. ឥត្ថំ អសង្ខយេ នាថ, គុណេ លក្ខណទីបិតេ;

គាថាសុ សូចកាស្វេក, គាថម្បិ សរតេ ពុធោ.

៣០. ចតុរាបាយមុត្តោ សោ, សាធកត្ថទ្វយស្ស ច;

ហតូបទ្ទវជាលោ ច, លាភី ហិតសុខស្ស ច.

៣១. អធិបោ នរទេវានំ, ចតុទីបិស្សរោបិ វា;

ភវេយ្យ អន្តិមេ ទេហេ, តមញ្ញំ សេតឆត្តកំ.

៣២. ភាវនាយានមារុយ្ហ, សមមេស្សតិ សុព្ពតោ;

ឥមស្មិំ អត្តភាវេបិ, អរោគោ ទីឃជីវិកោ.

៣៣. បូជិតោ សព្ពលោកេហិ, ភាវនាភិរតីមនោ;

ជនប្បិយោ មនាបោ ច, កា កថាខិលធារណេ.

នមក្ការបាឡិ និដ្ឋិតា.

នមក្ការដីកា

នមោ តស្ស ភគវតោ អរហតោ សម្មាសម្ពុទ្ធស្ស

១. សុគតន្ត្យាទិវណ្ណេហិ, បសត្ថញ្ច សុខទ្ទទំ;

វន្ទន្តានំ ជិនំ នត្វា, ធម្មំ សុទ្ធំ គណុត្តមំ.

២. នមក្ការំ ហិតត្ថីហិ, បោរាណាចរិយេហិ ច;

លិខិត្វា ឋបិតំ បុញ្ញ, ពុទ្ធិយា តេន វន្ទិនំ.

៣. តស្សត្ថវណ្ណនំ កស្សំ, គម្ភីរត្ថសុពោធនំ;

មោវិបុនាមេន សន្តេន, សីលុបេតេន យាចិតោ.

៤. វណ្ណន្តោបិ ច តស្សត្ថំ, តំ តំ អដ្ឋកថាទិសុ;

វុត្តញាយេន កស្សាមិ, សទ្ធា សុណាថ សាធវោ.

៥. នមនំ នមតីតី វា, នមតី តេន វា នមោ;

តស្ស ការោន្តិ តាហីតិ, នមក្ការោតិ វុច្ចតិ.

៦. តញ្ច ពុទ្ធឃោសាចរិ, យេន បុព្ពសុតំ កតំ;

ពុទ្ធឃោសុប្បត្តិយញ្ច, តំ តំ បន កថាទិសុ.

៧. ន ទិដ្ឋំ កតការណំ, តស្មា ហិតត្ថិកេហិ ច;

បោរាណាចរិយេហី ច, ឋបិតន្តិ មយា វុត្តំ;

តំ ការណំ វិញ្ញូហី ច, វិចារេត្វា វិជានិតន្តិ.

១. សុគតំ សុគតំ សេដ្ឋំ, កុសលំកុសលំ ជហំ;

អមតំ អមតំ សន្តំ, អសមំ អសមំ ទទំ.

សរណំ សរណំ លោកំ, អរណំ អរណំ ករំ;

អភយំ អភយំ ឋានំ, នាយកំ នាយកំ នមេ.

១. [ក] ឥទានិ បឋមំ តាវ សុគតន្ត្យាទីហិ អដ្ឋារសហិ គុណេហិ ថោមេត្វា ពុទ្ធស្ស វន្ទិតុកាមេន សុគតន្តិអាទិ គាថាទ្វយំ អារទ្ធំ. អយំ បន សព្ពបាទាទិយមកបថ្យា វត្តគាថាតិ ទដ្ឋព្ពំ. តំ បន យមកំ សុពោធាលង្ការេ កិលិដ្ឋទោសន្តិ វុត្តំ.

វុត្តញ្ហិ តត្ថ –

‘‘យំ កិលិដ្ឋបទំ មន្ទា, ភិធេយ្យំ យមកាទិកំ;

កិលិដ្ឋបទទោសេវ, តម្បិ អន្តោ ករីយតី’’តិ.