សដ្ឋិម បរិច្ឆេទ

កុមារោទយោ

១. រោហណេ និវសិត្ថា’វ, ជយពាហុមហីបតិ;

មិត្តាវ្ហា រាជិនី ចេវ, តទា កាលមកំសុ តេ.

២. សិរីវល្លភជាយា’ថ, ជនេសិ សុគលា ទុវេ;

មាណភរណកំ បុត្តំ, បុត្តិំ លីលាវតិម្បិ ច.

៣. មាណាភរណភូបាល-ទេវី’បិ រតនាវលី;

មិត្តំ បភាវតិញ្ចាបិ, អលភី ធីតរោ ទុវេ.

៤. បស្សន្តស្ស ឧភោ តាយោ, ធីតរោ វីរពាហុនោ;

តទា មហាទិបាទស្ស, ឯវំ អាសិ វិតក្កិតំ.

៥. លោកាភិសម្មតេ សព្ព-ភូបាលន្វយមុទ្ធនិ;

វិសុទ្ធេ សោមវំសម្ហិ, អភិជាតា មយំ បន.

៦. បិហនីយតរាការា, សព្ពសត្តិសមុន្នតា;

នានាវិជ្ជាសុ និបុណា, ហត្ថិអស្សាទិសុក្ខមា.

៧. តថា បេកាកិនា វេ’តេ, តយោ វិក្កមពាហុនា;

បរាជយំ បរិភវំ, បាបិតា ពហុសោ រណេ.

៨. សូនុនោ សុសមត្ថស្ស, វិសោធេតុ មិមំ មលំ;

ន ទិស្សតេ បាតុភាវោ, អហោ នោ អប្បបុញ្ញតា.

៩. ជនវាទកិលិដ្ឋេន, រាជត្តេនាបិ កិំ មម;

ឥទានិ វិសយាសង្គំ, ហិត្វា កល្យាណកម្មសុ.

១០. អប្បមត្តស្ស សតតំ, នេតព្ពា វាសរា’ឥតិ;

និយ្យាតេត្វា អមច្ចានំ, សព្ពំ រជ្ជវិចារណំ.

១១. តហិំ សត្ត’ដ្ឋមាសញ្ហិ, វសំ រត្តិយមេកទា;

ទេវរាជឃរេសេយ្យំ, កប្បេសិ សីលសំយតោ.

១២. តតោ បច្ចូសកាលម្ហិ, ទេវបុត្តំ មហិទ្ធិកំ;

វិចិត្តវត្ថាភរណំ, គន្ធមាលាវិភូសិតំ.

១៣. ឧឡារតររូបេន, ទេហោភាសេន អត្តនោ;

ឱភាសេន្តំ អសេសា’សា, សូរិយញ្ច ន ភុគ្គតំ.

១៤. វទន្តំ សុបិនេ ឯវំ, អទក្ខិ ទរណីបតិ;

បសីទស្សុ មហាភាគ, បិតោភវ មហិបតិ.

១៥. ធញ្ញលក្ខណសម្បន្នោ, ឥច្ឆិតត្ថស្សសាធកោ;

វិនីតោ លោកកុហរ-ព្យាបិតេជោ បរក្កមោ.

១៦. អាណពលយសោកិត្តិ-ភាសុរោ សគ្គុណាករោ;

លោកសាសនសំវុទ្ធិ-ករោ បុត្តវរោ តវ.

១៧. លព្ភីស្សតេ មហារាជ, ន ចិរស្សេវ សម្បតិ;

បុត្តទារាធិវុត្ថំ តំ, បុរំ ខិប្បំ បយាហីតិ.

១៨. បពុជ្ឈិត្វាន សញ្ជាត-បីតិវេគោថ រត្តិយា;

វិភាតាយ តតោបោង្ខ-គាមំ គញ្ឆិនរុត្តមោ.

១៩. យថា ទិដ្ឋប្បការន្តំ, កថេសិ សុបិនំ សុភំ;

មហេសី បមុខានំ សោ, អមច្ចានំ មហីបតិ.

២០. សទ្ធិំ មហេសិយា តត្ថ, បត្ថេន្តោ បុត្តមុត្តមំ;

ចិន្តោន្តោ ទានសីលាទិំ, សុភំ នានប្បការកំ.

២១. អថេកទិវសំកាលេ, បច្ចូសេ សុបិនេ បន;

សព្ពលក្ខណសម្បន្នំ, សព្ពសេតំ មនោហរំ.

២២. ទន្តីបោតវរំ ទន្តំ, កណ្ណេ គណិយបេមតោ;

បវិសន្តមិវត្តានំ, សេយ្យាគព្ភំ មហេសិយា.

២៣. សម្បស្សិយ បពុជ្ឈិត្វា, ឧដ្ឋាយ សយនាវរា;

សញ្ជាតបីតិបាមោជ្ជ-វេគបីណិតមានសោ.

