សត្តម បរិច្ឆេទ

វិជយាភិសេកោ

១. សព្ពលោកហីតំ កត្វា, បត្វា សន្តិករំ បទំ;

បរិនិព្ពានមញ្ចម្ហិ, និបន្នោ លោកនាយកោ.

២. ទេវតាសន្និបាតម្ហិ, មហន្តម្ហិ មហាមុនិ;

សក្ក តត្រសមីបដ្ឋំ, អវោច វទតំ វរោ.

៣. វិជយោ លាឡាវិសយា, សីហពាហុនរិន្ទជោ;

ឯសលង្កាធនុបត្តោ, សត្តភច្ចសតានុគោ.

៤. បតិដ្ឋហិស្សតិ ទេវិន្ទំ, លំកាយំ មម សាសនំ;

តស្មា សបរិវារំ តំ, រក្ខលំកញ្ច សាធុកំ.

៥. តថាគតស្ស ទេវិន្ទោ, វចោ សុត្វាវ សាទរោ;

ទេវស្សុប្បលវណ្ណស្ស, លំការក្ខំ សមប្បយិ.

៦. សក្កេន វុត្តមត្តោសោ, លង្កាមាគម្មសជ្ជុកំ;

បរិព្ពាជក វេសេន, រុក្ខមូល មូបវិសិំ.

៧. វិជយសម្មុខា សព្ពេ,

តំ ឧបច្ច អបុច្ឆិសុំ;

អយំ ភោ កោនុ ទីបោតី,

លំកាទីបោតិ សោ ព្រវិ.

៨. ន សន្តិ មនុជា ហេត្ថ, ន ច ហេស្សតិ វោ ភយំ;

ឥតិ វត្វា កុណ្ឌីកាយ, តេ ជលេន និសិញ្ចិយ.

៩. សុត្តញ្ច តេសំ ហត្ថេសុ, លគេត្វានភសា’គមា;

ទស្សេសិ សោណិរូបេន, បរិវារិកយក្ខិនី.

១០. ឯកោ តំ វារិយន្តោបិ, រាជបុត្តេន អន្វគា;

គាមម្ហិ វិជ្ជមានម្ហិ, ភវន្តិ សុនខា ឥតិ.

១១. តស្សា ច សាមីនី តត្ថ, កុវេណីនាម យក្ខិនី;

និសីទិ រុក្ខមូលម្ហិ, កន្តន្តិ តាបសី វិយ.

១២. ទិស្វាន សោ បោក្ខរណី, និសិន្នំ តញ្ច តាបសិំ;

តត្ថ ន្ហាត្វា បិវិត្វា ច, អាទាយ ច មុលាលិយោ.

១៣. វារិញ្ច បោក្ខរេហេវ, វុដ្ឋាសិ សាតមព្រវិ;

ភក្ខោ’សិ មម តិដ្ឋាតិ, អដ្ឋា ពទ្ធោ វសោ នរោ.

១៤. បរិត្តសុត្ត តេជេន, ភក្ខិតុំ សា ន សក្កុណី;

យាចិយន្តោបិ តំ សុត្តំ, នា’ទាយក្ខិនិយា នរោ.

១៥. តំ គហេត្វា សុរុង្គាយំ, រុទន្តំ យក្ខិនី ខិបិ;

ឯវំ ឯកេកសោ តត្ថ, ខិបី សត្តសតានិបិ.

១៦. អនាយន្តេសុ សព្ពេសុ, វិជយោ ភយសំកិតោ;

នន្តបញ្ចាយុធោ គន្ត្វា, ទិស្វា បោក្ខរណិំ សុភំ.

១៧. អបស្ស មុត្តិណ្ណបទំ, បស្សំ តញ្ចេវ តាបសិំ;

‘‘ឥមាយ ខលុ ភច្ចា មេ, គហិតានុ’’តិ ចិន្តិយ.

១៨. កិំ ន បស្សសិ ភច្ចេ មេ,

ហោតិ ត្វំ ឥតិ អាហតំ;

‘‘កិំ រាជបុត្ត ភច្ចេហិ,

បិវ នហាយា’’តិ អាហសា.