២៤. តាយំ វេលាយមេទាសុ-សេយ្យាគព្ភំ មហេសិយា;

បវិស្សសុបិនំ តស្សា, យថាទិដ្ឋំ បកាសយី.

២៥. អហម្បិ តាទិសំ ហត្ថិ-បោតកំ សយនំ មម;

បទក្ខិណំ ករិត្វាន, ឋិតំ សោណ្ឌេ សមាទិយ.

២៦. អាកឌ្ឍិត្វាន សយនំ, សមារោបិយ បេមតោ;

អាលិង្គិំ សុបិនម្ហីតិ, ទេវី ចាបិ តមព្រវី.

២៧. ឧភោ តេ អញ្ញមញ្ញស្ស, ទិដ្ឋមេវំ បកាសិយ;

ឧដ្ឋាបេសុំ បហដ្ឋាវ, វីតនិទ្ទារុណំ តទា.

២៨. តតោ បាតោ ឧបដ្ឋាតុ, មុបយាតំ បុរោហិតំ;

នេមិត្តកេ ច បុច្ឆិំសុ, សុនិត្វា តេ បមោទិតា.

២៩. ន ចិរស្សេវ បុត្តស្ស, ធញ្ញលក្ខណសាលិនោ;

ឧប្បត្តិយា អវស្សំ’វ, ភវំតព្ពន្តិ កិត្តយុំ.

៣០. តំ សុណិត្វា អមច្ចា ច, តថា នគរវាសិនោ;

អវិន្ទិំសុ ជនិន្ទោ ច, សព្ពេបីតិ មហុស្សវំ.

៣១. តតោ បដ្ឋាយ សោត្ថានំ, បត្ថយំ បត្ថិវោភុសំ;

ភិក្ខុសង្ឃេន ពហុសោ, ភណាបេសិ បរិត្តកំ.

៣២. មណិមុត្តាទិកំ ចិត្តំ, មហគ្ឃមនុវាសរំ;

បរិច្ចជិ ទានមុខេ, យាចកានមនេកសោ.

៣៣. បុរោហិតាទិវិប្បេហិ, វេទវេទង្គវិញ្ញូហិ;

វត្តាបេសិ ច ហោមាទិ-វិធានំ សោត្ថិ សម្មតំ.

៣៤. សុវិនដ្ឋេ វិហារេ ច, ធាតុគព្ភេ ច វាបិយោ;

ជិណ្ណា ច បដិសង្ខត្តុំ, យោជយី រាជកប្បិកេ.

៣៥. ទិនំ នយន្តេ កល្យាណ-កម្មេនេ’វំ នរិស្សរេ;

ន ចិរំ សណ្ឋហិ គព្ភ-វរោ កុច្ឆិម្ហិ ទេវិយា.

៣៦. តតោវគម្ម តំ ហដ្ឋ-បហដ្ឋោ សោ នរិស្សរោ;

មហន្តំ ទេវិយា គព្ភ-បរិហារមទាបយិ.

៣៧. បរិបក្កគព្ភា ទេវី, កមេន ជនយីសុកំ;

សមយេ ភទ្ទនក្ខត្ត-មុហុត្តេនភិលក្ខិតេ.

៣៨. សុប្បសន្នា អសេសា ច, ទិសាយោ តំខណេ អហុ;

សមីរណេ ច វាសិំសុ, សុគន្ធិមុទុសីតលា.

៣៩. ទន្តីនំ កោញ្ចនាទេន, ហយានំ ហេសិតេន ច;

រាជង្គណំ តទាជាតំ, មហាកោលាហលា កូលំ.

៤០. អច្ឆេរាតិសយេ ឯវំ, បាតុភូតេ អនេកធា;

ទិស្វា តំ វិម្ហយប្បត្តោ, មាណភរណភូបតិ.

៤១. សុត្វា និជស្ស បុត្តស្ស, តទា សញ្ជាតសាសនំ;

អមតេនាភិសិត្តោវ, បីតិបុណ្ណមនោរថោ.

៤២. មោចាបេត្វា តទា ការា-ឃរេ ពទ្ធេ ពហូជនេ;

ទានំ ឧឡារំ សមណ-ព្រាហ្មណានំ បទាបយិ.

៤៣. អមច្ចបមុខា ចាបិ, ជនាបុរនិវាសិនោ;

កទលីតោរណាទីហិ, រាជធានី មនេកធា.

៤៤. អលង្ករិត្វា សកលំ, សុមណ្ឌិតបសាធិតា;

ឆណំ មហន្តំ វត្តេសុំ, កតិបាហំ មនោរមំ.

៤៥. វេទេ វុត្តវិធានេន, ជាតកម្មាទិកំ វិធិំ;

សព្ពំ សមាបយិត្វាន, កុមារស្សា’វនីបតិ.

៤៦. បុរោហិតាទយោ វិប្បេ, តតោ លក្ខណបាឋកេ;

អាណាបេត្វាន សក្ការ-សម្មានវិធិបុព្ពកំ.

៤៧. និយោជេសិ កុមារស្ស, លក្ខណានំ បដិគ្គហេ;

សាធកំ សកលំ តស្ស, យត្ថបាទាទិលក្ខណំ.

៤៨. ឧបធារិយ មហាមច្ច-គណមជ្ឈគតស្ស តេ;

រាជិនោ ទេវិយា ចាបិ, បកាសេសុំ បមោទិតា.

៤៩. លង្កាទីបំ ឋបេត្វាន, ជម្ពុទីបតលម្បិ ច;

ឯកច្ឆត្តង្កិតំ កត្វា-នុភោត្តុំ និបុណោ ឥតិ.

៥០. តេ សន្តប្បិយ ភោគេហិ, ភិយ្យោ បុច្ឆិត្ថ សាទរំ;

សន្ទិស្សមានំ យំកិញ្ចិ, អរិដ្ឋំ អត្ថិ នត្ថី’តិ.

៥១. ទីឃាយុកោ កុមារោ’យំ, កិញ្ចិ បញ្ញាយតេ វត;

ជនការិដ្ឋយោគោ’តិ, តេ មហីបតិនោ’ព្រវុំ.

៥២. តស្សារិជនសម្មទ្ទិ-បតាបភុជយោ គតោ;

សោ បរក្កមពាហូ’តិ, អន្វត្ថនាមមគ្គហី.

៥៣. កណ្ណវេ ធមហញ្ចេវ, អន្នុបាសនមង្គលំ;

ការាបិយ វិធានញ្ញូ, យថាវិធិមសេសតោ.

៥៤. រញ្ញោ វិក្កមពាហុស្ស, សបុត្តុប្បត្តិសាសនំ;

វត្តុំ សទូតេ បេសេសិ, បុលត្ថិនគរំ តទា.

៥៥. តេហិសោ ភាគិនេយ្យស្ស, មហាភាគត្តនម្បិ ច;

ជនការិដ្ឋយោគញ្ច, សុត្វា វិក្កមពាហុសោ.

៥៦. ធញ្ញំ វិជយរាជាទិ-រាជមាលាយ នាយកំ;

មណិំវ ភាសុរំ មយ្ហំ, ភាគិនេយ្យំ ជនេសិសោ.

៥៧. ហានិ យាកាចិសតតំ, យថា តស្ស ន ហេស្សតិ;

តថា មមន្តិកេយេវ, កុមារោ ឯត្ថ វឌ្ឍតំ.

៥៨. អលទ្ធំ លភិតុំ លាភំ, លទ្ធញ្ច បរិរក្ខិតុំ;

សព្ពថា ន សមត្ថោយំ, បុត្តោ គជពាហុ មម.

៥៩. សូរភាវាទិយុត្តោ’បិ, មហិន្ទវ្ហបរោសុតោ;

និហីនោ មាតុគោត្តេន, ន រជ្ជស្ស រហោ មម.

៦០. ឋិតស្ស វិក្កជាតេន, នេកសោ សញ្ចិតេន មេ;

រជ្ជស្ស ភាគិនេយ្យោ’វ, កាមំ ភាគី ភវិស្សតិ.

៦១. ឥតិបេសេសិ ទូតេ សោ, អានេតុំ តំ កុមារកំ;

កុមារា ភរណំ ទត្វា, សេសំ សារញ្ចុបាយនំ.

៦២. សព្ពំ ទូតមុខា សុត្វា, វីរពាហុ មហីបតិ;

តស្សេតំ វចនំ យុត្តំ, វុត្តំ មេហិត ពុទ្ធិយា.

៦៣. តថាបិ ច និជារិដ្ឋ-បដិការត្ថមីទិសំ;

ឱរសំ បុត្តរតនំ, បេសេតុំ នា’នុរូបកំ.

៦៤. កិញ្ច តត្ថ កុមារម្ហិ, នីតេ វិក្កម ពាហុនោ;

បក្ខោ លទ្ធមហាវាហ-ពលោ វិយ ហុតាសនោ.

៦៥. អច្ចុន្នតេន មហតា, តេជសា សញ្ជលិស្សតិ;

ហានិរេវ វតម្ហាកំ, មហតី ហេស្សតេ ភុសំ.

៦៦. ឥតិ ហត្ថេ គតានំ សោ, ទូតានំ ថនយំ សកំ;

អបេសេត្វា វិសជ្ជេសិ, បសាទិយ មនេន សោ.

៦៧. សបុត្តទារេហិ សមគ្គវាសំ,

នរាទិនាថោ និវសំ តហិំសោ;

តិព្ពេន ផុដ្ឋោ មហតាគទេន,

រជ្ជេន សទ្ធិំ វិជហិត្ថ ទេសំ.

សុជនប្បសាទសំវេ គត្ថាយ កតេ មហាវំសេ

កុមារោទយោ នាម

សដ្ឋិមោ បរិច្ឆេទោ.