១៩. យក្ខិនី តាវ ជានាតិ, មម ជាតិន្តិ និច្ឆិតោ;

សង្ឃំ សនាមំ សាវេត្វា, ធនុំ សន្ធាយុ’ បាគតោ.

២០. យក្ខិំ អាទាយ គីវាយ, នារា ច វលយេន សោ;

វាមហត្ថេន កេសេសុ, គហេត្វា ទក្ខិណេ ន តុ.

២១. ឧក្ខិបិត្វា អសិំអាហ, ‘‘ភច្ចេ មេ ទេហិ ទាសិតំ;

មារេមី’’តិ ភយដ្ដាសា, ជីវិតំ យាចិ យក្ខិនី.

២២. ជីវិតំ ទេហិ មេ សាមិ, រជ្ជំ ទជ្ជាមិ តេ អហំ;

ករិស្សមិ’ត្តិ កិច្ចញ្ច, កិច្ចំ អញ្ញំ យថិច្ឆិតំ.

២៣. អទុព្ភាត្ថាយ សបថំ, សោ តំ យក្ខិំ អការយិ;

‘‘អានេហិ ភច្ចេ សីឃ’’ន្តិ, វុត្តមត្តាវ សា’នយិ.

២៤. ‘‘ឥមេ ជាតា’’តិ វុត្តាសា,

តណ្ឌុលាទិំ វិនិទ្ទិសិ;

ភក្ខិតានំ វាណិជានំ,

នាវដ្ឋំ វិវិខំ ពហុំ.

២៥. ភច្ចា តេ សាធយិត្វាន, ភត្តានិ ព្យញ្ជនានិច;

រាជា បុត្តំ ភោជយិត្វា, សព្ពេចាបិ អភុញ្ជិសុំ.

២៦. ទាបិតំ វិជយេន’គ្គំ, យក្ខី ភុញ្ជិយ បីណិតា;

សោឡសវស្សិកំ រូបំ, មាបយិត្វា មនោហរំ.

២៧. រាជបុត្ត មុបគញ្ឆិ, សព្ពាភរណភូសិតា;

មាបេសិ រុក្ខមូលស្មិំ, សយនញ្ច មហារហំ.

២៨. សាណិយា សុបរិក្ខិត្តំ, វិតានសមលង្កតំ;

តំ ទិស្វា រាជតនយោ, បេក្ខំ អត្ថមនាគតំ.

២៩. កត្វាន តាយនាវាយំ, និបជ្ជ សយនេ សុខំ;

សាណី បរិក្ខិបិត្វាន, សព្ពេ ភច្ចា និបជ្ជិសុំ.

៣០. រត្តិំ តូរិយសទ្ទញ្ច, សុត្វា គីតរវញ្ច សោ;

អបុច្ឆិ សហសេមានំ, កិំ សទ្ទោ ឥតិ យក្ខិនិំ.

៣១. រជ្ជញ្ច សាមិនោ ទេយ្យំ, សព្ពេ យក្ខេ ច ឃាតិយ;

មនុស្សា វាសករណា, យក្ខា មំ ឃាតយន្តិហិ.

៣២. ឥតិ ចិន្តិយ យក្ខី សា, អព្រវិ រាជនន្ទនំ;

សីរីសវត្ថុនា មេតំ, សាមិ យក្ខបុរំ ឥធ.

៣៣. តត្ថ ជេដ្ឋស្ស យក្ខស្ស, លំកានគរវាសិនី;

កុមារិកា ឥធា’នីតា, តស្សា មាតា ច អាគតា.

៣៤. អាវាហ មង្គលេ តត្ថ, ឥធាបិ ឧស្សវេ មហា;

វត្តតេ តត្ថ សទ្ទោយំ, មហាហេស សមាគមោ.

៣៥. អជ្ជេវ យក្ខេ ឃាតេហិ,

ន ហិ សក្ខា ឥតោ បរំ;

សោ អាហា’ទិស្ស មានេតេ,

ឃាតេស្សាមិ កថំ អហំ.

៣៦. យត្ថ សទ្ទំ ករិស្សាម, តេន សទ្ទេន ឃាតយ;

អាយុធំ មេ’នុភាវេន, តេសំ កាយេ បតិស្សតិ.

៣៧. តស្សា សុត្វា តថា កត្វា, សព្ពេ យក្ខេ អឃាតយិ;

សយម្បិ លទ្ធវិជយោ, យក្ខរាជ បសាធនំ.

៣៨. បសាធនេហិ សេសេហិ, តំតំ ភច្ចំ បសាធយិ;

កតិបហំ វសិត្វេ’ត្ថ, តម្ពបណ្ណិមុបាគមិ.

៣៩. មាបយិត្វា តម្បបណ្ណិ-នគរំ វិជយោ តហិំ;

វសី យក្ខិនិយា សទ្ធិំ, អមច្ច បរិវារិតោ.

៤០. នាវាយ ភូមិមោតិណ្ណា, វិជយបមុខា តទា;

កិលន្តា បាណិនាភូមិំ, អាលម្ពិយ និសីទិសុំ.

៤១. តម្ពភូមិរជោផុដ្ឋោ, តម្ពោបាណិ យតោ អហុំ;

សោ ទេសោចេវ ទីបោ ច, តេន តន្នាមកោ អហុ.

៤២. សីហពាហុ នរិន្ទោ សោ, សីហមាទិន្នវា ឥតិ;

សីហឡោ តេន សម្ពន្ធា, ឯតេ សព្ពេបិ សីហឡា.

៤៣. តត្ថ តត្ថ ច គាមេ តេ, តស្សា’មច្ចា និវេសយុំ;

អនុរាធគាមំ តន្នាមោ, កទម្ព នទីយន្តិកេ.

៤៤. គម្ភីរនទីយា តីរេ, ឧបតិស្សោ បុរោហិតោ;

ឧបតិស្សគាមំ មាបេសិ, អនុរាធស្ស ឧត្តរេ.

៤៥. អញ្ញេ តយោ អមច្ចា តេ, មាបយិំសុ វិសុំ វិសុំ;

ឧជ្ជេនិំ ឧរុវេលញ្ច, វិជិតំ នគរំ តថា.

៤៦. និវាសេត្វា ជនបទំ, សព្ពេ’មច្ចា សមច្ចតំ;

អវោចុំ រាជតនយា, សាមិ រជ្ជេភិសេចយ.

៤៧. ឥតិ វុត្តោ រាជបុត្តោ, ន ឥច្ឆិ អភិសេចនំ;

វិនា ខត្តិយកញ្ញាយ, អភិសេកំ មហេសិយា.

៤៨. អថាមច្ចា សាមិនោ ហេ, អភិសេក កតា ទរា;

ទុក្ករេសុបិ កិច្ចេសុ, តទត្ថភិរុតា តិគា.

៤៩. បណ្ណាការេ មហាសារេ, មណិមុត្តាទិកេ ពហូ;

គាហាបយិត្វា បាហេសុំ, ទក្ខិណំ មធុរំ បុរំ.

៥០. បណ្ឌុរាជស្ស ធីតត្ថំ, សាមិនោ សាមិភត្តិនោ;

អញ្ញេសំ ចាបិ ធីតត្ថំ, អមច្ចានំ ជនស្ស ច.

៥១. សីឃំ នាវាយ គន្ត្វាន, ទូតា តេ មធុរំ បុរំ;

បណ្ណាការេ ច លេខញ្ច, តស្ស រញ្ញោ អទស្សយុំ.

៥២. តតោ រាជាអមច្ចេហិ, មន្តយិត្វា សធីតរំ;

បាហេតុកាមោ’មច្ចានំ, អញ្ញេសំ ចាបិ ធីតរោ.

៥៣. លទ្ធា ឩនសតំ កញ្ញា, អថភេរិំ ចរាបយិ;

លំកាយ ធីតុគមនំ, ឥច្ឆមានា នរា ឥធ.

៥៤. និវាសយិត្វា ទិគុណំ, ឃរទ្វារេសុ ធីតរោ;

ឋបេន្តុ តេន លិង្គេន, អាទីយិស្សាមិតា ឥតិ.

៥៥. ឯវំ លទ្ធា ពហូកញ្ញា, តប្បយិត្វាន តំ កុលំ;

សម្បន្នសព្ពាលង្ការំ, ធីតរំ សម្បដិច្ឆទំ.

៥៦. សព្ពា តា លទ្ធសក្ការា, កញ្ញាយោ ច យថារហំ;

រាជារហេ ច ហត្ថស្ស-រថបេស្សិយ ការកេ.

៥៧. អដ្ឋារសន្នំ សេណីនំ, សហស្សញ្ច កុលានិ សោ;

លេខំ ទត្វាន បេសេសិ, វិជយស្ស ជិតា’រិនោ.

៥៨. សព្ពោសោ’តរី នាវាហិ, មហាតិត្ថេ មហាជនោ;

តេនេវ បដ្ដនំ តញ្ហិ, មហាតិត្ថំតិ វុច្ចតិ.

៥៩. វិជយស្ស សុតោធីតា, តស្សា យក្ខិនិយា អហុ;

រាជកញ្ញាគមំ សុត្វា, វិជយោ អាហ យក្ខិនិំ.

៦០. ‘‘គច្ឆ ទានិ តុវំ ភោតិ, ឋបេត្វា បុត្តកេ ទុវេ;

មនុស្សា អមនុស្សេហិ, ភាយិន្តីហិ សទា’’ ឥតិ.

៦១. សុត្វា តំ យក្ខភយតោ, ភីតំ តំ អាហ យក្ខិនិំ;

មា ចិន្តយិ សាហស្សេន, ទាបយិស្សាមិ តេ ពលិំ.

៦២. បុនប្បុនំ តំ យាចិត្វា, ឧភោ អាទាយ បុត្តកេ;

ភីតាបិ សា អគតិយា, លំកាបុរមុបាគមិ.

៦៣. បុត្តេ ពិហិ និសីទេត្វា, សយំ បាវិសិ តំ បុរំ;

សញ្ជានិត្វាន តំ យក្ខិំ, ភីតា ចោរីតិ សញ្ញិតោ.

៦៤. សំខុភិំសុ បុរេ យក្ខា, ឯកោ សាហសិកោ បន;

ឯកបាណិប្បហារេន, វិលយំ នយិ យក្ខិនិំ.

៦៥. តស្សាតុ មាតុលោ យក្ខោ, និក្ខម្ម នគរា ពហិ;

ទិស្វា តេ ទារកេ បុច្ឆិ, តុម្ហេ កស្ស សុតា ឥតិ.

៦៦. កុវេណិយា’តិ សុត្វា’ហ, មាតា វោ មារិតា ឥធ;

តុម្ហេបិ ទិស្វា មារេយ្យុំ, បលាយថ លហុំ ឥតិ.

៦៧. អាគុំ សុមនកូដំ តេ, បលាយិត្វា តតោ លហុំ;

វាសំ កប្បេសិ ជេដ្ឋោ សោ, វុទ្ធោ តាយ កណិដ្ឋិយា.

៦៨. បុត្តធីតាហិ វឌ្ឍិត្វា, រាជានុញ្ញាយ តេ វសុំ;

តត្ថេវ មលយេ ឯសោ, បុលិន្ទានញ្ហិ សម្ភវោ.

៦៩. បណ្ឌុរាជស្ស ទូតា តេ, បណ្ណាការំ សមប្បយុំ;

វិជយស្ស កុមារស្ស, រាជាធិការិកា ច តា.

៧០. កត្វា សក្ការសម្មានំ, ទូតានំ វិជយោ បន;

អទា យាថារហំ កញ្ញា, អមច្ចានំ ជនស្ស ច.